Cheʼ bʌ miʼ yujtel bajcheʼ jiñi, jiñi congregación mi caj i ñaʼtan chaʼan jiñi wiñic tsiʼ jisa jiñi ñaxam bʌ i ñujpuñel cheʼ bʌ tsaʼ chaʼ ñujpuñi yicʼot chaʼan jiñix yoque i yijñam am bʌ ili ora. Chaʼan mi lac chʼʌmben i sujm chucoch cheʼ miʼ yujtel bajcheʼ iliyi, laʼ laj qʼuel tsaʼ bʌ i yʌlʌ Jesús chaʼan jiñi divorcio yicʼot jiñi chaʼ ñujpuñel.

Ti Mateo 19:9, Jesús tsiʼ yʌlʌ baqui ora muqʼuix i mejlel ti jisʌntel jumpʼejl ñujpuñel. Yaʼi miʼ yʌl: «Majqui jach miʼ chaʼlen i bʌ ti divorciar tiʼ yijñam, pero mach tiʼ cajic tsiʼ chaʼle tsʼiʼlel jiñi i yijñam, i miʼ ñujpuñel yicʼot yambʌ xʼixic, woliʼ chaʼlen tsʼiʼlel». Ti jiñi tsaʼ bʌ i yʌlʌ Jesús mi laj cʌn 1) chaʼan jiñi tsʼiʼlel cojach jiñi muʼ bʌ i mejlel i yʌcʼ ti ujtel jumpʼejl divorcio yicʼot 2) chaʼan jiñi wiñic muʼ bʌ i chaʼlen i bʌ ti divorciar pero mach tiʼ cajic tsʼiʼlel i miʼ ñujpuñel yicʼot yambʌ woli (choncol) i chaʼlen tsʼiʼlel. a

¿Yom ba i yʌl ili i tʼan Jesús chaʼan mi juntiquil wiñic miʼ chaʼlen tsʼiʼlel i miʼ chaʼlen i bʌ ti divorciar tiʼ yijñam librejix chaʼan miʼ chaʼ ñujpuñel yicʼot yambʌ? An i tajol mach cheʼqui. Cheʼ bʌ an majqui miʼ chaʼlen tsʼiʼlel, jiñi maʼañic bʌ i mul mi caj i ñaʼtan mi mi caj i ñusʌben o maʼañic. Mi maʼañic miʼ ñusʌben i mul i miʼ chaʼleñob i bʌ ti divorciar, librejobix chaʼan miʼ chaʼ ñujpuñelob cheʼ bʌ ujtemix jiñi divorcio.

Tajol jiñi mach bʌ añic i mul mach yomic chaʼan miʼ jilel jiñi i ñujpuñel i miʼ yʌl chaʼan yom i ñusʌben i mul jiñi i ñoxiʼal. Pero ¿chuqui miʼ yujtel cheʼ bʌ jiñi wiñic maʼañic miʼ jacʼ i ñusʌbentel i miʼ bajñel chaʼlen i bʌ ti divorciar? Jiñi wiñic mach librejic tiʼ wut Dios chaʼan miʼ chaʼ ñujpuñel come jiñi i yijñam yomʌch i ñusʌben i mul i mach yomic chaʼan miʼ jilel jiñi i ñujpuñel. Mi tsaʼ chaʼ ñujpuñi yicʼot yambʌ anquese mach librejic chaʼan miʼ mel (chaʼlen) miʼ chaʼ mel tsʼiʼlel. Jiñi ancianojob mi caj i melob yambʌ comité judicial chaʼan miʼ qʼuelob ili mulil (1 Cor. 5:1, 2; 6:9, 10).

Mi juntiquil wiñic miʼ chaʼ ñujpuñel cheʼ bʌ mach librejic tiʼ wut Dios chaʼan miʼ mel, ¿bajcheʼ yilal miʼ qʼuel jiñi congregación jiñi ñaxam bʌ i ñujpuñel yicʼot jiñi tsijiʼ bʌ i ñujpuñel? ¿Bej anto ba i cʼʌjñibal tiʼ wut Dios jiñi ñaxam bʌ i ñujpuñel? ¿Muʼto ba i mejlel i yʌl jiñi maʼañic bʌ i mul chaʼan mi caj i ñusʌben i mul jiñi i ñoxiʼal bʌ ti ñaxan? ¿Muʼ ba caj i qʼuejlel bajcheʼ tsʼiʼlel jiñi tsijiʼ bʌ i ñujpuñel?

Cʼʌlʌl ti ili ora miʼ ñaʼtʌntel chaʼan jiñi tsijiʼ bʌ ñujpuñel xtsʼiʼlelobʌch cheʼ bʌ cuxulto jiñi maʼañic bʌ i mul, maʼañic miʼ ñujpuñel yicʼot maʼañic miʼ chaʼlen tsʼiʼlel. Pero Jesús mach jiñic tsiʼ wen taja ti tʼan jiñi maʼañic bʌ i mul cheʼ bʌ tsiʼ yʌlʌ chaʼan jiñi divorcio yicʼot jiñi chaʼ ñujpuñel. Tsaʼ jach i yʌlʌ chaʼan mi juntiquil wiñic miʼ chaʼlen i bʌ ti divorciar pero mach cheʼic bajcheʼ miʼ yʌl jiñi Biblia i miʼ ñujpuñel yicʼot yambʌ miʼ chaʼlen tsʼiʼlel. Mi cheʼ miʼ yujtel bajcheʼ jiñi, jiñi divorcio yicʼot jiñi tsijib ñujpuñel, tsaʼ bʌ i yʌlʌ Jesús bajcheʼ tsʼiʼlel, miʼ jisan jiñi ñaxam bʌ ñujpuñel.

 Cheʼ bʌ an majqui miʼ chaʼlen i bʌ ti divorciar chaʼan miʼ jisan jiñi ñaxam bʌ i ñujpuñel i miʼ ñujpuñel yicʼot yambʌ, jiñi maʼañic bʌ i mul maʼañix miʼ mejlel i yʌl chaʼan mi caj i ñusʌben i mul o maʼañic. Jiñi maʼañic bʌ i mul maʼañix tiʼ wenta chaʼan jiñi tsaʼ bʌ ujti. Cheʼ jaʼel, jiñi congregación maʼañix mi caj i qʼuel jiñi tsijiʼ bʌ ñujpuñel bajcheʼ tsʼiʼlel tiʼ caj cuxulto jiñi maʼañic bʌ i mul, maʼañic miʼ ñujpuñel o maʼañic miʼ chaʼlen tsʼiʼlel. b

Ti jiñi ñaxam bʌ ejemplo tsaʼ bʌ la cʌlʌ, jiñi wiñic tsiʼ chaʼle tsʼiʼlel i tsaʼ ujti divorcio. Pero ¿ixcu mi jiñi wiñic miʼ chaʼlen i bʌ ti divorciar anquese mach tiʼ cajic tsiʼ chaʼle tsʼiʼlel i miʼ chaʼ ñujpuñel yicʼot yambʌ? ¿O chuqui miʼ yujtel mi jiñi wiñic jinto miʼ chaʼlen tsʼiʼlel cheʼ bʌ divorciadojix i miʼ chaʼ ñujpuñel yicʼot yambʌ anquese jiñi ñaxam bʌ i yijñam yomʌch i ñusʌben i mul? Cheʼ miʼ yujtel iliyi, jiñi divorcio yicʼot jiñi tsijib ñujpuñel, lajal bʌ bajcheʼ tsʼiʼlel, miʼ jisan jiñi ñaxam bʌ ñujpuñel. Jiñi tsijiʼ bʌ ñujpuñel legalix. Jiñi revista La Atalaya 15 chaʼan febrero, 1980, página 30, tsiʼ yʌlʌ chaʼan jiñi lac piʼʌl tsaʼix ochi ti tsijiʼ bʌ ñujpuñel «i jin chaʼan mach mejlix i jisan jiñi i ñujpuñel i miʼ chaʼ sujtel yicʼot jiñi ñaxam bʌ i piʼʌl, come jiñi ñaxam bʌ i ñujpuñel tsaʼix jili tiʼ caj jiñi divorcio, jiñi tsʼiʼlel yicʼot cheʼ tsaʼ chaʼ ñujpuñi».

Ili tsijib tsictesʌntel maʼañic woli(yʌquel) i yʌl chaʼan mach yomic miʼ qʼuejlel ti chʼujul jiñi ñujpuñel i maʼañic woliʼ yʌl chaʼan mach tsʌtsic bʌ mulil jiñi tsʼiʼlel. Mi juntiquil wiñic miʼ chaʼlen i bʌ ti divorciar pero mach cheʼic bajcheʼ miʼ yʌl jiñi Biblia i miʼ ñujpuñel yicʼot yambʌ anquese mach librejic chaʼan miʼ mel, jiñi ancianojob mi caj i melob jumpʼejl comité judicial come tsiʼ chaʼle tsʼiʼlel. (I mi jiñi tsijiʼ bʌ i yijñam xñoptʼan, yom miʼ mejlel yambʌ comité judicial come tsiʼ chaʼle tsʼiʼlel jaʼel). Anquese jiñi tsijib xñujpuñel maʼañic mi caj i qʼuejlel bajcheʼ xtsʼiʼlel, jiñi wiñic cabʌl jab maʼañic mi caj i yʌqʼuentel privilegio tac yaʼ ti congregación. Yomto miʼ pijtʌntel chaʼan jiñi lac piʼʌlob mi qʼuextañob chuqui miʼ ñaʼtañob tiʼ tojlel tiʼ caj chuqui tsiʼ mele. Cheʼ jaʼel, yom miʼ qʼuejlel bajcheʼ yilal an jiñi ñaxam bʌ i yijñam yicʼot jiñi i yalobilob pecʼobto bʌ i jabilel (Mal. 2:14-16).

Jiñi xñoptʼañonbʌla yom mi lac lajin Jehová cheʼ bʌ mi laj qʼuel ti chʼujul jiñi ñujpuñel come la cujil jiñi wocol tac muʼ bʌ i yujtel cheʼ bʌ an majqui miʼ chaʼlen i bʌ ti divorciar yicʼot miʼ chaʼ ñujpuñel pero mach cheʼic bajcheʼ miʼ yʌl jiñi Biblia (Ec. 5:4, 5; Heb. 13:4).