1. ¿Chuqui jiñi wen ñuc bʌ tsiʼ yʌqʼueyonla Jehová cheʼ bʌ tsiʼ meleyonla?

CHEʼ bʌ Jehová tsiʼ meleyonla, an chuqui tac wen ñuc bʌ tsiʼ yʌqʼueyonla. Tsiʼ yʌqʼueyonla lac pensar chaʼan mi lac ñaʼtan bajcheʼ yom mi lac lajmesan lac wocol tac o mi lac wʌn chajpan chuqui la com lac mel (Proverbios 2:11). Yicʼot jaʼel, tsiʼ yʌqʼueyonla lac pʼʌtʌlel chaʼan miʼ mejlel lac mel chuqui tsaʼix bʌ lac wʌn ñaʼta yicʼot chaʼan mi lac taj chuqui la com (Filipenses 2:13). Tsiʼ yʌqʼueyonla jaʼel jiñi laj conciencia, muʼ bʌ i subeñonla chuqui jiñi wen bʌ yicʼot mach bʌ weñic. Miʼ coltañonla chaʼan mi lac tsʼaʼlen jiñi mulil yicʼot mi lac tojʼesan mach bʌ weñic tsaʼ lac mele (Romanos 2:15).

2. ¿Bajcheʼ yom Jehová chaʼan mi laj cʼʌn jiñi aqʼuebil bʌ i chaʼañonla?

² Jehová miʼ cʼuxbiñonla yicʼot yom chaʼan tijicñayonla, jin chaʼan yom cheʼ utsʼat mi laj cʼʌn jiñi tsaʼ bʌ i yʌqʼueyonla. Jumpʼejl ejemplo, yaʼ ti Tsʼijbujel Hebreo miʼ subeñonla chaʼan mi añʌch lac bʌxlel utsʼat mi caj i loqʼuel chuqui mi lac chajpan.  Cheʼ jaʼel, miʼ yʌl: «Tiʼ pejtelel chuqui maʼ mel, mele bajcheʼ yom melol» (Proverbios 21:5; Eclesiastés 9:10). Yaʼ ti Tsʼijbujel Griego miʼ yʌqʼueñonla ili ticʼojel: «Laʼ laj coltan pejtelel winicob cheʼ i yorajlel to». Cheʼ jaʼel miʼ yʌl: «Dios tsiʼ yʌqʼueyetla laʼ cʼʌjñibal ti jujuntiquiletla tiʼ yutslel i pusicʼal chaʼan mi laʼ coltan laʼ piʼʌlob» (Gálatas 6:10; 1 Pedro 4:10). Cheʼ bajcheʼ mi laj qʼuel, Jehová yom chaʼan mi lac mel chuqui utsʼat chaʼan i wenlel yambʌlob yicʼot lac wenlel.

3. ¿Chuqui jiñi maʼañix bʌ miʼ mejlel lac mel?

³ Jehová yom chaʼan utsʼat mi laj cʼʌn jiñi tsaʼ bʌ i yʌqʼueyonla, pero yujil chaʼan pʼisbil jach baqui jaxʌl mi lac mejlel. Jumpʼejl ejemplo, maʼañic miʼ mejlel lac jisan jiñi mulil yicʼot chʌmel (sajtel) (1 Reyes 8:46). Cheʼ jaʼel, maʼañic miʼ mejlel lac ticʼ jiñi wiñicob xʼixicob (quixtañujob) tiʼ pejtelel chuqui yom miʼ melob, come luʼ librejonla chaʼan mi lac mel chuqui la com. Anquese cabʌl chuqui la cujil, maʼañic miʼ mejlel lac laj lac bʌ bajcheʼ Jehová (Isaías 55:9).

4. ¿Chuqui mi caj laj qʼuel ti ili temaj?

⁴ Yom mi laj cʌy chaʼan miʼ tojʼesañonla Jehová tiʼ pejtelel ora. Yicʼot jaʼel, yom mi lac ñop chaʼan mucʼʌch caj i coltañonla i mi an chuqui maʼañic miʼ mejlel lac bajñel mel, jiñʌch mi caj i mel. Pero Jehová yom chaʼan mi lac ñaʼtan jaʼel bajcheʼ miʼ mejlel lac tojʼesan lac wocol yicʼot mi laj coltan yambʌlob (pejcan Salmo 37:3). Com bʌ la cʌl jiñʌch chaʼan yom mi lac ñop Jehová yicʼot mi lac mel chuqui utsʼat. Chaʼan mi lac ñaʼtan bajcheʼ miʼ mejlel lac mel, ti ili temaj mi caj laj qʼuel tsaʼ bʌ ujti tiʼ tojlel Noé, David yicʼot yambʌ i wiñicob Jehová  xucʼul bʌ tsiʼ ñopoyob. Mi caj laj qʼuel chaʼan an chuqui maʼañic bʌ tsaʼ mejliyob i mel, pero tsiʼ yʌcʼʌyob i pensar ti jiñi mucʼʌch bʌ i mejlelob i mel.

5. Tsictesan bajcheʼ yilal baqui tsaʼ chumle Noé.

⁵ Jiñi Biblia miʼ yʌl chaʼan Noé tsaʼ chumle baqui an cabʌl quixtañu muʼ bʌ i melob jontolil yicʼot miʼ chaʼleñob tsʼiʼlel (Génesis 6:4, 9-13). Jehová tsiʼ sube Noé chaʼan ti jumpʼejl bʌ qʼuin mi caj i jisan jiñi jontoloʼ bʌ. Pero cheʼ maxto cʼoti jiñi qʼuin, Noé tajol tsaʼʌch i wen taja i chʼijiyemlel tiʼ caj i melbal jiñi quixtañujob. Tsaʼ cʼoti i qʼuel chaʼan an chuqui tac maʼañic bʌ miʼ mejlel i mel, pero tsiʼ qʼuele jaʼel chaʼan an tacʌch chuqui mucʼʌch bʌ i mejlel i mel.

6, 7. a) ¿Chuqui maʼañic bʌ tsaʼ mejli i mel Noé? b) ¿Bajcheʼ lajal jiñi woli bʌ lac ñusan cheʼ bajcheʼ tsiʼ ñusa Noé?

⁶ Maʼañic bʌ tsaʼ mejli i mel Noé. Noé tiʼ tsictesa tsaʼ bʌ i yʌlʌ Dios cheʼʌch bajcheʼ tsaʼ subenti. Pero maʼañic tsaʼ mejli i xicʼ jiñi quixtañujob chaʼan miʼ ñʌchʼtañob. Maʼañic tsaʼ mejli i mel chaʼan ti ora miʼ cʼotel jiñi ñuc bʌ Butʼjaʼ. Yom jach bʌ miʼ mel jiñʌch cheʼ miʼ ñop chaʼan Jehová mucʼʌch caj i jisan jiñi jontoloʼ bʌ cheʼ baqui ora utsʼat miʼ qʼuel (Génesis 6:17).

⁷ Ili pañimil (mulawil) baqui chumulonla jaʼel, wen an jontolil i la cujil chaʼan Jehová mi caj i jisan (1 Juan 2:17). Pero maʼañic majqui miʼ mejlel lac wersa xicʼben i jacʼ «jini wen tʼan chaʼan i yumʌntel Dios». Yicʼot jaʼel, maʼañic chuqui miʼ mejlel lac mel chaʼan muqʼuix i tejchel jiñi ñuc bʌ wocol cheʼ maxto i  yorajlelic (Mateo 24:14, 21). Cheʼ bajcheʼ tsiʼ mele Noé, yom mi lac ñop chaʼan Dios mucʼʌch caj i jisan jiñi jontolil (Salmo 37:10, 11). Ti jumpʼejl lac pusicʼal mi lac ñop chaʼan Jehová maʼañic mi caj i bej acʼ ti ñumel i yorajlel cheʼ bajcheʼ tsaʼix i wʌn ñaʼta chaʼan mi caj i jisan jiñi jontolil (Habacuc 2:3).

8. ¿Baqui tsiʼ yʌcʼʌ i pensar Noé? (Qʼuele jiñi dibujo am bʌ tiʼ tejchibal).

⁸ Tsaʼʌch bʌ mejli i mel Noé. Noé yaʼʌch tsiʼ yʌcʼʌ i pensar ti chuqui muʼ bʌ i mejlel i mel, i maʼañic tsaʼ cʼunʼa tiʼ caj jiñi mach bʌ añic tsaʼ mejli i mel. Jumpʼejl ejemplo, ti jumpʼejl i pusicʼal tiʼ tsictesa jiñi tʼan tsaʼ bʌ i yʌlʌ Jehová (2 Pedro 2:5). Ili jiñʌch tsaʼ bʌ i colta chaʼan pʼʌtʌl miʼ yajñel i chʼujbiya. Cheʼ jaʼel, Noé tsiʼ jacʼbe i mandar Jehová chaʼan bajcheʼ yom miʼ mel jiñi arca (pejcan Hebreos 11:7).

9. ¿Bajcheʼ miʼ mejlel lac lajiben i melbal Noé?

⁹ Cheʼ bajcheʼ Noé, joñonla jaʼel woli (choncol) lac «chaʼliben i yeʼtel lac Yum» (1 Corintios 15:58). Jumpʼejl ejemplo, mi lac chaʼlen coltaya chaʼan miʼ mejlel yicʼot miʼ tojʼesʌntel i Yotlel Tempa bʌ yicʼot i Yotlel Colem Tempa bʌ tac. An muʼ bʌ i chaʼleñob coltaya ti colem tempa bʌ tac, ti Betel o ti jumpʼejl Oficina chaʼan Traducción. Pero mi lac ñumen chaʼlen subtʼan, come miʼ coltañonla lac ñumen pʼʌtʼesan lac pijtaya chaʼan ti talto bʌ qʼuin. Juntiquil hermana miʼ yʌl chaʼan cheʼ bʌ miʼ tsictesʌben yambʌlob jiñi bendición tac muʼ bʌ caj i chʼʌm tilel jiñi Yumʌntel, miʼ taj i qʼuel chaʼan maʼañobic i pijtaya come maʼañic baʼ ora mi caj i tojʼañob i wocol miʼ ñaʼtañob. Pero joñonla añʌch lac pijtaya, i miʼ pʼʌtʼan cheʼ mi lac loqʼuel ti subtʼan. Miʼ coltañonla chaʼan mi lac chaʼlen wersa lac taj la cuxtʌlel mach bʌ añic miʼ jilel (1 Corintios 9:24).

10. Tsictesan chuqui tsiʼ mele David.

¹⁰ Jiñi rey David maʼañic tsiʼ cʌyʌ i ñop Dios, i Jehová tsiʼ wen cʼuxbi (Hechos 13:22). David tsiʼ chaʼle tsʌts bʌ mulil cheʼ bʌ tsiʼ piʼle juntiquil xʼixic i cʼabaʼ Betsabé (Bat-seba). Chaʼan maʼañic miʼ tsictiyel i mul, tsiʼ chajpa bajcheʼ miʼ mejlel ti tsʌnsʌntel ti guerra jiñi Urias, i ñoxiʼal jiñi Betsabé. David tsiʼ chocbe majlel jumpʼejl jun jiñi Joab baqui tsiʼ yʌlʌ chaʼan Urías yom miʼ tsʌnsʌntel, i jiñʌch Urías tsaʼ bʌ i choco majlel i yʌqʼuen (2 Samuel 11:1-21). Tiʼ wiʼil, jiñi mulil tac tsaʼ bʌ i mele David tsaʼʌch cʼoti ti ñaʼtʌntel (Marcos 4:22). ¿Chuqui tsiʼ mele David?

11, 12. a) ¿Chuqui maʼañic tsaʼ mejli i mel David cheʼ tsaʼix i chaʼle mulil? b) ¿Chuqui mi caj i mel Jehová ti lac tojlel mi mucʼʌch laj cʌy lac mul?

¹¹ Maʼañic bʌ tsaʼ mejli i mel David. David tsaʼʌch i tajbe i wocolel jiñi mulil tac tsaʼ bʌ i mele, i maʼañic chuqui tsaʼ mejli i mel chaʼan miʼ lajmesan (2 Samuel 12:10-12, 14). Pero tsiʼ wen pʌsʌ i ñopoñel come tsaʼʌch i cʌyʌ i mul. Tsiʼ ñopo chaʼan Jehová tsaʼʌch i ñusʌbe i mul i chaʼan  jiñʌch mi caj i coltan i cuch i wocolel tac tsaʼ bʌ i mele.

¹² Ti lac pejtelel an lac sajtemal come xmulilonla. Pero an mulil tac ñumen tsʌts bʌ bajcheʼ yan tac bʌ. An i tajol maʼañix miʼ mejlel lac yʌp chuqui tsaʼ lac mele. Tajol yom mi laj cuchben i wocolel tsaʼ bʌ lac mele (Gálatas 6:7). Pero mi lac ñopben i tʼan Dios chaʼan, mi mucʼʌch laj cʌy lac mul, mi caj i coltañonla tiʼ pejtelel jiñi wocol muʼ bʌ lac taj (pejcan Isaías 1:18, 19 yicʼot Hechos 3:19).

13. ¿Chuqui tsiʼ mele David chaʼan wen miʼ chaʼ ajñel yicʼot Jehová?

¹³ Tsaʼʌch bʌ mejli i mel David. David tsiʼ yʌcʼʌ i bʌ ti coltʌntel ti Jehová come utsʼat tsiʼ chaʼ mulaj ajñel tiʼ tojlel. Jumpʼejl ejemplo, tsaʼʌch i jacʼʌ jiñi ticʼojel tsaʼ bʌ aqʼuenti tiʼ tojlel Natán, xʼaltʼan bʌ i chaʼan Jehová (2 Samuel 12:13). Cheʼ jaʼel, David tsiʼ sube Jehová jiñi i mul. Cheʼʌch tsiʼ pʌsʌ chaʼan yomʌch miʼ chaʼ qʼuejlel ti wen tiʼ tojlel Jehová (Salmo 51:1-17). Maʼañic tsiʼ yʌcʼʌ chaʼan miʼ yʌqʼuen i chʼijiyemlel jiñi tsaʼ bʌ i mele, i cheʼʌch tsaʼ mejli i chʼʌmben isujm. Maʼañic tsiʼ chaʼ mele jiñi mulil tac. Ti wiʼil, wen ñopol i chaʼan Dios cheʼ bʌ tsaʼ chʌmi, i cheʼʌch miʼ cʼajtesan Jehová (Hebreos 11:32-34).

14. ¿Chuqui mi laj cʌn tiʼ tojlel David?

¹⁴ ¿Chuqui mi laj cʌn tiʼ tojlel David? Mi tsaʼ lac chaʼle tsʌts bʌ mulil, yom mi laj cʌy lac mel, mi lac suben Jehová yicʼot mi laj cʼajtiben chaʼan miʼ ñusʌbeñonla (1 Juan 1:9). Cheʼ jaʼel, yom mi lac pejcan jiñi ancianojob, come jiñobʌch muʼ bʌ i mejlelob i coltañonla chaʼan wen mi lac chaʼ ajñel tiʼ tojlel Jehová (pejcan Santiago 5:14-16). Laʼ lac jacʼben i coltaya Jehová, i cheʼʌch mi lac pʌs chaʼan mucʼʌch lac ñop chaʼan mi caj i ñusan lac mul. Laʼ laj cʌn ti jiñi tsaʼ bʌ lac mele yicʼot laʼ lac chʌn melben i yeʼtel (troñel) Jehová (Hebreos 12:12, 13).

15. ¿Chuqui mi laj cʌn tiʼ tojlel Ana?

¹⁵ Tajol la cujil chuqui tsiʼ ñusayob yambʌ i wiñicob Dios tsaʼ bʌ i ñopbeyob i tʼan yicʼot tsiʼ chaʼleyob wersa i melob chuqui wen anquese tsiʼ tajayob wocol. Laʼ laj qʼuel tiʼ tojlel Ana. Ti ñaxan, maʼañic tsaʼ mejli i taj i yalobil. Maʼañic chuqui tsaʼ mejli i bajñel mel, pero tsiʼ ñopo chaʼan Jehová mi caj ñuqʼuesʌben i pusicʼal. Jin chaʼan, ti bele ora tsaʼ majli yaʼ ti tabernáculo chaʼan miʼ chʼujutesan Jehová yicʼot miʼ suben bajcheʼ yubil miʼ yubin i bʌ (1 Samuel 1:9-11). Ana juntiquilʌch wem bʌ xʼixic yom bʌ mi lac lajin. Tajol cʼamonla o an chuqui woli (yʌquel) lac chaʼlen, i maʼañic miʼ mejlel laj qʼuextan woli bʌ lac ñusan. ¿Chuqui miʼ mejlel lac mel? Yom mi laj cʌyben tiʼ wenta Jehová i mi lac ñop chaʼan mucʼʌch caj i cʌntañonla (1 Pedro 5:6, 7). Laʼ lac chaʼlen wersa lac locʼsʌben i wenlel jiñi tempa bʌ tac yicʼot yan tac bʌ coltʌntel muʼ bʌ  i yʌqʼueñonla jiñi i yorganización Jehová (Hebreos 10:24, 25).

16. ¿Chuqui miʼ mejlel i cʌñob jiñi tatʌlob tiʼ tojlel Samuel?

¹⁶ ¿Chuqui miʼ mejlel i mel jiñi tatʌlob mi an i yalobilob tsaʼ bʌ i cʌyʌyob Jehová? Jiñʌch cheʼ miʼ cʌñob tsaʼ bʌ i mele jiñi xʼaltʼan Samuel. Maʼañic tsiʼ wersa xiqʼui jiñi ñuquix bʌ i yalobilob chaʼan yom xucʼulob tiʼ tojlel Dios (1 Samuel 8:1-3). Tsiʼ cʌybe tiʼ wenta Jehová jiñi wocol. Pero tsiʼ chaʼle wersa chaʼan xucʼul miʼ yajñel ti Jehová yicʼot utsʼat miʼ qʼuel (Proverbios 27:11). Ili ora, cabʌl tatʌlob cheʼʌch miʼ ñusañob bajcheʼ jiñi. Pero miʼ ñopob chaʼan Jehová mucʼʌch i qʼuel ti wen jiñi muʼ bʌ i cʌyob i mul, lajal bajcheʼ jiñi tatʌl tsaʼ bʌ i yʌlʌ Jesús chaʼan tsiʼ chaʼ otsa tiʼ yotot jiñi i yalobil tsaʼ bʌ cʌn loqʼui majlel (Lucas 15:20). Jiñi tatʌlob miʼ chaʼleñob wersa chaʼan xucʼulob ti Jehová i miʼ pijtañob chaʼan jiñi i yalobilob miʼ chaʼ sujtelob ti congregación cheʼ miʼ qʼuelbeñob i melbal i tat i ñaʼ.

17. ¿Chucoch miʼ coltañonla tsaʼ bʌ i mele jiñi pʼumpʼun bʌ mebaʼ xʼixic?

¹⁷ Jiñi pʼumpʼun bʌ mebaʼ xʼixic cheʼ ti yorajlel Jesús an chuqui miʼ cʌntesañonla jeʼel (pejcan Lucas 21:1-4). Maʼañic chuqui tsaʼ mejli i mel chaʼan jiñi leco bʌ i melbalob ti templo miʼ qʼuextʌyelob. I maʼañic chuqui tsaʼ mejli i mel chaʼan miʼ loqʼuel ti pʼumpʼuñiyel (Mateo 21:12, 13). Pero tsiʼ wen ñopo Jehová, jin chaʼan tsiʼ chaʼle coltaya ti chaʼan bʌ chʼujutesʌntel. Uts i pusicʼal i tsiʼ yʌcʼʌ «chaʼpʼejl taqʼuin» mach bʌ wen letsemic, jiñi cojax bʌ cʌylem i chaʼan. ¡Ili xʼixic tsaʼʌch i wen ñopo Jehová! Yujil chaʼan cheʼ miʼ yʌcʼ ti ñaxan i melol i yeʼtel Jehová, mi caj i yʌqʼuentel chuqui i cʼʌjñibal bʌ i chaʼan. Cheʼ bajcheʼ jiñi mebaʼ xʼixic, mi lac ñop jaʼel chaʼan Jehová mi caj i yʌqʼueñonla i cʼʌjñibal bʌ lac chaʼan cheʼ ñaxan mi la cʌcʼ ti ñuc i Yumʌntel (Mateo 6:33).

18. ¿Bajcheʼ tsiʼ mele juntiquil hermano chaʼan miʼ ñusan i wocol tac?

¹⁸ Ili ora cabʌl hermanojob muʼ bʌ i ñopob Jehová yicʼot miʼ chaʼleñob wersa i melob muʼ bʌ i mejlel, mach jiñic maʼañic bʌ mi mejlel. Laʼ laj qʼuel tiʼ tojlel Malcolm, juntiquil xucʼul bʌ hermano tsaʼ bʌ chʌmi cheʼ ti 2015. Tiʼ pejtelel ora cheʼ tsiʼ melbe i yeʼtel Jehová temel yicʼot i yijñam, añʌch chuqui wem bʌ tsiʼ ñusayob yicʼot mach bʌ weñic. Tsiʼ yʌlʌ: «Mi lac taj wocol ti laj cuxtʌlel i mach la cujilic chuqui miʼ mejlel ti ujtel ti lac tojlel, pero muʼ bʌ i ñop Jehová miʼ taj bendición». Malcolm tsiʼ yʌcʼʌ ili ticʼojel: «Yom mi laj cʼajtiben lac chʼejlel Jehová chaʼan mi lac chʌn chaʼlen subtʼan. Jiñi lac ñaʼtʌbal yaʼ yom mi laj cʌcʼ ti muʼ bʌ i mejlel lac mel, mach yaʼic baqui maʼañic mi lac mejlel» * (qʼuele jiñi nota).

19. a) ¿Chucoch utsʼatʌch jiñi texto yajcʌbil bʌ chaʼan ili jabil 2017? b) ¿Bajcheʼ maʼ ñaʼtan a wʌcʼ ti ñuc jiñi texto chaʼan ili jabil?

¹⁹ Ili ora mi lac ñumen taj wocol tac come ila ti pañimil «utsi utsijax miʼ chʌn melob i jontolil» (2 Timoteo 3:1, 13). Jin chaʼan, ñumen i cʼʌjñibal cheʼ maʼañic mi laj cʌy chaʼan miʼ cʼuñʼesañonla jiñi wocol tac. Ti jumpʼejl lac pusicʼal yom mi lac ñop Jehová yicʼot mi la cʌcʼ lac pensar ti muʼ bʌ i mejlel lac mel. Jin chaʼan, utsʼatʌch cheʼ jiñi texto chaʼan ili jabil 2017 jiñʌch Salmo 37:3, muʼ bʌ i yʌl: «Ñopo lac Yum [Jehová], mele chuqui utsʼat».