«Tijicña mi caj i yubiñob jini tojoʼ bʌ muʼ bʌ i ñopob lac Yum»
DIANA ñumeñix ti 80 i jabilel. Jiñi i ñoxiʼal tsiʼ taja jiñi cʼamʌjel i cʼabaʼ Alzheimer i tsaʼ ajñi yaʼ baqui miʼ cʌntʌntel jiñi ñoxobix bʌ cʼʌlʌ tsaʼ chʌmi (sajti). Yicʼot jaʼel tsaʼ chʌmi chaʼtiquil i yalobilob yicʼot tsiʼ chaʼle wersa i mʌlben (jotben) jiñi cáncer am bʌ tiʼ chuʼ. Anquese tsiʼ ñusa jiñi, cheʼ bʌ jiñi hermanojob yaʼ ti congregación miʼ qʼuelob ti tempa bʌ o ti subtʼan miʼ yʌlob chaʼan tiʼ pejtelel ora tijicña.
John tsaʼ ajñi bajcheʼ superintendente i chaʼan circuito ñumen ti 43 jab. Tsiʼ wen mulaj jiñi eʼtel (troñel), pero tsiʼ cʌyʌ chaʼan miʼ cʌntan juntiquil tiʼ familia wen cʼam bʌ. Cheʼ bʌ jiñi hermanojob añix bʌ ora i cʌñʌyob John miʼ cʼotel i tajob ti colem tempa bʌ miʼ yʌlob chaʼan maʼañic qʼuextʌyem. Muʼto i wen pʌs i tijicñʌyel.
¿Chuqui miʼ coltan jiñi Diana yicʼot John chaʼan miʼ bej pʌsob i tijicñʌyel? ¿Chucoch juntiquil quixtañu muʼto i bej pʌs i tijicñʌyel mi woliʼ ñusan wocol o cheʼ miʼ cʌy jumpʼejl eʼtel muʼ bʌ i wen mulan? Jiñi Biblia miʼ yʌl: «Tijicña mi caj i yubiñob jini tojoʼ bʌ muʼ bʌ i ñopob lac Yum» (Sal. 64:10). Chaʼan miʼ mejlel lac ñumen ñaʼtan ili ñuc bʌ i sujmlel, laʼ lac tsajin chuqui miʼ mejlel i yʌqʼueñonla i sujm bʌ tijicñʌyel i chuqui maʼañic.
JUMUCʼ BɅ TIJICÑɅYEL
Ti laj cuxtʌlel, an chuqui tac miʼ yʌqʼueñonla lac tijicñʌyel, bajcheʼ ñujpuñel, cheʼ miʼ tilel la calobil o cheʼ mi la cʌqʼuentel jumpʼejl eʼtel tiʼ chaʼan bʌ Dios. I tilelʌch cheʼ mi la cubin lac bʌ bajcheʼ jiñi, come pejtelel iliyi lac majtañʌch tilem bʌ ti Jehová. Jin tsiʼ mele jiñi ñujpuñel, muʼ bʌ i yʌcʼ chaʼan miʼ tilel la calobil yicʼot miʼ yʌqʼueñonla la queʼtel tiʼ yorganización (Gn. 2:18, 22; Sal. 127:3; 1 Ti. 3:1).
Pero an i tajol, jiñi muʼ bʌ i yʌcʼ lac tijicñʌyel maʼañic miʼ jalijel. Juntiquil ñujpuñem bʌ miʼ mejlel ti chʌmel i piʼʌl o miʼ lotin (Ez. 24:18; Os. 3:1). Cheʼ jaʼel, an i tajol jiñi xcolelob maʼañic miʼ jacʼbeñob i tʼan i tat i ña yicʼot jiñi Dios o miʼ mejlel i chaʼlentelob ti expulsar yaʼ ti congregación. Jumpʼejl ejemplo, jiñi i yalobilob jiñi xʼaltʼan Samuel mach weñic tiʼ chʼujutesayob Jehová. I jiñi rey David tsiʼ chaʼle mulil, jin chaʼan tsiʼ taja cabʌl wocol tiʼ familia (1 S. 8:1-3; 2 S. 12:11). Ili wocol tac miʼ mejlel i sujtesan jiñi lac tijicñʌyel ti chʼijiyemlel.
Cheʼ jaʼel, miʼ mejlel i sʌt eʼtel tac tiʼ chaʼan bʌ Dios tiʼ caj wocol tac chaʼan laj cʼocʼlel, chaʼan miʼ cʌntʌntel juntiquil cʼam bʌ ti lac familia o cheʼ an
chuqui miʼ qʼuextʌyel tiʼ yorganización Jehová. Cabʌl hermanojob am bʌ i cʌyʌyob ili eʼtel tac miʼ yʌlob chaʼan muʼto i cʼajtesañob jiñi, come tsiʼ wen aqʼueyob i tijicñʌyel.Jamʌ tsiquil mi laj qʼuel chaʼan jiñi muʼ bʌ i yʌcʼ lac tijicñʌyel an i tajol maʼañic miʼ jalijel. Pero jiñi ejemplo tac i chaʼan Samuel, David yicʼot yañoʼ bʌ, miʼ pʌsbeñonla chaʼan an yambʌ tijicñʌyel mach bʌ yujilic jilel anquese an chuqui tac miʼ qʼuextʌyel mach bʌ pijtʌbilic lac chaʼan o mi lac taj wocol tac.
JIÑI TIJICÑɅYEL MAʼAÑIC BɅ I JILIBAL
Jesús wen yujil chuquiyes jiñi i sujm bʌ tijicñʌyel. Cheʼ bʌ yaʼ chumul ti panchan wen utsʼat bajcheʼ tsiʼ ñusa, jin chaʼan tsiʼ yʌlʌ: «Wen contentojon tiʼ tojlel [Jehová] tiʼ pejtelel ora» (Pr. 8:30). Pero cheʼ bʌ tsajñi ila ti pañimil (mulawil), an i tajol tsiʼ cuchu tsʌts tac bʌ wocol. Anquese cheʼʌch tsiʼ ñusa, tsiʼ wen mulaj i melben i yeʼtel i Tat (Jn. 4:34). ¿Chuqui tsiʼ colta i cuch jiñi wocol tac tsaʼ bʌ i ñusa cheʼ tsʼitaʼ jachix yom chaʼan miʼ chʌmel? Jiñi Biblia miʼ yʌl: «Jesús maʼanic tsiʼ xoyo i bijlel tiʼ tojlel wocol, come tsiʼ qʼuele jini tijicña bʌ woli bʌ i pijtan. Jini chaʼan tsiʼ yʌcʼʌ i bʌ ti quisin cheʼ bʌ tsaʼ chʌmi ti cruz [«teʼ», TNM]» (He. 12:2). Laʼ lac tsajin chaʼchajp tsaʼ bʌ i yʌlʌ Jesús chaʼan jiñi i sujm bʌ tijicñʌyel.
Ti jumpʼejl bʌ qʼuin, 70 xcʌntʼañob i chaʼan wen tijicña tsaʼ cʼotiyob cheʼ bʌ tsaʼ sujtiyob ti subtʼan come tsiʼ meleyob (chaʼleyob) cabʌl milagro, tsiʼ chocoyob loqʼuel xibajob. Jin chaʼan, Jesús tiʼ subeyob: «Mach yomic tijicñayetla chaʼan woliʼ loqʼuelob xibajob chaʼan ti laʼ tʼan. Pero yom tijicñayetla chaʼan tsʼijbubil laʼ cʼabaʼ ti panchan» (Lc. 10:1-9, 17, 20). Tiʼ sujm, anquese jumpʼejl eʼtel miʼ wen aqʼueñonla lac tijicñʌyel, jiñi ñuc bʌ i cʼʌjñibal jiñʌch cheʼ utsʼat miʼ qʼuelonla Jehová come miʼ yʌqʼueñonla jiñi i sujm bʌ tijicñʌyel.
Ti yambʌ qʼuin, cheʼ bʌ Jesús woli (choncol) i cʌntesan yambʌ wiñicob xʼixicob (quixtañujob), juntiquil xʼixic tsiʼ yʌlʌ ti cʼam bʌ tʼan chaʼan jiñi i ñaʼ ili wem bʌ xcʌntesa añʌch i tijicñʌyel tiʼ tojlel. Pero Jesús tsiʼ yʌlʌ: «Ñumen tijicñayob muʼ bʌ i yubibeñob i tʼan Dios muʼ bʌ i jacʼob» (Lc. 11:27, 28). Jiñi tatʌl ñaʼʌl am bʌ wem bʌ i yalobil, tijicña miʼ yubin i bʌ, pero ñumento mi caj i yubin i tijicñʌyel cheʼ mi jacʼben i tʼan Jehová yicʼot cheʼ i yamigo.
Ro. 5:3-5). Laʼ laj cʼajtesan chaʼan Jehová miʼ yʌqʼuen i yespíritu jiñi muʼ bʌ i ñopob, i jumpʼejl melbalʌl muʼ bʌ i yʌcʼ ti lac tojlel jiñi espíritu jiñʌch jiñi tijicñʌyel (Gá. 5:22). Jin chaʼan, Salmo 64:10 miʼ yʌl: «Tijicña mi caj i yubiñob jini tojoʼ bʌ muʼ bʌ i ñopob lac Yum».
Jin chaʼan, mi la com chaʼan miʼ ñumen pʼojlel i sujm bʌ lac tijicñʌyel, ñuc i cʼʌjñibal cheʼ mi lac ñaʼtan chaʼan utsʼat miʼ qʼuelonla Jehová. Isujmʌch, jiñi wocol tac maʼañic miʼ yʌqʼueñonla lac tijicñʌyel pero maʼañic miʼ mejlel i chilbeñonla. Come cheʼ mucʼʌch laj cuch yicʼot mi lac pʌs lac xucʼtʌlel ti Jehová, miʼ ñumen pʼojlel i tijicñʌyel lac pusicʼal (¿Chuqui an i colta John chaʼan bej tijicña miʼ yajñel?
Ili tac miʼ tsictesan chucoch Diana yicʼot John maʼañic tiʼ sʌtʌyob i tijicñʌyel anquese tsiʼ ñusayob tsʌts bʌ wocol tac. Diana miʼ yʌl: «Tsaʼ c sʌcla j coltʌntel ti Jehová, cheʼ bajcheʼ juntiquil alʌ chʼiton miʼ sʌclan i coltʌntel tiʼ tat i ñaʼ». I miʼ bej al: «Dios an i yʌqʼueyon cabʌl bendición chaʼan miʼ coltañon c bej chaʼlen subtʼan i maʼañic mic sʌt c tijicñʌyel». Ixcu jiñi John, ¿chuqui miʼ yʌl? Miʼ yʌl chaʼan ti 1918 tsiʼ yʌqʼueyob i yeʼtel bajcheʼ xcʌntesa yaʼ ti Cʌntesʌntel baʼ miʼ chajpʌntelob anciano yicʼot siervo ministerial i jiñʌch tsiʼ colta chaʼan miʼ wen chaʼlen estudio. Wocolix i yʌlʌ jiñi, chʌn tijicña tsaʼ ajñi i maʼañic tsiʼ cʌyʌ subtʼan cheʼ bʌ ti wiʼil tsiʼ cʌyʌ eʼtel bajcheʼ superintendente i chaʼan circuito. Miʼ yʌl chaʼan mach wocolic tsiʼ yubi yicʼot i yijñam come tiʼ pejtelel ora tsiʼ meleyob chuqui miʼ mulan Jehová. I miʼ yʌlob chaʼan tsaʼʌch i wen melbeyob i yeʼtel Jehová cheʼ bajcheʼ cʼamel tsaʼ mejliyob.
Cabʌl xñoptʼañob an i ñopoyob chaʼan i sujmʌch muʼ bʌ i yʌl Salmo 64:10. Laʼ laj qʼuel chaʼan jumpʼejl xñujpuñel tsaʼ bʌ i chaʼleyob eʼtel ñumen bʌ ti 30 jab yaʼ ti Betel ti Estados Unidos i tsaʼ bʌ aqʼuentiyob i yeʼtel bajcheʼ precursor especial. Miʼ yʌlob: «Cheʼ maʼ sʌt muʼ bʌ a wen cʼuxbin i tilelʌch cheʼ chʼijiyem maʼ wubin a bʌ. Pero mach yomic chaʼan cheʼ maʼ wajñel tiʼ pejtelel ora». Ti orajach tsaʼ caji i melbeñob i yeʼtel Dios yicʼot jiñi congregación baqui woliyob (yʌquelob) ti coltaya. Yicʼot miʼ bej alob: «Ti lon coración jamʌ tsiquil chuqui mi lon j cʼajtin. Cheʼ bʌ tsaʼ lon j qʼuele bajcheʼ miʼ jacʼbeñon lojon Jehová, tsiʼ yʌqʼueyon lon c tijicñʌyel yicʼot tsiʼ ñuqʼuesʌbeyon lon c pusicʼal. Cheʼ bʌ maxto jalic lon j cʼotel yaʼ ti congregación, tsaʼ ochiyob bajcheʼ precursor yambʌ hermanojob. Cheʼ jaʼel, tsaʼ c taja lon c tijicñʌyel cheʼ bʌ tsaʼ c taja lon chaʼpʼejl estudio yomoʼ bʌ i ñumen cʌn i chaʼan bʌ Dios».
TIJICÑɅYEL TIʼ PEJTELEL ORA
Tiʼ sujm, mach tiʼ pejtelel ora tijicñayonla. An i tajol mucʼʌch caj la cubin lac chʼijiyemlel. Pero Jehová miʼ ñuqʼuesan lac pusicʼal yicʼot jiñi tʼan tac am bʌ ti Salmo 64:10. Anquese an lac chʼijiyemlel, miʼ mejlel lac ñop chaʼan «tijicña mi caj i yubiñob jini tojoʼ bʌ muʼ bʌ i ñopob lac Yum». Ili yom i yʌl chaʼan mach yʌlʌyic chuqui miʼ mejlel ti ujtel ti lac tojlel, come chʌn tijicña mi caj la cajñel mi mucʼʌch lac pʌs lac xucʼtilel ti Jehová. I mi lac pijtan chaʼan miʼ cʼotel i yorajlel cheʼ bʌ miʼ tsʼʌctesan i tʼan chaʼan mi caj i mel «tsijiʼ bʌ panchan yicʼot tsijiʼ bʌ pañimil». Cheʼ jiñi, jiñi i wiñicob Dios tojobix miʼ cajelob i ‹tijicña› mi caj i yajñelob chaʼan pejtelel chuqui mi caj i mel Jehová (Is. 65:17, 18).
Laʼ lac ñaʼtan chuqui yom i yʌl jiñi: Mi caj lac taj laj cʼocʼlel i tiʼ pejtelel ora wen pʼʌtʌl mi caj la cajñel. Jiñi mach bʌ weñic tsaʼ bʌ lac ñusa o tsaʼ bʌ i yʌqʼueyonla lac chʼijiyemlel maʼañix mi caj laj cʼajtesan. Jehová miʼ yʌqʼueñonla i tʼan chaʼan «maʼanic mi caj i chʌn ñaʼtʌntel jini tsaʼix bʌ ñumi. Maʼanix majch mi caj i chʌn cʼajtesan». Come mi caj i yujtel jiñi chaʼ chʼojyel, mi caj la cajñel la quicʼot jiñi lac piʼʌlob tsaʼix bʌ chʌmiyob. Yonlel quixtañujob mi caj i wen tajob i tijicñʌyel, cheʼ bajcheʼ tsaʼ ujti tiʼ tojlel i tat i ñaʼ jiñi xcʼalʌl 12 bʌ i jabilel tsaʼ bʌ i chaʼ tejchesa Jesús (Mr. 5:42). Mi caj i cʼotel jiñi qʼuin cheʼ bʌ pejtelel jiñi quixtañujob ila ti Pañimil junyajl tojobix mi caj i yajñelob i tiʼ pejtelel ora «tijicña mi caj i yubiñob» i bʌ ti Jehová.