¿Chucoch Jesús tsiʼ taja ti tʼan jiñi tsaʼ bʌ i yʌlʌ David ti Salmo 22:1 cheʼ bʌ muqʼuix caj i chʌmel?

Cheʼ bajcheʼ miʼ yʌl Mateo 27:46 cheʼ bʌ Jesús tsʼitaʼ jax yom chaʼan chʌmel tsiʼ yʌlʌ: «C Dios, c Dios, ¿chucoch tsaʼ cʌyʌyon?». Cheʼ bajcheʼ iliyi, Jesús tiʼ tsʼʌctesa tsaʼ bʌ i wʌn alʌ David yaʼ ti Salmo 22:1 (Mr. 15:34). ¿Yom ba i yʌl iliyi chaʼan Jesús tsiʼ yubi i chʼijyemlel o tiʼ sʌtʌ i ñopoñel? Maʼañic. Jesús yujil chucoch yom miʼ chʌmel i tsaʼʌch i tsʼʌctesa (Mt. 16:21; 20:28). Yujil jaʼel chaʼan Jehová maʼañic mi caj i coltan cheʼ bʌ tsʼitaʼ jax yom chaʼan miʼ chʌmel (Job 1:10). Jehová tsiʼ yʌcʼʌ chaʼan Jesús miʼ pʌs chaʼan xucʼul mi caj i yajñel anquese wocol miʼ ñusan jinto miʼ chʌmel (Mr. 14:35, 36).

Cheʼ jiñi, ¿chucoch Jesús tsiʼ yʌlʌ jiñi tʼan tac? Anquese mach la cujilic chucoch, laʼ lac ñop laj qʼuel chucoch tajol tsiʼ yʌlʌ. *

Cheʼ bʌ tsiʼ yʌlʌ jiñi tʼan, tajol Jesús woliʼ yʌl chaʼan Jehová maʼañic mi caj i mʌctan chaʼan miʼ tsʌnsʌntel. Yomʌch miʼ toj jiñi lac mul, pero mach yicʼotic i coltaya Jehová. An i bʌcʼtal bajcheʼ joñonla i wersa yom miʼ chʌmel «chaʼan pejtelelonla» (He. 2:9).

Tajol Jesús tiʼ tsʼitaʼ alʌ jiñi tʼan am bʌ ti Salmo 22 chaʼan jiñi wiñicob xʼixicob miʼ cʼajtesañob jiñi Salmo. Ti jimbʌ ora, jiñi judíojob miʼ wen cʌyob tiʼ jol jiñi Salmo tac. Jin chaʼan, mi tsaʼ cʼajtesʌbentiyob  jumpʼejl versículo, mach jalic miʼ waʼ tilelob tiʼ jol muʼ bʌ i yʌl jiñi Salmo. Mi jiñʌch yom bʌ Jesús jiñi, woliʼ coltañob jiñi xcʌntʼañob judíojoʼ bʌ chaʼan miʼ cʼajtesañob profecía tac am bʌ yaʼ ti Salmos muʼ bʌ i yʌl bajcheʼ mi caj i chʌmel (Sal. 22:7, 8, 15, 16, 18, 24). Cheʼ jaʼel, yaʼ tiʼ yujtibal Salmo 22, miʼ tsictesan chaʼan Jehová mucʼʌch caj i mʌjlel i chaʼan i mi caj i pam pujquel tiʼ pejtelel pañimil (Sal. 22:27-31).

Cheʼ bʌ Jesús tsiʼ taja ti tʼan tsaʼ bʌ i yʌlʌ David, tajol jiñʌch chaʼan miʼ yʌcʼ ti cʌjñel chaʼan maʼañic i mul. Cheʼ bʌ mi caj i tsʌnsʌntel, Jesús tsaʼʌch lʌjtʼi i chaʼan cheʼ bʌ tsiʼ jopʼbeyob i mul chaʼan woliʼ pʼaj Dios ti jumpʼejl meloñel cheʼ jach bʌ tsaʼ mucu mejli (Mt. 26:65, 66). Cheʼ ti icʼan orajach tsiʼ chaʼleyob meloñel tiʼ tojlel, i mach cheʼic tsiʼ meleyob bajcheʼ miʼ yʌl jiñi mandar tac (Mt. 26:59; Mr. 14:56-59). Cheʼ bʌ Jesús tsiʼ mele jiñi cʼajtiya «c Dios, c Dios, ¿chucoch tsaʼ cʌyʌyon?» tajol woliʼ yʌcʼ ti ñaʼtʌntel chaʼan maʼañic chuqui leco bʌ tsiʼ mele i tiʼ caj jiñi, miʼ tsʌnsʌntel.

Tajol Jesús woliʼ yʌqʼueñob i cʼajtesan chaʼan anquese David woliʼ ñusan wocol mach yomic i yʌl chaʼan mach utsʼatix miʼ qʼuejlel ti Jehová. David maʼañic tiʼ sʌtʌ i ñopoñel come cheʼ bʌ tsaʼ ujti i yʌl jiñi cʼajtiya tsiʼ yʌlʌ chaʼan mucʼʌch i ñop tiʼ tojlel Dios chaʼan miʼ mejlel i coltan jiñi i wiñicob, i Jehová tsiʼ chʌn aqʼue bendición (Sal. 22:23, 24, 27). Cheʼʌch tsaʼ ujti tiʼ tojlel Jesús jaʼel, jiñi i ‹Yalobil David› anquese tsiʼ ñusa wocol yaʼ ti teʼ, mach yomic i yʌl chaʼan Jehová mach weñix tsiʼ qʼuele (Mt. 21:9).

Tajol Jesús jaʼel woliʼ yʌcʼ ti ñaʼtʌntel chaʼan wen cʼux miʼ yubin cheʼ bʌ Jehová maʼañix woliʼ coltan chaʼan miʼ mejlel i pʌs ti tsʼʌcʌl jiñi i xucʼtʌlel tiʼ tojlel. Jesús yomʌch miʼ ñusan wocol yicʼot miʼ chʌmel come Adán yicʼot Eva tsiʼ chaʼleyob mulil. Anquese ti ñaxan mach jiñic yom bʌ Jehová. Jesús maʼañic tsiʼ mele mach bʌ weñic, pero wersa yomʌch miʼ ñusan wocol yicʼot miʼ chʌmel chaʼan miʼ mejlel i yʌcʼ ti cʌñol chaʼan Satanás jiñʌch juntiquil xlot yicʼot chaʼan mi lac chaʼ taj jiñi tsaʼ bʌ sajti (Mr. 8:31; 1 P. 2:21-24). Ili mucʼʌch i mejlel ti tsʼʌctiyel mi Jehová mucʼʌch i jumucʼ cʌy i coltan anquese mach cheʼic ñʌmʌl i mel tilel.

Tajol Jesús jaʼel yomʌch i coltan jiñi xcʌntʼañob i chaʼan chaʼan jin yom miʼ ñaʼtañob chucoch Jehová tsiʼ yʌcʼʌ chaʼan cheʼ miʼ tsʌnsʌntel bajcheʼ jiñi. * Jesús yujil chaʼan cheʼ bʌ miʼ tsʌnsʌntel yaʼ ti teʼ bajcheʼ juntiquil xmulil mi caj i yʌcʼ ti yajlel cabʌl lac piʼʌlob (1 Co. 1:23, TNM). Mi jiñi xcʌntʼañob i chaʼan miʼ ñaʼtañob chucoch Jesús tsaʼ chʌmi, mi caj i ñaʼtañob chaʼan juntiquilʌch xcoltaya i mach juntiquilic xmulil (Gá. 3:13, 14, TNM).

Anquese mach la cujilic chucoch Jesús tsiʼ yʌlʌ jiñi tʼan, la cujilʌch bʌ jiñʌch chaʼan cheʼ bʌ yaʼ jocʼol ti teʼ wolʌch i tsʼʌctesan yom bʌ Jehová. Cheʼ bʌ tsaʼ ujti i yʌl jiñi, tsiʼ yʌlʌ jaʼel: «Tsaʼix tsʼʌctiyi» (Jn. 19:30; Lc. 22:37). Chaʼan miʼ mejlel i tsʼʌctesan pejtelel tsaʼ bʌ tili i mel ila ti Pañimil, Jehová tsaʼʌch i jumucʼ cʌyʌ i coltan. Cheʼ jaʼel, ili tsiʼ yʌcʼʌ chaʼan «pejtelel chuqui tac tsʼijbubil [...] tiʼ mandar Moisés yicʼot tiʼ jun xʼaltʼañob yicʼot ti Salmos» miʼ tsʼʌctiyel (Lc. 24:44).