1, 2. Cheʼ bajcheʼ miʼ yʌl Salmo 34:8, ¿chuqui yom mi lac mel chaʼan mi laj qʼuelben i yutslel Jehová?

LAʼCU lac ñaʼtan chaʼan an majqui miʼ yʌqʼueñonla bʌlñʌcʼʌl mach bʌ añic baʼ lac wis cʼuxu. Miʼ mejlel lac mero ñaʼtan bajcheʼ yubil cheʼ bʌ mi laj qʼuel, mi la cujtsʼin, mi laj qʼuel bajcheʼ tsaʼ mejli o an majqui mi laj cʼajtiben mi miʼ mulan. Pero jin jach mi caj lac ñoj ñaʼtan mi mucʼʌch caj lac mulan cheʼ bʌ mi lac ñop.

² Lʌcʼʌ cheʼʌch miʼ yujtel jaʼel yicʼot jiñi i yutslel Jehová, chaʼan mi lac ñaʼtan bajcheʼ yilal yom mi lac pejcan jiñi Biblia, jiñi lac jun tac yicʼot mi la cubin tiʼ tojlel yambʌ hermanojob bajcheʼ an i tajayob bendición. Pero jinto mi caj lac ñaʼtan chaʼan Jehová utsʌch cheʼ bʌ mi lac ñop o mi laj qʼuel jiñi i yutslel ti lac tojlel (pejcan Salmo 34:8). Laʼ la cʌl jumpʼejl ejemplo. Laʼcu lac ñaʼtan chaʼan la com lac melben i yeʼtel (troñel) Jehová ti tsʼʌcʌl, pero chaʼan mi lac mel an chuqui tac yom bʌ mi laj cʌy. Tajol wen pejcʌbil lac chaʼan jiñi tsaʼ bʌ i yʌlʌ Jesús chaʼan, mi mucʼʌch la cʌcʼ ti ñaxan jiñi Yumʌntel, Jehová mi caj i yʌqʼueñonla chuqui i cʼʌjñibal lac chaʼan, pero maʼañic baʼ laj qʼuele ti tsʼʌctiyel ti lac tojlel ili tʼan (Mt. 6:33). Anquese maʼañic baʼ laj qʼuele, mach cabʌlix taqʼuin mi laj cʼʌn, mach cabʌlix mi lac chaʼan eʼtel i mi la cʌcʼ lac bʌ ti subtʼan come mi lac ñop jiñi tsaʼ bʌ i yʌlʌ Jesús. Cheʼ mi lac mel iliyi, mi laj qʼuel chaʼan Jehová mucʼʌch caj i cʌntañonla. I cheʼ bajcheʼ jiñi mi laj qʼuel jiñi i yutslel ti lac tojlel.

3. Cheʼ bajcheʼ miʼ yʌl Salmo 16:1, 2, ¿majqui miʼ tajob i yutslel Jehová?

³ Jehová «miʼ pʌsbeñob i yutslel i pusicʼal pejtel winicob xʼixicob»,  yicʼotto jiñi mach bʌ i cʌñʌyobic (Sal. 145:9; Mt. 5:45). Pero miʼ ñumen aqʼuen i bendición jiñi muʼ bʌ i cʼuxbiñob yicʼot muʼ bʌ i melbeñob i yeʼtel ti jumpʼejl i pusicʼal (pejcan Salmo 16:1, 2). Laʼ laj qʼuel chuqui tac wem bʌ an i mele ti lac tojlel.

4. ¿Bajcheʼ miʼ pʌs i yutslel Jehová tiʼ tojlel jiñi muʼ bʌ i tech i lʌcʼtesañob i bʌ tiʼ tojlel?

⁴ Jajayajl mi lac jacʼ muʼ bʌ laj cʌn tiʼ tojlel Jehová, mi laj qʼuelben jiñi i wenlel. Cheʼ bʌ tsaʼ laj cʌñʌ tiʼ tojlel i tsaʼ cʼoti laj cʼuxbin, tsiʼ coltayonla laj qʼuextan jiñi lac pensar yicʼot lac melbal (chaʼlibal) ñajt bʌ an i chaʼañonla tiʼ tojlel (Col. 1:21). I cheʼ bʌ tsaʼ la cʌcʼʌ lac bʌ tiʼ tojlel i tsaʼ lac chʼʌmʌ jaʼ, tsiʼ ñumen pʌsbeyonla i yutslel cheʼ bʌ tsiʼ yʌqʼueyonla sʌc bʌ laj conciencia yicʼot chaʼan ñumen lʌcʼʌl mi la cajñel tiʼ tojlel (1 P. 3:21).

5. ¿Bajcheʼ tac an laj qʼuelbe i yutslel Jehová ti lac subtʼan?

⁵ Yaʼ ti subtʼan, cabʌl bajcheʼ qʼuelbil lac chaʼan i yutslel Jehová. ¿A wujil ba bʌqʼuen? Cabʌl i wiñicob Jehová cheʼoʼ bʌ bajcheʼ jiñi. Tajol cheʼ bʌ maxto a cʌñʌ jiñi i sujmlel maʼañic baʼ tsaʼ ñaʼta chaʼan mi caj a majlel a jatsʼben i tiʼ i yotot juntiquil mach bʌ a cʌñʌyic chaʼan maʼ suben chuqui miʼ yʌl jiñi Biblia. Pero wʌle muqʼuix a wen mel. Tiʼ coltaya Jehová, tsaʼ cʌñʌ a ñusan a bʌ ti subtʼan yicʼot an a wubi bajcheʼ yan tac bʌ an i coltayet. Jumpʼejl ejemplo, an i coltayet chaʼan maʼañic maʼ michʼan cheʼ bʌ an majqui miʼ ticʼlañet yaʼ ti subtʼan. Cheʼ jaʼel, an i coltayet chaʼan maʼ cʼajtesan jiñi texto a wom bʌ a pejcan cheʼ bʌ an majqui woli (choncol) i ñʌchʼtañet ti wen. I tsiʼ yʌqʼueyet a pʼʌtʌlel chaʼan maʼ bej chaʼlen wersa cheʼ bʌ mach yomobic i ñʌchʼtañetob yaʼ ti territorio (Jer. 20:7-9).

6. ¿Bajcheʼ mi laj qʼuelben i yutslel Jehová cheʼ bʌ miʼ chajpañonla?

⁶ Jehová an i pʌsbeyonla i yutslel jaʼel cheʼ miʼ chajpañonla chaʼan jiñi subtʼan (Jn. 6:45). Ti jiñi tempa bʌ Subtʼan yicʼot Melbalʌl miʼ pʌstʌl muʼ bʌ i mejlel la cʌl ti subtʼan i mi lac subentel chaʼan mi laj cʼʌn. Tajol mi lac tsʼitaʼ chaʼlen bʌqʼuen cheʼ bʌ an chuqui tsijiʼ bʌ mi caj lac mel. Pero mi mucʼʌch lac mel, mi caj laj qʼuel chaʼan mucʼʌch i coltañonla ti lac territorio. Yaʼ ti tempa bʌ tac yicʼot ti colem tempa bʌ mi lac subentel chaʼan mi lac chaʼlen subtʼan ti jujunchajp bajcheʼ yom. Tajol an mach bʌ ñʌmʌlic lac mel. Pero mi mucʼʌch lac mel, woli (yʌquel) lac mel junchajp baqui miʼ mejlel i yʌcʼ i bendición Jehová. Wʌle, laʼ laj qʼuel chuqui tac wem bʌ miʼ yʌqʼueñonla Jehová cheʼ bʌ mi laj qʼuel bajcheʼ miʼ mejlel lac ñumen melben i yeʼtel mach yʌlʌyic bajcheʼ añonla. Cheʼ jiñi mi caj laj qʼuel chuqui miʼ mejlel lac mel chaʼan mi lac taj jiñi lac meta tac.

7. ¿Chuqui ti bendición tac mi lac taj cheʼ mi lac chaʼlen wersa lac ñumen melben i yeʼtel Jehová?

⁷ Mi lac ñumen lʌcʼtesan lac bʌ ti Jehová. Laʼ laj qʼuel chuqui tsiʼ mele juntiquil anciano i cʼabaʼ Samuel, * woli bʌ ti coltaya yicʼot i yijñam ti Colombia. Tijicñayob bajcheʼ precursor yaʼ ti congregación baqui chʼoyolob, pero tsiʼ ñumen mulayob coltaya ti jumpʼejl congregación baqui ñumen yomto coltʌntel. Chaʼan miʼ mejlelob, an chuqui tac tsiʼ cʌyʌyob. Samuel miʼ yʌl: «Tsaʼ lon c mele muʼ bʌ i yʌl Mateo 6:33 i tsaʼ j cʌyʌ lon c mʌn jiñi mach bʌ wen ñuquic i cʼʌjñibal. Pero ñumen wocol bʌ tsaʼ lon cubi jiñʌch cheʼ mi lon j cʌy jiñi lon cotot, c chaʼañʌch lojon tsaʼ mejli i luʼ tojbilix». Yaʼ ti i tsijib asignación tsiʼ qʼueleyob chaʼan mach cabʌlix taqʼuin yomob. Samuel miʼ yʌl: «An lon j qʼuele bajcheʼ Jehová miʼ coltañon lon ti chuqui mi  lon c mel i miʼ jacʼ lon coración. Wʌle mic ñumen qʼuelben lojon jiñi i yutslel yicʼot i cʼuxbiya». ¿Am ba bajcheʼ miʼ mejlel a ñumen melben i yeʼtel Jehová? Mi añʌch, miʼ mejlel a ñop chaʼan mi caj a ñumen lʌcʼtesan a bʌ tiʼ tojlel yicʼot chaʼan mi caj i cʌntañet (Sal. 18:25).

8. ¿Chuqui maʼ cʌn ti chuqui miʼ yʌl Iván yicʼot Viktoria?

⁸ Jiñi la queʼtel ti Jehová miʼ yʌqʼueñonla lac tijicñʌyel. Laʼ lac ñaʼtan tsaʼ bʌ i yʌlʌ Iván yicʼot Viktoria, jumpʼejl xñujpuñel precursoroʼ bʌ añoʼ bʌ ti Kirguistán. Cabʌl chuqui tsiʼ cʌyʌyob chaʼan miʼ mejlel i melob baqui jach bʌ eʼtel, jumpʼejl jiñʌch jiñi construcción. Iván miʼ yʌl: «Mic wen chaʼlen lon wersa ti jujumpʼejl proyecto. Anquese lujbon lon mi lon cujtel mi cubin lon c ñʌchʼtʌlel yicʼot tijicñayon lon, come cujil lojon chaʼan tsaʼ lon j cʼʌñʌ lon c pʼʌtʌlel ti jiñi eʼtel chaʼan bʌ Yumʌntel. Jiñi lon camigojob tsaʼ bʌ lon c taja yicʼot jiñi cʼajal tac bʌ lon c chaʼan miʼ yʌqʼueñon lojon c tijicñʌyel» (Mr. 10:29, 30).

9. ¿Chuqui tsiʼ mele juntiquil hermana wocol bʌ bajcheʼ an chaʼan miʼ ñumen chaʼlen subtʼan, i chuqui tsiʼ taja?

⁹ Cheʼ mi lac melben i yeʼtel Jehová miʼ mejlel la cubin lac tijicñʌyel anquese wocol bajcheʼ añonla. Jumpʼejl ejemplo, juntiquil hermana viuda bʌ yicʼot ñoxix bʌ chʼoyol bʌ ti África Occidental i cʼabaʼ Mirreh, doctora ti ñaxan. Cheʼ bʌ tsiʼ cʌyʌ jiñi i yeʼtel, tsaʼ ochi ti precursora. An i chaʼan artritis ñijlemix bʌ i jajayajl miʼ loqʼuel ti subtʼan ti ototʌl tac jumpʼejl jach ora miʼ lʌtʼ, pero miʼ ñumen mejlel ti subtʼan baqui an cabʌl lac piʼʌlob. Cheʼ jaʼel, cabʌl i revisita yicʼot i estudio, i an ti teléfono bʌ miʼ yʌcʼ. ¿Chuqui tsiʼ ñijca chaʼan miʼ ñumen melben i yeʼtel Jehová? Miʼ yʌl: «Mic wen cʼuxbin Jehová yicʼot Jesucristo. Mic chʌn cʼajtiben Jehová chaʼan miʼ coltañon chaʼan mic ñumen melben i yeʼtel cheʼ bajcheʼ cʼamel mic mejlel» (Mt. 22:36, 37).

10. Cheʼ bajcheʼ miʼ pʌs Juan 6:45, ¿chuqui miʼ yʌcʼ Jehová tiʼ tojlel jiñi muʼ bʌ i chaʼleñob wersa i ñumen melbeñob i yeʼtel?

¹⁰ Jehová an bajcheʼ yan tac bʌ miʼ chajpañonla. Kenny, juntiquil precursor am bʌ ti Mauricio, tsiʼ qʼuele chaʼan i sujmʌch iliyi. Cheʼ bʌ tsiʼ cʌñʌ jiñi i sujmlel, tsiʼ cʌyʌ jiñi universidad, tsiʼ chʼʌmʌ jaʼ i tsaʼ caji i melben i yeʼtel Jehová ti tsʼʌcʌl. Miʼ yʌl: «Mic chaʼlen wersa chaʼan mic lajin jiñi xʼaltʼan Isaías, tsaʼ bʌ i yʌlʌ: ‹Um baʼ añon c Yum. Chocoyon majlel›» (Is. 6:8). Kenny an i chaʼle eʼtel ti cabʌl proyecto chaʼan construcción yicʼot chaʼan miʼ chaʼlentel ti traducir tiʼ tʼan jiñi lac jun tac. Miʼ yʌl: «Tsaʼ cʌntesʌntiyon bajcheʼ yom mic mel jiñi queʼtel tac». Pero mach tsaʼic jach i cʌñʌ bajcheʼ yom miʼ mel jiñi i yeʼtel. Miʼ bej al: «Tsaʼ j cʌñʌ baqui jaxʌl chuqui miʼ mejlel c mel yicʼot baqui tac bʌ melbalʌl yom mic taj chaʼan ñumen wen mic melben i yeʼtel Jehová» (pejcan Juan 6:45). ¿Chucoch maʼañic maʼ qʼuel bajcheʼ yilal añet i maʼ qʼuel miʼ maʼ mejlel a ñumen chʼʌm a cʌntesʌntel ti Jehová?

11. ¿Chuqui tsiʼ meleyob uxtiquil hermanajob ti Corea del Sur chaʼan miʼ ñumen chaʼleñob subtʼan i chuqui tsiʼ tajayob? (Qʼuele jiñi foto am bʌ tiʼ tejchibal).

¹¹ Jiñi cabʌlix bʌ jab Testigojob miʼ tajob i wenlel jaʼel tiʼ jiñi cʌntesʌntel muʼ bʌ i yʌcʼ Jehová cheʼ bʌ an chuqui tsijiʼ bʌ miʼ mejlel. Tiʼ jiñi pandemia chaʼan COVID-19, jiñi ancianojob ti jumpʼejl congregación ti Corea del Sur tiʼ tsʼijbuyob: «Chaʼtiqui uxtiquil hermanojob mach bʌ mejlobic ti subtʼan tsiʼ ñaʼtayob ti ñaxan tiʼ cʼaj cʼamob, wʌle mucʼob ti subtʼan ti videollamada. Uxtiquil hermanajob ñumeñix bʌ ti 80 i jabilelob tsiʼ cʌñʌ i cʼʌñob iliyi, wʌle lʌcʼʌ tiʼ pejtelel ora miʼ chaʼleñob subtʼan» (Sal. 92:14, 15). ¿A wom ba a ñumen melben i yeʼtel Jehová i maʼ ñumen qʼuelben i yutslel? Jiñi muʼ bʌ caj i yʌjlel miʼ mejlel i coltañet.

12. ¿Baqui bʌ i tʼan miʼ yʌqʼuen Jehová jiñi muʼ bʌ i ñopob tiʼ tojlel?

¹² Cʌñʌ a ñop tiʼ tojlel Jehová. Mi mucʼʌch lac ñop tiʼ tojlel i mi la cʌqʼuen ñumen wem bʌ ti lac tojlel, miʼ yʌl chaʼan mi caj i yʌqʼueñonla cabʌl bendición (Mal. 3:10). Juntiquil hermana ti Colombia i cʼabaʼ Fabiola tsiʼ qʼuele bajcheʼ Jehová tiʼ tsʼʌctesa jiñi i tʼan. Yom sujtel ti precursora regular cheʼ bʌ tsaʼ jaxto i chʼʌmʌ jaʼ, pero miʼ wen coltan ti taqʼuin jiñi i ñoxiʼal yicʼot jiñi uxtiquil i yalobilob. Jin chaʼan, cheʼ bʌ muqʼuix i mejlel i chaʼlen i bʌ ti jubilar, tsiʼ wen cʼajtibe Jehová chaʼan miʼ coltan. Miʼ yʌl: «Jal miʼ mejlel jiñi trámite chaʼan jumpʼejl pensión, pero jiñi c chaʼan tiʼ jumpʼejlel jach uw tsaʼ jacʼbentiyon. Lajal bajcheʼ jumpʼejl milagro». Tiʼ chaʼpʼejlel uw tsaʼ ochi bajcheʼ precursora. Wʌle ñumeñix ti 70 i jabilel i ñumeñix ti 20 jab i cajel bajcheʼ precursora. Cʼʌlʌl ili ora, an i colta 8 lac piʼʌlob chaʼan miʼ chʼʌmob jaʼ. Miʼ yʌl: «An i tajol cʼuñon mi cubin, pero ti jujumpʼejl qʼuin mij cʼajtiben i coltaya Jehová chaʼan mic tsʼʌctesan jiñi c hora».

13, 14. ¿Chuqui ti ejemplo tac miʼ mejlel i coltañonla chaʼan mi lac ñop ti Jehová yicʼot chaʼan mi lac ñumen melben i yeʼtel?

¹³ Cʼʌñʌ tiʼ tojlel yañoʼ bʌ tsaʼ bʌ i ñopoyob Jehová. Ti Biblia mi lac taj cabʌl ejemplo chaʼan tsaʼ bʌ i chaʼleyob wersa i melben i yeʼtel Dios. Cabʌlob am bʌ chuqui tsiʼ ñaxan meleyob chaʼan Jehová miʼ yʌqʼueñob ñuc tac bʌ bendición. Jumpʼejl ejemplo, Dios jinto tsiʼ yʌqʼue bendición Abrahán cheʼ bʌ tsiʼ cʌyʌ i yotot «anquese mach ñaʼtʌbilic i chaʼan baqui woliʼ  majlel» (He. 11:8). Jacob jinto tsaʼ aqʼuenti ñuc bʌ bendición cheʼ bʌ tsiʼ chaʼle jatsʼ yicʼot juntiquil ángel (Gn. 32:24-30). I cheʼ bʌ jiñi tejclum Israel mi caj i yochel ti jiñi lum wʌn albil bʌ, jiñi tejclum jinto tsaʼ mejli i cʼaxtesan jiñi Jordán jaʼ cheʼ bʌ jiñi sacerdotejob tsaʼ ochiyob yaʼ ti jaʼ (Jos. 3:14-16).

¹⁴ Miʼ mejlel laj cʌn jaʼel tiʼ tojlel jiñi Testigojob am bʌ i ñopoyob ti Jehová i miʼ ñumen melbeñob i yeʼtel. Jumpʼejl ejemplo, juntiquil hermano i cʼabaʼ Payton yicʼot i yijñam i cʼabaʼ Diana miʼ wen mulañob i pejcan jiñi experiencia tac tiʼ tojlel hermanojob woli bʌ i ñumen melbeñob i yeʼtel Jehová, bajcheʼ jiñi am bʌ yaʼ ti serie «Se ofrecieron para ayudar». * Payton miʼ yʌl: «Cheʼ bʌ mi lon c pejcan, lajal bajcheʼ an majqui woli lon j qʼuel chaʼan woliʼ cʼux sumuc bʌ bʌlñʌcʼʌl. Cheʼ bʌ mi lon c ñumen qʼuel, ñumen com lon j qʼuelben i yutslel Jehová». Ti wiʼil, ili xñujpuñel tsaʼ majliyob baqui ñumen yomto coltʌntel. ¿Am ba a pejca ili temaj tac? ¿I am ba a qʼuele jiñi video tac Muʼ bʌ i yʌl yambʌ xcolelob: Maʼañic yambʌ ñumen wem bʌ yicʼot Mi lon c chaʼlen subtʼan «cʼʌlʌl ti ñajt bʌ pañimil», am bʌ ti jw.org? Pejtelel iliyi miʼ mejlel i coltañet a qʼuel bajcheʼ miʼ mejlel a ñumen melben i yeʼtel Jehová.

15. ¿Bajcheʼ miʼ mejlel i coltañonla jiñi muʼ bʌ lac ñochtañob?

¹⁵ Ñochtan muʼ bʌ i mejlel i coltañetob. Mach wocolic mi la cubin chaʼan mi laj cʼux jumpʼejl bʌlñʌcʼʌl maʼañic bʌ baʼ laj cʼuxu cheʼ mi la cajñel la quicʼotob muʼ bʌ i mulañob jiñi bʌlñʌcʼʌl. Cheʼ jaʼel, cheʼ mi lac ñochtañob jiñi muʼ bʌ i yʌcʼob i bʌ tiʼ melol i yeʼtel Jehová, mach wocolic mi caj la cubin chaʼan mi laj qʼuel bajcheʼ miʼ mejlel lac ñumen melben i yeʼtel. Jiñʌch tsaʼ bʌ ujti tiʼ tojlel Kent yicʼot Verónica. Kent miʼ yʌl: «Jiñi lon camigojob yicʼot jiñi lon c familia miʼ subeñon lojon chaʼan mi lon j qʼuel bajcheʼ yambʌ mi lon c melben i yeʼtel Jehová. Tsaʼ lon j qʼuele chaʼan cheʼ bʌ mic ñusan lon qʼuin quicʼot lojon jiñi muʼ bʌ i yʌcʼob ti ñaxan jiñi Yumʌntel miʼ coltañon lojon chaʼan mi lon j qʼuel chuqui yambʌ miʼ mejlel lon c mel». Ili ora, tiʼ chaʼticlelob precursorob ti Serbia.

16. Cheʼ bajcheʼ miʼ yʌl jiñi lajiya am bʌ ti Lucas 12:16-21, ¿chucoch añʌch chuqui tac yom bʌ mi laj cʌy?

¹⁶ An chuqui tac yom maʼ cʌy chaʼan maʼ melben i yeʼtel Jehová. Chaʼan mi la cʌqʼuen i tijicñʌyel Jehová, mach cʼʌñʌlic mi laj cʌy pejtelel chuqui wem bʌ (Ec. 5:19, 20). Pero mi maʼañic mi lac ñumen melben i yeʼtel Dios tiʼ caj jach an chuqui mach bʌ la comic laj cʌy, tajol woli lac lajin jiñi wiñic tsaʼ bʌ i yʌlʌ Jesús cabʌl bʌ chuqui an i chaʼan pero tsiʼ ñajʌtesa Dios (pejcan Lucas 12:16-21). Juntiquil hermano i cʼabaʼ Christian, chumul bʌ ti Francia, miʼ yʌl: «Maʼañic woli cʌqʼuen Jehová yicʼot c familia jiñi c pʼʌtʌlel yicʼot i yorajlel am bʌ c chaʼan cheʼ bajcheʼ yom». Christian yicʼot i yijñam tsiʼ ñaʼtayob ochel bajcheʼ precursor, pero chaʼan miʼ mejlelob tsiʼ cʌyʌyob i yeʼtel. Chaʼan miʼ mejlel i mʌcʼlañob i bʌ, tsaʼ caji i sujcuñob ototʌl tac i tijicñayob anquese mach cabʌlic i chubʌʼañob. ¿Tsaʼ ba i tajayob i wenlel? Miʼ yʌl: «Ñumen tijicña mi cubin lon c bʌ ti subtʼan yicʼot cheʼ mi lon j qʼuel chaʼan jiñi estudiantejob yicʼot jiñi lon c revisita miʼ ñumen cʌñob Jehová».

17. ¿Chucoch an maʼañic bʌ miʼ mulañob i sʌclan yan tac bʌ bajcheʼ miʼ chaʼleñob subtʼan?

¹⁷ Sʌclan bajcheʼ tac yambʌ maʼ mejlel ti subtʼan (Hch. 17:16, 17; 20:20, 21). Juntiquil precursora ti Estados Unidos i cʼabaʼ Shirley an chuqui tac tsiʼ qʼuexta tiʼ subtʼan cheʼ tiʼ yorajlel jiñi pandemia. Ti ñaxan miʼ bʌcʼñan  subtʼan ti teléfono. Pero cheʼ bʌ tsaʼ cʼoti jiñi superintendente i chaʼan circuito, tsaʼ pʌsbenti bajcheʼ miʼ mejlel i mel. I cʼʌlʌl jimbʌ ora tsaʼ caji i ñumen chaʼlen subtʼan ti teléfono. Miʼ yʌl: «Ti ñaxan mic wen bʌcʼñan, pero wʌleʼli mic wen mulan. Muʼto lon c ñumen chaʼlen tʼan quicʼot lon jiñi quixtañujob bajcheʼ jiñi subtʼan ti otot tac».

18. ¿Chuqui miʼ mejlel i coltañonla chaʼan mi lac ñusan jiñi wocol tac muʼ bʌ i mejlel i mʌctañonla chaʼan mi lac ñumen chaʼlen subtʼan?

¹⁸ Aqʼuen a bʌ jumpʼejl meta i chaʼlen wersa a tsʼʌctesan. Cheʼ bʌ mi lac ñusan wocol tac, mi lac pejcan Jehová i mi lac wen ñaʼtan chuqui mi caj lac mel (Pr. 3:21). Sonia, am bʌ bajcheʼ precursora regular ti jumpʼejl grupo ti Europa ti jiñi tʼan romaní, miʼ yʌl: «Mic mulan c tsʼijbun ti jun jiñi meta tac i mi cʌcʼ baqui miʼ mejlel j qʼuel. Yaʼ tic mesa an jumpʼejl dibujo baqui miʼ tilel chaʼpʼejl bij. Cheʼ bʌ an chuqui mic ñaʼtan c mel, mij qʼuel jiñi dibujo i mic ñaʼtan baqui mi caj i pʌyon majlel jiñi woli bʌ c ñaʼtan c mel». I cheʼ bʌ Sonia miʼ ñusan wocol tac, miʼ chaʼlen wersa chaʼan wen jach chuqui miʼ ñaʼtan. Miʼ yʌl: «Jujunchajp muʼ bʌ c ñusan miʼ mejlel ti lajintel bajcheʼ jumpʼejl muro muʼ bʌ i mʌctañon chaʼan mic taj c meta o bajcheʼ jumpʼejl puente muʼ bʌ i coltañon chaʼan mic taj. Yaʼʌch cʌyʌl ti bajcheʼ yilal mij qʼuel».

19. ¿Bajcheʼ miʼ mejlel lac pʌs chaʼan mi la cʌqʼuen wocolix i yʌlʌ Jehová chaʼan pejtelel chuqui wem bʌ am bʌ i yʌqʼueyonla?

¹⁹ Cabʌl bajcheʼ miʼ yʌqʼueñonla i bendición Jehová. Miʼ mejlel la cʌqʼuen wocolix i yʌlʌ cheʼ mi lac chaʼlen wersa chaʼan mi la cʌqʼuen i ñuclel (He. 13:15). Junchajp bajcheʼ mi lac mel jiñʌch cheʼ mi lac sʌclan bajcheʼ tac yambʌ mi lac mejlel ti subtʼan. Mi mucʼʌch lac mel, Jehová mi caj i ñumen aqʼueñonla i bendición. Jin chaʼan, laʼ lac chaʼlen wersa ti jujumpʼejl qʼuin chaʼan mi lac sʌclan bajcheʼ tac miʼ mejlel laj qʼuel chaʼan Jehová añʌch i yutslel. Mi cheʼʌch mi lac mel, mi caj la cʌl bajcheʼ Jesús: «Jiñʌch c weʼel cheʼ mic mel chuqui yom c Tat tsaʼ bʌ i chocoyon tilel. Jiñʌch c weʼel cheʼ tsʼʌcʌl mic melben i yeʼtel» (Jn. 4:34).