1. Cheʼ bajcheʼ miʼ yʌl Efesios 6:10-13, ¿baqui bʌ junchajp ñumen ñuc bʌ bajcheʼ miʼ pʌsbeñonla i cʼuxbiya Jehová i miʼ chʼʌmonla ti ñuc?

JUNCHAJP ñuc bʌ bajcheʼ miʼ pʌs Jehová chaʼan miʼ cʼuxbiñonla yicʼot miʼ chʼʌmonla ti ñuc jin cheʼ miʼ coltañonla lac mʌlben (jotben) laj contrajob. Jiñi ñuc bʌ laj contrajob jiñobʌch Satanás yicʼot i xibajob. Jehová miʼ wʌn al chaʼan wen jontolob i miʼ yʌqʼueñonla i cʼʌjñibal bʌ lac chaʼan chaʼan mi lac mʌlbeñob (pejcan Efesios 6:10-13). Cheʼ mi lac jacʼben i coltaya Jehová i mi lac wen ñop tiʼ tojlel, mi caj i mejlel lac mʌlben jiñi Diablo. Miʼ mejlel lac ñop bajcheʼ jiñi apóstol Pablo, tiʼ tsʼijbu: «Mi woliʼ coltañonla Dios, ¿majqui miʼ mejlel i contrajiñonla?» (Ro. 8:31).

2. ¿Chuqui mi caj laj qʼuel ti ili temaj?

² Jiñi i sujm bʌ xñoptʼañonla maʼañic mi laj cʌlʌx acʼ ti ñuc jiñi Satanás yicʼot i xibajob. Cojach mi la cʌcʼ ti lac ñaʼtʌbal chaʼan mi lac ñumen cʌn Jehová yicʼot mi lac melben i yeʼtel (Sal. 25:5). Pero yom la cujil chuqui tac miʼ cʼʌn Satanás chaʼan maʼañic miʼ mejlel i lotiñonla (2 Co. 2:11). Ti ili temaj, mi caj laj qʼuel junchajp muʼ bʌ i cʼʌn Satanás yicʼot i xibajob chaʼan miʼ lotiñob jiñi wiñicob xʼixicob (quixtañujob). Yicʼot jaʼel, mi caj laj qʼuel chuqui miʼ mejlel lac mel chaʼan mi lac mʌlbeñob.

3, 4. a) ¿Chuqui ochem tiʼ chaʼan tac bʌ xiba? b) ¿Bajcheʼ cʼamel pujquem iliyi?

³ Chaʼan Satanás miʼ lotin jiñi quixtañujob, junchajp muʼ bʌ i wen cʼʌn jiñʌch i chaʼan bʌ xibajob. Jiñi muʼ bʌ i melob iliyi,  miʼ yʌlob chaʼan cabʌl chuqui yujilob mach bʌ yujilic jiñi yambʌlob i chaʼan añob i pʼʌtʌlel, pero iliyi mach tilemic ti Dios. Jumpʼejl ejemplo, an muʼ bʌ i poj ñaʼtañob jiñi talto bʌ qʼuin cheʼ miʼ qʼuelob jiñi ecʼ o yan tac bʌ. Yambʌ miʼ poj pʌsob chaʼan woliyʌch i pejcañob jiñi chʌmeñoʼ bʌ. I an xwujtob muʼ bʌ i cʼʌñob magia. *

⁴ Jiñi i chaʼan tac bʌ xiba miʼ mejlel tiʼ pejtelel pañimil (mulawil). Cheʼ bʌ tsaʼ mejli cʼajtiya ti 18 país am bʌ ti Latinoamérica yicʼot ti Caribe, ti uxuxtiquil quixtañu an juntiquil tsaʼ bʌ i yʌlʌ chaʼan miʼ ñop jiñi magia yicʼot wujt, i cabʌl tsaʼ bʌ i yʌlʌyob jaʼel chaʼan mucʼʌch i mejlel lac pejcan jiñi chʌmeñoʼ bʌ. Cheʼʌch tsaʼ mejli jaʼel ti 18 país am bʌ ti África, i ñumen ti ojlil tsiʼ yʌlʌyob chaʼan miʼ ñopob jiñi wujt. I sujm, ti lac pejtelel yom mi laj cʌntan lac bʌ, mach yʌlʌyic baqui chumulonla, come Satanás woli (choncol) i ñop «i lotin pejtel winicob ti pañimil» (Ap. 12:9).

5. ¿Bajcheʼ yilal miʼ qʼuel Jehová jiñi i chaʼan tac bʌ xiba?

⁵ Jehová «tojʌch chuqui miʼ yʌl» (Ro. 3:4). Jin chaʼan, miʼ tsʼaʼlen pejtelel ochem bʌ tiʼ chaʼan bʌ xiba. Tiʼ sube jiñi israelob: «Mach yomic miʼ yajñel ti laʼ tojlel mi juntiquilic muʼ bʌ i pul ti cʼajc chʼiton mi xchʼoc bʌ i yalobil. Mach yomic mi xticʼlaya mi xwujt mi jini muʼ bʌ i wʌn ñaʼtan chuqui mi caj i yujtel, mi jini muʼ bʌ i yʌcʼ i bʌ tiʼ wenta ecʼ, mi xpejca cruz mi jini muʼ bʌ i yʌcʼ i bʌ tiʼ wenta xiba chaʼan miʼ sub i tʼan yicʼot chaʼan miʼ mel ñuc tac bʌ i yeʼtel, mi jini yujil bʌ i pejcʌntel chʼujlelʌl. Come tsʼaʼlebil ti lac Yum pejtel muʼ bʌ i melob cheʼ bajcheʼ jini» (Dt. 18:10-12). Ili ora, mach xicʼbiloñixla chaʼan mi lac jacʼ jiñi Mandar tsaʼ bʌ i yʌcʼʌ Jehová tiʼ tojlel jiñi israelob. Pero la cujil chaʼan mucʼʌch i bej tsʼaʼlen jiñi i chaʼan tac bʌ xiba (Mal. 3:6).

6. a) ¿Bajcheʼ miʼ cʼʌn Satanás i chaʼan tac bʌ xiba chaʼan miʼ ticʼlan quixtañujob? b) Cheʼ bajcheʼ miʼ yʌl Eclesiastés 9:5, ¿bajcheʼ yilal añob jiñi tsaʼix bʌ chʌmiyob?

⁶ Jehová yujil chaʼan Satanás miʼ cʼʌn i chaʼan tac bʌ xiba chaʼan miʼ ticʼlan quixtañujob, jin chaʼan miʼ subeñonla lac tsʼaʼlen. Jumpʼejl ejemplo, miʼ cʼʌn chaʼan miʼ puc lot tac, bajcheʼ jiñi cʌntesa chaʼan jiñi chʌmeñoʼ bʌ an baqui miʼ majlelob ti chumtʌl (pejcan Eclesiastés 9:5). Cheʼ jaʼel, miʼ cʼʌn i bʌcʼtesan jiñi quixtañujob i chaʼan miʼ ñajtʼesañob tiʼ tojlel Dios. Yom bʌ jiñʌch chaʼan jiñi quixtañujob miʼ ñopob jiñi jontol bʌ xibajob, i mach jiñic Jehová.

7. ¿Chuqui miʼ subeñonla Jehová?

⁷ Cheʼ bajcheʼ tsaʼix laj qʼuele, Jehová miʼ subeñonla chuqui yom la cujil chaʼan jiñi Satanás yicʼot i xibajob maʼañic miʼ lotiñoñobla. Laʼ laj qʼuel chuqui tac miʼ mejlel lac mel chaʼan mi laj contrajiñob.

8. a) ¿Chuqui ñuc bʌ i cʼʌjñibal yom mi lac mel chaʼan miʼ mejlel laj contrajin jiñi jontol bʌ espíritujob? b) ¿Chuqui miʼ jamʌ tsictesan Salmo 146:4 tiʼ tojlel jiñi chʌmeñoʼ bʌ?

⁸ Laʼ lac pejcan i Tʼan Dios yicʼot laʼ lac wen ñaʼtan muʼ bʌ i yʌl. Ili jiñʌch junchajp ñuc bʌ i cʼʌjñibal chaʼan maʼañic mi lac ñop jiñi lot tac tilem bʌ ti xibajob. Jiñi i Tʼan Dios lajal bajcheʼ jay bʌ espada muʼ bʌ i jisʌben i cʼʌjñibal i lot tac Satanás (Ef. 6:17). Jumpʼejl ejemplo, wen tsiquil miʼ pʌs chaʼan jiñi chʌmeñoʼ bʌ maʼañix miʼ mejlel i pejcañob jiñi cuxulobto bʌ (pejcan Salmo 146:4). Yicʼot miʼ cʼajtesʌbeñonla chaʼan cojach Jehová miʼ  mejlel i yʌl ti toj chuqui miʼ cajel ti talto bʌ qʼuin (Is. 45:21; 46:10). Mi mucʼʌch lac pejcan i Tʼan Dios ti bele ora yicʼot mi lac wen ñaʼtan, chajpʌbil mi caj la cajñel chaʼan maʼañic mi lac ñop i mi lac tsʼaʼlen pejtelel i lot jiñi jontol bʌ espíritujob.

9. ¿Chuqui tac ochem bʌ tiʼ chaʼan bʌ xiba mach bʌ yomic mi lac mel?

⁹ Mach lac mel chuqui ochen tac bʌ tiʼ chaʼan bʌ xiba. Jiñi i sujm bʌ xñoptʼañonla maʼañic mi la cotsan lac bʌ ti xwujtob chaʼan miʼ mejlel lac pejcan jiñi chʌmeñoʼ bʌ. Cheʼ bajcheʼ tsaʼ laj qʼuele ti yambʌ temaj, maʼañic mi lac mel jiñi costumbre tac chucul bʌ yaʼ ti cʌntesa chaʼan jiñi chʌmeñoʼ bʌ an baqui miʼ majlelob ti chumtʌl. I maʼañic mi lac majlel baʼañob jiñi xqʼuel ecʼ chaʼan mi lac ñop laj cʌn chuqui miʼ cajel ti talto bʌ qʼuin (Is. 8:19). Mach yomic mi lac wis otsan lac bʌ ti ili melbalʌl (chaʼlebal) tac o yan tac bʌ bajcheʼ iliyi. La cujil chaʼan wen an i wocolel i miʼ mejlel i yʌcʼonla tiʼ tojlel Satanás yicʼot i xibajob.

10, 11. a) ¿Chuqui tsiʼ meleyob jiñi añoʼ bʌ ti Éfeso cheʼ tsiʼ cʌñʌyob i sujmlel? b) Cheʼ bajcheʼ miʼ yʌl 1 Corintios 10:21, ¿chucoch yom mi lac lajiñob, i bajcheʼ miʼ mejlel lac mel?

¹⁰ Laʼ lac jisan pejtelel chubʌʼan ochem bʌ tiʼ chaʼan xibajob. Cheʼ ti ñaxam bʌ siglo, yaʼ ti Éfeso, an quixtañujob tsaʼ bʌ i meleyob i chaʼan tac bʌ xiba. Pero tsiʼ qʼuextayob i melbal cheʼ tsiʼ cʌñʌyob i sujmlel. Jiñi Biblia miʼ yʌl chaʼan «cabʌl tsaʼ bʌ i chaʼleyob wujt tsiʼ tempayob i jun. Tsiʼ puluyob tiʼ wut winicob xʼixicob» (Hch. 19:19). Wen tsiquil chaʼan tsiʼ jacʼʌyob i yʌcʼ i bʌ tiʼ contra jiñi jontol bʌ espíritujob. Jiñi jun tac añoʼ bʌ i chaʼan tsiʼ puluyob i maʼañic tsiʼ majtan acʼʌyob o tsiʼ choñoyob, anquese wen lets tac i tojol. Tsiʼ ñumen qʼueleyob ti ñuc cheʼ utsʼat miʼ yajñelob yicʼot Jehová.

¹¹ ¿Bajcheʼ miʼ mejlel lac lajiñob? Mi an lac chubʌʼan muʼ bʌ lac poj cʼʌn chaʼan miʼ cʌntañonla  tiʼ contra jiñi jontol bʌ espíritujob yicʼot chaʼan maʼañic mi lac tajtʌl ti wocol, bajcheʼ ujʌl, cʌjchicʼʌbʌl o yan tac bʌ, utsʼat cheʼ muqʼuic lac jisan (pejcan 1 Corintios 10:21).

12. ¿Chuqui yom mi laj cʼajtiben lac bʌ?

¹² Laʼ lac wen tsajin chuqui mi laj qʼuel yicʼot mi lac ñaʼtan. Laʼ laj cʼajtiben lac bʌ: «¿Muʼ ba j qʼuel libro tac, revista o an tac bʌ ti Internet chaʼan bʌ xiba? ¿Bajcheʼ yilal jiñi música muʼ bʌ cubin, jiñi película yicʼot programa tac ti televisión muʼ bʌ j qʼuel yicʼot muʼ bʌ cʌsin ti videojuego? ¿Am ba ochem bʌ tiʼ chaʼan bʌ xiba? ¿Muʼ ba i pʌs chaʼan tac bʌ vampiro, zombijob o yan tac bʌ wen leco jax bʌ? ¿Muʼ ba i pʌs chaʼan mach lecojic jiñi magia yicʼot chaʼan chuqui tac miʼ melob yicʼot bʌ i pʼʌtʌlel xiba?». I sujmʌch, mach tiʼ pejtelic chuqui miʼ yʌjlel o miʼ pʌstʌl ochem tiʼ chaʼan tac bʌ xiba. Pero cheʼ mi lac ñaʼtan pejtelel iliyi, laʼ lac wen qʼuel chaʼan jiñi muʼ bʌ lac yajcan mach ochemic ti chuqui tac miʼ tsʼaʼlen Dios. La com lac chaʼlen wersa chaʼan sʌc miʼ chʌn ajñel laj conciencia tiʼ tojlel Jehová (Hch. 24:16). *

13. ¿Chuqui mach bʌ comic lac mel?

¹³ Mach la cʌl chaʼan bʌ xibajob. Chaʼan maʼañic mi lac mel, yom mi lac lajin jiñi ejemplo i chaʼan Jesús (1 P. 2:21). Cabʌl chuqui tsiʼ yubi tiʼ tojlel Satanás yicʼot jiñi xibajob cheʼ bʌ yaʼto an ti panchan. Pero cheʼ bʌ tsajñi ila ti Pañimil, maʼañic tsiʼ ñusa qʼuin i yʌl tiʼ tojlelob. Cojach tsiʼ chʼʌmʌ ti ñuc chaʼan miʼ yʌcʼ ti cʌjñel Jehová, mach jiñic Satanás. Cheʼ bajcheʼ Jesús, maʼañic mi la cʌl  ñumel i chaʼan bʌ xibajob. Muʼ bʌ lac mel, mi lac pʌs ti lac tʼan chaʼan tijicñayonla chaʼan jiñi «wen tac bʌ», yom i yʌl, jiñi i sujmlel (Sal. 45:1).

14, 15. a) ¿Chucoch mach yomic mi lac wen bʌcʼñan jiñi jontol bʌ espíritujob? b) ¿Chuqui miʼ coltañonla laj qʼuel chaʼan Jehová miʼ cʌntan i tejclum ili ora?

¹⁴ Mach lac bʌcʼñan jiñi jontol bʌ espíritujob. Ti ili pañimil, ti lac pejtelel an chuqui miʼ mejlel lac chaʼlen. Mach pijtʌbilic lac chaʼan miʼ mejlel ti ujtel jumpʼejl wocol, mi laj cʼamʼan o mi lac chʌmel. Pero mach yomic mi lac ñaʼtan chaʼan tiʼ mul xibajob. Jiñi Biblia miʼ yʌl chaʼan ti lac pejtelel mi lac mejlel ti «chujquel ti wocol» (Ec. 9:11, 12). Pero cheʼ jaʼel, Jehová añix i pʌsʌ chaʼan ñumento pʼʌtʌl bajcheʼ jiñi xibajob. Jumpʼejl ejemplo, maʼañic tsiʼ yʌcʼʌ chaʼan Satanás miʼ tsʌnsan Job (Job 2:6). I cheʼ tiʼ yorajlel Moisés tsiʼ pʌsʌ chaʼan ñumen an i pʼʌtʌlel bajcheʼ jiñi yujiloʼ bʌ magia ti Egipto (Éx. 8:18; 9:11). Ti wiʼil, Jehová tsiʼ yʌqʼue i pʼʌtʌlel Jesús chaʼan miʼ choc loqʼuel Satanás yicʼot xibajob yaʼ ti panchan. I maʼix jal yom chaʼan miʼ chojquelob ochel yaʼ ti chʼen maʼañic bʌ i yebal, baqui maʼañix majqui mi caj i ticʼlañob (Ap. 12:9; 20:2, 3).

¹⁵ Cabʌl chuqui miʼ coltañonla laj qʼuel chaʼan Jehová miʼ cʌntan i tejclum ili ora. Laʼ cu lac ñaʼtan iliyi: Woliyonla (yʌquelonla) ti subtʼan tiʼ pejtelel pañimil i mi lac pʌs i sujmlel (Mt. 28:19, 20). Cheʼ bajcheʼ jiñi, mi la cʌcʼ ti cʌjñel i melbal tac jiñi Diablo. Cheʼ muqʼuic i mejlel, miʼ waʼchocon jiñi subtʼan, pero mach cheʼiqui. Jin chaʼan, mach yomic mi lac bʌcʼñan jiñi jontol bʌ espíritujob. La cujil chaʼan Jehová woliʼ qʼuel «tiʼ pejtelel pañimil jini xucʼuloʼ bʌ i pusicʼal muʼ bʌ i ñopob, chaʼan miʼ pʌsbeñob ñuc bʌ i coltaya» (2 Cr. 16:9). Mi xucʼulonla ti Dios, jiñi xibajob maʼañic chuqui miʼ mejlel i tumbeñonla maʼañix bʌ i tsʼʌcal.

16, 17. Alʌ jumpʼejl ejemplo muʼ bʌ i pʌs chaʼan yomʌch an lac chʼejlel chaʼan miʼ mejlel lac mʌlben jiñi jontol bʌ espíritujob.

¹⁶ Chaʼan mi lac mʌlben jiñi jontol bʌ espíritujob yomʌch an lac chʼejlel, ñumento  cheʼ bʌ jiñi la camigojob o lac familia miʼ xicʼoñobla lac mel costumbre tac. Pero Jehová miʼ yʌqʼuen i bendición jiñi chʼejloʼ bʌ. Laʼ laj qʼuel tsaʼ bʌ ujti tiʼ tojlel jiñi hermana Erica, chʼoyol bʌ ti Ghana. Tsiʼ teche i cʌn chaʼan Biblia cheʼ bʌ 21 i jabilel. Come jiñi i papá yujil magia, tsiʼ ñaʼtayob chaʼan Erika mucʼʌch caj i cʼux jiñi weʼel muʼ bʌ i yʌqʼuentel i chʼujlel i ñojteʼelob i tat come jiñobʌch i costumbre. Cheʼ bʌ Erica maʼañic tsiʼ jacʼʌ, jiñi i familia tsiʼ qʼuele chaʼan maʼañic woliʼ chʼʌm ti ñuc i ñojteʼelob. Tsiʼ ñopoyob chaʼan miʼ cajelob ti cʼamʼan yicʼot ti sojquel chaʼan miʼ tojob i mul.

¹⁷ Tsiʼ ñopoyob i xicʼ chaʼan miʼ mel jiñi costumbre, pero Erika maʼañic tsiʼ jacʼʌ, anquese tsaʼ chojqui loqʼuel tiʼ yotot. Pero an hermanojob tsaʼ bʌ i yotsayob tiʼ yotot. Cheʼ bajcheʼ jiñi, Jehová tsiʼ yʌqʼue i bendición, jumpʼejl tsijiʼ bʌ i familia muʼ bʌ i chʼujutesañob Dios (Mr. 10:29, 30). Anquese tsaʼ tsʼaʼlenti i tsaʼ pulbenti i chubʌʼan, xucʼul tsaʼ ajñi, tsiʼ chaʼle chʼʌmjaʼ i juntiquilix precursora regular. Maʼañic miʼ bʌcʼñan xibajob. I miʼ yʌl tiʼ tojlel i familia: «Ti jujumpʼejl qʼuin mij cʼajtiben Jehová chaʼan laʼ mejlic i yubiñob i tijicñʌyel cheʼ miʼ cʌñob jaʼel yicʼot miʼ melbeñob i yeʼtel».

18. ¿Chuqui tac ti bendición mi caj lac taj mi mucʼʌch lac ñop tiʼ coltaya Jehová?

¹⁸ Mach ti lac pejtelelic mi lac taj tsʌts bʌ wocol chaʼan lac ñopoñel (chʼujbiya) ti Dios. Pero yomʌch mi lac chaʼlen wersa ti lac pejtelel chaʼan mi laj contrajin jiñi jontol bʌ espíritujob i mi lac ñop tiʼ coltaya Jehová. Cheʼ mucʼʌch lac mel, mi caj lac taj cabʌl bendición. Jumpʼejl ejemplo, maʼañix mi caj lac ñop i lot tac Satanás. Cheʼ jaʼel, maʼañic mi caj lac wis cʌy lac melben i yeʼtel Dios come maʼañic mi caj lac bʌcʼñan jiñi xibajob. Pero jiñi ñumen ñuc bʌ, jin cheʼ ñumen lʌcʼʌl mi caj la cajñel la quicʼot Jehová. Jiñi xcʌntʼan Santiago tsiʼ yʌlʌ: «Aqʼuen laʼ bʌ Dios. Pʌsʌ laʼ bʌ tiʼ contra xiba. Cheʼ jini mi caj i putsʼtañetla. Lʌcʼtesan laʼ bʌ baʼan Dios. Cheʼ jini mi caj i lʌcʼtesan i bʌ baʼ añetla» (Stg. 4:7, 8).