JIÑI cʌlʌx pensar lajal bajcheʼ jumpʼejl al bʌ laj cuch muʼ bʌ i lujbʼesañonla (Pr. 12:25). ¿Am baʼ wubi a bʌ bajcheʼ jiñi? ¿Am ba qʼuiñil mach cujchix a chaʼan maʼ wubin? Mi cheʼʌchi, mach a bajñelic cheʼ maʼ wubin a bʌ bajcheʼ jiñi. Cabʌlonla an majqui woli (choncol) laj cʌntan, an majqui tsaʼ chʌmi lac chaʼan, o an lac ñusa butʼjaʼlel o yan tac bʌ yicʼot yambʌ wocol tac muʼ bʌ i lujbʼesañonla, muʼ bʌ i yʌqʼueñonla lac chʼijyemlel i miʼ yʌcʼonla ti pensar. ¿Chuqui miʼ mejlel lac mel (chaʼlen) chaʼan maʼañic mi laj cʌlʌx chaʼlen pensar? a

Jiñi i yejemplo jiñi rey David miʼ mejlel i coltañonla chaʼan maʼañic miʼ mʌlbeñonla (jotbeñonla) jiñi cʌlʌx pensar. Tsiʼ ñusa cabʌl wocol, i mach junsujtelic jach colel i chʌmel (sajtel) (1 S. 17:34, 35; 18:10, 11). ¿Chuqui tsiʼ mele chaʼan maʼañic miʼ mʌlben jiñi cʌlʌx pensar? ¿Chuqui miʼ mejlel lac mel chaʼan mi lac lajin?

Tsaʼ tempʌyi i wocol jiñi David. Jumpʼejl ejemplo, laʼ laj qʼuel chuqui tsaʼ ujti cheʼ bʌ woli (yʌquel) ti putsʼel chaʼan jiñi rey Saúl maʼañic miʼ tsʌnsan. Cheʼ bʌ David yicʼot jiñi i wiñicob woliʼ sujtelob ti guerra, jiñi i contrajob tsiʼ xujchʼibeyob chuqui tac añob i chaʼan, tsiʼ pulbeyob i yotot i tsiʼ chucbeyob majlel i familia. ¿Chuqui tsiʼ mele David? Jiñi Biblia miʼ yʌl: «Cʼam tsiʼ chaʼleyob uqʼuel David yicʼot i winicob. Tsiʼ chaʼleyob uqʼuel jinto cheʼ maʼañobix i pʼʌtʌlel». I, cheʼto jaʼel, an i wiñicob yomoʼ bʌ i julob ti xajlel chaʼan miʼ tsʌnsañob (1 S. 30:1-6). Mi laj qʼuel chaʼan tsaʼ tempʌyi uxpʼejl i wocol David: An ti wocol i familia, jiñi i wiñicob yomob i tsʌnsan i jiñi rey Saúl woliʼ sʌclan jaʼel. ¿Muʼ baʼ ñaʼtan bajcheʼ cʼamel tsiʼ chaʼle pensar David?

¿Chuqui tsiʼ mele? David ti ora «tsiʼ pʼʌtʼesa i bʌ ti lac Yum Dios». ¿I bajcheʼ tsiʼ mele? Ñʌmʌl i cʼajtiben i coltaya Jehová ti oración yicʼot miʼ wen ñaʼtan chuqui tac an i mele Dios tiʼ tojlel (1 S. 17:37; Sal. 18:2, 6). Tsiʼ qʼuele chaʼan i cʼʌjñibalʌch i chaʼan i coltaya Jehová, jin chaʼan tsiʼ cʼajtibe chuqui yom miʼ mel. Cheʼ bʌ Jehová tsiʼ jacʼbe, añʌch chuqui tsiʼ mele ti ora. Jin chaʼan, Jehová tsiʼ colta David yicʼot jiñi i wiñicob, i tsaʼʌch i chaʼ tajayob i familia yicʼot chuqui tac añob i chaʼan. ¿Tsaʼ baʼ qʼuele chuqui jiñi uxchajp tsaʼ bʌ i mele David? Tsiʼ melbe oración Jehová chaʼan miʼ cʼajtiben i coltaya, tsiʼ wen ñaʼta bajcheʼ Dios tsiʼ colta ti wajali yicʼot tsiʼ mele chuqui tac tiʼ sube Jehová. ¿Bajcheʼ miʼ mejlel lac lajin David? Laʼ laj qʼuel uxchajp.

1. Laʼ lac chaʼlen oración. Jajayajl mi laj cajel ti cʌlʌx pensar, miʼ mejlel laj cʼajtiben Jehová chaʼan miʼ coltañonla lac ñaʼtan chuqui yom mi lac mel. Tijicña mi caj la cubin mi jal mi lac melben oración i mi lac laj suben muʼ bʌ lac pensarin. O mi maʼañic miʼ mejlel, laʼ lac mel jumpʼejl oración pʼots jach bʌ yicʼot ti mucul tʼan. Jajayajl mi laj cʼajtiben i coltaya Jehová, woli lac pʌs chaʼan mucʼʌch lac ñop tiʼ tojlel bajcheʼ David. Tsiʼ yʌlʌ: «Lajalʌch lac Yum bajcheʼ chʼentun baʼ mi lac putsʼel. Jiñʌch tsʼajcʌbil bʌ cotot. Jiñʌch caj Coltaya. C Diosʌch. Lajalʌch bajcheʼ wen xucʼul bʌ xajlel. Jiñʌch c mʌctʌjib, jini pʼʌtʌl bʌ muʼ bʌ i coltañon» (Sal. 18:2). ¿Mucʼʌch ba i coltañonla jiñi oración? Juntiquil precursora i cʼabaʼ Kahlia miʼ yʌl: «Tijicña mi cubin c bʌ cheʼ bʌ mic chaʼlen oración. Miʼ coltañon chaʼan cheʼ mic ñaʼtan bajcheʼ Jehová yicʼot chaʼan mic ñumen ñop tiʼ tojlel». Tiʼ sujm, jiñi oración jumpʼejlʌch lac majtan tilem bʌ ti  Jehová muʼ bʌ i coltañonla lac mʌlben jiñi cʌlʌx pensar.

2. Laʼ lac ñaʼtan i coltaya Jehová. Cʼajtesan bajcheʼ tsiʼ coltayet Jehová chaʼan maʼ cuch jiñi wocol tac. Cheʼ bʌ mi lac wen ñaʼtan bajcheʼ tsiʼ colta Jehová jiñi i wiñicob ti wajali yicʼot bajcheʼ an i coltayonla jaʼel, mi lac ñumen ñop tiʼ tojlel yicʼot ñumen tijicña mi la cubin lac bʌ (Sal. 18:17-19). Juntiquil anciano i cʼabaʼ Joshua tsiʼ yʌlʌ: «Melbil c chaʼan jumpʼejl lista chaʼan jiñi oración tac am bʌ i jacʼbeyon Jehová. Cheʼ bajcheʼ jiñi, miʼ mejlel j cʼajtesan cheʼ baʼ ora jamʌ tsiquil chuqui tsaʼ j cʼajtibe, i tsaʼʌch i yʌqʼueyon jiñi i cʼʌjñibal bʌ c chaʼan». Cheʼ bʌ mi lac ñaʼtan chuqui tac an i mele Jehová ti lac tojlel, mi lac chaʼ pʼʌtʼan chaʼan mi lac bej mʌlben jiñi cʌlʌx pensar.

3. An chuqui yom mi lac mel. Cheʼ bʌ woli lac ñaʼtan chuqui mi caj lac mel ti jumpʼejl wocol, yom mi lac ñaxan qʼuel chuqui miʼ yʌl jiñi Biblia, come jiñʌch ñumen wem bʌ laj coltʌntel (Sal. 19:7, 11). Cabʌlob an i qʼueleyob chaʼan cheʼ bʌ miʼ chaʼleñob ti investigar jumpʼejl versículo, miʼ ñumen chʼʌmbeñob i sujm bajcheʼ miʼ mejlel i jacʼob. Juntiquil anciano i cʼabaʼ Jarrod miʼ yʌl: «Jiñi investigación miʼ coltañon c wen cʌn jumpʼejl versículo. Cheʼ bajcheʼ jiñi, mic ñumen chʼʌmben i sujm chuqui yom i subeñon Jehová, jiñi i tʼan tac miʼ cʼotel tic pusicʼal i mic ñop c mel chuqui tac miʼ mulan». Cheʼ bʌ mi lac sʌclʌben i coltaya Jehová ti Biblia yicʼot mi lac jacʼ chuqui miʼ yʌl, ñumen chajpʌbilonla chaʼan mi lac mʌlben jiñi cʌlʌx pensar.

David yujil chaʼan i cʼʌjñibal i chaʼan i coltaya Jehová chaʼan miʼ mʌlben jiñi cʌlʌx pensar. I tsiʼ wen qʼuele ti ñuc i coltaya come tsiʼ yʌlʌ: «Chaʼan ti jatet, c Dios, mi mejlel c tijpʼel ñumel ti junwejl tsʼajc». I tsiʼ bej alʌ: «Jiñʌch Dios muʼ bʌ i yʌqʼueñon c pʼʌtʌlel» (Sal. 18:29, 32). Tajol mi lac ñaʼtan chaʼan jiñi lac wocol tac lajal bajcheʼ jumpʼejl muro baqui maʼañic mi lac mejlel ti cʼʌjquel, pero mucʼʌch i mejlel lac lʌtʼ tiʼ coltaya Jehová. Mi mucʼʌch lac mel oración chaʼan mi laj cʼajtiben i coltaya Jehová, mi lac wen ñaʼtan chuqui tac an i mele ti lac tojlel yicʼot mi lac mel cheʼ bajcheʼ yom, miʼ mejlel lac ñop chaʼan mi caj i yʌqʼueñonla lac pʼʌtʌlel yicʼot lac ñaʼtʌbal chaʼan mi lac mʌlben jiñi cʌlʌx pensar.