¿BAJCHEʼ yubil maʼ wubin a bʌ cheʼ bʌ juntiquil wem bʌ a wamigo miʼ chocbeñet cʼotel jumpʼejl carta muʼ bʌ i wen ñuqʼuesan a pusicʼal? Timoteo tsaʼʌch aqʼuenti jumpʼejl carta bajcheʼ iliyi, tsaʼ bʌ i chocbe cʼotel jiñi apóstol Pablo. Ili carta mi lac taj ili ora yaʼ ti Biblia i mi laj cʌn bajcheʼ Segunda Carta a Timoteo. Miʼ mejlel la cʌl chaʼan Timoteo tsaʼʌch i sʌcla jumpʼejl wem bʌ ajñibʌl chaʼan miʼ mejlel i pejcan jiñi carta yicʼot chaʼan miʼ ñaʼtan chuqui mi caj i suben i yamigo. Tajol Timoteo tsaʼ caji i cʼajtiben i bʌ: «¿Bajcheʼ yilal an Pablo? ¿Muʼ ba caj i yʌqʼueñon ticʼojel chaʼan ñumen wen mic mel jiñi eʼtel (troñel) tac am bʌ tic wenta? ¿Muʼ ba caj i coltañon ili carta chaʼan mic ñumen weñʼesan c subtʼan yicʼot chaʼan ñumen wen mij coltan yambʌlob?». Ili cʼajtiya tac tsaʼʌch jajqʼui ti jiñi carta yicʼot an tacʌch yambʌ bajcheʼ tsiʼ colta. Laʼ laj qʼuel chaʼpʼej uxpʼejl ticʼojel ñuc bʌ i cʼʌjñibal muʼ bʌ lac taj ti jiñi carta.

Cheʼ bʌ Timoteo tsiʼ teche i pejcan jiñi carta, tsiʼ qʼuele chaʼan miʼ wen cʼuxbintel ti Pablo. Jiñi apóstol tiʼ sube: «Cʼuxbibil bʌ calobil» (2 Ti. 1:2). Anquese Timoteo tsʼitaʼ ñumeñix ti 30 i jabilel cheʼ bʌ tsaʼ aqʼuenti ili carta, cheʼ ti jabil 65, cabʌlix chuqui yujil bajcheʼ anciano. Ñumen ti 10 jab tsiʼ chaʼle eʼtel yicʼot Pablo i cabʌl chuqui tsiʼ cʌñʌ tiʼ tojlel.

Timoteo tsaʼʌch i wen ñuqʼuesʌbe i pusicʼal cheʼ bʌ tsiʼ yubi chaʼan Pablo xucʼul woli (choncol) i lʌtʼ jiñi wocol tac. Pablo ñupʼul an ti cárcel yaʼ ti Roma, i mach jalix yom chaʼan mi caj ti tsʌnsʌntel (2 Ti. 1:15, 16; 4:6-8). Timoteo tsiʼ qʼuele chaʼan Pablo maʼañic i bʌqʼuen come tiʼ tsʼijbu: «wolic lʌtʼ pejtelel jini wocol» (2 Ti. 2:8-13). Timoteo tsaʼʌch i wen pʼʌtʼesa cheʼ bʌ tsiʼ yubi chaʼan Pablo wolʌch i lʌtʼ jiñi wocol tac, i miʼ mejlel i pʼʌtʼesañonla jaʼel.

Pablo tiʼ sube Timoteo chaʼan ñumen ñuc i cʼʌjñibal yom miʼ qʼuel jiñi eʼtel woli (yʌquel) bʌ i melben Dios. Pablo tiʼ sube: «Mij cʼajtesʌbeñet chaʼan maʼ pʼʌtʼesan bajcheʼ cʼajc jiñi majtan tilem bʌ ti Dios tsaʼ bʌ aqʼuentiyet» (2 Ti. 1:6, TNM). Ti ili texto, Pablo tsiʼ cʼʌñʌ jiñi tʼan khárisma, am bʌ ti griego, chaʼan jiñi tʼan «majtan». Ili tʼan am bʌ ti griego yom i yʌl cheʼ bʌ an chuqui mi la cʌqʼuentel ti majtan jach, mach bʌ i wentʌlelic chaʼan mi la cʌqʼuentel yicʼot mach bʌ añic chuqui tsaʼ lac mele chaʼan mi la cʌqʼuentel. Timoteo tsaʼ aqʼuenti ili  majtañʌl cheʼ bʌ tsaʼ yajcʌnti chaʼan miʼ mel jumpʼejl ñuc bʌ eʼtel ti congregación (1 Ti. 4:14).

¿Chuqui yom miʼ mel Timoteo yicʼot ili majtañʌl? Cheʼ bʌ tsiʼ pejca jiñi tʼan tac «mij cʼajtesʌbeñet chaʼan maʼ pʼʌtʼesan bajcheʼ cʼajc», tajol tsiʼ yʌqʼue i ñaʼtan jiñi cʼajc añoʼ bʌ i chaʼan jiñi lac piʼʌlob tiʼ yotot, muʼ bʌ i cʼunteʼ cʼunteʼ pul majlel jiñi siʼ cʼʌlʌl miʼ sujtel ti ñich cʼajc. Chaʼan maʼañic miʼ yʌjpel jiñi cʼajc, yom miʼ chʌn otsʌbeñob jiñi siʼ i cheʼ jiñi miʼ bej qʼuixñesañob. Jumpʼejl diccionario miʼ yʌl chaʼan jiñi tʼan anazōpyréō, tsaʼ bʌ i cʼʌñʌ Pablo i am bʌ ti griego yom i yʌl «miʼ chaʼ tsʼʌjyel, miʼ chaʼ pʼʌtʼan». Yom bʌ i yʌl Pablo ilayi, jiñʌch chaʼan Timoteo yom miʼ chaʼlen wersa i mel jiñi eʼtel yicʼot tijicña yom miʼ mel. Lajalʌch bajcheʼ woliʼ suben: «Acʼʌ pejtelel a pusicʼal ti jiñi a weʼtel». Ti ili ora, joñonla jaʼel cheʼʌch yom mi lac mel: Yom mi lac chaʼlen wersa lac melben i yeʼtel Dios yicʼot lac tijicñʌyel.

Timoteo tsiʼ bej pejca jiñi carta i chaʼan Pablo i tsiʼ taja tʼan tac muʼ bʌ caj i coltan chaʼan jiñi i subtʼan. Pablo tiʼ tsʼijbube: «Cʌntan jini utsʼat tac bʌ tsaʼ bʌ i yʌcʼʌ ti a wenta jini Chʼujul bʌ Espíritu chumul bʌ ti lac pusicʼal» (2 Ti. 1:14). ¿Baqui bʌ jiñi utsʼat tac bʌ tsaʼ bʌ aqʼuenti tiʼ wenta Timoteo? Ti jiñi versículo 13, Pablo tiʼ sube chaʼan maʼañic miʼ cʌy jiñi ‹toj bʌ tʼan›, yom bʌ i yʌl, jiñi i sujmlel muʼ bʌ lac taj yaʼ ti Tsʼijbujel tac (2 Ti. 1:13). Come Timoteo juntiquil xʼeʼtel i chaʼan Dios, yom miʼ subeñob i sujmlel jiñi hermanojob yicʼot jiñi mach bʌ hermanojobic (2 Ti. 4:1-5). Cheʼ jaʼel, tsaʼ waʼchoconti bajcheʼ anciano chaʼan miʼ cʌntʌben jiñi i tiñʌmeʼ Dios (1 P. 5:2). ¿Bajcheʼ miʼ mejlel i cʌntan jiñi i sujmlel yom bʌ miʼ sub? Jiñi chʼujul bʌ i yespíritu yicʼot i Tʼan Jehová jiñʌch muʼ bʌ caj i coltan (2 Ti. 3:14-17).

Joñonla jaʼel an chuqui tsaʼ aqʼuentiyonla ti lac wenta, jiñʌch i sujmlel muʼ bʌ la cʌqʼuen i cʌn yambʌlob (Mt. 28:19, 20). Mach ñajʌyic lac chaʼan chaʼan wen ñuc i cʼʌjñibal jiñi i sujmlel muʼ bʌ la cʌcʼ ti cʌñol. Jin chaʼan, yom mi lac mel oración tiʼ pejtelel ora yicʼot mi lac pejcan jiñi i Tʼan Dios ti jujumpʼejl qʼuin (Ro. 12:11, 12; 1 Ti. 4:13, 15, 16). Tajol añet bajcheʼ anciano o maʼ melben i yeʼtel Dios tiʼ pejtelel ora. Cheʼ an ti lac wenta ili eʼtel tac yom miʼ coltañonla chaʼan mi lac pʌs lac pecʼlel come mi lac ñopben i coltaya Dios. Jin chaʼan, miʼ mucʼʌch laj qʼuel ti ñuc yicʼot mi laj cʼajtiben i coltaya Jehová, mi caj i mejlel laj cʌntan jiñi i sujmlel tsaʼ bʌ aqʼuentiyonla.

Yambʌ eʼtel yom bʌ miʼ mel Timoteo jiñʌch cheʼ miʼ cʌntesan jiñi yambʌlob. Jin chaʼan, Pablo tiʼ sube: «Jini tʼan tsaʼ bʌ c subeyet [...], aqʼueñob tiʼ wenta xucʼul bʌ winicob muʼ bʌ caj i cʌntesañob yañoʼ bʌ» (2 Ti. 2:2). Pablo tsiʼ cʼajtesʌbe Timoteo chaʼan yom miʼ cʌntesan yambʌlob pejtelel jiñi tsaʼ bʌ i cʌñʌ. Ti ili ora jaʼel, jiñi ancianojob yom miʼ chaʼleñob wersa i cʌntesan jiñi yambʌlob yaʼ ti congregación. Juntiquil wem bʌ anciano maʼañic miʼ muc bajcheʼ miʼ mejlel jumpʼejl eʼtel. Muʼ bʌ i mel jiñʌch cheʼ miʼ cʌntesan jiñi yambʌlob chaʼan miʼ mejlel i melob jaʼel. Maʼañic miʼ bʌcʼñan chaʼan jiñi muʼ bʌ i cʌntesan ñumen wento miʼ cʼotel i mel jiñi eʼtel. Jin chaʼan, miʼ pʌsben ti tsʼʌcʌl bajcheʼ miʼ mejlel jumpʼejl eʼtel. Yom chaʼan jiñi muʼ bʌ i cʌntesañob miʼ pʼʌtʼañob tiʼ chaʼan bʌ Dios yicʼot miʼ tajob cabʌl i ñaʼtʌbal. Cheʼ bajcheʼ ili, jiñi «xucʼul bʌ winicob» ñumento mi caj i coltan jiñi hermanojob ti congregación.

Timoteo tsaʼʌch i wen qʼuele ti ñuc jiñi carta tsaʼ bʌ i chocbe cʼotel Pablo. Miʼ mejlel la cʌl chaʼan tsaʼʌch i chʌcʌ pejca jiñi ñuc tac bʌ ticʼojel tsaʼ bʌ i yʌqʼue jiñi i yamigo yicʼot tsaʼʌch i wen ñaʼta bajcheʼ mi caj i cʼʌn tiʼ cuxtʌlel.

Joñonla jaʼel la com lac jacʼ ili ticʼojel tac. Jin chaʼan la com lac chaʼlen wersa lac pʼʌtʼesan bajcheʼ cʼajc jiñi lac majtan tilem bʌ ti Dios tsaʼ bʌ aqʼuentiyonla, chaʼan mi laj cʌntan jiñi i sujmlel yicʼot chaʼan mi laj cʌntesan jiñi yambʌlob. Cheʼ bajcheʼ iliyi, mi caj i mejlel lac tsʼʌctesan ti wen jiñi eʼtel tsaʼ bʌ aqʼuentiyonla cheʼ bajcheʼ Pablo tiʼ sube Timoteo (2 Ti. 4:5).