1, 2. ¿Chuqui ti ejemplo miʼ coltañonla lac chʼʌmben i sujm muʼ bʌ i yʌl 1 Pedro 2:21?

LAʼCU lac ñaʼtan chaʼan mi lac majlel ti xʌmbal la quicʼot junmojt lac piʼʌlob baqui wen bʌbʌqʼuen yicʼot cabʌl ocʼol. I yaʼ majlel la quicʼot juntiquil woli (choncol) bʌ i pʌsbeñonla bij i joñonla mi lac tsajcan yaʼ baqui tsiʼ tʼuchtan majlel. Cheʼ jiñi, mi laj cʌy laj qʼuel, pero maʼañic mi lac chaʼlen bʌqʼuen. Ti lac pejtelel mi lac tʼuchtan majlel baqui tsaʼ ñumi jiñi xpʌs bij.

² Jiñi i sujm bʌ xñoptʼañonbʌla lajal bajcheʼ woliyonla (yʌquelonla) ti xʌmbal baqui wen bʌbʌqʼuen come chumulonla ti ili jontol bʌ pañimil (mulawil). Pero Jehová tsiʼ yʌqʼueyonla juntiquil muʼ bʌ i tojʼesañonla majlel, jiñʌch Jesucristo, jiñi toj bʌ i Yalobil chaʼan mi lac ‹tsajcan majlel› (1 P. 2:21). Jumpʼejl libro muʼ bʌ i tsictesan chaʼan jiñi Biblia miʼ yʌl chaʼan Pedro woliʼ lajin Jesús bajcheʼ juntiquil xpʌs bij. Cheʼ bajcheʼ juntiquil xʌmbal miʼ mejlel i tsajcʌben i bijlel juntiquil xpʌs bij, joñonla jaʼel miʼ mejlel lac tsajcʌben i bijlel Jesús. Pero ¿chuqui yom i yʌl cheʼ mi lac tsajcan? ¿Chucoch yom mi lac tsajcan? I ¿bajcheʼ miʼ mejlel lac mel?

3. ¿Chuqui yom i yʌl cheʼ an majqui mi lac tsajcan majlel?

³ ¿Chuqui yom i yʌl cheʼ an majqui mi lac tsajcan majlel? Cheʼ bʌ jiñi Biblia miʼ cʼʌn jiñi tʼan xʌmbal yicʼot ocʌl an i tajol woliʼ taj ti tʼan jiñi i melbal (chaʼlibal) juntiquil lac piʼʌl (Gn. 6:9; Pr. 4:26). Jiñi i melbal juntiquil lac piʼʌl miʼ mejlel ti lajintel bajcheʼ jiñi i xʌmbal o baqui tsiʼ yʌcʼʌ i yoc. Jin chaʼan,  cheʼ bʌ mi lac tsajcan juntiquil lac piʼʌl yom i yʌl chaʼan mi lac lajiben i melbal.

4. ¿Chuqui yom i yʌl cheʼ mi lac tsajcan majlel Jesús?

⁴ Cheʼ jiñi, ¿chuqui yom i yʌl cheʼ mi lac tsajcan majlel Jesús? Jiñʌch cheʼ bʌ mi lac lajiben i melbal. Yaʼ ti texto baqui chucul ili estudio, jiñi apóstol Pedro tsiʼ yʌlʌ jiñi wem bʌ ejemplo tsaʼ bʌ i pʌsbeyonla Jesús cheʼ bʌ tsiʼ lʌtʼʌ jiñi wocol. Pero cabʌlto chuqui miʼ mejlel lac lajiben Jesús (1 P. 2:18-25). Tiʼ sujm, pejtelel jiñi tsaʼ bʌ i mele yicʼot tsaʼ bʌ i yʌlʌ jumpʼejlʌch wem bʌ ejemplo chaʼañonla.

5. Tsictesan chucoch mucʼʌch i mejlel lac lajiben jiñi toj bʌ i melbal Jesús anquese xmulilonla.

⁵ Pero ¿muʼ ba mejlel lac tsajcʌben i melbal Jesús anquese xmulilonla? Mucʼʌch. Pedro maʼañic tsiʼ yʌlʌ chaʼan junyaj toj yom mi lac mel, tsaʼ jach i yʌlʌ chaʼan yom mi lac tsajcan majlel, pero ili yom i yʌl chaʼan xucʼul yom mi lac mel. Mi mucʼʌch lac tsajcan ti wen jiñi i melbal, mi lac chaʼlen wersa cheʼ bajcheʼ cʼamel mi lac mejlel, wolʌch lac jacʼ tsaʼ bʌ i yʌlʌ jiñi apóstol Juan chaʼan mi lac bej ajñel cheʼ bajcheʼ tsiʼ mele Jesús (1 Jn. 2:6).

6, 7. ¿Chucoch mi lac lʌcʼtesan lac bʌ ti Jehová mi mucʼʌch lac tsajcan majlel Jesús?

⁶ Mi mucʼʌch lac tsajcan majlel Jesús, mi caj lac lʌcʼtesan lac bʌ ti Jehová. ¿Chucoch? Ñaxam bʌ, come Jesús tsiʼ cʌybeyonla wem bʌ ejemplo chaʼan bajcheʼ mi lac chumtʌl cheʼ bajcheʼ miʼ mulan Dios (Jn. 8:29). Jin chaʼan, mi mucʼʌch lac tsajcan majlel Jesús, Jehová tijicña mi caj i yubin i bʌ. Cheʼ jaʼel, miʼ mejlel lac ñop chaʼan jiñi lac Tat am bʌ ti panchan mi caj i lʌcʼtesan i bʌ tiʼ tojlel jiñi muʼ bʌ i chaʼleñob wersa chaʼan miʼ sujtelob tiʼ yamigo (Stg. 4:8).

⁷ I chaʼpʼejlel, Jesús tsiʼ laji i Tat ti toj. Jin chaʼan tsaʼ mejli i yʌl: «Jini tsaʼ bʌ i qʼueleyon, tsaʼix i qʼuele c Tat» (Jn. 14:9). Mi lac lajin Jehová cheʼ bʌ mi lac lajin jiñi i melbal Jesús  yicʼot bajcheʼ yilal tsiʼ mele tiʼ tojlel lac piʼʌlob, jumpʼejl ejemplo, jiñʌch cheʼ bʌ tsiʼ pʼunta juntiquil am bʌ i lepra, cheʼ tsiʼ chʼʌmbe i sujm bajcheʼ yubil miʼ yubin i bʌ juntiquil xʼixic cʼam bʌ yicʼot cheʼ bʌ tsiʼ pʼunta jiñi am bʌ majqui tsaʼ chʌmiyob (sajtiyob) i chaʼan (Mr. 1:40, 41; 5:25-34; Jn. 11:33-35). Cheʼ bʌ mi lac ñumen chaʼlen wersa chaʼan mi lac lajiben i melbal tac Jehová, ñumen lʌcʼʌl mi la cajñel tiʼ tojlel.

8. Tsictesan chucoch miʼ coltañonla lac mʌlben pañimil cheʼ mi lac tsajcan majlel Jesús.

⁸ Mi mucʼʌch lac tsajcan majlel Jesús, maʼañic mi caj i qʼuextan baqui an lac ñaʼtʌbal ili jontol bʌ pañimil. Cheʼ bʌ jumpʼejl jax acʼʌlel yom chaʼan miʼ tsʌnsʌntel Jesús, tsiʼ yʌlʌ: «Tsac jisʌbe i yumʌntel pañimil» (Jn. 16:33). Jiñi i sujmlel i tʼan jiñʌch cheʼ maʼañic tsiʼ yʌcʼʌ chaʼan ili pañimil miʼ qʼuextʌben i ñaʼtʌbal, i melbal yicʼot chuqui yom bʌ i taj. Tsiʼ chaʼle wersa chaʼan maʼañic miʼ ñajʌyel i chaʼan chucoch tsaʼ tili ila ti Pañimil: Chaʼan miʼ sʌqʼuesʌntel i cʼabaʼ Jehová. ¿Chuqui mi caj lac mel joñonla? Cabʌl chuqui miʼ mejlel i yʌn lac pensar. Pero, mi yaʼʌch mi la cʌcʼ lac ñaʼtʌbal ti melol chuqui yom Jehová cheʼ bajcheʼ tsiʼ mele Jesús, mi caj lac mʌlben (jotben) jaʼel ili pañimil (1 Jn. 5:5).

9. ¿Chuqui yom mi lac mel chaʼan maʼañic mi lac loqʼuel ti jiñi bij muʼ bʌ i yʌqʼueñonla laj cuxtʌlel?

⁹ Mi mucʼʌch lac tsajcan majlel Jesús, mi caj lac taj jiñi cuxtʌlel mach bʌ añic i jilibal. Cheʼ bʌ juntiquil wiñic wen am bʌ i chubʌʼan tsiʼ cʼajtibe Jesús chuqui yom miʼ mel chaʼan miʼ taj jiñi cuxtʌlel mach bʌ añic i jilibal, tsiʼ jacʼbe: «Laʼ tsajcañon» (Mt. 19:16-21). Jesús tiʼ sube chaʼtiqui uxtiquil judíojob maʼañic bʌ miʼ ñopob chaʼan jiñʌch jiñi Cristo: «C tiñʌmeʼob [...] miʼ tsajcañoñob. Mi cʌqʼueñob i cuxtʌlel mach bʌ anic miʼ jilel» (Jn. 10:24-29). I Jesús tiʼ sube Nicodemo, juntiquil ochem bʌ ti Sanedrín chaʼan jiñi muʼ bʌ i pʌsob i ñopoñel tiʼ tojlel jiñʌch muʼ bʌ caj i tajob jiñi cuxtʌlel mach bʌ añic miʼ jilel (Jn. 3:16). Cheʼ bʌ mi lac mel bajcheʼ tsiʼ pʌsʌ Jesús tiʼ tʼan yicʼot tiʼ melbal mi lac pʌs chaʼan mucʼʌch lac ñop tiʼ tojlel. Mi mucʼʌch lac mel, maʼañic mi caj lac loqʼuel ti jiñi bij muʼ bʌ i yʌqʼueñonla laj cuxtʌlel (Mt. 7:14).

10. ¿Chuqui yom mi lac mel chaʼan mi lac ñumen cʌn Jesús? (Juan 17:3).

¹⁰ Chaʼan mi lac tsajcan majlel Jesús yicʼot lac xucʼtʌlel, ñaxan yom mi laj cʌn (pejcan Juan 17:3). Maʼañic baʼ ora miʼ yujtel laj cʌn Jesús. Yom mi lac ñumen cʌn majlel, ili yom i yʌl, cheʼ mi laj cʌn jiñi melbal tac am bʌ i chaʼan, jiñi i ñaʼtʌbal yicʼot i mandar tac. Ti lac pejtelel yom mi lac chaʼlen wersa laj cʌn Jehová yicʼot jiñi i Yalobil, mach yʌlʌyic mi añix cabʌl jab añonla tiʼ sujmlel o mach cheʼiqui.

11. ¿Chuqui mi lac taj yaʼ ti chʌmpʼejl Evangelio?

¹¹ Jehová miʼ wen cʼuxbiñonla, jin chaʼan tsiʼ  yʌcʼʌ ti tsʼijbuntel jiñi chʌmpʼejl Evangelio yaʼ tiʼ Tʼan chaʼan miʼ coltañonla laj cʌn jiñi i Yalobil. Ili miʼ taj ti tʼan jiñi i cuxtʌlel Jesús yicʼot i subtʼan. Miʼ subeñonla chuqui tsiʼ yʌlʌ, chuqui tsiʼ mele yicʼot bajcheʼ yubil tsiʼ yubi i bʌ. Ili chʌmpʼejl libro miʼ coltañonla lac wen ñaʼtan jiñi ejemplo tsaʼ bʌ i yʌcʼʌ Jesús (He. 12:3). Miʼ mejlel la cʌl, chaʼan yaʼʌch baqui mi laj qʼuel bajcheʼ yom mi lac tsajcan majlel Jesús. Mi mucʼʌch lac wen tsajin jiñi Evangelio tac, mi caj lac ñumen cʌn Jesús i cheʼ bajcheʼ jiñi mi caj lac tsajcan majlel yicʼot lac xucʼtʌlel.

12. ¿Bajcheʼ miʼ mejlel lac ñumen locʼsʌben i wenlel jiñi Evangelio tac?

¹² Chaʼan mi lac locʼsʌben i wenlel jiñi Evangelio tac mach cojach yom mi lac pejcan. Yom mi lac locʼsʌben i yorajlel chaʼan mi lac tsajin yicʼot mi lac wen ñaʼtan jiñi muʼ bʌ lac pejcan (laja yicʼot Josué 1:8). Laʼ laj qʼuel chaʼchajp muʼ bʌ caj i coltañonla chaʼan mi lac wen ñaʼtan jiñi muʼ bʌ lac pejcan yaʼ ti Evangelio tac yicʼot chaʼan mi lac mel cheʼ bajcheʼ mi laj cʌn.

13. ¿Bajcheʼ miʼ mejlel lac chumtan jiñi muʼ bʌ i yʌl jiñi Evangelio tac?

¹³ Ñaxam bʌ, laʼ lac chumtan jiñi muʼ bʌ lac pejcan yaʼ ti Evangelio tac. Laʼ laj cʼʌn lac ñaʼtʌbal chaʼan mi lac ñop laj qʼuel, lac ñʌchʼtan yicʼot la cubin jiñi tsaʼ bʌ ujti. Miʼ mejlel i coltañonla jiñi jun tac muʼ bʌ i yʌqʼueñonla jiñi i yorganización Jehová. Laʼ lac wen qʼuel jiñi woli bʌ i yʌl tilel jiñi relato. Laʼ lac wen sʌclan chuqui miʼ yʌjlel tiʼ tojlel jiñi lac piʼʌlob, jiñi tejclum tac yicʼot tsaʼ bʌ ujti ti ñaxan yicʼot ti wiʼil. Mi jumpʼejl relato muʼ bʌ i tilel ti yambʌ Evangelio, laʼ lac lajin i tajol an chuqui yambʌ mi lac taj maʼañic bʌ tiʼ tsʼijbu jiñi yambʌ.

14, 15. ¿Chuqui yom mi lac mel chaʼan mi lac jacʼ jiñi muʼ bʌ laj cʌn yaʼ ti Evangelio tac?

¹⁴ I chaʼpʼejlel, laʼ lac mel jiñi muʼ bʌ laj cʌn yaʼ ti Evangelio tac (Jn. 13:17). Cheʼ bʌ miʼ yujtel lac tsajin jumpʼejl relato yaʼ ti Evangelio, laʼ laj cʼajtiben lac bʌ: «¿Chuqui miʼ pʌsbeñon? ¿Bajcheʼ miʼ mejlel j cʼʌn chaʼan mij coltan yambʌlob?». Laʼ lac ñaʼtan juntiquil lac piʼʌl  mejl bʌ i coltan i cheʼ bʌ mi lac tajben wem bʌ i yorajlel, laʼ lac suben chuqui tsaʼ laj cʌñʌ, pero yicʼot la cutslel mi lac mel.

¹⁵ Laʼ laj qʼuel jumpʼejl ejemplo chaʼan bajcheʼ miʼ mejlel lac jacʼ jiñi ujtel bʌ laj cʌn. Mi caj laj qʼuel jiñi relato chaʼan jiñi pʼumpʼum mebaʼ xʼixic tsaʼ bʌ i taja i qʼuel Jesús yaʼ ti templo.

16. Tsictesan muʼ bʌ i yʌjlel yaʼ ti Marcos 12:41.

¹⁶ Laʼ lac chumtan jiñi relato (pejcan Marcos 12:41). Laʼ lac ñop laj qʼuel jiñi woli bʌ i yujtel. Jiñix jiñi 11 i chaʼan nisán ti jiñi jabil 33. Mach i tajax jumpʼejl semana chaʼan miʼ chʌmel Jesús, i lʌcʼʌ jumpʼejl qʼuin woli ti cʌntesa yaʼ ti templo. Jiñi ñucoʼ bʌ i yeʼtel ti ñopbalʌl muʼ bʌ i contrajiñob woliʼ chaʼleñob wersa chaʼan Jesús miʼ yajlel ti wocol. An tsaʼ bʌ i yʌlʌyob chaʼan mach tilemic ti Dios jiñi i yeʼtel i an tsaʼ bʌ i melbeyob cʼajtiya tac chaʼan miʼ taj i sajtemal tiʼ tʼan (Mr. 11:27-33; 12:13-34). Cheʼ jiñi, Jesús an baqui yambʌ miʼ majlel, tajol yaʼʌch baqui cʌmbil bajcheʼ jumpat baqui miʼ tempañob i bʌ xʼixicob. Miʼ taj i qʼuel jiñi caja tac baqui miʼ yotsʌntel taqʼuin yaʼ tiʼ tojel jiñi muro am bʌ ti jumpat. Miʼ buchtʌl i miʼ qʼuel jiñi woli bʌ i yotsañob i taqʼuin. Miʼ qʼuel chaʼan cabʌl ricojoʼ bʌ miʼ yotsañob i taqʼuin. Tajol lʌcʼʌl an baqui miʼ yotsʌntel jiñi taqʼuin i muʼto i taj i yubin bajcheʼ miʼ yochel jiñi taqʼuin.

17. ¿Chuqui tsiʼ mele jiñi pʼumpʼum mebaʼ xʼixic muʼ bʌ i yʌjlel yaʼ ti Marcos 12:42?

¹⁷ (Pejcan Marcos 12:42). Cheʼ jiñi, Jesús miʼ taj i qʼuel juntiquil pʼumpʼum bʌ xʼixic, «juntiquil mebaʼ xʼixic mach bʌ anic i chubʌʼan» (Lc. 21:2). Wocol bajcheʼ miʼ ñusan, tajol mi muqʼuicto i jastiyel i taqʼuin chaʼan miʼ mʌn chuqui i cʼʌjñibal i chaʼan. Anquese pʼumpʼum, miʼ majlel yaʼ baqui miʼ yotsʌntel taqʼuin i miʼ chaʼlen wersa chaʼan maʼañic miʼ qʼuejlel cheʼ bʌ miʼ yotsan jiñi chaʼsejl i taqʼuin, i tajol mi muqʼuicto i sub i bʌ cheʼ bʌ miʼ yotsan yaʼ ti caja. Pero Jesús yujilʌch jaypʼejl tsiʼ yotsa: Chaʼpʼejl leptón, jiñi taqʼuin mach bʌ junyaj letsic ti jimbʌ ora. Mi muqʼuicto i loqʼuel juncojt xpuruwoc yaʼi, juncojt xmateʼmut muʼ bʌ i chojñel chaʼan miʼ cʼuxtʌl mach bʌ wen letsic i tojol.

18. Cheʼ bajcheʼ miʼ yʌl Marcos 12:43, 44, ¿chuqui tsiʼ yʌlʌ Jesús cheʼ bʌ jiñi xʼixic tsiʼ yotsa i taqʼuin?

¹⁸ (Pejcan Marcos 12:43, 44). Jesús tsaʼ toj sajti i pusicʼal chaʼan jiñi tsaʼ bʌ i mele jiñi mebaʼ xʼixic. Jin chaʼan, miʼ pʌy jiñi xcʌntʼañob i chaʼan, miʼ suben chaʼan miʼ qʼuelob jiñi xʼixic i miʼ yʌl: «Jini mebaʼ xʼixic mach bʌ anic i chubʌʼan tsaʼix i choco ochel ñumen cabʌl bajcheʼ pejtelel yañoʼ bʌ tsaʼ bʌ i chocoyob ochel taqʼuin tiʼ yajñib». Cheʼ jiñi miʼ subeñob: «Tiʼ pejtelelob [ñumento jiñi ricojoʼ bʌ] tsiʼ chocoyob ochel jini locʼsʌbil bʌ tiʼ yonlel i chubʌʼan, pero jini mebaʼ xʼixic mach bʌ anic i chubʌʼan tsiʼ choco ochel pejtelel i tojol i bʌl i ñʌcʼ». Cheʼ bʌ jiñi xʼixic tsiʼ yotsa jiñi cojix bʌ i taqʼuin, tsiʼ pʌsʌ chaʼan miʼ ñop chaʼan Jehová mi caj i cʌntan (Sal. 26:3).

19. ¿Chuqui ñuc bʌ i cʼʌjñibal miʼ mejlel laj cʌn ti tsaʼ bʌ i yʌlʌ Jesús tiʼ tojlel jiñi pʼumpʼum mebaʼ xʼixic?

¹⁹ Mi lac mel cheʼ bajcheʼ mi laj cʌn. Laʼ laj cʼajtiben lac bʌ: «¿Chuqui miʼ mejlel j cʌn ti tsaʼ bʌ i yʌlʌ Jesús tiʼ tojlel jiñi pʼumpʼum mebaʼ xʼixic?». Laʼ lac ñaʼtan tiʼ tojlel jiñi xʼixic. Miʼ mejlel la cʌl chaʼan tsiʼ mulaj cheʼ ñumen oñic i taqʼuin miʼ mejlel i yʌqʼuen Jehová. Pero tsaʼʌch i yʌqʼue cheʼ bajcheʼ cʼamel miʼ mejlel. I Jesús yujil chaʼan Jehová miʼ wen qʼuel ti ñuc jiñi tsaʼ bʌ i yʌcʼʌ. Ili miʼ pʌsbeñonla junchajp wen ñuc bʌ i cʼʌjñibal: Jehová miʼ mulan cheʼ mi la cʌqʼuen jiñi ñumen wem bʌ lac chaʼan, cheʼ mi lac melben i yeʼtel (troñel) tiʼ pejtelel lac pusicʼal yicʼot tiʼ pejtelel laj cuxtʌlel (Mt. 22:37; Col. 3:23). Tijicña miʼ yubin cheʼ mi lac  mel cheʼ bajcheʼ cʼamel mi lac mejlel. Yaʼ ochem bajcheʼ cʼamel i yorajlel yicʼot lac pʼʌtʌlel mi la cʌqʼuen chaʼan mi lac chʼujutesan, jumpʼejl ejemplo, jiñʌch cheʼ bʌ mi lac chaʼlen subtʼan yicʼot cheʼ bʌ mi lac majlel ti tempa bʌ tac.

20. ¿Bajcheʼ miʼ mejlel lac mel jiñi tsaʼ bʌ laj cʌñʌ tiʼ tojlel jiñi mebaʼ xʼixic? Acʼʌ jumpʼejl ejemplo.

²⁰ ¿Bajcheʼ miʼ mejlel lac mel jiñi tsaʼ bʌ laj cʌñʌ tiʼ tojlel jiñi mebaʼ xʼixic? Laʼ lac ñaʼtan tiʼ tojlel hermanojob muʼ bʌ mejlel i coltañob cheʼ bʌ mi laj cʼajtesʌbeñob chaʼan Jehová tijicña miʼ yubin chaʼan jiñi woli bʌ i melob. Jumpʼejl ejemplo, ¿laj cʌñʌ ba juntiquil hermana añix bʌ i jabilel chʼijyem bʌ o maʼañix bʌ i cʼʌjñibal miʼ yubin i bʌ tiʼ caj maʼañix miʼ wen mejlel ti subtʼan cheʼ bajcheʼ ti ñaxan? ¿O laj cʌñʌ ba juntiquil hermano am bʌ tsʌts bʌ i cʼamʌjel i chʼijyem bʌ tiʼ caj maʼañic miʼ mejlel ti majlel ti pejtelel tempa bʌ? Miʼ mejlel lac subeñob tʼan tac muʼ bʌ i ñuqʼuesʌbeñob i pusicʼal (Ef. 4:29). Laʼ lac subeñob jiñi tsaʼ bʌ laj cʌñʌ tiʼ tojlel jiñi pʼumpʼum mebaʼ xʼixic. Jiñi muʼ bʌ lac subeñob mi caj i cʼajtesʌbeñob chaʼan Jehová tijicña cheʼ mucʼʌch lac mel cheʼ bajcheʼ cʼamel mi lac mejlel (Pr. 15:23; 1 Ts. 5:11). Cheʼ bʌ mi lac subeñob yambʌlob chaʼan weñʌch cheʼ woliʼ melbeñob i yeʼtel Jehová cheʼ bajcheʼ cʼamel miʼ mejlelob, anquese maʼañix bajcheʼ cʼamel miʼ qʼuelob, woli lac tsajcan majlel Jesús yicʼot lac xucʼtʌlel.

21. ¿Chuqui mi caj a mel jatet?

²¹ Mi lac wen qʼuel ti ñuc cheʼ yaʼ ti Evangelio tac cabʌl chuqui miʼ yʌjlel tiʼ tojlel Jesús i cheʼ bajcheʼ jiñi miʼ mejlel lac tsajcan majlel yicʼot lac xucʼtʌlel. Wen cheʼ muqʼuic lac tech lac wen tsajin ti lac bajñelil o la quicʼot lac familia jiñi Evangelio tac ¿ñomach? Chaʼan miʼ mejlel lac ñumen locʼsʌben i wenlel, yom mi lac chumtan jiñi muʼ bʌ lac pejcan yicʼot mi lac mel cheʼ bajcheʼ mi laj cʌn. Pero mach yomic jach mi lac lajin chuqui tsiʼ mele Jesús, ñuc i cʼʌjñibal jaʼel cheʼ mi lac ñʌchʼtan chuqui tsiʼ yʌlʌ. Ti jiñi yambʌ estudio, mi caj laj qʼuel chuqui miʼ mejlel laj cʌn ti jiñi tsaʼ bʌ i yʌlʌ Jesús cheʼ bʌ yaʼ jichʼil ti teʼ.