Yaʼ ti 2 Corintios 12:2, 3 Pablo tsiʼ taja ti tʼan juntiquil wiñic tsaʼ bʌ «chujqui letsel cʼʌlʌl tiʼ yuxlajmlel panchan». ¿Majqui jiñi? Ti ili carta tsaʼ bʌ i chocbe majlel jiñi congregación ti Corinto tiʼ tsictesa chaʼan Dios woliʼ cʼʌn bajcheʼ apóstol (2 Co. 11:5, 23). Cheʼ jiñi tsiʼ yʌlʌ chaʼan an chuqui tac ‹tsiʼ qʼuele ti espíritu yicʼot tsaʼ pʌsbenti ti lac Yum›. Ilayi maʼañic tsiʼ taja ti tʼan yambʌ hermanojob. Jin chaʼan, miʼ mejlel la cʌl chaʼan jiñi wiñic tsaʼ bʌ pʌsbenti jiñi ñajal tac yicʼot am bʌ chuqui tsiʼ qʼuele ti espíritu jiñʌch Pablo (2 Co. 12:1, 5).

Jin chaʼan, jiñi wiñic tsaʼ bʌ «chujqui letsel cʼʌlʌl tiʼ yuxlajmlel panchan» yicʼot ti «paraíso» jiñʌch Pablo (2 Co. 12:2-4). Tsiʼ yʌlʌ chaʼan an chuqui tsaʼ ‹pʌsbenti›, ili yom i yʌl chaʼan tsaʼ subenti muʼ bʌ caj i yujtel ti talto bʌ qʼuin.

¿Chuquiyes jiñi i «yuxlajmlel panchan» tsaʼ bʌ i qʼuele Pablo?

Yaʼ ti Biblia, cabʌl i sujmlel jiñi tʼan panchan. An i tajol, jin miʼ junyaj taj ti tʼan jiñi panchan (Gn. 11:3, 4; 27:28; Ap. 19:17). Miʼ taj ti tʼan jaʼel jiñi yumʌlob ila ti pañimil. (Dan. 4:20-22). Yicʼot miʼ taj ti tʼan i Yumʌntel Dios (Ap. 21:1).

Cheʼ jiñi, ¿chuqui yom i yʌl Pablo cheʼ bʌ tsiʼ yʌlʌ i «yuxlajmlel panchan»? An i tajol jiñi Biblia uxsujtel miʼ yʌl jumpʼejl tʼan chaʼan ñumen tsiquil miʼ cʌytʌl yic’ot miʼ pʌs chaʼan ñuc i cʼʌjñibal (Ap. 4:8). Cheʼ bajcheʼ miʼ mejlel laj qʼuel, cheʼ bʌ Pablo tsiʼ yʌlʌ jiñi i «yuxlajmlel panchan» woliʼ pʌs chaʼan jumpʼejlʌch ñumen ñuc bʌ yumʌl: Jiñi Yumʌntel am bʌ tiʼ wenta Jesús bajcheʼ jiñi Mesías yicʼot jiñi 144 mil bombiloʼ bʌ muʼ bʌ i cajelob ti yumʌntel yicʼot (qʼuele jiñi Perspicacia para comprender las Escrituras, volumen 1, i yopol 473, 476). Ili Yumʌntel am bʌ tiʼ wenta Jesús bajcheʼ Mesías jiñʌch tsaʼ bʌ i taja ti tʼan jiñi apóstol Pedro, cheʼ bʌ tiʼ tsʼijbu chaʼan woli lac pijtan jiñi «tsijiʼ bʌ panchan» tsaʼ bʌ i wʌn alʌ Dios (2 P. 3:13).

¿Chuquiyes jiñi «paraíso» tsaʼ bʌ i yʌlʌ Pablo?

Jiñi tʼan paraíso cabʌl i sujmlel jaʼel. Ñaxam bʌ, miʼ mejlel la cʌl chaʼan jiñʌch jiñi Paraíso muʼ bʌ i cajel ila ti Lum come cheʼʌch tsaʼ chumle ti ñaxan jiñi wiñic. I chaʼpʼejlel, tajol jiñʌch jiñi chʼujul bʌ paraíso baqui jiñi i wiñicob Dios mi caj i tajob i ñʌchʼtʌlel ti tsijiʼ bʌ pañimil. I yuxpʼejlel, tajol jiñʌch cheʼ utsʼatax bajcheʼ an yaʼ ti panchan, jiñi «i paraíso Dios» muʼ bʌ i yʌjlel ti Apocalipsis 2:7 (qʼuele jiñi Lac Tsictesʌbentel 1 i chaʼan julio, 2015, i yopol 13, párrafo 8).

Pablo tajol jin woliʼ taj ti tʼan ili uxchajp cheʼ bʌ tiʼ tsictesa yaʼ ti 2 Corintios 12:4 jiñi tsaʼ bʌ i ñusa.

Ti tsʼitaʼ jach bʌ tʼan:

Jiñi i «yuxlajmlel panchan» muʼ bʌ i yʌjlel ti 2 Corintios 12:2 tajol jiñʌch jiñi Yumʌntel am bʌ tiʼ wenta Jesús bajcheʼ jiñi Mesías yicʼot jiñi 144 mil bombiloʼ bʌ, yom i yʌl jiñi «tsijiʼ bʌ panchan» (2 P. 3:13).

Cʌmbil bajcheʼ i «yuxlajmlel panchan» come jiñʌch jiñi Yumʌntel ñumen ñuc bʌ.

Tajol jiñi «paraíso» baqui «tsaʼ chujqui letsel» Pablo ti jumpʼejl ñajal jiñʌch: 1) Jiñi Paraíso muʼ bʌ i cajel ila ti Lum, 2) jiñi chʼujul bʌ paraíso muʼ bʌ i cajel ti jiñi bʌ ora pero ñumen ñuc miʼ cajel, yicʼot 3) jiñi «i paraíso Dios» am bʌ ti panchan. Tiʼ yuxpʼejlel miʼ cajel yaʼ ti tsijiʼ bʌ pañimil.

Jiñi «tsijiʼ bʌ panchan» miʼ cajel ti eʼtel yicʼot jiñi «tsijiʼ bʌ pañimil» chaʼan miʼ mejlel jiñi paraíso. Luʼ tsijib miʼ cajel, yaʼʌch ochem jiñi Yumʌntel am bʌ ti panchan yicʼot jiñi quixtañujob muʼ bʌ caj i melbeñob i yeʼtel Jehová ti paraíso ila ti Lum.