1-3. a) ¿Chuqui wen ñuc bʌ tsaʼ ujti cheʼ ti Pentecostés ti jabil 33? b) ¿Baqui bʌ tʼan tsaʼ tsʼʌctiyi ti jiñi bʌ qʼuin? (Qʼuele jiñi dibujo am bʌ tiʼ tejchibal).

JUMPʼEJLΛCH domingo cheʼ ti sʌcʼan yaʼ ti Jerusalén ti jabil 33. Jiñʌch jumpʼejl qʼuin wen ñuc bʌ come miʼ mejlel jiñi qʼuiñijel chaʼan Pentecostés. Miʼ mejlel ti jujumpʼejl jab cheʼ bʌ miʼ tejchel ti tujqʼuel jiñi trigo. Ti jiñi templo, jiñi ñuc bʌ motomaj ñaxan tsiʼ pulu cheʼ ti sʌcʼan jiñi majtañʌl ñʌmʌlʌch bʌ miʼ mejlel. Ti wiʼil, cheʼ bʌ ti a las 9 cheʼ ti sʌcʼan, tsiʼ yʌcʼʌ chaʼqʼuejl waj tsaʼ bʌ mejli yicʼot jiñi «ñaxan bʌ i wut» trigo tsaʼ bʌ lojti ti jiñi jabil. Jiñi xmotomaj miʼ jʌmtsʼun jiñi waj cheʼ bʌ miʼ caj i yʌcʼ tiʼ tojlel Jehová (Levítico 23:15-20).

² Añix 100 jab i cajel ti mejlel cheʼ bʌ miʼ yʌqʼuentel Jehová chaʼqʼuejl waj ti jujumpʼejl jab. Iliyi añʌch chuqui yom i yʌl muʼ bʌ i cajel ti talto bʌ qʼuin wen ñuc bʌ i cʼʌjñibal. Iliyi tsaʼ ujti ti jumpʼejl alʌ otot yaʼ ti Jerusalén cheʼ ti Pentecostés ti jabil 33 cheʼ bʌ yaʼan 120 xcʌntʼañob i chaʼan Jesús woliyob (choncolob) ti oración (Hechos 1:13-15). Ili tsaʼ bʌ ujti, tiʼ tsʼʌctesa jiñi añix bʌ 800 jab tsiʼ wʌn alʌ jiñi xʼaltʼan Joel (Joel 2:28-32; Hechos 2:16-21). ¿Chuqui tsaʼ ujti?

³ (Pejcan Hechos 2:2-4). Cheʼ ti Pentecostés ti jabil 33, jiñi 120 xcʌntʼañob i chaʼan Jesús tsaʼ bojñiyob ti chʼujul bʌ i yespíritu Dios  (Hechos 1:8) (qʼuele jiñi recuadro «¿Chuqui yom i yʌl?»). Ti wiʼil, ti jiñi jach bʌ qʼuin yaʼ baqui an jiñi xcʌntʼañob tsaʼ caji ti cʼotel cabʌl wiñicob xʼixicob (quixtañujob), jiñi xcʌntʼañob tsaʼ caji i yʌlob chuqui wen tac bʌ tsiʼ qʼueleyob yicʼot tsiʼ yubiyob. Jiñi apóstol Pedro tiʼ tsictesʌbe jiñi quixtañujob tsaʼ bʌ ujti yicʼot chucoch wen ñuc i cʼʌjñibal. Cheʼ jiñi tsiʼ yʌlʌ: «Cʌyʌ laʼ mul, chʼʌmʌla jaʼ ti jujuntiquiletla tiʼ cʼabaʼ Jesucristo, chaʼan miʼ ñusʌntel laʼ mul. Cheʼi mi caj laʼ wʌqʼuentel Chʼujul bʌ Espíritu ti laʼ majtan». Ti jiñi bʌ qʼuin, cheʼ bʌ 3,000 tsiʼ chʼʌmʌyob jaʼ yicʼot jiñi chʼujul bʌ espíritu (Hechos 2:37, 38, 41).

4. a) ¿Chucoch yom laj qʼuel ti ñuc jiñi tsaʼ bʌ ujti yaʼ ti Pentecostés cheʼ ti jabil 33? b) Cheʼ tiʼ yorajlel Moisés, ¿chuqui tajol tsaʼ ujti jaʼel ti jiñi bʌ qʼuin? (Qʼuele jiñi nota am bʌ tiʼ yujtibal ili temaj).

⁴ ¿Jiñi ñuc bʌ motomaj jiñʌch Jesucristo, i jiñi chaʼqʼuejl waj miʼ lajintel ti jiñi xcʌntʼañob i chaʼan Jesús bombiloʼ (yajcʌbiloʼ) bʌ ti espíritu. Ili tsaʼ bʌ yajcʌntiyob xmulilob jaʼel. Jiñi Biblia miʼ yʌl chaʼan lajalob bajcheʼ jiñi «ñaxan bʌ i wut» pʌcʼʌbʌl (Santiago 1:18, Jini wen bʌ tʼan). Dios tsiʼ chʼʌmʌ tiʼ yalobilob yicʼot tsiʼ yajca chaʼan miʼ chaʼleñob Yumʌntel yicʼot Jesús yaʼ ti panchan (1 Pedro 2:9). Jehová mi caj i cʼʌn ili yumʌntel chaʼan miʼ chʼʌm tilel wen utsʼatax bʌ tiʼ tojlel jiñi muʼ bʌ i jacʼbeñob i tʼan. Jin chaʼan, mi choncol lac pijtan chumtʌl ti Paraíso wʌʼ ti Pañimil o ti panchan, yom mi laj qʼuel ti ñuc ti lac pejtelel jiñi tsaʼ bʌ ujti ti Pentecostés ti jiñi jabil 33 ^[1] (qʼuele jiñi nota am bʌ tiʼ yujtibal ili temaj).

5. Cheʼ bʌ Dios miʼ bon juntiquil quixtañu ti chʼujul bʌ espíritu, ¿bajcheʼ la cujil chaʼan mach tiʼ pejtelelic ora miʼ yujtel chuqui wen ñuc bʌ?

⁵ Jiñi 120 xcʌntʼañob ti Jerusalén wen yujilob chaʼan ti jiñi bʌ qʼuin Dios tsaʼʌch i boñoyob ti chʼujul bʌ espíritu. Tiʼ pejtelelob tsaʼ yajli lajal bʌ bajcheʼ cʼajc yaʼ tiʼ jolob. Cheʼ jaʼel, tsaʼ mejliyob ti tʼan ti yan tac bʌ tʼan (Hechos 2:6-12). Pero cheʼ bʌ Dios miʼ bon ti chʼujul bʌ espíritu juntiquil, mach tiʼ pejtelelic ora miʼ yujtel chuqui wen ñuc bʌ. ¿Bajcheʼ la cujil? Jumpʼejl ejemplo, cheʼ bʌ Dios tsiʼ boño jeʼel jiñi yambʌ quixtañujob ti jiñi bʌ qʼuin, maʼañic miʼ yʌl jiñi Biblia mi tsaʼ yajli cʼajc tiʼ jolob. Dios tsiʼ boño tiʼ yespíritu jiñi quixtañujob cheʼ bʌ tsiʼ chʼʌmʌyob jaʼ (Hechos 2:38). Pero mach tiʼ pejtelelic jiñi xñoptʼañob miʼ bojñelob ti espíritu tiʼ yorajlel cheʼ bʌ miʼ chʼʌmob jaʼ. Jiñi xñoptʼañob ti Samaria wiʼil to tsaʼ bojñiyob cheʼ ti chʼʌmʌyob jaʼ (Hechos 8:14-17). Cornelio yicʼot añoʼ bʌ tiʼ yotot tsaʼ bojñiyob ti espíritu cheʼ maxto i chʼʌmʌyob jaʼ (Hechos 10:44-48).

6. a) ¿Chuqui miʼ yʌqʼuentelob jiñi bombiloʼ bʌ? b) ¿Bajcheʼ miʼ mel i yeʼtel jiñi espíritu tiʼ tojlelob?

⁶ An xñoptʼañob ti ora bʌ miʼ ñaʼtañob chaʼan yajcʌbilob ti Dios. Yañoʼ bʌ xucʼu xucʼul miʼ ñaʼtañob. Pero tiʼ pejtelelob an chuqui miʼ yʌqʼuentelob, mach yʌlʌyic baqui ora miʼ cʼotel i ñaʼtañob chaʼan bombilob. Jiñi apóstol Pablo tsiʼ yʌlʌ: «Cheʼ bʌ tsaʼ laʼ wubi jini wen tʼan, [...] tsaʼ laʼ ñopo Cristo. Tsaʼ otsʌbentiyetla jini Chʼujul bʌ Espíritu, jiñʌch laʼ sellojlel yilal tsaʼ bʌ tili cheʼ bajcheʼ wʌn albil. Aqʼuebilonla jini Espíritu chaʼan mi lac ñaʼtan tsʼʌcʌl mi caj lac chʼʌm tiʼ pejtelel chuqui wʌn albil i chaʼan Dios» (Efesios 1:13, 14). Jehová miʼ yʌqʼuen i yespíritu jiñi yajcʌbil bʌ i chaʼan. Pero ¿chuqui miʼ yujtel tiʼ tojlelob? Jiñi espíritu miʼ yʌqʼueñob i ñaʼtan chaʼan yajcʌbilobʌch chaʼan miʼ majlelob ti panchan. Jin chaʼan, Pablo tsiʼ yʌlʌ chaʼan jiñi espíritu jiñʌch i sellojlel muʼ bʌ i yʌqʼueñob i ñaʼtan chaʼan yaʼʌch mi caj i chumtʌlob ti panchan cheʼ ti talto bʌ qʼuin, mach wʌʼic ti Pañimil (pejcan 2 Corintios 1:21, 22; 5:5).

7. ¿Chuqui yom miʼ mel juntiquil bombil bʌ chaʼan miʼ majlel ti panchan?

⁷ Cheʼ bʌ Dios miʼ yajcan juntiquil xñoptʼan, mach jiñic yom i yʌl chaʼan muqʼuix caj i yoque majlel ti panchan. Miʼ mejlel lac ñop chaʼan Dios  tsaʼʌch i pʌyʌ chaʼan miʼ majlel ti panchan. Pero Pedro tsiʼ yʌlʌ: «Chaʼlenla wersa chaʼan miʼ wen tsictiyel pʌybiletla, yajcʌbiletla. Mi cheʼʌch mi laʼ mel, maʼanic mi caj laʼ yajlel. Maʼanic mi caj laʼ cʌy laʼ ñop. Cheʼ jini mi caj laʼ pʌjyel ochel tiʼ yumʌntel Dios mach bʌ anic miʼ jilel, yicʼot lac Yum Jesucristo, Xcoltaya lac chaʼan» (2 Pedro 1:10, 11). Jin chaʼan, ti jujuntiquil yom miʼ cʌntan i bʌ chaʼan chʌn xucʼul miʼ yajñel ti Jehová. Tsaʼ yajcʌnti chaʼan miʼ majlel ti panchan, pero cojach mi maʼañic miʼ mel muʼ bʌ i tsʼaʼlen Jehová (Hebreos 3:1; Apocalipsis 2:10).

8, 9. a) ¿Chucoch an hermanojob wocol bʌ miʼ chʼʌmbeñob isujm chuqui miʼ chaʼlen jiñi xñoptʼan muʼ bʌ i bojñel tiʼ yespíritu Dios? b) ¿Bajcheʼ miʼ ñaʼtan juntiquil xñoptʼan chaʼan yajcʌbil chaʼan miʼ majlel ti panchan?

⁸ Cabʌl hermanojob ti ili ora wocol miʼ chʼʌmbeñob isujm chuqui miʼ yujtel cheʼ bʌ Jehová miʼ bon juntiquil xñoptʼan ti chʼujul bʌ espíritu. Cheʼʌch miʼ yujtel come mach jiñobic woli (yʌquel) bʌ i yajcʌntelob ti Jehová chaʼan miʼ majlelob ti panchan. Dios maʼañic tsiʼ mele jiñi quixtañujob chaʼan miʼ majlelob ti panchan, chaʼañʌch miʼ chumtʌlob wʌʼ ti Pañimil (Génesis 1:28; Salmo 37:29). Pero Jehová añʌch majqui tsiʼ yajcayob chaʼan miʼ majlelob ti eʼtel (troñel) bajcheʼ reyob yicʼot bajcheʼ motomajob yaʼ ti panchan. Cheʼ bʌ Dios miʼ yajcañob tiʼ yespíritu, miʼ qʼuextañob i pensar. Cʼʌlʌl cheʼ jiñi, cojach miʼ pijtañob chumtʌl yaʼ ti panchan (pejcan Efesios 1:18).

⁹ Pero ¿bajcheʼ miʼ ñaʼtan juntiquil xñoptʼan chaʼan yajcʌbilʌch? Qʼuele tsaʼ bʌ i sube Pablo jiñi bombiloʼ bʌ xñoptʼan yaʼ ti Roma, jiñi pʌybiloʼ bʌ chaʼan miʼ ‹yochelob ti chʼujul›. Tsaʼ subentiyob: «Maʼañic tsaʼ aqʼuentiyetla espíritu muʼ bʌ i yotsañetla ti mozo chaʼan mi laʼ chaʼ ajñel tiʼ bʌqʼuen; Dios tsiʼ yʌqʼueyetla i yEspíritu, chaʼan mi laʼ wochel ti yalobil, jiñi chaʼañ mi la cʌl: ¡Abba, c Tat! Jiñi espíritu miʼ subeñonla ti lac pusicʼal chaʼañ i yalobilonla Dios» (Romanos 1:7; 8:15, 16, Jiñi tsijiʼ bʌ wen tañ chaʼañ estudio). Cheʼ bajcheʼ mi laj qʼuel, Dios miʼ cʼʌn i yespíritu chaʼan miʼ yʌqʼuen i ñaʼtan jiñi xñoptʼan chaʼan yajcʌbil chaʼan miʼ majlel ti yumʌntel yicʼot Jesús yaʼ ti panchan (1 Tesalonicenses 2:12).

10. Cheʼ bʌ 1 Juan 2:27 miʼ yʌl chaʼan jiñi bombiloʼ bʌ mach cʼʌñʌlic miʼ cʌntesʌntelob, ¿chuqui yom i yʌl?

¹⁰ Jiñi pʌybiloʼ bʌ ti panchan mach cʼʌñʌlic miʼ subentelob chaʼan yajcʌbilob ti Dios. Jehová miʼ yʌqʼueñob i ñaʼtan tiʼ pusicʼal. Jiñi apóstol Juan tsiʼ sube jiñi bombiloʼ bʌ: «Tsaʼix tili jini Chʼujul bʌ Espíritu ti laʼ tojlel. Jini chaʼan mi laʼ cʌmben i sujmlel ti laʼ pejtelel». Yicʼot tsiʼ yʌlʌ: «Tsaʼix aqʼuentiyetla jini Chʼujul bʌ Espíritu woli bʌ i chʌn ajñel ti jatetla. Jini chaʼan mach wersajic miʼ cʌntesañetla yambʌ» (1 Juan 2:20, 27). Ti lac pejtelel la com chaʼan mi laj cʌntesʌntel ti Jehová, cheʼ jaʼel jiñi bombiloʼ bʌ. Pero mach cʼʌñʌlic chaʼan jiñi bombiloʼ bʌ miʼ subentelob chaʼan yajcʌbilob ti Dios. Jehová miʼ cʼʌn chʼujul bʌ i yespíritu chaʼan ti jumpʼejl i pusicʼal miʼ ñopob, come maʼañic yambʌ ñumen pʼʌtʌl bʌ bajcheʼ i yespíritu Jehová.

11, 12. a) ¿Chuqui miʼ mejlel i cʼajtiben i bʌ juntiquil bombil bʌ? b) ¿Chuqui wen yujilob jiñi bombiloʼ bʌ?

¹¹ Cheʼ bʌ jiñi xñoptʼañob miʼ yajcʌntelob chaʼan miʼ majlelob ti panchan, miʼ wen qʼuextʌyelob. Jin chaʼan, Jesús tsiʼ yʌlʌ chaʼan miʼ chaʼ ilañob pañimil o miʼ qʼuextʌyel bajcheʼ yilalob (Juan 3:3, 5). Ti wiʼil tiʼ tsictesa: «Wersa yom mi laʼ chaʼ ilan pañimil. Jini icʼ miʼ ñumel majlel baqui jach yom. Jatet maʼ wubin icʼ, mach a wujilic baqui chʼoyol mi baqui miʼ majlel. Cheʼʌch jaʼel jini Espíritu ti jujuntiquil muʼ bʌ i chaʼ ilan pañimil» (Juan 3:7, 8). Cheʼ bajcheʼ mi laj qʼuel, mach cʼuñic ti tsictesʌbentel juntiquil mach bʌ bombilic bajcheʼ yubil miʼ yubin juntiquil bombil bʌ ^[2] (qʼuele jiñi nota am bʌ tiʼ yujtibal ili temaj).

 ¹² Juntiquil hermano bombil bʌ tajol miʼ cʼajtiben i bʌ cheʼ miʼ yubin chaʼan an yambʌ hermano tsaʼ bʌ yajcʌnti ti Jehová, chucoch jin tsaʼ yajcʌnti. Tajol miʼ ñaʼtan mi mucʼʌch caj i mejlel i tsʼʌctesan muʼ bʌ i cʼajtiben Jehová. Pero yujil chaʼan Jehová tsaʼʌch i yajca chaʼan miʼ chumtʌl ti panchan. Jin chaʼan wen tijicña miʼ yubin i bʌ yicʼot miʼ yʌqʼuen wocolix i yʌlʌ Jehová. Jiñi bombiloʼ bʌ lajal miʼ yubiñob bajcheʼ Pedro cheʼ bʌ tsiʼ yʌlʌ: «Laʼ sujbic i ñuclel Dios i Tat lac Yum Jesucristo, come cabʌl tsiʼ pʼuntayonla cheʼ bʌ tsiʼ yʌqʼueyonla lac chaʼ ilan pañimil chaʼañ jiñi cuxul bʌ lac pijtaya, chaʼañ tsaʼ chaʼ tejchi chʼojyel Jesucristo baʼañ chʌmeñoʼ bʌ. Come Dios mi caj i yʌqʼueñonla jiñi lotbebilon bʌ la ti panchan baʼ maʼañic miʼ jilel, baʼ maʼañic miʼ bibʼan baʼ maʼañic miʼ tsuculiyel» (1 Pedro 1:3, 4, Jiñi tsijiʼ bʌ wen tañ chaʼañ estudio). Cheʼ bʌ ili hermanojob miʼ pejcañob ili tʼan, miʼ ñopob chaʼan jiñʌch woliʼ pejcʌntelob ti Jehová.

13. a) ¿Bajcheʼ miʼ qʼuextʌyel i pensar juntiquil xñoptʼan cheʼ bʌ Dios miʼ bon ti chʼujul bʌ i yespíritu? b) ¿Chucoch miʼ qʼuextʌyel i pensar jiñi xñoptʼan?

¹³ Cheʼ bajcheʼ tsaʼ laj qʼuele, juntiquil xñoptʼan miʼ qʼuextan i pensar cheʼ bʌ Dios miʼ bon ti chʼujul bʌ i yespíritu. ¿Bajcheʼ? Cheʼ bʌ maxto pʌjyi chaʼan miʼ majlel ti panchan, tajol wʌʼʌch an i pijtaya chaʼan miʼ yajñel tiʼ pejtelel ora wʌʼ ti Pañimil. Tajol tsiʼ ñaʼta chaʼan mi caj i qʼuel cheʼ bʌ Jehová miʼ yʌqʼueñonla jiñi Paraíso yicʼot miʼ jisan jiñi jontolil. Tajol tsiʼ ñaʼta i chaʼ qʼuel cheʼ miʼ chaʼ tejchel i piʼʌlob o i yamigojob chʌmeñoʼ bʌ. Yicʼot tajol tsiʼ ñaʼta cheʼ mi caj i mel i yotot yicʼot i cʼux wut teʼ tac muʼ bʌ caj i pʌcʼ (Isaías 65:21-23). Pero tsiʼ luʼ qʼuexta i pensar cheʼ bʌ Jehová tsiʼ pʌyʌ chaʼan miʼ majlel ti panchan. ¿Chucoch? ¿Chaʼan ba tsiʼ wen taja i chʼijiyemlel o tsiʼ yila wocol? ¿Chaʼan ba tsaʼ waʼ cʼoti i sʌc ñaʼtan chaʼan mi caj i lujbʼan chumtʌl wʌʼ ti Pañimil i mi caj i jilel i tijicñʌyel? ¿O chaʼan ba cheʼ jach tsaʼ cʼoti i waʼ mulan majlel i qʼuel bajcheʼ yilal chumtʌl ti panchan? Maʼañic. Tsaʼ qʼuextʌyi i pensar come cheʼʌch tsaʼ cʼoti i ñaʼtan Jehová. Cheʼ bʌ Dios miʼ yajcan juntiquil chaʼan miʼ majlel ti panchan, miʼ cʼʌn chʼujul bʌ i yespíritu chaʼan miʼ qʼuextʌyel i pensar yicʼot i pijtaya.

14. ¿Bajcheʼ yilal miʼ qʼuelob i cuxtʌlel wʌʼ ti Pañimil jiñi bombiloʼ bʌ?

¹⁴ ¿Yom ba i yʌl iliyi chaʼan ti ora jach yomob chʌmel jiñi bombiloʼ bʌ chaʼan miʼ majlelob ti panchan? Maʼañic. Pablo tiʼ tsictesa bajcheʼ yubil miʼ yubiñob. Tsiʼ yʌlʌ: «Cheʼ wʌʼto añonla ti lac bʌcʼtal ila ti pañimil mi lac chaʼlen ajcʌn yicʼot tsic pusicʼal. Mach la comic lac chilbentel, pero la comix chumtʌl ti tsijiʼ bʌ lac bʌcʼtal chaʼan miʼ pʌntʌyel jini yujil bʌ chʌmel ti jini mach bʌ yujilic chʌmel, chaʼan cuxul mi la cajñel tiʼ pejtelel ora» (2 Corintios 5:4). Cheʼ bʌ Pablo tsiʼ yʌlʌ chaʼan mach yomobic miʼ chilbentelob i bʌcʼtal, yom i yʌl chaʼan jiñi bombiloʼ bʌ mach yomobic chʌmel. Tijicña cheʼ cuxulob i yom i cʼʌñob i cuxtʌlel tiʼ melol i yeʼtel Jehová yicʼotob i familia yicʼot i yamigojob. Miʼ cʼajtesañob chuqui albil i chaʼan Dios tiʼ tojlelob anquese chuqui jach choncol i melob (1 Corintios 15:53; 2 Pedro 1:4; 1 Juan 3:2, 3; Apocalipsis 20:6).

15. ¿Chuqui tac mach bʌ yomic i yʌl chaʼan bombilʌch juntiquil xñoptʼan?

¹⁵ Tajol maʼ cʼajtiben a bʌ mi pʌybilet i chaʼan Dios ti panchan. Mi cheʼʌch maʼ wubin, ñaʼtan ili cʼajtiya tac: ¿Muqʼuet ba ti subtʼan tiʼ pejtelel a chʼejlel maʼ wubin, wen yʌñʌl bʌ bajcheʼ yañoʼ bʌ? ¿Muʼ baʼ wen mulan a pejcan Biblia yicʼot maʼ cʌn «i sujmlel Dios wocol bʌ ti cʌñol»? (1 Corintios 2:10). ¿Muʼ baʼ wubin chaʼan añʌch bajcheʼ yʌñʌl miʼ coltañet Jehová ti a subtʼan? ¿A womʌch baʼ mel chuqui yom Dios tiʼ pejtelel a pʼʌtʌlel? ¿Muʼ baʼ wen cʼuxbin a wermañojob yicʼot maʼ wubin chaʼan yomʌch maʼ coltañob ti melol i yeʼtel Jehová? ¿Am baʼ qʼuele chaʼan añʌch cabʌl bajcheʼ coltʌbil i chaʼañet Dios? Mi tsaʼ jacʼʌ chaʼan cheʼʌchi, ¿yom ba i yʌl chaʼan bombilet jaʼel? Maʼañic, come cheʼʌch miʼ mejlel i yubiñob  jaʼel tiʼ pejtelel i wiñicob Dios anquese mach bombilobic. Jehová miʼ mejlel i cʼʌn i yespíritu chaʼan miʼ yʌqʼueñob i pʼʌtʌlel tiʼ pejtelel i wiñicob anquese wʌʼ mi caj i chumtʌlob wʌʼ ti Pañimil o mi caj i majlelob ti panchan. Cheʼ jaʼel, mi woli a cʼajtiben a bʌ chaʼan mi bombilet, yom i yʌl chaʼan mach cheʼiqui. Jiñi bombiloʼ bʌ maʼañic miʼ cʼajtibeñob i bʌ tiʼ bajñelil mi bombilob. Maʼañic miʼ wis alob tiʼ pusicʼal mi mach bombilobic, yujilob chaʼan cheʼʌchi.

16. ¿Bajcheʼ la cujil chaʼan mach tiʼ pejtelelic muʼ bʌ i yʌqʼuentelob chʼujul bʌ espíritu pʌybilob ti panchan?

¹⁶ Jiñi Biblia miʼ yʌl chaʼan cabʌl xucʼuloʼ bʌ ti Jehová tsaʼ aqʼuentiyob jiñi chʼujul bʌ espíritu, pero maʼañic tsaʼ majliyob ti panchan. Juntiquil jiñʌch Juan tsaʼ bʌ yʌcʼʌ chʼʌm jaʼ. Jesús tsiʼ yʌlʌ chaʼan jiñʌch juntiquil wiñic wen ñuc bʌ i cʼʌjñibal, pero tsiʼ yʌlʌ chaʼan maʼañic mi caj i majlel ti yumʌntel yaʼ ti panchan (Mateo 11:10, 11). Yambʌ ejemplo jiñʌch David. Tsiʼ taja i coltaya ti jiñi chʼujul bʌ espíritu (1 Samuel 16:13). Cheʼʌch tsaʼ mejli i chʼʌmben isujm jiñi wen mucul tac bʌ tiʼ tojlel Jehová yicʼot tiʼ tsʼijbu tʼoxol libro tac am bʌ ti Biblia (Marcos 12:36). Pero jiñi apóstol Pedro tsiʼ yʌlʌ chaʼan «maʼanic tsaʼ letsi majlel David ti panchan» (Hechos 2:34). Jehová tsiʼ cʼʌñʌ i yespíritu chaʼan miʼ melob chuqui wen ñuc tac bʌ, pero maʼañic tsiʼ cʼʌñʌ chaʼan miʼ pʌyob majlel ti panchan. ¿Yom ba i yʌl iliyi chaʼan mach xucʼulobic o chaʼan maʼañobic i cʼʌjñibal chaʼan miʼ majlelob ti panchan? Maʼañic. Yom i yʌl chaʼan Jehová mi caj i chaʼ cuxtesañob chaʼan miʼ chumtʌlob ti jumpʼejl Paraíso wʌʼ ti Pañimil (Juan 5:28, 29; Hechos 24:15).

17, 18. a) ¿Baqui mi caj i chumtʌlob lʌcʼʌl tiʼ pejtelel i wiñicob Dios? b) ¿Baqui bʌ cʼajtiya tac mi caj i jajqʼuel ti yambʌ temaj?

¹⁷ Yonlel muʼ bʌ i melbeñob i yeʼtel Jehová ti ili ora maʼañic mi caj i majlelob ti panchan. Wʌʼʌch woliʼ pijtañob wʌʼ ti Pañimil i yumʌntel Dios, lajal bajcheʼ Abraham, David, Juan tsaʼ bʌ yʌcʼʌ chʼʌm jaʼ, cheʼ bajcheʼ yambʌ wiñicob xʼixicob ti wajali (Hebreos 11:10). Mi caj i yajñelob 144 mil yumʌlob ti panchan chaʼan miʼ chaʼleñob yumʌl yicʼot Cristo. Pero jiñi Biblia miʼ yʌl chaʼan cojach miʼ caj ti cʌytʌl i «colobal» jiñi bombiloʼ bʌ wʌʼ ti Pañimil cheʼ ti cojix bʌ qʼuin (Apocalipsis 12:17, TNM). Cabʌl jiñi tsicbiloʼ bʌ ti jiñi 144 mil tsaʼix chʌmiyob i yaʼix añob ti panchan.

¹⁸ Pero mi juntiquil miʼ yʌl chaʼan yajcʌbil, ¿bajcheʼ yom miʼ qʼuelob jiñi xñoptʼañob añoʼ bʌ i pijtaya ila ti Pañimil? Mi yaʼ ti laj congregación an juntiquil muʼ bʌ i tech i cʼux jiñi caxlan waj yicʼot i jap jiñi vino cheʼ bʌ miʼ Cʼajtesʌntel i chʌmel Jesús, ¿bajcheʼ yilal yom mi laj qʼuel? Mi wolito i ñumen pʼojlel majlel jiñi muʼ bʌ i yʌlob chaʼan bombilob, ¿muʼ ba caj la cʼojoʼtan? Ili cʼajtiya tac mi caj i jajqʼuel ti yambʌ temaj.