1. ¿Chuqui miʼ qʼuel Jehová ti jiñi i wiñicob?

TIJICÑAYONLA cheʼ la cujil chaʼan Jehová wen «miʼ qʼuel i chaʼañoʼ bʌ» (Sal. 149:4). Miʼ qʼuel jiñi wen tac bʌ lac melbal (chaʼlibal), jiñi chuqui la cujil melol i miʼ sujtesañonla tiʼ yamigo. Mi xucʼuloñʌchla, tiʼ pejtelel ora lʌcʼʌl mi caj i yajñel la quicʼot (Jn. 6:44).

2. ¿Chucoch an hermanojob wocol bʌ miʼ yubiñob chaʼan miʼ ñopob chaʼan Jehová mucʼʌch i cʼuxbiñob?

² An muʼ bʌ i yʌlob: «Cujil chaʼan Jehová miʼ cʼuxbin i tejclum, pero ¿mucʼʌch ba i cʼuxbiñon?». ¿Chucoch an hermanojob muʼ bʌ i melbeñob i bʌ jiñi cʼajtiya? Laʼcu laj cʌn tiʼ tojlel Oksana, * tsaʼ bʌ i wen ñusa wocol cheʼ bʌ chʼoʼchʼocto: «Wen tijicña tsaʼ cubi c bʌ cheʼ bʌ tsaʼ c chʼʌmʌ jaʼ yicʼot cheʼ bʌ tsaʼ sujtiyon ti precursora. Pero tsaʼ ñumi 15 jab i tsaʼ caji j cʼajtesan jiñi wocol tsaʼ bʌ c ñusa. Tsaʼ c ñaʼta chaʼan Jehová mach weñix miʼ qʼuelon yicʼot chaʼan i wentʌlel mach yomic miʼ cʼuxbiñon». Juntiquil precursora i cʼabaʼ Yua, tsaʼ bʌ i wen ñusa wocol jaʼel cheʼ bʌ chʼoʼchʼocto , miʼ yʌl: «Tsaʼ cʌqʼue j cuxtʌlel Jehová come com cʌqʼuen i yubin i tijicñʌyel, pero tsaʼ c ñaʼta chaʼan maʼañic mi caj i cʼuxbiñon».

3. ¿Chuqui ti cʼajtiya tac mi caj lac jacʼ ti ili estudio?

 ³ Cheʼ bajcheʼ jiñi hermana Oksana yicʼot Yua tajol wocol mi la cubin jaʼel chaʼan mi lac ñop chaʼan Jehová mucʼʌch i cʼuxbiñonla. Jin chaʼan mi caj lac jacʼ chaʼpʼejl cʼajtiya: ¿Chucoch yomʌch mi lac ñop chaʼan Jehová mucʼʌch i cʼuxbiñonla? Yicʼot ¿chuqui yom mi lac mel cheʼ baʼ ora mi’ tilel ti la col chaʼan Jehová maʼañic miʼ cʼuxbiñonla?

4. ¿Baqui bʌ i wocolel cheʼ bʌ maʼañic mi lac ñop chaʼan Jehová miʼ cʼuxbiñonla?

⁴ Mi mucʼʌch lac ñop chaʼan Jehová miʼ cʼuxbiñonla, mi caj lac ñumen melben i yeʼtel (troñel) anquese mi lac ñusan cabʌl wocol. Pero mi maʼañic mi lac ñop chaʼan Jehová miʼ cʼuxbiñonla, ‹tsʼitaʼ jach lac pʼʌtʌlel› mi caj la cubin lac bʌ yicʼot Satanás mi caj i mʌlbeñonla (Pr. 24:10; Ef. 6:16).

5. ¿Bajcheʼ yubil an i yubiyob i bʌ chaʼtiqui uxtiquil hermanojob maʼañic bʌ tsiʼ ñopoyob chaʼan miʼ cʼuxbintelob ti Jehová?

⁵ An xñoptʼañob muʼ bʌ i ñaʼtañob chaʼan maʼañic miʼ cʼuxbintelob ti Jehová i an cʼuñʼayob i ñopoñel. Juntiquil anciano i cʼabaʼ James muʼ bʌ ti eʼtel ti Betel yicʼot muʼ bʌ ti coltaya ti congregación ti yambʌ tʼan tsiʼ cʼajtibe i bʌ mi Jehová mucʼʌch i qʼuel ti ñuc jiñi eʼtel woli (choncol) bʌ i mel. Cheʼ jaʼel, tsiʼ ñaʼta chaʼan Jehová maʼañic woli (yʌquel) i ñʌchʼtʌben i yoración. Juntiquil precursora i cʼabaʼ Eva, miʼ yʌl: «Mi lac taj wocol cheʼ bʌ mi lac ñaʼtan chaʼan Jehová maʼañic miʼ cʼuxbiñonla come mach la comix lac melben i yeʼtel i mach tijicñayoñixla». I Michael, juntiquil hermano am bʌ bajcheʼ precursor regular yicʼot anciano, miʼ yʌl: «Mi maʼañic maʼ ñop chaʼan Jehová mucʼʌch i cʼuxbiñet, xucʼu xucʼul mi caj a ñajtʼesan a bʌ tiʼ tojlel».

6. ¿Chuqui yom mi lac mel cheʼ baʼ ora mi lac ñaʼtan chaʼan Jehová maʼañic miʼ cʼuxbiñonla?

⁶ Jiñi tsaʼ bʌ i yʌlʌ jiñi hermanojob miʼ pʌsbeñonla chaʼan añʌch i wocolel cheʼ bʌ mi lac ñaʼtan chaʼan Jehová maʼañic miʼ cʼuxbiñonla. ¿Chuqui yom mi lac mel cheʼ baʼ ora mi lac ñaʼtan jiñi? Ñaxam bʌ, yom mi lac locʼsan ti ora jiñi pensar. I chaʼpʼejlel yom mi laj cʼajtiben Jehová jiñi lac ñʌchʼtʌlel i chaʼan miʼ cʌntʌbeñonla lac pusicʼal yicʼot lac pensar (Sal. 139:23; Fil. 4:6, 7). I yuxpʼejlel, mach ñajʌyic lac chaʼan chaʼan  an hermanojob woli bʌ i yubiñob i bʌ bajcheʼ jiñi. I mi caj laj cʌn jiñi ejemplo chaʼan jiñi apóstol Pablo.

7. ¿Chuqui ti wocol tac tsiʼ ñusa Pablo?

⁷ Come an cabʌl chuqui mi lac mel, tajol mi la cubin chaʼan mach luʼ ujtic lac chaʼan, cheʼʌch tsiʼ yubi i bʌ jaʼel jiñi apóstol Pablo. Pablo tsiʼ yʌlʌ chaʼan tsiʼ cʼojoʼta bajcheʼ yilal añob pejtelel jiñi hermanojob (2 Co. 11:23-28). ¿Woli ba lac ñusan jumpʼejl tsʌts bʌ cʼamʌjel muʼ bʌ i chilbeñonla lac tijicñʌyel? Pablo jaʼel tsiʼ ñusa jumpʼejl cʼamʌjel (2 Co. 12:7-10). ¿Chʼijyemonbala tiʼ caj xmulilonla? Mi cheʼʌchi, cheʼʌch tsiʼ yubi i bʌ Pablo jaʼel. Tsiʼ yʌlʌ chaʼan mach tijicñayic come tiʼ pejtelel ora yom miʼ chaʼlen wersa chaʼan maʼañic miʼ mel mach bʌ weñic (Ro. 7:21-24).

8. ¿Chuqui tsiʼ colta Pablo chaʼan miʼ chʌn melben i yeʼtel Jehová anquese tsiʼ ñusa wocol tac?

⁸ Anquese Pablo tsiʼ wen ñusa wocol tac tsiʼ chʌn melbe i yeʼtel Jehová, ¿baqui tsiʼ taja jiñi i pʼʌtʌlel? Jiñʌch cheʼ bʌ tsiʼ ñopo chaʼan majqui jach miʼ yʌcʼ i ñopoñel ti Jesús yicʼot jiñi i cuxtʌlel tsaʼ bʌ i yʌcʼʌ mi caj i taj jiñi cuxtʌlel mach bʌ añic miʼ jilel yicʼot cheʼ yujil chaʼan Jehová mi caj i ñusʌben i mul mi mucʼʌch i cʌy i mel (Jn. 3:16; Ro. 6:23; Sal. 86:5).

9. ¿Chuqui miʼ pʌsbeñonla tsaʼ bʌ i yʌlʌ Pablo yaʼ ti Gálatas 2:20?

⁹ Pablo yujil chaʼan Jehová miʼ cʼuxbin come tsiʼ yʌcʼʌ i Yalobil chaʼan miʼ chʌmel (sajtel) tiʼ caj. Laʼ laj qʼuel chuqui miʼ yʌl Gálatas 2:20 (pejcan). Pablo tsiʼ yʌlʌ chaʼan jiñi i Yalobil Dios tsiʼ cʼuxbi, i tsiʼ yʌcʼʌ i bʌ ti chʌmel tiʼ caj. Ili miʼ pʌsbeñonla chaʼan Pablo yujil chaʼan mucʼʌch i cʼuxbintel ti Jehová i mach cojach jiñi i yermañujob. Jin chaʼan tiʼ sube jaʼel jiñi romanojob: «Tsaʼ chʌmi Cristo chaʼañonla cheʼ xmulilon tola» (Ro. 5:8). Ili miʼ yʌqʼueñonla laj qʼuel chaʼan Jehová miʼ cʼuxbiñonla ti jujuntiquil.

10. ¿Chuqui miʼ cʌntesañonla Romanos 8:38, 39?

¹⁰ (Pejcan Romanos 8:38, 39). Pablo yujil chaʼan maʼañic chuqui miʼ mejlel i mʌctan Jehová chaʼan miʼ cʼuxbiñonla come tsiʼ wen pʌsbe i pijt jiñi tejclum Israel yicʼot tsaʼ pʌsbenti pʼuntaya jaʼel, ti yambʌ tʼan, lajal bajcheʼ tsiʼ yʌlʌ: «Mi Jehová tsiʼ yʌcʼʌ ti chʌmel i yalobil tij caj, mucʼʌch i cʼuxbiñon» (Ro. 8:32).

11. Anquese Pablo tsiʼ mele mach bʌ wentaquic cheʼ bajcheʼ muʼ bʌ i yʌl 1 Timoteo 1:12-15, ¿chucoch tsaʼʌch i ñopo chaʼan Dios miʼ cʼuxbin?

 ¹¹ (Pejcan 1 Timoteo 1:12-15). Pablo ñoj xmulil tsiʼ yubi i bʌ ñumento bajcheʼ jiñi yambʌlob tiʼ caj tsaʼ bʌ i mele tac. Tsiʼ ticʼla yambʌlob, tsiʼ yotsayob ti cárcel i tsiʼ yʌcʼʌ i tʼan chaʼan miʼ tsʌnsʌntelob (Hch. 26:10, 11). Tajol tsaʼʌch i yubi i chʼijyemlel o cʼuxʌch tsiʼ yubi cheʼ bʌ ti wiʼil tsiʼ qʼuele o tsiʼ cʌñʌ juntiquil i yalobil jumpʼejl xñujpuñel tsaʼ bʌ i tsʌnsa. Pero tsiʼ ñaʼta chaʼan Jesús tsiʼ yʌcʼʌ i bʌ ti chʌmel tiʼ caj, jin chaʼan tsiʼ yʌlʌ: «Apóstolon chaʼan tiʼ yutslel i pusicʼal Dios» (1 Co. 15:3, 10). ¿Chuqui mi laj cʌn ili ora? Yom mi lac ñop ti jumpʼejl lac pusicʼal chaʼan Jesús tsiʼ yʌcʼʌ i bʌ ti chʌmel ti laj caj, i cheʼ bajcheʼ jiñi miʼ mejlel lac lʌcʼtesan lac bʌ ti Jehová (Hch. 3:19). Jehová mach jiñic miʼ yʌcʼ ti ñuc chuquiyes tsaʼ lac mele wajali, mach yʌlʌyic mi xñoptʼañoñixla o mi maxto, muʼ bʌ i qʼuel ti ñuc jiñʌch chuquiyes muʼ bʌ lac mel ili ora (Is. 1:18).

12. Cheʼ bajcheʼ miʼ yʌl 1 Juan 3:19, 20, ¿chuqui yom mi lac mel mi maʼañic laj cʼʌjñibal mi la cubin lac bʌ o cheʼ mi lac ñaʼtan chaʼan mach yomic mi laj cʼuxbintel?

¹² An qʼuiñil jiñi lac pusicʼal miʼ mejlel i lotiñonla, ¿bajcheʼ? Miʼ mejlel i yʌqʼueñonla la cubin chaʼan maʼañic laj cʼʌjñibal, chaʼan mach yomix mi laj cʼuxbintel, i chaʼan jiñi i cuxtʌlel Jesús maʼañic miʼ mejlel i ñusan lac mul (pejcan 1 Juan 3:19, 20). Mi cheʼ mi la cubin lac bʌ bajcheʼ jiñi, laʼ laj cʼajtesan chaʼan Jehová ñumen ñuc cheʼ bajcheʼ lac pusicʼal, miʼ cʼuxbiñonla yicʼot miʼ ñusʌbeñonla lac mul. I yom mi lac ñop chaʼan Jehová mucʼʌch i cʼuxbiñonla. Muʼ bʌ caj i coltañonla jiñʌch cheʼ mi lac pejcan lac Biblia ti jujumpʼejl qʼuin, mi lac chʌcʌ mel oración yicʼot mi lac ñusan qʼuin la quicʼot la quermañujob.

13. ¿Bajcheʼ miʼ coltañonla cheʼ bʌ mi lac pejcan i Tʼan Dios? (Qʼuele jaʼel jiñi recuadro: « ¿Bajcheʼ miʼ coltañob jiñi i Tʼan Dios?»).

¹³ Cheʼ bʌ mi lac pejcan jiñi Biblia ti jujumpʼejl qʼuin yicʼot mi lac wen ñaʼtan, miʼ coltañonla chaʼan mi lac ñumen cʌn Jehová yicʼot chaʼan miʼ cʼotel laj qʼuel chaʼan mucʼʌch i wen cʼuxbiñonla. Cheʼ jaʼel, miʼ coltañonla lac tojʼesan jiñi lac pensar (2 Ti. 3:16). Juntiquil anciano i cʼabaʼ Kevin, maʼañic bʌ i cʼʌjñibal tsiʼ yubi i bʌ, miʼ yʌl: «Cheʼ tsaʼ c pejca jiñi Salmo 103 yicʼot tsaʼ c wen ñaʼta, tsiʼ coltayon c tojʼesan c pensar yicʼot c ñaʼtan bajcheʼ yilal miʼ qʼuelon Jehová». Eva, tsaʼ bʌ lac taja ti tʼan yaʼ ti párrafo 5, miʼ yʌl: «Cheʼ miʼ yujtel jumpʼejl qʼuin mi cʌqʼuen i yorajlel chaʼan mic wen ñaʼtan tiʼ tojlel Jehová, i jiñi miʼ yʌqʼueñon c ñʌchʼtʌlel yicʼot miʼ pʼʌtʼesan c ñopoñel».

14. ¿Bajcheʼ miʼ coltañonla jiñi oración?

¹⁴ Mi mucʼʌch laj qʼuel Jehová bajcheʼ wem bʌ la camigo mi caj lac pejcan ti oración tiʼ pejtelel ora (1 Ts. 5:17). Mi caj lac suben bajcheʼ yubil mi la cubin lac bʌ, chuqui mi lac ñaʼtan yicʼot chuqui mi laj cʼojoʼtan, i cheʼ jiñi mi caj lac pʌsben chaʼan mi lac ñop chaʼan mi caj i coltañonla yicʼot chaʼan la cujil chaʼan miʼ cʼuxbiñonla (Sal. 94:17-19; 1 Jn. 5:14, 15). Jiñi hermana Yua, tsaʼix bʌ lac taja ti tʼan miʼ yʌl: «Mach cojach mic suben Jehová jiñi tsaʼ bʌ c ñusa ti jumpʼejl qʼuin. Mic suben pejtelel bajcheʼ yubil mi cubin c bʌ. An cʼoti j qʼuel chaʼan Jehová mach jin jach i Yum pejtelel Pañimil, mucʼʌch i cʼuxbin jujuntiquil jiñi i yalobilob». (Qʼuele jiñi recuadro « ¿Añix ba a pejca?»).

15. ¿Bajcheʼ miʼ pʌsbeñonla Jehová chaʼan miʼ qʼuelonla ti ñuc ti jujuntiquil?

¹⁵ Laʼ lac ñusan qʼuin yicʼot jiñi hermanojob. Jehová miʼ qʼuelonla ti ñuc, jin chaʼan tsiʼ yʌqʼueyonla jiñi hermanojob lajaloʼ bʌ bajcheʼ lac familia muʼ bʌ i pʌsbeñonla ‹cʼuxbiya tiʼ pejtelel ora› (Stg. 1:17; Pr. 17:17). Ti jiñi carta i chaʼan Colosenses, Pablo tsiʼ yʌlʌ chaʼan an hermanojob tsaʼ bʌ i coltayob yicʼot tsaʼ bʌ i ñuqʼuesʌbeyob i pusicʼal (Col. 4:10, 11). Cheʼ jaʼel, Jesucristo tsaʼ coltʌnti tiʼ yamigojob, yaʼ bʌ ochem jiñi ángelob yicʼot jiñi wiñicob xʼixicob (Lc. 22:28, 43).

16. ¿Bajcheʼ miʼ coltañoñobla jiñi hermanojob chaʼan lʌcʼʌl mi la cajñel tiʼ tojlel Jehová?

¹⁶ ¿Mucʼʌch ba laj cʼajtiben jiñi hermanojob chaʼan miʼ coltañoñobla i mucʼʌch ba lac chʼʌm laj coltʌntel? Cheʼ bʌ mi lac suben juntiquil hermano pʼʌtʌlix bʌ tiʼ chaʼan bʌ Dios chuqui tac mi laj cʼojoʼtan mach yomic i yʌl chaʼan mach pʼʌtʌloñicla come miʼ mejlel i coltañonla. James, jiñi tsaʼ bʌ lac taja ti tʼan ti párrafo 5 miʼ yʌl: «An i wen coltayon cheʼ an  c chaʼan wem camigojob. Cheʼ bʌ miʼ ñumel ti col mach tac bʌ weñic, miʼ wen ñʌchʼtañoñob yicʼot miʼ cʼajtesʌbeñoñob chaʼan miʼ cʼuxbiñoñob. Iliyi an i coltañon j qʼuel chaʼan Jehová miʼ cʼuxbiñon yicʼot chaʼan miʼ chʼʌmon ti ñuc». ¡Wen ñucʌch i cʼʌjñibal cheʼ an la camigojob yaʼ ti congregación!

17, 18. ¿Majqui yom mi lac ñopben i tʼan, i chucoch?

¹⁷ Satanás yom chaʼan mi lac lujbʼan i mi laj cʌy lac mel chuqui wen. Yom chaʼan mi lac ñaʼtan chaʼan Jehová maʼañic miʼ cʼuxbiñonla i chaʼan mach yomix miʼ coltañonla, pero jiñi mach i sujmic.

¹⁸ Jehová miʼ cʼuxbiñonla yicʼot miʼ qʼuelonla ti ñuc ti jujuntiquilonla. Cheʼ mi lac jacʼben i tʼan, mi caj lac chʌn ajñel tiʼ cʼuxbiya cheʼ bajcheʼ Jesús (Jn. 15:10). Mach lac ñop muʼ bʌ i yʌl Satanás yicʼot muʼ bʌ i subeñonla lac pusicʼal chaʼan Jehová maʼañic miʼ cʼuxbiñonla. Laʼ lac ñop chaʼan Jehová miʼ qʼuel chuqui wem bʌ ti lac tojlel. Jehová miʼ cʼuxbin i tejclum i mucʼʌch i cʼuxbiñet jaʼel.