Jiñi xñoptʼañob tsiʼ wen chʼʌmʌyob ti ñuc tsaʼ bʌ i yʌlʌ jiñi apóstol Pablo: «Com c mel lojon chuqui utsʼat». ¿Chuqui yom i yʌl ili tʼan?

Lʌcʼʌ ti lac pejtelel mi laj qʼuel lac bʌ ti espejo cheʼ mi caj lac loqʼuel ti xʌmbal. ¿Chucoch? Come la com qʼuejlel ti wen. Pero jiñi ñumen i cʼʌjñibal bʌ mach jiñic mi wen xibabil lac jol o mi utsʼat lac pislel. Tiʼ sujm, jiñi am bʌ ti lac pusicʼal miʼ mejlel i yʌcʼ chaʼan ñumen wen mi laj qʼuejlel bajcheʼ yilalonla o tajol maʼañic.

Jiñi Biblia tsiquil miʼ yʌl chaʼan i tilelʌch cheʼ mi lac mel chuqui mach bʌ weñic. Génesis 8:21 miʼ yʌl: «Jontol chuqui miʼ ñaʼtañob tiʼ pusicʼal cʼʌlʌ cheʼ chʼiton to». Mi la com lac mel chuqui utsʼat, yom mi lac chaʼlen wersa chaʼan maʼañic miʼ yʌsañonla jiñi mulil. Jiñi apóstol Pablo tsiʼ yʌlʌ bajcheʼ tsiʼ chaʼle wersa chaʼan miʼ mʌlben (jotben) jiñi mulil: «Tic pusicʼal mic wen mulan i mandar Dios. Pero mic ñaʼtan an yambʌ c pʌyol tic bʌcʼtal muʼ bʌ i contrajin jini com bʌ c mel tic pusicʼal. Miʼ yʌcʼon ti chujquel tiʼ pʼʌtʌlel mulil am bʌ tic bʌcʼtal» (Romanos 7:22, 23).

Jumpʼejl ejemplo, cheʼ bʌ añonla ti jumpʼejl wocol baqui tajol yom mi lac mel mach bʌ weñic, an ti lac wenta miʼ cʼotel lac ñaʼtan chaʼan maʼañic mi lac mel. Mach cʌchʌloñicla tiʼ melol mulil, joñon la cujil mi la com lac mel chuqui wem bʌ o mach bʌ weñic. Cheʼ maʼañic mi la cʌcʼ ti ochel jontol bʌ ti lac pensar, choncol lac yajcan lac mel chuqui utsʼat ti ili pañimil (mulawil) baqui mach bʌ cheʼiqui.

Yom jumpʼejl lac pusicʼal chaʼan miʼ mejlel lac mel chuqui utsʼat. Pero chʼijiyemtic jax cheʼ cabʌlob mach bʌ yomobic come ñumen i cʼʌjñibal i chaʼañob cheʼ miʼ qʼuejlelob ti wen. Miʼ cheʼ yomob, cojach miʼ yʌlob chucoch cheʼ tsiʼ meleyob bajcheʼ jiñi. Jiñi libro The (Honest) Truth About Dishonesty (Jiñi [wem bʌ] i sujmlel chaʼan jiñi mach bʌ utsʼatic) miʼ yʌl: «Ti isujm, jiñix to baqui jaxʌl mi lac ñop chaʼan utsʼat chuqui woli lac mel, mi lac chʌn chaʼlen lot». Pero ¿chuqui miʼ mejlel i coltañonla lac ñaʼtan mi yomʌch mi lac mel mach bʌ utsʼatic?

Tiʼ pejtelel pañimil, yonlel wiñicob xʼixicob (quixtañujob) an i qʼueleyob chaʼan jiñi Biblia jiñʌch wem bʌ laj coltʌntel. Jiñi i Tʼan Dios an i chaʼan mandar tac mach bʌ lajalic bajcheʼ yan tac bʌ chaʼan bajcheʼ yilal yomonla (Salmo 19:7). Miʼ yʌcʼ ticʼojel tac chaʼan bʌ familia, jiñi eʼtel (troñel), bajcheʼ yomonla yicʼot tiʼ chaʼan bʌ Dios. Maʼañic jilen i cʼʌjñibal jiñi i ticʼojel tac. Jiñi i mandar yicʼot i principio tac miʼ cʼʌjñibʌyel i chaʼan jiñi quixtañujob tiʼ pejtelel tejclum, alʌ lum tac yicʼot bajcheʼ  jach bʌ i colorlel i pʌchʌlelob. Mi caj laj cʌn lac mel chuqui utsʼat tiʼ pejtelel lac pusicʼal mi mucʼʌch lac wen pejcan jiñi Biblia, mi lac wen ñaʼtan muʼ bʌ i yʌl yicʼot mi mucʼʌch lac jacʼ.

Pero chaʼan mi lac mel chuqui utsʼat, mach jasʌlic mi laj cʌn jiñi Biblia come chumulonla ti ili pañimil baqui mi lac wersa subentel lac mel mach bʌ weñic. Chaʼan maʼañic mi lac yajlel tiʼ melol mach bʌ utsʼatic, yom mi laj cʼajtiben Dios ti oración chaʼan miʼ coltañonla (Filipenses 4:6, 7). Cheʼʌch mi caj lac taj lac chʼejlel chaʼan mi lac mel chuqui wen, i maʼañic mi caj lac chaʼlen lot.

Hitoshi, tsaʼ bʌ ajli yaʼ ti ñaxam bʌ temaj, tsiʼ taja cabʌl i wenlel cheʼ tsaʼ cʌjñi bajcheʼ wem bʌ xʼeʼtel come tsiʼ taja jumpʼejl eʼtel baqui miʼ wen chʼʌmob ti ñuc cheʼ maʼañic miʼ chaʼlen lot. Tsiʼ yʌlʌ: «Wen tijicña mi cubin c bʌ. Tsaʼ c taja jumpʼejl eʼtel baqui tijicña miʼ mejlel ti ajñel j conciencia».

Cheʼʌch tsaʼ ujti tiʼ tojlel yañoʼ bʌ jeʼel. Laʼ laj qʼuel chuqui ujtem tiʼ tojlel jiñi am bʌ i yʌcʼʌyob ti ñuc jiñi principio am bʌ ti Biblia, cheʼ bʌ miʼ yʌl laʼ lac «mel [...] chuqui utsʼat».

• Tijicña bʌ laj conciencia

  «Tsaʼ j cʌyʌ clase chaʼan mic chaʼlen eʼtel yicʼot jiñi ajxujchʼob cheʼ bʌ 13 c jabilel. Lʌcʼʌ tiʼ pejtelel jiñi c taqʼuin, tsaʼ c taja tiʼ melol mach bʌ weñic. Ti wiʼil tsaʼ ñujpuñiyon, cheʼ jiñi, joñon quicʼot c ñoxiʼal tsaʼ cajiyon lojon ti estudio chaʼan Biblia yicʼot i testigojob Jehová. Tsaʼ j cʌñʌ lojon chaʼan Jehová * miʼ tsʼaʼlen jiñi mach bʌ weñic, jin chaʼan tsaʼ c ñaʼta j qʼuextan lojon c melbal [Proverbios 6:16-19]. Tsaʼ c chʼʌmʌ lon jaʼ yicʼot tsaʼ sujtiyon lojon tiʼ testigo Jehová cheʼ ti 1990.

  Wajali, cabʌl chuqui an c chaʼan ti cotot xujchʼibil bʌ, pero wʌle maʼañix. Wʌle muqʼuix c mel chuqui utsʼat yicʼot tijicñayix an jiñi j conciencia. Cheʼ bʌ mij cʼajtesan baqui ora tsaʼ c chaʼle xujchʼ, mi cʌqʼuen wocolix i yʌlʌ Jehová chaʼan tsiʼ pʼuntayon. Cheʼ bʌ jajayajl muqʼuix caj c majlel ti wʌyel, cojach miʼ yʌqʼueñon c tijicñʌyel cheʼ cujil chaʼan Jehová tijicñayʌch yicʼoton» (Cheryl, Irlanda).

  «Cheʼ bʌ juntiquil quixtañu tsiʼ ñopo i yʌqʼueñon taqʼuin chaʼan mic chaʼlen lot, pero maʼañic tsaʼ c chʼʌmʌ, jiñi c yum ti troñel tsiʼ subeyon: ‹Tsaʼix i sujtesayet ti wem bʌ quixtañu jiñi a Dios. Weñʌch cheʼ wʌʼ choncolet ti troñel ilayi›. Wen miʼ yajñel j conciencia ti Jehová cheʼ mic mel chuqui utsʼat. Miʼ mejlel j coltan c familia yicʼot yañoʼ bʌ chaʼan cheʼ miʼ melob jaʼel» (Sonny, Hong Kong).

• Ñʌchʼtʌlel

  «xʼEʼtelon ti jumpʼejl banco am bʌ tiʼ pejtelel pañimil. I tilelʌch cheʼ maʼañix miʼ wen chʼʌjmel ti ñuc chaʼan miʼ mejlel chuqui utsʼat ti ili eʼtel, come cojach yom i ñumen tajob taqʼuin. An yonlel miʼ ñaʼtañob: ‹¿Chuqui i wocolel mi tsaʼ c tsʼitaʼ chaʼle lot, cheʼ muʼ tsaʼ c ñumen taj taqʼuin yicʼot miʼ ñumen tojʼan bajcheʼ chumulon?›. Miʼ yʌqʼueñon c ñʌchʼtʌlel cheʼ maʼañic mic chaʼlen lot. Maʼañic baqui ora mi caj c chaʼlen lot anquese an chuqui miʼ tilel tic tojlel. Yujilob jiñi c yum ti eʼtel chaʼan maʼañic baqui ora mi cac chaʼlen lot miʼ tsiʼ subeyoñob, mi muqʼuic caj c lotiñob jaʼel» (Tom, Estados Unidos).

• Mi laj qʼuejlel ti ñuc

  «Jiñi am bʌ tiʼ wenta eʼtel tsiʼ subeyon chaʼan mic chaʼlen lot chaʼan chuqui tsaʼ bʌ sajti, pero maʼañic tsaʼ c jacʼʌ. Cheʼ bʌ tsaʼ ñaʼtʌnti majqui jiñi xujchʼob, i yum jiñi empresa tsiʼ yʌqʼueyon wocolix cʌlʌ cheʼ maʼañic tsaʼ c chaʼle lot. Yom wen an lac chʼejlel chaʼan mi lac mel ti ili pañimil chuqui utsʼat bʌ. Pero ti wiʼil, mi laj qʼuejlel ti ñuc tiʼ tojlel yañoʼ bʌ» (Kaori, Japón).

Cheʼ mi lac mel chuqui utsʼat, tijicña laj conciencia, an ñʌchʼtʌlel yicʼot mi laj qʼuejlel ti ñuc. Tiʼ sujm, añʌch i wenlel mi cheʼ mi lac mel.