Cheʼ bʌ ñucoñix cajel tsaʼ j cʌyʌ j qʼuel Jehová bajcheʼ camigo. I tsaʼ caji j qʼuel chaʼan jiñi c piʼʌlob ti escuela libre miʼ melob chuqui yomob, pero joñon maʼañic. Ñoj tsʌts tsaʼ caji j qʼuel muʼ bʌ i cʼajtibeñon c papá yicʼot c mamá yicʼot muʼ bʌ i yʌl jiñi Biblia, wocol jax ti melol tsaʼ j qʼuele jiñi i chaʼan bʌ Jehová, maʼañic tsaʼ j cʌyʌ c ñop chaʼan añʌch Jehová, pero mach lʌcʼʌlix tsaʼ caji cubin c bʌ tiʼ tojlel.

Maʼañic ti sujtiyon ti inactiva, pero mic loqʼuel ti subtʼan chaʼan jach maʼañic chuqui miʼ yʌlob tic tojlel. Mi muqʼuicto c chajpan bʌ chaʼan jiñi subtʼan, jin chaʼan wocol mi cubin cheʼ mic pejcan lac piʼʌlob. I tiʼ caj jiñi, maʼañic majqui mi cʌqʼuen estudio mi muqʼuic cʌqʼue revisita, mach weñic bajcheʼ mic ñaʼtan, mach tijicñayoñix ti subtʼan. I tsaʼ j cʼajtibe c bʌ: «¿Chucoch mucʼon ti bej subtʼan ti jujumpʼejl semana ti jujumpʼejl uw?».

Cheʼ bʌ 17 c jabilel wen comix bajñel chumtʌl, jin chaʼan tsaʼ majliyon ti chumtʌl ti Australia. Jiñi c papá yicʼot c mamá tsiʼ wen cʼojoʼtayoñob, pero tsiʼ ñaʼtayob chaʼan mucʼʌch caj c bej melben i yeʼtel Jehová.

 Ti Australia mach weñix chuqui tsaʼ caji c mel. Tsaʼ c wen cʌyʌ jiñi tempa bʌ tac yicʼot tsaʼ caji c ñochtan yambʌ xcolelob muʼ bʌ i bixel ajñelob ti tempa bʌ i ti wiʼil miʼ majlelob ti jap lembal yicʼot son. Wʌle cujil chaʼan mach weñic tsaʼ bʌ c mele, mic melben i chaʼan bʌ Jehová, pero woli c mel i chaʼan bʌ pañimil jaʼel.

Tsaʼ ñumi chaʼpʼejl jab, i tsaʼ j cʌñʌ juntiquil hermana tsaʼ bʌ i wen coltayon j qʼuel chaʼan mach weñic chuqui woli c mel tij cuxtʌlel. Ti jimbʌ ora tsaʼ chumleyon ti jumpʼejl otot yaʼ baqui an joʼtiquil hermanajob maxto bʌ añobic i ñoxiʼal, i tic sube lojon jiñi superintendente i chaʼan circuito yicʼot jiñi i yijñam i cʼabaʼ Tamara chaʼan miʼ cʌytʌlob ti lon cotot. Cheʼ bʌ jiñi i ñoxiʼal Tamara an chuqui woliʼ qʼuel ti congregación, Tamara miʼ yajñel yicʼoton lojon i tijicña mi lon c ñusan. Jiñi tsaʼ c wen mulaj tiʼ tojlel come tsaʼ j qʼuele chaʼan anquese Tamara miʼ wen melben i yeʼtel Dios wen tseʼtseʼña yicʼot mach wocolic chaʼan mi lac pejcan.

Tamara wen tijicña bʌ xʼixic, tsiʼ pʌsbeyon chaʼan miʼ wen mulan cheʼ an tiʼ sujmlel yicʼot miʼ wen mulan subtʼan. Tamara tsiʼ pʌsbeyon wem bʌ ejemplo i tsaʼ c mulaj chaʼan cheʼoñic bajcheʼ jiñi, wen tijicña cheʼ bʌ miʼ chaʼlen wersa chaʼan miʼ wen melben i yeʼtel Jehová, pero joñon chʼijyem tsaʼ cubi bʌ come mach cheʼic woli c mel. Jiñi wem bʌ i melbal tsiʼ cʼajtesʌbeyon chaʼan Jehová yom chaʼan mi lac melben i yeʼtel yicʼot i ‹tijicñʌyel lac pusicʼal› yicʼot chaʼan yom mi lac ‹chaʼlen cʼay› ti lac tijicñʌyel (Sal. 100:2).

Com cubin jiñi tijicñʌyel muʼ bʌ i yubin Tamara, pero chaʼan mic mejlel cubin jiñi tijicñʌyel añʌch chuqui tac yom mic tojʼesan tic melbal. Anquese tsaʼʌch jalʼa chaʼan mic tojʼesan, tsaʼ c teche c chajpan c bʌ chaʼan jiñi subtʼan yicʼot tsaʼ bixel ochiyon ti precursora auxiliar. Ili tsiʼ coltayon chaʼan mic sʌt majlel c bʌqʼuen. Come tsaʼix caji c ñumen cʼʌn jiñi Biblia,  ñumen tijicña tsaʼ caji cubin c bʌ. Cheʼ jiñi jujumpʼejlix uw tsaʼ cajiyon ti ochel ti precursora auxiliar.

Tsaʼ caji c sujtesan ti camigojob jiñi hermanojob mach bʌ junlajalic i jabilelob pʼʌtʌloʼ bʌ tiʼ chaʼan bʌ Dios yicʼot tijicña bʌ miʼ melbeñob i yeʼtel. Jiñi wem bʌ i yejemplojob tsiʼ coltayon c ñaʼtan chuqui yom mic mel tij cuxtʌlel yicʼot chaʼan yom mic weñʼesan bajcheʼ mic pejcan jiñi Biblia yicʼot jiñi lac jun tac. Ñumen tijicñayix tsaʼ caji cubin c bʌ ti subtʼan. Jin chaʼan, tsaʼ ochiyon ti precursora regular. Cheʼ jaʼel, wen tijicña tsaʼ caji cubin c bʌ yaʼ ti congregación.

Tsaʼ ñumi jumpʼejl jab i tsaʼ j cʌñʌ jiñi Alex, juntiquil hermano wen uts bʌ, muʼ bʌ i cʼuxbin Jehová, miʼ wen mulan subtʼan yicʼot añix bʌ 6 jab i cajel bajcheʼ precursor regular. Añix chaʼpʼej uxpʼejl uw i cajel ti subtʼan jaʼel yaʼ ti Malaui, baqui yomto cabʌl xsubtʼañob. Yaʼi tsiʼ cʌñʌ hermanojob tsaʼ bʌ i pʌsbeyob wem bʌ ejemplo yicʼot tsaʼ bʌ i subeyob chaʼan yom miʼ bej acʼ ti ñaxan jiñi i Yumʌntel Dios.

Cheʼ ti 2003 tsaʼ ñujpuñiyon lojon, i cʼʌlʌl ili ora woli c bej melben lojon i yeʼtel Jehová tiʼ pejtelel ora. Cabʌl chuqui ñuc bʌ i cʼʌjñibal an lon j cʌñʌ i Jehová an i yʌqʼueyon lojon i bendición.

Cheʼ ti 2009 tsaʼ chojquiyon lojon majlel yaʼ ti Timor Oriental, lʌcʼʌl bʌ an ti Indonesia. Tijicña tsaʼ cubi lon c bʌ, pero tsaʼ lon c wen chaʼle bʌqʼuen jaʼel. Cheʼ jiñi tsaʼ ñumi 5 uw i tsaʼ cʼotiyon lojon ti Dili.

Cheʼ bʌ tsaʼ cʼotiyon lojon wen qʼuexel jiñi cultura, jiñi tʼan, chuqui miʼ cʼuxob yicʼot bajcheʼ yilal chumulob. Cheʼ mi lon c loqʼuel tiʼ subtʼan mic tajeʼ lon lac piʼʌlob pʼumpʼuñoʼ bʌ, maʼañic bʌ tsiʼ wen qʼueleyob jun yicʼot ticʼlʌbiloʼ bʌ. Tsaʼ j cʌñʌ lojon cabʌl lac piʼʌlob añoʼ bʌ i lojweñal, mach bʌ  tijicñayobic tiʼ caj jiñi guerra ñusʌbil bʌ i chaʼañob yicʼot jiñi ticʼlʌntel. *

¡Wen utsʼatax jiñi subtʼan! Ti jumpʼejl bʌ qʼuin tsaʼ j cʌñʌ juntiquil xchʼoc i cʼabaʼ María 13 bʌ i jabilel i wen chʼijyem. * Maʼañix i mamá i maʼañic miʼ wen taj i qʼuel jiñi i papá. Mach yujilic chuqui yom miʼ mel tiʼ cuxtʌlel cheʼ bajcheʼ yambʌ alobob. Ti jumpʼejl bʌ qʼuin tsaʼ caji i subeñon bajcheʼ miʼ yubin i bʌ, pero maʼañic tsaʼ c ñaʼta come maxto wen cujilic i tʼan. Jin chaʼan, tsaʼ j cʼajtibe Jehová ti oración chaʼan miʼ coltañon c ñuqʼuesʌben i pusicʼal. Cheʼ jiñi, tsaʼ c pejcʌbe texto tac tsaʼ bʌ i ñuqʼuesʌbe i pusicʼal. Ti wiʼil tsaʼ caji j qʼuel bajcheʼ tsaʼ qʼuextʌyi i cuxtʌlel, tsiʼ qʼuexta i melbal yicʼot tsaʼ qʼuextʌyi i pensar. Maʼañic jaypʼejl jab tsaʼ ñumi i tsiʼ chʼʌmʌ jaʼ, cheʼ jaʼel muqʼuix i yʌcʼ estudio. Wʌle añix tiʼ familia Jehová i cʼuxbibil miʼ yubin i bʌ.

Jehová woli i yʌcʼ i bendición ti jiñi subtʼan woli bʌ i yujtel ti Timor Oriental. Anquese cabʌl hermanojob maxto wen añic ora chʼʌmbilob i chaʼan jaʼ, cabʌlob añob bajcheʼ precursor, anciano yicʼot siervo ministerial. Yambʌlob woliyob ti coltaya ti traducción ti jiñi tʼan tac muʼ bʌ i cʼʌjñel yaʼi. Tsaʼ cubi c tijicñʌyel cheʼ tsaʼ j qʼueleyob ti cʼay ti tempa bʌ, cheʼ mucʼob ti tseʼñal yicʼot cheʼ woli i melbeñob i yeʼtel Jehová.

Wen qʼuexelʌch chumtʌl ti Timor Oriental cheʼ bajcheʼ ti Australia. Anquese an qʼuiñil jiñi autobús baqui mi lon c chaʼlen xʌmbal butʼul ti lac piʼʌlob sujtel bʌ mucʼob ti mʌn chʌy yicʼot yan tac bʌ bʌlñʌcʼʌl. An qʼuiñil yaʼ baqui mi lon cajñel ti acʼ estudio wen an ticwal, mach ñuquic i yotot jiñi lac piʼʌlob, mach pisojic i mal yicʼot cabʌl jax mut, pero anquese wocolʌch tiʼ pejtelel ora tsaʼ c ñaʼta: «Wen utsʼatax ajñel wʌʼi».

Wen tijicñayon come jiñi c papá yicʼot c mamá tsiʼ wen chaʼleyob wersa chaʼan miʼ cʌntesañoñob tiʼ tojlel Jehová yicʼot cheʼ bʌ tsiʼ wen coltayoñob, jinto jaʼel cheʼ colelix c loqʼuel ti jiñi wem bʌ bij. Jiñi tʼan tac am bʌ ti Proverbios 22:6 an tsʼʌctiyi tic tojlel. C mamá yicʼot c papá wen tijicñayob come joñon yicʼot Alex woli lon c melben i yeʼtel Jehová. Cheʼ ti 2016 tsaʼ c teche lon eʼtel bajcheʼ superintendente i chaʼan circuito ti jiñi territorio am bʌ tiʼ wenta i qʼuel jiñi sucursal i chaʼan Australasia.

Ti ñaxan ñoj wocol tsaʼ j qʼuele jiñi subtʼan, pero wʌle muqʼuix c wen mulan. Wʌle cujil chaʼan muʼ bʌ i wen aqʼueñonla lac tijicñʌyel jiñʌch cheʼ mi lac melben i yeʼtel Jehová ti jumpʼejl lac pusicʼal anquese an wocol tac. Añix 18 jab cajel c melben i yeʼtel Jehová yicʼot jiñi Alex i wen tijicña an cubi c bʌ. Wʌle cujil chaʼan i sujmʌch tsaʼ bʌ i yʌlʌ tiʼ tojlel Jehová jiñi David: «Laʼ i tajob i tijicñʌyel i pusicʼal pejtel jini muʼ bʌ i ñopetob. Laʼ i chaʼleñob cʼay tiʼ pejtelel ora chaʼan i tijicñʌyel i pusicʼal. Laʼ i tajob i tijicñʌyel ti jatet jini cʼux bʌ miʼ yubiñob a cʼabaʼ» (Salmo 5:11).