1. ¿Baqui bʌ meta tac miʼ mejlel la cʌqʼuen lac bʌ?

 JIÑI i sujm bʌ xñoptʼañonbʌla mi laj cʼuxbin Jehová i la com lac melben (chaʼliben) i yeʼtel (troñel) ti wen. Chaʼan miʼ mejlel lac mel yom mi la cʌqʼuen lac bʌ wem bʌ meta tac, bajcheʼ i tajol jiñi wem bʌ melbalʌl (chaʼlibal) tac, an chuqui tac yambʌ mi laj cʌn yicʼot mi laj qʼuel bajcheʼ miʼ mejlel laj coltan yañoʼ bʌ. b

2. ¿Chucoch yom mi la cʌqʼuen lac bʌ meta tac yicʼot mi lac chaʼlen wersa lac taj?

² ¿Chucoch yom mi la cʌqʼuen lac bʌ meta tac yicʼot mi lac chaʼlen wersa lac taj? Junchajp, come la com lac tijicñesan Jehová, jiñi lac Tat. Tijicña miʼ yubin cheʼ bʌ mi laj cʼʌn jiñi la cujil bʌ melol chaʼan mi lac melben i yeʼtel. Cheʼ jaʼel, la com bej sujtel ti ñumen wem bʌ xñoptʼan chaʼan mi lac ñumen coltan la quermañujob (1 Tes. 4:9, 10). Ti lac pejtelel yom mi lac bej chaʼlen wersa chaʼan mi lac ñumen melben i yeʼtel Jehová, mach yʌlʌyic jaypʼejlix jab añonla tiʼ sujmlel. Laʼ laj qʼuel bajcheʼ miʼ mejlel lac mel.

3. ¿Chuqui ti ticʼojel tsaʼ aqʼuenti Timoteo ti 1 Timoteo 4:12-16?

³ Timoteo chʼitonto cheʼ bʌ jiñi apóstol Pablo tiʼ tsʼijbube majlel jiñi ñaxam bʌ carta am bʌ tiʼ cʼabaʼ, pero añix i ñaʼtʌbal bajcheʼ anciano. Pero Pablo tiʼ sube chaʼan miʼ bej chaʼlen wersa chaʼan miʼ ñumen lʌcʼtesan i bʌ ti Jehová (pejcan 1 Timoteo 4:12-16). Cheʼ bʌ mi lac wen qʼuel tsaʼ bʌ i yʌlʌ Pablo, mi caj laj qʼuel chaʼan an chaʼchajp tsaʼ bʌ i sube Timoteo chaʼan  yom miʼ weñʼesan. Junchajp, yom miʼ chaʼlen wersa chaʼan miʼ taj jiñi melbalʌl tac bajcheʼ jiñi cʼuxbiya, jiñi ñopoñel yicʼot jiñi sʌclel. Cheʼ jaʼel, yom miʼ weñʼesan bajcheʼ miʼ chaʼlen pejcaya jun, miʼ yʌcʼ ticʼojel yicʼot miʼ chaʼlen cʌntesa. Ti ili estudio, mi caj laj qʼuel i yejemplo Timoteo yicʼot chaʼan cheʼ bʌ mi la cʌqʼuen lac bʌ meta tac muʼ bʌ i mejlel lac taj miʼ coltañonla chaʼan mi lac ñumen lʌcʼtesan lac bʌ ti Jehová. Cheʼ jaʼel, mi caj laj qʼuel bajcheʼ miʼ mejlel lac ñumen melben i yeʼtel Jehová.

4. Cheʼ bajcheʼ miʼ yʌl Filipenses 2:19-22, ¿chucoch Jehová tsiʼ wen cʼʌñʌ Timoteo?

⁴ ¿Chucoch Jehová tsaʼʌch i wen cʼʌñʌ Timoteo? Come an i chaʼan wen utsʼatax bʌ melbalʌl tac (pejcan Filipenses 2:19-22). Ti jiñi tsaʼ bʌ i yʌlʌ Pablo tiʼ tojlel Timoteo, mi laj qʼuel chaʼan an i pecʼlel, xucʼul, yujil eʼtel yicʼot miʼ mejlel ti ñojpel tiʼ tojlel. Uts yicʼot jiñi hermanojob i mucʼʌch i ñaʼtañob. Jin chaʼan, Pablo tsaʼʌch i wen cʼuxbi i tsiʼ yʌqʼue tiʼ wenta wocol bʌ eʼtel tac (1 Cor. 4:17). Jehová mi caj i cʼuxbiñonla mi tsaʼ lac chaʼle wersa lac taj melbalʌl tac muʼ bʌ i mulan i mi caj ñumen cʼʌñonla tiʼ yorganización (Sal. 25:9; 138:6).

5. a) ¿Bajcheʼ miʼ mejlel lac ñaʼtan chuquito yom mi lac tojʼesan ti lac tojlel? b) ¿Chuqui miʼ mel jiñi hermana xchʼocto bʌ am bʌ yaʼ ti foto chaʼan miʼ ñumen chʼʌmben i sujm bajcheʼ yubil miʼ yubin yambʌlob?

⁵ Laʼ la cʌqʼuen lac bʌ meta yom bʌ mi lac taj. Laʼ lac pejcan Jehová ti oración chaʼan mi lac ñaʼtan chuquito yom mi lac tojʼesan ti lac tojlel. Miʼ mejlel lac yajcan junchajp yom bʌ mi lac tojʼesan i laʼ lac chaʼlen wersa lac tojʼesan. ¿Yomto ba mi lac ñumen chʼʌmben i sujm bajcheʼ yubil miʼ yubiñob i bʌ yañoʼ bʌ o chaʼan mi lac ñumen mulan laj coltan yañoʼ bʌ? ¿Yomto ba mi lac ñumen sʌclan ñʌchʼtʌlel o chaʼan la comʌch lac ñusʌben i mul yañoʼ bʌ? Mi maʼañic mi lac bajñel cʌn lac bʌ, laʼ laj cʼajtiben juntiquil la camigo chaʼan miʼ subeñonla bajcheʼ yilal miʼ qʼuelonla (Pr. 27:6).

6. ¿Bajcheʼ miʼ mejlel lac taj jiñi melbalʌl la com bʌ?

⁶ Laʼ lac chaʼlen wersa chaʼan mi lac taj jiñi lac meta. ¿Bajcheʼ? Laʼ lac ñaxan sʌclan información chaʼan bʌ jiñi melbalʌl la com bʌ lac taj. Jumpʼejl ejemplo, laʼcu lac ñaʼtan chaʼan yom mi lac ñumen ñusʌben i mul yañoʼ bʌ. Wen cheʼ muqʼuic lac pejcan yicʼot mi lac wen ñaʼtan jiñi i yejemplo muʼ bʌ i yʌjlelob ti Biblia tsaʼ bʌ i ñusʌbeyob i mul yañoʼ bʌ yicʼot jiñi maʼañic bʌ tsiʼ meleyob. Laʼcu lac ñaʼtan tiʼ  tojlel Jesús. Tsaʼʌch i ñusʌbe i mul yañoʼ bʌ (Luc. 7:47, 48). Mach jiñic tsiʼ qʼuele i sajtemalob, tsiʼ qʼuele chuqui wem bʌ tiʼ tojlelob. Pero jiñi fariseojob tsiʼ ñaʼtayob «chaʼan maʼañobic i cʼʌjñibal jiñi yañoʼ bʌ» (Luc. 18:9). Cheʼ bʌ tsaʼix lac wen ñaʼta ili ejemplo tac, laʼ laj cʼajtiben lac bʌ: «¿Bajcheʼ yilal mij qʼuel jiñi yambʌlob? ¿Chuqui ti melbalʌl tac mij qʼuelbeñob?». Mi wocol mi la cubin chaʼan an majqui mi lac ñusʌben i mul, laʼ lac tsʼijbun baqui bʌ melbalʌl tac an i chaʼan i mi laj cʼajtiben lac bʌ: «¿Bajcheʼ yilal miʼ qʼuel Jesús? ¿Muʼ ba i ñusʌben i mul?». Cheʼ mi lac mel iliyi, miʼ mejlel i coltañonla chaʼan mi laj qʼuextan lac pensar. Tajol ti ñaxan wocol mi caj la cubin chaʼan mi lac ñusʌben i mul jiñi am bʌ chuqui tsiʼ tumbeyonla. Pero mi mucʼʌch lac chaʼlen wersa, mucʼʌch caj i mejlel lac ñumen ñusʌben i mul jiñi yañoʼ bʌ.

7. ¿Bajcheʼ miʼ cʌn Jehová ili ora jiñi wen yujiloʼ bʌ i yeʼtel? (Proverbios 22:29).

⁷ Yambʌ meta muʼ bʌ i mejlel la cʌqʼuen lac bʌ jiñʌch cheʼ an chuqui yambʌ mi laj cʌn. Jumpʼejl ejemplo, ñaʼtancu jiñi hermanojob muʼ bʌ i chaʼleñob eʼtel ti construcción chaʼan sucursal tac, i Yotlel tac colem tempa bʌ yicʼot i Yotlel tempa bʌ. Cabʌlob an chuqui tsiʼ cʌñʌyob i mel come tsiʼ chaʼleyob eʼtel yicʼot jiñi yañoʼ bʌ ñumen yujilobix bʌ. Cheʼ bajcheʼ mi laj qʼuel yaʼ ti foto tac, jiñi wiñicob yicʼot xʼixicob woli (choncol) i cʌñob bajcheʼ yom miʼ cʌntañob jiñi i Yotlel colem tempa bʌ yicʼot jiñi i Yotlel tempa bʌ. Cheʼ bajcheʼ iliyi yicʼot ti yan tac bʌ eʼtel, Jehová, «jiñi Rey am bʌ tiʼ pejtelel ora», yicʼot Jesús, «jiñi Rey tiʼ tojlel [...] reyob», miʼ cʼʌn ili hermanojob chaʼan cabʌl chuqui ñuc bʌ miʼ mejlel (1 Tim. 1:17; 6:15; pejcan Proverbios 22:29). La com lac chaʼlen tsʌts bʌ eʼtel chaʼan mi laj cʼʌn jiñi la cujil bʌ melol chaʼan mi la cʌqʼuen i ñuclel Jehová, mach chaʼañic mi lac bajñel sʌclan lac ñuclel (Juan 8:54).

8. ¿Chuqui mi caj i coltañonla lac ñaʼtan chuqui yom mi lac tojʼesan?

⁸ Laʼ la cʌqʼuen lac bʌ meta yom bʌ mi lac taj. ¿Chuqui yambʌ yom mi lac tojʼesan? Laʼ lac pejcan jiñi ancianojob ti congregación o tajol jiñi superintendente chaʼan circuito chaʼan miʼ subeñonla chuqui yom mi lac mel. Jumpʼejl ejemplo, mi tiʼ subeyonla chaʼan yom mi lac ñumen weñʼesan bajcheʼ mi lac chaʼlen tʼan o jiñi laj cʌntesa, miʼ mejlel laj cʼajtibeñob baqui ñoj yom mi lac tojʼesan. Cheʼ jiñi, laʼ lac mel. ¿Bajcheʼ?

9. ¿Chuqui miʼ mejlel lac mel chaʼan an chuqui mi laj cʌn?

⁹ Laʼ lac chaʼlen wersa chaʼan mi lac taj jiñi lac meta. Laʼcu lac ñaʼtan chaʼan la com sujtel ti ñumen wem bʌ xcʌntesa. Miʼ mejlel lac wen pejcan jiñi folleto Sujten ti ñumen wem bʌ xcʌntesa yicʼot xpejcaya jun. I cheʼ bʌ muʼto caj lac ñusan jumpʼejl asignación ti jiñi tempa bʌ I Subtʼan yicʼot i Melbal jiñi xÑoptʼan, miʼ mejlel laj cʼajtiben yambʌ hermano ñumen añix bʌ i ñaʼtʌbal chaʼan miʼ ñʌchʼtañonla yicʼot miʼ subeñonla baqui bʌ yom mi lac tojʼesan. Mi mucʼʌch lac wen chajpan jiñi lac asignación tac, mi caj lac sujtel ti ñumen wem bʌ xcʌntesa, i mi caj i qʼuejlel chaʼan la cujilʌch eʼtel yicʼot chaʼan miʼ mejlel ti ñojpel ti lac tojlel (Pr. 21:5; 2 Cor. 8:22).

10. Acʼʌ jumpʼejl ejemplo muʼ bʌ i pʌs chuqui miʼ mejlel lac mel chaʼan an chuqui mi laj cʌn.

¹⁰ ¿Ixcu mi la com lac weñʼesan junchajp mach bʌ wen la cujilic melol? ¡Mach lujbʼaconla! Laʼ laj cʌn tiʼ tojlel juntiquil hermano i cʼabaʼ Garry, wen wocol bʌ tsiʼ yubi chaʼan miʼ pejcan jun. Miʼ yʌl chaʼan miʼ wen ubin quisin cheʼ bʌ an chuqui yom miʼ pejcan yaʼ ti tempa bʌ. Pero maʼañic tsaʼ lujbʼa, tsiʼ chʌn chaʼle wersa  chaʼan miʼ cʌn. Tiʼ coltaya jiñi hermanojob yicʼot jiñi lac jun tac, wʌle muqʼuix i ñusan discurso tac ti tempa bʌ, ti jumpʼejl bʌ qʼuin colem tempa bʌ yicʼot ti jiñi uxpʼejl bʌ qʼuin.

11. Cheʼ bajcheʼ tiʼ tojlel Timoteo, ¿chuqui mi caj i coltañonla chaʼan chajpʌbilonla chaʼan mi lac ñumen taj eʼtel tac?

¹¹ ¿Tsaʼ ba sujti Timoteo ti ñumen wem bʌ xcʌntesa? Jiñi Biblia maʼañic miʼ yʌl, pero la cujil chaʼan tsaʼʌch i jacʼʌ jiñi i ticʼojel tac Pablo. Jin chaʼan, miʼ mejlel lac ñaʼtan chaʼan cʼunteʼ cʼunteʼ tsaʼ sujti ti ñumen wem bʌ xcʌntesa i ñumen wen tiʼ tsʼʌctesa jiñi i yeʼtel tac (2 Tim. 3:10). Cheʼ bajcheʼ Timoteo, mi tsaʼ lac ñumen cʌñʌ lac mel jumpʼejl eʼtel, chajpʌbil mi caj la cajñel chaʼan mi la cʌqʼuentel yambʌ eʼtel tac.

12. ¿Bajcheʼ an i coltayet yañoʼ bʌ?

¹² ¡Wen tijicña mi la cubin lac bʌ cheʼ bʌ jiñi yambʌlob miʼ coltañoñobla! Jumpʼejl ejemplo, mi añonla ti hospital, miʼ wen aqʼueñonla lac tijicñʌyel cheʼ bʌ miʼ julaʼtañonla jiñi hermanojob ochemoʼ bʌ jiñi Comité muʼ bʌ i pejcan doctorob o jiñi Junmojt muʼ bʌ i julaʼtañob cʼamoʼ bʌ ti hospital. O cheʼ bʌ mi lac ñusan jumpʼejl tsʌts bʌ wocol, mi laj qʼuel ti ñuc cheʼ bʌ juntiquil anciano miʼ yʌqʼuen i yorajlel chaʼan miʼ ñʌchʼtañonla yicʼot miʼ ñuqʼuesan lac pusicʼal. I cheʼ bʌ la com coltʌntel chaʼan mi la cʌcʼ jumpʼejl estudio, mi laj qʼuel ti ñuc cheʼ bʌ miʼ coltañonla juntiquil precursor wen añix bʌ i ñaʼtʌbal muʼ bʌ i majlel yicʼotonla i miʼ subeñonla chuqui yom mi lac tojʼesan. Jesús tsiʼ yʌlʌ: «Ñumen an tijicñʌyel cheʼ mi la cʌcʼ i mach jiñic cheʼ mi lac chʼʌm» (Hech. 20:35). Pejtelel ili hermanojob miʼ yubiyob ili tijicñʌyel cheʼ bʌ miʼ coltañoñobla. I joñonla jaʼel mi caj la cubin lac tijicñʌyel mi cheʼʌch mi lac mel. Mi la com lac ñumen melben i yeʼtel Jehová o yan tac bʌ, ¿bajcheʼ miʼ mejlel lac mel?

13. ¿Chuqui yom mi lac chʼʌm ti ñuc cheʼ bʌ mi caj la cʌqʼuen lac bʌ jumpʼejl meta?

¹³ Mach la cʌqʼuen lac bʌ meta tac mach bʌ jamʌ tsiquilic. Jumpʼejl ejemplo, tajol mi lac ñaʼtan: «Com c ñumen coltan jiñi congregación». Pero tajol maʼañic mi caj lac ñaʼtan baqui yom mi lac tech i wocol chaʼan mi lac ñaʼtan mi wolix (yʌquelix) lac mel o maxto. Jin chaʼan, ñumen wen cheʼ jamʌ tsiquil mi la  cʌl jiñi meta la com bʌ. Tajol miʼ mejlel lac tsʼijbun jiñi meta yicʼot chuqui mi caj lac mel chaʼan mi lac taj.

14. ¿Chucoch yom mi lac ñaʼtan chaʼan an i tajol an chuqui yom mi caj laj qʼuextan cheʼ bʌ woli la cʌqʼuen lac bʌ meta tac?

¹⁴ Cheʼ bʌ mi la cʌqʼuen lac bʌ jumpʼejl meta yom mi lac ñaʼtan chaʼan an i tajol an chuqui mi caj laj qʼuextan. ¿Chucoch? Come maʼañic miʼ mejlel lac ñaʼtan chuqui mi caj i yujtel. Jumpʼejl ejemplo, jiñi apóstol Pablo tsiʼ chaʼle coltaya chaʼan miʼ mejlel jiñi congregación am bʌ ti Tesalónica, i tajol tsiʼ ñaʼta jalto mi caj i cʌytʌl chaʼan miʼ bej coltan jiñi tsijiʼ bʌ xñoptʼañob. Pero jiñi i contrajob tsiʼ chocoyob loqʼuel ti jiñi tejclum (Hech. 17:1-5, 10). Cheʼ tsaʼic cʌyle, tsiʼ yʌcʼʌ ti wocol jiñi congregación. Pero Pablo maʼañic tsaʼ lujbʼa, tsiʼ qʼuexta jiñi tsaʼ bʌ i lon ñaʼta, i ti wiʼil tsiʼ choco majlel Timoteo chaʼan miʼ pʼʌtʼesʌben i ñopoñel jiñi hermanojob (1 Tes. 3:1-3). Wen tijicña tsiʼ yubiyob jiñi añoʼ bʌ ti Tesalónica cheʼ bʌ tsiʼ qʼueleyob chaʼan Timoteo yomʌch majlel baqui yomto coltaya.

15. Tsictesan yicʼot jumpʼejl ejemplo chuqui miʼ mejlel ti ujtel yicʼot jiñi lac meta cheʼ bʌ an chuqui miʼ qʼuextʌyel.

¹⁵ Miʼ mejlel laj cʌn tiʼ tojlel Pablo yicʼot chuqui tsiʼ ñusa ti Tesalónica. Tajol tsaʼ la cʌqʼue lac bʌ jumpʼejl meta tiʼ yeʼtel Jehová, pero an chuqui miʼ waʼ qʼuextʌyel i maʼañix miʼ mejlel lac mel (Ec. 9:11, 12). ¿Chuqui mi caj lac mel? Laʼ la cʌqʼuen lac bʌ yambʌ meta muqʼuixto bʌ i mejlel lac taj. Jiñʌch tsaʼ bʌ i mele Ted yicʼot Hiedi. Tsiʼ cʌyʌyob Betel tiʼ caj cʼamʌjel. Pero ti ora tiʼ sʌclayob bajcheʼ yambʌ miʼ mejlel i melbeñob i yeʼtel Jehová come miʼ wen cʼuxbiñob. Tsaʼ ñaxan ochiyob bajcheʼ precursor regular, cheʼ jiñi tsaʼ sujtiyob ti precursor especial i Ted tsaʼ cʌntesʌnti chaʼan miʼ yochel bajcheʼ superintendente sustituto. Pero cheʼ jiñi tsaʼ qʼuextʌnti jiñi jabilel muʼ bʌ i cʼajtintel chaʼan miʼ yochelob bajcheʼ superintendente chaʼan circuito, Ted yicʼot Hiedi tsiʼ qʼueleyob chaʼan maʼañix miʼ mejlel i tajob jiñi asignación. Ti ñaxan tsaʼʌch i tsʼitaʼ ubiyob i chʼijyemlel, pero yujilob chaʼan añʌch bajcheʼ yambʌ miʼ mejlel i melbeñob i yeʼtel Jehová. Ted miʼ yʌl: «An lon j qʼuele chaʼan mach junchajpic jach bajcheʼ miʼ mejlel c ñumen melben lon i yeʼtel Jehová».

16. ¿Chuqui mi laj cʌn ti Gálatas 6:4?

¹⁶ Maʼañic chuqui miʼ mejlel lac mel chaʼan maʼañic chuqui miʼ yujtel ti laj cuxtʌlel. Jin chaʼan, wen ñuc i cʼʌjñibal mi laj cʼajtesan chaʼan jiñi asignación tac muʼ bʌ la cʌqʼuentel mach jiñi muʼ bʌ i yʌcʼ chaʼan miʼ qʼuelonla ti ñuc Jehová. Cheʼ jaʼel, maʼañic i cʼʌjñibal cheʼ mi laj qʼuel jiñi asignación tac am bʌ i chaʼan yañoʼ bʌ i joñonla maʼañic lac chaʼan. Hiedi miʼ  yʌl: «Mi tsaʼ lac laja laj cuxtʌlel yicʼot i chaʼan yañoʼ bʌ, mi caj lac sʌt lac ñʌchʼtʌlel» (pejcan Gálatas 6:4). Jin chaʼan, ñumen wen cheʼ mi lac sʌclan bajcheʼ tac mi lac melben i yeʼtel Jehová yicʼot mi laj coltan yambʌlob. c

17. ¿Chuqui miʼ mejlel lac mel mi la com lac taj yan tac bʌ eʼtel?

¹⁷ Mi mach cabʌlic chuqui an lac chaʼan mi lac chumtʌl yicʼot maʼañic mi lac yilol otsan lac bet, mi caj lac mejlel lac ñumen mel yan tac bʌ eʼtel. Laʼ la cʌqʼuen lac bʌ meta tac ili ora muʼ bʌ caj i coltañonla lac taj yambʌ meta tac ñumen ñuc bʌ. Jumpʼejl ejemplo, mi a wom sujtel ti precursor regular, ¿muʼ ba a mejlel ti jumucʼ ochel bajcheʼ precursor auxiliar? O mi a wom sujtel ti siervo ministerial, ¿muʼ ba a mejlel a ñumen chaʼlen subtʼan yicʼot maʼ julaʼtan jiñi hermanojob añobix bʌ i jabilel o cʼamoʼ bʌ yaʼ ti congregación? Pejtelel jiñi muʼ bʌ a cʌn ili ora miʼ mejlel i coltañet chaʼan maʼ taj yan tac bʌ asignación ti wiʼil. Mach yʌlʌyic chuqui miʼ yujtel, aqʼuen Jehová jiñi ñumen wem bʌ ti a tojlel tiʼ melol i yeʼtel (Rom. 12:11).

18. ¿Chuqui miʼ pʌsbeñonla i yejemplo Beverley? (Qʼuele jaʼel jiñi foto).

¹⁸ Mach la cʌl chaʼan wen ñoxoñixla i tiʼ caj jiñi maʼañix miʼ mejlel la cʌqʼuen lac bʌ meta tac yicʼot lac chaʼlen wersa chaʼan mi lac taj. Jumpʼejl ejemplo muʼ bʌ i pʌs jiñi jiñʌch jiñi hermana Beverley am bʌ 75 i jabilel. Maʼañic miʼ wen mejlel ti xʌmbal tiʼ caj tsaʼ cʼamʼa. Pero yomʌch i wen chaʼlen coltaya ti jiñi campaña chaʼan Conmemoración. ¿Chuqui tsiʼ mele? Tsiʼ yʌqʼue i bʌ meta tac i wen tijicña tsiʼ yubi i bʌ cheʼ bʌ tiʼ tsʼʌctesa. Jiñi tsaʼ bʌ i mele tsiʼ colta yambʌlob chaʼan miʼ ñumen chaʼleñob subtʼan. Tsiquil chaʼan Jehová miʼ wen qʼuel ti ñuc pejtelel chuqui miʼ melob jiñi hermanojob ñoxobix bʌ anquese maʼañix miʼ wen mejlelob (Sal. 71:17, 18).

19. ¿Baqui tac bʌ meta miʼ mejlel la cʌqʼuen lac bʌ?

¹⁹ Laʼ la cʌqʼuen lac bʌ meta tac muʼ bʌ i mejlel lac taj. Laʼ lac chaʼlen wersa chaʼan mi lac taj jiñi melbalʌl tac muʼ bʌ i mulan Jehová. Laʼ laj cʌn lac mel muʼ tac bʌ i coltañonla chaʼan miʼ ñumen cʼʌñonla Dios yicʼot i yorganización. Laʼ lac sʌclan chuqui tac yambʌ miʼ mejlel lac mel tiʼ tojlel la quermañujob. d Mi mucʼʌch lac mel pejtelel iliyi, Jehová mi caj i yʌqʼueñonla i bendición, i cheʼ bajcheʼ tsaʼ ujti tiʼ tojlel Timoteo, jamʌ tsiquil mi caj i qʼuejlel chaʼan wolʌch laj colel tiʼ chaʼan bʌ Dios (1 Tim. 4:15).