1, 2. a) ¿Librejʌch ba añonla miʼ yʌl jiñi yambʌlob? b) ¿Chuqui miʼ cʌntesañonla jiñi Biblia chaʼan lac librejlel? c) ¿Chuqui tac mi caj lac jacʼ ti ili temaj?

JUNTIQUIL xʼixic tsiʼ sube i yamigo: «Mach a wʌqʼueñon c wen ñaʼtan c bʌ, ñumen ora cheʼ maʼ subeñon chuqui yom mic mel». Anquese libre chaʼan miʼ yajcan chuqui yom i mel jiñi xʼixic, tsiʼ mulaj chaʼan miʼ subentel yom bʌ miʼ mel. Jiñʌch ñuc bʌ lac majtan tsaʼ bʌ i yʌqʼueyonla Jehová cheʼ librejonla. Ixcu joñonla, ¿muʼ ba lac mulan lac bajñel ñaʼtan chuqui la com lac mel, o chaʼan yambʌ majqui miʼ subeñonla? ¿Bajcheʼ yilal mi laj qʼuel cheʼ librejonla chaʼan mi lac yajcan chuqui la com?

² An muʼ bʌ i ñaʼtañob chaʼan mach mero librejoñicla come Dios wʌn albilix i chaʼan chuqui yom bʌ mi lac mel. Yambʌ miʼ yʌlob chaʼan yom junyajlel librejonla chaʼan miʼ mejlel lac bajñel ñaʼtan chuqui la com. Pero jiñi Biblia miʼ  cʌntesañonla chaʼan Jehová tsiʼ meleyonla i miʼ mejlel lac bajñel ñaʼtan la com bʌ lac mel (pejcan Josué 24:15). Cheʼ jaʼel miʼ jacʼ ili cʼajtiya tac: ¿Baqui chilil librejonla? ¿Bajcheʼ yom mi laj cʼʌn lac librejlel? ¿Bajcheʼ mi lac pʌs chaʼan mucʼʌch laj cʼuxbin Jehová ti chuqui mi lac ñaʼtan lac mel? ¿Bajcheʼ mi lac pʌs chaʼan mucʼʌch laj qʼuel ti ñuc muʼ bʌ i yajcan i mel yambʌlob? Ili tac mi caj lac jacʼ ti ili temaj.

3. ¿Chuqui miʼ mel Jehová cheʼ junyajlel libre an?

³ Jiñi junyajlel libre bʌ an jiñʌch Jehová, pero cabʌl chuqui miʼ mejlel laj cʌn tiʼ tojlel. Jumpʼejl ejemplo, Jehová tsiʼ yajca jiñi tejclum Israel bajcheʼ «cʼuxbibil bʌ i chaʼan» (Deuteronomio 7:6-8). Cheʼʌch tsiʼ mele chaʼan miʼ tsʼʌctesan i tʼan tsaʼ bʌ i yʌqʼue Abraham (Abrahán), jiñi i yamigo (Génesis 22:15-18). Jehová tiʼ pejtelel ora miʼ pʌs i cʼuxbiya yicʼot toj chuqui miʼ mel. Cheʼʌch tsiʼ pʌsʌ cheʼ bʌ tsiʼ tiqʼui jiñi israelob tiʼ cajob i ñusatʼan. Cheʼ bʌ ti jumpʼejl i pusicʼal miʼ cʌyob i mul, Jehová miʼ cʼuxbiñob yicʼot miʼ pʼuntañob. Tsiʼ yʌlʌ: «Mi caj cʌqʼueñob i pʼʌtʌlel chaʼan xucʼul miʼ yajñelob quicʼot. Mi caj j cʼuxbiñob tiʼ yutslel c pusicʼal» (Oseas 14:4). Wen tsiquil chaʼan muʼ bʌ i mel Jehová cheʼ libre an, jiñʌch miʼ coltan yambʌlob. ¡Wen utsʼatax cheʼ mi laj cʌn tiʼ tojlel!

4, 5. a) ¿Majqui jiñi ñaxan bʌ tsaʼ mejli ti libre chaʼan miʼ yajcan chuqui yom, bajcheʼ tsiʼ cʼʌñʌ? b) ¿Chuqui ti cʼajtiya yom mi lac melben lac bʌ?

⁴ Cheʼ bʌ Jehová tsiʼ mele jiñi ángelob yicʼot yambʌ wiñicob xʼixicob (quixtañujob), tsiʼ yʌcʼʌyob ti libre. Dios ñaxan tsiʼ mele Jesús, i cheʼʌch tsiʼ mele bajcheʼ i yejtal. Jiñʌch ñaxam bʌ tsaʼ aqʼuenti jiñi majtan chaʼan libre miʼ yajcan chuqui yom (Colosenses 1:15). ¿Bajcheʼ tsiʼ cʼʌñʌ Jesús jiñi i majtan? Cheʼ yaʼto an ti panchan, xucʼul tsaʼ ajñi ti Dios i maʼañic tsiʼ tsajca Satanás. Cheʼ bʌ wʌʼan ti Pañimil, maʼañic tsiʼ jacʼbe i tʼan Satanás (Mateo 4:10). Cheʼ bʌ jumpʼejl jax acʼʌlel yom chaʼan miʼ chʌmel (sajtel), ti jumpʼejl oración tsiʼ sube i Tat chaʼan cojach yom i melben i yeʼtel (troñel). Tsiʼ yʌlʌ: «C Tat, mi a wom, locʼsʌbeñon jini vaso i yejtal bʌ wocol. Laʼ mejlic bajcheʼ yom a pusicʼal, mach cheʼic bajcheʼ com» (Lucas 22:42). ¿Mach ba añic miʼ mejlel lac tsajcan bajcheʼ tsiʼ mele Jesús i mi lac mel chuqui yom Jehová yicʼot mi la cʌqʼuen i ñuclel?

⁵ Miʼ mejlel lac tsajcan bajcheʼ tsiʼ mele Jesús come melbilonla tiʼ yejtal Dios jaʼel (Génesis 1:26). Pero mach junyajlel librejic añonla cheʼ bajcheʼ Jehová. Jiñi Biblia miʼ tsictesan chaʼan an jach baqui chilil tsiʼ yʌcʼʌyonla ti libre, i yom mi la cʌcʼ ti ñuc. Jumpʼejl ejemplo, jiñi xʼixic ñujpuñem bʌ yom miʼ qʼuel ti ñuc i yeʼtel i ñoxiʼal, i jiñi xcolelob yom miʼ jacʼbeñob i tʼan i tat i ñaʼ (Efesios 5:22; 6:1). Jin chaʼan yom mi laj cʼajtiben lac bʌ: «¿Muʼ ba j qʼuel ti ñuc bajcheʼ pʼisbil i chaʼan Dios chaʼan libre añon?». Jiñi laj cuxtʌlel yaʼʌch cʌyʌl cheʼ bajcheʼ mi lac jacʼ ili cʼajtiya.

6. Tsictesan chucoch i cʼʌjñibalʌch cheʼ pʼisbil jach bajcheʼ tsaʼ ajqʼuiyonla ti libre.

⁶ ¿Tiʼ sujm ba librejonla mi la cʌl mi pʼisbil jach chuqui yom mi lac mel? Cheʼʌchi. ¿Chucoch? Come cheʼ pʼisbil jach bajcheʼ tsaʼ ajqʼuiyonla, miʼ cʌntañonla. Laʼ cu lac ñaʼtan chaʼan majlel mucʼonla ti carro, pero yaʼ ti bij maʼañic señal tac. Jiñi xñijca carrojob bajcheʼic jach miʼ chaʼleñob ajñel yicʼot tiʼ chaʼwejlel miʼ cʼʌñob jiñi carretera. ¿Mach ba muqʼuic caj lac bʌcʼñan? Muʼ cu. Ili ejemplo miʼ pʌsbeñonla chaʼan tijicña mi la cajñel cheʼ pʼisbil jach chuqui jach mi lac mel. Laʼ laj qʼuel ejemplo tac ti Biblia baqui miʼ pʌs chaʼan cheʼ pʼisbil jach bajcheʼ acʼbil i chaʼañonla Jehová chaʼañʌch lac wenlel.

7. a) Alʌ chucoch mach lajalic bajcheʼ tsaʼ mejli Adán yicʼot jiñi añimal tac. b) ¿Chuqui tsiʼ mele Adán cheʼ tsaʼ mejli ti libre?

⁷ Adán jiñʌch jiñi ñaxam bʌ wiñic tsiʼ mele Jehová. Libre tsaʼ ajqʼui chaʼan miʼ yajcan chuqui yom i mel, cheʼʌch bajcheʼ tsaʼ ajqʼui jaʼel jiñi ángelob. Pero jiñi añimal tac mach cheʼic tsaʼ mejliyob. ¿I chuqui tsiʼ mele Adán? Tsiʼ jacʼʌ jiñi eʼtel chaʼan miʼ yotsʌben i cʼabaʼ jiñi añimal tac. Chaʼan Adán miʼ mejlel i wen qʼuel i miʼ yotsʌben wen tac bʌ i cʼabaʼ jiñi añimal tac, jiñi Biblia miʼ yʌl chaʼan Dios tsiʼ laj pʌybeyob cʼotel tiʼ tʼejl. Jehová maʼañic tsiʼ qʼuextʌbe i cʼabaʼ jiñi tsaʼix bʌ i yotsʌbe Adán. Tsaʼʌch i qʼuele ti ñuc tsaʼ bʌ i mele (Génesis 2:19).

8. ¿Bajcheʼ mach weñic tsiʼ cʼʌñʌ Adán jiñi i majtan tsaʼ bʌ aqʼuenti, i baqui bʌ i wocolel tac?

⁸ Jehová tsiʼ sube Adán chaʼan miʼ sujtesan ti jumpʼejl paraíso ili Pañimil. Dios tsiʼ yʌlʌ: «Laʼ pʼojliquetla. Butʼula jini pañimil. Cʼʌñʌla. Laʼ i yumañetla jini chʌy yicʼot jini mut yicʼot pejtel cuxul tac bʌ muʼ bʌ ti xʌmbal ti pañimil» (Génesis 1:28). Pero Adán maʼañic tsiʼ qʼuele ti ñuc cheʼ pʼisbil jach baqui jaxʌl tsiʼ yʌcʼʌ Jehová chaʼan libre miʼ yajñel. Jin chaʼan, tsiʼ cʼuxu i wut teʼ tsaʼ bʌ subenti chaʼan maʼan miʼ cʼux. Ili ora mi la quilan wocol come Adán maʼañic tsiʼ cʼʌñʌ ti wen jiñi i majtan (Romanos 5:12). Laʼ lac chʌn cʼajtesan i wocolel tsaʼ bʌ i taja Adán cheʼ mach weñic chuqui tsiʼ yajca. Ili mi caj i coltañonla chaʼan wen mi laj cʼʌn tsaʼ bʌ i yʌqʼueyonla Jehová yicʼot cheʼ pʼisbil jach bajcheʼ tsiʼ yʌqʼueyonla.

9. ¿Chuqui tsiʼ mele Jehová tiʼ tojlel jiñi israelob, yicʼot chuqui ti tʼan tsiʼ yʌcʼʌyob?

⁹ Adán yicʼot Eva tsiʼ cʌybeyonla mulil yicʼot chʌmel. Pero anto ti lac wenta chaʼan mi lac bajñel ñaʼtan chuqui la com lac mel. Cheʼ mi laj qʼuel bajcheʼ tsiʼ mele Jehová tiʼ tojlel i tejclum Israel, mi lac ñaʼtan chaʼan cheʼʌchi. Jiñʌch tsiʼ yʌqʼueyob i ñaʼtan mi yomob sujtel tiʼ chaʼan bʌ Dios o maʼañic (Éxodo 19:3-6). Jiñi israelob tsaʼʌch i jacʼʌyob yicʼot tsiʼ yʌcʼʌyob i tʼan: «Mi caj c mel lojon cheʼ bajcheʼ tsiʼ yʌlʌ lac Yum» (Éxodo 19:8). Pero ti wiʼil, tsiʼ jemeyob i tʼan. Ili añʌch chuqui ñuc bʌ miʼ cʌntesañonla. ¿Baqui bʌ? Chaʼan yom mi laj qʼuel ti ñuc cheʼ librejonla, yom chʌn lʌcʼʌl mi la cajñel tiʼ tojlel Jehová yicʼot mi lac jacʼben i mandar (1 Corintios 10:11).

10. ¿Chuqui ti ejemplo tac miʼ pʌs ti Hebreos capítulo 11 chaʼan mucʼʌch i mejlel lac yajcan la cʌqʼuen i ñuclel Jehová? (Qʼuele jiñi dibujo am bʌ tiʼ tejchibal).

 ¹⁰ Yaʼ ti capítulo 11 i chaʼan Hebreos miʼ taj ti tʼan i cʼabaʼ 16 wiñicob xʼixicob tsaʼ bʌ i qʼueleyob ti ñuc cheʼ pʼisbil jach bajcheʼ tsaʼ ajqʼuiyob ti libre. Tsiʼ tajayob cabʌl bendición yicʼot wem bʌ i pijtaya ti talto bʌ qʼuin chaʼan wen chuqui tsiʼ ñaʼtayob i mel. Jumpʼejl ejemplo, Noé tsiʼ wen acʼʌ i ñopoñel (chʼujbiya) ti Dios yicʼot tsiʼ jacʼʌ i mel jumpʼejl arca chaʼan miʼ coltan i familia yicʼot i pʼolbalob (Hebreos 11:7). Abraham yicʼot Sara ti jumpʼejlob i pusicʼal tsiʼ jacʼbeyob i tʼan Dios yicʼot tsaʼ majliyob ti jiñi lum tsaʼ bʌ wʌn subentiyob. Anquese «tsaʼ mejliyob ti chaʼ sujtel» yaʼ ti tejclum Ur, tsiʼ yʌcʼʌyob i ñaʼtʌbal chaʼan muʼ bʌ caj i mel Dios cheʼ ti talto bʌ qʼuin. Jiñi Biblia miʼ yʌl chaʼan tsiʼ chaʼleyob wersa chaʼan miʼ tajob «jini ñumen wen bʌ i lumal» (Hebreos 11:8, 9, 13, 15, 16). Moisés maʼañic tsiʼ jacʼʌ i chʼʌm jiñi chubʌʼañʌl tac ti Egipto yicʼot «tsiʼ yʌcʼʌ i bʌ i yubin i ticʼlʌntel yicʼot i chaʼañoʼ bʌ Dios. Maʼanic tsiʼ yajca chaʼan miʼ poj tijicñesan i pusicʼal jumucʼ ti mulil» (Hebreos 11:24-26). Laʼ lac mel bajcheʼ tsiʼ meleyob jiñi xucʼul bʌ i wiñicob Dios yicʼot laʼ laj qʼuel ti ñuc jiñi lac majtan cheʼ librejonla chaʼan mi lac mel chuqui yom Dios.

11. a) ¿Chuqui jiñi ñumen ñuc bʌ mi caj lac taj mi weñʌch mi laj cʼʌn jiñi lac majtan? b) ¿Chuqui mi ñijcañonla chaʼan wen chuqui la com lac mel cheʼ librejonla?

¹¹ Tajol mach wocolic cheʼ mi laj cʌy chaʼan yambʌ quixtañu miʼ subeñonla chuqui yom mi lac mel. Pero mi cheʼ mi lac mel, an chuqui wen ñuc bʌ woli (choncol) lac sʌt. ¿Chuqui jiñi? Jiñi Biblia miʼ tsictesan yaʼ ti Deuteronomio 30:19, 20 (pejcan). Yaʼ ti versículo 19 miʼ yʌl chaʼan Dios tsiʼ yʌqʼueyob i yajcan jiñi israelob chuqui yomob i mel. I yaʼ ti versículo 20 miʼ yʌl chaʼan jiñi tsaʼ bʌ i yajcayob i mel tsiʼ yʌcʼʌ ti cʌñol bajcheʼ cʼamel tsiʼ cʼuxbiyob Jehová. Joñonla miʼ mejlel lac yajcan jaʼel mi la com lac chʼujutesan Jehová. Miʼ jiñʌch mi lac yajcan, mi caj laj cʼʌn jiñi lac majtan chaʼan mi la cʌqʼuen i ñuclel Jehová yicʼot mi lac pʌs bajcheʼ cʼamel mi laj cʼuxbin.

12. ¿Chuqui mach la comic lac mel yicʼot jiñi majtañʌl tsaʼ bʌ i yʌqʼueyonla Jehová?

¹² Laʼ lac ñaʼtan chaʼan an juntiquil la camigo muʼ bʌ la cʌqʼuen i majtan. ¿Bajcheʼ yubil mi la cubin mi tsaʼ jach i choco o miʼ cʼʌn chaʼan jach miʼ ticʼlan yambʌlob? ¿Mach ba cʼuxic mi caj la cubin? Jehová tsiʼ majtan acʼʌyonla ti libre chaʼan chuqui la com lac mel, pero cʼux miʼ yubin cheʼ mach utsʼatic chuqui miʼ yajcañob i mel jiñi quixtañujob o chaʼan jach miʼ ticʼlañob yambʌlob. Jiñi Biblia miʼ yʌl chaʼan «ti cojix bʌ qʼuin tac» maʼañic mi caj i yʌqʼueñob wocolix i yʌlʌ Dios (2 Timoteo 3:1, 2). Pero joñonla mach la comic lac mel bajcheʼ jiñi. Jin chaʼan, ¿bajcheʼ miʼ mejlel lac pʌs chaʼan mucʼʌch laj qʼuel ti ñuc jiñi majtañʌl tsaʼ bʌ i yʌqʼueyonla Jehová? ¿Bajcheʼ miʼ mejlel laj cʼʌn ti wen tsaʼ bʌ i yʌqʼueyonla?

13. ¿Bajcheʼ miʼ mejlel laj cʼʌn ti wen jiñi majtañʌl?

 ¹³ Ti lac pejtelel librejonla chaʼan mi lac yajcan majqui la com ti la camigojob, bajcheʼ yilal lac pislel mi caj lac xoj yicʼot bajcheʼ mi caj lac ñusan qʼuin. Pero yom tsajilonla i mach yomic mi lac yajcan lac mel chuqui mach bʌ utsʼatic tiʼ wut Dios o chaʼan jach mi lac mel bajcheʼ ili pañimil (mulawil) (pejcan 1 Pedro 2:16). Anquese librejonla chaʼan mi lac mel chuqui la com, yom mi laj cʼʌn ti wen chaʼan mi lac mel chuqui utsʼat «tiʼ pejtelel chaʼan miʼ tsictiyel i ñuclel Dios» (1 Corintios 10:31; Gálatas 5:13).

14. ¿Chucoch yom mi lac ñop Jehová cheʼ an chuqui com lac mel?

¹⁴ Jehová miʼ subeñonla: «Joñon a Yumon, a Dioson muʼ bʌ j cʌntesañet chaʼan maʼ taj chuqui wen. Joñon mic tojʼesañet ti a bijlel baʼ yom maʼ chaʼlen xʌmbal» (Isaías 48:17). Mi mucʼʌch lac ñop Jehová, mi caj laj qʼuel ti ñuc chuqui miʼ subeñonla yicʼot wen chuqui mi caj lac yajcan lac mel. Mi añʌch lac pecʼlel, mi caj la cʌl chaʼan mi juntiquilic miʼ mejlel i «bajñel tojʼesan majlel i bʌ. Mach mejlic i bajñel yajcan i bijlel» (Jeremías 10:23). Adán yicʼot jiñi israelob maʼañic tsiʼ yʌcʼʌyob ti ñuc yaʼ baqui chilil tsiʼ yʌcʼʌ Jehová chaʼan libre miʼ yajñelob. Tsaʼ cajiyob i «bajñel ñaʼtan» chuqui yom i melob. Mach lac mel bajcheʼ tsiʼ meleyob. Tiʼ pejtelel lac pusicʼal yom mi lac ñop Jehová, mach ti lac bajñel lac bʌjic (Proverbios 3:5).

15. ¿Chuqui miʼ cʌntesañonla jiñi principio am bʌ ti Gálatas 6:5?

¹⁵ Jiñi yambʌlob librejob chaʼan miʼ ñaʼtañob yomoʼ bʌ i mel, i yom mi laj qʼuel ti ñuc come librejonla ti lac pejtelel. Jin chaʼan, tajol an hermanojob mach bʌ lajalic chuqui miʼ ñaʼtañob cheʼ bajcheʼ joñonla. Cheʼʌch miʼ mejlel ti ujtel ti lac melbal ti jujuntiquil yicʼot bajcheʼ mi lac chʼujutesan Dios. Laʼ laj cʼajtesan jiñi principio am bʌ ti Gálatas 6:5 (pejcan). Ili miʼ cʌntesañonla chaʼan ti jujuntiquil an ti lac wenta chaʼan chuqui mi lac yajcan lac mel. Mi mucʼʌch lac chʼʌmben isujm, mi caj laj qʼuel ti ñuc chuqui miʼ yajcan yambʌlob.

16, 17. a) ¿Chucoch tsaʼ sujti ti jumpʼejl wocol tiʼ tojlel xñoptʼañob ti Corinto jiñi tsaʼ bʌ i ñaʼtayob i mel ti jujuntiquil? b) ¿Bajcheʼ tsiʼ colta Pablo jiñi xñoptʼañob? c) ¿Chuqui mi laj cʌn tiʼ tojlelob?

¹⁶ Laʼ laj qʼuel jumpʼejl ejemplo am bʌ ti Biblia muʼ bʌ i pʌsbeñonla chucoch yom mi laj qʼuel ti ñuc muʼ bʌ i yajcan i mel yambʌlob. Jiñi xñoptʼañob ti Corinto mach junlajalic bajcheʼ tsaʼ cʼoti i ñaʼtañob chaʼan mi yom miʼ cʼuxob o maʼañic jiñi weʼelʌl muʼ bʌ i chojñel ti mercado tsaʼix bʌ cʼʌjñi tiʼ chʼujutesʌntel diosteʼ tac. An muʼ bʌ i cʼuxob jiñi weʼelʌl come yujilob chaʼan maʼañic i cʼʌjñibal jiñi diosteʼ tac. Pero jiñi xñoptʼañob tsaʼ bʌ i chʼujutesayob diosteʼ tac ti wajali tsiʼ ñaʼtayob chaʼan lajalʌch bajcheʼ woli (yʌquel) i chʼujutesañob diosteʼ tac cheʼ miʼ cʼuxob jiñi weʼelʌl (1 Corintios 8:4, 7). Ili jiñʌch wen tsʌts bʌ wocol come tsʼitaʼ jach mach colel i tʼox jiñi congregación. ¿Chuqui tsiʼ mele Pablo chaʼan miʼ coltan jiñi hermanojob?

¹⁷ Ti ñaxan, Pablo tsiʼ cʼajtesʌbe jiñi hermanojob chaʼan anquese miʼ cʼuxob o maʼañic jiñi weʼelʌl tac, mach yom i yʌl chaʼan ñumen wen mi caj i yajñelob yicʼot Dios (1 Corintios 8:8). Tsiʼ subeyob chaʼan yom tsajilob chaʼan maʼañic miʼ lowbeñob i conciencia jiñi cʼuñob to bʌ, anquese librejob chaʼan miʼ melob chuqui yomob (1 Corintios 8:9). Ti wiʼil tsiʼ sube jiñi cʼuñoʼ bʌ i conciencia chaʼan maʼañic chuqui yom miʼ yʌlob tiʼ tojel muʼ bʌ i cʼuxob jiñi weʼelʌl (1 Corintios 10:25, 29, 30). Cheʼ bajcheʼ mi laj qʼuel, ñucʌch i cʼʌjñibal jiñi tsaʼ bʌ ujti come yaʼ ochem i chʼujutesʌntel Dios, i ti jujuntiquil tsiʼ ñaʼtayob chuqui mi caj i melob. Ixcu yaʼ ti yambʌ tac mach bʌ wen añic i wocolel bajcheʼ lac pislel o lac ñusaqʼuin tac, ¿mach ba yomic mi laj qʼuel ti ñuc jaʼel chuqui miʼ yajcan yambʌlob chaʼan tac jiñi? (1 Corintios 10:32, 33).

18. ¿Bajcheʼ mi caj lac pʌs chaʼan mi laj qʼuel jiñi lac majtan tsaʼ bʌ i yʌqʼueyonla Jehová?

¹⁸ Cheʼ libre chaʼan mi lac yajcan chuqui la com jiñʌch jumpʼejl lac majtan tsaʼ bʌ i yʌqʼueyonla Jehová muʼ bʌ i yʌqʼueñonla lac tijicñʌyel (2 Corintios 3:17). Mi lac wen qʼuel ti ñuc ili lac majtan come miʼ mejlel laj cʼʌn chaʼan mi lac pʌs bajcheʼ cʼamel mi laj cʼuxbin Jehová. Laʼ lac yajcan la cʌqʼuen i ñuclel Dios yicʼot laʼ laj qʼuel ti ñuc chuqui miʼ yajcan yambʌlob. Cheʼʌch mi caj lac pʌs chaʼan mi lac wen qʼuel ti ñuc jiñi utsʼatax bʌ lac majtan tsiʼ yʌqʼueyonla Jehová.