1, 2. a) ¿Chuqui tsiʼ yʌlʌ Jehová chaʼan chuqui miʼ cajel ti ujtel ti ili ora? b) ¿Baqui bʌ cʼajtiya tac mi caj i jajqʼuel ti ili temaj? (Qʼuele jiñi dibujo am bʌ tiʼ tejchibal).

JEHOVÁ tsiʼ yʌlʌ chaʼan ti ili ora, «10 wiñicob» yujiloʼ bʌ tiʼ pejtelel i tʼan jiñi tejclum tac mi caj i chucbeñob i bujc juntiquil «judío bʌ», i mi caj i yʌlob: «Mi caj c majlel lojon quicʼotetla, come tsaʼ cubi lojon chaʼan laʼ wicʼot Dios» (Zacarías 8:23). Jiñi «judío bʌ» yom i yʌl jiñi xñoptʼañob bombiloʼ (yajcʌbiloʼ) bʌ i chaʼan Dios ti chʼujul bʌ i yespíritu. Jiñi Biblia miʼ yʌl jaʼel chaʼan jiñobʌch «i chaʼañoʼ bʌ Dios» (Gálatas 6:16). Jiñi «10 wiñicob» yom i yʌl añoʼ bʌ i pijtaya chaʼan miʼ chumtʌlob wʌʼ ti Pañimil tiʼ pejtelel ora. ¿Chucoch yomob majlel yicʼot jiñi bombiloʼ bʌ? Come yujilob chaʼan ñopbilobʌch ti Jehová yicʼot jiñʌch ñuc bʌ majtañʌl miʼ yubiñob cheʼ bʌ temel miʼ chʼujutesañob Jehová yicʼotob.

² Cheʼ bajcheʼ Zacarías, Jesús tsiʼ yʌlʌ chaʼan temel mi caj i yajñel jiñi i wiñicob Dios. Jiñi añoʼ bʌ i pijtaya chaʼan miʼ chumtʌlob ti panchan tsiʼ subeyob ti «mach [bʌ] cabʌleticla». I jiñi añoʼ bʌ i pijtaya wʌʼ ti Pañimil tsiʼ subeyob ti «yambʌ c tiñʌmeʼ». Jesús tsiʼ yʌlʌ chaʼan tiʼ pejtelelob «junmojt jach» mi caj i yajñelob i cojach mi caj i tsajcʌntel bajcheʼ «Xcʌnta tiñʌmeʼ» (Lucas 12:32; Juan 10:16). Pero tajol mi laj  cʼajtiben lac bʌ: ¿Cʼʌñʌl ba la cujil i cʼabaʼob tiʼ pejtelel jiñi bombiloʼ bʌ ili ora? ¿Bajcheʼ yilal yom miʼ pʌsob i bʌ jiñi bombiloʼ bʌ? Mi yaʼ ti laj congregación an juntiquil muʼ bʌ i tech i cʼux jiñi caxlan waj yicʼot i jap jiñi vino cheʼ bʌ miʼ Cʼajtesʌntel i chʌmel Jesús, ¿bajcheʼ yilal yom mi laj qʼuel? Mi woli (choncol) i ñumen pʼojlel majlel jiñi muʼ bʌ i yʌlob chaʼan bombilob, ¿muʼ ba caj laj cʼojoʼtan (pensalin)? Ili chʌmpʼejl cʼajtiya mi caj i jajqʼuel ti ili temaj.

3. ¿Chucoch maʼañic miʼ mejlel lac wen ñaʼtan majqui mi caj i majlelob ti panchan yicʼot jiñi tsicbiloʼ bʌ ochel ti jiñi 144 mil?

³ ¿Cʼʌñʌl ba la cujil i cʼabaʼob tiʼ pejtelel jiñi bombiloʼ bʌ wʌʼto bʌ añob ti Pañimil? Maʼañic. ¿Chucoch? Come maʼañic miʼ mejlel lac wen ñaʼtan mi mucʼʌch caj i majlelob ti panchan ^[1] (qʼuele jiñi nota am bʌ tiʼ yujtibal ili temaj). Anquese Dios pʌybilʌch i chaʼañob yaʼ ti panchan, pero cojach mi caj i majlelob mi xucʼulobʌch cʼʌlʌl tiʼ yujtibal. Satanás yujilʌch, jin chaʼan miʼ cʼʌn «lot bʌ xʼaltʼañob» chaʼan miʼ ñop i yʌcʼob ti yajlel (Mateo 24:24). Jiñi bombiloʼ bʌ yujilob chaʼan cojach mi caj i majlelob ti panchan cheʼ bʌ Jehová miʼ yʌqʼueñob cojix bʌ i sellojlel. Ili cojix bʌ sello miʼ yʌqʼuentelob cheʼ bʌ tsʼitaʼ jax yom chaʼan miʼ chʌmelob (sajtelob) o cheʼ bʌ lʌcʼʌlix chaʼan miʼ cajel jiñi «ñuc bʌ wocol» (Apocalipsis 2:10; 7:3, 14).

4. Mi jiñi yambʌ tiñʌmeʼob mach yujilobic chuqui i cʼabaʼob tiʼ pejtelel jiñi bombiloʼ bʌ wʌʼto bʌ añob ti Pañimil, ¿chucoch miʼ subeñob: «Mi caj c majlel lojon quicʼotetla»?

⁴ Mi jiñi yambʌ tiñʌmeʼob mach luʼ yujilobic i cʼabaʼ tiʼ pejtelel jiñi bombiloʼ bʌ wʌʼto bʌ añob ti Pañimil, ¿chucoch miʼ subeñob: «Mi caj c majlel lojon quicʼotetla»? Jiñi Biblia miʼ yʌl chaʼan «10 wiñicob» mi caj i chucbeñob i bujc juntiquil «judío bʌ» i mi caj i yʌlob: «Mi caj c majlel lojon quicʼotetla, come tsaʼ cubi lojon chaʼan laʼ wicʼot Dios». Jiñi versículo miʼ yʌl juntiquil «judío bʌ», pero ti wiʼil miʼ chaʼ al jiñi tʼan «quicʼotetla» yicʼot «laʼ wicʼot». Jin chaʼan, jiñi tʼan «judío bʌ» mach yom i yʌl chaʼan juntiquil jach, yom i yʌl tiʼ pejtelel jiñi bombiloʼ bʌ cheʼ junmojtob jach. Jiñi yambʌ tiñʌmeʼob yujilobʌch, jin chaʼan miʼ yʌlob chaʼan miʼ majlelob yicʼot jiñi bombiloʼ bʌ, yom i yʌl, chaʼan temel miʼ melbeñob i yeʼtel (troñel) Jehová yicʼotob. Mach cʼʌñʌlic yujilob tiʼ pejtelel i cʼabaʼ jiñi bombiloʼ bʌ chaʼan miʼ mejlel i tsajcañob. ¿Chucoch? Come jiñi Biblia miʼ yʌl chaʼan cojach yom mi lac tsajcan Jesús (Mateo 23:10).

5. a) ¿Chuqui bʌ ticʼojel yom miʼ wen acʼob ti ñuc jiñi bombiloʼ bʌ? b) ¿Chucoch wen ñucʌch i cʼʌjñibal ili ticʼojel?

⁵ Jiñi bombiloʼ bʌ yom miʼ wen chʼʌmob ti ñuc ili ticʼojel am bʌ ti 1 Corintios 11:27-29 (pejcan). Mi juntiquil maʼañic miʼ cʌntan i bʌ bajcheʼ an yicʼot Jehová, pero miʼ cʼux jiñi caxlan waj yicʼot miʼ jap jiñi vino cheʼ miʼ Cʼajtesʌntel i chʌmel Jesús, ‹mach weñic› chuqui woli (yʌquel) i mel. Yom i yʌl chaʼan maʼañic woliʼ qʼuel ti ñuc (Hebreos 6:4-6; 10:26-29). Ili ticʼojel wen ñuc i cʼʌjñibal, come mi juntiquil yajcʌbil bʌ mach chʌn xucʼul miʼ yajñel ti Jehová, maʼañic mi caj i taj i «[pʌyol] ti chan ti Cristo Jesús, jiñʌch jini cʼax utsʼat bʌ» (Filipenses 3:13-16).

6. ¿Bajcheʼ yilal yomob jiñi bombiloʼ bʌ?

⁶ Pablo tsiʼ sube jiñi bombiloʼ bʌ: «Ti wocol tʼan mic subeñetla chaʼan mi laʼ wajñel cheʼ bajcheʼ yom Dios, come jini chaʼan tsiʼ pʌyʌyetla». ¿Bajcheʼ miʼ mejlel i tsʼʌctesañob jiñi? Pablo tiʼ tsictesa: «Ajñenla ti pecʼ tiʼ yutslel laʼ pusicʼal. Chʌn cuchbeñob i sajtemal laʼ piʼʌlob ti laʼ cʼuxbiya». Tsiʼ cʼajtesʌbeyob jaʼel chaʼan yom miʼ chaʼleñob wersa chaʼan chʌn temel yicʼot tiʼ ñʌchʼtʌlel miʼ yajñelob (Efesios 4:1-3). Jiñi chʼujul bʌ espíritu miʼ coltan i wiñicob Dios chaʼan maʼañic miʼ chanʼesañob i bʌ, pecʼ miʼ melob i bʌ (Colosenses 3:12). Jin chaʼan mach ñumen yujilobic miʼ yubiñob i bʌ. Maʼañic  miʼ ñaʼtañob chaʼan ñumen añob i chaʼan chʼujul bʌ espíritu tiʼ caj bombilob, i chaʼan mach lajalobic bajcheʼ yañoʼ bʌ. Maʼañic miʼ yʌlob chaʼan ñumen utsʼat miʼ chʼʌmbeñob isujm jiñi Biblia. Maʼañic miʼ subeñob juntiquil quixtañu chaʼan yajcʌbilob jaʼel yicʼot chaʼan yom miʼ cʼuxob jiñi caxlan waj yicʼot miʼ japob jiñi vino. Miʼ pʌsob i pecʼlel come yujilob chaʼan cojach Jehová miʼ mejlel ti pʌyoñel yaʼ ti panchan.

7, 8. a) ¿Chuqui maʼañic bʌ miʼ melob jiñi bombiloʼ bʌ? b) ¿Chucoch mach cheʼic miʼ melob bajcheʼ jiñi?

⁷ Jiñi bombiloʼ bʌ yujilob chaʼan jiñʌch ñuc bʌ majtañʌl cheʼ miʼ pʌjyelob ti panchan, pero maʼañic miʼ pijtañob chaʼan yom miʼ qʼuejlelob ti ñuc tiʼ tojlel jiñi hermanojob (Efesios 1:18, 19; pejcan Filipenses 2:2, 3). Yujilob chaʼan Jehová maʼañic tsiʼ yʌqʼue i ñaʼtan tiʼ pejtelel quixtañujob cheʼ bʌ tsiʼ yajcayob. Jin chaʼan, mach toj sajtelic i pusicʼal juntiquil bombil bʌ cheʼ bʌ an yambʌ hermano maʼañic bʌ miʼ ñop chaʼan cheʼʌchi. Jiñi hermano yajcʌbil bʌ yujil chaʼan ti Biblia miʼ yʌl chaʼan mach yomic ti ora miʼ ñojpel cheʼ bʌ an majqui miʼ yʌl chaʼan tsaʼ aqʼuenti ñuc bʌ i yeʼtel ti Jehová (Apocalipsis 2:2). Yicʼot jaʼel, cheʼ bʌ juntiquil bombil bʌ miʼ cʌn yambʌ hermano bombil bʌ jaʼel, mach ti orajic miʼ suben chaʼan bombil. ¿Chucoch? Come mach yomic chaʼan mi caj i wen qʼuejlel ti ñuc. Tajol miʼ ñaʼtan chaʼan wen cheʼ maʼañic majqui miʼ suben. Maʼañic mi caj i wen al chaʼan chuqui tac mi caj i mel ti panchan (1 Corintios 1:28, 29; pejcan 1 Corintios 4:6-8).

⁸ Jiñi hermanojob bombiloʼ bʌ maʼañic miʼ ñaʼtañob chaʼan cojach yom miʼ yajñelob yicʼot yambʌ bombiloʼ bʌ jaʼel, cheʼ bajcheʼ junmojt quixtañujob wen ñucoʼ bʌ. Mach jiñob jach miʼ bajñel sʌclañob i bʌ chaʼan miʼ chaʼleñob tʼan o miʼ comol pejcañob Biblia (Gálatas 1:15-17). Cheʼic miʼ melob jiñi, cabʌl tʼox bʌ miʼ yujtel ti congregación. Maʼañic woliʼ yʌcʼob ti ñuc jiñi chʼujul bʌ espíritu muʼ bʌ i coltan chaʼan ñʌchʼʌl yicʼot temel miʼ yajñel i tejclum Dios (pejcan Romanos 16:17, 18).

9. ¿Chucoch yom wen tsajilonla chaʼan bajcheʼ yilal mi lac mel tiʼ tojlelob jiñi bombiloʼ bʌ? (Qʼuele jiñi recuadro « Jiñi cʼuxbiya ‹mach lecojic i melbal›»).

⁹ Jesús tsiʼ sube jiñi xcʌntʼañob i chaʼan: «Ti pejteletla laʼ wermano laʼ bʌ». Ti wiʼil tiʼ subeyob: «Majqui jach chan miʼ mel i bʌ mi caj i peqʼuesʌntel. Majqui jach pecʼ miʼ mel i bʌ, mi caj i chañʼesʌntel» (Mateo 23:8-12). Mach yomic mi laj cʌlʌx acʼob ti ñuc anquese bombil bʌ. Jiñi Biblia miʼ yʌl chaʼan yom mi lac tsajcañob bajcheʼ yilalob i ñopoñel ti Dios jiñi ancianojob, pero maʼañic miʼ yʌl chaʼan mi lac tsajcan juntiquil quixtañu (Hebreos 13:7). Jiñi Biblia miʼ yʌl chaʼan añʌch yom bʌ mi laj qʼuelob ti «ñumen ñuc», pero mach chaʼañic bombilob, chaʼañʌch miʼ chaʼleñob wersa ti subtʼan yicʼot ti cʌntesa (1 Timoteo 5:17). Mi tsaʼ caji lac pʌs chaʼan mi lac wen qʼuelob ti ñuc o ñumen utsʼatax chuqui mi caj lac mel tiʼ tojlelob, miʼ mejlel la cʌcʼob ti quisin, o miʼ mejlel la cʌqʼueñob i yubiñob i bʌ ti ñuc (Romanos 12:3). ¡Mach la comic miʼ yajlelob ti mulil tiʼ caj bajcheʼ yilal mi lac mel tiʼ tojlelob! (Lucas 17:2).

10. ¿Bajcheʼ mi lac pʌs chaʼan mi laj qʼuelob ti ñuc jiñi yajcʌbiloʼ bʌ?

¹⁰ ¿Bajcheʼ mi lac pʌs chaʼan mi laj qʼuelob ti ñuc jiñi yajcʌbiloʼ bʌ chaʼan miʼ majlelob ti panchan? An cabʌl bajcheʼ. Ñaxam bʌ, maʼañic mi laj cʼajtibeñob bajcheʼ tsaʼ yajcʌntiyob, jiñob jach yujilob. Maʼañic ti lac wenta jiñi (1 Tesalonicenses 4:11; 2 Tesalonicenses 3:11). Cheʼ jaʼel, mach yomic mi lac ñaʼtan chaʼan jiñi i ñoxiʼal o yijñam, o jiñi tatʌlob o yambʌ i familiajob yajcʌbilob jaʼel. Cheʼ bʌ juntiquil miʼ yajcʌntel mach yomic i yʌl chaʼan luʼ yajcʌbil i familia jaʼel (1 Tesalonicenses 2:12). Cheʼ jaʼel, maʼañic mi lac mel cʼajtiya muʼ bʌ i yʌqʼuen i chʼijiyemlel yañoʼ bʌ. Jumpʼejl ejemplo, maʼañic mi laj cʼajtiben i yijñam juntiquil bombil bʌ bajcheʼ yubil miʼ yubin cheʼ bʌ maʼañic mi caj i  yajñel yicʼot i ñoxiʼal yaʼ ti Paraíso. Mi lac ñop chaʼan Jehová mi caj i yʌqʼueñonla tiʼ pejtelel chuqui la com yaʼ ti Paraíso (Salmo 145:16).

11. ¿Chucoch yom mi lac jacʼ jiñi ticʼojel cheʼ mach yomic mi laj cʼʌn i «tʼojol bʌ tʼan»?

¹¹ Cheʼ junlajal mi laj qʼuel jiñi bombiloʼ bʌ cheʼ bajcheʼ mi laj qʼuel jiñi yambʌ hermanojob, mucʼʌch i coltañonla. ¿Chucoch? Come jiñi Biblia miʼ yʌl chaʼan tajol añob «payxo [o mach bʌ isujmic] hermanojob» yaʼ ti congregación muʼ bʌ i yʌlob chaʼan bombilob (Gálatas 2:4, 5; 1 Juan 2:19). Jiñi bombiloʼ bʌ tajol an mach bʌ chʌn xucʼulobix miʼ yajñelob (Mateo 25:10-12; 2 Pedro 2:20, 21). Jiñi xcʌntʼan Judas tsiʼ yʌlʌ chaʼan mach yomic mi laj cʼʌn i «tʼojol bʌ tʼan». Yom i yʌl chaʼan mach weñic cheʼ mi lac tsajcan yambʌlob yaʼ ti congregación chaʼan jach bombilob, wen cʌmbilob o chaʼan jach cabʌlix jab cajel i melbeñob i yeʼtel Jehová. Yom mi lac jacʼ ili ticʼojel. Jin chaʼan, maʼañic mi caj lac sʌt lac ñopoñel (chʼujbiya) ti Dios yicʼot maʼañic mi caj laj cʌy lac melben i yeʼtel anquese jiñi hermanojob miʼ ñajtʼesañob i bʌ tiʼ tojlel (Judas 16).

12, 13. ¿Chucoch mach yomic miʼ yʌcʼonla ti cʌlʌx pensar cheʼ bʌ mach la cujilic jaytiquil jiñi muʼ bʌ i cʼuxob caxlan waj yicʼot miʼ japob vino wʌʼ ti Pañimil?

¹² Ti cabʌl ora, jiñi xñoptʼañob muʼ bʌ i cʼuxob caxlan waj yicʼot miʼ japob vino cheʼ miʼ Cʼajtesʌntel i chʌmel Jesús miʼ bej jubel majlel. Pero ti ili jab ñumeñix bʌ, woli ñumen cʼʌjquel majlel. ¿Yom ba mi laj cʼojoʼtan iliyi? Maʼañic. Laʼ laj qʼuel chʌnchajp chucoch.

¹³ «Lac Yum miʼ cʌn i chaʼañoʼ bʌ» (2 Timoteo 2:19). Dios yujil majqui jiñi bombil bʌ yicʼot mach bʌ añic. Pero jiñi hermanojob muʼ bʌ i tsicob jaytiquil muʼ bʌ i cʼuxob caxlan waj yicʼot miʼ japob vino cheʼ tiʼ Cʼajtesʌntel i chʌmel Jesús maʼañic miʼ mejlel i ñaʼtañob. Yaʼ ochemob jaʼel jiñi muʼ bʌ i yʌlob chaʼan bombilob. Jumpʼejl ejemplo, ti ñaxan an muʼ bʌ i cʼuxob jiñi caxlan waj yicʼot miʼ japob vino, pero wʌle maʼañix miʼ melob. Yañoʼ bʌ tajol añob i cʼamʌjel tiʼ jol o an bajcheʼ yubil miʼ yubiñob i bʌ, jin chaʼan miʼ lon ñaʼtañob chaʼan mi caj i majlelob ti panchan. Pero tiʼ sujm maʼañic miʼ mejlel lac wen ñaʼtan jaytiquil jiñi wʌʼto bʌ añob ti Pañimil bombiloʼ bʌ.

14. ¿Chuqui miʼ yʌl jiñi Biblia chaʼan jaytiquil to jiñi bombiloʼ bʌ wʌʼ añob ti Pañimil cheʼ bʌ miʼ tejchel jiñi ñuc bʌ wocol?

¹⁴ Jiñi bombiloʼ bʌ añob tiʼ joytʌlel Pañimil cheʼ bʌ tal Jesús chaʼan miʼ pʌyob majlel ti panchan. Jiñi Biblia miʼ yʌl chaʼan Jesús «mi caj i choc tilel i yángelob yicʼot cʼam bʌ i tʼan trompeta. Mi caj i tempañob tilel tiʼ chʌnwejlel pañimil jini yajcʌbiloʼ bʌ i chaʼan ti junwejl panchan cʼʌlʌl ti yambʌ junwejl» (Mateo 24:31). Jiñi Biblia miʼ yʌl cheʼ ti cojix bʌ qʼuin mach cabʌlix wʌʼto bʌ añob ti Pañimil (Apocalipsis 12:17).  Pero maʼañic miʼ yʌl chaʼan jaytiquil to wʌʼ añob cheʼ miʼ tejchel jiñi ñuc bʌ wocol.

15, 16. ¿Chuqui jiñi chaʼpʼejl yom bʌ mi lac chʼʌmben isujm tiʼ tojlel jiñi bombiloʼ bʌ?

¹⁵ Jiñʌch Jehová yujil jala miʼ yajcañob (Romanos 8:28-30). Dios tsiʼ techeʼ i yajcan chaʼtiquil uxtiquil cheʼ bʌ chaʼ tejcheñix Jesús. Ti jiñi bʌ ora jiñi xñoptʼañob luʼ bombilob. Ti wiʼil, cheʼ bʌ ñumeñix cabʌl jab yonlel tsaʼ bʌ i yʌlʌyob chaʼan xñoptʼañob, tiʼ sujm mach jiñobic. Pero Jehová tsiʼ boño tiʼ yespíritu jiñi isujm bʌ xñoptʼañob añoʼ bʌ ti jiñi bʌ ora. Ili jiñobʌch bajcheʼ jiñi trigo tsaʼ bʌ i yʌlʌ Jesús muʼ bʌ caj i colel baqui an jiñi mach bʌ weñic pacʼ (Mateo 13:24-30). Ti ili ora, Jehová wolito i chʌn yajcan tilel jiñi quixtañujob tsicbiloʼ bʌ ochel ti jiñi 144 mil ^[2] (qʼuele jiñi nota am bʌ tiʼ yujtibal ili temaj). Mi Jehová tsiʼ ñaʼta i yajcan chaʼtiquil uxtiquil bombiloʼ bʌ cheʼ tsʼitaʼ jachix yom chaʼan i jilibal ili pañimil (mulawil), la cujil chaʼan weñʌch chuqui woliʼ mel (Isaías 45:9; Daniel 4:35; pejcan Romanos 9:11, 16) ^[3] (qʼuele jiñi nota am bʌ tiʼ yujtibal ili temaj). Mach cheʼic la com lac mel bajcheʼ jiñi xʼeʼtelob tsaʼ bʌ i yʌlʌ Jesús. Jiñi xʼeʼtelob tsiʼ chaʼleyob mach bʌ weñic tʼan tiʼ tojlel i yumob chaʼan chuqui tsiʼ mele tiʼ tojlel jiñi yambʌ wiñicob tsaʼ bʌ cajiyob ti eʼtel cheʼ bʌ wolix i bʌjlel qʼuin (pejcan Mateo 20:8-15).

¹⁶ Jiñi «xucʼul bʌ xʼeʼtel am bʌ cabʌl i ñaʼtʌbal» mach tiʼ pejtelelobic jiñi bombiloʼ bʌ (Mateo 24:45-47). Ili ora, Jehová yicʼot Jesús miʼ cʼʌn junmojt wiñicob chaʼan yonlel quixtañu miʼ cʌñob i sujmlel, cheʼ bajcheʼ tiʼ yorajlel jiñi ñaxam bʌ xñoptʼañob. Tiʼ yorajlel jiñi ñaxam bʌ xñoptʼañob mach cabʌlobic jiñi bombiloʼ bʌ tsiʼ meleyob jiñi Tsʼijbujel ti Griego. Ili ora mach cabʌlobic jiñi bombiloʼ bʌ añoʼ bʌ tiʼ wenta chaʼan «miʼ yʌqʼueñob i bʌl i ñʌcʼ» i tejclum Dios cheʼ tiʼ yorajlel.

17. ¿Chuqui tsaʼ cʌñʌ ti ili temaj?

¹⁷ ¿Chuqui tsaʼ laj cʌñʌ ti ili temaj? Jehová tsaʼix i ñaʼta chaʼan yonlel i wiñicob miʼ chumtʌlob tiʼ pejtelel ora wʌʼ ti Pañimil yicʼot majquiyob muʼ bʌ caj i majlelob ti Yumʌntel yicʼot Jesús yaʼ ti panchan. Jehová mi caj i yʌqʼueñob i majtan jiñi «10 wiñicob» yicʼot jiñi «judío bʌ». Yom chaʼan jiñi chaʼmojt miʼ jacʼob jaʼel jiñi mandar yicʼot xucʼul miʼ yajñelob. Yom añob i pecʼlel jiñi chaʼmojt. Yom temel miʼ melbeñob i yeʼtel Jehová yicʼot temel miʼ yajñelob. Yicʼot yom miʼ chaʼleñob wersa chaʼan ñʌchʼʌl miʼ yajñelob ti congregación. Cheʼ wolito lac pijtan miʼ tilel i jilibal ili pañimil, laʼ lac chʌn melben i yeʼtel Jehová yicʼot laʼ lac tsajcan majlel Jesús lajal bajcheʼ«junmojt jach».