ÑUCɅCH i pʼʌtʌlel lac ñopoñel (chʼujbiya). Jumpʼejl ejemplo, anquese Satanás yom i jisan bajcheʼ añonla la quicʼot Jehová, jiñi lac ñopoñel jiñʌch muʼ bʌ i mʌctʌben «i jalʌjb xiba» o i yac tac (Ef. 6:16). Cheʼ jaʼel, miʼ coltañonla chaʼan mi laj cuch wocol tac lajal bʌ bajcheʼ colem bʌ wits. Jesús tiʼ sube jiñi xcʌntʼañob i chaʼan chaʼan mi añob i ñopoñel bajcheʼ i yalʌ bʌcʼ mostaza, muqʼuix caj i mejlel i subeñob jiñi wits chaʼan miʼ tʌtsʼ i bʌ ti yambʌ i yajñib, i mucʼʌch caj i tʌtsʼ i bʌ (Mt. 17:20). Jiñi lac ñopoñel miʼ pʼʌtʼesañonla tiʼ chaʼan bʌ Dios, jin chaʼan, wen cheʼ mi lac tsajin ili cʼajtiya tac: ¿Chuquiyes jiñi ñopoñel? ¿Bajcheʼ yom an lac pusicʼal chaʼan miʼ mejlel lac pʌs? ¿Chuqui yom mi lac mel chaʼan miʼ ñumen pʼʌtʼan jiñi lac ñopoñel? Yicʼot ¿majqui tiʼ tojlel yom mi la cʌcʼ jiñi lac ñopoñel? (Ro. 4:3).

Jiñi lac ñopoñel mach cojach yom i yʌl cheʼ an chuqui mi lac ñop o chaʼan mi la cʌl chaʼan i sujmʌch chuqui miʼ yʌl jiñi Biblia, come yaʼi miʼ yʌl chaʼan jiñi xibajob miʼ ñopob chaʼan añʌch Dios i miʼ bʌcʼñañob (Stg. 2:19). Jin chaʼan, ¿chuquiyes jiñi lac ñopoñel?

Cheʼ bʌ jiñi Biblia miʼ taj ti tʼan lac ñopoñel, an chaʼchajp chuqui yom i yʌl. Ñaxam bʌ, miʼ yʌl chaʼan jiñi am bʌ i ñopoñel «xucʼul i pusicʼal miʼ pijtan» (He. 11:1). Mi añʌch lac ñopoñel, mi lac wen ñop chaʼan pejtelel chuqui miʼ yʌl Jehová i sujmlelʌch yicʼot mi caj i tsʼʌctiyel. Jumpʼejl ejemplo, Dios tiʼ sube jujuntiquil israelitajob ili tʼan: «Muqʼuic i mejlel a jem jini xucʼul bʌ tʼan tsaʼ bʌ c mele yicʼot jini qʼuin yicʼot acʼʌlel, chaʼan miʼ yʌsiyel, chaʼan miʼ xoy i bijlel, cheʼ jini mi mejlel a jem jaʼel jini xucʼul bʌ tʼan tsaʼ bʌ c mele yicʼot c winic David» (Jer. 33:20, 21). ¿Am baʼ bʌcʼña chaʼan jiñi Qʼuin maʼañic mi caj i loqʼuel i cheʼ jiñi maʼañic mi yujtel jiñi qʼuiñil yicʼot acʼʌlel? Mi jatet mucʼʌch a ñop chaʼan mi caj i bej ujtel jiñi sʌcʼajel yicʼot acʼʌlel, ¿mach ba yomic maʼ ñop chaʼan jiñi tsaʼ bʌ i yʌcʼʌ jiñi qʼuiñil yicʼot acʼʌlel mi caj i tsʼʌctesan i tʼan? Cheʼʌchi (Is. 55:10, 11; Mt. 5:18).

I chaʼpʼejlel, jiñi am bʌ i ñopoñel «miʼ ñop tiʼ isujm tal jini mach bʌ tsiquilic» (He. 11:1). Laʼ lac ñaʼtan juntiquil chʼiton muʼ bʌ i cʼajtibeñonla chucoch la cujil chaʼan añʌch jiñi icʼ. Anquese maʼañic qʼuele lac chaʼan jiñi icʼ mach wocolic mi lac tsictesʌben jiñi chʼiton chaʼan tiʼ sujm añʌch, come mi lac jap icʼ, miʼ jatsʼonla yicʼot yan tac bʌ. Cheʼ jiñi chʼiton miʼ cʼotel i chʼʌmben i sujm, mi caj i ñop chaʼan añʌch anquese maʼañic miʼ qʼuel. Lajal jaʼel, jiñi lac ñopoñel chucul ti jiñi cʌmbil bʌ lac chaʼan (Ro. 1:20).

Jiñi lac ñopoñel waʼchocobil ti chuqui cʌmbil lac chaʼan, i chaʼan mi lac taj, ñaxan yom mi laj cʌn «i sujmlel» (1 Ti. 2:4). Pero mach cojach yom mi lac mel (chaʼlen) jiñi. Jiñi apóstol Pablo tiʼ tsʼijbu chaʼan jiñi lac ñopoñel mi lac pʌs «ti lac pusicʼal» (Ro. 10:10). Mach jasʌlic chaʼan mi lac ñop jiñi i sujmlel, ñuc i cʼʌjñibal mi lac chʼʌm ti ñuc. Cheʼ bajcheʼ jiñi, mi caj lac mulan lac pʌs jiñi lac ñopoñel, yom bʌ i yʌl, cheʼ mi lac chumtan jiñi i sujmlel (Stg. 2:20). Jiñi maʼañic bʌ miʼ qʼuel ti ñuc jiñi i sujmlel, tajol maʼañic mi caj i ñop chuqui miʼ cʌntesʌntel come mach yomic i qʼuextan chuqui ñopol  i chaʼan o miʼ sʌclan i tʼan chaʼan i melol i chaʼan bʌ pañimil (mulawil) (2 P. 3:3, 4; Jud. 18). Jin chaʼan, cabʌl wiñicob xʼixicob (quixtañujob) maʼañic tsiʼ tajayob i ñopoñel cheʼ bʌ tsiʼ qʼueleyob milagro tac ti wajali (Nm. 14:11; Jn. 12:37). Jiñi chʼujul bʌ i yespíritu Dios cojach miʼ yʌqʼuen i ñopoñel jiñi muʼ bʌ i cʼuxbiñob i sujmlel yicʼot miʼ tsʼaʼleñob jiñi lot (Gá. 5:22; TNM, 2 Ts. 2:10, 11).

Cabʌl i wiñicob Dios ti wajali tsiʼ pʌsʌyob chaʼan pʼʌtʌlobʌch i ñopoñel ti Dios. Juntiquil jiñʌch jiñi rey David (He. 11:32, 33). Pero mach mejlic la cʌl chaʼan tiʼ pejtelel i familia tsiʼ pʌsʌyob jaʼel. Jumpʼejl ejemplo, jiñi i yʌscun, Eliab, maʼañic tsiʼ pʌsʌ i ñopoñel cheʼ bʌ tsiʼ yʌʼle David chaʼan yom i ñaʼtan chaʼan bajcheʼ woli (choncol) ti pʼajoñel jiñi Goliat (1 S. 17:26-28). Maʼañic majqui toj añix i ñopoñel cheʼ miʼ yilan pañimil, mi jiñicto mi lac chʼʌmben i chaʼan lac tat lac ñaʼ. Jin chaʼan, David tsiʼ wen pʌsʌ i ñopoñel come wen i yamigo Jehová.

Yaʼ ti Salmo 27, David tiʼ tsictesa bajcheʼ tsaʼ mejli i pʼʌtʼesan jiñi i ñopoñel (versículo 1). Tsiʼ wen ñaʼta chuqui ñusʌbil i chaʼan yicʼot bajcheʼ tsiʼ colta Jehová tiʼ tojlel i contrajob (versículo 2 yicʼot 3). Tsiʼ wen qʼuele ti ñuc i tabernáculo Jehová (versículo 4) i miʼ chʼujutesan yaʼi yicʼot yambʌ israelitajob (versículo 6). Tsiʼ wen sʌcla i tojʼesʌntel ti Jehová ti oración (versículo 7 yicʼot 8). I cheʼ jaʼel, tsiʼ mulaj chaʼan Jehová miʼ cʌntesan ajñel tiʼ bijlel (versículo 11). Tsiʼ wen qʼuele ti ñuc jiñi i ñopoñel come tsiʼ cʼajti: «¿Baqui añon wʌle cheʼ machic tsaʼ c ñopo [...]?» (versículo 13, TNM).

Miʼ mejlel lac taj lac ñopoñel lajal bʌ bajcheʼ i chaʼan David mi mucʼʌch lac lajiben i ñaʼtʌbal yicʼot tsaʼ bʌ i mele cheʼ bajcheʼ miʼ tsictesan jiñi Salmo 27. Come jiñi lac chʼujbiya yaʼʌch chucul ti jiñi i sujmlel cʌmbil bʌ lac chaʼan, cheʼ mi lac ñumen pejcan jiñi i Tan Dios yicʼot jiñi lac jun tac, mach wocolic mi caj lac pʌs ili i wut jiñi espíritu (Sal. 1:2, 3). Cheʼ mi lac pejcan jiñi i Tʼan Dios, laʼ la cʌqʼuen i yorajlel chaʼan mi lac wen ñaʼtan, come mi caj i ñijcañonla lac ñumen aqʼuen wocolix i yʌlʌ Jehová. Mi mucʼʌch lac ñumen qʼuel ti ñuc chuqui an i mele Jehová, ñumento la com lac pʌs lac ñopoñel tiʼ chʼujutesʌntel yaʼ ti tempa bʌ tac i mi lac suben jiñi yambʌ quixtañujob chaʼan jiñi lac pijtaya (He. 10:23-25). Mi lac pʌs lac ñopoñel jaʼel cheʼ maʼañic mi laj cʌy lac mel oración i maʼañic baqui ora mi laj cʌy lac bʌ (Lc. 18:1-8). Jin chaʼan, laʼ lac chʌn pejcan ti oración come mi lac ñop chaʼan mucʼʌch i qʼuelonla ti ñuc (1 Ts. 5:17; 1 P. 5:7). Jiñi lac ñopoñel miʼ ñijcañonla chaʼan chuqui mi lac mel, i jiñi muʼ bʌ i cʼotel lac mel, miʼ pʼʌtʼesan lac ñopoñel (Stg. 2:22).

Ti jiñi acʼʌlel, cheʼ mach jalix mi caj i chʌmel (sajtel) Jesús, tiʼ sube jiñi xcʌntʼañob i chaʼan: «Mi laʼ  ñop Dios. Ñopoyon jaʼel» (Jn. 14:1). Jin chaʼan yomʌch mi lac ñop Jesús, mach jiñic jach tiʼ tojlel Jehová. ¿Bajcheʼ? Laʼ laj qʼuel uxchajp bajcheʼ miʼ mejlel lac mel.

Ñaxan, laʼ laj qʼuel jiñi i tojol laj coltʌntel bajcheʼ jumpʼejl majtañʌl tsaʼ bʌ i yʌqʼueyonla Dios ti jujuntiquil. Jiñi apóstol Pablo tsiʼ yʌlʌ: «Wolic taj j cuxtʌlel tiʼ ñopol i Yalobil Dios tsaʼ bʌ i cʼuxbiyon, tsaʼ bʌ i yʌcʼʌ i bʌ ti chʌmel chaʼañon» (Gá. 2:20). Mi an lac ñopoñel ti Jesús, miʼ cʼotel lac ñaʼtan chaʼan jiñi i tojol laj coltʌntel jiñʌch chaʼan ti lac tojlel, ili jiñʌch chaʼan Dios miʼ ñusʌbeñonla lac mul, muʼ bʌ i yʌqʼueñonla lac pijtaya chaʼan mi lac taj laj cuxtʌlel mach bʌ añic miʼ jilel yicʼot jiñʌch bajcheʼ tsiʼ ñumen pʌsʌ Dios chaʼan miʼ cʼuxbiñonla (Ro. 8:32, 38, 39; Ef. 1:7). Iliyi mi caj i yʌqʼueñonla lac pʼʌtʌlel chaʼan maʼañic mi la cʌcʼ ochel ti lac pensar mach tac bʌ weñic (2 Ts. 2:16, 17).

I chaʼpʼejlel, laʼ lac lʌcʼtesan lac bʌ ti Jehová ti oración cheʼ mi lac chʼʌm ti ñuc jiñi i cuxtʌlel tsaʼ bʌ i yʌcʼʌ Jesús. Wocolix i yʌlʌ chaʼan i tojol laj coltʌntel, miʼ mejlel lac pejcan Jehová ti oración chaʼan mi lac pʼuntʌntel yicʼot mi laj coltʌntel tiʼ yutslel i pusicʼal cheʼ mi lac taj wocol (He. 4:15, 16; 10:19-22). Jiñi oración jiñʌch muʼ bʌ i coltañonla chaʼan maʼañic mi lac yajlel ti mulil (Lc. 22:40).

I yuxpʼejlel, laʼ lac jacʼben i tʼan Jesús. Jiñi apóstol Juan tiʼ tsʼijbu chaʼan jiñi muʼ bʌ i ñop i Yalobil Dios miʼ taj i cuxtʌlel mach bʌ añic miʼ jilel, i chaʼan jiñi muʼ bʌ i ñusʌben i tʼan, mach mejlic i yʌqʼuentel i cuxtʌlel, mucʼ jach i yajñel tiʼ michʼlel Dios (Jn. 3:36, TNM). Miʼ cʼotel laj qʼuel chaʼan jiñi apóstol Juan tsiʼ yʌlʌ chaʼan jiñi lac ñopoñel miʼ taj i bʌ yicʼot cheʼ mi lac jacʼ tʼan. Jin chaʼan, mi lac pʌs lac ñopoñel ti Jesús cheʼ mi lac jacʼben i tʼan. I mi lac jacʼben i tʼan cheʼ mi lac chuc lac bʌ tiʼ «mandar Cristo», yom i yʌl, pejtelel chuqui tsiʼ cʌntesa yicʼot chuqui tiʼ subeyonla lac mel (Gá. 6:2). Cheʼ jaʼel, mi lac jacʼben i tʼan cheʼ mi lac jacʼ chuqui miʼ subeñonla jiñi «xucʼul bʌ xʼeʼtel» (Mt. 24:45). Mi mucʼʌch lac mel chuqui miʼ subeñonla Jesús, mi caj lac taj lac pʼʌtʌlel chaʼan mi laj cuch jiñi wocol tac lajal bʌ bajcheʼ icʼ jaʼal (Lc. 6:47, 48).

Ti jumpʼejl bʌ qʼuin, juntiquil wiñic tiʼ sube Jesús: «Chʌncox chʼujbiñet. Cotyañon chaʼan mic más chʼujbiñet» (Mr. 9:24, Jini wen bʌ tʼan). Ili wiñic tsiʼ pʌsʌ chaʼan añʌch i ñopoñel, pero tsiʼ pʌsʌ i pecʼlel i tsiʼ yʌlʌ chaʼan yomto miʼ ñumen taj. Cheʼ bajcheʼ ili wiñic, ti lac pejtelel yomʌch mi lac ñumen pʌs lac ñopoñel cheʼ an chuqui mi lac ñusan. I ti lac pejtelel miʼ mejlel lac pʼʌtʼesan ili ora. Cheʼ bajcheʼ tsaʼ laj qʼuele, miʼ mejlel lac mel cheʼ mi lac pejcan jiñi i Tʼan Dios i mi lac wen ñaʼtan, cheʼ bajcheʼ jiñi mi caj lac ñumen aqʼuen wocolix i yʌlʌ Jehová. Jiñi lac ñopoñel miʼ ñumen pʼʌtʼan cheʼ mi lac tem chʼujutesan yicʼot la quermañujob, cheʼ mi lac suben yambʌlob jiñi lac pijtaya i mi lac chʌn chaʼlen oración. Cheʼ mi lac mel ili tac chaʼan mi lac xucʼchocon lac ñopoñel, mi lac taj ñuc bʌ lac majtan: Mi la cajñel tiʼ cʼuxbiya Dios (Jud. 20, 21).