1, 2. ¿Chuqui mi caj laj qʼuel ti ili estudio?

I TILELɅCH mi la cubin lac chʼijyemlel cheʼ bʌ mi lac ñaʼtan chaʼan mach cabʌlic qʼuin cuxulonla yicʼot cheʼ bʌ mi lac ñusan cabʌl wocol (Job 14:1). Cheʼʌch tsiʼ yubiyob i bʌ jaʼel jiñi i wiñicob Jehová ti wajali. An tsaʼ bʌ i cʼajtiyob chaʼan muqʼuix i chʌmelob (sajtelob) (1 R. 19:2-4; Job 3:1-3, 11; 7:15, 16). Pero tiʼ pejtelel ora Jehová tsiʼ ñuqʼuesʌbeyob i pusicʼal. Cheʼ jaʼel, Jehová tsiʼ yʌcʼʌ tiʼ tsʼijbuntel yaʼ ti Biblia jiñi tsaʼ tac bʌ i ñusayob chaʼan miʼ ñuqʼuesan lac pusicʼal yicʼot chaʼan miʼ cʌntesañonla (Ro. 15:4).

² Ti ili estudio, mi caj lac taj ti tʼan José, jiñi i yalobil Jacob, jiñi mebaʼ Noemí yicʼot i yʌʼlib i cʼabaʼ Rut, jiñi levita tsaʼ bʌ i tsʼijbu jiñi Salmo 73 yicʼot jiñi apóstol Pedro tsaʼ bʌ i ñusayob wocol tsaʼ bʌ i yʌqʼueyob i chʼijyemlel. ¿Chuqui tsiʼ mele Jehová chaʼan miʼ ñuqʼuesʌbeñob i pusicʼal? ¿I chuqui mi laj cʌn tiʼ tojlelob? I jacʼbal ili cʼajtiya tac miʼ yʌqʼueñonla lac ñaʼtan chaʼan «lʌcʼʌl an lac Yum [Jehová] baʼan chʼijiyemoʼ bʌ i pusicʼal» yicʼot «miʼ coltan jini woli bʌ i melob i pusicʼal» o cʼuñob (Sal. 34:18).

3, 4. ¿Chuqui tsiʼ chaʼle José cheʼ bʌ xcolelto?

³ Cheʼ bʌ José añix 17 i jabilel, Dios chaʼyajl tsiʼ yʌqʼue i ñajlen chaʼan ti jumpʼejl bʌ qʼuin mi caj i wen qʼuejlel ti ñuc tiʼ familia (Gn. 37:5-10). Pero mach jalic tsaʼ ñumi, an chuqui tsaʼ qʼuextʌyi tiʼ tojlel. Jiñi i yuscuñob maʼañic tsiʼ qʼueleyob ti ñuc, jin chaʼan tsiʼ choñoyob i tiʼ caj jiñi, tsaʼ caji ti majtan eʼtel tiʼ yotot juntiquil yumʌl i cʼabaʼ Potifar chʼoyol bʌ ti Egipto (Gn. 37:21-28). Orajach chuqui tsaʼ qʼuextʌyi tiʼ tojlel José come  cheʼ bʌ yaʼanto tiʼ yotot miʼ wen cʼuxbintel tiʼ tat, pero cheʼ bʌ tsaʼ chojñi ti Egipto tsaʼ sujti ti xyaj eʼtel (troñel) i chaʼan juntiquil wiñic maʼañic bʌ miʼ chʼujutesan Jehová (Gn. 39:1).

⁴ Cheʼ jaʼel, jiñi i yijñam Potifar tsaʼ caji i yʌl chaʼan José tsiʼ ñopo i piʼlen. I Potifar maʼañic chuqui tsiʼ mele chaʼan miʼ ñaʼtan miʼ sujmʌch chuqui tsaʼ bʌ i yʌlʌ i yijñam, jin chaʼan tsiʼ yotsa José ti cárcel, baqui tsiʼ cʌchʌyob ti cadena (Gn. 39:14-20; Sal. 105:17, 18). ¿Muʼ ba lac ñaʼtan bajcheʼ yubil tsiʼ yubi i bʌ José cheʼ bʌ jiñi xʼixic tsiʼ yʌlʌ lot tiʼ tojlel? ¿I chuqui mi caj i yʌlob jiñi yambʌlob tiʼ tojlel Jehová? Tiʼ caj ili wocol tac miʼ mejlel lac ñaʼtan chaʼan José tsaʼʌch i yubi i chʼijyemlel.

5. ¿Chuqui tsiʼ mele José chaʼan miʼ cʌy i yubin i chʼijyemlel?

⁵ José maʼañic chuqui tsaʼ mejli i mel chaʼan miʼ cʌy majtan eʼtel, i cheʼ jaʼel maʼañic chuqui tsaʼ mejli i mel cheʼ yaʼan ti cárcel. ¿Chuqui tsiʼ mele chaʼan maʼañic miʼ cʼunʼesan jiñi wocol? Tsiʼ chaʼle wersa i mel jiñi eʼtel tac tsaʼ bʌ aqʼuenti i maʼañic tsiʼ xucʼchoco i pensar ti jiñi mach bʌ mejlic i mel. José tiʼ pejtelel ora tsiʼ yʌcʼʌ ti ñaxan Jehová, jin chaʼan Jehová tsiʼ yʌcʼʌ ti loqʼuel ti wen pejtelel chuqui tsiʼ mele (Gn. 39:21-23).

6. ¿Bajcheʼ tsiʼ ñuqʼuesʌbe i pusicʼal José jiñi tsaʼ bʌ i yʌqʼue i ñajlen tac Jehová?

⁶ Yambʌ tajol tsaʼ bʌ ñuqʼuesʌbe i pusicʼal José jiñʌch cheʼ bʌ tsiʼ wen ñaʼta jiñi tsaʼ bʌ i yʌqʼue i ñajlen tac Jehová: Cheʼ mucʼʌch caj i chaʼ qʼuel i familia yicʼot cheʼ ñumen weñix mi caj i yajñel. I cheʼʌch tsaʼ ujti. Cheʼ bʌ José añix 37 i jabilel tsiʼ qʼuele bajcheʼ tsaʼ caji ti tsʼʌctiyel i ñajal (Gn. 37:7, 9, 10; 42:6, 9).

7. Cheʼ bajcheʼ miʼ yʌl 1 Pedro 5:10, ¿chuqui mi caj i coltañonla chaʼan mi lac lʌtʼ jiñi wocol tac?

⁷ ¿Chuqui mi laj cʌn ti jiñi i yejemplo José? Jiñi tsaʼ bʌ i ñusa tac miʼ cʼajtesʌbeñonla chaʼan ti ili pañimil (mulawil) an muʼ bʌ i melbeñoñobla mach bʌ weñic. Tajol juntiquil la quermañu miʼ melbeñonla mach bʌ weñic.  Pero mi mucʼʌch laj qʼuel Jehová bajcheʼ la caj coltaya, maʼañic mi caj la cʌcʼ chaʼan jiñi chʼijyemlel miʼ cʼuñʼesañonla yicʼot maʼañic mi caj laj cʌy lac melben i yeʼtel (Sal. 62:6, 7; pejcan 1 Pedro 5:10). Cheʼ jaʼel, Jehová tsiʼ yʌqʼue jiñi chaʼpʼejl ñajal José cheʼ bʌ xcolelto. Jin chaʼan, ili miʼ pʌsbeñonla chaʼan Jehová yujil chaʼan jiñi xcolelob wem mi caj i melbeñob i yeʼtel. Ti ili ora, an cabʌl xcolelob muʼ bʌ i wen ñopob Jehová cheʼ bajcheʼ José, i an añoʼ bʌ ti cárcel come chʌn xucʼul yom ajñelob ti Jehová (Sal. 110:3).

8. ¿Chuqui ti wocol tsiʼ ñusayob Noemí yicʼot Rut?

⁸ Noemí yicʼot Elimélec añob chaʼtiquil i yalobil i chumulob ti Judá, pero tsaʼ tejchi tsʌts bʌ wiʼñal, jin chaʼan tsaʼ majliyob ti chumtʌl ti jumpʼejl país i cʼabaʼ Moab. Cheʼ bʌ yaʼañob yaʼi, Elimélec tsaʼ chʌmi, i Noemí i bajñel jach tsaʼ cʌyle yicʼot chaʼtiquil i yalobil. Cheʼ jiñi, jiñi chaʼtiquil i yalobil tsiʼ pʌyʌyob i yijñam i cʼabaʼob Rut yicʼot Orpá chʼoyoloʼ bʌ yaʼ ti Moab. Tsaʼ ñumi 10 jab, i jiñi wiñicob maʼañobic i yalobil tsaʼ chʌmiyob (Rt. 1:1-5). Noemí, Rut yicʼot Orpá wen chʼijyem tsiʼ yubiyob i bʌ. Pero ¿chuqui mi caj i melob? Rut yicʼot Orpá miʼ mejlel i chaʼ ñujpuñelob, pero Noemí wolix (choncolix) i wen ñoxʼan. Jin chaʼan ¿majqui mi caj i cʌntan? Noemí tsaʼ cʼoti i yʌl bajcheʼ yubil miʼ yubin i bʌ: «Mach laʼ pejcañon ti Noemí [...]. Pejcañon ti Mara [...], come cabʌl tsiʼ yʌqʼueyon i chʼijiyemlel c pusicʼal jini Mach Bʌ Anic I Pʼisol I Pʼʌtʌlel». Mach tijicñayic miʼ yubin i bʌ, pero Noemí tsaʼ chaʼ sujti majlel ti Belén, i Rut tsaʼ majli yicʼot (Rt. 1:7, 18-20).

9. Cheʼ bajcheʼ miʼ yʌl Rut 1:16, 17, 22, ¿chuqui tsiʼ mele Rut chaʼan miʼ ñuqʼuesʌben i pusicʼal Noemí?

⁹ ¿Chuqui tsiʼ colta Noemí? Jiñʌch jiñi i sujm bʌ cʼuxbiya. Rut tsiʼ pʌsʌ ili cʼuxbiya cheʼ bʌ maʼañic tsiʼ cʌyʌ Noemí (pejcan Rut 1:16, 17, 22). Yaʼ ti Belén, Rut tsiʼ chaʼle tsʌts bʌ eʼtel cheʼ miʼ lot i colobal cebada chaʼan cheʼ jiñi an chuqui miʼ cʼuxob. Jin chaʼan, mach jalic tsaʼ ñumi, Rut tsaʼ qʼuejli chaʼan wem bʌ xʼixic (Rt. 3:11; 4:15).

10. ¿Bajcheʼ tsiʼ pʌsbe Jehová jiñi pʼumpʼuñoʼ bʌ chaʼan mucʼʌch i cʼuxbiñob?

¹⁰ Jehová tsiʼ yʌqʼue jiñi israelitajob jumpʼejl mandar baqui tsiʼ pʌsʌ chaʼan miʼ pʼuntan jiñi pʼumpʼuñoʼ bʌ cheʼ bajcheʼ Noemí yicʼot Rut. Jehová tiʼ sube jiñi i tejclum chaʼan mach yomic mi laj tucʼob o mi laj lotob jiñi tsaʼ bʌ i pʌcʼʌyob chaʼan jiñi pʼumpʼuñoʼ bʌ miʼ mejlel i sʌclañob (Lv. 19:9, 10). Wocolix i yʌlʌ jiñi mandar, Noemí yicʼot Rut mach wocolic tsiʼ yubiyob chaʼan miʼ tajob chuqui miʼ cʼuxob.

11, 12. ¿Chuqui tsiʼ mele Boaz chaʼan Noemí yicʼot Rut miʼ yubiñob i tijicñʌyel?

¹¹ I yum jiñi lum baʼ tsiʼ chaʼle eʼtel Rut jiñʌch Boaz, juntiquil wiñic wen am bʌ i taqʼuin. Boaz tsiʼ mulaj cheʼ bʌ Rut maʼañic tsiʼ cʌyʌ Noemí yicʼot chaʼan miʼ wen cʼuxbin. Jin chaʼan, tsaʼ ñujpuñi yicʼot Rut i tsiʼ mʌñʌ jiñi lum i chaʼan bʌ i familia Noemí, jiñi lum muʼ bʌ caj i chʼʌmob i yalobilob Rut (Rt. 4:9-13). Cheʼ jiñi, tsaʼ tiliyob i yalobil i cʼabaʼ Obed, jiñʌch i tatuch David (Rt. 4:16, 17).

¹² Laʼcu lac ñaʼtan bajcheʼ cʼamel tsiʼ yubi i tijicñʌyel Noemí cheʼ mecʼbil i chaʼan Obed i tsiʼ yʌqʼue wocolix i yʌlʌ Jehová tiʼ pejtelel i pusicʼal. Pero ñumento mi caj i yubiñob i tijicñʌyel Noemí yicʼot Rut cheʼ bʌ mi caj i chaʼ cuxtʌyelob come mi caj i yubiñob chaʼan Obed tsaʼ sujti tiʼ ñojteʼel jiñi Mesías, Jesucristo.

13. ¿Chuqui mi laj cʌn ti jiñi i yejemplo Noemí yicʼot Rut?

¹³ ¿Chuqui mi laj cʌn ti jiñi i yejemplo Noemí yicʼot Rut? Chaʼan miʼ mejlel la cubin lac chʼijyemlel cheʼ bʌ mi lac ñusan wocol. Miʼ mejlel i cʼotel lac ñaʼtan chaʼan maʼañix mi caj i tojʼan  lac wocol. Ti jimbʌ ora, laʼ la cʌqʼuen tiʼ cʼʌb jiñi lac Tat am bʌ ti panchan jiñi lac wocol tac i mach lac ñajtʼesan lac bʌ tiʼ tojlel la quermañujob. La cujil chaʼan Jehová mach tiʼ pejtelic ora mi caj i locʼsañonla ti jiñi wocol woli (yʌquel) bʌ lac ñusan cheʼ bajcheʼ maʼañic tsiʼ chaʼ cuxtesʌbe i ñoxiʼal yicʼot i yalobilob Noemí. Pero mucʼʌch bʌ caj i mel Jehová jiñʌch cheʼ bʌ tiʼ pejtelel ora mi caj i coltañonla laj cuch jiñi wocol, tajol cheʼ bʌ miʼ cʼʌn jiñi la quermañujob chaʼan miʼ pʌsbeñoñobla i sujm bʌ cʼuxbiya (Pr. 17:17).

14. ¿Chucoch tsiʼ wen ubi i chʼijyemlel juntiquil levita?

¹⁴ Jiñi tsaʼ bʌ i tsʼijbu jiñi Salmo 73 jiñʌch juntiquil levita. Jiñi levitajob tsaʼ aqʼuentiyob ñuc bʌ i yeʼtel yaʼ baqui miʼ chʼujutesʌntel Jehová. Pero ti jumpʼejl bʌ qʼuin tsiʼ wen ubi i chʼijyemlel come tsaʼ caji i mulan bajcheʼ añob jiñi jontoloʼ bʌ yicʼot jiñi muʼ bʌ i chañʼesañob i bʌ. Maʼañic tsiʼ mulaj jiñi mach bʌ weñic miʼ melob, pero tsiʼ mulaj bajcheʼ poj wen chumulob (Sal. 73:2-9, 11-14). Jiñi levita tsiʼ qʼuele chaʼan luʼ añob i chaʼan yilal: Chaʼan wen añob i taqʼuin, chaʼan wen tijicñayob yicʼot chaʼan maʼañic chuqui miʼ cʼojoʼtañob. Ili tsaʼʌch i wen aqʼue i chʼijyemlel jiñi levita, jin chaʼan tsiʼ yʌlʌ: «Lolom jach wolij cʌntan c pusicʼal. Lolom jach mij cʌntan c bʌ chaʼan mi cajñel ti sʌc». Ili miʼ pʌs chaʼan colelix i cʌy i melben i yeʼtel Dios.

15. Cheʼ bajcheʼ miʼ yʌl Salmo 73:16-19, 22-25, ¿chuqui tsiʼ mele jiñi levita chaʼan miʼ cʌy i yubin i chʼijyemlel?

¹⁵ (Pejcan Salmo 73:16-19, 22-25). Jiñi levita tsaʼ ochi ti jiñi «chʼujul bʌ Ajñibʌl i chaʼan Dios», baqui yambʌ israelitajob woliʼ chʼujutesañob Jehová. Yaʼi, tsiʼ mele oración chaʼan miʼ mejlel i tojʼesan i ñaʼtʌbal. Jin chaʼan, tsiʼ chʼʌmbe i sujm chaʼan woli pʌs i bʌ ti tonto chaʼan chuqui woliʼ ñaʼtan i chaʼan mi maʼañic miʼ cʌy i ñaʼtan mi caj i ñajtʼesan tiʼ tojlel Jehová. Yicʼot tsiʼ qʼuele chaʼan jiñi jontoloʼ bʌ mi caj ‹i yajlelob yaʼ baʼ tʼuchulob i yoc› yicʼot «bʌbʌqʼuen» bajcheʼ mi caj i jilelob. ¿Chuqui tsiʼ colta jiñi levita chaʼan maʼañix miʼ chʌn ubin i chʼijyemlel yicʼot chaʼan miʼ cʌy i mulan bajcheʼ yilal chumulob jiñi jontolob? Tsiʼ colta cheʼ bʌ tsaʼ caji i qʼuel jiñi jontoloʼ bʌ cheʼ  bajcheʼ miʼ qʼuel Jehová. Cheʼ bʌ tsiʼ mele, tsiʼ chaʼ ubi i ñʌchʼtʌlel i pusicʼal yicʼot chaʼ tijicña tsiʼ yubi i bʌ. Jiñi levita tiʼ sube Jehová: «Com jach jatet ti pañimil, mach comic yambʌ».

16. ¿Chuqui mi laj cʌn ti jiñi i yejemplo jiñi levita tsaʼ bʌ i tsʼijbu jiñi Salmo 73?

¹⁶ ¿Chuqui mi laj cʌn ti jiñi i yejemplo jiñi levita? Chaʼan mach yomic mi lac mulan bajcheʼ chumulob jiñi jontoloʼ bʌ. Jiñi i tijicñʌyelob maʼañic mi caj i jalʼan come maʼañic mi caj i chumtʌlob tiʼ pejtelel ora (Ec. 8:12, 13). Mi tsaʼ lac mulaj bajcheʼ chumulob, lajal bajcheʼ woli la cotsan chʼijyemlel ti lac pusicʼal i miʼ mejlel i yʌcʼ chaʼan mi lac ñajtʼesan lac bʌ tiʼ tojlel Jehová. Jin chaʼan, mi tsaʼ la cubi chʼijyemlel cheʼ bajcheʼ jiñi levita, laʼ lac mel tsaʼ bʌ i mele: Laʼ lac ñʌchʼtan chuqui miʼ subeñonla Jehová yicʼot laʼ lac ñusan qʼuin la quicʼot jiñi la quermañujob. Mi jiñi lac tijicñʌyel jiñʌch Jehová, ñumen tijicña mi caj la cubin lac bʌ yicʼot mi caj lac chʌn ajñel ti jiñi bij muʼ bʌ i pʌyonla majlel lac taj jiñi laj «cuxtʌlel mach bʌ yujilic jilel» (1 Ti. 6:19).

17. ¿Chuqui tac tsiʼ ñusa Pedro tsaʼ bʌ i yʌqʼue i yubin i chʼijyemlel?

¹⁷ Jiñi apóstol Pedro jiñʌch juntiquil wiñic maʼañic bʌ miʼ ticʼ i bʌ i an i tajol jin jach miʼ ñaxan al muʼ bʌ i tilel tiʼ jol. An qʼuiñil tsiʼ yʌlʌ o tsiʼ mele tsaʼ tac bʌ i wiʼil aqʼue i yubin i chʼijyemlel. Jumpʼejl ejemplo, cheʼ bʌ Jesús tiʼ sube i yapóstolob chaʼan mi caj i ñusan wocol yicʼot chaʼan mi caj i tsʌnsʌntel, Pedro tiʼ sube: «Mach cheʼic mi caj a wujtel», jin chaʼan Jesús tsiʼ tiqʼui (Mt. 16:21-23). Cheʼ bʌ jiñi i contrajob tsaʼ cʼoti i chucob Jesús, Pedro ti ora tiʼ tsepbe i chiquin juntiquil i yaj eʼtel jiñi ñuc bʌ sacerdote, jin chaʼan Jesús tsiʼ chaʼ tiqʼui (Jn. 18:10, 11). Cheʼ jaʼel, Pedro tiʼ sube Jesús chaʼan maʼañic mi caj i cʌy anquese jiñi yambʌ apóstolob cheʼʌch miʼ cʼotel i melob (Mt. 26:33). Anquese Pedro cheʼʌch tsiʼ yʌlʌ tsiʼ bʌcʼña jiñi i contrajob i uxyajl tsiʼ yʌlʌ chaʼan mach i cʌñʌyic Jesús. Jin chaʼan «tsaʼ loqʼui majlel» i «tsʌts tsaʼ caji ti uqʼuel» (Mt. 26:69-75). Pedro tsiʼ cʼajtibe i bʌ mi Jesús mucʼʌch caj i ñusʌben i mul.

18. ¿Chuqui tac tsiʼ mele Jesús chaʼan miʼ coltan Pedro chaʼan maʼañic miʼ cʼuñʼesan jiñi chʼijyemlel?

 ¹⁸ Pedro maʼañic tsiʼ yʌcʼʌ chaʼan miʼ cʼuñʼesan jiñi chʼijyemlel. Anquese tsiʼ mele mach bʌ weñic tsiʼ chaʼ taja i tijicñʌyel i tsaʼ caji i bej melben i yeʼtel Jehová yicʼot jiñi yambʌ apóstolob (Jn. 21:1-3; Hch. 1:15, 16). ¿Chuqui tsiʼ colta? Pedro tsiʼ cʼajtesa chaʼan Jesús tsiʼ yʌlʌ chaʼan tsiʼ cʼajtibe Jehová chaʼan maʼañic miʼ cʼuñʼan i ñopoñel yicʼot chaʼan miʼ chaʼ majlel i ñuqʼuesʌben i pusicʼal jiñi i yermañujob. Jehová tsaʼʌch i jacʼbe i yoración. Ti wiʼil, cheʼ bʌ Jesús tsaʼ chaʼ cuxtʌyi tsiʼ pʌsʌ i bʌ tiʼ tojlel Pedro, tajol chaʼan miʼ ñuqʼuesʌben i pusicʼal (Lc. 22:32; 24:33, 34; 1 Co. 15:5). Jesús tsaʼʌch i chaʼ pʌsʌ i bʌ tiʼ tojlel i yapóstolob cheʼ bʌ tsiʼ lon ñusayob jumpʼejl acʼʌlel i ñop i chucob chʌy. Ti jimbʌ ora, Pedro tsaʼ mejli i chaʼ suben Jesús chaʼan mucʼʌch i cʼuxbin. I cheʼ jaʼel, Jesús tsiʼ pʌsbe Pedro chaʼan tsaʼʌch i ñusʌbe i mul come tsiʼ ñumen aqʼue eʼtel (Jn. 21:15-17).

19. Cheʼ bajcheʼ miʼ yʌl Salmo 103:13, 14, ¿bajcheʼ yilal miʼ qʼuel Jehová jiñi lac mul, i bajcheʼ miʼ mejlel lac lajin?

¹⁹ ¿Chuqui mi laj cʌn ti jiñi i yejemplo Pedro? Jiñi tsaʼ bʌ i mele Jesús tiʼ tojlel Pedro miʼ pʌsbeñonla chaʼan yujil pʼuntaya, lajal bajcheʼ i Tat. Jin chaʼan, mi tsaʼ lac mele mach bʌ weñic, mach lac ñaʼtan chaʼan Jehová maʼañic mi caj i ñusʌbeñonla lac mul. Mach ñajʌyic lac chaʼan chaʼan Satanás jiñʌch yom bʌ mi lac ñaʼtan. Yom bʌ mi lac mel jiñʌch cheʼ bʌ mi lac pʌsbeñob laj cʼuxbiya yicʼot lac pʼuntaya jiñi muʼ bʌ melbeñoñobla mach bʌ weñic cheʼ bajcheʼ miʼ mel Jehová ti lac tojlel (pejcan Salmo 103:13, 14).

20. ¿Chuqui mi caj laj qʼuel ti yambʌ estudio?

²⁰ Jiñi tsaʼ bʌ i ñusayob José, Noemí yicʼot Rut, jiñi levita yicʼot Pedro miʼ pʌsbeñonla chaʼan «lʌcʼʌl an lac Yum [Jehová] baʼan chʼijiyemoʼ bʌ i pusicʼal» (Sal. 34:18). Jehová mach tiʼ pejtelelic ora an chuqui mi caj i mel chaʼan maʼañic mi lac ñusan jiñi wocol tac o mi la cubin lac chʼijyemlel. Pero mucʼʌch i pʼʌtʼesan lac ñopoñel cheʼ miʼ coltañonla lac lʌtʼ (1 P. 1:6, 7). Yaʼ ti yambʌ estudio, mi caj laj qʼuel yan tac bʌ muʼ i mel Jehová chaʼan miʼ coltan jiñi i wiñicob cheʼ bʌ chʼijyemob tajol tiʼ caj cheʼ bʌ miʼ ñaʼtañob chaʼan xmulilob o tiʼ caj yan tac bʌ wocol.