¿Cheʼ ba maʼ ñaʼtan jeʼel? Tiʼ sujm, ti lac pejtelel mach junyajlic an tajleyonla ti wocol o an i tajol maʼañic mi lac ñaʼtan chuqui mi lac mel. Pero jiñʌch bajcheʼ mi lac jacʼ cheʼ baqui ora mi lac subentel lac chaʼlen lot, mi caj i yʌcʼ ti cʌjñel majquiyonla tiʼ sujmlel. Jumpʼejl ejemplo, mi ñumen i cʼʌjñibal mi la cubin chaʼan utsʼat miʼ qʼuelonla jiñi yañoʼ bʌ, tajol mi lac ñaʼtan chaʼan maʼañic i wocolel cheʼ mi lac tsʼitaʼ chaʼlen lot mi an mach bʌ weñic tsaʼ lac mele. Pero yom mi laj cuchben i wocolel mi tsaʼ ñaʼtʌnti i sujmlel. Laʼ laj qʼuel baqui bʌ i wocolel tac.

Jiñi wen ñuc bʌ i cʼʌjñibal jiñʌch cheʼ miʼ yʌjqʼuel ti ñuc chuqui mi la cʌl come miʼ coltañonla chaʼan chʌn utsʼat mi laj cajñel la quicʼot yañoʼ bʌ. Pero ili mach ti orajach miʼ mejlel lac taj. Mi lac taj cheʼ bʌ mi lac ñusan qʼuin yicʼot yañoʼ bʌ, mi la cʌl i sujmlel bʌ yicʼot cheʼ mach lac bajñel jach mi lac ñaʼtan lac bʌ. Pero chʼijiyemtic jax cheʼ bʌ miʼ mejlel ti sajtel tiʼ cajach jumpʼejl lot. I wen wocol ti chaʼ tajtʌl cheʼ bʌ tsaʼix lac sʌtʌ.

¿Am ba i lotiyet juntiquil wen cʌmbil bʌ a chaʼan? Mi cheʼi, tajol mach tijicñayic tsaʼ wubi a bʌ o tsaʼ wubi chaʼan maʼañic tsiʼ qʼueleyet ti ñuc, i melelʌch. Wen tsiquil chaʼan miʼ mejlel ti jilel jiñi tijicñʌyel am bʌ i chaʼan jiñi wen ñʌmʌl bʌ la quicʼot cheʼ mi lac mel mach bʌ utsʼatic.

Ti jumpʼejl estudio tsaʼ bʌ i mele Robert Innes, maestro bʌ chaʼan Economía yaʼ ti Universidad ti California, tsiʼ qʼuele chaʼan «miʼ mejlel lac toyben lac bʌ jiñi lot». Lajal bajcheʼ jumpʼejl virus: Cheʼ cabʌl ora mi la cajñel la quicʼot juntiquil yujil bʌ lot, miʼ mejlel lac toyben jaʼel.

¿Chuqui miʼ mejlel lac mel chaʼan maʼañic mi lac toy? Jiñi Biblia miʼ mejlel i coltañonla. Mic poj subeñet chaʼan maʼ qʼuel jiñi principio tac am bʌ ti Biblia.