1, 2. a) ¿Chuqui tac ochem ti jiñi majtañʌl aqʼuebil bʌ i chaʼañonla Dios? b) ¿Baqui bʌ cʼajtiya tac mi caj i jajqʼuel ti ili temaj?

JEHOVÁ miʼ wen cʼuxbiñonla, jin chaʼan tsiʼ choco tilel wen cʼuxbibil bʌ i Yalobil wʌʼ ti Pañimil, Jesucristo, chaʼan miʼ yʌcʼ i cuxtʌlel ti laj caj (Juan 3:16; 1 Juan 4:9, 10). Ili jiñʌch wen ñuc bʌ majtañʌl chʼʌmʌl bʌ i chaʼan wiñicob xʼixicob (quixtañujob). Jin chaʼan, jiñi apóstol Pablo tsiʼ yʌlʌ chaʼan jiñʌch jumpʼejl «lac majtan cʼax letsem bʌ i tojol» (2 Corintios 9:15). ¿Chuqui yom i yʌcʼ ti ñaʼtʌntel chaʼan ili tʼan?

² Pablo yujilix chaʼan mi caj i tsʼʌctiyel tiʼ pejtelel chuqui tsaʼ bʌ i wʌn alʌ Dios cheʼ tsiʼ yʌcʼʌ i cuxtʌlel Jesús (pejcan 2 Corintios 1:20). Jiñi i cuxtʌlel tsaʼ bʌ i yʌcʼʌ Jesús, tiʼ pejtelel jiñi cʼuxbiya yicʼot chuqui tac wem bʌ miʼ yʌqʼueñonla Dios, yaʼʌch ochem ti jiñi «lac majtan cʼax letsem bʌ» tsaʼ bʌ i yʌqʼueyonla Dios. Maʼañic mi lac taj lac tʼan chaʼan mi lac tsictesan ili majtañʌl wen utsʼatax  bʌ. ¿Bajcheʼ yubil mi la cubin chaʼan ili wen ñuc bʌ majtañʌl? ¿Chuqui yom mi lac mel ili ora cheʼ lʌcʼʌlix miʼ cajel i Cʼajtesʌntel i chʌmel Jesús? Ili jabil mi caj laj cʼajtesan cheʼ ti miércoles 23 i chaʼan marzo.

3, 4. a) ¿Bajcheʼ yubil mi la cubin cheʼ bʌ an majqui miʼ yʌqʼueñonla jumpʼejl majtañʌl? b) ¿Bajcheʼ miʼ mejlel i qʼuextan lac melbal jumpʼejl majtañʌl?

³ Tiʼ pejtelel jiñi majtañʌl miʼ yʌqʼueñonla lac tijicñʌyel. Pero an ñumen ñuc tac bʌ muʼ bʌ i mejlel i qʼuextan bajcheʼ yilalonla. Laʼ la cʌl jumpʼejl ejemplo. Ñaʼtancu chaʼan an tsʌts bʌ a mul i jin chaʼan mi caj a tsʌnsʌntel. Pero mach yʌxʌl a wo, an majqui miʼ yʌl chaʼan miʼ yʌcʼ i cuxtʌlel ti a caj. ¿Bajcheʼ yubil mi caj a wubin a bʌ?

⁴ Tajol maʼ qʼuextan a melbal. Tajol maʼ ñumen pʌs a cʼuxbiya yicʼot maʼ tʼoxben yañoʼ bʌ chuqui an a chaʼan o maʼ ñusʌben i mul tsaʼ bʌ i mele mach bʌ weñic ti a tojlel. Tajol jaʼel maʼañic mi caj a cʌy a qʼuel ti ñuc chuqui tsiʼ mele ti a tojlel jiñi mach bʌ a cʌñʌyic cheʼ bʌ tsiʼ coltayet.

5. ¿Chucoch miʼ mejlel la cʌl chaʼan Dios tsiʼ yʌqʼueyonla jiñi ñumen ñuc bʌ lac majtan?

⁵ Jiñi majtañʌl tsaʼ bʌ i yʌqʼueyonla Dios ñumen anto i ñuclel i mach lajalic bajcheʼ jiñi ejemplo tsaʼ bʌ la cʌlʌ (1 Pedro 3:18). Ti lac pejtelel mi lac chʌmel come xmulilonla (Romanos 5:12). Pero Dios miʼ wen cʼuxbiñonla i tsiʼ choco tilel i Yalobil chaʼan miʼ chʌmel ti laj caj (Hebreos 2:9). I cuxtʌlel tsaʼ bʌ i yʌcʼʌ Cristo anto yambʌ chuqui mi caj i mel. Mi caj i jisan tiʼ pejtelel ora jiñi chʌmel (Isaías 25:7, 8; 1 Corintios 15:22, 26). Tiʼ pejtelel jiñi muʼ bʌ i ñopob (chʼujbiñob) Jesús mi caj i chumtʌlob ti tijicña yicʼot ñʌchʼʌl mi caj i yajñelob tiʼ pejtelel ora, junmojt mi caj i majlelob ti panchan i yambʌ junmojt mi caj i cʌytʌlob wʌʼ ti Pañimil (Romanos 6:23; Apocalipsis 5:9, 10). Pero anto yambʌ chuqui ochem ti jiñi majtañʌl tsaʼ bʌ i yʌqʼueyonla Dios.

6. a) ¿Chuqui utsʼatax bʌ woli a pijtan? b) ¿Bajcheʼ mi lac pʌs chaʼan mucʼʌch la cʌqʼuen wocolix i yʌlʌ Dios chaʼan i cʼuxbiya?

⁶ ¿Chuqui utsʼatax bʌ miʼ chʼʌm tilel jiñi majtañʌl tsaʼ bʌ i yʌqʼueyonla Dios? Jiñi Pañimil mi caj i sujtel ti paraíso, jiñi cʼamoʼ bʌ mi caj i cʼocʼañob yicʼot mi caj i chaʼ tejchel jiñi chʌmeñoʼ bʌ (Isaías 33:24; 35:5, 6; Juan 5:28, 29). Mi lac wen cʼuxbin Jehová yicʼot Jesús chaʼan ili wen ñuc bʌ majtañʌl. ¿Bajcheʼ mi lac pʌs chaʼan mucʼʌch laj qʼuel ti ñuc? Ñaxam bʌ, mi lac lajin i melbal Cristo. Yambʌ, cheʼ mi laj cʼuxbin la quermañojob. I yujtibal, tiʼ pejtelel lac pusicʼal mi lac ñusʌben i mul yañoʼ bʌ.

7, 8. a) Mi mucʼʌch lac chʼʌm ti ñuc i cʼuxbiya Jesús, ¿chuqui mi caj la cubin tiʼ tojlel? b) ¿Chuqui yom mi lac mel mi mucʼʌch lac chʼʌm ti ñuc i cʼuxbiya Jesús?

⁷ Ñaxam bʌ, i cʼuxbiya Dios am bʌ i chaʼan ti lac tojlel yom miʼ ñijcañonla laj cʼʌn laj cuxtʌlel chaʼan mi la cʌcʼ ti ñuqʼuesʌntel Jesús. Jiñi apóstol Pablo tsiʼ yʌlʌ: «I cʼuxbiya Cristo miʼ wersa xicʼbeñon lojon» (pejcan 2 Corintios 5:14, 15). Pablo yujilix chaʼan mi mucʼʌch lac chʼʌm ti ñuc i cʼuxbiya Jesús, mi caj laj cʼuxbin yicʼot mi caj la cʌcʼ ti ñuc. Cheʼ mi lac chʼʌmben isujm tsaʼ bʌ i mele Jehová ti lac tojlel, mi lac chaʼlen wersa la cʌcʼ ti ñuc Jesús cheʼ bajcheʼ chumulonla. ¿Bajcheʼ?

⁸ Yom mic «tsajcanla majlel» Cristo cheʼʌch bajcheʼ tsiʼ mele (1 Pedro 2:21; 1 Juan 2:6). Cheʼ bʌ mi lac jacʼben i tʼan Dios yicʼot Cristo, mi lac pʌs chaʼan mucʼʌch laj cʼuxbiñob. Jesús tsiʼ yʌlʌ: «Jini muʼ bʌ i cʌn c mandar, muʼ bʌ i jacʼ, jiñʌch muʼ bʌ i cʼuxbiñon. Jini muʼ bʌ i cʼuxbiñon, mi caj i cʼuxbintel chaʼan c Tat. Joñon mi caj  j cʼuxbin jaʼel. Mi caj cʌqʼueñetla laʼ wen cʌñon» (Juan 14:21; 1 Juan 5:3).

9. ¿Baqui bʌ wocol mi lac ñusan ti lac pejtelel?

⁹ Cheʼ bʌ wolix (choncolix) i lʌcʼtiyel i yorajlel chaʼan miʼ Cʼajtesʌntel i chʌmel Jesús, yom mi lac ñaʼtan bajcheʼ woli (yʌquel) laj cʼʌn laj cuxtʌlel (qʼuele jiñi recuadro «¿Chuqui yom i yʌl?»). Laʼ laj cʼajtiben lac bʌ: «¿Bajcheʼ woli c lajin i melbal Jesús? ¿Anto ba baqui yom mic tojʼesan c bʌ?». Ñuc i cʼʌjñibal cheʼ mi lac melben lac bʌ ili cʼajtiya tac come ili pañimil (mulawil) miʼ xicʼonla lac mel chuqui miʼ mel jiñi quixtañujob (Romanos 12:2). Mi mach tsajilonla, tajol miʼ cajel lac mel jaʼel bajcheʼ jiñi wen yujiloʼ bʌ, wen cʌmbil bʌ ti televisión yicʼot xʼalasob wen cʌmbiloʼ bʌ (Colosenses 2:8; 1 Juan 2:15-17). ¿Bajcheʼ miʼ mejlel lac lʌtʼ iliyi?

10. a) ¿Baqui bʌ cʼajtiya yom mi lac melben lac bʌ cheʼ ti yorajlel i Cʼajtesʌntel i chʌmel Jesús? b) ¿Chuqui muʼ bʌ caj laj cʌy lac mel? (Qʼuele jiñi dibujo tac am bʌ tiʼ tejchibal).

¹⁰ Ti ili ora cheʼ mi caj laj cʼajtesan i chʌmel Jesús wen cheʼ muqʼuic lac ñaʼtan bajcheʼ yilal lac pislel, jiñi música, película, chuqui an ti lac teléfono, ti laj computadora yicʼot ti lac tableta. Laʼ laj cʼajtiben lac bʌ: «¿Muʼ ba caj quisñin c bʌ cheʼ muqʼuic i qʼuelon Jesús bajcheʼ yilal xojol c chaʼan c pislel?» (pejcan 1 Timoteo 2:9, 10). «¿Muʼ ba c pʌs tic pislel chaʼan woliyʌch c tsajcan Cristo? ¿Muʼ ba caj i mulan Jesús jiñi película tac muʼ bʌ j qʼuel yicʼot cʼay tac muʼ bʌ c ñʌchʼtan? ¿Muʼ ba caj c mulan c majñʌben Jesús jiñi c teléfono o tableta? ¿Muʼ ba caj c pʌsben Jesús baqui bʌ videojuego mic mulan i mic suben chucoch?». Mi mucʼʌch laj cʼuxbin Jehová, yom mi laj cʌy laj cʼʌn mach bʌ weñic chaʼan juntiquil xñoptʼan, anquese wocol mi laj cubin (Hechos 19:19, 20). Cheʼ bʌ tsaʼ laj cʌqʼue laj cuxtʌlel Jehová, tsaʼ laj cʌqʼue lac tʼan chaʼan mi caj laj cʼʌn chaʼan mi laj cʌcʼ ti ñuc Cristo. Jin chaʼan, maʼañic chuqui yom miʼ mʌctañonla chaʼan mi lac tsajcan Jesús (Mateo 5:29, 30; Filipenses 4:8).

11. a) ¿Chuqui yambʌ mi caj lac mel mi mucʼʌch laj cʼuxbin Jehová yicʼot Jesús? b) ¿Chuqui miʼ mejlel lac mel tiʼ tojlel añoʼ bʌ ti laj congregación?

¹¹ Yambʌ muʼ bʌ mejlel lac mel mi mucʼʌch laj cʼuxbin Jehová yicʼot Jesús jiñʌch cheʼ mi lac chaʼlen subtʼan i mi laj cʌntesan yañoʼ bʌ yicʼot lac tijicñʌyel (Mateo 28:19, 20; Lucas 4:43). Cheʼ tiʼ yorajlel i Cʼajtesʌntel i chʌmel Jesús, ¿muʼ ba mejlel lac chajpan lac bʌ chaʼan mi la cochel bajcheʼ precursor auxiliar i mi lac mel 30 o 50 hora ti subtʼan? Ñaʼtancu tsaʼ bʌ i mele juntiquil hermano am bʌ 84 i jabilel tsaʼix bʌ chʌmi i yijñam. Tsiʼ lon ñaʼta chaʼan mach mejlix i mel bajcheʼ precursor auxiliar tiʼ caj i jabilel yicʼot chaʼan mach wen cʼoqʼuic. Pero jiñi precursorob chumuloʼ bʌ tiʼ tʼejl tsiʼ subeyob chaʼan miʼ caj i sʌclʌbeñob bajcheʼ miʼ majlel ti subtʼan yaʼ baqui tsaʼ aqʼuenti i territorio. Wocolix i yʌlʌ chaʼan tsaʼ coltʌnti, tsaʼ mejli ti subtʼan 30 hora ti jiñi uw. ¿Am ba majqui miʼ mejlel laj coltan ti laj congregación chaʼan miʼ yochel bajcheʼ precursor cheʼ ti marzo yicʼot abril? Tiʼ sujm, mach ti lac pejtelel mi lac mejlel. Pero jiñi ora am bʌ lac chaʼan yicʼot lac pʼʌtʌlel miʼ mejlel laj cʼʌn chaʼan mi lac melben i yeʼtel (troñel) Jehová. Mi mucʼʌch lac mel, mi caj lac pʌs chaʼan mi laj cʌqʼuen wocolix i yʌlʌ Jesús chaʼan i cʼuxbiya, cheʼ bajcheʼ tsiʼ mele jiñi apóstol Pablo. ¿Chuqui yambʌ yom mi lac mel mi mucʼʌch laj qʼuel ti ñuc i cʼuxbiya Dios?

12. Mi la com chaʼan Dios miʼ cʼuxbiñonla, ¿chuqui yom mi lac mel?

¹² I chaʼchajplel, muʼ bʌ i ñijcañonla chaʼan mi laj cʼuxbin la quermañojob jiñʌch i cʼuxbiya Dios ti lac tojlel. Jiñi apóstol Juan tiʼ tsʼijbu: «Mi cheʼʌch tsiʼ cʼuxbiyonla Dios,  cheʼ yom mi laj cʼuxbin lac bʌ ti lac pejtelel» (1 Juan 4:7-11). Mi la com miʼ cʼuxbiñonla Dios, yom mi laj cʼuxbin laj quermañojob jaʼel (1 Juan 3:16). ¿Bajcheʼ miʼ mejlel lac pʌsbeñob laj cʼuxbiya?

13. ¿Chuqui wem bʌ ejemplo tsiʼ cʌybeyonla Jesús?

¹³ Jesús tsiʼ pʌsbeyonla tiʼ melbal bajcheʼ yom mi laj cʼuxbin yañoʼ bʌ. Cheʼ bʌ tsajñi wʌʼ ti Pañimil, tsiʼ ñumen colta jiñi añoʼ bʌ i pecʼlel. Tiʼ tsʼʌca jiñi cʼamoʼ bʌ, mach bʌ weñobic i yoc, xpotsʼob, xcojcob yicʼot xʼumaʼob (Mateo 11:4, 5). Jesús miʼ wen mulan i cʌntesan jiñi quixtañu yom bʌ i cʌñob Dios, i mach lajalic tsiʼ mele bajcheʼ jiñi ñucoʼ bʌ i yeʼtel ti ñopbalʌl (Juan 7:49). Tsiʼ cʼuxbi jiñi añoʼ bʌ i pecʼlel i tsiʼ chaʼle wersa chaʼan miʼ coltañob (Mateo 20:28).

14. ¿Chuqui yom mi lac mel chaʼan mi lac pʌs laj cʼuxbiya tiʼ tojlel la quermañojob?

¹⁴ Cheʼ tiʼ yorajlel i Cʼajtesʌntel i chʌmel Jesús jiñʌch wen cheʼ mi lac ñaʼtan bajcheʼ mi caj laj coltan la quermañojob ti laj congregación, ñumen to jiñi añobix bʌ i jabilel. ¿Muʼ ba i mejlel lac julaʼtañob, lac chʼʌmbeñob majlel chuqui miʼ cʼuxob, laj coltañob tiʼ yotot yicʼot lac pʌyob majlel ti tempa bʌ o ti subtʼan? (Pejcan Lucas 14:12-14). Yom bʌ miʼ ñijcañonla lac pʌsben laj cʼuxbiya la quermañojob jiñʌch i cʼuxbiya Dios ti lac tojlel.

15. ¿Chuqui yom mi lac ñaʼtan ti lac pejtelel?

¹⁵ I yuxchajplel, i cʼuxbiya am bʌ i chaʼan Dios ti lac tojlel yom miʼ ñijcañonla chaʼan mi lac ñusʌben i mul la quermañojob. Luʼ xmulilonla come tilemonla tiʼ pʼolbal Adán, jin chaʼan maʼañic majch miʼ mejlel i yʌl chaʼan maʼañic i cʼʌjñibal i chaʼan jiñi cuxtʌlel tsaʼ bʌ i yʌcʼʌ Jesús. Cheʼ to jaʼel jiñi wen xucʼul bʌ i wiñic Dios an i cʼʌjñibal i chaʼan. Ti lac pejtelel yom mi lac ñaʼtan chaʼan Dios tsaʼʌch i ñusa wen ñuc bʌ lac mul. ¿Chucoch añʌch i cʼʌjñibal cheʼ mi lac ñaʼtan jiñi? Mi caj laj qʼuel i jacʼbal ti jumpʼejl ejemplo tsaʼ bʌ i yʌlʌ Jesús.

16, 17. ¿Chuqui yom i pʌsbeñonla Jesús cheʼ bʌ tsiʼ yʌlʌ chaʼan jiñi rey tsaʼ bʌ i ñusʌbe i bet juntiquil i yaj eʼtel?

¹⁶ Jesús tsiʼ yʌlʌ jumpʼejl historia chaʼan juntiquil xʼeʼtel am bʌ i bet tiʼ tojlel juntiquil rey cheʼ bʌ 60 millón taqʼuin melbil bʌ ti plata. Pero jiñi rey tsiʼ ñusʌbe i bet. Ti wiʼil, jiñi xʼeʼtel maʼañic tsiʼ ñusʌbe i bet yambʌ xyaj eʼtel an jach bʌ i bet cheʼ bʌ 100 taqʼuin melbil bʌ ti plata. Cheʼ bʌ jiñi xʼeʼtel tsaʼic i qʼuele ti ñuc tsaʼ bʌ i mele jiñi rey tiʼ tojlel, i wentʌlelʌch chaʼan miʼ ñusʌben i mul jaʼel jiñi xyaj eʼtel. Cheʼ bʌ jiñi rey tsiʼ taja i yubin tsaʼ bʌ i mele jiñi jontol bʌ xʼeʼtel, cʌlʌxix tsaʼ michʼa. Jin chaʼan, jiñi rey tsiʼ pʌyʌ tilel i tsiʼ sube: «Tsac ñusʌbeyet a bet come ti wocol tʼan tsaʼ cʼajtibeyon. ¿Mach ba yomic maʼ pʼuntan a piʼʌl ti eʼtel, cheʼ bajcheʼ tsac pʼuntayet?» (Mateo 18:23-35). ¿Chuqui yom i pʌsbeñonla Jesús yicʼot jiñi? Cheʼ bʌ Jehová miʼ ñusan lac mul, lajal bajcheʼ tsiʼ tojo ñuc bʌ lac bet. ¿Chuqui yom mi lac mel mi mucʼʌch la cʌqʼuen wocolix i yʌlʌ?

 ¹⁷ Cheʼ mi lac chajpan lac bʌ cheʼ ti Cʼajtesʌntel i chʌmel Jesús, laʼ lac ñaʼtan: «¿Am ba juntiquil hermano tsaʼ bʌ i mele mach bʌ weñic tic tojlel? ¿Wocol ba chaʼan mic ñusʌben i mul?». Cheʼ jiñi laʼ lac tsajcan jiñi ejemplo i chaʼan Jehová, muʼ bʌ i ñusʌbeñonla lac mul (Salmo 86:5; Nehemías 9:17). Mi mucʼʌch la cʌqʼuen wocolix i yʌlʌ Jehová cheʼ miʼ ñusan lac mul, mi caj lac ñusʌben i mul yañoʼ bʌ tiʼ pejtelel lac pusicʼal. Mi la com chaʼan Jehová miʼ cʼuxbiñonla yicʼot miʼ ñusan lac mul, yom mi laj cʼuxbin yicʼot mi lac ñusʌben i mul la quermañojob (Mateo 6:14, 15). Tiʼ sujm, maʼañic mi caj i tojʼan tiʼ pejtelel chuqui tsaʼ ujti, pero mi caj i coltañonla chaʼan tijicña mi la cajñel.

18. ¿Chuqui tsiʼ colta juntiquil hermana chaʼan miʼ lʌtʼben i sajtemal yambʌ hermana?

¹⁸ An i tajol wocolʌch mi lac ñusʌben i sajtemal la quermañojob yicʼot la quermañajob (pejcan Efesios 4:32 yicʼot Colosenses 3:13, 14). Laʼ laj qʼuel chuqui tsiʼ mele juntiquil hermana, i cʼabaʼ Lily. ^[1] Tsiʼ yʌlʌ chaʼan mi caj i coltan juntiquil hermana tsaʼix bʌ chʌmi i ñoxiʼal i cʼabaʼ Carol. Lily miʼ pʌy majlel baqui tac yom majlel jiñi Carol, miʼ coltan ti mʌñoñel yicʼot ti yan tac bʌ chuqui yom melol. Anquese Lily miʼ wen coltan, pero Carol tiʼ pejtelel ora miʼ michʼan. An i tajol Lily wocolʌch miʼ ñusan yicʼot Carol. Pero Lily tsiʼ chaʼle wersa i qʼuel wen tac bʌ i melbal Carol. Wocolix i yʌlʌ jiñi, Lily cabʌl jab tsiʼ colta Carol cʼʌlʌl cheʼ bʌ tsaʼ cʼamʼa i tsaʼ chʌmi. Lily miʼ yʌl chaʼan yomix i qʼuel cheʼ bʌ Carol miʼ chaʼ tejchel i mach chʌn xmulilix. Mi mucʼʌch laj qʼuel ti ñuc i cʼuxbiya Dios, mi caj mejlel lac lʌtʼbeñob i sajtemal la quermañojob jaʼel. Cheʼ jaʼel, ili cʼuxbiya mi caj i coltañonla lac pijtan ti lac pejtelel cheʼ baqui ora mach xmuliloñixla i maʼañic mi lac chʌn taj lac sajtemal.

19. ¿Chuqui mi caj lac mel mi mucʼʌch la cʌqʼuen wocolix i yʌlʌ Dios chuqui melbil i chaʼan ti lac tojlel?

¹⁹ Jehová tsiʼ yʌqʼueyonla jumpʼejl ñuc bʌ lac majtan. Laʼ lac wen ñaʼtan tiʼ pejtelel chuqui melbil i chaʼan Jehová yicʼot Jesús ti lac tojlel cheʼ tiʼ yorajlel i Cʼajtesʌntel i chʌmel Cristo. Laʼ lac pʌs tiʼ pejtelel ora chaʼan mucʼʌch laj qʼuel ti ñuc ili lac majtan. Laʼ lac tsajcan Cristo, laʼ laj cʼuxbin la quermañojob yicʼot mi lac ñusʌbeñob i mul tiʼ pejtelel lac pusicʼal.