Jehová tiʼ sube jiñi israelitajob chaʼan yom chʼujulob. Chaʼan miʼ coltañob, tsiʼ yʌqʼueyob ili mandar: «Mach a chaʼlen jopʼtʼan ñumel yaʼ ti a lumal. Mach yomic maʼ wʌcʼ a bʌ tiʼ contra i cuxtʌlel a piʼʌl. Joñon Jehová» (Lv. 19:2, 16, TNM).

Jiñi tʼan «maʼ wʌcʼ a bʌ tiʼ contra» tsiquilʌch miʼ pʌsben i sujmlel bajcheʼ an jiñi tʼan hebreo original bʌ. Pero ¿chuqui yom i yʌl? Jumpʼejl libro chaʼan bʌ judíojob miʼ yʌl tiʼ tojlel Levítico: «Ili versículo wocol ti tsictesʌntel come maʼañic miʼ mejlel ti ñoj ñaʼtʌntel baqui bʌ i sujmlel jiñi tʼan hebreo, jiñi literal bʌ i sujmlel jiñʌch ‹mach yomic waʼalonla ti lʌcʼʌl o tiʼ tʼejl›».

Chaʼtiqui uxtiquil wen i cʌñʌyoʼ bʌ chaʼan jiñi Biblia miʼ ñaʼtañob chaʼan ili tʼan tsuyul yicʼot jiñi versículo 15, muʼ bʌ i yʌl: «Mach yomic jelel mi laʼ chaʼlen meloñel chaʼan mi laʼ ticʼlan jini pʼumpʼun bʌ, chaʼan mi laʼ coltan jini wen chumul bʌ. Toj yom mi laʼ mel laʼ piʼʌlob» (Lv. 19:15). Cheʼ i sujmic jiñi, jiñi mandar am bʌ ti versículo 16 chaʼan maʼañic miʼ yʌcʼ i bʌ tiʼ contra yambʌ yom i yʌl chaʼan jiñi israelitajob mach yomic miʼ melob (chaʼleñob) chuqui mach bʌ tojic yaʼ ti meloñel, cheʼ bʌ miʼ chaʼleñob choñoñel o yaʼ tiʼ familia. I mach yomic miʼ chaʼleñob lot jaʼel chaʼan miʼ bajñel locʼsañob i wenlel. I sujmʌch, mach yomic mi lac mel jiñi, pero an junchajp ñumen wem bʌ bajcheʼ miʼ mejlel lac chʼʌmben i sujm jiñi tʼan am bʌ ti versículo 16.

Laʼ laj qʼuel muʼ bʌ i yʌl i tejchibal ili versículo. Dios tiʼ sube jiñi israelitajob chaʼan mach yomic miʼ chaʼleñob jopʼtʼan ñumel. Laʼ laj cʼajtesan chaʼan jiñi jopʼtʼan mach jiñic jach cheʼ bʌ mi la cʌl juntiquil lac piʼʌl, anquese ili mucʼʌch i yʌcʼ wocol jaʼel (Pr. 10:19; Ec. 10:12-14; 1 Tim. 5:11-15; Sant. 3:6). Lʌcʼʌ tiʼ pejtelel ora, jiñi muʼ bʌ i chaʼleñob jopʼtʼan yilol i chaʼañob miʼ melob chaʼan miʼ ticʼlañob juntiquil. Jiñi muʼ bʌ i chaʼleñob jopʼtʼan tajol miʼ chaʼleñob tʼan tiʼ tojlel juntiquil lac piʼʌl anquese jiñi miʼ mejlel i yʌcʼ ti wocol i cuxtʌlel. Jiñʌch tsaʼ bʌ ujti tiʼ tojlel Nabot. Chaʼtiqui uxtiquil wiñicob tsiʼ jopʼbeyob i mul, i tiʼ caj jiñi tsiʼ juluyob ti xajlel chaʼan miʼ tsʌnsañob anquese maʼañic i mul (1 R. 21:8-13). Jin chaʼan, cheʼ bajcheʼ miʼ yʌl jiñi i yujtibal Levítico 19:16, juntiquil muʼ bʌ i chaʼlen jopʼtʼan tajol woli (choncol) i yʌcʼ i bʌ tiʼ contra i cuxtʌlel jiñi yambʌ lac piʼʌl.

Cheʼ jaʼel, tajol juntiquil miʼ jopʼben i mul yambʌ tiʼ caj miʼ tsʼaʼlen. Ti 1 Juan 3:15 miʼ yʌl: «Pejtelel muʼ bʌ i tsʼaʼlen i yermañu juntiquilʌch xtsʌnsa, i jatetla laʼ wujil chaʼan mi juntiquilic xtsʌnsa mi caj i taj jiñi cuxtʌlel mach bʌ añic miʼ jilel». Mi lac taj laj qʼuel chaʼan, cheʼ bʌ Dios tsaʼ ujti i yʌcʼ jiñi mandar am bʌ ti Levítico 19:16, tsiʼ yʌlʌ: «Mach a tsʼaʼlen a wermañu ti a pusicʼal» (Lv. 19:17, TNM).

Jin chaʼan, jiñi mandar am bʌ ti Levítico 19:16 miʼ pʌsbeñonla junchajp ñuc bʌ i cʼʌjñibal chaʼan jiñi xñoptʼañonbʌla. Yom mi lac locʼsan jiñi mach bʌ weñic lac pensar i maʼañic baʼ ora yom mi lac chaʼlen jopʼtʼan tiʼ tojlel yambʌ. Mi tsaʼ la cʌcʼʌ lac bʌ tiʼ contra yambʌ, yom i yʌl, mi lac chaʼlen jopʼtʼan tiʼ tojlel tiʼ caj jach maʼañic mi lac mulan bajcheʼ yilal o tiʼ caj i tsʌytsʌyñiyel lac pusicʼal, woli (yʌquel) lac pʌs chaʼan mi lac tsʼaʼlen. I tiʼ tojlel juntiquil xñoptʼan mach yomic an tsʼaʼleya (Mat. 12:36, 37).