1. ¿Chuqui tsiʼ yʌqʼue Jehová jujuntiquil i wiñicob?

JEHOVÁ miʼ cʼuxbiñonla, jin chaʼan tsiʼ yʌcʼʌ chaʼan jujuntiquilonla mi la cajñel yaʼ tiʼ congregación. Anquese mach junlajalic jiñi eʼtel tac muʼ bʌ lac mel, luʼ an laj cʼʌjñibal i wersa yom mi laj coltan lac bʌ. Ili ñuc bʌ cʌntesʌntel jiñʌch muʼ bʌ i coltañonla Pablo chaʼan mi lac chʼʌmben i sujm. ¿Bajcheʼ?

2. Cheʼ bajcheʼ miʼ yʌl Efesios 4:16, ¿chucoch yom mi laj qʼuel lac bʌ ti ñuc yicʼot mi laj coltan lac bʌ?

² Cheʼ bajcheʼ miʼ yʌl jiñi texto baqui chucul ili estudio, Pablo tsiʼ yʌlʌ chaʼan mach mejlic laj qʼuel juntiquil i wiñic Jehová i mi lac ñaʼtan: ‹Maʼañic a cʼʌjñibal› (1 Co. 12:21). Chaʼan ñʌchʼʌl miʼ yajñel jiñi congregación, yom mi laj qʼuel lac bʌ ti ñuc yicʼot mi laj coltan lac bʌ (pejcan Efesios 4:16). Cheʼ temel mi la cajñel, mi lac pʼʌtʼesan lac bʌ yicʼot cʼuxbibil mi la cubin lac bʌ.

3. ¿Chuqui mi caj laj qʼuel ti ili estudio?

³ ¿Bajcheʼ tac miʼ mejlel lac pʌs chaʼan mi laj qʼuel ti ñuc jiñi la quermañujob? Ti ili estudio, mi caj lac ñaxan qʼuel bajcheʼ miʼ mejlel i chʼʌmob i bʌ ti ñuc jiñi ancianojob. Yaʼi, mi caj laj qʼuel bajcheʼ miʼ mejlel lac pʌs chaʼan mi laj qʼuel ti ñuc jiñi hermanojob yicʼot jiñi hermanajob mach bʌ ñujpuñemobic. I ti wiʼil, mi caj laj qʼuel bajcheʼ miʼ mejlel lac pʌs chaʼan mi laj cʼuxbin jiñi la quermañujob mach bʌ wen yujilobic jiñi lac tʼan.

4. ¿Baqui bʌ i ticʼojel Pablo am bʌ ti Romanos 12:10 yom bʌ miʼ jacʼob jiñi ancianojob?

⁴ Jujuntiquil jiñi ancianojob waʼchocobilob tiʼ yespíritu Jehová, pero mach junlajalic chuqui yujilob i melol (1 Co. 12:17, 18). Tajol an tsaʼ jaxto bʌ tsijib waʼchocontiyob i maxto wen cabʌlic chuqui wen yujilob, i an maʼix bʌ cabʌl chuqui miʼ mejlel i wen melob chaʼan ñoxobix o cʼamob. Pero mi juntiquilic anciano yom miʼ qʼuel i piʼʌl i miʼ ñaʼtan: ‹Maʼañic a cʼʌjñibal›. Yom bʌ miʼ melob jiñʌch cheʼ miʼ jacʼbeñob i ticʼojel Pablo muʼ bʌ lac taj ti Romanos 12:10 (pejcan).

5. ¿Bajcheʼ miʼ pʌsob jiñi ancianojob chaʼan miʼ qʼuelob ti ñuc jiñi i piʼʌlob, i chucoch ñuc i cʼʌjñibal chaʼan cheʼʌch miʼ melob?

⁵ Jiñi ancianojob miʼ pʌsob chaʼan miʼ qʼuelob ti ñuc jiñi yambʌ ancianojob cheʼ bʌ miʼ ñʌchʼtañob chuqui miʼ yʌlob. Wen ñuc i cʼʌjñibal iliyi cheʼ bʌ miʼ tempañob i bʌ chaʼan miʼ chajpañob wen ñuc bʌ i cʼʌjñibal. ¿Chucoch? Laʼ laj qʼuel chuqui tsiʼ yʌlʌ jiñi revista La Atalaya 1 i chaʼan octubre cheʼ ti 1988: «Jiñi ancianojob yujilob chaʼan Cristo miʼ mejlel i cʼʌn jiñi chʼujul bʌ espíritu chaʼan miʼ cʼʌn juntiquil anciano ochem bʌ ti jiñi junmojt ancianojob chaʼan miʼ yʌl jumpʼejl principio loqʼuem bʌ ti Biblia chaʼan miʼ tojʼesʌntel baqui jach bʌ wocol o cheʼ an chuqui miʼ ñaʼtʌntel chaʼan yom miʼ mejlel (Hch. 15:6-15). Tiʼ pejtelelob jiñi junmojt ancianojob miʼ coltʌntelob ti chʼujul bʌ espíritu, mach cojach juntiquil».

6. a) ¿Chuqui mi caj i coltan jiñi ancianojob chaʼan temel miʼ chaʼleñob eʼtel? b) ¿Bajcheʼ mi taj i wenlel jiñi congregación?

⁶ Mi juntiquil anciano miʼ qʼuel ti ñuc i piʼʌlob, mach jiñic mi caj i ñaxan acʼ i bʌ ti tʼan tiʼ pejtelel ora cheʼ bʌ miʼ tempañob i bʌ. Mach jiñic jach muʼ bʌ i bajñel cajel ti tʼan yicʼot yom bʌ chaʼan tiʼ pejtelel ora miʼ chʼʌjmel i tʼan. Tiʼ pecʼlel, mi caj i yʌl chuqui miʼ ñaʼtan yicʼot mi caj i ñʌchʼtan chuqui miʼ yʌl yambʌlob. Pero ñumen ñuc bʌ i cʼʌjñibal jiñʌch cheʼ mi caj i pejcan jiñi principio tac am bʌ ti Biblia yicʼot mi caj i jacʼ chuqui miʼ yʌl «jini xucʼul bʌ xʼeʼtel am bʌ cabʌl i ñaʼtʌbal» (Mt. 24:45-47).  Cheʼ bʌ miʼ pʌsbeñob i bʌ cʼuxbiya yicʼot miʼ chʼʌmob i bʌ ti ñuc jiñi ancianojob cheʼ an chuqui woli (choncol) i ñaʼtañob i mel, jiñi chʼujul bʌ i yespíritu Dios yaʼʌch an yicʼotob i miʼ coltañob chaʼan jiñi muʼ bʌ i ñaʼtañob i mel miʼ pʼʌtʼesan jiñi congregación (Stg. 3:17, 18).

7. ¿Chuqui tsiʼ ñaʼta Jesús tiʼ tojlelob jiñi mach bʌ ñujpuñemobic?

⁷ Ti laj congregación mach cojach an hermanojob ñujpuñemoʼ bʌ yicʼot familia tac añoʼ bʌ i yalobil, yaʼañob jaʼel hermanojob yicʼot hermanajob mach bʌ ñujpuñemobic. ¿Bajcheʼ yilal yom mi laj qʼuelob ili hermanojob mach bʌ ñujpuñemobic? Laʼ laj cʼajtesan chuqui tsiʼ yʌlʌ Jesús tiʼ tojlelob. Cheʼ bʌ tsajñi ila ti Lum, maʼañic tsaʼ ñujpuñi i tsiʼ ñumen aqʼue i yorajlel i subtʼan. Maʼañic baqui ora tsiʼ yʌlʌ chaʼan jiñi xñoptʼañob yomʌch miʼ wersa ñujpuñelob o chaʼan maʼañic miʼ ñujpuñelob. Pero tsaʼʌch i yʌlʌ chaʼan an xñoptʼañob muʼ bʌ caj i ñaʼtañob chaʼan mach yomob ñujpuñel (Mt. 19:11, 12). Tsiʼ qʼuele ti ñuc jiñi mach bʌ ñujpuñemobic yicʼot maʼañic tsiʼ ñaʼta chaʼan maʼañobic i cʼʌjñibal o chaʼan anto chuqui yomob i chaʼan.

8. Cheʼ bajcheʼ tsiʼ yʌlʌ Pablo ti 1 Corintios 7:7-9, ¿chuqui tsaʼ subentiyob i ñaʼtan jiñi xñoptʼañob?

⁸ Cheʼ bajcheʼ Jesús, jiñi apóstol Pablo cʼʌlʌl cheʼ bʌ tsaʼ caji i melben i yeʼtel Dios maʼañic i yijñam tsaʼ ajñi. Maʼañic baqui ora tsiʼ yʌlʌ chaʼan mach weñic cheʼ an majqui miʼ ñujpuñel. Yujil chaʼan jujuntiquil an tiʼ wenta miʼ yajcan chuqui yom. Pero tiʼ sube jiñi xñoptʼañob chaʼan mi mejl i melbeñob i yeʼtel Jehová cheʼ bʌ maʼañic miʼ ñujpuñelob (pejcan 1 Corintios 7:7-9). Pablo maʼañic tsiʼ pʼaja jiñi mach bʌ ñujpuñemobic. Yaʼ mi laj qʼuel cheʼ bʌ tsiʼ yajca jiñi xcolel Timoteo come mach ñujpuñemic chaʼan miʼ qʼuel ñuc tac bʌ eʼtel (Fil. 2:19-22). * Jin chaʼan, mach yomic mi lac ñaʼtan chaʼan juntiquil hermano ñumen chajpʌbil cheʼ bʌ ñujpuñem o chaʼan ñumen chajpʌbil cheʼ bʌ mach ñujpuñemic (1 Co. 7:32-35, 38).

9. ¿Chuqui miʼ mejlel la cʌl chaʼan jiñi ñujpuñemoʼ bʌ o jiñi i bajñelob jach bʌ?

⁹ Jesús yicʼot Pablo maʼañic tsiʼ yʌlʌyob chaʼan wersa yom mi lac ñujpuñel o chaʼan lac bajñel jach yom mi laj cʌytʌl. Cheʼ jiñi, ¿chuqui miʼ mejlel la cʌl chaʼan jiñi ñujpuñemoʼ bʌ o jiñi i bajñelob jach bʌ? Ti jiñi revista La Atalaya  1 i chaʼan octubre cheʼ ti 2012 tsiʼ yʌlʌ: «Miʼ mejlel laj qʼuel bajcheʼ jumpʼejl majtañʌl cheʼ an majqui ñujpuñem o maʼañic. [...] Jehová maʼañic miʼ ñaʼtan chaʼan jiñi i bajñelob jach bʌ yom miʼ quisñiñob i bʌ o miʼ yubiñob i chʼijiyemlel chaʼan mach ñujpuñemobic». Tiʼ sujm, yom mi laj qʼuelob ti ñuc jiñi mach bʌ ñujpuñemobic yaʼ ti laj congregación.

10. ¿Bajcheʼ miʼ mejlel lac pʌs chaʼan mi laj qʼuel ti ñuc jiñi i bajñelob jaxto bʌ?

¹⁰ ¿Bajcheʼ miʼ mejlel lac pʌs chaʼan mi laj qʼuel ti ñuc bajcheʼ miʼ yubiñob i bʌ yicʼot bajcheʼ yilal woliʼ ñusañob jiñi i bajñelob jaxto bʌ? Yom mi laj cʼajtesan chaʼan an xñoptʼañob i bajñelob jaxto bʌ come cheʼʌch tsiʼ ñaʼtayob ajñel. Añʌch yomoʼ bʌ ñujpuñel, pero maxto tajbilic i chaʼañob jiñi yomoʼ bʌ i pʌy. Yambʌlob tsaʼix chʌmiyob i piʼʌl. Mach yʌlʌyic bajcheʼ yilal añob, pero mach yomic mi laj cʼajtibeñob chucoch mach ñujpuñemobic o mi lac subeñob chaʼan mi laj coltañob i sʌclañob i piʼʌl. Tajol añʌch muʼ bʌ caj i cʼajtibeñonla chaʼan mi laj coltañob. Pero mi maʼañic miʼ cʼajtiñob laj coltaya, laʼ lac ñaxan ñaʼtan bajcheʼ yubil mi caj i yubiñob mi an chuqui miʼ cʼotel lac subeñob (1 Ts. 4:11; 1 Ti. 5:13). Laʼ laj qʼuel chuqui an i yʌlʌyob chaʼtiqui uxtiquil hermanojob yicʼot hermanajob i bajñelobto bʌ.

11, 12. ¿Bajcheʼ miʼ mejlel la cʌqʼueñob i yubin i chʼijiyemlel jiñi i bajñelobto bʌ anquese mach yʌlolic lac chaʼan?

¹¹ Juntiquil superintendente i chaʼan circuito i bajñelto bʌ muʼ bʌ i mel ti wen i yeʼtel miʼ yʌl chaʼan cabʌlʌch i wenlel cheʼ bʌ mach ñujpuñemic. An qʼuiñil miʼ yubin i chʼijiyemlel cheʼ bʌ an hermanojob muʼ bʌ i cʼajtibeñob chucoch maxto añic i yijñam, anquese mach chaʼañic i jontolil miʼ cʼajtibeñob. Juntiquil hermano am bʌ ti Betel maxto bʌ ñujpuñemic miʼ yʌl: «An qʼuiñil mic ñaʼtan chaʼan jiñi hermanojob pʼumpʼum jax miʼ qʼuelob jiñi maxto bʌ ñujpuñemobic, i miʼ qʼuelob bajcheʼ jumpʼejl wocol cheʼ i bajñelobto i maʼañic miʼ qʼuelob bajcheʼ jumpʼejl majtañʌl».

¹² Juntiquil hermana am bʌ ti Betel i bajñel jaxto bʌ miʼ yʌl: «An hermanojob muʼ bʌ i yʌlob chaʼan jiñi i bajñelobto bʌ yomobʌch ñujpuñel, jin chaʼan miʼ majlelob ti qʼuiñijel tac chaʼan miʼ sʌclañob muʼ bʌ mejlel i pʌyob. Ti jumpʼejl bʌ qʼuin tsaʼ chojquiyon majlel c mel jumpʼejl eʼtel ti yambʌ país, ti acʼʌlelix tsaʼ cʼotiyon i an tempa bʌ. Jiñi hermana baqui mi caj cʌytʌl tiʼ subeyon chaʼan yaʼ tiʼ congregación an chaʼtiquil hermano lajal bʌ i jabilelob quicʼot. Tiʼ subeyon chaʼan maʼañic woliʼ sʌclan c novio, pero cheʼ bʌ tsaʼ ochiyon lojon yaʼ tiʼ Yotlel tempa bʌ tsiʼ chucuyon majlel baʼan jiñi chaʼtiquil hermanojob chaʼan mij cʌñob. ¡Ti lon cuxticlel tsaʼ lon cubi quisin!».

13. ¿Chuqui tsiʼ colta juntiquil hermana i bajñelto bʌ?

¹³ Yambʌ hermana am bʌ ti Betel i bajñel jaxto bʌ miʼ yʌl: «J cʌñʌyob precursorob i bajñelobto bʌ añobix bʌ i jabilel pʼisbil jach bʌ chuqui miʼ melob, yujiloʼ bʌ chuqui yomob, yomʌch bʌ i coltan yambʌlob, tijicñayoʼ bʌ woliʼ melbeñob i yeʼtel Jehová yicʼot miʼ wen coltañob jiñi i congregación. Maʼañic miʼ ñumelob ti pʼis come mach ñumen ñuc miʼ yubiñob i bʌ chaʼan i bajñelobto i maʼañic miʼ ñaʼtañob chaʼan maʼañobic i cʼʌjñibal tiʼ caj mach ñujpuñemobic yicʼot maʼañobic i yalobil». Wen utsʼatax ajñel ti jumpʼejl congregación baqui mi laj qʼuejlel ti ñuc, maʼañic lac tsʼaʼlentel yicʼot junlajal mi laj qʼuejlel. Luʼ cʼuxbibil mi la cubin lac bʌ.

14. ¿Bajcheʼ mi lac pʌs chaʼan mi laj qʼuelob ti ñuc jiñi i bajñelobto bʌ?

¹⁴ Jiñi la quermañujob i bajñelobto bʌ miʼ  mulañob chaʼan mi laj qʼuelbeñob wem bʌ i melbalob i mach jiñic cheʼ bʌ mi la cʌlob. Mach yom pʼumpʼum jax mi laj qʼuelob. Laʼ laj qʼuel ti ñuc jiñi i xucʼtʌlelob. Mi cheʼʌch mi lac mel, maʼañic mi caj i yubiñob chaʼan woli (yʌquel) lac subeñob: ‹Maʼañic laʼ cʼʌjñibal› (1 Co. 12:21). Mi caj la cʌqʼueñob i ñaʼtan chaʼan mucʼʌch laj qʼuelob ti ñuc yaʼ ti congregación.

15. ¿Chuqui an i mele cabʌl hermanojob chaʼan miʼ ñumen chaʼleñob subtʼan?

¹⁵ Ti jiñi jabil tac ñumen bʌ tilel, cabʌl xsubtʼañob an i ñaʼtayob i cʌn yambʌ tʼan chaʼan miʼ ñumen chaʼleñob subtʼan. Chaʼan miʼ melob iliyi, cabʌl chuqui an i meleyob. An majlemob ti jumpʼejl congregación baqui yujilob yambʌ tʼan (Hch. 16:9). Ili jujuntiquilix an tiʼ wenta miʼ ñaʼtan mi yom i mel. Anquese cabʌl jab miʼ ñumel chaʼan miʼ cʌñob ti wen yambʌ tʼan, miʼ wen coltañob jiñi congregación. Jiñi wem bʌ i melbalob (chaʼlibalob) yicʼot chuqui yujiloʼ bʌ, miʼ pʼʌtʼesañob jiñi hermanojob. Tiʼ sujm, mi laj qʼuel ti ñuc jiñi muʼ bʌ i melob.

16. ¿Chuqui yom miʼ qʼuelob jiñi ancianojob chaʼan miʼ yʌlob chaʼan weñix cheʼ miʼ waʼchocontel juntiquil hermano?

¹⁶ ¿Wem ba cheʼ jiñi junmojt ancianojob miʼ yʌlob chaʼan mach weñic cheʼ miʼ waʼchocontel juntiquil hermano ti anciano o ti siervo ministerial tiʼ cajach chaʼan maxto wen yujilic jiñi tʼan yujil bʌ jiñi congregación? Maʼañic. Jiñi muʼ bʌ caj i qʼuelob tiʼ tojlel jiñi hermano jiñʌch chaʼan miʼ mucʼʌch i tsʼʌctesan muʼ bʌ i cʼajtintel tiʼ tojlel jiñi ancianojob yicʼot jiñi siervo ministerialob, mach chaʼañic wen yujilix jiñi tʼan (1 Ti. 3:1-10, 12, 13; Tit. 1:5-9).

17. ¿Chuqui yom miʼ yajcan jiñi familia muʼ bʌ i majlel ti chumtʌl ti yambʌ país?

¹⁷ An familia tac am bʌ majlemob ti chumtʌl ti yambʌ país tiʼ caj jiñi wocol tac baqui tilemob o chaʼan miʼ sʌclañob eʼtel. Tajol jiñi i yalobilob miʼ majlelob ti jumpʼejl escuela ti jiñi tʼan yujiloʼ bʌ ti jiñi país baqui tsaʼ cʼotiyob i jiñi tatʌlob yom miʼ cʌñob jaʼel chaʼan miʼ yʌqʼuentelob troñel. Pero laʼcu lac ñaʼtan chaʼan an jumpʼejl congregación o jumpʼejl grupo yujiloʼ bʌ jiñi i tʼan. ¿Baqui yom miʼ majlelob? ¿Ti jiñi tʼan yujiloʼ bʌ o ti jiñi tʼan yujil bʌ jiñi país?

18. Cheʼ bajcheʼ miʼ yʌl Gálatas 6:5, ¿bajcheʼ miʼ mejlel lac pʌs chaʼan mi laj qʼuel ti ñuc chuqui tsiʼ yajca i mel jiñi i jol familia?

¹⁸ Jiñi i jol familia yom miʼ yajcan baqui bʌ congregación mi caj i majlelob. Jin chaʼan, yom miʼ ñaʼtan chuqui ñumen wen chaʼan jiñi i familia (pejcan Gálatas 6:5). Come jin an ti wenta jiñi i jol familia i ñaʼtan chuqui mi caj i mel, mach yom mi la cotsan lac bʌ. Laʼ laj qʼuel ti wen chuqui miʼ yajcan i mel i laʼ lac chʼʌmob ti wen jiñi familia yaʼ ti congregación (Ro. 15:7).

19. ¿Chuqui yom miʼ mel jiñi i jol familia mi jiñi i yalobilob maʼañic miʼ wen chʼʌmbeñob i sujm jiñi tʼan yujil bʌ jiñi congregación?

¹⁹ Tajol an familia tac ti jumpʼejl congregación  ti jiñi tʼan yujiloʼ bʌ i tat i ñaʼ. Pero mi jiñi i yalobilob miʼ majlelob ti jumpʼejl escuela ti jiñi tʼan yujiloʼ bʌ ti jiñi país, tajol mach wen yujilobix jiñi tʼan yujiloʼ bʌ i tat i ñaʼ. Jin chaʼan, tajol wocol miʼ yubiñob chaʼan miʼ chʼʌmbeñob i sujm muʼ bʌ i yʌjlel yaʼ ti tempa bʌ tac yicʼot chaʼan miʼ pʼʌtʼañob tiʼ chaʼan bʌ Dios. Cheʼ miʼ yujtel iliyi, jiñi i jol jiñi familia yom miʼ mel oración yicʼot miʼ ñaʼtan chuqui yom miʼ mel chaʼan miʼ coltan jiñi i yalobilob chaʼan ñumen lʌcʼʌl miʼ yubiñob i bʌ tiʼ tojlel Jehová yicʼot i tejclum. An chaʼchajp muʼ bʌ i mejlel i melob: O miʼ wen cʌntesañob jiñi i yalobilob ti jiñi tʼan yujiloʼ bʌ, o miʼ majlelob ti jumpʼejl congregación ti jiñi tʼan muʼ bʌ i wen chʼʌmbeñob i sujm jiñi i yalobilob. Ti jiñi congregación baqui miʼ ñaʼtañob majlel, jiñi hermanojob yom miʼ yʌqʼueñob i yubin jiñi familia chaʼan mucʼʌch i qʼuejlelob ti ñuc.

20. ¿Bajcheʼ mi lac pʌs chaʼan mi laj qʼuelob ti ñuc jiñi woli bʌ i cʌñob yambʌ tʼan?

²⁰ Cheʼ bajcheʼ tsaʼix tac laj qʼuele, ti cabʌl congregación an hermanojob muʼ bʌ i chaʼleñob wersa i ñopob yambʌ tʼan. Tajol wocol miʼ yubiñob chaʼan miʼ yʌlob chuqui miʼ ñaʼtañob, pero mi mach jiñic jach mi laj qʼuel cheʼ maʼañic miʼ wen mejlelob, mi caj laj qʼuel chaʼan mucʼʌch i cʼuxbiñob Jehová yicʼot chaʼan yomʌch i melbeñob i yeʼtel. Jiñʌch muʼ bʌ caj i coltañonla chaʼan ti jumpʼejl lac pusicʼal mi laj qʼuelob ti ñuc. Maʼañic mi caj lac ñaʼtan chaʼan maʼañic i cʼʌjñibalob lac chaʼan tiʼ cajach mach wen yujilob lac tʼan.

21, 22. ¿Chucoch mi lac wen aqʼuen wocolix i yʌlʌ Jehová?

²¹ Mi la cʌqʼuen wocolix i yʌlʌ Jehová cheʼ miʼ yʌcʼonla ajñel tiʼ congregación. Mach yʌlʌyic mi wiñiconla o xʼixiconla, mi ñujpuñemonla o maʼañic, mi xcolelontola o ñoxoñixla, mi wen la cujil jumpʼejl tʼan o maʼañic: Tiʼ wut Jehová yicʼot ti jiñi hermanojob luʼ an laj cʼʌjñibal (Ro. 12:4, 5; Col. 3:10, 11).

²² Wen utsʼatax chuqui tsaʼ laj cʌñʌ ti jiñi ejemplo tsaʼ bʌ i yʌcʼʌ Pablo chaʼan jiñi lac bʌcʼtal. Mi mucʼʌch lac mel, mi caj lac sʌclan bajcheʼ miʼ mejlel lac ñumen pʌs chaʼan mi laj qʼuel ti ñuc cheʼ yaʼañonla tiʼ congregación Jehová yicʼot yambʌlob.