1. ¿Chuqui tsiʼ yubi David tiʼ tojlel Jehová, i chuqui tsiʼ ñijca i mel?

JIÑI REY DAVID tiʼ tsʼijbu: «Wen ñuc lac Yum. Laʼ sujbic i ñuclel» (Sal. 145:3). David tsaʼʌch i cʼuxbi Jehová, i jiñi i cʼuxbiya tsiʼ ñijca chaʼan miʼ suben i ñuclel «tiʼ yojlil jini muʼ bʌ i tempañob i bʌ» (Sal. 22:22; 40:5). Joñonla jaʼel mucʼʌch laj cʼuxbin Jehová i cheʼʌch mi laj cʌl bajcheʼ tsiʼ yʌlʌ David: «Laʼ sujbic a ñuclel c Yum, i Dioset bʌ Israel, come ñuquet ti oñiyi yicʼot tiʼ pejtelel ora» (1 Cr. 29:10-13).

2. a) ¿Bajcheʼ junchajp miʼ mejlel la cʌqʼuen i ñuclel Jehová? b) ¿Chuqui miʼ yubin lamital hermanojob, i chuqui mi caj laj qʼuel?

² Junchajp bajcheʼ mi lac sub i ñuclel Jehová ili ora, jiñʌch cheʼ mi la cʌcʼ laj comentario ti tempa bʌ tac. Pero cabʌl hermanojob wocol miʼ yubiñob. Yomʌch i yʌcʼob i comentario pero maʼañic miʼ mejlelob. ¿Bajcheʼ miʼ mejlelob i mʌlben i bʌqʼuen? ¿Chuqui tac mi caj i coltañonla laj cʌcʼ wem bʌ comentario? Chaʼan mi la cʌqʼuen i jacʼbal ili cʼajtiya tac, laʼ laj qʼuel chʌnchajp ñuc bʌ i cʼʌjñibal chucoch mi la cʌcʼ laj comentario ti tempa bʌ tac.

3-5. a) Cheʼ bajcheʼ miʼ yʌl Hebreos 13:15, ¿chucoch mi la cʌcʼ laj comentario ti tempa bʌ tac? b) ¿Bajcheʼ la cujil chaʼan Jehová maʼañic miʼ wersa xicʼonla chaʼan yom lajal laj comentario bajcheʼ i chaʼan yambʌlob?

³ Jehová tsiʼ yʌqʼueyonla ñuc bʌ lac majtan chaʼan mi lac sub i ñuclel (Sal. 119:108). Jiñi laj comentario tac yaʼʌch ochem ti jiñi «majtan» muʼ bʌ la cʌqʼuen Dios, i maʼañic yambʌ muʼ bʌ i mejlel i mel ti lac wenta (pejcan Hebreos 13:15). ¿Muʼ ba i wersa xicʼonla Jehová chaʼan junlajal mi la cʌcʼ jiñi majtañʌl, yom i yʌl, jiñi comentario tac? Maʼañic.

 ⁴ Jehová yujil chaʼan mach junlajalic chuqui miʼ mejlel lac mel yicʼot bajcheʼ añonla, i mucʼʌch i qʼuel ti ñuc muʼ bʌ i mejlel la cʌqʼuen. Laʼ lac ñaʼtan bajcheʼ yilal jiñi majtañʌl tac tsaʼ bʌ i chʼʌmʌ tiʼ tojlel israelob. Jiñi mucʼʌch bʌ i mejlelob, miʼ yʌcʼob juncojt alʌ chʼoc tʌñʌmeʼ o chʼoc chivo. Jiñi pʼumpʼuñoʼ bʌ miʼ mejlel i yʌcʼob ‹chaʼcojt xpuruwoc o chaʼcojt xʼucujts›. Pero mi an maʼañic bʌ miʼ mejlel i yʌc iliyi, Jehová miʼ chʼʌm jaʼel jumpʼis harina (Lv. 5:7, 11). Anquese jiñi harina mach wen letsic i tojol, Jehová mucʼʌch i qʼuel ti ñuc mi jiñʌch jiñi ñumen wem bʌ.

⁵ Cʼʌlʌl ili ora, Dios cheʼʌch miʼ bej ñaʼtan. Cheʼ bʌ mi la cʌcʼ laj comentario, miʼ chʼʌmonla ti ñuc yicʼot maʼañic miʼ pijtan chaʼan wen la cujil tʼan bajcheʼ Apolos o chaʼan ti ora mi laj qʼuextʌben i pensar yambʌlob cheʼ bajcheʼ tsiʼ mele Pablo (Hch. 18:24; 26:28). Cojach miʼ subeñonla chaʼan mi lac chaʼlen wersa la cʌcʼ bajcheʼ mi lac mejlel. Laʼ laj cʼajtesan jiñi mebaʼ xʼixic tsaʼ bʌ i yʌcʼʌ chaʼsejl alʌ taqʼuin. Jehová tsaʼʌch i chʼʌmʌ come tsiʼ yʌcʼʌ pejtelel chuqui an i chaʼan (Lc. 21:1-4).

6. a) Cheʼ bajcheʼ miʼ yʌl Hebreos 10:24, 25, ¿bajcheʼ miʼ mejlel i coltañonla jiñi comentario tac muʼ bʌ la cubin yaʼ ti tempa bʌ? b) ¿Bajcheʼ miʼ mejlel a pʌs chaʼan mucʼʌch a qʼuel ti ñuc i comentario jiñi hermanojob?

⁶ Ti jiñi laj comentario tac, mi laj comol chʼejlʼesan lac bʌ (pejcan Hebreos 10:24, 25). Ti lac pejtelel mi lac mulan lac ñʌchʼtan jiñi qʼuexel bʌ comentario tac. Jumpʼejl ejemplo, mi lac mulan lac ñʌchʼtan cheʼ juntiquil chut alob miʼ yʌcʼ i yalʌ comentario loqʼuem bʌ tiʼ pusicʼal. Mi la cubin lac tijicñʌyel jaʼel cheʼ bʌ an majqui miʼ tsictesan jumpʼejl i sujmlel tsaʼ bʌ i tsijib cʌñʌ. I mi laj qʼuelob ti ñuc jiñi yicʼotoʼ bʌ i chʼejlel miʼ yʌcʼob i comentario anquese wen yujilob quisin o wolito i cʌñob lac tʼan (1 Ts. 2:2). ¿Bajcheʼ miʼ mejlel lac pʌsbeñob chaʼan mucʼʌch laj qʼuel ti ñuc cheʼ bʌ miʼ chaʼleñob wersa? Junchajp jiñʌch cheʼ mi la cʌqʼueñob wocolix i yʌlʌ tiʼ yujtibal jiñi tempa bʌ yicʼot cheʼ mi lac subeñob chaʼan jiñi i comentario tsaʼʌch i wen coltayonla. Yambʌ, jiñʌch cheʼ mi la cʌcʼ laj comentario jaʼel. Cheʼ bajcheʼ jiñi, mach cojach mi caj i ñuqʼuesʌntel lac pusicʼal, cheʼʌch mi caj lac mel jaʼel (Ro. 1:11, 12).

7. ¿Bajcheʼ tac miʼ yʌqʼueñonla lac wenlel cheʼ mi la cʌcʼ laj comentario?

⁷ Mi lac taj lac wenlel cheʼ bʌ mi laj cʌcʼ laj comentario (Is. 48:17). ¿Bajcheʼ tac? Ñaxam bʌ, mi tsaʼ lac ñaʼta lac letsan laj cʼʌb, ñumen wen mi caj lac chajpan lac bʌ chaʼan jiñi tempa bʌ, mi caj lac ñumen chʼʌmben i sujm jiñi i Tʼan Dios  yicʼot cabʌl chuqui mi caj laj cʌn chaʼan yom bʌ mi lac mel. I chaʼpʼejlel, tajol mi caj lac ñumen ñusan lac bʌ yaʼ ti tempa bʌ come mi caj la cotsan lac bʌ ti jiñi muʼ bʌ i yʌjlel. I yuxpʼejlel, come chaʼan mi la cʌcʼ laj comentario yomʌch mi lac chaʼlen wersa, jiñi muʼ bʌ la cʌl mi caj i cʌytʌl ti lac jol.

8, 9. a) Cheʼ bajcheʼ miʼ yʌl Malaquías 3:16, ¿bajcheʼ yilal miʼ qʼuel Jehová maʼ wʌl cheʼ mi lac chaʼlen wersa la cʌcʼ laj comentario? b) ¿Pero bajcheʼ miʼ bej ubiñob i bʌ jiñi hermanojob?

⁸ Jehová miʼ mulan cheʼ mi la cʌl jiñi ñopol bʌ lac chaʼan. Miʼ mejlel lac ñop chaʼan mucʼʌch i ñʌchʼtañonla yicʼot miʼ chʼʌm ti ñuc cheʼ mi lac chaʼlen wersa la cʌcʼ laj comentario ti tempa bʌ (pejcan Malaquías 3:16, TNM). * Cheʼ jaʼel, miʼ pʌsbeñonla chaʼan mucʼʌch i qʼuel ti ñuc cheʼ miʼ yʌqʼueñonla bendición tac (Mal. 3:10).

⁹ Wen tsiquil chucoch yomʌch mi la cʌcʼ laj comentario. Pero tajol añʌch muʼto bʌ i bʌcʼñañob i letsan i cʼʌb. Mi cheʼʌch woli a wubin, mach a taj a chʼijiyemlel. Laʼ laj qʼuel principio tac yicʼot ejemplo tac am bʌ ti Biblia, yicʼot yan tac bʌ laj coltʌntel muʼ bʌ caj i laj coltañonla chaʼan mi la cʌcʼ laj comentario.

10. a) ¿Chuqui muʼ bʌ laj cubin ti lac pejtelel? b) ¿Chucoch miʼ mejlel la cʌl chaʼan weñʌch jiñi lac bʌqʼuen cheʼ mi la cʌcʼ laj comentario?

¹⁰ ¿Muʼ ba i tilel a bʌqʼuen cheʼ maʼ letsan a cʼʌb chaʼan maʼ wʌcʼ a comentario? Mi cheʼʌchi, mach jatet jach maʼ wubin a bʌ bajcheʼ jiñi. Tiʼ sujm, lʌcʼʌ ti lac pejtelel mi lac tsʼitaʼ chaʼlen bʌqʼuen cheʼ mi la cʌcʼ laj comentario. Pero mi jiñʌch muʼ bʌ i mʌctañet chaʼan maʼ wʌcʼ a comentario, yom maʼ wen ñaʼtan chucoch cheʼ maʼ wubin bajcheʼ jiñi. ¿Jimba maʼ bʌcʼñan chaʼan maʼañix chuqui mi caj i mejlel a wʌl o tajol maʼ wʌl mach bʌ weñic? ¿Muʼ baʼ pensalin chaʼan jiñi a comentario mach ñoj weñic bajcheʼ i chaʼan yambʌlob? Weñʌch jiñi a bʌqʼuen come choncol  i pʌs chaʼan añʌch a pecʼlel yicʼot chaʼan ñumen ñuc maʼ qʼuel yambʌlob bajcheʼ jatet. Jehová miʼ wen mulan jiñi pecʼlel (Sal. 138:6; Fil. 2:3). Cheʼ jaʼel, yom chaʼan maʼ sub i ñuclel yicʼot chaʼan maʼ ñuqʼuesʌben i pusicʼal a wermañojob yaʼ ti tempa bʌ (1 Ts. 5:11). Jehová miʼ cʼuxbiñet yicʼot mi caj i yʌqʼueñet a chʼejlel i cʼʌjñibal bʌ a chaʼan.

11. ¿Baqui bʌ principio miʼ mejlel i coltañonla?

¹¹ Laʼ laj qʼuel chaʼpʼejl uxpʼejl principio. Jiñi i Tʼan Dios miʼ cʼajtesʌbeñonla chaʼan ti lac pejtelel mi lac taj lac sajtemal ti lac tʼan (Stg. 3:2). Jehová maʼañic miʼ pijtan chaʼan tojonla, i jiñi la quermañojob cheʼʌch miʼ melob jaʼel (Sal. 103:12-14). Lac familiajobʌch tiʼ pejtelelob yicʼot miʼ cʼuxbiñoñobla (Mr. 10:29, 30; Jn. 13:35). Miʼ chʼʌmbeñob i sujm chaʼan an qʼuiñil mach cheʼic miʼ loqʼuel lac tʼan bajcheʼ la com.

12, 13. ¿Chuqui mi laj cʌn tiʼ tojlel Nehemías yicʼot Jonás?

¹² Laʼ laj qʼuel chaʼpʼejl ejemplo am bʌ ti Biblia muʼ bʌ caj i coltañonla lac sʌt lac bʌqʼuen. Laʼ laj qʼuel tiʼ tojlel Nehemías, tsaʼ bʌ i chaʼle eʼtel tiʼ yotot juntiquil ñuc bʌ rey. Nehemías tsiʼ yubi i chʼijiyemlel cheʼ bʌ tsiʼ yubi chaʼan jiñi i tsʼajquil yicʼot i puerta tac Jerusalén jejmeñix (Neh. 1:1-4). Ñaʼtancu bajcheʼ cʼamel i bʌqʼuen cheʼ bʌ jiñi rey tsiʼ cʼajtibe chucoch chʼijiyem. Cheʼ bʌ muʼto caj i jacʼ, tsiʼ mele jumpʼejl pʼots bʌ oración. Wocolix i yʌlʌ jiñi oración, jiñi rey tsiʼ wen colta jiñi i tejclum Dios (Neh. 2:1-8). Tsaʼ bʌ i mele Nehemías miʼ cʌntesañonla chaʼan ñuc i cʼʌjñibal mi lac mel oración cheʼ bʌ muʼto caj lac jacʼ jumpʼejl tʼan. Laʼ lac ñaʼtan jaʼel tiʼ tojlel Jonás. Cheʼ bʌ Jehová tiʼ sube i pejcan jiñi quixtañujob ti Nínive, tsaʼʌch i wen bʌcʼña i tsaʼ putsʼi majlel ti yambʌ tejclum (Jon. 1:1-3). Pero tiʼ coltaya Dios tsaʼʌch i mele jiñi eʼtel, i jiñi tsaʼ bʌ i yʌlʌ tsiʼ yʌqʼue i wenlel cabʌl quixtañujob (Jon. 3:5-10). Tsaʼ bʌ ujti tiʼ tojlel Jonás miʼ cʌntesañonla chaʼan Jehová miʼ mejlel i coltañonla lac melben i yeʼtel anquese wen an lac bʌqʼuen. Pero jiñi la quermañojob maʼañic mi lac wen bʌcʼñañob bajcheʼ jiñi quixtañujob chʼoyoloʼ bʌ ti Nínive, ¿ñomach?

¹³ ¿Chuqui tac mi caj i coltañonla la cʌcʼ laj comentario muʼ bʌ i ñuqʼuesʌben i pusicʼal la quermañojob? Laʼ laj qʼuel.

14. a) ¿Chucoch yom mi lac wen chajpan lac bʌ chaʼan jiñi tempa bʌ tac? b) ¿Baqui ora miʼ mejlel lac chajpan lac bʌ?

¹⁴ Laʼ lac chajpan lac bʌ chaʼan jiñi tempa bʌ tac. Maʼañic mi caj lac wen bʌcʼñan la cʌcʼ laj comentario mi mucʼʌch la cʌqʼuen i yorajlel chaʼan wen mi lac chajpan lac bʌ (Pr. 21:5). Tiʼ sujm, mach junlajalic bajcheʼ añonla. Eloise, juntiquil mebaʼ xʼixic ñumeñix bʌ ti 80 i jabilel, miʼ tech i chajpan jiñi Lac tsictesʌbentel tiʼ tejchibal semana. Miʼ yʌl: «Tijicña mi cubin c bʌ yaʼ ti tempa bʌ tac mi añʌchix chaʼpʼejl uxpʼejl qʼuin c chajpa c bʌ». Yambʌ hermana i cʼabaʼ Joy, jujumpʼejl bʌ qʼuin mucʼ ti eʼtel, miʼ chajpan jiñi Lac Tsictesʌbentel cheʼ jumpʼejl jax qʼuin yom jiñi tempa bʌ come miʼ yʌl chaʼan cʼajalix to yom i chaʼan jiñi tsaʼ bʌ i cʌñʌ. Ike, juntiquil anciano wen am bʌ i yeʼtel yicʼot am bʌ bajcheʼ precursor,  miʼ yʌl: «An j qʼuele chaʼan ñumen wen cheʼ ti jujumpʼejl qʼuin mic tsʼitaʼ chajpan c bʌ i mach ti jumpʼejl jach bʌ qʼuin mic luʼ chajpan».

15. ¿Bajcheʼqui mi lac chajpan lac bʌ ti wen chaʼan jumpʼejl tempa bʌ?

¹⁵ ¿Bajcheʼqui mi lac chajpan lac bʌ ti wen chaʼan jumpʼejl tempa bʌ? Ñaxan yom bʌ mi lac mel jiñʌch mi laj cʼajtiben Jehová chʼujul bʌ i yespíritu (Lc. 11:13; 1 Jn. 5:14). Cheʼ jiñi, ti chaʼpʼejl uxpʼejl minuto laʼ lac ñaʼtan chuqui woliʼ yʌl tiʼ pejtelel jiñi temaj. Wen qʼuele jiñi título, subtítulo, dibujo yicʼot jiñi recuadro tac. Cheʼ jaʼel, laʼ lac tech laj qʼuel jujumpʼejl párrafo, i mi mucʼʌch lac mejlel laʼ lac luʼ pejcan jiñi texto tac. Laʼ lac wen ñaʼtan jiñi woli bʌ lac pejcan, pero yom mi lac ñumen qʼuel ti ñuc jiñi la com bʌ la cʌl. Cheʼ ñumen wen mi lac chajpan lac bʌ, mi caj lac taj lac wenlel yicʼot mach wocolic mi caj la cubin chaʼan mi la cʌcʼ laj comentario (2 Co. 9:6).

16. ¿Baqui bʌ jiñi eʼtijib tac an a chaʼan, i bajcheʼ maʼ cʼʌn?

¹⁶ Laʼ laj cʼʌn jiñi eʼtijib tac am bʌ ti Internet. Jehová miʼ yʌqʼueñonla eʼtijib tac tiʼ tojlel yorganización chaʼan miʼ coltañonla lac chajpan lac bʌ. Ti jiñi aplicación JW Library^® miʼ mejlel lac chaʼlen ti descargar jiñi jun tac ti lac teléfono o lac tableta. Cheʼ jiñi, miʼ mejlel lac chajpan jiñi jun, o miʼ mejlel lac ñʌchʼtan jumpʼejl audio jin jach baqui o bajcheʼ ora la com. An muʼ bʌ i cʼʌñob ili aplicación chaʼan miʼ chajpañob i bʌ cheʼ miʼ jumucʼ cʼajob i yo tiʼ troñel, ti escuela o cheʼ an baqui woliʼ majlelob. Cheʼ jaʼel, wocolix i yʌlʌ jiñi programa Watchtower Library yicʼot jiñi página BIBLIOTECA TI INTERNET Watchtower^™, mach wocolic ti sʌclʌntel i sujmlel chuqui com bʌ lac ñumen cʌn.

17. a) ¿Chucoch weñʌch cheʼ cabʌl comentario mi lac chajpan? b) ¿Chuqui tsaʼ cʌñʌ ti jiñi video Sujten tiʼ yamigo Jehová: Chajpan ti utsʼat jiñi a comentario?

¹⁷ Mi mucʼʌch i mejlel, laʼ lac chajpan cabʌl comentario ti jujumpʼejl temaj. ¿Chucoch? Come mach tiʼ pejtelel ora mi caj la cʌqʼuentel laj comentario. Tajol miʼ letsañob i cʼʌb yambʌ hermanojob i jiñi woli bʌ i ñusan jiñi tempa bʌ maʼañic miʼ yajcañonla. Cheʼ jaʼel, tajol pʼisbil bajcheʼ cʼamel comentario mi caj i yʌcʼ chaʼan maʼañic miʼ ñumel cheʼ bajcheʼ aqʼuebil i yorajlel. Jin chaʼan, mach michʼaconla yicʼot mach lac taj lac chʼijiyemlel mi maʼañic mi la cʌqʼuentel laj comentario ti jiñi ñaxan tac bʌ párrafo. Cheʼ cabʌl comentario mi lac chajpan miʼ mejlel lac wen letsan laj cʼʌb. Muʼ bʌ i mejlel lac mel jaʼel jiñʌch i pejcʌntel jumpʼejl texto. Pero mi mucʼʌch i mejlel, laʼ lac chajpan jumpʼejl comentario ti lac bajñel tʼan. *

18. ¿Chucoch mach yomic wen jal mi la cʌcʼ laj comentario?

¹⁸ Laʼ laj cʌcʼ comentario tac mach bʌ wen jalic. Lʌcʼʌ tiʼ pejtelel ora jiñi comentario mach bʌ wen jalic yicʼot muʼ bʌ i chʼʌmbentel i sujm miʼ ñuqʼuesan lac pusicʼal. Jin chaʼan, laʼ lac chaʼlen wersa chaʼan 30 segundo jach miʼ  jalʼan laj comentario (Pr. 10:19; 15:23). Ñuc i cʼʌjñibal cheʼ jiñi añix bʌ i ora i cajel i yʌcʼob i comentario miʼ yʌcʼob wem bʌ ejemplo chaʼan ili. Cheʼ miʼ yʌcʼob wocol tac bʌ comentario muʼ bʌ i jalʼan cabʌl minuto, tajol an muʼ bʌ caj i bʌcʼñan i letsan i cʼʌb ti caj mach cheʼic mi caj i jacʼ bajcheʼ jiñi yambʌ. Cheʼ jaʼel, mi mach wen jalic jiñi laj comentario, cabʌl hermanojob miʼ mejlel i letsañob i cʼʌb. Mi tsaʼ aqʼuentiyonla jiñi ñaxam bʌ comentario ti jumpʼejl párrafo, wen ñuc i cʼʌjñibal cheʼ jin jach mi lac toj aqʼuen i jacʼbal yicʼot ti tsiquil bʌ tʼan, mach lac luʼ tsictesan woli bʌ i yʌl jiñi párrafo. Cheʼ bʌ tsaʼix tsictesʌnti jiñi ñuc bʌ i cʼʌjñibal, miʼ mejlel ti alol yan tac bʌ (qʼuele jiñi recuadro « ¿Chuqui miʼ mejlel j cʌl tij comentario?»).

19. ¿Bajcheʼ miʼ mejlel i coltañonla jiñi muʼ bʌ i ñusan jiñi tempa bʌ, pero chuqui yom mi lac mel?

¹⁹ Laʼ lac suben jiñi muʼ bʌ i ñusan jiñi tempa bʌ chaʼan an jumpʼejl párrafo baqui com la cʌcʼ laj comentario. Mi la com lac mel bajcheʼ jiñi, laʼ lac suben jiñi hermano cheʼ bʌ muʼto caj i tejchel jiñi tempa bʌ. Cheʼ bʌ muqʼuix caj i tsajintel jiñi párrafo, ti ora yom mi lac letsan laj cʼʌb yicʼot chan mi lac chʼuy chaʼan miʼ taj i qʼuel.

20. ¿Chucoch lajal jiñi tempa bʌ tac bajcheʼ comol uchʼel la quicʼot la camigojob?

²⁰ Jiñi tempa bʌ tac lajalʌch bajcheʼ woliyonla ti uchʼel la quicʼot la camigojob. Mi an hermanojob muʼ bʌ i pʌyoñobla ti uchʼel i mi lac subentel chaʼan mi lac chʼʌm majlel yambʌ bʌlñʌcʼʌl mach bʌ wocolic ti chajpʌntel, ¿chuqui mi caj lac mel? Tajol mi caj lac tsʼitaʼ chaʼlen bʌqʼuen, pero mucʼʌch caj lac chaʼlen wersa chaʼan jiñi muʼ bʌ lac chʼʌm majlel miʼ laj mulañob. Ti jiñi tempa bʌ tac, jiñʌch Jehová tsaʼ bʌ i pʌyʌyonla, i tsaʼix i chajpʌbeyonla wen bʌ bʌlñʌcʼʌl (Sal. 23:5; Mt. 24:45). Jehová miʼ mulan chaʼan mach wocolic muʼ bʌ la cʌcʼ, pero yomʌch wen mi lac chajpan. Jin chaʼan, laʼ lac chajpan lac bʌ ti wen yicʼot laʼ la cʌcʼ laj comentario bajcheʼ cʼamel miʼ mejlel. Cheʼ jiñi, mach cojach mi caj lac mʌcʼlan lac bʌ chaʼan chuqui miʼ yʌqʼueñonla Jehová, mi caj laj coltan yambʌlob chaʼan cheʼʌch miʼ melob jaʼel.