1, 2. a) ¿Majqui jiñi Eunice, i chuqui ti wocol tac tsiʼ ñusa bajcheʼ ñaʼʌl? b) Tsictesan jiñi dibujo am bʌ tiʼ tejchibal.

 ANQUESE jiñi Biblia maʼañic miʼ yʌl cheʼ bʌ tsiʼ chʼʌmʌ jaʼ Timoteo, miʼ mejlel lac ñaʼtan chaʼan jiñi i mamá i cʼabaʼ Eunice wen tijicña tsiʼ yubi ti jimbʌ qʼuin (Pr. 23:25). Laʼcu lac ñaʼtan iliyi: Eunice wen tijicña cheʼ bʌ tsiʼ qʼuele chaʼan yaʼan jiñi i yalobil, muqʼuix caj i chʼʌmjaʼ. Cheʼ bʌ woli (choncol) i qʼuel, miʼ lʌcʼtesan i bʌ Loida, jiñi i welita Timoteo, i miʼ mecʼ. Eunice tam miʼ jap icʼ chaʼan i tijicñʌyel. Miʼ loqʼuel i yaʼlel i wut cheʼ bʌ miʼ yubin bajcheʼ miʼ sub i bʌ jiñi jaʼ i cheʼ bʌ miʼ qʼuel chaʼan jiñi i yalobil tijicña cheʼ tsaʼix ujti i chʼʌmjaʼ. Anquese wocolʌch tsiʼ yubi tsaʼʌch mejli i pʌsben jiñi i yalobil chaʼan miʼ cʼuxbin Jehová yicʼot Jesucristo, jiñi i Yalobil. ¿Chuqui ti wocol tac tsiʼ ñusa chaʼan miʼ qʼuel iliyi?

² Jiñi i papá yicʼot i mamá Timoteo mach lajalobic i ñopbal. Griego jiñi i papá, i jiñi i mamá yicʼot i welita judíajob (Hech. 16:1). Miʼ ñaʼtʌntel chaʼan Timoteo colelto woli (yʌquel) cheʼ bʌ Eunice yicʼot Loida tsaʼ sujtiyob ti xñoptʼan. Pero jiñi i papá maʼañic tsiʼ qʼuexta i ñopbal. Timoteo ñuquix chaʼan miʼ mejlel i bajñel ñaʼtan chuqui mi caj i mel (chaʼlen). ¿Chuqui mi caj i mel? ¿Muʼ ba caj i cʌlel tiʼ ñopbal i papá? ¿Muʼ ba caj i mel jiñi i costumbre judíojob tsaʼ bʌ i cʌñʌ cheʼ bʌ alʌto? ¿O mi caj i sujtel ti xcʌntʼan i chaʼan Jesús?

3. Cheʼ bajcheʼ miʼ yʌl Proverbios 1:8, 9, ¿bajcheʼ yilal miʼ qʼuel Jehová pejtelel chuqui miʼ melob jiñi ñaʼʌlob chaʼan miʼ coltañob i yalobilob chaʼan miʼ sujtelob tiʼ yamigo Dios?

³ Cheʼ bajcheʼ Eunice, jiñi ñaʼʌlob xñoptʼañoʼ bʌ ti ili ora miʼ wen cʼuxbiñob i familia. Yomob i coltan i yalobilob chaʼan miʼ  sujtelob tiʼ yamigo Jehová. I jiñi lac Dios miʼ wen qʼuel ti ñuc pejtelel chuqui miʼ melob (pejcan Proverbios 1:8, 9). Jehová an i colta cabʌl ñaʼʌlob chaʼan miʼ coltañob jiñi i yalobilob chaʼan miʼ cʼuxbiñob yicʼot miʼ melbeñob i yeʼtel (troñel).

4. ¿Chuqui ti wocol tac miʼ ñusañob jiñi ñaʼʌlob ti ili ora?

⁴ I tilelʌch cheʼ juntiquil ñaʼʌl miʼ cʼajtiben i bʌ mi jiñi i yalobil mucʼʌch caj i melben i yeʼtel Jehová, cheʼ bajcheʼ Timoteo. Jiñi tatʌlob wen yujilob jiñi wocol tac muʼ bʌ i ñusañob jiñi i yalobil ila tiʼ pañimil (mulawil) Satanás (1 Ped. 5:8). Cheʼ jaʼel, cabʌl ñaʼʌlob wocol bʌ miʼ yubiñob chaʼan miʼ cosañob i yalobil come maʼañobic i ñoxiʼal o mach xñoptʼañobic jiñi i ñoxiʼal. Jumpʼejl ejemplo, juntiquil hermana i cʼabaʼ Christine b miʼ yʌl: «Jiñi c ñoxiʼal juntiquilʌch wem bʌ tatʌl i miʼ wen cʼuxbiñon lojon, pero maʼañic miʼ yʌqʼueñon j cosan jiñi lon calobil cheʼ bajcheʼ i testigo Jehová. Mach junsujtel jach tsaʼ cucʼta c bʌ i tsaʼ j cʼajtibe c bʌ mi ti jumpʼejl bʌ qʼuin mi caj i melbeñob i yeʼtel Jehová jiñi calobilob».

5. ¿Chuqui mi caj laj qʼuel ti ili estudio?

⁵ Mi ñaʼʌlet i xñoptʼañet miʼ mejlel a coltan a walobilob chaʼan miʼ cʼuxbiñob yicʼot miʼ melbeñob i yeʼtel Jehová, cheʼ bajcheʼ tsiʼ mele Eunice. Ti ili estudio, mi caj laj qʼuel bajcheʼ miʼ mejlel a lajin jiñi i yejemplo yicʼot maʼ cʌntesañob jiñi a walobilob ti chuqui maʼ wʌl yicʼot ti chuqui maʼ mel. Mi caj laj qʼuel jaʼel bajcheʼ mi caj i coltañet Jehová.

6. Cheʼ bajcheʼ miʼ yʌl 2 Timoteo 3:14, 15, ¿bajcheʼ tsaʼ sujti ti xñoptʼan jiñi Timoteo?

⁶ Cʼʌlʌl cheʼ bʌ tsiʼ yila pañimil Timoteo, Eunice tsiʼ chaʼle wersa chaʼan miʼ pʌsben «jiñi chʼujul bʌ tsʼijbujel» cheʼ bajcheʼ miʼ chʼʌmbeñob i sujm jiñi judíojob. I sujmʌch chaʼan maxto tsʼʌcʌlic jiñi i ñaʼtʌbal, come maʼañic chuqui yujil chaʼan bʌ Jesucristo. Pero jiñi tsaʼ bʌ i cʌñʌ Timoteo yaʼ ti Tsʼijbujel tsaʼʌch i colta chaʼan miʼ sujtel ti xñoptʼan. Pero ¿mucʼʌch ba caj i mel? Ñuquix i muqʼuix i mejlel i bajñel ñaʼtan chuqui mi caj i mel tiʼ cuxtʌlel. Tiʼ sujm, jiñi tsaʼ bʌ i mele i mamá tsaʼʌch i colta Timoteo chaʼan miʼ ñop jiñi i sujmlel tiʼ tojlel Jesús (pejcan 2 Timoteo 3:14, 15). ¡Wen tijicña tsiʼ yubi i bʌ Eunice cheʼ bʌ tsaʼ mejli i coltan i yalobil chaʼan miʼ cʌn Jehová! Tiʼ sujm, ili xñoptʼan tsaʼʌch i yʌqʼue i ñuclel jiñi i cʼabaʼ, tilem bʌ ti jumpʼejl tʼan yom bʌ i yʌl «mʌl (jot)».

7. ¿Chuqui tsiʼ mele Eunice chaʼan miʼ bej coltan i yalobil cheʼ bʌ tsaʼix i chʼʌmʌ jaʼ?

⁷ Junchajpʌch ñuc bʌ i cʼʌjñibal tsaʼ bʌ i mele Timoteo cheʼ bʌ tsiʼ chʼʌmʌ jaʼ. Pero Eunice tsaʼʌch i bej chaʼle pensar. ¿Chuqui mi caj i mel jiñi i yalobil? ¿Muʼ ba caj i mel muʼ bʌ i yʌlob jiñi mach bʌ weñic i yamigojob? ¿Muʼ ba caj i majlel ti clase ti Atenas i mi caj i ñop jiñi i cʌntesa tac wiñicob muʼ bʌ i pʌstʌl yaʼi? ¿Muʼ ba caj i lolom jisan i tiempo, i pʼʌtʌlel i mi caj i sʌclan chubʌʼañʌl tac come chʼitonto? Eunice maʼañic miʼ mejlel i suben Timoteo chuqui yom miʼ mel, pero mucʼʌch i mejlel i coltan. ¿Bajcheʼ? Miʼ bej coltan chaʼan miʼ bej colel i cʼuxbiya tiʼ tojlel Jehová yicʼot chaʼan miʼ qʼuel ti ñuc tsaʼ bʌ i mele Jesús. Pero mach jin jach jiñi tatʌlob i bajñeloʼ bʌ tiʼ sujmlel wocol miʼ yubiñob chaʼan miʼ cʼotelob tiʼ pusicʼal jiñi i yalobil i miʼ sujtelob ti xucʼul bʌ i wiñic Jehová, wocolʌch miʼ yubiñob jaʼel jiñi tatʌlob muʼ bʌ i lajal melbeñob i yeʼtel Jehová. Jin chaʼan, ¿chuqui miʼ mejlel i cʌñob jiñi tatʌlob tiʼ tojlel Eunice?

8. ¿Bajcheʼ miʼ mejlel i coltan jiñi i ñoxiʼal Testigo bʌ juntiquil ñaʼʌl chaʼan miʼ pʼʌtʼesʌbeñob i ñopoñel jiñi i yalobilob?

⁸ Chaʼlen ti estudiar jiñi Biblia laʼ wicʼot laʼ  walobilob. Mi xñoptʼan jiñi a ñoxiʼal, Jehová yom chaʼan maʼ coltan chaʼan maʼ pʼʌtʼesʌben i ñopoñel laʼ walobilob. Junchajp bajcheʼ miʼ mejlel a mel jiñʌch cheʼ maʼ coltan jiñi chʼujutesaya ti familia ti jujumpʼejl semana. Alʌ chuqui tac wem bʌ chaʼan jiñi chʼujutesaya i ñaʼtan chuqui miʼ mejlel a mel chaʼan utsʼat yicʼot tijicña mi laʼ ñusan ti jimbʌ ora. Tajol miʼ mejlel a coltan jiñi a ñoxiʼal chaʼan miʼ chajpan chuqui mi caj laʼ chaʼlen ti estudiar o chuqui yambʌ yom i mel. Cheʼ jaʼel, mi tsaʼ laʼ qʼuele chaʼan an juntiquil laʼ walobil muqʼuix bʌ i mejlel ti aqʼuentel estudio yicʼot jiñi libro Ubin a tijicñʌyel, miʼ mejlel a coltan jiñi a ñoxiʼal.

9. ¿Chuqui ti coltʌntel an i chaʼan juntiquil ñaʼʌl mach bʌ xñoptʼañic i ñoxiʼal?

⁹ An ñaʼʌlob yom bʌ miʼ chʼʌmob tiʼ wenta chaʼan miʼ chaʼleñob estudio yicʼotob i yalobil come maʼañobic i ñoxiʼal o mach xñoptʼañobic jiñi i ñoxiʼal. Mi cheʼ añet bajcheʼ jiñi, mach a pensarin a bʌ. Jehová mi caj i coltañet. Cʼʌñʌ jiñi muʼ tac bʌ i yʌqʼueñet jiñi i yorganización chaʼan maʼ chaʼlen estudio a wicʼot a walobilob. Cheʼ jaʼel, miʼ mejlel a cʼajtiben yambʌ tatʌlob bajcheʼ an i cʼʌñʌyob pejtelel iliyi ti jiñi i chʼujutesaya ti familia c (Pr. 11:14). Suben Jehová jaʼel chaʼan miʼ coltañet chaʼan maʼ chaʼlen wem bʌ tʼan a wicʼot a walobilob chaʼan maʼ ñaʼtan chuqui miʼ ñaʼtañob yicʼot bajcheʼ yubil miʼ yubiñob (Pr. 20:5). Chaʼan maʼ mejlel ti wem bʌ tʼan a wicʼot, jasʌl cheʼ maʼ melben cʼajtiya bajcheʼ iliyi: «¿Chuqui ti wocol woli a ñusan ti escuela?».

10. ¿Chuqui yambʌ miʼ mejlel a mel chaʼan maʼ coltan jiñi a walobilob chaʼan miʼ cʌñob Jehová?

¹⁰ Sʌclʌben i yorajlel chaʼan maʼ pʌsben i chaʼan bʌ Jehová jiñi a walobilob. Subeñob chaʼan bʌ Jehová yicʼot pejtelel chuqui wem bʌ an i mele ti a tojlel (Dt. 6:6, 7; Is. 63:7). Iliyi ñumen ñucto i cʼʌjñibal cheʼ bʌ maʼañic maʼ mejlel ti estudio a wicʼot a walobilob yaʼ ti a wotot. Christine, tsaʼ bʌ ajli ti párrafo 4, miʼ yʌl: «Mic chaʼlen wersa chaʼan bajcheʼ jach ora mic suben chaʼan bʌ Jehová jiñi calobilob, come maʼañic miʼ mejlel c mel ti bajcheʼ jach ora com. Mic loqʼuel lojon ti xʌmbal o mic letsel lojon ti jiñi cayuco i mic tsʼitaʼ ñajtʼesan lon c bʌ tiʼ tiʼ jiñi jaʼ chaʼan mi cʌl lojon jiñi utsʼatax bʌ melbil (pʌtbil) tac bʌ i chaʼan Jehová yicʼot yan tac bʌ tema. Cheʼ bʌ ñucobix jiñi calobilob, tsaʼ c subeyob chaʼan miʼ mejlel i bajñel pejcañob jiñi Biblia». Cheʼ jaʼel, alʌ chuqui wem bʌ chaʼan jiñi i yorganización Jehová yicʼot tiʼ tojlel jiñi hermanojob. Mach a wʌl jiñi ancianojob. Jiñi muʼ bʌ a wʌl tiʼ tojlelob miʼ mejlel i yʌcʼ chaʼan jiñi a walobilob miʼ cʼajtibeñob i coltaya cheʼ bʌ i cʼʌjñibal i chaʼañob.

11. Cheʼ bajcheʼ miʼ yʌl Santiago 3:18, ¿chucoch ñucʌch i cʼʌjñibal cheʼ mi lac sʌclan ñʌchʼtʌlel yaʼ ti la cotot?

¹¹ Sʌclan ñʌchʼtʌlel yaʼ ti a wotot. Ñʌmtesan a bʌ chaʼan maʼ pʌsben jiñi a ñoxiʼal yicʼot a walobilob chaʼan maʼ cʼuxbiñob. Pejcan ti uts jiñi a ñoxiʼal i pʌsʌ chaʼan mucʼʌch a qʼuel ti ñuc, i pʌsben jiñi a walobilob chaʼan cheʼʌch yom miʼ melob jaʼel. Ili mi caj i coltan chaʼan an ñʌchʼtʌlel yaʼ ti a wotot yicʼot chaʼan mach wen wocolic chaʼan miʼ cʌñob chaʼan bʌ Jehová (pejcan Santiago 3:18). Laʼ laj qʼuel tiʼ tojlel Jozsef, juntiquil precursor especial am bʌ ti Rumania. Cheʼ bʌ alʌto, jiñi i papá maʼañic tsiʼ wis mulaj chaʼan jiñi i mamá, jiñi i yerañob yicʼot Jozsef miʼ melbeñob i yeʼtel Jehová. Jozsef miʼ yʌl: «Jiñi c mamá tsiʼ wen chaʼle wersa chaʼan an ñʌchʼtʌlel yaʼ ti lon cotot. Cheʼ bʌ ñumen jontol miʼ mel i bʌ jiñi c papá, ñumen uts miʼ mel i bʌ jiñi c mamá. Cheʼ bʌ miʼ qʼuel  chaʼan wocol mi lon cubin chaʼan mi lon j qʼuel ti ñuc yicʼot chaʼan mic jacʼben lon i tʼan jiñi lon c papá, miʼ pejcʌbeñon lojon Efesios 6:1-3. Cheʼ jiñi miʼ subeñon lojon baqui tac bʌ jiñi wem bʌ melbalʌl tac am bʌ i chaʼan c papá i miʼ coltañon lon c chʼʌmben i sujm chucoch yom mi lon j qʼuel ti ñuc. Mach junsujtelic jach tsiʼ mele iliyi chaʼan maʼañic miʼ tejchel wocol».

12. Cheʼ bajcheʼ miʼ yʌl 2 Timoteo 1:5, ¿bajcheʼ tsiʼ colta Timoteo jiñi i yejemplo Eunice?

¹² (Pejcan 2 Timoteo 1:5). Eunice tsiʼ yʌqʼue wem bʌ ejemplo Timoteo. Miʼ mejlel la cʌl chaʼan tsaʼʌch i pʌsbe chaʼan jiñi i sujm bʌ ñopoñel tsiquil ti chuqui mi lac mel (Sant. 2:26). Timoteo tsiʼ qʼuele chaʼan pejtelel chuqui miʼ mel jiñi i mamá chaʼañʌch miʼ wen cʼuxbin Jehová. Tsiʼ qʼuele jaʼel chaʼan tijicña cheʼ miʼ melben i yeʼtel Jehová. ¿Bajcheʼ tsiʼ colta jiñi i yejemplo Eunice? Cheʼ bajcheʼ tsiʼ yʌlʌ jiñi apóstol Pablo, Timoteo pʼʌtʌl i ñopoñel cheʼ bajcheʼ i chaʼan i mamá. I mach cheʼ jach tsaʼ bajñel tili. Tsiʼ qʼuele jiñi wem bʌ ejemplo i tsaʼʌch i laji. Cheʼ jaʼel, ili ora an cabʌl ñaʼʌlob muʼ bʌ i cʼotelob tiʼ pusicʼal jiñi añoʼ bʌ tiʼ familia i mach chaʼañobic i tʼan (1 Ped. 3:1, 2). Mucʼʌch i mejlel a mel jaʼel. ¿Bajcheʼ?

13. ¿Chucoch juntiquil ñaʼʌl yom miʼ ñumen qʼuel ti ñuc cheʼ i yamigo Jehová?

¹³ Jiñi ñumen ñuc bʌ yom maʼ qʼuel jiñʌch cheʼ i yamigojet Jehová (Dt. 6:5, 6). Cheʼ bajcheʼ yonlel ñaʼʌlob, jatet cabʌl chuqui maʼ mel chaʼan maʼ wʌqʼuen chuqui i cʼʌjñibal i chaʼan jiñi a walobilob. Jumpʼejl ejemplo, maʼ cʼʌn jiñi a tiempo, a taqʼuin yicʼot a cʼaj o. Pero mach yomic maʼ cʌy a bej lʌcʼtesan a bʌ ti Jehová tiʼ caj cʌlʌxix chuqui maʼ mel. Locʼsʌben i yorajlel chaʼan maʼ bajñel chaʼlen oración, chaʼan maʼ chaʼlen ti estudiar jiñi Biblia yicʼot chaʼan maʼ majlel ti tempa bʌ. Cheʼ bajcheʼ iliyi, ñumen lʌcʼʌl mi caj a wajñel a wicʼot Jehová i mi caj a wʌqʼuen wem bʌ ejemplo jiñi a familia yicʼot yambʌ lac piʼʌlob.

14, 15. ¿Chuqui maʼ cʌn tiʼ tojlel Leanne, María yicʼot João?

¹⁴ Laʼ laj qʼuel i yejemplo chaʼtiqui uxtiquil xcolelob tsaʼ bʌ i cʌñʌyob i cʼuxbin Jehová yicʼot chaʼan miʼ ñopob tiʼ tojlel cheʼ bʌ tsiʼ qʼuelbeyob jiñi i yejemplo i mamá. Leanne, juntiquil i yixicʼal Christine, miʼ yʌl: «Maʼañic mic mejlel lon c chaʼlen ti estudiar jiñi Biblia cheʼ bʌ jiñi c papá yaʼan ti lon cotot. Pero jiñi i mamá maʼañic tsiʼ wis cʌyʌ i bʌ ti jiñi tempa bʌ. Anquese mach cabʌlic chuqui cujil lojon chaʼan bʌ jiñi Biblia, jiñi i yejemplo yicʼot bajcheʼ tsiʼ chaʼle wersa tsiʼ coltayon lojon chaʼan pʼʌtʌl lon c ñopoñel. Tsaʼ lon j qʼuele chaʼan iliyi jiñʌch jiñi i sujmlel anquese joñon lon maxto añic mi cajñel lojon ti tempa bʌ».

¹⁵ Tiʼ tojlel María, jiñi i papá an i tajol miʼ yʌqʼuen i toj i mul jiñi i familia tiʼ caj miʼ yajñelob ti tempa bʌ. María miʼ yʌl: «Jiñi c mamá jiñʌch juntiquil hermana ñumen chʼejl bʌ cʌmbil bʌ c chaʼan. Cheʼ bʌ alʌlonto, an i tajol an chuqui maʼañic bʌ mic mel tiʼ caj mic bʌcʼñan chuqui mi caj i yʌlob jiñi yañoʼ bʌ. Pero cheʼ mij qʼuel chaʼan wen chʼejl jiñi c mamá yicʼot chaʼan miʼ yʌcʼ ti ñaxan Jehová tsiʼ coltayon chaʼan mic mʌlben jiñi c bʌqʼuen tiʼ tojlel yambʌlob». João yicʼot i familia maʼañic miʼ mejlel i yʌlob i chaʼan tac bʌ Dios yaʼ tiʼ yotot come jiñi i papá tiʼ subeyob chaʼan mach yomic miʼ melob. João miʼ yʌl: «Mi cʌl jiñi tsaʼ bʌ c ñumen mulaj jiñʌch cheʼ jiñi c mamá miʼ mel chuqui jach chaʼan tijicña jiñi c papá, pero maʼañic miʼ cʌy i cʼuxbiya ti Jehová».

16. ¿Bajcheʼ miʼ mejlel i coltan yañoʼ bʌ jiñi i yejemplo juntiquil ñaʼʌl?

¹⁶ Cʼajtesan chaʼan jiñi a wejemplo miʼ mejlel i coltan yañoʼ bʌ. ¿Bajcheʼ? Ñaʼtancu  bajcheʼ yilal tsiʼ qʼuele jiñi apóstol Pablo jiñi i yejemplo Eunice. Tiʼ tsʼijbu chaʼan jiñi i sujm bʌ ñopoñel tsaʼ bʌ i pʌsʌ Timoteo ñaxan tsiʼ pʌsʌ Eunice (2 Tim. 1:5). ¿I jalix tsiʼ teche i qʼuel jiñi i ñopoñel Eunice? Tajol tsiʼ cʌñʌ Loida yicʼot Eunice cheʼ bʌ cojaxto tsajñi ti subtʼan bajcheʼ misionero yaʼ ti Listra, i tajol tsiʼ coltayob chaʼan miʼ sujtelob ti xñoptʼan (Hech. 14:4-18). Cheʼ bʌ tiʼ tsʼijbube majlel Timoteo, cheʼ bʌ ñumeñix 15 jab, cʼajalto i chaʼan jiñi i ñopoñel Eunice i tsiʼ yʌlʌ bajcheʼ wem bʌ ejemplo. Tsiquil chaʼan jiñi i melbal (chaʼlibal) ili xʼixic tsiʼ ñijcʌbe i pusicʼal jiñi apóstol Pablo yicʼot yambʌ xñoptʼañob cheʼ ti ñaxam bʌ siglo. Mi jatet woli a bajñel cosan a walobil o mach xñoptʼañic jiñi a ñoxiʼal, miʼ mejlel a ñop chaʼan jiñi a wejemplo miʼ pʼʌtʼesʌben i ñopoñel yicʼot miʼ ñijcʌben i pusicʼal jiñi yañoʼ bʌ.

17. ¿Chuqui yom maʼ mel mi maʼ qʼuel chaʼan jiñi a walobil maʼañic woliʼ chʼʌm ti ñuc bajcheʼ woli a chaʼlen wersa chaʼan maʼ coltan?

¹⁷ ¿Ixcu mi maʼ qʼuel chaʼan jiñi a walobil maʼañic woliʼ chʼʌm ti ñuc bajcheʼ woli a chaʼlen wersa a coltan? Cʼajtesan chaʼan mach ti orajic mi laj cʌntesan jiñi la calobil. Cheʼ bajcheʼ mi laj qʼuel yaʼ ti dibujo tac, cheʼ bʌ an chuqui maʼ pʌcʼ, tajol maʼ cʼajtiben a bʌ mi mucʼʌch caj i yʌcʼ i wut. Anquese mach a wujilic chuqui mi caj i yujtel, mucʼʌch a bej mul chaʼan wen bajcheʼ miʼ colel (Mar. 4:26-29). Cheʼ jaʼel, juntiquil ñaʼʌl tajol miʼ cʼajtiben i bʌ mi wolʌch i cʼotel tiʼ pusicʼal jiñi i yalobil. Anquese maʼañic miʼ mejlel a ñaʼtan chuqui mi caj i yujtel, mucʼʌch  i mejlel a bej chaʼlen wersa chaʼan maʼ coltan jiñi a walobil, cheʼ bajcheʼ jiñi wen bajcheʼ mi caj i colel chaʼan miʼ melben i yeʼtel Jehová (Pr. 22:6).

18. ¿Bajcheʼ miʼ mejlel i coltan Jehová jiñi a walobilob chaʼan miʼ tajob majlel i ñopoñel?

¹⁸ Cʼʌlʌl ti wajali, Jehová an i colta cabʌl xcolelob chaʼan miʼ sujtelob tiʼ yamigo (Sal. 22:9, 10). Jin chaʼan, mucʼʌch i mejlel i coltañob jaʼel jiñi a walobilob chaʼan miʼ lʌcʼtesañob i bʌ tiʼ tojlel, mi cheʼʌch yomob (1 Cor. 3:6, 7). Mi jiñi a walobilob woliʼ tʌtsʼob i bʌ yilal ti jiñi i sujmlel, Jehová mucʼʌch caj i bej cʌntañob (Sal. 11:4). I cheʼ bʌ miʼ qʼuel chaʼan miʼ pʌsob chaʼan yomob ajñel ti jiñi wem bʌ bij, chajpʌbil mi caj i yajñel chaʼan miʼ coltañob (Hech. 13:48; 2 Cr. 16:9). Cheʼ jaʼel, miʼ mejlel i coltañet chaʼan maʼ wʌl wem bʌ tʼan tac cheʼ tiʼ yorajlel, cheʼ bʌ i cʼʌjñibal i chaʼañob jiñi a walobilob (Pr. 15:23). O miʼ mejlel i ñijcʌben i pusicʼal juntiquil hermano o juntiquil hermana yaʼ ti congregación chaʼan miʼ pʌsbeñob cʼuxbiya. Anquese ñucobix, Jehová miʼ mejlel i coltañob chaʼan miʼ cʼajtesañob junchajp tsaʼ bʌ a pʌsbeyob ti wajali (Juan 14:26). Mi mucʼʌch a bej cʌntesañob ti chuqui maʼ wʌl yicʼot ti chuqui maʼ mel, cabʌl chuqui woli a mel baqui miʼ mejlel i yʌcʼ i bendición Jehová.

19. ¿Chucoch miʼ mejlel a ñop chaʼan weñʌch miʼ qʼuelet Jehová?

¹⁹ Jiñi i cʼuxbiya Jehová ti a tojlel mach yaʼic cʌyʌl ti chuqui miʼ mel jiñi a walobilob. Miʼ cʼuxbiñet come maʼ cʼuxbin jaʼel. Mi a bajñel woli a cosan jiñi a walobilob o mach xñoptʼañic jiñi a ñoxiʼal, cʼajtesan chaʼan Jehová miʼ yʌcʼ i tʼan chaʼan mi caj i cʌntañet yicʼot chaʼan mi caj i sujtel tiʼ tat jiñi a walobilob (Sal. 68:5). Maʼañic miʼ mejlel a xicʼ jiñi a walobilob chaʼan miʼ melbeñob i yeʼtel Dios. Pero mi mucʼʌch a bej ñop tiʼ coltaya Jehová yicʼot maʼ mel cheʼ cʼamel maʼ mejlel wen mi caj i qʼuelet.