1, 2. ¿Chuqui jiñi i tojol laj coltʌntel, i chucoch ñuc i cʼʌjñibal lac chaʼan?

CHEʼ bʌ Adán tsiʼ chaʼle mulil, maʼañix tsaʼ mejli ti chumtʌl tiʼ pejtelel ora, i jiñi i yalobilob maʼañix tsaʼ mejliyob jaʼel. Adán wersa yomʌch miʼ chʌmel (sajtel) come yilolʌch tsiʼ chaʼle mulil. Pero ¿ixcu jiñi i yalobilob? Mach tiʼ mulobic cheʼ tsiʼ chaʼle mulil Adán (Ro. 5:12; 5:14, Jiñi tsijiʼ bʌ wen tʼañ chaʼañ estudio). ¿Am ba chuqui miʼ mejlel ti melol chaʼan miʼ locʼsʌntelob ti jiñi mulil? Añʌch. Cheʼ bʌ maxto wen cabʌlic ora tsiʼ chaʼle mulil Adán, Jehová tsaʼ caji i tsictesan bajcheʼ mi caj i coltan jiñi i wiñicob ti jiñi mulil yicʼot chʌmel (Gn. 3:15). I cheʼ jaʼel, Jehová tsiʼ yʌlʌ chaʼan mi caj i choc tilel jiñi i Yalobil «chaʼan miʼ yʌcʼ i bʌ ti chʌmel chaʼan i tojol i mul cabʌlob» (Mr. 10:45; Jn. 6:51).

² ¿Chuqui jiñi i tojol laj coltʌntel? Yaʼ ti Tsʼijbujel Griego miʼ yʌl chaʼan jiñʌch jiñi i cuxtʌlel tsaʼ bʌ i yʌcʼʌ Jesús chaʼan miʼ toj jiñi tsaʼ bʌ i sʌtʌ Adán (1 Co. 15:22). ¿Chucoch yomʌch cheʼ miʼ mejlel bajcheʼ ili? Come yaʼ tiʼ Mandar Jehová miʼ yʌl chaʼan yomʌch miʼ chaʼ qʼuextʌyel yicʼot yambʌ cuxtʌlel (Éx. 21:23-25). Adán tiʼ sʌtʌ jiñi toj bʌ i cuxtʌlel. Jin chaʼan, chaʼan miʼ tsʼʌctiyel cheʼ bajcheʼ miʼ yʌl jiñi toj bʌ i Mandar Jehová, Jesús tsiʼ yʌcʼʌ jiñi toj bʌ i cuxtʌlel (Ro. 5:17). Cheʼ bajcheʼ ili, miʼ sujtel ti «Lac Tat Am Bʌ tiʼ Pejtelel Ora» mi mucʼʌch la cʌcʼ lac ñopoñel ti jiñi i tojol laj coltʌntel (Is. 9:6; Ro. 3:23, 24).

3. Cheʼ bajcheʼ miʼ yʌl Juan 14:31 yicʼot 15:13, ¿chucoch Jesús tsiʼ yʌcʼʌ jiñi toj bʌ i cuxtʌlel?

³ Jesús tsaʼʌch i yʌcʼʌ jiñi i cuxtʌlel come mucʼʌch i wen cʼuxbin i Tat yicʼot miʼ cʼuxbiñonla jaʼel (pejcan Juan 14:31; 15:13). Jiñi cʼuxbiya jiñʌch tsaʼ bʌ i ñijca chaʼan miʼ chʌn melben i yeʼtel (troñel) i Tat yicʼot chaʼan xucʼul miʼ yajñel cʼʌlʌl miʼ chʌmel. Wocolix i yʌlʌ tsaʼ bʌ i mele Jesús, mi caj i tsʼʌctiyel jiñi  wʌn ñaʼtʌbil bʌ i chaʼan Jehová tiʼ tojlel jiñi wiñicob xʼixicob (quixtañujob) yicʼot chaʼan ili Lum. Ti ili estudio, mi caj laj qʼuel chucoch Jehová tsiʼ yʌcʼʌ chaʼan Jesús miʼ wen ñusan wocol cheʼ bʌ muʼto caj i tsʌnsañob. Cheʼ jaʼel, mi caj lac tsʼitaʼ qʼuel jumpʼejl ejemplo chaʼan juntiquil xtsʼijbaya Biblia tsaʼ bʌ i wen qʼuele ti ñuc jiñi i tojol laj coltʌntel. I jiñi cojix bʌ mi caj laj qʼuel, jiñʌch chaʼan bajcheʼ miʼ mejlel lac ñumen qʼuel ti ñuc tsaʼ bʌ i mele Jehová yicʼot Jesús ti lac tojlel.

4. ¿Bajcheʼ tsaʼ chʌmi Jesús?

⁴ Laʼcu lac tsʼitaʼ ñaʼtan bajcheʼ yilal tsiʼ ñusa Jesús cheʼ bʌ lʌcʼʌlix yom chaʼan miʼ tsʌnsañob. Cheʼ yomic, tsaʼ mejli i cʼajtin i coltʌntel ti yonlel ángelob, pero mach cheʼic tsiʼ mele. Tsaʼʌch i yʌcʼʌ chaʼan soldadojob romanojoʼ bʌ miʼ chucob yicʼot miʼ jatsʼob (Mt. 26:52-54; Jn. 18:3; 19:1). Jesús tsaʼ jajtsʼi ti asiyal tsaʼ bʌ i wen lowbe i bʌcʼtal. Ti wiʼil tsiʼ yʌqʼueyob i qʼuech majlel juntsʼijt teʼ anquese wen lojweñix. Jesús tsiʼ qʼueche majlel jiñi teʼ cʼʌlʌl baqui mi caj i chʼijob. Pero jiñi soldadojob romanojoʼ bʌ tsiʼ xicʼbeyob juntiquil wiñic chaʼan miʼ coltan Jesús i qʼuech majlel jiñi teʼ (Mt. 27:32). Cheʼ bʌ Jesús tsaʼ cʼoti yaʼ baqui mi caj i chʼijob, jiñi muʼ bʌ i cajelob ti tsʌnsa tsiʼ chʼijbeyob i cʼʌb yicʼot i yoc ti jiñi bʌñʌl bʌ teʼ. Cheʼ bʌ yaʼix jocʼol, jiñi i yalel tsaʼ caji i ñumen lowben yaʼ baqui tsiʼ chʼijiyob ti clavo. Jiñi i yamigojob woli (choncol) i wen yubiñob wocol yicʼot woliyob (yʌquelob) ti uqʼuel, pero jiñi yumʌlob judíojoʼ bʌ woli i wajleñob Jesús (Lc. 23:32-38; Jn. 19:25). Mach jumucʼ jach tsiʼ yila wocol Jesús. Tsaʼ caji ti jilel majlel i pʼʌtʌlel, i wocolix tsaʼ caji i jap icʼ. Yujil chaʼan xucʼulʌch tsaʼ ajñi tiʼ tojlel Jehová. I cheʼ bʌ muqʼuix caj i yoque chʌmel, tsiʼ pejca Jehová ti oración. Cheʼ jiñi, tsiʼ liji i jol i tsaʼ chʌmi (Mr. 15:37; Lc. 23:46; Jn. 10:17, 18; 19:30, Jini wen bʌ tʼan). ¡Cʌlʌxix tsiʼ ñusa wocol cheʼ bʌ tsaʼ chʌmi!

5. ¿Baqui bʌ jiñi ñumen wocol bʌ tsiʼ yubi Jesús?

⁵ Pero ñumen wocol bʌ tsiʼ yubi Jesús jiñʌch cheʼ tsiʼ jopʼbeyob i mul chaʼan tsiʼ chaʼle pʼajoñel, i mach wen jiñic bajcheʼ tiʼ tsʌnsayob. Tsiʼ yʌlʌyob chaʼan Jesús tsiʼ pʼaja Dios yicʼot chaʼan maʼañic tsiʼ chʼʌmbe ti ñuc i cʼabaʼ (Mt. 26:64-66). Cheʼ bʌ Jesús yujil chaʼan jiñi quixtañujob mi caj i yʌlob chaʼan tsiʼ pʼaja Dios, tsiʼ wen acʼʌ ti pensar i yom chaʼan jiñi i Tat miʼ coltan (Mt. 26:38, 39, 42). ¿Chucoch tsiʼ yʌcʼʌ Jehová chaʼan jiñi i Yalobil miʼ ñusan wocol yicʼot miʼ chʌmel? Mi caj laj qʼuel uxchajp chucoch.

6. ¿Chucoch yom miʼ jocʼchocontel Jesús ti juntsʼijt teʼ?

⁶ Ñaxam bʌ jiñʌch chaʼan Jesús yom miʼ chʌmel ti teʼ chaʼan mach chʌn chocbilix miʼ qʼuejlelob jiñi judíojob (Gá. 3:10, 13). Tsaʼ chojquiyob ti Dios jiñi judíojob come maʼañic tsiʼ jacʼbeyob i Mandar Dios anquese tsiʼ lon alʌyob chaʼan mucʼʌch caj i melob. I yaʼto ochem jaʼel chaʼan xmulilob tiʼ caj Adán (Ro. 5:12). Jiñi Mandar tsaʼ bʌ aqʼuentiyob jiñi israelitajob ti Dios, miʼ yʌl chaʼan mi juntiquil wiñic miʼ chaʼlen mulil yom miʼ tsʌnsʌntel. I ti wiʼil, cheʼ bʌ tsaʼix chʌmi miʼ jocʼchocontel ti teʼ (Dt. 21:22, 23; 27:26). * Jin chaʼan, cheʼ bʌ Jesús tsaʼ jocʼchoconti ti teʼ, tsiʼ chʼʌmʌ tiʼ wenta i mul jiñi judíojob i cheʼ bajcheʼ jiñi, mach chʌn chocbilix tsaʼ qʼuejliyob. Jiñi i cuxtʌlel tsaʼ bʌ i yʌcʼʌ Jesús tsaʼ mejli i coltañob anquese tiʼ tsʼaʼleyob.

7. ¿Baqui bʌ i chaʼchajplel cheʼ bʌ Dios tsiʼ yʌcʼʌ chaʼan jiñi i Yalobil miʼ ñusan wocol?

⁷ I chaʼchajplel chucoch Jehová tsiʼ yʌqʼue i ñusan cabʌl wocol jiñi i Yalobil, jiñʌch chaʼan  miʼ chajpan bajcheʼ Ñuc bʌ sacerdote. Jesús tsaʼʌch i chumta chaʼan wocolʌch chaʼan mi lac jacʼben i tʼan Dios cheʼ bʌ mi lac ñusan tsʌts bʌ wocol. Wen wocolʌch tsaʼ bʌ i ñusa, jin chaʼan ‹tsiʼ cʼajtibe Dios ti wocol tʼan yicʼot cʼam tsiʼ chaʼle uqʼuel›. Cheʼ bajcheʼ ili, Jesús miʼ chʼʌmbeñonla i sujm yicʼot «miʼ mejlel i coltan jini woli bʌ i pʌjyelob ti mulil». Mi la cʌqʼuen wocolix i yʌlʌ Jehová cheʼ tsiʼ waʼchoco juntiquil Ñuc bʌ sacerdote muʼ bʌ i chʼʌmben i sujm chaʼan an laj cʼunlel (He. 2:17, 18; 4:14-16; 5:7-10).

8. ¿Baqui bʌ jiñi i yuxchajplel cheʼ bʌ Dios tsiʼ yʌcʼʌ chaʼan Jesús miʼ ñusan wocol?

⁸ I yuxchajplel chucoch Jehová tsiʼ yʌcʼʌ chaʼan jiñi i Yalobil miʼ wen ñusan wocol, jiñʌch chaʼan miʼ jajqʼuel ili ñuc bʌ cʼajtiya: ¿Mejl ba jiñi wiñicob xʼixicob i yajñelob ti xucʼul tiʼ tojlel Jehová anquese miʼ ñusañob wen tsʌts bʌ wocol? Satanás miʼ yʌl chaʼan maʼañic. Miʼ yʌl chaʼan mi lac melben i yeʼtel Jehová come an jach chuqui la com. Cheʼ jaʼel, miʼ yʌl chaʼan lajalonla bajcheʼ Adán, mach bʌ añic tsiʼ cʼuxbi Jehová (Job 1:9-11; 2:4, 5). Jehová yujilʌch chaʼan jiñi i Yalobil xucʼulʌch mi caj i yajñel, jin chaʼan tsiʼ yʌcʼʌ i ñusan wocol baqui jaxʌl tsaʼ mejli. I cheʼ bajcheʼ ili, tsiʼ pʌsʌ chaʼan Satanás jiñʌch juntiquil xlot.

9. ¿Chuqui miʼ mejlel laj cʌn tiʼ tojlel jiñi apóstol Juan?

⁹ Yonlel xñoptʼañob an i pʼʌtʼesʌbeyob i ñopoñel cheʼ bʌ miʼ cʼotel i cʌñob chaʼan jiñi i tojol laj coltʌntel. An i bej chaʼleyob subtʼan anquese miʼ wen contrajintelob yicʼot anquese miʼ ñusañob cabʌl wocol. Laʼ laj qʼuel tsaʼ bʌ i ñusa jiñi apóstol Juan. Tajol ñumen ti 60 jab tiʼ subu i sujmlel chaʼan Cristo yicʼot chaʼan jiñi i tojol laj coltʌntel. Lʌcʼʌ añix 100 i jabilel cheʼ bʌ jiñi romanojob tsiʼ yotsayob ti mʌjquibʌl yaʼ ti isla am bʌ ti Patmos. ¿Chuqui i mul cheʼ bʌ tsiʼ yotsayob ti mʌjquibʌl? Chaʼañʌch tiʼ subu jiñi «i tʼan Dios yicʼot i sujmlel Jesús» (Ap. 1:9). ¡Wen utsʼatax bajcheʼ tsiʼ pʌsʌ i xucʼtʌlel yicʼot bajcheʼ tsiʼ lʌtʼʌ jiñi wocol tac!

10. ¿Bajcheʼ tiʼ pʌsʌ Juan ti jiñi libro tsaʼ bʌ i tsʼijbu chaʼan mucʼʌch i wen qʼuel ti ñuc jiñi i tojol laj coltʌntel?

¹⁰ Jiñi libro tsaʼ bʌ i tsʼijbu Juan tsiʼ pʌsʌ chaʼan mucʼʌch i wen cʼuxbin Jesús yicʼot chaʼan mucʼʌch i wen qʼuel ti ñuc jiñi i tojol laj coltʌntel. Cheʼ jaʼel, ñumen ti 100 miʼ taj ti tʼan jiñi i tojol laj coltʌntel yicʼot jiñi wenlel. Jumpʼejl ejemplo, tiʼ tsʼijbu: «Mi an majqui tsiʼ chaʼle mulil, an la caj pejcaya tiʼ tojlel lac Tat, jiñʌch Jesucristo, jini Toj Bʌ» (1 Jn. 2:1, 2). Cheʼ jaʼel, tsiʼ yʌlʌ chaʼan wen ñucʌch i cʼʌjñibal cheʼ «miʼ tsictesañob chaʼan bʌ Jesús» (Ap. 19:10, TNM). Tsiquilʌch chaʼan Juan mucʼʌch i wen qʼuel ti ñuc jiñi i tojol laj coltʌntel. ¿Bajcheʼ miʼ mejlel lac pʌs chaʼan cheʼʌch mi la cubin jaʼel?

11. ¿Chuqui miʼ mejlel i coltañonla chaʼan maʼañic mi lac yajlel ti mulil?

¹¹ Laʼ lac chaʼlen wersa chaʼan maʼañic mi lac yajlel ti mulil. Mi mucʼʌch laj qʼuel ti ñuc jiñi i tojol laj coltʌntel, maʼañic mi caj lac ñaʼtan: «Miʼ mejlel c chaʼlen mulil, i ti wiʼil miʼ mejlel j cʼajtin chaʼan mic ñusʌbentel». Yom bʌ mi lac mel jiñʌch cheʼ bʌ mi tsaʼ tili ti lac pensar chaʼan mi lac mel mach bʌ weñic, mi la cʌl: «¡Maʼañic! ¿Chucoch mi caj c mel bajcheʼ ili cheʼ bʌ Jehová yicʼot Jesús cabʌlix chuqui tsiʼ meleyob tic tojlel?». Cheʼ jaʼel miʼ mejlel laj cʼajtiben i coltaya Jehová i mi lac suben: «Mach maʼ wʌcʼon lojon baʼ mic pʌjyel lojon ti mulil» (Mt. 6:13).

12. ¿Bajcheʼ miʼ mejlel lac jacʼ jiñi ticʼojel am bʌ ti 1 Juan 3:16-18?

¹² Laʼ laj cʼuxbin jiñi la quermañujob. Mi  cheʼʌch mi lac mel, mi lac pʌs chaʼan mucʼʌch laj qʼuel ti ñuc jiñi i tojol laj coltʌntel come Jesús tsiʼ yʌcʼʌ i cuxtʌlel chaʼan ti lac pejtelel. Mi Jesús tsiʼ yʌcʼʌ i cuxtʌlel chaʼan ti lac pejtelel chaʼañʌch miʼ cʼuxbiñonla (pejcan 1 Juan 3:16-18). Mi weñʌch bajcheʼ mi lac pejcan lac bʌ, woli lac pʌs chaʼan mucʼʌch laj cʼuxbin lac bʌ (Ef. 4:29, 31–5:2). Mi laj coltan lac bʌ cheʼ bʌ an majqui cʼam o cheʼ bʌ an majqui woliʼ ñusañob tsʌts bʌ wocol, cheʼ bajcheʼ jiñi tsʌts bʌ icʼ jaʼal o yan tac bʌ. Pero ¿chuqui yom mi lac mel cheʼ bʌ juntiquil hermano miʼ yʌl o miʼ mel mach bʌ weñic ti lac tojlel?

13. ¿Chucoch yom mi lac ñusʌben i mul yambʌlob?

¹³ ¿Ñʌmʌl ba lac lot ti lac pusicʼal michʼajel cheʼ bʌ an juntiquil miʼ yʌl mach bʌ weñic ti lac tojlel? (Lv. 19:18, TNM). Mi cheʼʌchi, laʼ lac mel muʼ bʌ i yʌl ili ticʼojel: «Chʌn cuchben laʼ bʌ laʼ sajtemal yicʼot ñusʌben laʼ bʌ laʼ mul tiʼ yutslel laʼ pusicʼal, cheʼto jaʼel cheʼ añʌch chucoch yom mi laʼ michʼan tiʼ tojlel yambʌ. Cheʼ bajcheʼ tsiʼ ñusʌbeyetla laʼ mul Jehová tiʼ yutslel i pusicʼal, cheʼʌch yom mi laʼ mel jatetla» (Col. 3:13, TNM). Cheʼ bʌ mi lac ñusʌben i mul juntiquil la quermañu, woli lac pʌsben jiñi lac Tat am bʌ ti panchan chaʼan mucʼʌch laj qʼuel ti ñuc jiñi i tojol laj coltʌntel. ¿Bajcheʼ miʼ mejlel lac ñumen qʼuel ti ñuc ili majtañʌl tsaʼ bʌ i yʌqʼueyonla Dios?

14. ¿Chuqui mi caj i coltañonla chaʼan mi lac ñumen qʼuel ti ñuc jiñi i tojol laj coltʌntel?

¹⁴ Laʼ la cʌqʼuen wocolix i yʌlʌ Jehová chaʼan jiñi i tojol laj coltʌntel. Juntiquil hermana am bʌ 83 i jabilel chumul bʌ ti India i cʼabaʼ Joanna, miʼ yʌl: «Wen ñuc mij qʼuel cheʼ bʌ ti jiñi coración mi cʌqʼuen wocolix i yʌlʌ Jehová chaʼan jiñi i tojol laj coltʌntel». Ti jiñi oración muʼ bʌ lac mel ti jujuntiquil, laʼ lac ñaʼtan jaʼel jiñi mach tac bʌ weñic tsaʼ lac mele ti jiñi qʼuin i laʼ lac suben Jehová chaʼan miʼ ñusʌbeñonla. Pero mi tsaʼ lac mele tsʌts bʌ mulil yom mi laj cʼajtiben i coltaya jaʼel jiñi ancianojob. I jiñi ancianojob mi caj i ñʌchʼtañob chuqui mi lac subeñob i mi caj i yʌqʼueñoñobla ticʼojel chucul bʌ ti Biblia. I cheʼ jaʼel, mi caj i melob oración yicʼotoñobla i mi caj i cʼajtibeñob Jehová chaʼan miʼ ñusan lac mul. Wocolix i yʌlʌ cheʼ bʌ tsiʼ yʌcʼʌ i cuxtʌlel Jesús, mi lac mejlel ti chaʼ sujtel tiʼ yamigo Jehová (Stg. 5:14-16).

15. ¿Chucoch yom mi la cʌqʼuen i yorajlel chaʼan mi lac wen ñaʼtan jiñi i tojol laj coltʌntel?

¹⁵ Laʼ la cʌqʼuen i yorajlel chaʼan mi lac wen  ñaʼtan jiñi i tojol laj coltʌntel. Juntiquil hermana am bʌ 73 i jabilel i cʼabaʼ Rajamani, miʼ yʌl: «Cheʼ bʌ mic pejcan bajcheʼ cʼamel tsiʼ wen ñusa wocol Jesús, miʼ loqʼuel i yaʼlel c wut». Tajol joñonla jaʼel miʼ mejlel i wen aqʼueñonla lac chʼijyemlel cheʼ mi lac pejcan bajcheʼ cʼamel tsiʼ wen ñusa wocol Jesús. Cheʼ bʌ mi lac ñumen aqʼuen i yorajlel lac wen ñaʼtan jiñi i tojol laj coltʌntel, mi caj lac ñumen cʼuxbin Jehová yicʼot Jesús. Jin chaʼan, cheʼ mi lac bajñel chajpan lac bʌ, ñumen wen cheʼ mi lac wen ñaʼtan jiñi i tojol laj coltʌntel.

16. ¿Bajcheʼ miʼ coltañonla cheʼ bʌ mi laj cʌntesan yambʌlob chaʼan jiñi i tojol laj coltʌntel? (Qʼuele jiñi dibujo am bʌ tiʼ tejchibal).

¹⁶ Laʼ laj cʌntesan yambʌlob chaʼan jiñi i tojol laj coltʌntel. Mi lac ñumen qʼuel ti ñuc jiñi i tojol laj coltʌntel cheʼ bʌ mi lac suben yambʌlob. Cabʌlʌch la queʼtijib muʼ bʌ i mejlel laj cʼʌn chaʼan mi lac tsictesʌben jiñi yambʌlob chucoch Jesús tsaʼ chʌmi ti laj caj. Jumpʼejl ejemplo, miʼ mejlel laj cʼʌn jiñi folleto ¡Jini wen tʼan tilem bʌ ti Dios!, ti jiñi cʌntesʌntel 4 am bʌ i títulojlel «¿Majqui jini Jesucristo?». Cheʼ jaʼel miʼ mejlel laj cʼʌn jiñi libro ¿Chuqui miʼ cʌntesañonla jiñi Biblia?, ti jiñi cʌntesʌntel 5 am bʌ i títulojlel «I tojol laj coltʌntel: Ñuc bʌ lac majtan ti Dios». Ti jujumpʼejl jab mi lac ñumen qʼuel ti ñuc jiñi i tojol laj coltʌntel cheʼ bʌ mi lac majlel ti jiñi i Cʼajtesʌntel i chʌmel Jesús yicʼot cheʼ bʌ mi lac pʌy yambʌlob ti jiñi tempa bʌ. Jehová tsaʼ yʌqʼueyonla ili wen ñuc bʌ eʼtel chaʼan mi laj cʌntesan yambʌlob chaʼan tiʼ tojlel i Yalobil.

17. ¿Chucoch jiñi i tojol laj coltʌntel jiñʌch ñumen ñuc bʌ majtañʌl tsaʼ bʌ i yʌcʼʌ Dios tiʼ tojlel jiñi quixtañujob?

¹⁷ ¿Chucoch mucʼʌch lac wen qʼuel ti ñuc jiñi i tojol laj coltʌntel yicʼot mi la cʌqʼuen wocolix i yʌlʌ Jehová yicʼot Jesús chaʼan jiñi tsaʼ bʌ i meleyob? Come jiñi i tojol laj coltʌntel miʼ coltañonla chaʼan miʼ mejlel la cajñel ti lʌcʼʌl la quicʼot Jehová anquese xmulilonla. Cheʼ jaʼel, mi caj i jisʌben i yeʼtel jiñi Diablo (1 Jn. 3:8, TNM). Yicʼot mi caj i tsʼʌctesan jiñi wʌn ñaʼtʌbil bʌ i chaʼan Jehová cheʼ bʌ miʼ sujtesan ti jumpʼejl paraíso ili Lum, cheʼ bʌ pejtelel jiñi quixtañujob miʼ cʼuxbiñob yicʼot miʼ melbeñob i yeʼtel. Jin chaʼan, laʼ lac chaʼlen wersa lac ñumen pʌs chaʼan mi lac ñumen qʼuel ti ñuc jiñi i tojol laj coltʌntel come jiñʌch jiñi ñumen ñuc bʌ majtañʌl tsaʼ bʌ i yʌcʼʌ Jehová tiʼ tojlel jiñi quixtañujob.