1, 2. ¿Bajcheʼ miʼ pʌs jiñi tsaʼ bʌ ujti tiʼ tojlel Tony chaʼan mejlʌch laj qʼuextan lac melbal?

TONY jiñʌch juntiquil xcolel maʼañic bʌ i tat tsaʼ coli yicʼot maʼañic bʌ miʼ mulan clase. Tsiʼ ñaʼta i cʌy jiñi escuela. Tiʼ yujtibal semana tac miʼ yajñel yicʼot i yamigojob o miʼ majlel ti cine. Mach jontolic i maʼañic miʼ cʼʌn droga tac, pero maʼañic i cʼʌjñibal i cuxtʌlel miʼ yubin i maʼañic miʼ wen ñop chaʼan añʌch Dios. Cheʼ jiñi, tsaʼ i cʌñʌ jumpʼejl xñujpuñel testigojoʼ bʌ i tiʼ subeyob chuqui tac maʼañic miʼ ñop yicʼot tsiʼ melbeyob cʼajtiya tac. Jiñi xñujpuñel tsiʼ yʌqʼueyob chaʼpʼejl folleto jiñi El origen de la vida yicʼot ¿Es la vida obra de un Creador?

² Cheʼ bʌ jiñi xñujpuñel tsiʼ chaʼ julaʼtayob, Tony wen qʼuexelix. Tsiʼ wen mulaj i pejcan jiñi folleto tac, i wen xujmucʼ tiquix i chaʼan yicʼot wen pʌcbilix jiñi i xujc tac. Tony tiʼ subeyob: «Mij cʌl añʌch Dios». Tsiʼ chʼujbi jumpʼejl estudio, i xucʼu xucʼul tsiʼ qʼuexta bajcheʼ yilal miʼ qʼuel i cuxtʌlel. Cheʼ jaʼel, tsaʼ sujti ti wem bʌ alumno yaʼ ti escuela. Jiñi director toj sajtel i pusicʼal chaʼan jiñi. Tiʼ sube: «Tsaʼix a wen tojʼesa a melbal yicʼot weñix a calificación. ¿Chaʼan ba woliyet (choncolet) ti estudio a wicʼot i testigojob Jehová?». Tony tiʼ sube chaʼan cheʼʌchi i tiʼ tsictesʌbe woli (yʌquel) bʌ i cʌn. Ti wiʼil, tsaʼ loqʼui ti escuela i wʌle ora añix bajcheʼ precursor regular yicʼot  siervo ministerial. Cheʼ jaʼel, ñumen tijicña come waʼli añix wem bʌ i Tat, jiñʌch Jehová (Sal. 68:5).

3. ¿Baqui bʌ ticʼojel miʼ yʌqʼuen Jehová jiñi xcolelob?

³ Jiñi tsaʼ bʌ ujti tiʼ tojlel Tony miʼ cʼajtesʌbeñonla chaʼan Jehová mucʼʌch i qʼuel ti ñuc jiñi xcolelob. I yom chaʼan maʼ taj a tijicñʌyel ti a cuxtʌlel. Jin chaʼan miʼ yʌqʼueñet ili ticʼojel: «Cʼajtesan ti ili ora jiñi Cʼax ñuc bʌ tsaʼ bʌ i Meleyet, cheʼ chʼitoñet to» (Ec. 12:1, TNM). Ti ili pañimil, an qʼuiñil wocolʌch tiʼ melol iliyi, pero mucʼʌch lac mejlel. Yicʼot i coltaya Jehová wen mi caj a wajñel, i mach cojic jach cheʼ chʼitoñetto, mi caj i coltañet tiʼ pejtelel ora. Chaʼan mi lac ñumen chʼʌmben i sujm iliyi, laʼ laj qʼuel chuqui tsiʼ colta jiñi israelob chaʼan miʼ chʼʌmob jiñi Lum tsaʼ bʌ wʌn Subentiyob yicʼot bajcheʼ tsiʼ taja i pʼʌtʌlel David chaʼan miʼ mʌlben (jotben) jiñi colem bʌ wiñic i cʼabaʼ Goliat.

4, 5. Cheʼ mi lac tsajin chuqui tsiʼ colta jiñi israelob chaʼan miʼ chʼʌmob jiñi Lum tsaʼ bʌ wʌn Subentiyob yicʼot tsaʼ bʌ i colta David chaʼan miʼ mʌlben Goliat, ¿chuqui mi laj cʌn? (Qʼuele jiñi dibujo tac am bʌ tiʼ tejchibal).

⁴ Cheʼ tsʼitaʼ jax yom chaʼan jiñi israelob miʼ yochelob yaʼ ti Lum tsaʼ bʌ wʌn Subentiyob, Dios maʼañic tiʼ subeyob chaʼan miʼ sujtelob ti wem bʌ soldadojob mi chaʼañic miʼ majlelob ti guerra (Dt. 28:1, 2). Tsaʼ bʌ i subeyob jiñʌch chaʼan miʼ jacʼbeñob i tʼan yicʼot miʼ ñopob tiʼ tojlel (Jos. 1:7-9). Tajol an majqui miʼ yʌl chaʼan mach weñic jiñi ticʼojel. Pero jiñʌch wem bʌ tsiʼ mele jiñi israelob come tiʼ coltaya Jehová mach junsujtel jach tsiʼ mʌlbeyob jiñi cananeojob (Jos. 24:11-13). Tiʼ sujm, yomʌch an lac ñopoñel chaʼan mi lac jacʼben i tʼan Dios. Mi añʌch lac ñopoñel wen mi caj laj cajñel tiʼ pejtelel ora. Wʌle ora bej añixto i cʼʌjñibal iliyi cheʼ bajcheʼ ti wajali.

⁵ Goliat juntiquilʌch wen chʼejl bʌ soldado am bʌ i chanlel cheʼ bʌ 3 metro. Cheʼ jaʼel, wen chajpʌbil tsaʼ majli ti guerra (1 S. 17:4-7). Pero David an jach chaʼpʼejl chuqui tiʼ chʼʌmʌ majlel: Jumpʼejl pʌrʌntun yicʼot i ñopoñel ti Jehová. Jiñi maʼañobic bʌ i ñopoñel tajol tsiʼ yʌlʌyob chaʼan David juntiquilʌch tonto. Pero mach cheʼiqui. Jiñi tonto bʌ jiñʌch Goliat (1 S. 17:48-51).

6. ¿Chuqui mi caj lac taj ti tʼan ti ili temaj?

⁶ Yaʼ ti yambʌ temaj tsaʼ laj qʼuele chʌnchajp muʼ bʌ mejlel i yʌqʼueñonla lac tijicñʌyel: Jiñi i cʼʌjñibal bʌ lac chaʼan ti Dios, lac taj wem bʌ la camigojob muʼ bʌ i cʼuxbiñob Jehová, muʼ bʌ mejlel lac taj am bʌ i cʼʌjñibal yicʼot laj qʼuel ti ñuc jiñi librejlel muʼ bʌ i yʌqʼueñonla Dios. Ti ili temaj, mi caj lac bej al majlel iliyi i mi caj lac tsajin principio tac muʼ bʌ lac taj ti Salmo 16.

7. a) ¿Bajcheʼ yilal juntiquil pʼʌtʌl bʌ ti chaʼan bʌ Dios? b) ¿Chuquiyes jiñi majtañʌl tsaʼ bʌ aqʼuenti David, i chuqui miʼ yʌqʼuen i yubin?

⁷ Jiñi am bʌ i ñaʼtʌbal tiʼ chaʼan bʌ Dios miʼ chaʼlen wersa i qʼuel chuqui miʼ yujtel cheʼ bajcheʼ miʼ qʼuel Dios. Miʼ sʌclʌben i coltaya i ti jumpʼejl i pusicʼal miʼ jacʼben i tʼan (1 Co. 2:12, 13). Cheʼʌch tsiʼ mele David. Ti jumpʼejl i cʼay tsiʼ yʌlʌ: «Jini c Yum jiñʌch com bʌ ti pejtelel c pusicʼal. I wentajʌch cuxul bʌ jaʼ muʼ bʌ c jap, jiñʌch c majtan» (Sal. 16:5). David tsiʼ qʼuele ti ñuc jiñi i «majtan», yom i yʌl, cheʼ lʌcʼʌl an yicʼot Jehová i tiʼ sʌcla i coltʌntel tiʼ tojlel (Sal. 16:1). Jin chaʼan tsaʼ mejli i yʌl: «Jini chaʼan wen tijicñayon». Maʼañic yambʌ chuqui miʼ yʌqʼuen i tijicñʌyel David, cojach cheʼ i yamigojʌch Jehová (pejcan Salmo 16:9, 11).

8. ¿Chuqui tac miʼ mejlel i coltañet chaʼan tijicña maʼ wajñel?

⁸ Jiñi cojach bʌ miʼ ñaʼtañob i ñusañob i bʌ ila ti pañimil o chaʼan miʼ tajob taqʼuin maʼañic miʼ mejlel i yubiñob i tijicñʌyel bajcheʼ David (1 Ti. 6:9, 10). Juntiquil hermano chʼoyol bʌ ti Canadá miʼ yʌl: «Jiñi i sujm bʌ tijicñʌyel mach yaʼ chucul ti chuqui mi lac taj ti laj  cuxtʌlel, yaʼʌch cʌyʌl ti chuqui mi la cʌqʼuen Jehová Dios, jiñi muʼ bʌ i yʌqʼueñonla chuqui tac wem bʌ» (Stg. 1:17). Cheʼ bajcheʼ maʼ qʼuel, mi pʼʌtʌlʌch a ñopoñel ti Jehová i maʼ melben i yeʼtel (troñel) tijicña mi caj a wajñel yicʼot mi caj a wubin chaʼan añʌch i sujmlel a cuxtʌlel. Chaʼan maʼ ñumen taj a ñopoñel, yom maʼ wʌqʼuen i yorajlel chaʼan maʼ cʌn. ¿Bajcheʼ? Maʼ pejcʌben i Tʼan, mi a wen qʼuel chuqui tac melbil (pʌtbil) i chaʼan wʌʼ ti pañimil yicʼot ti panchan yicʼot maʼ wen ñaʼtan jiñi i melbal (chaʼlebal) tac am bʌ i chaʼan, bajcheʼ i cʼuxbiya ti a tojlel (Ro. 1:20; 5:8).

9. Cheʼ bajcheʼ David, ¿chuqui miʼ mejlel a mel chaʼan jiñi i Tʼan Dios miʼ tojʼesañet?

⁹ Jehová juntiquilʌch wem bʌ tatʌl i miʼ cʼuxbiñonla, pero an i tajol miʼ ticʼonla. David tsiʼ wen qʼuele ti ñuc cheʼ miʼ chʼʌm i ticʼojel, jin chaʼan tsiʼ yʌlʌ: «Mi caj c ñuqʼuesan Jehová, jiñi am bʌ i yʌqʼueyon ticʼojel. Jinto cheʼ ti acʼʌlel, jiñi wen tam bʌ an tic pensar miʼ tojʼesañon» (Sal. 16:7, TNM). David tsiʼ wen ñaʼtʌbe i ticʼojel Dios i tsiʼ chaʼle wersa chaʼan lajal miʼ chaʼlen pensar bajcheʼ Dios. Tsiʼ yʌc i bʌ ti tojʼesʌntel yicʼot jiñi ticʼojel tac, yom i yʌl, chaʼan miʼ qʼuextʌben i melbal i miʼ sujtesan ti ñumen wem bʌ quixtañu. Mi cheʼʌch maʼ mel jaʼel, mi caj i ñumen pʼʌtʼan a cʼuxbiya tiʼ tojlel Jehová yicʼot mi caj a ñumen mulan a jacʼben i tʼan. Cheʼ bajcheʼ jiñi, mi caj a taj a colel. Juntiquil hermana i cʼabaʼ Christin, tsiʼ yʌlʌ: «Cheʼ mic chajpan c bʌ yicʼot cheʼ mic wen ñaʼtan muʼ bʌ c pejcan, mij cubin chaʼan c chaʼañʌch tsaʼ bʌ i tsʼijbu Jehová».

10. Cheʼ bajcheʼ miʼ yʌl Isaías 26:3, ¿baqui bʌ wenlel maʼ taj cheʼ pʼʌtʌlet tiʼ chaʼan bʌ Dios?

¹⁰ Mi yaʼʌch an a ñaʼtʌbal tiʼ chaʼan bʌ Dios, Jehová mi caj i coltañet a cʌn yicʼot a taj a pʼipʼlel chaʼan maʼ qʼuel ili pañimil yicʼot bajcheʼ mi caj i yujtel cheʼ bajcheʼ miʼ qʼuel Jehová. Miʼ cajel i mel bajcheʼ jiñi come yom chaʼan maʼ ñaʼtan chuqui i cʼʌjñibal ti a cuxtʌlel, chaʼan maʼ yajcan chuqui wem bʌ yicʼot chaʼan maʼañic maʼ bʌcʼñan jiñi talto bʌ qʼuin. Jiñi xʼaltʼan Isaías tsiʼ yʌlʌ chaʼan Jehová miʼ cʌntan jiñi muʼ bʌ i yʌcʼob i bʌ tiʼ tojlel i miʼ chʌn aqʼuentelob i ñʌchʼtʌlel i pusicʼal (pejcan Isaías 26:3). Juntiquil hermano i cʼabaʼ Joshua, chʼoyol bʌ ti Estados Unidos, an chuqui miʼ yʌl: «Mi lʌcʼʌl maʼ wajñel a wicʼot Jehová, jamʌ tsiquil mi caj a qʼuel chuqui an i cʼʌjñibal i chuqui maʼañic bʌ».

11. ¿Bajcheʼ tsiʼ yajca David i yamigojob?

¹¹ David yujil baqui miʼ mejlel i taj wem bʌ i yamigojob. Tsiʼ yajca bajcheʼ i yamigojob muʼ bʌ i cʼuxbiñob Jehová yicʼot muʼ bʌ i chaʼleñob wersa i jacʼbeñob i mandar tac chaʼan sʌc miʼ yajñelob, iliyi tsaʼʌch i wen aqʼue i tijicñʌyel. Yambʌ tsaʼ bʌ i tsʼijbu jiñi Salmos an chuqui lajal tsiʼ yʌlʌ. Tiʼ tsʼijbu chaʼan jin jach i yamigojob jiñi muʼ bʌ i bʌcʼñañob Dios i miʼ jacʼbeñob i tʼan (Sal. 119:63). Cheʼ bajcheʼ ti laj qʼuele ti yambʌ temaj, mucʼʌch mejlel a taj wem bʌ a wamigojob muʼ bʌ i cʼuxbiñob Jehová yicʼot miʼ jacʼbeñob i tʼan, i mach cʼʌñʌlic cheʼ junlajal laʼ jabilel.

12. ¿Chucoch David yicʼot Jonatán wen i yamigojob i bʌ?

¹² David mach cojach tsiʼ yajca bajcheʼ i yamigojob jiñi lajal bʌ i jabilel yicʼot. ¿Cʼajal baʼ chaʼan chuqui i cʼabaʼ juntiquil wem bʌ i yamigo? Jiñʌch Jonatán. Jiñi Biblia utsʼatax chuqui miʼ yʌl tiʼ tojlelob. Pero ¿a wujil ba chaʼan Jonatán ñumen an i jabilel bajcheʼ David? Cheʼ bʌ 30 jab i ñumelal. Jin chaʼan, ¿chucoch tsaʼ sujtiyob ti wem bʌ i yamigojob i bʌ? Come tiʼ chaʼticlelob añob i ñopoñel ti Dios, miʼ qʼuelob i bʌ ti ñuc yicʼot wem bʌ i melbalob, cheʼ bajcheʼ jiñi i chʼejlelob tsaʼ bʌ i pʌsʌyob cheʼ bʌ tsiʼ chaʼleyob jatsʼ yicʼot i contrajob Dios (1 S. 13:3; 14:13; 17:48-50; 18:1).

13. ¿Bajcheʼ miʼ mejlel a taj cabʌl a wamigojob? Alʌ jumpʼejl ejemplo.

¹³ Lajal bajcheʼ David yicʼot Jonatán mi caj la cubin lac tijicñʌyel miʼ yamigojonla muʼ bʌ i cʼuxbiñob Jehová yicʼot miʼ pʌsob i ñopoñel  tiʼ tojlel. Juntiquil hermana i cʼabaʼ Kiera añix bʌ cabʌl jab i cajel i melben i yeʼtel Dios, miʼ yʌl: «An camigojob tiʼ pejtelel pañimil, mach lajalic chuqui ñusʌbil i chaʼañob yicʼot jiñi i culturajob». Mi cheʼʌch maʼ mel jaʼel, tsiquil mi caj i qʼuel chaʼan jiñi i Tʼan Dios yicʼot jiñi chʼujul bʌ espíritu miʼ temonla.

14. a) ¿Chuqui mi caj i coltañet chaʼan maʼ taj chuqui am bʌ i cʼʌjñibal? b) ¿Chuqui an i yʌlʌ yambʌ xcolelob cheʼ miʼ yʌcʼob i ñaʼtʌbal tiʼ chaʼan bʌ Dios?

¹⁴ (Pejcan Salmo 16:8). Jiñi ñumen ñuc bʌ i cʼʌjñibal i chaʼan David jiñʌch cheʼ miʼ melben i yeʼtel Dios. Miʼ mejlel a taj a tijicñʌyel jaʼel mi mucʼʌch a tsajcʌben i melbal. Ñaxan acʼʌ ti ñuc ti melol i yeʼtel Dios yicʼot ñaʼtan chuqui a wom a taj, pero chʌn cʼajtesan chuqui yom Dios chaʼan maʼ mel. Juntiquil hermano i cʼabaʼ Steven miʼ yʌl: «Cheʼ mic chaʼlen wersa c taj chuqui com c mel tiʼ chaʼan bʌ Dios, cheʼ bʌ tsaʼix c taja yicʼot cheʼ mij qʼuel bajcheʼ an i coltayon, miʼ yʌqʼueñon c tijicñʌyel». Juntiquil xcolel chʼoyol bʌ ti Alemania am bʌ ti yambʌ país tsiʼ yʌlʌ: «Cheʼ bʌ ñoxoñix, mach comic c ñaʼtan chaʼan tiʼ pejtelel chuqui tsaʼ c mele joñon jach tsaʼ c ñaʼta c bʌ». Com lojon chaʼan cheʼʌch maʼ ñaʼtan bajcheʼ ili xcolelob. Mi cheʼʌchi, cʼʌñʌ chuqui a wujil melol chaʼan maʼ wʌqʼuen i ñuclel Dios yicʼot maʼ coltan yambʌlob (Gá. 6:10). Ñaʼtan chuqui a wom a taj i cʼajtiben Jehová chaʼan miʼ coltañet a taj. Jehová miʼ wen mulan i jacʼ jiñi oración tac (1 Jn. 3:22; 5:14, 15).

15. ¿Chuqui tac miʼ mejlel a ñaʼtan chaʼan maʼ taj tiʼ chaʼan bʌ Dios? (Qʼuele jiñi recuadro « Muʼ bʌ mejlel a mel tiʼ chaʼan bʌ Dios»).

¹⁵ ¿Chuqui tac miʼ mejlel a ñaʼtan chaʼan maʼ taj tiʼ chaʼan bʌ Dios? Tajol miʼ mejlel a wʌcʼ a comentario cheʼ mach pejcʌbilic, maʼ sujtel ti precursor o maʼ majlel ti coltaya ti Betel. Miʼ mejlel a wʌcʼ a bʌ jaʼel chaʼan maʼ ñop yambʌ tʼan chaʼan maʼ chaʼlen coltaya ti yambʌ tejclum. Juntiquil xcolel ochem bʌ bajcheʼ precursor i cʼabaʼ Barak miʼ yʌl: «Maʼañic yambʌ chuqui miʼ mejlel i yʌqʼueñon c tijicñʌyel, cojach cheʼ ti jujumpʼejl qʼuin mic ñaʼtan chaʼan mi caj c melben i yeʼtel Jehová tiʼ pejtelel c pʼʌtʌlel».

16. ¿Bajcheʼ miʼ qʼuel David jiñi i mandar tac yicʼot i principio tac Jehová, i chucoch?

¹⁶ (Pejcan Salmo 16:2, 4). Yaʼ ti yambʌ temaj tsaʼ laj qʼuele chaʼan jiñi mandar tac yicʼot  principio tac i chaʼan bʌ Dios miʼ yʌcʼonla ti libre come miʼ coltañonla laj cʼuxbin jiñi wem bʌ yicʼot lac tsʼaʼlen jiñi jontol bʌ (Am. 5:15). Ti jiñi ñaxam bʌ tsʼijbujel, David yom i yʌcʼ ti ñaʼtʌntel yaʼ ti Salmo 16:2 chaʼan tilem ti Jehová pejtelel chuqui wem bʌ. Tsiʼ chaʼle wersa i lajin Dios yicʼot miʼ mel pejtelel chuqui wen. Yicʼot jaʼel tsiʼ chaʼle wersa i tsʼaʼlen muʼ bʌ i tsʼaʼlen Dios, bajcheʼ i chʼujutesʌntel diosteʼ tac. Come ñaʼtʌbil i chaʼan chaʼan Ili melbalʌl miʼ juʼsʌben i cʼʌjñibal jiñi wiñicob xʼixicob (quixtañujob) yicʼot miʼ chilben jiñi i ñuclel yom bʌ miʼ yʌqʼuentel Jehová (Is. 2:8, 9; Ap. 4:11).

17, 18. a) ¿Chuqui miʼ yujtel tsiʼ yʌlʌ David cheʼ miʼ chʼujutesʌntel diosteʼ tac? b) ¿Chucoch an quixtañujob muʼ bʌ i tajob cabʌl wocol?

¹⁷ Ti wajali, jiñi tsʼiʼlel yaʼ ochem ti i chʼujutesʌntel diosteʼ tac (Os. 4:13, 14). Cabʌl quixtañujob ochemob ti jiñi mach bʌ i sujmic chʼujutesaya come miʼ mulañob i mel tsʼiʼlel. Pero iliyi maʼañic miʼ yʌqʼueñob i tijicñʌyel. David tsiʼ yʌlʌ yaʼ ti Salmo 16:4 chaʼan «miʼ wen tajob wocol» muʼ bʌ i chʼujutesañob diosteʼ tac. Jiñi quixtañujob muʼto i tsʌnsañob i yalobil chaʼan miʼ yʌqʼueñob i majtan jiñi i diosob (Is. 57:5). Jehová mach utsʼatic tsiʼ qʼuele jiñi (Jer. 7:31). Cheʼ yaʼic chumulet ti jiñi bʌ ora, ¿mach ba tijicñayʌch tsaʼ wubi cheʼ jiñi a tat a ñaʼ tsiʼ chʼujutesayob Jehová?

¹⁸ Ti ili ora, jiñi mach bʌ i sujmic ñopbalʌl mach lecojic miʼ qʼuel jiñi tsʼiʼlel yicʼot cheʼ jiñi quixtañujob miʼ wʌlʌc piʼleñob i bʌ. Pero jiñi i wocolel lajalʌch bajcheʼ ti wajali (1 Co. 6:18, 19). Jiñi librejoʼ bʌ miʼ ñaʼtañob ila ti pañimil cojach «miʼ wen tajob wocol». Tajol añix a qʼuele jiñi. Jin chaʼan, ñʌchʼtan chuqui miʼ yʌl a Tat am bʌ ti panchan. Ñopo chaʼan jiñʌch ñumen wem bʌ cheʼ maʼ chʼujbiben i tʼan. Mach ñajʌyic a chaʼan, ñumen cabʌl i wocolel mi tsaʼ mele mach bʌ weñic, i jumucʼ jach jiñi tijicñʌyel muʼ bʌ i yʌcʼ (Gá. 6:8). Joshua, tsaʼ bʌ laj cʌlʌ ti párrafo 10 miʼ yʌl: «Chuqui jach miʼ mejlel lac mel cheʼ librejonla. Pero mi mach weñic mi laj cʼʌn lac librejlel, mach lac tajayic lac tijicñʌyel».

19, 20. ¿Chuqui mi caj i tajob jiñi xcolelob muʼ bʌ i ñopob Jehová yicʼot miʼ jacʼbeñob i tʼan?

¹⁹ Jesús tiʼ sube jiñi xcʌntʼañob i chaʼan: «Mi maʼanic mi laʼ cʌy c tʼan, mero xcʌntʼañetla c chaʼan. Mi caj laʼ cʌn i sujmlel c tʼan. I sujmlel c tʼan mi caj i yʌqʼuetla ti colel» (Jn. 8:31, 32). Jiñi i sujmlel miʼ colonla loqʼuel yaʼ ti mach bʌ i sujmic ñopbalʌl yicʼot ti lotintel. Pero mach cojach jiñi. Cheʼ bajcheʼ tsaʼix laj qʼuele, ti talto bʌ qʼuin ‹mi caj la cochel ti libre chaʼan tijicña mi la cajñel yicʼot i ñuclel i yalobilob Dios› (Ro. 8:21). Pero ili ora muqʼuix a mejlel a tʼox ubin ili librejlel. ¿Bajcheʼ? Jiñʌch cheʼ maʼañic maʼ cʌy i tʼan Cristo, yom i yʌl, cheʼ maʼ jacʼ pejtelel i cʌntesa. Cheʼ mucʼʌch a chumtan jiñi woli bʌ a cʌn majlel miʼ cʼotel a cʌn jiñi i sujmlel.

²⁰ xColel, qʼuele ti ñuc a librejlel tsaʼ bʌ i yʌqʼueyet Dios. Mi tsaʼ cʼʌñʌ ti wen, utsʼat chuqui mi caj a chobejtan ti talto bʌ qʼuin. Juntiquil xcolel Testigo bʌ tsiʼ yʌlʌ: «Cheʼ maʼ cʼʌn ti wen jiñi a librejlel mi caj i coltañet cheʼ ñuquetix, cheʼ bʌ an chuqui ñuc bʌ i cʼʌjñibal yom maʼ yajcan a mel. Jumpʼejl ejemplo, chaʼan maʼ yajcan jumpʼejl wem bʌ eʼtel o mi a wom ñujpuñel o maxto añic».

21. ¿Chuqui yom maʼ mel chaʼan maʼ taj a «cuxtʌlel mach bʌ yujilic jilel»?

²¹ Ti ili tsucul pañimil, jiñi «ñusa bʌ» muʼ bʌ i yʌjlel maʼañic mi jalijel. Maʼañic majqui yujil chuqui mi caj i yujtel ijcʼʌl (Stg. 4:13, 14). Jin chaʼan, ñumen wen cheʼ yaʼʌch maʼ chʌn ajñel yaʼ ti bij muʼ bʌ i pʌyonla majlel lac taj laj «cuxtʌlel mach bʌ yujilic jilel» (1 Ti. 6:19). I sujmʌch, Dios maʼañic mi caj i xicʼonla. Jujuntiquil an ti lac wenta chaʼan mi lac yajcan. Jin chaʼan, sujtesan Jehová bajcheʼ jiñi a «majtan». Qʼuele ti ñuc pejtelel chuqui wem bʌ miʼ yʌqʼueñet (Sal. 103:5). I ñopo chaʼan jin mi caj i yʌqʼueñet tijicña bʌ a cuxtʌlel tiʼ pejtelel ora (Sal. 16:11).