1. ¿Chuqui la com chaʼan miʼ melob jiñi lac familia?

JUNTIQUIL hermana i cʼabaʼ Pauline * miʼ yʌl: «Cʼʌlʌl cheʼ tsaʼ j cʌñʌ jiñi i sujmlel tsaʼ c mulaj chaʼan tiʼ pejtelel c familia miʼ yajñelob quicʼot ti paraíso. Ñumento cheʼ jiñi c ñoxiʼal Wayne yicʼot calobil mic tem melben lon i yeʼtel (troñel) Jehová». Mi an lac familia maxto bʌ i cʌñʌyic Dios yicʼot maxto añic miʼ cʼuxbiñob, tajol cheʼ mi la cubin lac bʌ bajcheʼ Pauline.

2. ¿Baqui bʌ cʼajtiya tac mi caj lac jacʼ ti ili temaj?

² Maʼañic miʼ mejlel lac xicʼ jiñi lac familia chaʼan miʼ jacʼob jiñi i sujmlel. Pero mejlʌch laj coltañob chaʼan miʼ ñumen mulañob i ñʌchʼtan jiñi wen tʼan am bʌ ti Biblia (2 Ti. 3:14, 15). ¿Chucoch yom mi lac subeñob wen tʼan jiñi lac familia? ¿Chucoch yom mi lac chʼʌmben i sujm bajcheʼ miʼ yubiñob i bʌ? ¿Chuqui miʼ mejlel lac mel chaʼan miʼ cʼotel i cʼuxbiñob Jehová bajcheʼ joñonla? Yicʼot ¿bajcheʼ miʼ mejlel i coltañoñobla jiñi hermanojob? Ti ili temaj mi caj lac jacʼ ili cʼajtiya tac.

3. Cheʼ bajcheʼ miʼ yʌl 2 Pedro 3:9, ¿chucoch yom mi lac subeñob wen tʼan jiñi lac familia?

³ Mach jalix yom chaʼan Jehová miʼ jisan i pañimil (mulawil) Satanás. Cojach mi caj i coltʌntelob «jiñi yomoʼ bʌ i taj i cuxtʌlel mach bʌ añic miʼ jilel» (Hch. 13:48, TNM). Mi lac chaʼlen wersa yicʼot mi la cʌqʼuen i yorajlel chaʼan mi lac suben wen tʼan jiñi wiñicob xʼixicob (quixtañujob) añoʼ bʌ ti lac lumal, jin chaʼan la  comʌch jaʼel chaʼan jiñi lac familia miʼ melbeñob (chaʼlibeñob) i yeʼtel Jehová. Jiñi cʼuxbibil bʌ lac Tat am bʌ ti panchan «mach yomic miʼ sajtel mi juntiquilic. Yom mi laj cʌy lac mul ti lac pejtelel» (pejcan 2 Pedro 3:9).

4. ¿Chuqui mach bʌ weñic miʼ mejlel i cʼotel lac mel cheʼ mi lac suben wen tʼan juntiquil ti lac familia?

⁴ Yom mi laj cʼajtesan chaʼan wen jach bajcheʼ miʼ mejlel lac sub jiñi wen tʼan, pero an i tajol mach cheʼic mi lac mel. Tajol ti uts bʌ tʼan mi lac suben wen tʼan juntiquil mach bʌ laj cʌñʌyic, pero ñumen tsʌts bajcheʼ mi lac subeñob jiñi lac familia.

5. ¿Chuqui yom cʼajal lac chaʼan cheʼ baʼ ora mi lac subeñob wen tʼan jiñi lac familia?

⁵ Cheʼ mi laj cʼajtesan bajcheʼ tsaʼ lac subeyon wen tʼan jiñi lac familia ti ñaxan, tajol miʼ cʼotel lac ñaʼtan chaʼan mach weñic bajcheʼ tsaʼ lac mele i chaʼan ñumen wento bajcheʼ tsaʼ lac mele yomic. Jiñi apóstol Pablo tsiʼ yʌqʼue jiñi xñoptʼañob ili ticʼojel: «Tiʼ pejtelel ora chaʼlenla uts bʌ tʼan am bʌ i yʌtsʼmil yubil. Ñaʼtanla bajcheʼ yom mi laʼ jacʼben i tʼan jujuntiquil» (Col. 4:5, 6). Yom mi laj cʼajtesan ili tʼan tac cheʼ baʼ ora mi lac chaʼlen tʼan la quicʼot juntiquil ti lac familia. Mi mach cheʼiqui, tajol miʼ mejlel lac ñajtʼesañob ti jiñi i sujmlel i mach chaʼañic mi lac lʌcʼtesañob.

6, 7. Acʼʌ jumpʼejl ejemplo muʼ bʌ i pʌs chaʼan ñucʌch i cʼʌjñibal cheʼ juntiquil ñujpuñem bʌ miʼ chʼʌmben i sujm bajcheʼ miʼ yubin i bʌ i piʼʌl.

⁶ Laʼ lac pʌs chaʼan la cujil ubintel bajcheʼ miʼ yubiñob i bʌ. Pauline jiñi tsaʼ bʌ lac taj ti tʼan miʼ yʌl: «Ti ñaxan, com jach cʌl i chaʼan bʌ Dios quicʼot c ñoxiʼal. Maʼañic chuqui yambʌ mi lon c taj ti tʼan». Pero, Wayne tsʼitaʼ jach yujil i chaʼan bʌ Biblia i maʼañic miʼ ñaʼtan chuqui miʼ tsictesʌben. Tsaʼ cʼoti i ñaʼtan chaʼan Pauline cojach yaʼan tiʼ jol i ñopbal. Tsiʼ bʌcʼña chaʼan  tsiʼ yotsa i bʌ ti jumpʼejl ñopbalʌl wen bʌbʌqʼuen bʌ i chaʼan woli (choncol) i lotintel.

⁷ Pauline miʼ yʌl chaʼan cojach miʼ ñusan jujumpʼejl ochʼajel qʼuin yicʼot tiʼ yujtibal semana yicʼot jiñi hermanojob yaʼ ti tempa bʌ tac, ti subtʼan yicʼot cheʼ miʼ julaʼtañob tiʼ yotot. Miʼ yʌl: «An i tajol cheʼ baqui ora miʼ cʼotel Wayne ti lon cotot maʼañic majqui an yicʼot i bajñel jach miʼ yubin i bʌ». Tiʼ sujm, Wayne yom chaʼan jiñi i yijñam yicʼot i yalobil yaʼañob yicʼot. Mach i cʌñʌyic jiñi hermanojob i tsaʼ cʼoti i ñaʼtan chaʼan Pauline cojach miʼ ñumen chʼʌm ti ñuc jiñi tsijiʼ bʌ i yamigojob bajcheʼ tiʼ tojlel. Jin chaʼan tsiʼ cʼajtibe jiñi divorcio. Tiʼ sujm, i wentʌlel tsiʼ ñumen chʼʌmʌ ti ñuc bajcheʼ miʼ yubin i bʌ i ñoxiʼal.

8. Cheʼ bajcheʼ miʼ yʌl 1 Pedro 3:1, 2, ¿chuqui tajol miʼ caj i ñumen qʼuel jiñi lac familia ti lac tojlel?

⁸ Laʼ lac pʌs wen tac bʌ lac melbal. An i tajol, jiñi lac familia jiñʌch miʼ ñumen qʼuelob muʼ bʌ lac mel, mach jiñic chuqui mi la cʌl (pejcan 1 Pedro 3:1, 2). Jiñʌch tsaʼ bʌ cʼoti i ñaʼtan Pauline. Miʼ yʌl: «Mic ñaʼtan chaʼan Wayne miʼ cʼuxbiñon lon yicʼot chaʼan tiʼ sujmlel mach yom jiñi divorcio. Pero jiñi tsaʼ bʌ i subeyon tsiʼ yʌqʼueyon c chʼʌmben i sujm chaʼan yom mic tech c pʌs c melbal bajcheʼ miʼ subeñon Jehová. Maʼix tsaʼ caji c wen chaʼlen tʼan, yom jach mic pʌsben wem bʌ c melbal». Jin chaʼan, tsiʼ cʌyʌ i xicʼ i ñoxiʼal i yʌl i chaʼan bʌ Biblia i tsiʼ teche tʼan yicʼot chaʼan muʼ bʌ i ñusan ti jujumpʼejl qʼuin. Wayne tsiʼ qʼuele chaʼan jiñi i yijñam tsaʼ caji i ñumen pʌs i yutslel yicʼot jiñi i yalobil maʼañic miʼ ñusan tʼan (Pr. 31:18, 27, 28). Cheʼ bʌ tsiʼ qʼuele chaʼan wen an jiñi familia chaʼan i cʌmbal ti Biblia, tsaʼ caji i mulan i ñʌchʼtan jiñi wen tan (1 Co. 7:12-14, 16).

9. ¿Chucoch mach yom mi laj cʌy laj coltan jiñi lac familia?

 ⁹ Mach laj cʌy laj coltañob. Jehová jiñʌch muʼ bʌ i yʌqʼueñonla wem bʌ ejemplo. Mach junyajlic jach miʼ coltan jiñi quixtañujob chaʼan miʼ jacʼob o miʼ ñopob jiñi wen tʼan i miʼ tajob i cuxtʌlel (Jer. 44:4). Jiñi apóstol Pablo tiʼ sube jiñi Timoteo chaʼan mach yomic miʼ cʌy i coltan jiñi yambʌlob come cheʼ bajcheʼ jiñi mi caj i coltan i bʌ yicʼot jiñi muʼ bʌ i ñʌchʼtañob (1 Ti. 4:16). Mi laj cʼuxbin jiñi lac familia jin chaʼan la com chaʼan miʼ cʌñob jiñi i sujmlel am bʌ ti Biblia. Cheʼ bajcheʼ tiʼ tojlel Pauline jiñi i tʼan yicʼot i melbal tsiʼ colta jiñi i familia. Ili ora wen tijicña come temel yicʼot i ñoxiʼal miʼ melbeñob i yeʼtel Jehová, precursorob tiʼ chaʼticlelob i jiñi Wayne añix bajcheʼ anciano.

10. ¿Chucoch yomʌch la cujil pijt?

¹⁰ Yom la cujil pijt. Cheʼ mi lac tech lac mel ti laj cuxtʌlel muʼ bʌ i yʌl jiñi Biblia, jiñi lac familia tajol wocol miʼ yubiñob chaʼan miʼ ñʌmʼañob ti chuqui ñopol lac chaʼan yicʼot bajcheʼ chumulonla. Tiʼ pejtelel ora muʼ bʌ i ñaxan qʼuelob jin cheʼ maʼañix mi lac mel la quicʼotob jiñi qʼuiñijel tac muʼ bʌ i melob tiʼ ñopbal yicʼot cheʼ maʼañix mi la cotsan lac bʌ ti política. Tiʼ tejchibal, tajol an muʼ bʌ i michʼ qʼueloñobla (Mt. 10:35, 36). Pero mach yomic mi lac ñaʼtan chaʼan maʼañic baʼ ora mi caj i qʼuextañob i melbal. Mi tsaʼ laj cʌyʌ laj coltañob chaʼan miʼ cʼotel i chʼʌmbeñob i sujm chuqui ñopol lac chaʼan, tsaʼix lac bajñel alʌ ti lac pusicʼal chaʼan mach yomic miʼ tajob jiñi cuxtʌlel maʼañic bʌ i jilibal. Jehová tsiʼ yʌcʼʌ tiʼ tojlel Jesús chaʼan miʼ chaʼlen meloñel, mach joñonicla (Jn. 5:22). Mi la cujilʌch pijt, tajol jiñi lac familia mi caj i ñumen mulañob i ñʌchʼtan jiñi wen tʼan (qʼuele jiñi recuadro « Laʼ laj cʼʌn jiñi lac página chaʼan Internet»).

11-13. ¿Chuqui mi laj cʌn tiʼ tojlel Alice chaʼan bajcheʼ tsiʼ mele tiʼ tojlel i tat i ñaʼ?

¹¹ Yom utsonla, pero mach la cʌcʼ ti qʼuextʌyel chuqui tsaʼ lac yajca. (Pr. 15:2). Laʼ laj qʼuel ili ejemplo i chaʼan Alice. Tsiʼ cʌñʌ i sujmlel ti yambʌ país cheʼ mach yaʼic chumul yicʼot i tat i ñaʼ, maʼañic bʌ miʼ ñopob Dios yicʼot wen ochemob tiʼ chaʼan bʌ política. Tsiʼ chʼʌmbe i sujm chaʼan yom miʼ subeñob ti ora chaʼan jiñi wen tac bʌ woli (yʌquel) bʌ i cʌñeʼ. Alice miʼ yʌl: «Mi muʼto a pijtan chaʼan maʼ tsictesʌbeñob chaʼan jiñi tsijiʼ bʌ a ñopbal yicʼot a melbal, maʼañic mi caj i ñumen mulañob jiñi a familia». Jin chaʼan, tiʼ tsʼijbube carta tac jiñi i tat i ñaʼ chaʼan miʼ cʼajtibeñob chuqui miʼ ñaʼtañob tiʼ chaʼan tac bʌ Biblia, bajcheʼ jiñi cʼuxbiya, come miʼ pijtan chaʼan miʼ cʼotel i mulañob (1 Co. 13:1-13). Alice miʼ yʌqʼueñob wocolix i yʌlʌ chaʼan tsiʼ cosayob yicʼot tsiʼ cʌntayob, i miʼ chocbeñob majlel majtañʌl tac. Cheʼ baqui ora miʼ julaʼtañob, miʼ chaʼlen wersa chaʼan miʼ coltan jiñi i ñaʼ ti chuqui yom melol tiʼ yotot. Pero ti ñaxan, jiñi i tat i ñaʼ maʼañic tsiʼ mulayob cheʼ baqui ora tiʼ subeyob jiñi tsijiʼ bʌ i ñopbal.

¹² Cheʼ bʌ yaʼto chumul yicʼot i tat i ñaʼ, tiʼ pejtelel ora miʼ pejcan i Biblia. Alice miʼ yʌl chaʼan jiñʌch tsaʼ bʌ i colta i ñaʼ chaʼan miʼ chʼʌmben i sujm chucoch ñucʌch cʼʌjñibal tiʼ tojlel i chaʼan bʌ Biblia. Cheʼ jaʼel, jiñi i tat tsaʼ caji i tsʼitaʼ cʌn i chaʼan bʌ Biblia chaʼan miʼ cʼotel i chʼʌmben i sujm chuqui miʼ ñaʼtan i yixicʼal yicʼot chaʼan miʼ taj mach bʌ tojic ti Biblia. Alice miʼ yʌl: «Tsaʼ cʌqʼue jumpʼejl Biblia yicʼot tsaʼ c tsʼijbube tʼan tac muʼ bʌ i cʼotel tiʼ pusicʼal». ¿Chuqui tsaʼ cʼoti ti ujtel? Jiñi i tat maʼañic chuqui lecoj tsaʼ cʼoti i taj, cojach tsaʼ toj sajti i pusicʼal chaʼan tsaʼ bʌ cʼoti i pejcan.

¹³ Yom utsonla, pero mach la cʌcʼ ti qʼuextʌyel chuqui tsaʼ lac yajca lac mel anquese mi lac taj wocol tac (1 Co. 4:12b). Jumpʼejl ejemplo, Alice tsiʼ lʌtʼʌ i contrajintel tiʼ tojlel i ñaʼ. Miʼ yʌl: «Cheʼ baqui ora tsaʼ c chʼʌmʌ jaʼ, jiñi c mamá tiʼ subeyon chaʼan juntiquiloñʌch xñusatʼan». ¿Chuqui tsiʼ mele Alice? Miʼ  bej al: «Maʼañic tsaʼ j qʼuextʌbe i tʼan, tic sube chaʼan tsaʼ c yajca ochel bajcheʼ i testigo Jehová i chaʼan maʼañic mi caj c yʌn jiñi c tʼan. Tsaʼ c sube chaʼan mic wen cʼuxbin. Ti lon c chaʼticlel tsaʼ lon c chaʼle uqʼuel yicʼot tsaʼ c chajpʌbe wen sumuc bʌ bʌlñʌcʼʌl. Ti jiñi bʌ ora, tsaʼ cʼoti i ñaʼtan jiñi c mamá chaʼan jiñi Biblia tiʼ sujtesayon ti wem bʌ quixtañu».

14. ¿Chucoch mach yomic mi lac jacʼ lac mel cheʼ an chuqui miʼ xicʼbeñonla jiñi lac familia?

¹⁴ Tajol mach ti orajic mi caj i ñumen chʼʌmbeñob i sujm jiñi lac familia chucoch mi laj qʼuel ti ñuc i melol i yeʼtel Jehová. Jumpʼejl ejemplo, cheʼ baqui ora Alice tsiʼ ñaʼta ochel bajcheʼ precursora, i mach jiñic cheʼ miʼ majlel ti qʼueljun baqui tsiʼ yajcʌbeyob i tat i ñaʼ, jiñi i ñaʼ tsiʼ chaʼ chaʼle uqʼuel. Pero Alice chʌn xucʼul tsaʼ ajñi. Miʼ yʌl: «Mi tsaʼ wʌcʼʌ chaʼan jiñi a familia miʼ qʼuextañob chuqui maʼ yajcan a mel, cheʼʌch mi caj i bej melob. Pero mi mucʼʌch a tsictesʌbeñob jiñi tsaʼ bʌ a yajca a mel ti uts bʌ tʼan yicʼot ti a xucʼtʌlel tajol an muʼ bʌ caj i ñʌchʼtañetob». Jiñʌch tsaʼ bʌ ujti tiʼ tojlel. Wʌle bʌ ora jiñi i tat i ñaʼ añob bajcheʼ precursor, i jiñi i tat an bajcheʼ anciano jaʼel.

15. Cheʼ bajcheʼ miʼ yʌl Mateo 5:14-16 yicʼot 1 Pedro 2:12, ¿bajcheʼ miʼ mejlel i coltan jiñi lac familia jiñi wem bʌ i melbal jiñi hermanojob?

¹⁵ Jehová miʼ cʼʌn jiñi wem bʌ i melbal i wiñicob chaʼan miʼ pʌy ochel tiʼ sujmlel jiñi wiñicob xʼixicob (pejcan Mateo 5:14-16; 1 Pedro 2:12). Mi jiñi a piʼʌl mach i testigojic Jehová, ¿i cʌñʌyoʼ ba jiñi hermanojob yaʼ ti congregación? Pauline tsaʼ bʌ la cʌlʌ ti ñaxan, tsiʼ pʌyʌ jiñi hermanojob tiʼ yotot chaʼan jiñi Wayne miʼ cʼotel i cʌñob. Wayne miʼ cʼajtesan bajcheʼ tsiʼ  colta juntiquil hermano chaʼan mach lecojic miʼ qʼuel jiñi hermanojob. Miʼ tsictesan: «Tsiʼ cʼajti jumpʼejl qʼuin tiʼ yeʼtel chaʼan mij qʼuelon xʼalas. Tsaʼ cʼoti j cʌn chaʼan añʌch yambʌ tac chuqui miʼ mulan, mach cojach jiñi i ñopbal».

16. ¿Chucoch yom mi lac pʌyob majlel ti tempa bʌ tac jiñi lac familiajob?

¹⁶ Junchajp bajcheʼ miʼ mejlel laj coltan jiñi lac familiajob jiñʌch cheʼ lac pʌyob majlel ti tempa bʌ (1 Co. 14:24, 25). Jiñi ñaxan tempa bʌ baqui tsajñi jiñi Wayne jiñʌch tiʼ Cʼajtesʌntel i chʌmel Jesús come loqʼuemix tiʼ yeʼtel i maʼañic miʼ wen jalʼan. Miʼ tsictesan: «Maʼañic tsaʼ c wen chʼʌmbe i sujm chuqui tsaʼ ajli, pero cʼajal c chaʼan chuqui tsiʼ meleyob tic tojlel. Tsiʼ lʌcʼtesayob i bʌ baʼañon yicʼot tsʌts tsiʼ chucuyob j cʼʌb. Tsaʼ cʼoti j qʼuel chaʼan wem bʌ quixtañujob». Jumpʼejl xñujpuñel i cʼabaʼ Armando yicʼot Rosalinda yaʼ ti congregación tsiʼ wen colta jiñi Pauline i cʌntan i yalobil cheʼ ti tempa bʌ yicʼot ti subtʼan. Jin chaʼan, cheʼ bʌ jiñi Wayne tsaʼix i mulaj i ñumen cʌmben chaʼan i ñopbal jiñi Pauline, tsiʼ cʼajtibe jiñi hermano Armando chaʼan miʼ yʌqʼuen cʌntesʌntel am bʌ ti Biblia.

17. ¿Chuqui jiñi mach bʌ yomic mi lac ñaʼtan chaʼan lac mul, pero chucoch mach yomic mi laj cʌy laj coltan jiñi lac familiajob?

¹⁷ Mi lac pijtan chaʼan ti jumpʼejl bʌ qʼuin tiʼ pejtelel lac familia miʼ melbeñob i yeʼtel Jehová. Pero i sujmlelʌch jaʼel, anquese mi lac mel tiʼ pejtelel chaʼan bajcheʼ mi laj coltañob, tajol maʼañic baʼ ora miʼ yochelob tiʼ sujmlel. Mi cheʼ miʼ yujtel bajcheʼ iliyi, mach yomic mi lac ñaʼtan chaʼan lac mul muʼ bʌ i yajcañob. Come maʼañic majqui miʼ mejlel lac xicʼ chaʼan miʼ jacʼob chuqui ñopol lac chaʼan. Pero mach lac ñaʼtan chaʼan maʼañic miʼ mejlel i coltañob cheʼ miʼ qʼueloñobla chaʼan tijicñayonla woli lac melben i yeʼtel Jehová. Laʼ lac tajob ti oración, laʼ lac subeñob jiñi i sujmlel ti uts bʌ tʼan yicʼot mach lac ñaʼtan chaʼan maʼix mi caj laj coltañob (Hch. 20:20). Laʼ lac ñop chaʼan Jehová mi caj i yʌqʼueñonla bendición cheʼ mi lac chaʼlen wersa. I mi jiñi lac familia miʼ yajcan i ñʌchʼtañoñobla, mi caj i tajob i coltʌntel.