Yaʼ ti panchan, Jesús tsiʼ cʌñʌ wen tac bʌ i melbal (chaʼlibal) chaʼan miʼ tem chaʼlen eʼtel yicʼot yambʌlob. Cheʼ jiñi, cheʼ bʌ tsajñi wʌʼ ti Lum tsiʼ cʌybe wem bʌ ejemplo jiñi tsaʼ bʌ i chaʼleyob eʼtel yicʼotob. ¿Bajcheʼ miʼ coltañonla i yejemplo? Cheʼ mi laj qʼuel majlel, mi caj laj qʼuel uxpʼejl principio muʼ bʌ caj i coltañonla chaʼan wem bʌ xcoltayajonla, chaʼan temelonla yicʼot chaʼan bajcheʼ yom mi laj coltan lac bʌ.

Jiñi yujil bʌ eʼtel yicʼot yambʌlob an i pecʼlel, miʼ qʼuel ti ñuc i piʼʌlob ti eʼtel i maʼañic miʼ chañʼesan i bʌ. Jesús tsiʼ qʼuele chaʼan jiñi i Tat an i pecʼlel. Anquese Jehová jin jach yom miʼ subentel bajcheʼ Tsaʼ bʌ i mele (pʌtʌ) pejtelel chuqui tac an, tsiʼ taja ti tʼan bajcheʼ tsiʼ colta i Yalobil. Tsiquil iliyi ti ili tʼan tac tsaʼ bʌ i yʌlʌ Dios: «Laʼ lac mel winic ti la quejtal» (Gn. 1:26). Cheʼ bʌ Jehová tsiʼ yʌlʌ iliyi, Jesús tsiʼ qʼuele chaʼan jiñi i Tat wen an i pecʼlel (Sal. 18:35).

Jesús tsiʼ pʌsʌ i pecʼlel jaʼel ila ti Lum. Cheʼ bʌ jiñi lac piʼʌlob tsiʼ yʌqʼueyob i ñuclel, Jesús tsiʼ yʌqʼue i ñuclel Jehová (Mar. 10:17, 18; Juan 7:15, 16). Cheʼ jaʼel, tsiʼ chaʼle wersa chaʼan an ñʌchʼtʌlel yicʼot jiñi xcʌntʼañob i chaʼan i tsiʼ qʼuele bajcheʼ i yamigojob, mach cheʼic bajcheʼ xyaj eʼtelob (Juan 15:15). Tsaʼto i pocbeyob i yoc chaʼan miʼ pʌsbeñob chaʼan yom añob i pecʼlel (Juan 13:5, 12-14). Cheʼ bajcheʼ Jesús, joñonla jaʼel yom mi laj qʼuel ti ñuc lac piʼʌlob ti eʼtel i mi lac ñaʼtan chuqui yomob, mach jiñic chuqui la com joñonla. Cabʌl chuqui miʼ mejlel lac taj cheʼ bʌ mi laj comol qʼuel lac bʌ ti ñuc i maʼañic mi laj cʌlʌx cʼojoʼtan (pensalin) majqui mi caj i yʌqʼuentel i ñuclel (Rom. 12:10).

 Jiñi am bʌ i pecʼlel yujil chaʼan «mucʼʌch i joloñel tiʼ pejtelel cheʼ miʼ temob i tʼan cheʼ cabʌlob» (Pr. 15:22). Mach yʌlʌyic bajcheʼ cʼamel la cujil o jiñi lac ñaʼtʌbal, laʼ laj cʼajtesan chaʼan mi juntiquilic lac piʼʌl laj yujilix. Jesús jaʼel tsiʼ cʌñʌ chaʼan an chuqui tac mach bʌ i cʌñʌyic (Mat. 24:36). Cheʼ jaʼel, tsiʼ mulaj i cʌn chuqui miʼ ñaʼtañob jiñi xcʌntʼañob i chaʼan anquese xmulilob (Mat. 16:13-16). Jin chaʼan tijicñayob jiñi i piʼʌlob ti eʼtel cheʼ bʌ yaʼañob yicʼot. Cheʼ jaʼel, cheʼ bʌ an lac pecʼlel i la cujil chaʼan an chuqui tac maʼañic bʌ miʼ mejlel lac mel (chaʼlen), i la com lac ñʌchʼtan chuqui miʼ yʌlob yambʌlob woli (choncol) lac sʌclan jiñi ñʌchʼtʌlel i wen mi caj i loqʼuel chuqui mi lac mel.

Ñumen ñucto i cʼʌjñibal cheʼ bʌ jiñi ancianojob miʼ lajibeñob i pecʼlel Jesús cheʼ bʌ miʼ comol chaʼleñob eʼtel. Yom cʼajalob i chaʼan chaʼan jiñi chʼujul bʌ espíritu miʼ mejlel i coltan majqui jach bʌ anciano chaʼan miʼ yʌl muʼ bʌ i mejlel i coltañob chaʼan miʼ yajcañob chuqui wen. Mi yaʼ ti tempa bʌ tac muʼ bʌ i melob miʼ chaʼleñob wersa i pʌsob chaʼan tiʼ pejtelelob miʼ mejlel i yʌlob chuqui miʼ ñaʼtañob mi caj i mejlel i yajcañob chuqui wem bʌ muʼ bʌ i coltan jiñi congregación.

Juntiquil wem bʌ xcoltaya miʼ chʼʌmben i sujm yambʌlob. Jin chaʼan, maʼañic miʼ tsʌtsʼesan i bʌ i miʼ chʼʌm ti ñuc muʼ bʌ i yʌl yambʌlob. Tiʼ sujm, Jesús mach junsujtelic jach tsiʼ qʼuele chaʼan jiñi i Tat miʼ chʼʌmben i sujm yambʌlob. Jumpʼejl ejemplo, Jehová tsiʼ choco tilel chaʼan miʼ coltañonla chaʼan maʼañic mi lac chʌmel (sajtel) anquese añʌch lac mul (Juan 3:16).

Cheʼ bʌ i cʼʌjñibal tsiʼ qʼuele, Jesús tsiʼ mele chuqui yom yañoʼ bʌ. Laʼ laj cʼajtesan bajcheʼ tsiʼ colta juntiquil xʼixic fenicia bʌ anquese yaʼ jach tsaʼ chojqui majlel ti jiñi tejclum Israel (Mat. 15:22-28). Cheʼ jaʼel, tsiʼ chʼʌmbe i sujm jiñi xcʌntʼañob i chaʼan cheʼ maʼañic tsiʼ cʼajtibeyob chuqui maʼañix bʌ miʼ mejlel i melob. Cheʼ bʌ Pedro tsiʼ yʌlʌ chaʼan mach i cʌñʌyic, Jesús tsiʼ ñusʌbe i mul i ti wiʼil tsiʼ yʌqʼue ñuc tac bʌ eʼtel (Luc. 22:32; Juan 21:17; Hech. 2:14; 8:14-17; 10:44, 45). I yejemplo Jesús miʼ pʌsbeñonla chaʼan yom mi lac chʼʌm ti ñuc yambʌlob chaʼan mi lac pʌs chaʼan maʼañic mi lac tsʌtsʼesan lac bʌ (Filip. 4:5).

Mi la cujilʌch i chʼʌmbentel i sujm, mi caj lac mejlel ti eʼtel la quicʼot majqui jach bʌ lac piʼʌlob. Jesús wen tsaʼ ajñi yicʼot pejtelel lac piʼʌlob,  jin chaʼan jiñi i contrajob tiʼ tsʼaʼleyob i tsiʼ yʌlʌyob chaʼan i yamigo xchʼʌm tojoñelob yicʼot xmulilob tsaʼ bʌ i ñopoyob jiñi wen tʼan (Mat. 11:19). ¿Muʼ ba i mejlel lac lajin Jesús i tijicña mi lac chaʼlen eʼtel la quicʼot yambʌlob anquese mach lajalobic bajcheʼ joñonla? Juntiquil hermano i cʼabaʼ Louis, am bʌ i chaʼle coltaya bajcheʼ viajante yicʼot ti Betel, an i chaʼle eʼtel yicʼot cabʌl hermanojob mach bʌ junlajalobic, miʼ yʌl: «Joñon mij qʼuel chaʼan jiñi hermanojob lajalob bajcheʼ jumpʼejl pared melbil bʌ ti xajlel tac mach bʌ junlajalic bajcheʼ yilal yicʼot i colemlel. Cheʼ wen miʼ tojʼesʌntel jujumpʼejl xajlel toj mi caj i loqʼuel jiñi pared. Cheʼ jaʼel, an c chaʼle wersa chaʼan mic tojʼesan bajcheʼ yilalon chaʼan mic chaʼlen eʼtel tic ñʌchʼtʌlel quicʼot yambʌlob i cheʼ bajcheʼ jiñi wen miʼ loqʼuel jiñi eʼtel». ¡Jumpʼejlʌch wem bʌ melbalʌl!

¿Bajcheʼ mi lac mejlel ti sujtel ti wem bʌ xcoltaya yaʼ ti congregación? Jumpʼejl ejemplo, tajol yaʼ ti laj c grupo an hermanojob mach bʌ junlajalic i jabilel bajcheʼ lac chaʼan o yambʌ bajcheʼ yom miʼ coltañob i familia. Cheʼ bʌ mi lac chaʼlen subtʼan la quicʼotob, ¿muʼ ba lac mejlel lac chaʼlen subtʼan cheʼ bajcheʼ miʼ mulañob chaʼan miʼ ñumen ñusañob i bʌ ti subtʼan?

Jiñi wem bʌ xcoltayajob «miʼ tʼoxob chuqui añob i chaʼan» (1 Tim. 6:18). Cheʼ bʌ Jesús tsiʼ chaʼle eʼtel yicʼot i Tat tsiʼ qʼuele chaʼan Jehová maʼañic chuqui miʼ muc. Cheʼ bʌ Jehová tsiʼ mele jiñi panchan yaʼ tsaʼ ajñi Jesús i tsiʼ cʌñʌ tiʼ tojlel (Pr. 8:27). Ti wiʼil, yicʼot i tijicñʌyel, Jesús tiʼ sube jiñi xcʌntʼañob i chaʼan chuqui tac tsiʼ yubi i yʌl i Tat (Juan 15:15). Cheʼ bajcheʼ Jehová, yom mi lac tʼox la quicʼot la quermañujob jiñi la cujil bʌ yicʼot jiñi lac ñaʼtʌbal. Juntiquil wem bʌ xcoltaya maʼañic miʼ muc chuqui yujil chaʼan jach maʼañic majqui yambʌ miʼ ñaʼtan. Tijicña mi caj i pʌsben yambʌlob chuqui tac cʌmbil i chaʼan.

Yambʌ bajcheʼ miʼ mejlel lac tʼox chuqui an lac chaʼan jiñʌch cheʼ mi lac tijicñesʌben i pusicʼal la quermañujob. Tijicña mi la cubin cheʼ bʌ an majqui miʼ qʼuel ti ñuc bajcheʼ mi lac chaʼlen wersa i ti jumpʼejl i pusicʼal miʼ yʌqʼueñonla wocolix i yʌlʌ, ¿ñomach? Jesús tsiʼ yʌqʼue i yorajlel i subeñob i piʼʌlob ti eʼtel chuqui tac wem bʌ miʼ qʼuelob tiʼ tojlelob (laja yicʼot Mateo 25:19-23; Luc. 10:17-20). Tsaʼto i subeyob chaʼan mi caj i melob «ñumen ñuc bʌ eʼtel tac» (Juan 14:12). I cheʼ bʌ jumpʼejl jax acʼʌlel yom chaʼan miʼ chʌmel tsiʼ yʌqʼue i yubin i tijicñʌyel jiñi xucʼul bʌ i yapóstolob, tiʼ subeyob: «Jatetla maʼañic mi laʼ cʌyon anquese añon ti wocol tac» (Luc. 22:28). Miʼ mejlel la cʌl chaʼan jiñi tʼan tac tsaʼʌch i wen ñuqʼuesʌbeyob i pusicʼal i tsiʼ coltayob chaʼan miʼ ñumen chaʼleñob eʼtel. Mi joñonla jaʼel mi la cʌqʼuen i yorajlel chaʼan mi lac subeñob chaʼan weñʌch woli (yʌquel) bʌ i melob jiñi hermanojob, ñumen tijicña mi caj i yajñelob i mi caj i ñumen chaʼleñob wersa.

Juntiquil hermano i cʼabaʼ Kayode miʼ yʌl: «Mach wersajic tojet chaʼan wem bʌ xcoltayajet, pero mucʼʌch i mejlel a wʌqʼuen i tijicñʌyel yambʌlob yicʼot maʼ coltañob chaʼan mach wocolic miʼ yubiñob i yeʼtel». ¿Cheʼet ba bajcheʼ jiñi? ¿Ixcu cheʼ muqʼuic a cʼajtiben yambʌ hermanojob mi wem bʌ xcoltayajet? ¿Tijicña ba miʼ yubiñob yicʼotet cheʼ bajcheʼ jiñi xcʌntʼañob tsiʼ yubiyob i bʌ tiʼ tojlel Jesús? Mi cheʼʌchi, mi caj i mejlel a wʌl cheʼ bajcheʼ tsiʼ yʌlʌ jiñi apóstol Pablo: «Lac piʼʌl lac bʌ ti eʼtel chaʼan tijicña mi laʼ wajñel» (2 Cor. 1:24).