1. ¿Chuqui yom miʼ mel jiñi xñoptʼañob chaʼan miʼ yujtesañob jiñi ajñel chaʼan bʌ cuxtʌlel mach bʌ añic miʼ jilel?

JIÑI xñoptʼañonbʌla lajalonla bajcheʼ juntiquil xʼajñel, i jiñi majtañʌl jiñʌch laj cuxtʌlel mach bʌ añic miʼ jilel. Mi tsaʼ jaxto lac teche o mi wajalix laj cajel, yomʌch mi lac bej chaʼlen ajñel jinto mi laj cujtesan. Jiñi ticʼojel tac tsaʼ bʌ i tsʼijbu jiñi apóstol Pablo tiʼ tojlel jiñi xñoptʼañob ti Filipos miʼ mejlel i ñuqʼuesan lac pusicʼal chaʼan mi la cujtesan jiñi ajñel. Chaʼtiquil uxtiquil yaʼ bʌ añob ti jiñi congregación cheʼ ti ñaxam bʌ siglo cabʌlix jab an i cajel i melbeñob i yeʼtel Jehová cheʼ bʌ tsaʼ chocbentiyob cʼotel jiñi carta. Anquese weñʌch bajcheʼ woli (choncol) i melob, Pablo tsiʼ cʼajtesʌbeyob chaʼan yomʌch miʼ bej chaʼleñob ajñel. Yom chaʼan miʼ lajibeñob i melbal (chaʼlebal) chaʼan miʼ chʌn chaʼleñob wersa i miʼ cʼotelob yaʼ baʼ jaxʌl jiñi bij (Fil. 3:14).

2. ¿Chucoch weñʌch cheʼ jiñi Pablo tsiʼ ñuqʼuesʌbe i pusicʼal jiñi xñoptʼañob añoʼ bʌ ti Filipos?

² Weñʌch cheʼ jiñi Pablo tsiʼ ñuqʼuesʌbe i pusicʼal jiñi xñoptʼañob añoʼ bʌ ti Filipos come jiñi congregación tsaʼʌch i wen taja tsʌts bʌ tsʼaʼlentel cʼʌlʌl cheʼ tsaʼ waʼchoconti. Pejtelel iliyi tsaʼ tejchi ti jabil 50, cheʼ bʌ Pablo yicʼot Silas tsaʼ subentiyob majlel ti Macedonia. Jin chaʼan, tsaʼ cʼotiyob ti subtʼan ti Filipos (Hch. 16:9). Yaʼi tsiʼ tajayob juntiquil xʼixic i cʼabaʼ Lidia tsaʼ bʌ caji i wen ñʌchʼtan jiñi wen tʼan woli (yʌquel) bʌ i subob come Jehová tsiʼ jambe i pusicʼal (Hch. 16:14). Mach jalic tsaʼ ñumi cheʼ jiñi Lidia yicʼot añoʼ bʌ tiʼ yotot tsiʼ chʼʌmʌyob jaʼ. Pero jiñi Diablo maʼañic tsaʼ lujbʼa. Chaʼtiquil uxtiquil wiñicob ti jiñi tejclum ti chucuyob majlel jiñi Pablo yicʼot Silas tiʼ tojlel jiñi añoʼ bʌ i yeʼtel yicʼot tsaʼ toʼol jopʼbentiyob i mul chaʼan choncol i techob wocol. Jin chaʼan, tsiʼ jatsʼʌyob jiñi Pablo yicʼot Silas, tsaʼ otsʌntiyob ti cárcel i tsaʼ subentiyob chaʼan miʼ loqʼuelob ti jiñi tejclum (Hch.  16:16-40). ¿Tsaʼ ba lujbʼayob o tsiʼ cʌyʌyob i melob i yeʼtel Dios? Maʼañic ¿Ixcu jiñi hermanojob ti jiñi tsijiʼ bʌ congregación? Tsiʼ pʌsʌyob wem bʌ i melbal come tsiʼ lʌtʼʌyob jiñi wocol jaʼel. Tiʼ sujm, tsiʼ wen ñuqʼuesʌbeyob i pusicʼal jiñi wem bʌ ejemplo i chaʼan Pablo yicʼot Silas.

3. ¿Chuqui yujil Pablo, i chuqui ti cʼajtiya tac mi caj lac jacʼ?

³ Pablo maʼañic tsaʼ lujbʼa (2 Co. 4:16). Pero yujil chaʼan mi yom i yujtesan jiñi ajñel yomʌch yaʼan i ñaʼtʌbal ti baqui yom cʼotel. ¿Chuqui mi laj cʌn tiʼ tojlel? ¿Chuqui wem bʌ ejemplo an lac chaʼan ili ora muʼ bʌ i pʌsbeñonla chaʼan mejlʌch laj cuch anquese an wocol tac? ¿I bajcheʼ miʼ coltañonla jiñi lac pijtaya ti talto bʌ qʼuin chaʼan maʼañic mi lac lujbʼan?

4. ¿Chuqui tsiʼ mele Pablo anquese woliʼ ñusan wocol?

⁴ Laʼ laj qʼuel chuqui ti wocol woliʼ ñusan jiñi Pablo cheʼ baqui ora tiʼ tsʼijbube jiñi xñoptʼañob añoʼ bʌ ti Filipos yicʼot bajcheʼ tsiʼ chaʼle wersa. Tsaʼ cʌjchi tiʼ yotot yaʼ ti Roma, jin chaʼan maʼañic miʼ mejlel ti loqʼuel ti subtʼan. Pero tsaʼʌch i wen sube jiñi wen tʼan jiñi quixtañujob muʼ bʌ cʼotel i julaʼtañob yicʼot tiʼ tsʼijbube carta tac jiñi ñajt tac bʌ congregación. Cheʼ jaʼel ili ora, cabʌl xñoptʼañob añobix bʌ i jabilel o cʼamoʼ bʌ mach bʌ mejlix i loqʼuelob tiʼ yotot, miʼ subeñob wen tʼan jiñi quixtañujob muʼ bʌ i cʼotel i julaʼtañob. Cheʼ jaʼel, miʼ tsʼijbuñob carta tac muʼ bʌ i ñuqʼuesʌbeñob i pusicʼal jiñi quixtañujob mach bʌ mejlic i julaʼtañob.

5. Cheʼ bajcheʼ tsiʼ yʌlʌ ti Filipenses 3:12-14, ¿chuqui tsiʼ colta jiñi Pablo chaʼan maʼañic chuqui miʼ mʌctan?

⁵ Pablo maʼañic tsiʼ yʌcʼʌ chaʼan miʼ mʌctan jiñi tsaʼ bʌ i taja ti ñaxan yicʼot cheʼ tsiʼ mele mach tac bʌ weñic. Tsiʼ yʌlʌ chaʼan yom miʼ ñajʌtesan ‹jiñi am bʌ tiʼ pat› chaʼan miʼ ‹taj jiñi am bʌ tiʼ tojel i wut›, yom i yʌl, chaʼan miʼ yujtesan jiñi ajñel chaʼan miʼ taj i cuxtʌlel maʼañic bʌ i jilibal (pejcan Filipenses 3:12-14). ¿Chuqui tajol tsaʼ mejli i mʌctan jiñi Pablo? Ñaxam bʌ, jiñi tsaʼ bʌ i taja ti judaísmo. Pero iliyi tsaʼ jach i qʼuele bajcheʼ «misujelʌl» (Fil. 3:3-8). I chaʼpʼejlel, jiñʌch cheʼ muʼto i bej ñaʼtan i mul chaʼan tsiʼ ticʼla jiñi xñoptʼañob. Pero maʼañic tsiʼ yʌcʼʌ chaʼan ili miʼ mʌlben (jotben). I yuxpʼejlel, jiñʌch tsaʼ bʌ cʼoti i mel bajcheʼ xñoptʼan. Tsiʼ wen taja cabʌl i wenlel anquese tsaʼ otsʌnti ti cárcel, tsaʼ jajtsʼi, cheʼto jaʼel tsaʼ jujli ti xajlel, uxyajl colel i chʌmel (sajtel) yaʼ ti colem ñajb cheʼ bʌ tsaʼ jejmi barco, tsiʼ yubi wiʼñal yicʼot maʼañic chuqui miʼ xoj. Pero maʼañic baqui ora tsiʼ ñaʼta chaʼan tsaʼix i luʼ mele tiʼ pejtelel (2 Co. 11:23-27). Anquese cabʌl chuqui tsiʼ taja yicʼot tsiʼ ñusa wocol tac, yujil chaʼan yom miʼ chʌn chaʼlen wersa. I cheʼʌch yom mi lac mel jaʼel.

6. ¿Baqui tac bʌ jiñi ‹am bʌ ti lac pat›?

⁶ ¿Bajcheʼ miʼ mejlel lac ñajʌtesan jiñi ‹am bʌ ti lac pat› cheʼ bajcheʼ tsiʼ mele jiñi Pablo? Tajol an yom bʌ mi lac chaʼlen wersa chaʼan mi laj cʌy la cubin lac chʼijiyemlel chaʼan tiʼ caj jiñi mulil tsaʼ bʌ lac mele ti wajali. Mi cheʼ bajcheʼ jiñi, ¿chucoch maʼañic mi la cʌqʼuen i yorajlel lac sʌclan ti lac jun tac chaʼan jiñi i tojol laj coltʌntel? Cheʼ mi lac wen pejcan, mi lac wen ñaʼtan yicʼot mi lac mel oración chaʼan ili temaj mi caj i coltañonla chaʼan maʼañix mi lac wen ubin lac chʼijiyemlel chaʼan jiñi mulil tsaʼ bʌ lac mele ti wajali, come mi caj lac chʼʌmben i sujm yicʼot lac chʼujbin chaʼan Jehová tsaʼix i ñusa lac mul. Laʼ laj qʼuel yambʌ muʼ bʌ laj cʌn tiʼ tojlel Pablo. An Testigojob tsaʼ bʌ i cʌyʌyob i yeʼtel baqui wen miʼ tojtʌlob chaʼan miʼ ñumen acʼob i coltaya tiʼ subol i Yumʌntel Dios. Mi cheʼ joñonla jaʼel, cheʼ mi lac ñajʌtesan jiñi añix bʌ ti lac pat yom i yʌl chaʼan maʼañix mi caj lac chaʼ mulan lac taj jiñi tsaʼ bʌ laj cʌyʌ ti wajali (Nm. 11:4-6; Ec. 7:10, TNM). Ti jiñi ‹am bʌ ti lac pat› yaʼ ochem jaʼel jiñi am bʌ lac taja tiʼ melol i yeʼtel Dios o jiñi wocol tac tsaʼix bʌ lac ñusa. Tiʼ sujm,  cheʼ mi laj cʼajtesan bajcheʼ an i yʌqʼueyonla cabʌl bendición yicʼot i coltaya jiñi lac Tat ti ili cabʌl jab ñumen bʌ tilel miʼ mejlel i ñumen lʌcʼtesañonla tiʼ tojlel. Pero mach la comic lac ñaʼtan chaʼan tsaʼix lac luʼ mele tiʼ pejtelel (1 Co. 15:58).

7. Cheʼ bajcheʼ miʼ yʌl 1 Corintios 9:24-27, ¿chuqui i cʼʌjñibal yom mi lac mel chaʼan mi lac taj jiñi laj cuxtʌlel? Acʼʌ jumpʼejl ejemplo.

⁷ Pablo tsaʼʌch i wen chʼʌmbe i sujm ili tsaʼ bʌ i yʌlʌ Jesús: «Chaʼlenla wersa» (Lc. 13:23, 24). Jiñi apóstol Pablo yujil chaʼan yom miʼ chaʼlen wersa cʼʌlʌl miʼ chʌmel cheʼ bajcheʼ tsiʼ mele Cristo. Jin chaʼan, tsiʼ laji jiñi laj cuxtʌlel bajcheʼ jiñi muʼ bʌ i chaʼleñob ajñel (pejcan 1 Corintios 9:24-27). Jiñi muʼ bʌ i chaʼleñob ajñel yaʼʌch miʼ yʌcʼob i ñaʼtʌbal yaʼ baqui yom cʼotelob i maʼañic miʼ yʌcʼob chaʼan an chuqui miʼ mʌctañob. Jumpʼejl ejemplo, jiñi xʼajñelob miʼ mejlel i chaʼleñob ajñel ti jumpʼejl calle baqui an choñoñibʌl tac yicʼot ti yan tac bʌ muʼ bʌ i mejlel i mʌybeñob i wut. Mi juntiquilic xʼajñel mi caj i waʼtʌl i qʼuel chuqui woliʼ chojñel come yom i mʌl. Lajalʌch jiñi ajñel chaʼan bʌ laj cuxtʌlel, maʼañic chuqui yom miʼ mʌctañonla. Mi yaʼ jach mi la cʌcʼ jiñi lac ñaʼtʌbal ti baqui la com cʼotel yicʼot mi lac chaʼlen wersa cheʼ bajcheʼ tsiʼ mele Pablo, mi caj lac taj jiñi lac majtan.

8. ¿Chuqui uxchajp mi caj lac tsajin?

⁸ Laʼ lac tsajin uxchajp muʼ bʌ i mejlel i cʼuñʼesañonla. Jiñʌch cheʼ woliʼ jalʼan mi la cubin chaʼan miʼ tsʼʌctiyel jiñi woli bʌ lac pijtan, cheʼ mach wen cʼocʼoñixla mi la cubin lac bʌ yicʼot cheʼ maʼañic miʼ seb jilel jiñi lac wocol. Cheʼ mi lac ñaʼtan chuqui tsiʼ meleyob jiñi yambʌ i wiñicob Dios an chuqui wem bʌ mi laj cʌn tiʼ tojlelob (Fil. 3:17).

9. ¿Bajcheʼ miʼ mejlel i ticʼlañonla cheʼ wolito i jalʼan mi la cubin chaʼan miʼ tsʼʌctiyel jiñi albil bʌ i chaʼan Dios?

⁹ Cheʼ woliʼ jalʼan mi la cubin chaʼan miʼ tsʼʌctiyel jiñi woli bʌ lac pijtan. I tilelʌch cheʼ la com chaʼan miʼ tsʼʌctiyel jiñi albil bʌ tac i chaʼan Dios. Cheʼ bʌ jiñi xʼaltʼan Habacuc tsiʼ yʌlʌ chaʼan yomix chaʼan miʼ jisʌntel jiñi jontolil yaʼ ti Judá, Jehová tiʼ sube chaʼan yomto miʼ bej pijtan (Hab. 2:3). Pero jiñi lac tijicñʌyel miʼ mejlel ti jilel cheʼ wolito jalʼan mi la cubin chaʼan miʼ tsʼʌctiyel jiñi albil bʌ i chaʼan Dios. I tajol miʼ mejlel i cʼuñʼesañonla (Pr. 13:12). Jiñʌch tsaʼ bʌ  cʼoti ti ujtel tiʼ tejchibal 1901. Ti jimbʌ ora, cabʌl xñoptʼañob bombiloʼ bʌ o yajcʌbiloʼ bʌ tsiʼ pijtayob majlel ti panchan cheʼ ti 1914. ¿Chuqui tsiʼ meleyob jiñi xucʼul bʌ hermanojob cheʼ maʼañic tsaʼ tsʼʌctiyi jiñi woli bʌ i pijtañob?

10. ¿Chuqui tsiʼ mele jumpʼejl xucʼul bʌ xñujpuñel cheʼ baqui ora maʼañic tsaʼ tsʼʌctiyi jiñi woli bʌ i pijtañob?

¹⁰ La laj qʼuel tiʼ tojlel chaʼtiquil xucʼul bʌ hermanojob, jiñi Royal yicʼot Pearl Spatz tsaʼ bʌ i ñusayob jiñi wocol. Jiñi hermano Royal tsiʼ chʼʌmʌ jaʼ cheʼ ti jabil 1908, cheʼ bʌ an jaxto 20 i jabilel. Tsiʼ wen ñopo chaʼan lʌcʼʌlix mi caj i majlel ti panchan. Cheʼ bʌ jiñi hermano tsiʼ cʼajtibe ñujpuñel jiñi Pearl cheʼ ti 1911 tiʼ sube: «A wujilix chuqui mi caj i yujtel ti 1914. Mi mucʼʌch caj lac ñujpuñel, ñumen wen cheʼ muqʼuix lac mel ti ora». Cheʼ bʌ ili xñujpuñel maʼañic tsaʼ majliyob ti panchan cheʼ ti 1914, ¿tsaʼ ba i cʌyʌyob ajñel chaʼan miʼ tajob jiñi cuxtʌlel mach bʌ añic mi jilel? Maʼañic, come yaʼ jach añob i ñaʼtʌbal i chʌn melbeñob i yeʼtel Dios tiʼ xucʼtʌlel, mach chaʼañic yomob i taj i majtan. Yomobʌch i bej chaʼleñob ajñel cʼʌlʌl miʼ yujtesañob. I cheʼʌch tsiʼ meleyob. Tsiʼ chʌn chaʼleyob wersa yicʼot xucʼul tsaʼ ajñiyob cʼʌlʌl tsaʼ chʌmiyob. Tiʼ sujm, mi lac pijtan cheʼ ba ora Jehová mi caj i sʌqʼuesan i cʼabaʼ, cheʼ mi caj i pʌs chaʼan i Yumʌntel jiñʌch ñumen wem bʌ yicʼot cheʼ mi caj i tsʼʌctesan pejtelel chuqui albil i chaʼan. Miʼ mejlel lac ñop chaʼan tiʼ pejtelel mi caj i tsʼʌctiyel cheʼ bʌ yorajlelix miʼ qʼuel. Cheʼ miʼ cʼotel jiñi, laʼ lac bej melben i yeʼtel Dios i mach la cʌcʼ chaʼan miʼ jilel lac tijicñʌyel o chaʼan mi laj cʼuñʼan cheʼ wolito i jalʼan mi la cubin chaʼan miʼ tsʼʌctiyel jiñi woli bʌ lac pijtan.

11, 12. ¿Chucoch yom mi lac chaʼlen wersa anquese mach wen cʼocʼoñixla bajcheʼ ti ñaxan? Acʼʌ jumpʼejl ejemplo.

¹¹ Cheʼ mach wen cʼocʼoñixla mi la cubin lac bʌ. Juntiquil xʼajñel yom wen cʼocʼ chaʼan miʼ mejlel ti ajñel. Pero joñonla mach wen i cʼʌjñibalic laj cʼocʼlel chaʼan mi lac bej pʼʌtʼesan lac bʌ tiʼ chaʼan bʌ Dios. Tiʼ sujm, yonlel hermanojob mach bʌ wen cʼocʼobix miʼ chʌn pʼʌtʼesañob i bʌ tiʼ chaʼan bʌ Dios (2 Co. 4:16). Laʼ laj qʼuel tiʼ tojlel jiñi hermano Arthur Secord. * Ti jumpʼejl bʌ qʼuin, cheʼ bʌ añix 55 jab an ti Betel yicʼot 88 i jabilel, juntiquil enfermera muʼ bʌ i cʌntan ti uts bʌ tʼan tiʼ sube: «Hermano Secord, cabʌl chuqui an a mele tiʼ tojlel Jehová». Pero Arthur maʼañic tsiʼ yʌcʼʌ tiʼ ñaʼtʌbal chuqui melbilix i chaʼan. Tsiʼ qʼuelbe i wut, ti tseʼta i tsiʼ jacʼʌ: «I sujmʌch. Pero jiñi ñumen ñuc bʌ i cʼʌjñibal mach jiñic tsaʼix bʌ lac mele, jiñʌch muʼ bʌ caj lac tech lac mel majlel ili ora».

¹² ¿Cabʌlix ba jab an lac teche lac melben i yeʼtel Jehová i wʌle ora jiñi laj cʼocʼlel maʼañix miʼ wen aqʼueñonla lac mel bajcheʼ ti ñaxan? Mi cheʼʌchi, mach yomic mi la cʌcʼ ti jilel lac tijicñʌyel. Miʼ mejlel lac ñop chaʼan Jehová miʼ qʼuel  ti ñuc pejtelel tsaʼ bʌ lac mele ti wajali (He. 6:10). I chaʼan ili ora, laʼ laj cʼajtesan chaʼan mach jiñic muʼ bʌ lac wen mel tiʼ tojlel Jehová muʼ bʌ i pʌs bajcheʼ cʼamel mi laj cʼuxbin. Mi lac pʌs chaʼan mucʼʌch laj cʼuxbin cheʼ bej tijicñayonla yicʼot cheʼ mi lac chaʼlen wersa cheʼ bajcheʼ cʼamel mi lac mejlel (Col. 3:23). Jehová miʼ chʼʌmben i sujm chuqui miʼ mejlel lac mel i maʼañic miʼ cʼajtibeñonla chuqui mach mejlix lac mel (Mr. 12:43, 44).

13. ¿Bajcheʼ miʼ coltañonla jiñi tsaʼ bʌ i ñusayob Anatoly yicʼot Lidiya chaʼan mi lac bej chaʼlen wersa anquese añix ora i cajel lac ñusan wocol tac?

¹³ Cheʼ maʼañic miʼ seb jilel jiñi lac wocol. An i wiñicob Jehová am bʌ i lʌtʼʌyob cabʌl wocol yicʼot contrajintel ti cabʌl jab. Laʼ lac ñaʼtan tiʼ tojlel jiñi hermano Anatoly Melnik, * chʼoyol bʌ ti Moldavia. 12 jaxto i jabilel cheʼ baqui ora jiñi xʼeʼtelob tsiʼ chucuyob i tat, tsiʼ yotsayob ti cárcel i tsiʼ chocoyob majlel ti Siberia, am bʌ 7000 kilómetro i ñajtlel yicʼot i familia. Tsaʼ ñumi jumpʼejl jab, i tsaʼ chojquiyob majlel jaʼel yaʼ ti Siberia jiñi Anatoly, i mamá, i tatuch, i chuchuʼ. Tsaʼ ñumi i yorajlel, i tsaʼ mejliyob ti majlel ti tempa bʌ tac, pero chaʼan miʼ cʼotelob yom miʼ xʌñob 30 kilómetro baqui an cabʌl hielo i cʌlʌxix tsʌñal. Cheʼ ñumeñix cabʌl jab, jiñi hermano Melnik tsiʼ ñusa uxpʼejl jab ti cárcel i maʼañic tsaʼ tem ajñi yicʼot i yijñam, i cʼabaʼ Lidiya, yicʼot i xchʼoc bʌ i yalobil an jaxto bʌ jumpʼejl i jabilel. Anquese tsiʼ lʌtʼʌ wocol tac ti cabʌl jab, Anatoly yicʼot i familia tsiʼ ñaʼtayob i chʌn chaʼleñob wersa. Ili ora Anatoly añix 82 i jabilel yicʼot ochem ti jiñi Comité i chaʼan sucursal am bʌ ti jumpʼejl país i chaʼan Asia. Lajal bajcheʼ Anatoly yicʼot Lidiya, laʼ lac mel bajcheʼ cʼamel mi lac mejlel tiʼ yeʼtel Jehová yicʼot laʼ lac chʌn lʌtʼ bajcheʼ tsaʼ lac mele ti wajali (Gá. 6:9).

14. ¿Chuqui yujil Pablo yom bʌ miʼ mel chaʼan miʼ taj jiñi i majtan?

¹⁴ Pablo yujil chaʼan mi caj i yujtesan jiñi ajñel yicʼot mi caj i taj i majtan. Come juntiquilʌch xñoptʼan bombil bʌ, miʼ pijtan jiñi i majtan chaʼan miʼ majlel ti panchan. Pero yujil chaʼan yomʌch miʼ chaʼlen wersa chaʼan miʼ cʼotel i taj (Fil. 3:14). Chaʼan miʼ coltan jiñi añoʼ bʌ ti Filipos chaʼan maʼañic miʼ mʌyob i wut yaʼ baqui yom cʼotelob, tiʼ subeyob jumpʼejl lajiya.

15. Pablo tsiʼ yʌlʌ jumpʼejl lajiya chaʼan bʌ jumpʼejl lumal, ¿bajcheʼ tsiʼ cʼʌñʌ chaʼan miʼ ñuqʼuesʌbeñob i pusicʼal jiñi añoʼ bʌ ti Filipos i miʼ chʌn chaʼleñob wersa?

¹⁵ Jiñi apóstol Pablo tsiʼ cʼajtesʌbeyob jiñi añoʼ bʌ ti Filipos chaʼan mi caj i majlelob ti panchan, cheʼ bajcheʼ yaʼañob i lumal (Fil. 3:20).  ¿Chucoch ñuc i cʼʌjñibal chaʼan maʼañic miʼ ñajʌtesañob? Come ti jimbʌ ora miʼ wen qʼuelob ti ñuc jiñi i lumal yaʼ ti Roma. * Pero jiñi xñoptʼan bombiloʼ bʌ mi caj i tajob ñumen wem bʌ yaʼ ti panchan. Jin chaʼan, ñumen ñuc i cʼʌjñibal cheʼ mi caj i yajñelob yaʼ tiʼ Yumʌntel Dios i mach jiñic yaʼ ti Roma. Jin chaʼan, Pablo tsiʼ ñuqʼuesʌbeyob i pusicʼal jiñi añoʼ bʌ ti Filipos yicʼot ili tʼan: «Yom jach mi laʼ wajñel ti utsʼat cheʼ bajcheʼ miʼ cʌntesañonla i wen tʼan Cristo» (Fil. 1:27). Jiñi tʼan am bʌ ti griego tsaʼ bʌ chaʼlenti ti traducir bajcheʼ «mi laʼ wajñel ti utsʼat», yom i yʌl, chaʼan mi laj cʼotel ti cʌjñel chaʼan chʼoyolonla ti jumpʼejl lumal. Wʌle bʌ ora, jiñi xñoptʼañob bombiloʼ bʌ jiñobʌch wem bʌ ejemplo come miʼ chʌn chaʼleñob wersa chaʼan miʼ cʼotel i tajob jiñi cuxtʌlel mach bʌ añic miʼ jilel yaʼ ti panchan.

16. Cheʼ bajcheʼ miʼ yʌl Filipenses 4:6, 7, ¿chuqui yom mi lac chʌn mel mi woli lac pijtan chumtʌl ti panchan o ila ti Lum?

¹⁶ Yomʌch mi lac chʌn chaʼlen wersa chaʼan mi lac taj lac majtan: Jiñi chumtʌl tiʼ pejtelel ora ti panchan o ti jumpʼejl Paraíso ila ti Lum. Mach yʌlʌyic chuqui woli lac ñusan, mach sujtic laj qʼuel jiñi tsaʼix bʌ laj cʌyʌ i mach la cʌcʼ chaʼan an chuqui miʼ mʌctañonla ti bej colel tiʼ chaʼan bʌ Dios (Fil. 3:16). Tajol mi laj qʼuel chaʼan wolito i jalʼan jiñi woli bʌ lac pijtan o tajol mach wen cʼocʼoñixla bajcheʼ ti ñaxan. I cheʼ jaʼel, an lʌtʼbil lac chaʼan wocol tac yicʼot ticʼlʌntel ti cabʌl jab. Mach yʌlʌyic chuqui woli lac ñusan, mach laj cʼojoʼtan lac bʌ, laʼ la cʌqʼuen tiʼ wenta Dios ti oración yicʼot jiñi la com bʌ. Jiñʌch mi caj i yʌqʼueñonla i ñʌchʼtʌlel lac pusicʼal (pejcan Filipenses 4:6, 7).

17. ¿Chuqui mi caj lac tsajin ti yambʌ temaj?

¹⁷ Cheʼ bajcheʼ juntiquil xʼajñel miʼ chaʼlen wersa chaʼan miʼ cʼotel yaʼ baqui yom, laʼ la cʌcʼ lac ñaʼtʌbal ti tsʼʌcʌl chaʼan mi laj cujtesan jiñi ajñel chaʼan bʌ laj cuxtʌlel. Cheʼ bajcheʼ cʼamel an lac pʼʌtʌlel yicʼot laj cʼocʼlel, laʼ lac chʌn chaʼlen wersa lac taj laj colel tiʼ chaʼan bʌ Dios yicʼot jiñi utsʼatax bʌ am bʌ tiʼ tojel lac wut. ¿Chuqui yom mi lac mel chaʼan mi lac chʌn chaʼlen wersa laj cʼotel yaʼ baqui la com? Jiñi yambʌ temaj mi caj i coltañonla lac ñaʼtan chuqui yom mi la cʌcʼ ti ñaxan yicʼot «chuqui tac ñumen ñuc bʌ i cʼʌjñibal» (Fil. 1:9, 10, TNM).