1, 2. ¿Chuqui miʼ ñaʼtañob cabʌl quixtañu chaʼañob i yeʼtel?

AN MUʼ bʌ i ñaʼtañob chaʼan ñucob i cʼʌjñibal o maʼañic cheʼʌch bajcheʼ yilalob i yeʼtel (troñel). An cultura tac baqui ñʌmʌl ti ubintel chaʼan chaʼtiquil tsaʼ jaxto bʌ i cʌñʌyob i bʌ miʼ cʼajtibeñob i bʌ baqui bʌ i yeʼtelob.

² Cheʼ bʌ an majqui miʼ tajtʌlob ti tʼan yaʼ ti Biblia, an i tajol miʼ yʌjlel jaʼel chuqui ti eʼtel tsiʼ meleyob. Miʼ yʌjlel chaʼan Mateo tsiʼ chaʼle eʼtel bajcheʼ xchʼʌm tojoñel, chaʼan Simón jiñʌch muʼ bʌ i tsʼaj pʌchi, i Lucas «jini cʼuxbibil bʌ stsʼʌcaya» (Colosenses 4:14; Mateo 10:3; Hechos 10:6). An i tajol, jiñ i Biblia miʼ yʌl chuqui aqʼuebilob tiʼ wenta jaʼel jiñi muʼ bʌ i melbeñob i yeʼtel Dios. Laʼ lac ñaʼtan tiʼ tojlel jiñi rey David, jiñi xʼaltʼan Elías yicʼot jiñi apóstol Pablo. Tsiʼ wen qʼueleyob ti ñuc jiñi eʼtel tsaʼ bʌ aqʼuentiyob tiʼ wenta. Joñonla jaʼel yom mi laj qʼuel ti ñuc baqui jach bʌ eʼtel miʼ mejlel lac mel tiʼ tojlel Jehová.

3. ¿Chucoch utsʼatʌch cheʼ jiñi hermanojob ñoxobix bʌ miʼ cʌntesañob jiñi xcolelob to bʌ? (Qʼuele jiñi foto am bʌ tiʼ tejchibal).

 ³ Tijicña mi la cubin cheʼ mi lac melben i yeʼtel Dios yicʼot mi laj qʼuel ti ñuc jiñi la queʼtel ti congregación. An mach bʌ la comic laj cʌy jiñi la queʼtel come mi lac wen mulan. Pero cheʼ ñoxoñixla, maʼañix chuqui miʼ mejlel lac wen mel bajcheʼ ti ñaxan (Eclesiastés 1:4). Ili añʌch i wocolel ti lac tojlel. ¿Chucoch? Come woli (choncol) i ñumen pʼojlel jiñi subtʼan i jiñi i yorganización Dios woli (yʌquel) i cʼʌn jiñi tecnología chaʼan ñumen cabʌl miʼ cʼotel i cʌñob jiñi wen tʼan. Come añix bajcheʼ tac tsijib yom melol jiñi eʼtel, jiñi hermanojob añobix bʌ i jabilel wocol miʼ yubiñob chaʼan miʼ cʌñob (Lucas 5:39). Cheʼ jaʼel, la cujil chaʼan cheʼ ñumen añix lac jabilel miʼ jilel majlel lac pʼʌtʌlel (Proverbios 20:29). Jin chaʼan, utsʼatʌch cheʼ jiñi hermanojob ñoxobix bʌ miʼ cʌntesañob ti yambʌ eʼtel tac jiñi xcolelob to bʌ (pejcan Salmo 71:18).

4. ¿Chucoch an wocol bʌ miʼ yubiñob chaʼan miʼ yʌqʼueñob tiʼ wenta yambʌlob jiñi eʼtel tac? (Qʼuele jiñi recuadro « ¿Chucoch tajol wocol mi la cubin chaʼan mi la cʌcʼ jumpʼejl eʼtel?»).

⁴ Jiñi hermanojob añoʼ bʌ i yeʼtel wocolʌch miʼ yubiñob chaʼan miʼ yʌqʼueñob tiʼ wenta yambʌ hermanojob xcolelob to bʌ jiñi eʼtel tac. Tajol chʼijiyem miʼ yubiñob i bʌ cheʼ miʼ ñaʼtañob chaʼan mi caj i sʌtob jiñi muʼ bʌ i wen mulañob. Cheʼ jaʼel, tajol mach wen yomobic cheʼ miʼ ñaʼtañob chaʼan yambʌlix mi caj i mel jiñi eʼtel muʼ bʌ i wen cʼuxbiñob. Tajol mach weñic mi caj i mejlel jiñi eʼtel miʼ ñaʼtañob mi mach yaʼic añob i qʼuel. O tajol miʼ ñaʼtañob chaʼan maʼañic i yorajlel chaʼan miʼ cʌntesañob yambʌlob. Pero jiñi xcolelob yom yujilob pijt jeʼel mi maʼañic woliʼ yʌqʼuentelob yambʌ eʼtel.

5. ¿Chuqui ti cʼajtiya tac mi caj laj qʼuel ti ili temaj?

⁵ Jin chaʼan, ¿chucoch ñuc i cʼʌjñibal cheʼ jiñi hermanojob ñoxobix bʌ miʼ cʌntesañob ti yambʌ eʼtel tac jiñi xcolelob to bʌ? ¿Bajcheʼ miʼ mejlel i melob? (2 Timoteo 2:2). ¿Chucoch ñuc i cʼʌjñibal cheʼ wen yom miʼ pʌsob i bʌ jiñi xcolelob yicʼot miʼ chaʼleñob wersa chaʼan miʼ cʌñob cheʼ mi temel chaʼleñob eʼtel yicʼot jiñi ñoxobix bʌ? Laʼ laj qʼuel bajcheʼ tsiʼ colta i yalobil jiñi rey David chaʼan miʼ tsʼʌctesan jumpʼejl eʼtel ñuc bʌ i cʼʌjñibal.

6. ¿Chuqui tsiʼ ñaʼta i mel David, pero bajcheʼ yʌlʌ Jehová?

⁶ David cabʌl ora tsaʼ putsʼi ñumel come an majqui yom i tsʌnsan. Pero cheʼ tsaʼ ochi ti rey, wen utsʼat baqui tsaʼ chumle. Jin chaʼan tsiʼ sube jiñi xʼaltʼan Natán: «Joñon chumulon ti otot melbil bʌ ti chʼujteʼ, pero jini Arca i yejtal bʌ i trato lac Yum an jach ti pisil bʌ otot». David ti jumpʼejl i pusicʼal tsiʼ ñaʼta i melben Jehová wen utsʼatax bʌ i yotot. Jin chaʼan Natán tsiʼ sube: «Utsʼat maʼ mel pejtelel chuqui woli a ñaʼtan». Pero Jehová mach cheʼic tsiʼ ñaʼta bajcheʼ Natán. Jin chaʼan tsiʼ sube chaʼan miʼ chaʼ suben David: «Maʼanic mi caj a waʼchocobeñon cotot». Jehová tsaʼʌch i yʌcʼʌ i tʼan chaʼan mucʼʌch caj i bej aqʼuen i bendición David, pero tsiʼ sube chaʼan  jiñʌch juntiquil i yalobil mi caj i mel jiñi otot. ¿Bajcheʼ yubil tsiʼ yubi David? (1 Crónicas 17:1-4, 8, 11, 12; 29:1).

7. ¿Bajcheʼ tsiʼ pʌsʌ David chaʼan tsaʼʌch i qʼuele ti ñuc tsaʼ bʌ i sube Jehová?

⁷ David wen chʼijiyem tsiʼ yubi cheʼ bʌ tsaʼ subenti chaʼan mach jiñic mi caj i melben i templo Jehová. Pero tsaʼʌch i colta i yalobil chaʼan jiñi eʼtel muʼ bʌ caj i mel. Tsiʼ colta i qʼuel jiñi xʼeʼtelob yicʼot chaʼan miʼ tempan jiñi teʼ, fierro, cobre, plata yicʼot oro. David maʼañic tsiʼ cʌlʌx ñaʼta majqui mi caj i qʼuejlel ti ñuc cheʼ bʌ ujtemix jiñi otot, anquese ti wiʼil tsaʼ ajli bajcheʼ i yotot Salomón. Tsaʼ bʌ i mele David jiñʌch tsiʼ sube i yalobil: «Laʼ i wen coltañet lac Yum chaʼan maʼ chʼejlʼesan a bʌ chaʼan maʼ waʼchocoben i Templo lac Yum cheʼ bajcheʼ tsiʼ subeyon» (1 Crónicas 22:11, 14-16).

8. ¿Chucoch tajol tsiʼ ñaʼta David chaʼan Salomón maxto wen chajpʌbilic chaʼan miʼ mel jiñi templo, pero chuqui tsiʼ mele?

⁸ (Pejcan 1 Crónicas 22:5). David tajol tsiʼ ñaʼta chaʼan Salomón maxto wen chajpʌbilic chaʼan miʼ yʌqʼuentel tiʼ wenta jiñi ñuc bʌ eʼtel. Come ñuc tsiʼ mulaj chaʼan miʼ mejlel jiñi templo, tsiʼ ñaʼta chaʼan Salomón maxto añic miʼ mejlel come xcolel to. Pero yujil jaʼel chaʼan Jehová mi caj i coltan Salomón chaʼan miʼ tsʼʌctesan ili ñuc bʌ eʼtel. Jin chaʼan, tsiʼ chaʼle wersa i coltan i yalobil chaʼan miʼ mejlel jiñi i yotot Jehová.

9. ¿Baqui bʌ ejemplo miʼ mejlel i coltan jiñi añobix bʌ i jabilel chaʼan miʼ yubiñob i tijicñʌyel cheʼ miʼ yʌqʼueñob tiʼ wenta i yeʼtel jiñi yambʌ hermanojob?

⁹ Mach yomic miʼ yubiñob i chʼijiyemlel jiñi hermanojob ñoxobix bʌ cheʼ miʼ tʼoxbeñob i yeʼtel jiñi xcolelob to bʌ. La cujil chaʼan ñumen i cʼʌjñibal ili ora cheʼ mi lac tsʼʌctesan jiñi eʼtel tsaʼ bʌ i yʌqʼueyonla Jehová. Jin chaʼan, yomʌch  miʼ cʌntesʌntel jiñi hermanojob xcolelob to bʌ. Laʼ lac ñaʼtan ili ejemplo. Cheʼ bʌ chʼoʼchʼocontola (chutontola), tajol tsaʼ laj qʼuele chaʼan miʼ ñijcan carro jiñi lac tat. I cheʼ bʌ wolix lac taj laj colel, tsiʼ cʌntesayonla jaʼel. Ti wiʼil, tsaʼ lac locʼsa lac licencia i tsaʼ caji lac ñijcan jaʼel jiñi carro. Pero jiñi lac tat tsaʼʌch i bej subeñonla bajcheʼ yom mi lac mel. Tajol laja lajalix tsaʼ caji lac ñijcan jiñi carro. Pero cheʼ tsaʼix ñoxʼa jiñi lac tat, joñoñixla tsaʼ caji lac ñumen ñijcan. ¿Tsaʼ ba michʼa lac tat tiʼ caj jiñi? Maʼañic. Tsiʼ yubi i tijicñʌyel come tsaʼ lac pʌyʌ majlel baqui jach yom majlel. Lajal jaʼel, jiñi hermanojob ñoxobix bʌ, miʼ tajob i tijicñʌyel cheʼ miʼ qʼuelob chaʼan jiñi xcolelob tsaʼ bʌ i cʌntesayob mucʼʌch i mejlel i tsʼʌctesañob yambʌ eʼtel tac.

10. ¿Tsaʼ ba i mulaj Moisés chaʼan jin jach miʼ yʌqʼuentel i ñuclel o chaʼan i bajñel jach an i yeʼtel?

¹⁰ Yom mi laj cʌntan lac bʌ chaʼan maʼañic mi lac tsʼaʼlen yambʌlob cheʼ miʼ yʌqʼuentelob jumpʼejl eʼtel. Miʼ mejlel laj cʌn tsaʼ bʌ i mele Moisés. Laʼ laj qʼuel chuqui tsiʼ mele cheʼ bʌ tsaʼ waʼchoconti xʼaltʼañob yaʼ ti Israel (pejcan Números 11:24-29). Josué tsiʼ ñopo i ticʼob, pero Moisés tsiʼ sube: «¿Yom ba tsʌytsʌyña a pusicʼal tic tojlel? Maʼ lon ñaʼtan mach utsʼatic miʼ chaʼleñob subtʼan winicob, pero yomcu. Utsʼat muqʼuic i yʌqʼueñob i yEspíritu lac Yum pejtelel winicob xʼixicob». Moisés yujil chaʼan jiñʌch Jehová woli bʌ i mel jiñi. Maʼañic tsiʼ mulaj chaʼan miʼ bajñel qʼuejlel ti ñuc mi chaʼañic i bajñel jach an i yeʼtel. Yom tsiʼ yʌlʌ jaʼel chaʼan tiʼ pejtelel i wiñicob Dios miʼ sujtelob ti xʼaltʼan. Ixcu joñonla, ¿muʼ ba la cubin lac tijicñʌyel cheʼ an majqui miʼ yʌqʼuentel tsijiʼ bʌ eʼtel?

11. ¿Chuqui tsiʼ yʌlʌ juntiquil hermano cheʼ bʌ yambʌyix tsiʼ chʼʌmʌ tiʼ wenta jiñi eʼtel?

¹¹ Cabʌl hermanojob añix ora i cajel i melbeñob i yeʼtel Jehová. Pero añix i cʌntesa yambʌ xcolelob to bʌ chaʼan miʼ melob yambʌ eʼtel tac. Laʼ laj qʼuel tsaʼ bʌ ujti tiʼ tojlel Peter. 74 jab tsiʼ melbe i yeʼtel Jehová, pero 35 jab tsaʼ ajñi ti jumpʼejl sucursal yaʼ ti Europa. Cabʌl jabil tsaʼ ajñi tiʼ wenta jiñi Oficina chaʼan subtʼan. Pero ti wiʼil tsaʼ aqʼuenti tiʼ wenta yambʌ hermano maxto bʌ wen ñoxic i cʼabaʼ Paul. Peter jiñʌch tsaʼ bʌ i cʌntesa Paul. ¿Tsaʼ ba i wen ubi i chʼijiyemlel Peter tiʼ caj jiñi? Maʼañic. Tsiʼ yʌlʌ: «Wen tijicña  mi cubin cheʼ an hermanojob tsaʼ bʌ chajpʌntiyob chaʼan yambʌ eʼtel tac yicʼot cheʼ weñʌch woliʼ melob».

12. ¿Chuqui mi laj cʌn tiʼ tojlel Roboam?

¹² Cheʼ bʌ tsaʼ chʌmi (sajti) jiñi rey Salomón, tsaʼ ochi ti qʼuexol i yalobil i cʼabaʼ Roboam (Rehoboam). Ili tsijiʼ bʌ rey tsiʼ cʼajtibe i ticʼojel jiñi xñoxob chaʼan miʼ ñaʼtan bajcheʼ yom miʼ mel i yeʼtel. Pero maʼañic tsiʼ jacʼʌ tsaʼ bʌ subenti. Jin tsiʼ jacʼbe i ticʼojel jiñi lajal to bʌ i jabilel yicʼotob. Jin chaʼan mach weñic chuqui tsaʼ ujti (2 Crónicas 10:6-11, 19). ¿Chuqui miʼ cʌntesañonla tsaʼ bʌ i mele? Chaʼan utsʼat cheʼ mi laj cʼajtiben ticʼojel jiñi ñumen añobix bʌ i jabilel yicʼot i ñaʼtʌbal. Cheʼ jaʼel, yom mi lac ñʌchʼtan muʼ bʌ i subeñoñobla. Ili mach yomic i yʌl chaʼan jiñi hermanojob xcolelob to bʌ cheʼ yom mi caj i wersa melob bajcheʼ ti wajali. Pero mach yomic miʼ ñaʼtañob jeʼel chaʼan maʼañic i cʼʌjñibal cheʼ bajcheʼ miʼ melob jiñi añobix bʌ i jabilel.

13. ¿Chuqui yom miʼ melob jiñi hermanojob xcolelob to bʌ cheʼ miʼ chaʼleñob eʼtel yicʼot añobix bʌ i jabilel?

¹³ An hermanojob xcolelob to bʌ am bʌ i tajol jin miʼ qʼuelob jiñi eʼtel muʼ bʌ i mel jiñi hermanojob añobix bʌ i jabilel. Pero jiñʌch wen chaʼan ili xcolelob to bʌ miʼ cʌmbeñob jiñi añobix bʌ i jabilel. ¿Cʼajal baʼ chaʼan jiñi hermano tsaʼ bʌ la cʌlʌ ti párrafo 11? Cheʼ bʌ tsiʼ chʼʌmʌ tiʼ wenta jiñi eʼtel yaʼ ti Betel lon am bʌ tiʼ wenta Peter, tsiʼ yʌlʌ: «Tsaʼ c sʌclʌbe i yorajlel chaʼan mij cʼajtiben ticʼojel jiñi Peter, i tsaʼ c sube jiñi yambʌ hermanojob yaʼ bʌ mucʼob ti eʼtel quicʼot chaʼan cheʼʌch yom miʼ melob jaʼel».

14. ¿Chuqui miʼ cʌntesañonla chaʼan bajcheʼ yilal tsiʼ chaʼle eʼtel Timoteo yicʼot jiñi apóstol Pablo?

¹⁴ Timoteo ñumen pecʼ to i jabilel bajcheʼ jiñi apóstol Pablo, pero cabʌl jabil temel tsiʼ chaʼleyob eʼtel (pejcan Filipenses 2:20-22). Ti jumpʼejl bʌ qʼuin, Pablo tsiʼ sube jiñi xñoptʼañob ti Corinto: «Tsac choco majlel Timoteo baʼ añetla. Jiñʌch cʼuxbibil bʌ calobil. Xucʼul i pusicʼal ti lac Yum. Mi caj i yʌqʼueñetla laʼ chaʼ ñaʼtan chuqui mic chaʼlen ti Cristo. Cheʼ bajcheʼ mij cʌntesan xñoptʼañob ti pejtelel pañimil baqui jach miʼ tempañob i bʌ, cheʼʌch mic mel jaʼel» (1 Corintios 4:17). Ili miʼ pʌsbeñonla chaʼan tiʼ chaʼticlelob tsiʼ coltayob i bʌ. Pablo tsiʼ yʌqʼue i yorajlel chaʼan miʼ cʌntesan Timoteo tiʼ pejtelel tsaʼ bʌ i cʼʌñʌ ti subtʼan Cristo, i Timoteo tsaʼʌch i chaʼle wersa chaʼan wen miʼ cʌn. Pablo tsiʼ wen cʼuxbi Timoteo yicʼot yujil chaʼan weñʌch mi caj i cʌntan jiñi hermanojob ti Corinto. Jiñi ancianojob miʼ mejlel i tsajcʌbeñob i melbal Pablo cheʼ miʼ cʌntesañob yambʌ hermanojob chaʼan miʼ cʌntañob jiñi congregación.

15. ¿Bajcheʼ miʼ coltañonla Romanos 12:3-5 cheʼ bʌ an chuqui woliʼ qʼuextʌyel?

¹⁵ Ili ora jiñi jumpʼejl parte i yorganización Jehová wʌʼ ti Pañimil woliʼ wen colel. Ili yom i yʌl chaʼan an chuqui mi caj i bej qʼuextʌyel majlel, i an wocol bʌ mi caj la cubin. ¿Chuqui miʼ mejlel lac mel? Yom pecʼonla i yom mi la cʌcʼ lac ñaʼtʌbal tiʼ melol chuqui yom Jehová, mach lac bajñel ñaʼtan lac bʌ. Cheʼ bajcheʼ ili chʌn temel mi caj la cajñel. Pablo tiʼ tsʼijbube majlel jiñi xñoptʼañob ti Roma: «Mic subeñetla ti jujuntiquiletla: Mach a lon ñaʼtan ti a pusicʼal ñumen an a ñuclel bajcheʼ an». Ti wiʼil Pablo tsiʼ yʌlʌ chaʼan ti jujuntiquilonla an jumpʼejl la queʼtel, lajal bajcheʼ añʌch i cʼʌjñibal jujunchajp am bʌ ti lac bʌcʼtal (Romanos 12:3-5).

16. ¿Chuqui miʼ mejlel lac mel ti jujuntiquil chaʼan an ñʌchʼtʌlel yicʼot temel miʼ yajñel i tejclum Dios?

¹⁶ Ti lac pejtelel la com lac jacʼben i tʼan Jehová yicʼot mi lac mel chuqui jach mi laj cʼajtibentel. Jiñi añobix bʌ i jabilel miʼ mejlel i cʌntesañob jiñi xcolelob to bʌ. Jiñi xcolelob to bʌ miʼ mejlel i melob yambʌ eʼtel tac, pero yicʼotob i pecʼlel i miʼ qʼuelob ti ñuc jiñi yambʌlob. Jiñi ñujpuñemobix bʌ tijicña miʼ yubiñob cheʼ miʼ coltʌntelob tiʼ yijñam cheʼ bʌ an chuqui miʼ qʼuextʌyel tiʼ tojlelob. Cheʼ bajcheʼ ili, jiñi hermanajob jaʼel woliʼ tsajcañob bajcheʼ tsiʼ mele Priscila, juntiquil xucʼul bʌ xñoptʼan ti bele ora bʌ tsiʼ colta i ñoxiʼal, i cʼabaʼ Áquila (Hechos 18:2).

17. ¿Chucoch tsiʼ cʌntesa Jesús jiñi xcʌntʼañob i chaʼan?

¹⁷ Jesús ti jumpʼejl i pusicʼal tsiʼ mulaj i cʌntesan yambʌlob, i jiñʌch jiñi ñuc bʌ ejemplo chaʼañonla. Yujil chaʼan mach jiñic muʼ bʌ caj i bej mel jiñi i troñel. Cheʼ jaʼel, tsiʼ chʼʌmbe isujm chaʼan xmulilobʌch jiñi xcʌntʼañob i chaʼan. Pero tsiʼ ñopo chaʼan jiñobʌch muʼ bʌ caj i ñumen chaʼleñob subtʼan (Juan 14:12). Jin chaʼan, wen tsiʼ cʌntesayob chaʼan baqui tac jach miʼ ñumelob ti subtʼan, i jiñi xcʌntʼañob cheʼʌch tsiʼ meleyob (Colosenses 1:23).

18. a) ¿Bajcheʼ yilal bʌ eʼtel mi caj lac mel ti talto bʌ qʼuin? b) ¿Chuqui ti eʼtel an lac chaʼan ili ora?

¹⁸ Cheʼ tsaʼ chʌmi Jesús, Jehová tsiʼ chaʼ tejchesa yicʼot tsiʼ ñumen aqʼue i yeʼtel. Cheʼ jaʼel, ñumen ñuc tsiʼ yʌcʼʌ «Cristo bajcheʼ pejtel i yumʌntel tac pañimil yicʼot ñucoʼ bʌ i yeʼtel añoʼ bʌ i pʼʌtʌlel» (Efesios 1:19-21). Mi tsaʼ chʌmiyonla ili ora, pero xucʼuloñʌchla ti Jehová, mi caj lac chaʼ tejchel yaʼ ti tsijiʼ bʌ pañimil (mulawil) yicʼot mi caj lac mel cabʌl eʼtel muʼ bʌ i yʌqʼueñonla lac tijicñʌyel. Pero ili ora an ñuc bʌ la queʼtel, jiñʌch i subol jiñi wen tʼan yicʼot mi lac sutqʼuin ti xcʌntʼan yambʌlob. Jin chaʼan, mi xcolelontola o añix lac jabilel, laʼ lac chʌn jacʼ ili tʼan: «Yom bʌxetla cheʼ mi laʼ chaʼliben i yeʼtel lac Yum» (1 Corintios 15:58).