1, 2. ¿Bajcheʼ yilal woliʼ ñusan Jesús cheʼ bʌ tsiʼ yʌlʌ jiñi cojix bʌ i tʼan tac cheʼ bʌ muqʼuix caj i chʌmel?

JIÑɅCH jiñi 14 i chaʼan nisán cheʼ ti jabil 33. Cheʼ bʌ jiñi i contrajob Jesús miʼ yujtel i jopʼbeñob i mul yicʼot i yʌlob chaʼan mi caj i tsʌnsʌntel anquese maʼañic chuqui tsiʼ mele, miʼ wajleñob, miʼ pʼumpʼum ticʼlañob yicʼot miʼ chʼijob ti teʼ. Jajayajl miʼ jap icʼ yicʼot miʼ chaʼlen tʼan wen cʼux miʼ yubin come chʼijbil i cʼʌb yicʼot i yoc, pero wersa yom miʼ chaʼlen tʼan come an ñuc tac bʌ i cʼʌjñibal yom bʌ miʼ yʌl.

² Laʼ lac tsajin tsaʼ bʌ i yʌlʌ Jesús cheʼ bʌ yaʼ jichʼil ti teʼ yicʼot chuqui miʼ mejlel laj cʌn. Miʼ mejlel la cʌl chaʼan lajal bajcheʼ mi caj la cubiben i tʼan (Mt. 17:5).

3. ¿Majqui woliʼ taj ti tʼan Jesús cheʼ bʌ tsiʼ yʌlʌ: «C Tat ñusʌbeñob i mul»?

³ Tsaʼ bʌ i yʌlʌ Jesús. Cheʼ bʌ tsaʼ ujti i chʼijob ti teʼ, Jesús tiʼ sube Jehová: «C Tat ñusʌbeñob i mul». ¿Majqui woliʼ tajob ti tʼan? Jiñi tsaʼ bʌ i bej alʌ miʼ coltañonla lac ñaʼtan majquiyob: «Mach yujilobic chuqui woliʼ chaʼleñob » o woliʼ melob (Lc. 23:33, 34). Tajol jin woli (choncol) i taj ti tʼan jiñi soldadojob romanojoʼ bʌ tsaʼ bʌ i chʼijiyob tiʼ yoc yicʼot tiʼ cʼʌb. Mach yujilobic majqui jiñi Jesús. Tajol jin woli (yʌquel) i taj ti tʼan jaʼel jiñi tsaʼ bʌ i yʌlʌyob chaʼan yom miʼ tsʌnsʌntel, pero tiʼ wiʼil tsiʼ yʌcʼʌyob i ñopoñel tiʼ tojlel (Hch. 2:36-38). Jesús maʼañic tsiʼ yʌcʼʌ chaʼan jiñi tsaʼ bʌ melbenti miʼ yʌqʼuen i lot i michʼajel tiʼ  pusicʼal (1 P. 2:23). Tiʼ sube Jehová chaʼan miʼ ñusʌben i mul jiñi tsaʼ bʌ i yʌcʼʌyob ti tsʌnsʌntel.

4. ¿Chuqui tsiʼ pʌsbeyonla Jesús cheʼ bʌ tsiʼ ñusʌbe i mul jiñi i contrajob?

⁴ ¿Chuqui mi laj cʌn? Yom mi lac ñusʌben i mul yambʌlob cheʼ bajcheʼ tsiʼ mele Jesús (Col. 3:13). Tajol an lac piʼʌlob o lac familia muʼ bʌ i contrajiñoñobla come maʼañic miʼ chʼʌmbeñob i sujm jiñi ñopol bʌ lac chaʼan yicʼot bajcheʼ chumulonla. Tajol miʼ yʌlob mach bʌ i sujmic ti lac tojlel, miʼ yʌcʼoñoñobla ti quisin, miʼ tsilob lac jun tac o muʼto i yʌlob chaʼan an chuqui mi caj i tumbeñoñobla. Mach yomic mi lac lot lac michʼajel tiʼ tojlelob, laʼ laj cʼajtiben Jehová chaʼan miʼ jambeñob i wut chaʼan ti jumpʼejl bʌ qʼuin miʼ ñopob jiñi i sujmlel (Mt. 5:44, 45). An i tajol wocol mi la cubin chaʼan mi lac ñusʌben i mul yambʌlob, ñumento mi an chuqui tsiʼ tumbeyoñobla. Pero mi tsaʼ la cʌcʼʌ ti colel jiñi lac michʼ pusicʼal, mi caj lac bajñel ticʼlan lac bʌ. Juntiquil hermana miʼ yʌl: «Cujil chaʼan cheʼ mic ñusʌben i mul yambʌlob mach yomic i yʌl chaʼan wen mij qʼuel jiñi muʼ bʌ i melob o chaʼan mi cʼʌc c bʌ ti ticʼlʌntel, yom i yʌl, chaʼan woli c choc loqʼuel jiñi c michʼ pusicʼal» (Sal. 37:8). Cheʼ bʌ mi lac ñusʌben i mul yambʌlob, woli lac pʌs chaʼan mach la comic miʼ ticʼlañonla jiñi mach bʌ wentaquic (Ef. 4:31, 32).

5. ¿Chuqui tiʼ sube Jesús juntiquil xujchʼ, i chucoch tsiʼ yʌqʼue jiñi i pijtaya?

⁵ Tsaʼ bʌ i yʌlʌ Jesús. Tiʼ tʼejl Jesús, tsaʼ chʼijleyob chaʼtiquil xujchʼob. Ti ñaxan, tiʼ chaʼticlelob tsiʼ waʼleyob jaʼel (Mt. 27:44). Cheʼ jiñi, juntiquil tsiʼ cʌyʌ i wajlen come tsiʼ qʼuele chaʼan Jesús «maʼanic chuqui jontol» tsiʼ mele (Lc. 23:40, 41). I mach jiñic jach jiñi, tsiʼ pʌsʌ jaʼel chaʼan miʼ ñop chaʼan Jesús mi caj i chaʼ chʼojyel yicʼot mi caj i sujtel ti Rey. Tiʼ sube: «C Yum ñaʼtañon cheʼ maʼ tilel ti a yumʌntel» (Lc. 23:42). Tsiquil chaʼan mucʼʌch i wen ñop. Jesús tsiʼ jacʼbe: «Tiʼ sujm mic subeñet wʌle, mi caj a wajñel a wicʼoton ti Paraíso», maʼañic tsiʼ yʌlʌ chaʼan tiʼ yumʌntel (Lc. 23:43, TNM). Jiñi tʼan «mi caj a wajñel a wicʼoton» miʼ pʌs chaʼan jumpʼejlʌch tʼan tsaʼ bʌ bajñel aqʼuenti jiñi wiñic. Jesús yujil chaʼan jiñi i Tat wen yujil pʼuntaya, jin chaʼan tsiʼ yʌqʼue i pijtaya jiñi xujchʼ cheʼ bʌ muʼto caj ti chʌmel (Sal. 103:8).

6. ¿Chuqui miʼ pʌsbeñonla tsaʼ bʌ i sube Jesús jiñi xujchʼ?

⁶ ¿Chuqui mi laj cʌn? Jesús tsiʼ yʌcʼʌ ti tsictiyel bajcheʼ yilal i Tat (He. 1:3). Jehová yom i ñusʌbeñonla lac mul yicʼot i pʼuntañonla mi mucʼʌch lac chaʼ ñaʼtan lac bʌ chaʼan pejtelel jiñi tsaʼ bʌ lac mele yicʼot mi mucʼʌch la cʌcʼ lac ñopoñel cheʼ bʌ tsaʼ chʌmi Jesucristo (1 Jn. 1:7). Pero ¿chuqui miʼ mejlel lac mel mi wocolto mi la cubin chaʼan mi lac ñop chaʼan Jehová mucʼʌch caj i ñusʌbeñonla lac mul chaʼan tsaʼ bʌ lac mele ti wajali? Laʼcu laʼ ñaʼtan iliyi: Cheʼ bʌ tsʼitaʼ jachix yom chaʼan miʼ chʌmel (sajtel) Jesús, tsiʼ pʼunta juntiquil xujchʼ woli jaxto bʌ i tech i ñop. Ili miʼ pʌsbeñonla chaʼan Jehová mucʼʌch caj i pʼuntan jiñi xucʼul bʌ i wiñicob, woli bʌ i chaʼleñob wersa chaʼan miʼ jacʼbeñob i tʼan (Sal. 51:1; 1 Jn. 2:1, 2).

7. Cheʼ bajcheʼ miʼ yʌl Juan 19:26, 27, ¿chuqui tiʼ sube Jesús jiñi María yicʼot Juan, i chucoch?

⁷ Tsaʼ bʌ i yʌlʌ Jesús (pejcan Juan 19:26, 27). Jesús yom chaʼan an majqui miʼ chʼʌm tiʼ wenta i ñaʼ, tajol mebaʼix ti jimbʌ ora. Cheʼ bʌ miʼ chʌmel Jesús, jiñi i yerañob mucʼʌch  mejlel i yʌqʼueñob chuqui i cʼʌjñibal bʌ i chaʼan. Pero tajol maxto xcʌntʼañobic ti jimbʌ ora. Pero ¿majqui mi caj i coltan María tiʼ chaʼan bʌ Dios? Juan juntiquilʌch xucʼul bʌ apóstol i juntiquil wem bʌ i yamigo Jesús. Jesús miʼ qʼuel bajcheʼ i familia pejtelel muʼ bʌ i chʼujutesan Jehová (Mt. 12:46-50). Jesús miʼ cʼuxbin i ñaʼ i yom chaʼan wen miʼ yajñel, jin chaʼan tiʼ sube Juan chaʼan miʼ cʌntan come yujil chaʼan mucʼʌch caj i coltan chaʼan miʼ bej melben i yeʼtel (troñel) Jehová. Tiʼ sube María: «Qʼuele a walobil», cheʼ jiñi tiʼ sube Juan: «Qʼuele a ñaʼ». Cʼʌlʌl ti jimbʌ ora, María tsiʼ qʼuele Juan bajcheʼ i yalobil i Juan tsiʼ cʌnta María bajcheʼ i ñaʼ. Jesús tsiʼ wen cʼuxbi jiñi xʼixic tsaʼ bʌ i cʌnta cʼʌlʌl cheʼ bʌ tsiʼ  yila pañimil (chʼocʼa) i yaʼ bʌ an i qʼuel cheʼ bʌ woliʼ chʌmel.

8. ¿Chuqui mi laj cʌn ti jiñi tsaʼ bʌ subenti María yicʼot Juan?

⁸ ¿Chuqui mi laj cʌn? An i tajol ñumen ñʌmʌlonla la quicʼot jiñi hermanojob i mach jiñic la quicʼot lac familia. Tajol an lac familia muʼ bʌ i contrajiñonla o miʼ ñajtʼesañob i bʌ ti lac tojlel. Pero cheʼ bajcheʼ tsiʼ yʌlʌ Jesús mi lʌcʼʌl mi la cajñel tiʼ tojlel Jehová yicʼot tiʼ tojlel i yorganización, «joʼcʼal [100] i ñumel» mi caj lac taj bajcheʼ muʼ bʌ lac sʌt. Cabʌlob muʼ bʌ caj i sujtelob bajcheʼ la calobilob, la quixicʼalob yicʼot lac tat lac ñaʼob (Mr. 10:29, 30). ¿Bajcheʼ yubil mi la cubin cheʼ ochemonla ti jumpʼejl familia temel bʌ an come an lac ñopoñel yicʼot mi laj cʼuxbin Jehová yicʼot la quermañujob? (Col. 3:14; 1 P. 2:17).

9. ¿Chuqui miʼ pʌsbeñonla jiñi tsaʼ bʌ i yʌlʌ Jesús ti Mateo 27:46?

⁹ Tsaʼ bʌ i yʌlʌ Jesús. Cheʼ bʌ tsʼitaʼ jax yom chaʼan miʼ chʌmel, Jesús tsiʼ yʌlʌ ti cʼam bʌ tʼan: «C Dios, c Dios, ¿chucoch tsaʼ cʌyʌyon?» (Mt. 27:46). Jiñi Biblia maʼañic miʼ tsictesan chucoch tsiʼ yʌlʌ Jesús jiñi. Pero laʼcu lac ñaʼtan chuqui miʼ pʌsbeñonla. Cheʼ bʌ tsiʼ yʌlʌ jiñi, Jesús woliʼ tsʼʌctesan jiñi profecía muʼ bʌ lac taj yaʼ ti Salmo 22:1. * Cheʼ jaʼel, jiñi i tʼan tac miʼ pʌsbeñonla chaʼan Jehová mach wen qʼuelbilic i chaʼan chaʼan maʼañic chuqui miʼ chaʼlen (Job 1:10). Jesús tsiʼ chʼʌmbe i sujm chaʼan jiñi i Tat tsiʼ junyaj cʌyʌ tiʼ cʼʌb jiñi i contrajob chaʼan miʼ mejlel i pʌs chaʼan mucʼʌch i ñop tiʼ tojlel cʼʌlʌl miʼ chʌmel, maʼañic majqui yambʌ ñusʌbil bʌ i chaʼan bajcheʼ jiñi. Cheʼ jaʼel, jiñi tsaʼ bʌ i yʌlʌ tsiʼ pʌsʌ chaʼan maʼañic chuqui tsiʼ mele chaʼan miʼ tsʌnsʌntel.

10. ¿Chuqui mi laj cʌn ti tsaʼ bʌ i sube i Tat jiñi Jesús?

¹⁰ ¿Chuqui mi laj cʌn? Junchajp jiñʌch cheʼ mach yomic mi lac pijtan chaʼan Jehová miʼ tʌtsʼbeñonla jiñi wocol tac. Cheʼ bajcheʼ Jesús, yom chajpʌbilonla chaʼan xucʼulonla cʼʌlʌl mi lac chʌmel (Mt. 16:24, 25). Pero la cujil chaʼan Dios maʼañic mi caj i yʌcʼ chaʼan mi la quilʌbentel lac pusicʼal baʼ jaxʌl maʼañic miʼ mejlel laj cuch (1 Co. 10:13). Yambʌ muʼ bʌ i mejlel laj cʌn jiñʌch chaʼan tajol mi lac toʼol ticʼlʌntel cheʼ bajcheʼ tsaʼ ujti tiʼ tojlel Jesús (1 P. 2:19, 20). Jiñi lac piʼʌlob miʼ contrajiñoñobla come mach i chaʼañoñicla pañimil (mulawil) yicʼot mi lac sub jiñi i sujmlel, mach chaʼañic tsaʼ lac mele mach bʌ weñic (Jn. 17:14; 1 P. 4:15, 16). Jesús yujil chucoch Jehová woliʼ yʌqʼuen i ñusan wocol. Pero cheʼ bʌ jiñi xucʼul bʌ i wiñicob woliʼ ñusañob wocol, an muʼ bʌ i cʼajtibeñob i bʌ chucoch Jehová miʼ yʌcʼ ti ujtel jiñi (Hab. 1:3). Jehová wen yujil pʼuntaya yicʼot yujil pijt, miʼ chʼʌmben i sujm chaʼan mach yomic i yʌl chaʼan maʼañobic i ñopoñel, yomob i ñuqʼuesʌntel i pusicʼal tilem bʌ tiʼ tojlel (2 Co. 1:3, 4).

11. ¿Chucoch tsiʼ yʌlʌ Jesús jiñi muʼ bʌ lac taj ti Juan 19:28?

¹¹ Tsaʼ bʌ i yʌlʌ Jesús (pejcan Juan 19:28). ¿Chucoch tsiʼ yʌlʌ Jesús chaʼan tiquiñix i tiʼ? Chaʼan miʼ tsʼʌctiyel jiñi profecía muʼ bʌ lac taj ti Salmo 22:15, muʼ bʌ i yʌl: «Jilemix c pʼʌtʌlel cheʼ bajcheʼ i xejtʼil pʼejt tsaʼ bʌ i wen tiqui. Miʼ ñottʌl cacʼ chaʼan tiquin c tiʼ». Cheʼ jaʼel, miʼ mejlel la cʌl chaʼan tiquiñix i tiʼ. Yom miʼ yʌqʼuentel jaʼ come tsaʼ wen jajtsʼi i wen wocol jax woliʼ ñusan cheʼ yaʼ jichʼil ti teʼ.

12. ¿Chuqui mi laj cʌn ti jiñi i tʼan Jesús cheʼ bʌ tsiʼ yʌlʌ chaʼan tiquiñix i tiʼ?

 ¹² ¿Chuqui mi laj cʌn? Jesús maʼañic tsiʼ ñaʼta chaʼan cheʼ miʼ yʌl bajcheʼ yubil miʼ yubin yom i yʌl chaʼan mach pʼʌtʌlic, i mach cheʼic yom mi lac ñaʼtan jaʼel. Tajol maʼañic mi lac mulan lac suben yambʌlob cheʼ bʌ an chuqui i cʼʌjñibal lac chaʼan. Pero baʼ ora la com coltʌntel yomʌch mi la cʌl. Laʼcu lac ñaʼtan, miʼ ñoxoñixla o cʼamonla tajol yom mi lac suben juntiquil la camigo chaʼan miʼ pʌyonla majlel ti mʌñoñel o ti doctor. Mi chʼijyemonla tajol yom mi lac suben juntiquil anciano o juntiquil hermano añix bʌ i ñaʼtʌbal chaʼan miʼ ñʌchʼtañonla o miʼ subeñonla wem bʌ tʼan tac muʼ bʌ i tijicñesañonla (Pr. 12:25). Laʼ laj cʼajtesan chaʼan jiñi la quermañujob miʼ cʼuxbiñoñobla i yomob i coltañonla baʼ ora woli la cubin wocol (Pr. 17:17). Pero yom mi lac subeñob cheʼ bʌ la com coltʌntel come maʼañic miʼ ñaʼtañob chuqui woli lac ñaʼtan.

13. ¿Chuqui tsiʼ taja Jesús cheʼ xucʼul tsaʼ ajñi cʼʌlʌl tsaʼ chʌmi?

¹³ Tsaʼ bʌ i yʌlʌ Jesús. Lʌcʼʌ las 3 ti icʼan cheʼ ti 14 i chaʼan nisán, Jesús tsiʼ yʌlʌ: «Tsaʼix tsʼʌctiyi» (Jn. 19:30). Cheʼ bʌ muqʼuix caj i chʌmel Jesús tsaʼʌch i ñaʼta chaʼan tsiʼ mele pejtelel chuqui yom Jehová. ¿Chuqui tsiʼ taja cheʼ xucʼul tsaʼ ajñi cʼʌlʌl tsaʼ chʌmi? Ñaxam bʌ, tsiʼ yʌcʼʌ ti cʌñol chaʼan Satanás juntiquilʌch xlot come tsiʼ pʌsʌ chaʼan juntiquil toj bʌ wiñic xucʼul miʼ mejlel ti ajñel anquese Satanás miʼ chaʼlen wersa chaʼan mach cheʼiqui. I chaʼpʼejlel, tsiʼ yʌcʼʌ i cuxtʌlel chaʼan i tojol laj coltʌntel. Cheʼ bajcheʼ jiñi, anquese xmulilonla, ti lac pejtelel miʼ mejlel lac lʌcʼtesan lac bʌ ti Dios yicʼot mi lac taj lac pijtaya chaʼan bʌ laj cuxtʌlel mach bʌ añic miʼ jilel. I yuxpʼejlel, Jesús tsiʼ colta jiñi wem bʌ i cʼabaʼ i Tat yicʼot chaʼan jiñʌch an tiʼ wenta chaʼan miʼ chaʼlen yumʌntel.

14. Tsictesan bajcheʼ yom mi lac chumtʌl ti jujumpʼejl qʼuin.

¹⁴ ¿Chuqui mi laj cʌn? Yom mi lac ñaʼtan chaʼan xucʼul la com ajñel ti jujumpʼejl qʼuin. Laʼ laj qʼuel chuqui tsiʼ yʌlʌ jiñi hermano Maxwell Friend, tsaʼ bʌ i chaʼle cʌntesa yaʼ ti Cʌntesʌntel loqʼuem bʌ ti Biblia i chaʼan Galaad de la Watchtower. Ti jumpʼejl colem tempa bʌ internacional bʌ, baqui woliʼ taj ti tʼan chaʼan bʌ jiñi xucʼtʌlel, tsiʼ yʌlʌ: «Mach a cʌy chaʼan ijcʼʌl jiñi muʼ bʌ i mejlel a mel o a wʌl wʌle. ¿Bajcheʼ maʼ ñaʼtan mi cuxuletto ijcʼʌl? Jujumpʼejl qʼuin yom maʼ ñaʼtan chaʼan cojax miʼ mejlel a pʌs chaʼan yomʌch maʼ taj jiñi cuxtʌlel mach bʌ añic miʼ jilel». Cheʼ bajcheʼ tsiʼ yʌlʌ jiñi hermano, jujumpʼejl qʼuin yom mi lac chumtan cheʼ bajcheʼ jiñi cojix bʌ qʼuin am bʌ lac chaʼan chaʼan mi lac pʌs chaʼan xucʼulonla. Cheʼ bajcheʼ jiñi, anquese mi lac chʌmel, mi caj i mejlel lac suben Jehová: «Tsaʼ c chaʼle wersa chaʼan xucʼul mi cajñel ti a tojlel, chaʼan mic pʌs chaʼan Satanás juntiquilʌch xlot yicʼot chaʼan mic sʌqʼuesan jiñi a cʼabaʼ i miʼ tsictiyel chaʼan añʌch ti a wenta maʼ chaʼlen yumʌntel».

15. Cheʼ bajcheʼ miʼ yʌl Lucas 23:46, ¿chuqui jiñi yujil bʌ Jesús?

¹⁵ Tsaʼ bʌ i yʌlʌ Jesús (pejcan Lucas 23:46). Ti jumpʼejl i pusicʼal, Jesús tsiʼ yʌlʌ: «C Tat, mi cʌqʼueñet c chʼujlel [cuxtʌlel] ti a cʼʌb». Jesús yujil chaʼan an tiʼ wenta Jehová chuqui mi caj i yujtel tiʼ tojlel yicʼot chaʼan maʼañic mi caj i ñajʌyel i chaʼan chuqui tsiʼ mele.

16. ¿Chuqui mi laj cʌn tiʼ tojlel Joshua?

¹⁶ ¿Chuqui mi laj cʌn? Yom mi la cʌcʼ tiʼ cʼʌb  Jehová jiñi laj cuxtʌlel. Pero chaʼan mi lac mel jiñi, yom mi lac ñop tiʼ tojlel tiʼ pejtelel lac pusicʼal (Pr. 3:5). Laʼcu lac ñaʼtan tiʼ tojlel Joshua, juntiquil hermano am bʌ 15 i jabilel i tsaʼ bʌ i taja jumpʼejl cʼamʌjel maʼañix bʌ i tsʼʌcal. Maʼañic tsiʼ jacʼʌ i chʼʌm tsʼac tac muʼ bʌ i ñusan ti pʼis i mandar tac Dios. Cheʼ bʌ muqʼuix caj i chʌmel, tiʼ sube i mamá: «Añon ti cʼʌb Jehová». I tsiʼ bej alʌ: «Mamá miʼ mejlel c subeñet tiʼ pejtelel c pusicʼal: Cujil chaʼan Jehová mi caj i chaʼ chʼojyesañon. Tsiʼ qʼuele c pusicʼal i yujil chaʼan mij cʼuxbin tiʼ sujm». * Ti lac pejtelel yom mi laj cʼajtiben lac bʌ: «Cheʼ muqʼuic c taj jumpʼejl wocol i mic mejlel ti chʌmel, ¿xucʼul ba mi caj cajñel i mi caj c ñop chaʼan Jehová maʼañic mi caj i ñajʌtesañon yicʼot mi caj i chaʼ cuxtesañon?».

17, 18. ¿Chuqui tac tsaʼ laj cʌñʌ? (Qʼuele jaʼel jiñi recuadro: « ¿Chuqui mi laj cʌn ti jiñi cojix bʌ i tʼan tac Jesús?»).

¹⁷ Tiʼ sujm, cabʌl chuqui miʼ pʌsbeñonla jiñi cojix bʌ i tʼan tac Jesús. Miʼ cʼajtesʌbeñonla chaʼan yom mi lac ñusʌben i mul yambʌlob yicʼot chaʼan mi lac ñop chaʼan Jehová mi caj i ñusʌbeñonla lac mul. An lac chaʼan jumpʼejl ñuc bʌ lac majtan: Ochemonla ti jumpʼejl familia muʼ bʌ i coltañob i bʌ. Pero yomʌch mi lac sub cheʼ bʌ la com coltʌntel. La cujil chaʼan Jehová mi caj i coltañonla laj cuch baqui jach bʌ wocol. Mi lac chʼʌmben i sujm chaʼan wen ñuc i cʼʌjñibal cheʼ mi lac chumtan jujumpʼejl qʼuin bajcheʼ jiñi cojix bʌ am bʌ lac chaʼan chaʼan mi lac pʌs lac xucʼtʌlel i la cujil chaʼan Jehová mi caj i chaʼ chʼojyesañonla mi tsaʼ chʌmiyonla.

¹⁸ Mi mucʼʌch lac jacʼ pejtelel tsaʼ bʌ laj cʌñʌ, woli lac mel tsaʼ bʌ i yʌlʌ Jehová tiʼ tojlel i Yalobil: «Ubinla i tʼan» (Mt. 17:5).