TEMAJ CHAʼAN ESTUDIO 32
Laʼ pʼojlic jiñi laj cʼuxbiya
«Ili jiñʌch woli bʌ c bej cʼajtin ti oración, chaʼan miʼ ñumen pʼojlel laʼ cʼuxbiya» (FIL. 1:9, TNM).
CʼAY 106 Laʼ lac pʌs isujm bʌ laj cʼuxbiya
MUʼ BɅ CAJ I QʼUEJLEL *
1. ¿Majqui tsiʼ chaʼleyob coltaya chaʼan miʼ waʼchocontel jiñi congregación ti Filipos?
CHEʼ bʌ jiñi apóstol Pablo, Silas, Lucas yicʼot Timoteo tsaʼ cʼotiyob ti Filipos tsiʼ tajayob cabʌl wiñicob xʼixicob (quixtañujob) yomoʼ bʌ i ñʌchʼtan jiñi wen tʼan chaʼan i Yumʌntel Dios. Ili chʌntiquil chʼejl bʌ xñoptʼañob tsiʼ yʌcʼʌyob i coltaya chaʼan miʼ waʼchocontel jumpʼejl congregación ti jiñi tejclum. Jiñi tsijiʼ bʌ xñoptʼañob tsaʼ caji i tempañob i bʌ, tajol yaʼ tiʼ yotot juntiquil xñoptʼan i cʼabaʼ Lidia wen am bʌ i yutslel pusicʼal (Hch. 16:40).
2. ¿Chuqui ti wocol tac tsiʼ waʼ ñusayob jiñi tsijiʼ bʌ xñoptʼañob añoʼ bʌ ti Filipos?
2 Jiñi tsijiʼ bʌ congregación ti ora tsaʼ caji i waʼ ñusan wocol tac. Satanás tsiʼ chaʼle wersa chaʼan jiñi mach bʌ añobic tiʼ sujmlel miʼ contrajiñob jiñi chʌntiquil xñoptʼañob tiʼ subol jiñi wen tʼan. Jiñi añoʼ bʌ i yeʼtel tsiʼ chucuyob majlel jiñi Pablo yicʼot Silas, tsaʼ wen jajtsʼiyob yicʼot tsaʼ otsʌntiyob ti cárcel. Cheʼ tiʼ yijcʼʌlel tsaʼ locʼsʌntiyob. ¿Chuqui tsiʼ meleyob cheʼ bʌ librejobix? Tsaʼ majli i julaʼtañob jiñi tsijiʼ bʌ xñoptʼañob yicʼot tsiʼ wen ñuqʼuesʌbeyob i pusicʼal. Ti wiʼil, tsaʼ loqʼuiyob majlel ti jiñi tejclum yicʼot Timoteo, pero jiñi Lucas tajol tsaʼ cʌyle. ¿Chuqui tsiʼ meleyob jiñi tsijiʼ bʌ xñoptʼañob? Tiʼ coltaya jiñi chʼujul bʌ espíritu, tsiʼ bej melbeyob i yeʼtel (troñel) Jehová (Fil. 2:12). Jin chaʼan, Pablo tsaʼʌch i wen taja i tijicñʌyel tiʼ tojlelob.
3. Cheʼ bajcheʼ miʼ yʌl Filipenses 1:9-11 (TNM), ¿chuqui tsiʼ cʼajti Pablo ti oración?
3 Cheʼ bʌ ñumeñix 10 jab, Pablo tiʼ tsʼijbubeyob jumpʼejl carta. Cheʼ bʌ mi lac pejcan, ti ora miʼ cʼotel laj qʼuel bajcheʼ cʼamel tsiʼ cʼuxbi jiñi hermanojob. Tiʼ subeyob chaʼan mi wen cʼajtesañob yicʼot chaʼan ‹tiʼ pejtelel i pusicʼal miʼ wen cʼuxbiñob tiʼ pejtelelob yicʼot i cʼuxbiya Jesucristo› (Fil. 1:8). Cheʼ jeʼel, tsiʼ yʌlʌ chaʼan miʼ mel oración tiʼ tojlelob. Miʼ cʼajtiben Jehová chaʼan miʼ coltañob i pʼojlesañob i cʼuxbiya, chaʼan miʼ ñaʼtañob chuqui tac ñumen ñuc bʌ i cʼʌjñibal, chaʼan maʼañic miʼ tajtʌlob i mul, chaʼan maʼañic miʼ yʌcʼob ti yajlel yambʌlob yicʼot chaʼan mi bej bujtʼelob i pusicʼal tiʼ wut chuqui toj bʌ. Tiʼ sujm, mi lac ñop chaʼan ili ora jaʼel miʼ mejlel i wen coltañonla i tʼan tac jiñi Pablo (pejcan Filipenses 1:9-11, TNM). * Ti ili temaj, mi caj laj qʼuel jiñi tsaʼ bʌ i taja tac ti tan yicʼot bajcheʼ miʼ mejlel lac mel ti laj cuxtʌlel.
LAʼ PʼOJLIC JIÑI LAJ CʼUXBIYA
4. a) Cheʼ bajcheʼ miʼ yʌl 1 Juan 4:9, 10, ¿bajcheʼ an i pʌsʌ Jehová chaʼan mi cʼuxbiñonla? b) ¿Bajcheʼ cʼamel yom mi laj cʼuxbin Dios?
4 Jehová tsiʼ pʌsbeyonla jiñi ñuc bʌ i cʼuxbiya cheʼ tiʼ choco tilel i Yalobil ila ti Pañimil (mulawil) chaʼan miʼ toj lac mul (pejcan 1 Juan 4:9, 10). Jiñi i cʼuxbiya miʼ ñijcañonla laj cʼuxbin (Ro. 5:8). ¿Bajcheʼ cʼamel yom mi laj cʼuxbin Dios? Jesús tsiʼ jacʼʌ ili cʼajtiya cheʼ bʌ tiʼ sube jiñi fariseo: «Cʼuxbin a Yum Dios tiʼ pejtelel a pusicʼal, ti pejtelel a chʼujlel [«cuxtʌlel», TNM], ti pejtelel a ñaʼtʌbal» (Mt. 22:36, 37). La com laj cʼuxbin Dios tiʼ pejtelel lac pusicʼal. La com chaʼan ti jujumpʼejl qʼuin miʼ bej pʼʌtʼan majlel laj cʼuxbiya tiʼ tojlel. Pablo tiʼ subeyob jiñi añoʼ bʌ ti Filipos chaʼan yom miʼ ñumen p’ojlelob i cʼuxbiya. ¿Chuqui miʼ mejlel lac mel chaʼan mi lac ñumen pʼʌtʼesan laj cʼuxbiya ti Dios?
5. ¿Chuqui miʼ mejlel lac mel chaʼan miʼ ñumen pʼʌtʼan majlel laj cʼuxbiya ti Dios?
5 Yom mi laj cʌñeʼ Dios chaʼan miʼ cʼotel laj cʼuxbin. Jiñi Biblia miʼ yʌl: «Jini mach bʌ yujilic cʼuxbiya mach i cʌñʌyic Dios. Come cʼuxbiyajʌch Dios» (1 Jn. 4:8). Jiñi apóstol Pablo tsiʼ yʌlʌ chaʼan jiñi laj cʼuxbiya miʼ pʼʌtʼan cheʼ baqui ora mi lac taj ‹cabʌl lac ñaʼtʌbal› tiʼ chaʼan bʌ Jehová yicʼot ‹mi lac chʼʌmben i sujm ti tsʼʌcʌl› chuqui miʼ ñaʼtan (Fil. 1:9, TNM). Cheʼ baqui ora tsaʼ lac teche laj cʌn chuqui miʼ yʌl jiñi Biblia, tsaʼ laj cʌñʌ bajcheʼ yilal Dios, i jiñi tsiʼ ñijcayonla laj cʼuxbin. Pero jiñi laj cʼuxbiya tsaʼ bej coli cheʼ bʌ tsaʼ lac ñumen cʌñʌ majlel bajcheʼ yilal yicʼot jiñi utsʼatax bʌ i melbal (chaʼlebal). Jin chaʼan, cheʼ mi lac pejcan i Tʼan Dios yicʼot mi lac wen ñaʼtan ñucʌch i cʼʌjñibal lac chaʼan (Sal. 77:12).
6. Cheʼ bajcheʼ miʼ yʌl 1 Juan 4:11, 20, 21, ¿majqui yom mi laj cʼuxbiñob jaʼel chaʼan miʼ pʼojlel jiñi laj cʼuxbiya?
6 Jiñi ñuc bʌ i cʼuxbiya Dios ti lac tojlel miʼ ñijcañonla chaʼan mi laj cʼuxbin jiñi hermanojob (pejcan 1 Juan 4:11, 20, 21). Tajol mi lac ñaʼtan chaʼan jiñi laj cʼuxbiya mi caj i bajñel colel come mi lac melben i yeʼtel Jehová yicʼot mi lac lajiben i melbal tac. Cheʼ jaʼel, mi lac tsajcʌben i melbal Jesús, tsaʼ bʌ i wen cʼuxbiyonla yicʼot tsaʼ bʌ i yʌcʼʌ i cuxtʌlel ti lac tojlel. Pero tiʼ sujm, an i tajol wocol mi la cubin chaʼan mi lac jacʼ jiñi mandar chaʼan yom mi laj cʼuxbin lac bʌ ti jujuntiquil. Laʼ laj qʼuel chuqui tsaʼ ujti yaʼ ti congregación i chaʼan Filipos.
7. ¿Chuqui miʼ cʌntesañonla jiñi ticʼojel i chaʼan Pablo tsaʼ bʌ i yʌqʼue Evodia yicʼot Síntique?
7 Jiñi Evodia yicʼot Síntique chaʼtiquil chʼejl bʌ hermanajob tsaʼ bʌ i «chaʼleyob eʼtel» yicʼot jiñi apóstol Pablo. Pero tajol tsaʼ michʼayob, i mach i chʌn yamigajobix i bʌ. Pablo tsiʼ tajayob ti tʼan tiʼ carta yicʼot tsiʼ yʌqʼueyob tsʌts bʌ ticʼojel. Tiʼ subeyob chaʼan yom jumpʼejlob jach i pusicʼal o ñaʼtʌbal (Fil. 4:2, 3). Jiñi apóstol Pablo tsiʼ qʼuele chaʼan i cʼʌjñibal miʼ suben jaʼel jiñi congregación: «Melela tiʼ pejtelel laʼ pusicʼal. Mach yomic mi laʼ chaʼlen wulwul tʼan mi aʼleya» (Fil. 2:14). Tiʼ sujm, ili tsʌts bʌ ticʼojel tac tsiʼ colta chaʼan ili xucʼul bʌ hermanajob yicʼot jiñi congregación miʼ pʼʌtʼesañob i cʼuxbiya.
¿Chucoch yom mi laj qʼuel chuqui wem bʌ miʼ melob yambʌlob? (Qʼuele jiñi párrafo 8). *
8. ¿Chuqui miʼ mejlel i yʌcʼ chaʼan wocol mi la cubin chaʼan mi laj cʼuxbin la quermañojob, i bajcheʼ miʼ mejlel lac mʌlben ili wocol?
8 Cheʼ bajcheʼ tsaʼ ujti tiʼ tojlel Evodia yicʼot Síntique, cheʼ bʌ mi laj qʼuel mach tac bʌ weñic tiʼ tojlel jiñi hermanojob miʼ mejlel i yʌcʼ chaʼan wocol mi la cubin chaʼan mi laj cʼuxbiñob. Ti lac pejtelel ti bele ora mi lac mel mach bʌ weñic. Mi mucʼ jach la cʌcʼ ti lac ñaʼtʌbal i sajtemal yambʌlob, maʼañix mi caj laj cʼuxbiñob. Laʼ lac ñaʼtan iliyi. Juntiquil hermano miʼ ñajʌyel i chaʼan i coltañonla lac sʌqʼuesan jiñi i Yotlel tempa bʌ, i mi lac michʼan. Pero mi tsaʼ lac teche laj cʼajtesan pejtelel mach bʌ weñic an i mele, mi caj lac ñumen michʼan, i mi caj i jilel majlel laj cʼuxbiya. ¿Woli ba lac ñusan ili wocol? Mi cheʼʌchi, laʼ laj cʼajtesan chaʼan Jehová miʼ luʼ qʼuel pejtelel mach bʌ weñic ti lac tojlel yicʼot tiʼ tojlel jiñi hermano, pero mucʼʌch i bej cʼuxbiñonla. Jin chaʼan, yom mi lac lajiben i cʼuxbiya Jehová i mi laj qʼuel chuqui tac wem bʌ miʼ melob jiñi yambʌlob. Cheʼ mi lac chaʼlen wersa laj cʼuxbin jiñi hermanojob, temel mi caj la cajñel la quicʼotob (Fil. 2:1, 2).
«CHUQUI TAC ÑUMEN ÑUC BɅ I CʼɅJÑIBAL»
9. ¿Baqui tac bʌ jiñi «ñumen ñuc bʌ i cʼʌjñibal» tsaʼ bʌ i taja ti tʼan Pablo ti jiñi carta tsaʼ bʌ i tsʼijbube jiñi añoʼ bʌ ti Filipos?
9 Tiʼ coltaya jiñi chʼujul bʌ espíritu, Pablo tiʼ sube jiñi añoʼ bʌ ti Filipos, yicʼot tiʼ pejtelel jiñi xñoptʼañob, chaʼan yom miʼ ñaʼtañob «chuqui tac ñumen ñuc bʌ i cʼʌjñibal» (Fil. 1:10, TNM). Yaʼ ochem jiñi i sʌqʼuesʌntel i cʼabaʼ Dios, cheʼ miʼ tsʼʌctesan chuqui ñaʼtʌbil i chaʼan, cheʼ an ñʌchʼtʌlel yicʼot temelonla ti congregación (Mt. 6:9, 10; Jn. 13:35). Mi mucʼʌch laj qʼuel ti ñuc ti laj cuxtʌlel pejtelel iliyi, mi lac pʌs chaʼan mi laj cʼuxbin Jehová.
10. ¿Chuqui yom mi lac mel chaʼan maʼañic lac mul miʼ qʼuelonla Jehová?
10 Pablo tsiʼ yʌlʌ jaʼel chaʼan mach yomic miʼ ‹tajtʌl lac mul›. Ili mach yomic i yʌl chaʼan junyajl toj yom mi la cajñel. Mach lajaloñicla bajcheʼ Jehová, mach bʌ añic i mul. Pero mi caj i qʼuelonla bajcheʼ maʼañic bʌ lac mul cheʼ mi lac chaʼlen wersa lac pʼʌtʼesan jiñi laj cʼuxbiya yicʼot mi lac wen ñaʼtan ñuc tac bʌ i cʼʌjñibal. Junchajp bajcheʼ miʼ mejlel lac pʌs laj cʼuxbiya jiñʌch cheʼ mi lac chaʼlen wersa chaʼan maʼañic mi la cʌcʼ ti yajlel yambʌlob.
11. ¿Chucoch mach yomic mi la cʌcʼ ti yajlel ti mulil yambʌlob?
11 Jiñi ticʼojel chaʼan mach yomic mi la cʌcʼ ti «yajlel yambʌlob» wen ñucʌch i cʼʌjñibal. Jiñi lac ñusaqʼuin, jiñi lac pislel muʼ lac xoj, cheʼto jaʼel jiñi la queʼtel miʼ mejlel i yʌcʼ ti yajlel ti mulil yambʌlob. Tajol mach mulilic chuqui mi lac mel, pero añʌch i wocolel cheʼ jiñi muʼ bʌ lac yajcan lac mel miʼ ticʼlʌben i conciencia yambʌlob i mi la cʌcʼob ti yajlel. Jesús tsiʼ yʌlʌ chaʼan ñumen utsʼat mi tsaʼic ñaxan cʌjchi ñaʼatun ti lac bicʼ i mi lac chojquel ochel ti mar i mach jiñic cheʼ mi lac yʌnsan ti mulil juntiquil (Mt. 18:6).
12. ¿Chuqui mi laj cʌn tiʼ tojlel jumpʼejl xñujpuñel precursoroʼ bʌ?
12 Laʼ laj qʼuel bajcheʼ tsiʼ chʼʌmʌyob ti ñuc jumpʼejl xñujpuñel precursoroʼ bʌ jiñi ticʼojel chaʼan maʼañic miʼ yʌcʼob ti yajlel yambʌlob. Yaʼ tiʼ congregación, tsaʼ ajñi jumpʼejl xñujpuñel maxto bʌ jalic chʼʌmʌl i chaʼan jaʼ, tsaʼ bʌ cosʌntiyob ti jumpʼejl familia baqui an tac chuqui mʌctʌbil chaʼan miʼ melob. Ili hermanojob tsiʼ ñaʼtayob chaʼan jiñi xñoptʼañob mach yomic miʼ majlelob ti cine, mi chaʼañic miʼ qʼuelob jumpʼejl película mach bʌ lecojic. Jin chaʼan, maʼañic tsiʼ mulayob cheʼ bʌ tsaʼ cʼoti i ñaʼtañob chaʼan jiñi precursorob tsiʼ qʼueleyob jumpʼejl película. Jin chaʼan, jiñi precursorob maʼañix tsaʼ majliyob ti cine, jinto cheʼ jiñi hermanojob miʼ pʼʌtʼesañob jiñi i conciencia yicʼot miʼ chʼʌmbeñob i sujm chuqui wen i chuqui maʼañic bʌ (He. 5:14). Cheʼʌch tsiʼ pʌsʌyob chaʼan mach tiʼ tʼan jach miʼ yʌlob chaʼan yujilob cʼuxbiya (Ro. 14:19-21; 1 Jn. 3:18).
13. ¿Bajcheʼ miʼ mejlel lac ñijcan juntiquil chaʼan miʼ chaʼlen mulil?
13 Cheʼ jaʼel, miʼ mejlel la cʌcʼ ti yajlel juntiquil cheʼ mi lac ñijcan chaʼan miʼ chaʼlen mulil. La laj qʼuel bajcheʼ miʼ mejlel ti ujtel. Laʼ lac ñaʼtan tiʼ tojlel juntiquil woli (choncol) bʌ i chʼʌm cʌntesʌntel i chaʼan Biblia tsaʼ bʌ i chaʼle wersa i cʌy i jap lembal i tsaʼʌch mʌjli i chaʼan. Miʼ cʼotel i ñaʼtan chaʼan mach yomix miʼ wis jab jiñi lembal. Mach jalic miʼ ñumel i cabʌl chuqui miʼ qʼuextan tiʼ melbal yicʼot miʼ chʼʌm jaʼ. Ti jumpʼejl bʌ qʼuin, juntiquil hermano miʼ pʌy tiʼ yotot yicʼot yambʌ hermanojob. Ti wiʼil, anquese mach yicʼotic i jontolil, jiñi hermano miʼ suben i jap lembal i miʼ yʌl: «Chʼʌmʌlix a chaʼan jaʼ yicʼot an a chaʼan i yespíritu Jehová. Cʼajtesan chaʼan jumpʼejl i wut jiñi espíritu jiñʌch cheʼ mi lac ticʼ lac bʌ. Mi mucʼʌch a ticʼ a bʌ, pʼisbil jach mi caj a jap». Chʼijiyemtic cheʼ jiñi tsijiʼ bʌ hermano mi jacʼ jiñi ticʼojel mach bʌ weñic i miʼ chaʼ yajlel ti jap lembal.
14. ¿Bajcheʼ miʼ coltañonla jiñi tempa bʌ tac chaʼan mi lac jacʼ jiñi ticʼojel tac am bʌ ti Filipenses 1:10, TNM?
14 Jiñi tempa bʌ tac mach junchajpic jach bajcheʼ miʼ coltañonla lac jacʼ jiñi ticʼojel am bʌ ti Filipenses 1:10, TNM. Ñaxam bʌ, miʼ cʼajtesʌbeñonla chuqui ñumen ñuc bʌ i cʼʌjñibal miʼ qʼuel Jehová. I chaʼchaʼpʼejl, miʼ cʌntesañonla lac pʌs ti lac melbal chuqui mi laj cʌn chaʼan maʼañic miʼ tajtʌl lac mul. I yuxpʼejlel miʼ ñijcañonla lac pʌs cʼuxbiya yicʼot mi lac mel chuqui tac wen (He. 10:24, 25). Cheʼ bʌ jiñi hermanojob miʼ wen ñuqʼuesañob lac pusicʼal, mi caj lac ñumen cʼuxbiñob yicʼot jiñi Jehová. Mi ti jumpʼejl lac pusicʼal mi laj cʼuxbin Jehová yicʼot jiñi hermanojob mi caj lac chaʼlen wersa chaʼan maʼañic mi la cʌcʼ ti yajlel mi juntiquilic la quermañu.
LAʼ CHɅN BUJTʼIC LAC PUSICʼAL «TIʼ WUT CHUQUI TOJ»
15. ¿Chuqui yom i yʌl cheʼ ‹miʼ bujtʼel lac pusicʼal tiʼ wut chuqui toj›?
15 Pablo tsiʼ cʼajtibe Jehová chaʼan jiñi añoʼ bʌ ti Filipos yom butʼulob i pusicʼal «tiʼ wut chuqui toj» bʌ (Fil. 1:11, TNM). Tiʼ sujm, yaʼ ochem cheʼ miʼ cʼuxbiñob Jehová yicʼot i tejclum. Cheʼ jaʼel, cheʼ miʼ subeñob yambʌlob jiñi i ñopoñelob ti Jesús yicʼot jiñi utsʼatax bʌ woli bʌ i pijtañob. Pablo tiʼ subeyob jaʼel chaʼan yom miʼ tsictiyel i sʌclelob tiʼ tojlel yambʌlob cheʼ bajcheʼ ecʼ (Fil. 2:15). Weñʌch cheʼ tsiʼ cʼʌñʌ jiñi lajiya come Jesús tsiʼ yʌlʌ chaʼan jiñi xcʌntʼañob i chaʼan ‹i sʌclelob pañimil› (Mt. 5:14-16). Tiʼ subeyob jaʼel, chaʼan yom miʼ sutqʼuiñob ti xcʌntʼan yonlel quixtañujob i chaʼan mi caj i sujtelob tiʼ testigojob «cʼʌlʌl ti ñajt bʌ pañimil» (Hch. 1:8; Mt. 28:18-20). Jin chaʼan, ‹miʼ bujtʼel lac pusicʼal tiʼ wut chuqui toj› cheʼ mi lac chaʼlen wersa lac mel ili ñuc bʌ eʼtel.
Cheʼ bʌ Pablo tsaʼ cʌjchi tiʼ yotot yaʼ ti Roma, tiʼ tsʼijbu jiñi carta tiʼ tojlel jiñi añoʼ bʌ ti Filipos. Cheʼ jaʼel, tiʼ sube wen tʼan jiñi soldadojob woli bʌ i cʌntañob yicʼot muʼ bʌ i julaʼtañob. (Qʼuele jiñi párrafo 16).
16. Cheʼ bajcheʼ miʼ yʌl Filipenses 1:12-14, ¿bajcheʼ miʼ mejlel lac pʌs lac sʌclel cheʼ bajcheʼ ecʼ, cheʼto jaʼel cheʼ mi lac ñusan tsʌts bʌ wocol tac? (Qʼuele jiñi dibujo am bʌ tiʼ tejchibal).
16 Mach yʌlʌlic chuqui woli (yʌquel) lac ñusan, miʼ mejlel lac pʌs lac sʌclel cheʼ bajcheʼ ecʼ. An i tajol, jiñi muʼ bʌ i mʌctañonla ti subtʼan miʼ mejlel i sujtel ti wem bʌ coltaya lac chaʼan. Jiñʌch tsaʼ bʌ ujti tiʼ tojlel jiñi apóstol Pablo. Cheʼ tiʼ tsʼijbu jiñi carta tiʼ tojlel jiñi añoʼ bʌ ti Filipos, cʌchʌl tiʼ yotot yaʼ ti Roma. Pero maʼañic tsiʼ mʌcta chaʼan miʼ suben jiñi wen tʼan yicʼot i chʼejlel jiñi woli bʌ i cʌntañob yicʼot muʼ bʌ i cʼotel i julaʼtañob. Jiñi wem bʌ i melbal tsiʼ ñuqʼuesʌbe i pusicʼal jiñi hermanojob yicʼot chaʼan miʼ tajob i chʼejlel tiʼ subol «jini wen tʼan» yicʼot cheʼ «maʼañobix i bʌqʼuen» (pejcan Filipenses 1:12-14; 4:22).
Tiʼ pejtelel ora, laʼ lac sʌclan bajcheʼ miʼ mejlel lac sub jiñi wen tʼan. (Qʼuele jiñi párrafo 17). *
17. ¿Bajcheʼ miʼ mejlel i chʌn subob wen tʼan jiñi hermanojob anquese woliʼ ñusañob tsʌts bʌ wocol?
17 Yonlel hermanojob miʼ wen pʌsob i chʼejlel cheʼ bajcheʼ jiñi Pablo. Chumulob ti país tac baqui mʌctʌbil lac subtʼan, jin chaʼan miʼ wen sʌclañob bajcheʼ miʼ mejlel i subob jiñi wen tʼan (Mt. 10:16-20). Ti jumpʼejl país, juntiquil superintendente i chaʼan circuito tiʼ sube jiñi hermanojob chaʼan ti jujuntiquil yom miʼ sʌclañob bajcheʼ miʼ cajelob ti subtʼan: Tiʼ familia, jiñi chumuloʼ bʌ tiʼ tʼejl, i piʼʌlob ti escuela yicʼot ti eʼtel yicʼot i cʌñʌyoʼ bʌ. Chaʼpʼejl jab tsaʼ ñumi, orajach tsaʼ wen pʼojli congregación tac ti jiñi bʌ circuito. Tajol joñonla mach mʌctʌbilic lac subtʼan. Pero añʌch chuqui ñuc bʌ miʼ cʌntesañonla ili hermanojob: Tiʼ pejtelel ora, yom mi lac chaʼlen wersa lac sʌclan bajcheʼ miʼ mejlel lac sub jiñi wen tʼan, i mi lac ñop chaʼan Jehová mi caj i yʌqʼueñonla lac pʼʌtʌlel chaʼan mi lac ñusan baqui jach bʌ wocol (Fil. 2:13).
18. ¿Chuqui la com lac mel ti jujuntiquil?
18 Ñumento ti ili ora, laʼ lac jacʼ jiñi ticʼojel tac tsaʼ bʌ i yʌcʼʌ jiñi Pablo ti jiñi carta tsaʼ bʌ i tsʼijbube jiñi añoʼ bʌ ti Filipos. Laʼ lac wen ñaʼtan chuqui tac ñumen ñuc bʌ i cʼʌjñibal, laʼ lac chaʼlen wersa chaʼan maʼañic miʼ tajtʌl lac mul, mach la cʌcʼ ti yajlel yambʌlob yicʼot laʼ bujtʼic lac pusicʼal ti chuqui toj. Cheʼ jiñi, mi caj i ñumen pʼojlel laj cʼuxbiya yicʼot mi caj la cʌqʼuen i ñuclel jiñi cʼuxbibil bʌ lac Tat, Jehová.
CʼAY 17 «Comʌch c mel»
^ parr. 5 Ili ora, yom mi lac ñumen pʼʌtʼesan laj cʼuxbiya tiʼ tojlel jiñi hermanojob. Jiñi carta tsaʼ bʌ i tsʼijbube Pablo jiñi añoʼ bʌ ti Filipos miʼ coltañonla laj qʼuel chuqui yom mi lac mel chaʼan miʼ wen pʼojlel laj cʼuxbiya, cheʼto jaʼel cheʼ miʼ tilel wocol tac.
^ parr. 3 Filipenses 1:9-11 (TNM): «Ili jiñʌch woli bʌ c bej cʼajtin ti oración, chaʼan miʼ ñumen pʼojlel laʼ cʼuxbiya ti cabʌl laʼ ñaʼtʌbal yicʼot mi laʼ chʼʌmben i sujm ti tsʼʌcʌl, chaʼan mi laʼ ñaʼtan chuqui tac ñumen ñuc bʌ i cʼʌjñibal, chaʼan maʼañic miʼ tajtʌl laʼ mul yicʼot chaʼan maʼañic mi laʼ wʌcʼ ti yajlel yambʌlob cʼʌlʌl tiʼ qʼuiñilel Cristo, yicʼot chaʼan miʼ bujtʼel laʼ pusicʼal tiʼ wut chuqui toj, tilem bʌ ti Cristo Jesús chaʼan miʼ yʌqʼuentel i ñuclel Dios».
^ parr. 55 MUʼ BɅ I PɅS JIÑI FOTO TAC: Cheʼ woliʼ sʌqʼuesañob i Yotlel Tempa bʌ, Joe miʼ jumucʼ waʼtʌl i miʼ pejcan juntiquil hermano yicʼot i yalobil. Iliyi miʼ michʼesan Mike, woli bʌ i cʼʌn jiñi aspiradora. Miʼ pensalin chaʼan Joe yom miʼ yʌcʼ i coltaya i mach chaʼañic miʼ chaʼlen tʼan. Pero ti wiʼil, jiñi Mike miʼ qʼuel chaʼan jiñi Joe woliʼ coltan juntiquil hermana añix bʌ i jabilel. Ili miʼ cʼajtesʌben chaʼan cojach yom miʼ chʼʌm ti ñuc jiñi wen tac bʌ i melbal Joe.
^ parr. 59 MUʼ BɅ I PɅS JIÑI FOTO TAC: Ti jumpʼejl país baqui mʌctʌbil lac subtʼan, juntiquil hermano miʼ suben juntiquil i cʌñʌ bʌ jiñi wen tʼan chaʼan i Yumʌntel Dios. Ti wiʼil, cheʼ woliʼ cʼaj i yoj yaʼ tiʼ yeʼtel, miʼ suben wen tʼan juntiquil i piʼʌl.
