¿Wen pejcʌbilix baʼ chaʼan jiñi temaj tac maxto bʌ wen jalic loqʼuem ti Lac Tsictesʌbentel? Qʼuele mi mucʼʌch i mejlel a jacʼ ili cʼajtiya tac:

¿Chuqui mi lac taj yaʼ ti Biblia muʼ bʌ i pʌs chaʼan Dios mucʼʌch i yubin bajcheʼ yubil mi la cubin lac bʌ?

Cheʼ bʌ jiñi israelob tsaʼ cʌjchiyob majlel ti Egipto, Dios yujil chaʼan wolʌch i ñusañob wocol yicʼot tsaʼʌch i yubi bajcheʼ yubil miʼ yubiñob i bʌ (Is. 63:9). Joñonla jaʼel, miʼ mejlel la cubin chuqui miʼ ñusan yambʌlob come melbilonla tiʼ yejtal Dios. Yujil ubintel jiñi wocol muʼ bʌ lac ñusan anquese mi lac ñaʼtan chaʼan mach i wentʌlelic miʼ pʌsbeñonla i cʼuxbiya (wp18.3, i yopol 8 yicʼot 9).

¿Bajcheʼ tsiʼ colta Jesús jiñi quixtañujob chaʼan junlajal miʼ qʼuelob i bʌ?

Cheʼ tiʼ yorajlel Jesús, an cabʌl judíojob lecoj bʌ miʼ qʼuelob yambʌlob. Cristo tsiʼ pʌsʌ chaʼan ñuc i cʼʌjñibal miʼ pʌsob i pecʼlel yicʼot tsiʼ chaʼle tsʌts bʌ ticʼojel chaʼan jiñi muʼ bʌ i chanʼesañob i bʌ tiʼ caj baqui tilemob. Tsiʼ yʌlʌ chaʼan jiñi xcʌntʼañob i chaʼan yom miʼ luʼ qʼuelob i bʌ tiʼ yermaño (w18.06, i yopol 9 yicʼot 10).

¿Chuqui mi laj cʌn chaʼan chucoch Dios maʼañic tsiʼ yʌcʼʌ ti ochel Moisés yaʼ ti Lum tsaʼ bʌ wʌn Subentiyob?

Moisés wen lʌcʼʌl tsaʼ ajñi yicʼot Jehová (Dt. 34:10). Cheʼ ñumeñix cheʼ bʌ 40 jab, cheʼ muqʼuix caj i loqʼuelob yaʼ tiʼ tiquiñal lum, jiñi israelob tsaʼ chaʼ cajiyob ti michʼ tiʼ caj maʼañic jaʼ. Dios tiʼ sube Moisés chaʼan miʼ pejcan jiñi xajlel. Pero Moisés tsiʼ jatsʼʌ jiñi xajlel, maʼañic tsiʼ pejca. Jehová tajol tsaʼ michʼa yicʼot Moisés come maʼañic tsiʼ jacʼbe i mandar o chaʼan maʼañic tsiʼ yʌqʼue i ñuclel (Nm. 20:6-12). Ili miʼ pʌsbeñonla chaʼan wen ñucʌch i cʼʌjñibal mi lac jacʼben i tʼan Jehová yicʼot mi la cʌqʼuen i ñuclel (w18.07, i yopol 13 yicʼot 14).

¿Chuqui ti wocol mi lac mejlel ti yajlel cheʼ jin jach mi laj qʼuel mach bʌ tojic tiʼ tojlel yambʌlob?

An uxchajp muʼ bʌ i mejlel i ticʼlʌbeñob i pensar jiñi quixtañujob chaʼan chuqui miʼ ñaʼtañob tiʼ tojlel yambʌlob: Jiñi i colorlel lac pʌchʌlel, bajcheʼ cʼamel lac taqʼuin yicʼot lac jabilel. Ñucʌch i cʼʌjñibal cheʼ junlajal mi laj qʼuel jiñi yambʌlob cheʼ bajcheʼ miʼ qʼuel Jehová (Hch. 10:34, 35) (w18.08, i yopol 8 cʼʌlʌl ti 12).

¿Bajcheʼ tac miʼ mejlelob ti coltaya ti congregación jiñi hermanojob ñoxobix bʌ?

Jiñi xñoptʼan ñoxix bʌ muʼ bʌ i qʼuextʌyel i yeʼtel ñucʌch miʼ bej qʼuejlel ti Dios i miʼ mejlel i wen coltan yambʌlob. Tajol miʼ mejlel i ñumen coltan jiñi mach bʌ xñoptʼañic i ñoxiʼal jiñi hermanajob, jiñi cʌybiloʼ bʌ i chaʼan subtʼan yicʼot tempa bʌ, miʼ yʌcʼob estudio tac yicʼot miʼ ñumen chaʼleñob subtʼan (w18.09, i yopol 8 cʼʌlʌl ti 11).

¿Chuqui jiñi an tac bʌ yaʼ ti la queʼtijib chaʼan bʌ cʌntesa?

Yaʼ ti eʼtijib tac am bʌ lac chaʼan yaʼʌch ochem jiñi tarjeta chaʼan jw.org, lac pʌyol chaʼan tempa bʌ, waxʌcpʼejl tratado utsʼatax bʌ bajcheʼ melbil, jiñi revista Lac Tsictesʌbentel yicʼot ¡Despertad! Cheʼ jaʼel, an lac chaʼan folleto tac, chaʼpʼejl libro chaʼan mi laj cʌcʼ estudio yicʼot chʌmpʼejl video muʼ bʌ i wen cʼʌjñibʌyel lac chaʼan, bajcheʼ jiñi ¿Chucoch yom mi lac pejcan jiñi Biblia? (w18.10, i yopol 16).

¿Chuqui yom miʼ mel juntiquil xñoptʼan chaʼan miʼ mʌn jiñi i sujmlel cheʼ bajcheʼ miʼ yʌl Proverbios 23:23, TNM?

Mach cʼʌñʌlic mi laj cʌcʼ taqʼuin chaʼan mi lac taj jiñi i sujmlel. Pero yomʌch mi lac chaʼlen wersa yicʼot mi la cʌqʼuen i yorajlel chaʼan miʼ mejlel lac taj (w18.11, i yopol 4).

¿Chuqui mi laj cʌn chaʼan bajcheʼ Oseas tsiʼ mele tiʼ tojlel i yijñam i cʼabaʼ Gómer?

Gómer mach junsujtelic jach tsiʼ mele tsʼiʼlel. Pero Oseas tsiʼ ñusʌbe i mul i maʼañic tsiʼ cʌyʌ. Mi juntiquil xñoptʼan miʼ chaʼlen tsʼiʼlel, jiñi i piʼʌl mach bʌ añic i mul miʼ mejlel i ñusʌben. Mi jiñi xʼixic o wiñic miʼ tech i chaʼ piʼlen i piʼʌl tsaʼ bʌ i chaʼle tsʼiʼlel, maʼañix miʼ mejlel i chaʼlen i bʌ ti divorciar (w18.12, i yopol 13).