1. ¿Chuqui la com lac mel jiñi i wiñiconbʌla Dios, i chucoch? (Qʼuele jiñi dibujo am bʌ tiʼ tejchibal).

JESUCRISTO tsiʼ yʌqʼue ili mandar jiñi xcʌntʼañob i chaʼan: «Cucula cheʼ jini. Sutqʼuiñob ti xcʌntʼañob winicob xʼixicob ti pejtelel pañimil» (Mt. 28:19). Jiñi xucʼul bʌ i wiñiconla Dios la com laj cʌn bajcheʼ miʼ mejlel lac mel ti tsʼʌcʌl jiñi eʼtel (troñel) tsaʼ bʌ aqʼuentiyonla (2 Ti. 4:5). Tiʼ sujm, jiñʌch jiñi ñumen ñuc bʌ, am bʌ i cʼʌjñibal yicʼot yom bʌ melol ili ora. Pero tajol wocol mi la cubin chaʼan mi lac ñumen aqʼuen i yorajlel jiñi subtʼan cheʼ bajcheʼ la com.

2. ¿Chuqui tac miʼ mejlel i yʌcʼ chaʼan wocol mi lac tsʼʌctesan jiñi la queʼtel tiʼ chaʼan bʌ Dios?

² An yan tac bʌ ñuc bʌ i cʼʌjñibal muʼ bʌ lac mel yom bʌ mi la cʌqʼuen cabʌl i yorajlel yicʼot lac pʼʌtʌlel. Tajol cabʌl ora mi lac chaʼlen eʼtel chaʼan mi lac mʌcʼlan lac familia. Cheʼ jaʼel, tajol an yan tac bʌ chuqui an ti lac wenta ti lac familia, o woli (choncol) lac ñusan cʼamʌjel, cʌlʌx chʼijiyemlel o wocol tac tiʼ caj ñoxlel. ¿Bajcheʼ miʼ mejlel laj cuch pejtelel iliyi i tsʼʌcʌl mi lac mel (chaʼlen) jiñi la queʼtel tiʼ chaʼan bʌ Dios?

3. ¿Chuqui miʼ pʌsbeñonla jiñi tsaʼ bʌ i yʌlʌ Jesús yaʼ ti Mateo 13:23?

³ Mach yomic mi la cubin lac chʼijiyemlel mi maʼañic bajcheʼ cʼamel miʼ mejlel laj cʌqʼuen i yorajlel jiñi i chaʼan bʌ Jehová. Jesús yujil chaʼan mach junlajalic mi caj lac mejlel ti subtʼan (pejcan Mateo 13:23). Cheʼ mi lac chaʼlen wersa chaʼan tiʼ pejtelel ora mi lac melben i yeʼtel Jehová ti jumpʼejl lac pusicʼal mucʼʌch caj i wen qʼuel ti ñuc (He. 6:10-12). Cheʼ jaʼel, tajol mi lac ñaʼtan chaʼan muʼto i mejlel lac ñumen melben i yeʼtel. Ti ili temaj, mi caj laj qʼuel chuqui miʼ mejlel lac  mel chaʼan ñaxan mi la cʌcʼ ti laj cuxtʌlel jiñi la queʼtel ti chaʼan bʌ Dios, chaʼan maʼañic chuqui miʼ mʌctañonla i mi lac ñumen weñʼan ti lac subtʼan yicʼot ti laj cʌntesa. Pero laʼ lac ñaxan qʼuel chuqui yom i yʌl cheʼ tsʼʌcʌl mi lac mel jiñi la queʼtel tiʼ chaʼan bʌ Dios.

4. ¿Chuqui yom i yʌl cheʼ tsʼʌcʌl mi lac mel la queʼtel tiʼ chaʼan bʌ Dios?

⁴ Chaʼan mi lac mel ti tsʼʌcʌl jiñi la queʼtel ti chaʼan bʌ Dios yom i yʌl chaʼan mi lac ñumen chaʼlen subtʼan yicʼot cʌntesa. Jehová mach cojic jach miʼ qʼuel ti ñuc jaypʼejl ora mi la cʌcʼ, muʼ bʌ i qʼuel jiñʌch chucoch mi lac mel. Mi jiñʌch miʼ ñijcañonla jiñi laj cʼuxbiya ti Dios yicʼot tiʼ tojlel lac piʼʌlob, mi caj lac chaʼlen wersa lac mel jiñi la queʼtel bajcheʼ xñoptʼan * (Mr. 12:30, 31; Col. 3:23). Ili yom i yʌl chaʼan mi caj laj cʼʌn pejtelel lac pʼʌtʌlel chaʼan mi lac mel. Mi mucʼʌch laj qʼuel ti ñuc jiñi lac subtʼan, mi caj lac chaʼlen wersa chaʼan cabʌl wiñicob xʼixicob (quixtañujob) miʼ yubiñob jiñi wen tʼan.

5, 6. Tsictesan yicʼot jumpʼejl ejemplo bajcheʼ miʼ mejlel la cʌcʼ ti ñaxan i melol i yeʼtel Dios anquese mach cabʌlic i yorajlel lac chaʼan.

⁵ Laʼ lac ñaʼtan tiʼ tojlel juntiquil xcolel muʼ bʌ i mulan i jatsʼ guitarra, i cheʼʌch miʼ mel jajayajl miʼ tajben i yorajlel. Ti wiʼil, miʼ yʌqʼuentel eʼtel ti jumpʼejl restaurante chaʼan miʼ jatsʼ guitarra tiʼ yujtibal semana. Pero come mach letsic miʼ tojtʌl, miʼ chaʼlen eʼtel ti jumpʼejl tienda ti lunes cʼʌlʌl ti viernes. I sujmʌch chaʼan cabʌl ora miʼ ñusan yaʼ ti tienda, pero muʼ bʌ i ñumen mulan jiñʌch jiñi música. Yom chaʼan ñumen wen miʼ jatsʼ yicʼot jin jax miʼ mel tiʼ pejtelel ora. Jin chaʼan, cheʼ bʌ mi tsʼitaʼ tajben tac i yorajlel miʼ jatsʼ i guitarra.

⁶ Cheʼʌch joñonla jaʼel, tajol mach mejlic lac ñumen aqʼuen i yorajlel jiñi subtʼan cheʼ bajcheʼ la com. Pero tiʼ sujm, jiñʌch muʼ bʌ lac ñumen mulan lac mel. Mi lac chaʼlen wersa chaʼan jiñi wen tʼan chaʼan i Yumʌntel Dios miʼ ñumen cʼotel tiʼ pusicʼal jiñi quixtañujob.  Pero come cabʌl la queʼtel, tajol mi laj cʼajtiben lac bʌ bajcheʼ miʼ mejlel la cʌcʼ ti ñaxan jiñi i chaʼan bʌ Dios.

7, 8. ¿Bajcheʼ miʼ mejlel lac lajin Jesús ti lac subtʼan?

⁷ Jesús jiñʌch jiñi ñumen wem bʌ ejemplo chaʼañonla chaʼan bajcheʼ yilal tsiʼ qʼuele jiñi subtʼan. Ñumen ñuc bʌ tiʼ tojlel jiñʌch cheʼ tsiʼ subu chaʼan bʌ i Yumʌntel Dios (Jn. 4:34, 35). Tsiʼ wen chaʼle xʌmbal chaʼan miʼ subeñob wen tʼan cabʌl quixtañujob. Tiʼ pejtelel ora tsiʼ chaʼle wersa subtʼan ti jujumpʼejl otot yicʼot baqui miʼ ñumel cabʌl lac piʼʌlob. Jiñi ñaxam bʌ tiʼ cuxtʌlel jiñʌch jiñi subtʼan.

⁸ Miʼ mejlel lac lajin Jesús cheʼ mi lac chaʼlen wersa lac pejcan jiñi quixtañujob ti bajcheʼ jach ora yicʼot baqui jach añonla. Mi laj cʌy chuqui tac mi lac mulan chaʼan mi lac mejlel ti subtʼan (Mr. 6:31-34; 1 P. 2:21). An hermanojob mejloʼ bʌ ti ochel ti precursor especial, regular o auxiliar. Yañoʼ bʌ, an i cʌñʌyob yambʌ tʼan o an majlemob ti chumtʌl baqui yomto xsubtʼañob. Pero yonlel jiñi eʼtel muʼ bʌ i mejlel jiñʌch tiʼ tojlel jiñi xsubtʼañob, tajol maʼañic bʌ miʼ mejlelob ti ochel bajcheʼ precursor, muʼ bʌ i yʌcʼob i coltaya cheʼ bajcheʼ cʼamel miʼ mejlelob. Jin chaʼan, mach yʌlʌyic bajcheʼ añonla, Jehová maʼañic miʼ cʼajtibeñonla mach bʌ mejlic lac mel. Yom bʌ jiñʌch cheʼ mi la cubin lac tijicñʌyel cheʼ mi lac sub «jiñi ñuc bʌ wen tʼan tilem bʌ ti jiñi tijicña bʌ Dios» (1 Ti. 1:11; Dt. 30:11).

9. a) ¿Bajcheʼ tsiʼ ñumen qʼuele ti ñuc Pablo jiñi subtʼan anquese tsiʼ chaʼle eʼtel? b) ¿Chuqui miʼ pʌs Hechos 28:16, 30, 31 chaʼan bajcheʼ yilal tsiʼ qʼuele Pablo jiñi subtʼan?

⁹ Jiñi apóstol Pablo jiñʌch yambʌ wem bʌ ejemplo. Cheʼ i chaʼyajlelix tsaʼ majli ti subtʼan bajcheʼ misionero i tsajñi ti Corinto, tsiʼ jumucʼ chaʼle eʼtel tiʼ melol pisil bʌ otot tac, come mach oñic i taqʼuin. Pero mach jiñic ñumen ñuc bʌ tsiʼ qʼuele. Tsiʼ mele ili eʼtel chaʼan miʼ mʌcʼlan i bʌ, i cheʼ jiñi, miʼ mejlel i suben wen tʼan jiñi quixtañujob ti Corinto i mach jiñobic miʼ tojbeñob chuqui i cʼʌjñibal i chaʼan (2 Co. 11:7). Anquese tsaʼʌch i chaʼle eʼtel, tsiʼ chʌn acʼʌ ti ñaxan jiñi eʼtel tiʼ chaʼan bʌ Dios, i ti jujumpʼejl sábado tsiʼ chaʼle subtʼan. Cheʼ bʌ tsaʼix i taja i cʼʌjñibal bʌ i chaʼan, tsiʼ ñumen acʼʌ i bʌ ti subtʼan. Tsiʼ ‹chaʼle wersa subtʼan ti Corinto. Tsiʼ chʌn sube judíojob chaʼan Cristojʌch jini Jesús› (Hch. 18:3-5; 2 Co. 11:9). Ti wiʼil, cheʼ bʌ tsaʼ cʌjchi cʌytʌl chaʼpʼejl jab tiʼ yotot yaʼ ti Roma, tiʼ sube wen tʼan jiñi muʼ bʌ i julaʼtañob yicʼot tiʼ tsʼijbu carta tac (pejcan Hechos 28:16, 30, 31). Maʼañic tsiʼ yʌcʼʌ chaʼan chuqui jach miʼ mʌctan tiʼ melol i yeʼtel Dios. Tiʼ tsʼijbu: «Jini chaʼan maʼanic mic lujbʼan lojon, [...] cheʼ bʌ tsiʼ yʌqʼueyon lojon queʼtel» (2 Co. 4:1). Cheʼ bajcheʼ Pablo, miʼ mejlel lac mel chaʼan jiñi subtʼan jiñʌch ñumen ñuc bʌ ti laj cuxtʌlel anquese yom mi lac chaʼlen eʼtel.

10, 11. ¿Chuqui yom mi lac mel chaʼan mi lac tsʼʌctesan ti wen jiñi la queʼtel tiʼ chaʼan bʌ Dios anquese cʼamonla?

¹⁰ ¿Chuqui miʼ mejlel lac mel mi mach mejloñicla ti subtʼan ti jujumpʼejl otot tiʼ cʼaj añix lac jabilel o mach cʼocʼoñicla? An yan tac bʌ bajcheʼ mi lac mejlel ti subtʼan. Jiñi xñoptʼañob ti ñaxam bʌ siglo tiʼ subuyob wen tʼan baqui jach añob. Tsiʼ chaʼleyob wersa i subob jiñi i sujmlel baqui jach an quixtañujob: Ti jujumpʼejl otot, yaʼ baʼ miʼ ñumel cabʌl lac piʼʌlob yicʼot ti bajcheʼ jach ora (Hch. 17:17; 20:20). Pero ¿ixcu mi mach jalic mi lac mejlel ti xʌmbal? Tajol mi lac mejlel ti buchtʌl baqui miʼ ñumel cabʌl lac piʼʌlob i mi lac pejcañob. Cheʼ jaʼel, mi lac mejlel ti subtʼan ti teléfono, mi lac mel carta yicʼot baqui jach añonla. Yonlel xsubtʼañob mach bʌ wen cʼocʼobic wen  tijicña miʼ yubiñob cheʼ bʌ miʼ chaʼleñob subtʼan bajcheʼ tac ili.

¹¹ Jin chaʼan, mejlʌch lac tsʼʌctesan la queʼtel tiʼ chaʼan bʌ Dios anquese cʼamonla. Laʼ lac chaʼ cʼajtesan jiñi apóstol Pablo. Tsiʼ yʌlʌ: «Tsiquil mach chʼoyolic ti joñonla jini ñuc bʌ lac pʼʌtʌlel, pero chʼoyol ti Dios» (2 Co. 4:7). Ili pʼʌtʌlel tsaʼ cʼʌjñibʌyi i chaʼan cheʼ tsaʼ cʼamʼa cheʼ bʌ woli ti subtʼan ti yambʌ tejclum. Tiʼ sube jiñi chumuloʼ bʌ ti Galacia: «Tsac subeyetla ili wen tʼan cheʼ ti ñaxan cheʼ yaʼ añon baʼ añetla chaʼan tiʼ caj tsiʼ tajayon cʼamʌjel» (Gá. 4:13). Cheʼʌch joñonla jaʼel, tajol jiñi laj cʼamʌjel miʼ yʌcʼ chaʼan mi lac subeñob wen tʼan jiñi doctorob, jiñi enfermerojob yicʼot yambʌlob muʼ bʌ i chaʼleñob coltaya. Cabʌl muʼ bʌ i chaʼleñob eʼtel bajcheʼ ili, woliyob ti eʼtel cheʼ mi lac ñumel tiʼ yototob.

12. ¿Chuqui yom i yʌl cheʼ «tojʌch baqui miʼ qʼuel» lac wut?

¹² Jesús tsiʼ yʌlʌ: «Jini lac wut lámparajʌch chaʼan lac bʌcʼtal. Mi weñʌch laʼ wut [o «tojʌch baqui miʼ qʼuel», TNM], mi laʼ wen qʼuel i sʌclel pañimil» (Mt. 6:22). ¿Chuqui yom i yʌl ili tʼan tac? Chaʼan junsujm jach baqui yom an lac ñaʼtʌbal, maʼañic chuqui yom miʼ mʌctañonla. Jesús tsiʼ pʌsʌ bajcheʼ yom miʼ mejlel cheʼ bʌ tsiʼ yʌcʼʌ tiʼ ñaʼtʌbal i yeʼtel Dios, tsiʼ cʌntesa jiñi xcʌntʼañob chaʼan yomʌch miʼ yʌcʼob i ñaʼtʌbal tiʼ yeʼtel Dios yicʼot tiʼ Yumʌntel. Mi lac lajin Jesús mi jiñʌch mi laj qʼuel ti ñuc jiñi subtʼan ti laj cuxtʌlel cheʼ bʌ ‹ñaxan mi lac sajcan i yumʌntel Dios yicʼot i tojel› (Mt. 6:33).

13. ¿Chuqui miʼ mejlel i coltañonla chaʼan yaʼ jach mi la cʌcʼ lac ñaʼtʌbal ti subtʼan?

 ¹³ Junchajp bajcheʼ mi la cʌcʼ lac ñaʼtʌbal ti jiñi subtʼan jiñʌch cheʼ maʼañic mi lac sʌclan cabʌl chubʌʼañʌl i mi laj coltañob i cʌn Jehová jiñi yambʌlob yicʼot mi cʼuxbiñob. * Jumpʼejl ejemplo, ¿mejl ba laj qʼuextan i yorajlel la queʼtel chaʼan mi lac ñumen chaʼlen subtʼan ti jujumpʼejl semana? ¿Mejl ba lac tsʼitaʼ cʌy jiñi ñusaqʼuin tac muʼ bʌ i wen chilbeñonla i yorajlel am bʌ lac chaʼan?

14. ¿Chuqui tsiʼ mele jumpʼejl xñujpuñel chaʼan miʼ ñumen aqʼueñob i yorajlel jiñi subtʼan?

¹⁴ Laʼ laj qʼuel chuqui tsiʼ mele juntiquil anciano i cʼabaʼ Elías yicʼot i yijñam. Miʼ yʌl: «Maʼañic tsaʼ mejliyon lojon ti ochel ti precursor ti jiñi bʌ ora, pero añʌch chuqui yom mi lon c mel. Jin chaʼan, an chuqui tac tsaʼ lon c mele chaʼan mi lon cʌqʼuen i yorajlel jiñi subtʼan. Jumpʼejl ejemplo, maʼañix tsaʼ caji lon j cʼʌn cabʌl taqʼuin, mach cabʌlix ora mi lon j cʌqʼuen jiñi ñusaqʼuin tac come tsaʼ j qʼuele lojon chaʼan miʼ chilbeñon lon cabʌl ora, i cheʼ jaʼel, tsaʼ j cʼajti lojon chaʼan mach cabʌlix ora mi caj lon c chaʼlen eʼtel. Tsaʼʌch i wen coltayon lojon, come muqʼuix lon c chaʼlen subtʼan cheʼ ti icʼan, mi lon cʌcʼ estudio yicʼot chaʼyajl mic loqʼuel lojon ti subtʼan ti jujumpʼejl uw cheʼ ti semana. Wen tijicña mi lon cubin».

15, 16. Cheʼ bajcheʼ miʼ yʌl 1 Timoteo 4:13, 15, ¿bajcheʼ miʼ mejlel lac ñumen weñʼesan lac subtʼan yicʼot laj cʌntesa? (Qʼuele jiñi recuadro « Mejl tac bʌ i coltañonla chaʼan tsʼʌcʌl mi lac mel la queʼtel tiʼ chaʼan bʌ Dios»).

¹⁵ Yambʌ bajcheʼ miʼ mejlel lac tsʼʌctesan ti wen jiñi la queʼtel tiʼ chaʼan bʌ Dios jiñʌch cheʼ  mi lac ñumen weñʼesan bajcheʼ mi lac chaʼlen cʌntesa. Jinto jiñi quixtañujob chajpʌbilobix bʌ ti jumpʼejl eʼtel yomto miʼ bej cʌñob, jin chaʼan miʼ subentelob chaʼan yom miʼ bej chʼʌmob i cʌntesʌntel. Cheʼʌch joñonla jaʼel, yom mi lac ñumen weñʼesan bajcheʼ mi lac chaʼlen cʌntesa (Pr. 1:5; pejcan 1 Timoteo 4:13, 15).

¹⁶ ¿Bajcheʼ miʼ mejlel lac mel? Jiñʌch cheʼ mi lac ñʌchʼtan muʼ bʌ i yʌjlel yaʼ ti tempa bʌ I Subtʼan yicʼot i Melbal jiñi xÑoptʼan. Yaʼi mi lac chajpʌntel chaʼan ñumen wen mi lac chaʼlen subtʼan. Jumpʼejl ejemplo, cheʼ bʌ jiñi am bʌ ti wenta tempa bʌ miʼ yʌqʼuen ticʼojel jiñi tsaʼ bʌ i ñusayob i demostración, laʼ lac chʼʌm ti ñuc jiñi mejl bʌ i coltañonla chaʼan mi lac ñumen weñʼesan lac subtʼan. Cheʼ jiñi, laʼ lac mel cheʼ bʌ an majqui mi lac pejcan. Yambʌ muʼ bʌ i mejlel i coltañonla jiñʌch cheʼ mi laj cʼajtiben i coltaya jiñi am bʌ tiʼ wenta jiñi grupo o mi lac suben chaʼan miʼ loqʼuel ti subtʼan la quicʼot. Miʼ mejlel laj cʼajtibeñob i coltaya jaʼel jiñi yambʌ hermanojob añix bʌ cabʌl ora i cajelob ti subtʼan, juntiquil precursor o jiñi superintendente i chaʼan circuito. Pejtelel iliyi, mi caj i coltañonla chaʼan ñumen wen mi laj cʼʌn jiñi eʼtijib tac chaʼan bʌ cʌntesa. Cheʼ jiñi, ñumen wen mi caj lac ñusan cheʼ bʌ mi lac chaʼlen subtʼan yicʼot cʌntesa.

17. ¿Bajcheʼ yubil mi la cubin lac bʌ cheʼ tsʼʌcʌl mi lac mel i yeʼtel Dios?

¹⁷ Jiñʌch ñuc bʌ lac majtan cheʼ mi lac mejlel ti tem eʼtel la quicʼot Jehová (1 Co. 3:9). Cheʼ bʌ mi lac sʌclan «chuqui ñumen wen» i mi la cʌcʼ lac ñaʼtʌbal tiʼ melol i yeʼtel Dios, mi lac mel ‹tiʼ tijicñʌyel lac pusicʼal› (Fil. 1:10; Sal. 100:2). Jiñi xʼeʼtelonbʌla i chaʼan Dios la cujil chaʼan mi caj i yʌqʼueñonla lac pʼʌtʌlel chaʼan tsʼʌcʌl mi lac melben i yeʼtel, mach yʌlʌyic mi an lac wocol tac o an chuqui miʼ mʌctañonla (2 Co. 4:1, 7; 6:4). Anquese cabʌl mi lac chaʼlen subtʼan o tsʼitaʼ jach, wen tijicña mi la cubin cheʼ mi lac melben i yeʼtel Dios tiʼ pejtelel lac pusicʼal (Gá. 6:4). Cheʼ tsʼʌcʌl mi lac mel, mi lac pʌs laj cʼuxbiya tiʼ tojlel Jehová yicʼot lac piʼʌlob. ¿Chuqui mi caj lac taj? Jiñi Biblia miʼ yʌl: «Cheʼ jini mi caj a coltan a bʌ yicʼot jini muʼ bʌ i yubiñob a tʼan» (1 Ti. 4:16).