1-3. a) ¿Chucoch Jehová tsiʼ wen cʼuxbi Salomón i chuqui ti bendición tsiʼ taja? b) ¿Chuqui ti cʼajtiya tac mi caj la cʌqʼuen i jacʼbal ti ili temaj?

SALOMÓN maxto wen añic i jabilel cheʼ bʌ tsaʼ ochi bajcheʼ rey ti Israel. Cheʼ tsaʼ caji ti yumʌntel, Jehová tsiʼ pejca tiʼ ñajal i tiʼ sube: «Cʼajtibeñon chuqui a wom». Salomón tiʼ sube chaʼan maxto añic chuqui wen yujil, jin chaʼan tsiʼ cʼajtibe chaʼan miʼ yʌqʼuen wem bʌ i ñaʼtʌbal (1 R. 3:5-10). Ili tsiʼ pʌsʌ chaʼan miʼ cʌn chaʼan pʼisbil jach chuqui yujil melol. Jin chaʼan, maʼañic toj sajtel lac pusicʼal cheʼ bʌ tsaʼ wen cʼuxbinti ti Jehová (2 S. 12:24). Jehová tsiʼ wen mulaj tsaʼ bʌ i cʼajti Salomón, jin chaʼan tsiʼ yʌqʼue i ‹pʼipʼlel i pusicʼal yicʼot cabʌl i ñaʼtʌbal› (1 R. 3:12).

² Cheʼ bʌ Salomón xucʼul tsaʼ ajñi tsiʼ wen taja bendición. Tsaʼ aqʼuenti tiʼ wenta i melben i «yotot lac Yum i Dios israelob» (1 R. 8:20). Tsaʼ wen cʌjñi chaʼan jiñi i ñaʼtʌbal tsaʼ bʌ aqʼuenti ti Dios. Yicʼot i coltaya jiñi chʼujul bʌ espíritu tiʼ tsʼijbu uxpʼejl libro am bʌ ti Biblia, jumpʼejl jiñʌch jiñi Proverbios.

³ Jiñi tʼan pusicʼal ñumento ti 100 miʼ yʌjlel yaʼ ti libro i chaʼan Proverbios. Jumpʼejl ejemplo, Proverbios 4:23, miʼ yʌl: «Cʌntan a pusicʼal ti jumpʼejl jach». ¿Chuqui yom i yʌl jiñi tʼan «pusicʼal» ti ili versículo? Mi caj laj qʼuel ti ili temaj. Cheʼ jaʼel, mi caj la cʌqʼuen i jacʼbal chaʼpʼejl cʼajtiya ñuc tac bʌ i cʼʌjñibal: ¿Bajcheʼ yom i jem o i cʼamʼesan lac pusicʼal Satanás? ¿I chuqui yom mi lac mel chaʼan mi laj cʌntan? Cheʼ mi lac ñaʼtʌben i jacʼbal mi caj i coltañonla chaʼan xucʼul mi laj cajñel ti Dios.

4, 5. a) ¿Chuqui yom i yʌl jiñi tʼan «pusicʼal» ti Proverbios 4:23? b) ¿Bajcheʼ lajal i cʌntʌntel lac bʌcʼtal yicʼot cheʼ mi laj cʌntan bajcheʼ yilalonla tiʼ sujm?

⁴ Cheʼ bʌ yaʼ ti Proverbios 4:23 miʼ yʌl jiñi tʼan «pusicʼal» woliʼ taj ti tʼan bajcheʼ yilalonla tiʼ sujm. Ti yambʌ tʼan yaʼʌch ochem chuqui mi lac ñaʼtan, bajcheʼ mi la cubin lac bʌ, jiñi laj com bʌ yicʼot chucoch mi lac mel. Mach jiñic bajcheʼ yilal mi laj qʼuejlel ti yambʌlob, jiñʌch majquiyonla tiʼ sujm.

⁵ Cheʼ mi laj cʌntan bajcheʼ yilalonla tiʼ sujm, lajal bajcheʼ woli laj cʌntan laj cʼocʼlel. Jumpʼejl ejemplo, mi mach la com cʼamʼan wen yom mi laj cʼux lac waj yicʼot mi lac mel ejercicio. Cheʼ jaʼel, mi la com chaʼan cʼocʼ mi la cajñel tiʼ chaʼan bʌ Dios, yom mi lac pʼʌtʼesan lac ñopoñel, ili miʼ mejlel lac mel cheʼ mi lac pʌs ti laj cuxtʌlel chuqui woli (choncol) laj cʌn majlel yicʼot mi la cʌl chuqui ñopol lac chaʼan (Ro. 10:8-10; Stg. 2:26). Yambʌ, tajol jiñi lac bʌcʼtal miʼ subeñonla chaʼan cʼocʼoñʌchla anquese mach cheʼiqui. Cheʼ lajal jaʼel, pejtelel chuqui mi lac mel tiʼ chaʼan bʌ Dios miʼ mejlel i yʌqʼueñonla lac ñaʼtan chaʼan pʼʌtʌlʌch lac ñopoñel, anquese ti lac pusicʼal woli (yʌquel) i colel majlel mach tac bʌ weñic (1 Co. 10:12; Stg. 1:14, 15). Laʼ laj cʼajtesan chaʼan Satanás yom i qʼuextan lac pensar bajcheʼ i chaʼan. ¿Bajcheʼ yom i qʼuextan i bajcheʼ miʼ mejlel laj cʌntan?

6. ¿Chuqui yom i taj Satanás, i bajcheʼ yom i mel?

⁶ Satanás juntiquilʌch muʼ bʌ i bajñel ñaʼtan i bʌ mucʼ jach bʌ i ñusʌben i mandar tac Jehová i yom i qʼuextan lac pensar yicʼot mi lac mel muʼ bʌ i mulan. Come maʼañic miʼ mejlel i xicʼonla, miʼ sʌclan bajcheʼ miʼ mejlel i mel. Jumpʼejl ejemplo, miʼ joyonla ti quixtañujob tsaʼix bʌ i yʌmbeyob i pensar (1 Jn. 5:19). Yom chaʼan mi lac ñusan cabʌl ora la quicʼotob anquese la cujil chaʼan jiñi mach bʌ weñobic i melbal miʼ mejlel i ‹bibʼesan› o i jem lac pensar yicʼot lac melbal (1 Co. 15:33). Ili jiñʌch tsaʼ bʌ i cʼʌñʌ tiʼ tojlel jiñi rey Salomón, tsaʼ ñujpuñi yicʼot cabʌl xʼixicob maʼañic bʌ miʼ chʼujutesañob Dios, i xucʼu xucʼul tsaʼ caji  i ñajtʼesʌbeñob i «pusicʼal» ti Jehová (1 R. 11:3).

7. a) ¿Chuqui yan tac bʌ miʼ cʼʌn Satanás chaʼan miʼ puc jiñi i ñaʼtʌbal? b) ¿Chucoch yom wen tsajilonla?

⁷ Satanás miʼ cʼʌn película yicʼot programa tac ti televisión chaʼan miʼ puc i ñaʼtʌbal. Yujil chaʼan mucʼʌch lac mulan jiñi historia tac muʼ bʌ i ñumel yaʼi, i miʼ cʼʌn chaʼan miʼ qʼuextan lac pensar, lac melbal yicʼot bajcheʼ yubil mi laj cubin lac bʌ. Jesús tsiʼ cʼʌñʌ historia tac chaʼan miʼ chaʼlen cʌntesa. Jumpʼejl ejemplo, tsiʼ cʼʌñʌ jiñi relato chaʼan jiñi wem bʌ samaritano yicʼot chaʼan jiñi chʼiton tsaʼ bʌ chaʼ sujti tiʼ yotot (Mt. 13:34; Lc. 10:29-37; 15:11-32). Jiñi lajaloʼ bʌ i pensar bajcheʼ Satanás miʼ mejlel i cʼʌñob jiñi historia tac chaʼan miʼ jem lac pensar. Jin chaʼan, yom wen tsajilonla. I sujm chaʼan an película yicʼot programa tac muʼ bʌ i yʌcʼ lac tijicñʌyel yicʼot miʼ cʌntesañonla i maʼañic miʼ bibʼesan lac pensar. Jin chaʼan, yom pʼisbil jach chuqui mi laj qʼuel. Cheʼ an chuqui mi lac yajcan laj qʼuel yom mi laj cʼajtiben lac bʌ: «¿Woli ba i ñop i pʌsbeñon ili programa o película chaʼan weñʌch cheʼ mic jacʼben jiñi tsucul bʌ c pensar?» (Gá. 5:19-21; Ef. 2:1-3). Mi tsaʼ lac taja laj qʼuel chaʼan woliʼ pʌs chuqui miʼ ñaʼtan Satanás, yom mi lac tʌtsʼ lac bʌ cheʼ bajcheʼ choncol lac putsʼtan jumpʼejl tsʌts bʌ cʼamʌjel.

8. ¿Bajcheʼ miʼ mejlel i cʌntʌbeñob i pusicʼal i yalobil jiñi tatʌlob?

⁸ Tatʌlob, an ti laʼ wenta chaʼan mi laʼ cʌntan laʼ walobilob chaʼan Satanás maʼañic miʼ qʼuextʌbeñob i pusicʼal. Tiʼ sujm, mi laʼ chaʼlen wersa chaʼan maʼañic miʼ cʼamʼañob. Jumpʼejl ejemplo, mi laʼ sʌqʼuesan laʼ wotot yicʼot mi laʼ choc pejtelel mejl bʌ i yʌcʼ ti wocol i cuxtʌlel laʼ walobilob. Cheʼ lajal jaʼel, yom mi laʼ cʌntan laʼ walobilob chaʼan jiñi película, programa tac ti televisión, videojuego yicʼot jiñi página tac ti internet chaʼan maʼañic miʼ lajibeñob i pensar Satanás. Jehová tsiʼ yʌcʼʌ ti laʼ wenta  chaʼan wen miʼ yajñelob tiʼ tojlel (Pr. 1:8; Ef. 6:1, 4). Jin chaʼan, mach laʼ bʌcʼñan chaʼan mi laʼ waʼchocon mandar tac chucul bʌ ti Biblia. Subenla jiñi laʼ walobilob chuqui miʼ mejlel i qʼuelob i chuqui maʼañic bʌ, i coltañob i chʼʌmben i sujm chucoch cheʼ maʼ mel bajcheʼ jiñi (Mt. 5:37). Cheʼ bʌ woliʼ tajob majlel i colel, coltañob chaʼan miʼ mejlel i bajñel yajcañob chuqui jiñi wem bʌ yicʼot mach bʌ weñic cheʼ bajcheʼ miʼ yʌl i mandar tac Dios (He. 5:14). Cʼajtesanla chaʼan jiñi laʼ walobil cabʌl chuqui miʼ cʌñob ti chuqui mi laʼ wʌl, pero ñumento ti chuqui mi laʼ mel (Dt. 6:6, 7; Ro. 2:21).

9. ¿Chuqui ti ñaʼtʌbal miʼ yʌcʼ Satanás, i chucoch añʌch i wocolel?

⁹ Satanás miʼ mejlel i bibʼesan lac pusicʼal cheʼ mi lac jacʼben i ñaʼtʌbal wiñicob i mach i chaʼañic Dios (Col. 2:8). Jumpʼejl ejemplo, miʼ yʌc ti ñaʼtʌntel chaʼan jiñi ñumen ñuc bʌ ti laj cuxtʌlel jiñʌch i sʌclʌntel cabʌl taqʼuin. ¿Chucoch wocolʌch iliyi? Come anquese mucʼʌch i tajob o maʼañic, jiñi muʼ bʌ i ñaʼtañob i sʌclan cabʌl taqʼuin miʼ yʌcʼob ti wocol i cʼocʼlel, i familia yicʼot bajcheʼ añob tiʼ chaʼan bʌ Dios (1 Ti. 6:10). Wen tijicñayonla chaʼan jiñi lac Tat am bʌ ti panchan miʼ coltañonla laj qʼuel ti pʼisbil jach jiñi taqʼuin (Ec. 7:11, 12; Lc. 12:15).

10, 11. a) ¿Chuqui yom mi lac mel chaʼan mi laj cʌntan lac bʌ? b) ¿Chuqui miʼ mel jiñi xcʌntayajob wajali, i bajcheʼ miʼ mejlel i chaʼlen eʼtel jiñi laj conciencia bajcheʼ juntiquil xcʌntaya?

¹⁰ Chaʼan mi laj cʌntan lac pusicʼal, yom mi laj cʌn chuqui ti wocol miʼ mejlel lac taj i ti ora mi lac ñaʼtan chuqui mi caj lac mel. Jiñi tʼan am bʌ ti Proverbios 4:23 miʼ yʌqʼueñonla laj cʼajtesan jiñi xcʌntayajob tiʼ yorajlel jiñi rey Salomón. Jiñʌch waʼchocobiloʼ bʌ tiʼ pam i tsʼajquil jiñi tejclum, i cheʼ miʼ qʼuelob chaʼan woliʼ lʌcʼtiyel jumpʼejl wocol, ti ora miʼ subob. Ili miʼ yʌqʼueñonla lac ñaʼtan chuqui yom mi lac mel chaʼan Satanás maʼañic miʼ yʌn lac pensar.

¹¹ Ti wajali, jiñi xcʌntayajob miʼ comol chaʼleñob eʼtel (troñel) yicʼot muʼ bʌ i cʌntañob i puertajlel jiñi tejclum (2 S. 18:24-26). Cheʼ woliʼ lʌcʼtiyel i contrajob miʼ comol qʼuelob mi ñupʼulʌch i puertajlel jiñi tejclum (Neh. 7:1-3). Jiñi laj conciencia cʌntesʌbil bʌ ti Biblia * miʼ mejlel i chaʼlen eʼtel bajcheʼ juntiquil xcʌntaya. ¿Bajcheʼ? Ti ora miʼ sub cheʼ bʌ Satanás yom i ticʼlan lac pusicʼal, ili yom i yʌl, cheʼ bʌ yom i yʌn lac pensar, bajcheʼ yubil mi laj cubin lac bʌ, jiñi laj com bʌ yicʼot chucoch mi lac mel. Cheʼ bʌ jiñi laj conciencia miʼ subeñonla chaʼan woliʼ lʌcʼtiyel jumpʼejl wocol, ti ora yom mi lac jacʼben i tʼan, lajal bajcheʼ woli lac mʌcben puerta jiñi Satanás chaʼan maʼañic miʼ yochel.

12, 13. ¿Chuqui miʼ mejlel lac mulan, pero chuqui yom mi lac mel?

¹² Laʼ laj qʼuel jumpʼejl ejemplo chaʼan bajcheʼ mi laj cʌntan lac bʌ ti chuqui tac miʼ mel Satanás. Jehová miʼ cʌntesañonla chaʼan mach yomic mi la cʌl jiñi chaʼan bʌ tsʼiʼlel yicʼot chuqui tac bibiʼ (Ef. 5:3). Pero ¿chuqui mi caj lac mel cheʼ jiñi lac piʼʌlob ti eʼtel o ti escuela miʼ tech i yʌlob chuqui tac bibiʼ? La cujil chaʼan mach yomic mi lac mel «chuqui mach tojic, yicʼot i colosojlel lac pusicʼal yicʼot i chaʼan bʌ pañimil» (Tit. 2:12). Jin chaʼan,  tajol jiñi laj conciencia miʼ subeñonla chaʼan yom yʌxʌl laj co (Ro. 2:15). ¿Chuqui mi caj lac mel? ¿Muʼ ba caj lac jacʼben i tʼan ili xcʌntaya i mi caj lac ñupʼ jiñi puerta? Tajol mi caj lac mulan lac ñʌchʼtan chuqui woliʼ yʌlob o mi laj qʼuel chuqui tac woliʼ pʌsob. Pero yom bʌ mi lac mel jiñʌch cheʼ mi laj qʼuextan lac tʼan o mi lac loqʼuel yaʼi.

¹³ Yom an lac chʼejlel chaʼan maʼañic mi lac yajlel tiʼ xicʼol lac piʼʌlob chaʼan mi lac mel mach bʌ weñic o chaʼan mi lac ñaʼtan. Miʼ mejlel lac ñop chaʼan Jehová mucʼʌch i qʼuel cheʼ mi lac chaʼlen wersa chaʼan maʼañic miʼ qʼuextan lac pensar Satanás yicʼot chaʼan mi caj i yʌqʼueñonla lac pʼʌtʌlel yicʼot lac ñaʼtʌbal chaʼan mi lac mʌlben (2 Cr. 16:9; Is. 40:29; Stg. 1:5). ¿Chuqui yan tac bʌ miʼ mejlel lac mel chaʼan mi laj cʌntan lac pusicʼal?

14, 15. a) ¿Chuqui yom mi la cʌcʼ ti ochel ti lac pusicʼal, i bajcheʼ mi lac mel? b) ¿Bajcheʼ miʼ coltañonla Proverbios 4:20-22 chaʼan mi lac ñumen locʼsʌben i wenlel i pejcʌntel jiñi Biblia? (Qʼuele jaʼel jiñi recuadro « ¿Bajcheʼ miʼ mejlel a wen ñaʼtan?»)

¹⁴ Chaʼan mi laj cʌntan lac pusicʼal, mach jasʌlic cheʼ maʼañic mi la cʌcʼ ti ochel mach tac bʌ weñic, yom mi la cʌcʼ ti ochel jaʼel chuqui tac wem bʌ. Laʼ lac chaʼ ñaʼtan jiñi ejemplo chaʼan jiñi tejclum wen cʌntʌbil bʌ. Jiñi xcʌntaya puerta yom ñupʼul i chaʼan chaʼan maʼañic miʼ yochel i contrajob. Pero miʼ jam chaʼan miʼ yochel i cʌyob jiñi bʌlñʌcʼʌl yicʼot yan tac bʌ. Mi maʼañic miʼ mel, jiñi quixtañujob mi caj i chʌmelob (sajtelob) ti wiʼñal. Cheʼ jaʼel, yom mi lac jam lac pusicʼal chaʼan miʼ yochel i cʌntesa tac Jehová.

¹⁵ Yaʼ ti Biblia mi lac tajben i ñaʼtʌbal Dios. Jin chaʼan, jajayajl mi lac pejcan, mi la cʌcʼ chaʼan jin miʼ tojʼesan lac pensar, bajcheʼ yubil mi laj cubin yicʼot jiñi lac melbal. Chaʼan mi lac ñumen locʼsʌben i wenlel i pejcʌntel jiñi Biblia an chaʼchajp yom bʌ mi lac mel. Ñaxam bʌ, yom mi lac mel oración. Juntiquil hermana miʼ yʌl: «Cheʼ muʼto caj c pejcan jiñi Biblia, mij cʼajtiben Jehová chaʼan miʼ coltañon j qʼuel jiñi ‹ñuc tac bʌ › i cʼʌjñibal am bʌ tiʼ Tʼan» (Sal. 119:18). I chaʼpʼejlel, yom mi lac wen ñaʼtan jiñi muʼ bʌ lac pejcan. Cheʼ mi lac mel iliyi, jiñi i Tʼan Dios miʼ yochel ti lac pusicʼal i miʼ coltañonla chaʼan mi laj cʼuxbin bajcheʼ miʼ chaʼlen pensar Jehová (pejcan Proverbios 4:20-22; Sal. 119:97).

16. ¿Baqui bʌ i wenlel mi lac taj cheʼ mi laj qʼuel jiñi canal JW Broadcasting? Alʌ jumpʼejl ejemplo.

¹⁶ Yambʌ junchajp bajcheʼ mi laj cʌcʼ ti ochel i ñaʼtʌbal Dios ti lac tojlel, jiñʌch cheʼ mi laj qʼuel pejtelel chuqui miʼ ñumel yaʼ ti canal JW Broadcasting^®. Jumpʼejl xñujpuñel miʼ yʌl: «Jiñi programa ti jujumpʼejl uw an sujti tiʼ jacʼbal jiñi lon coración tac. cheʼ bʌ an lon c chʼijiyemlel o c bajñel mi cubin lon c bʌ, miʼ pʼʌtʼesañon lojon yicʼot mi tijicñesan lon c pusicʼal. Ti lon cotot mic ñʌchʼtan lojon jiñi cʼay tac chaʼan i Yumʌntel Dios ti bajcheʼ jach ora: Cheʼ choncol lon c mel jiñi uchʼel, cheʼ mi c sujcun lon cotot o cheʼ mi lon c jap té». Ili programa tac miʼ coltañonla laj cʌntan lac pusicʼal, chaʼan mi lac chaʼlen pensar bajcheʼ Jehová yicʼot chaʼan mi lac mʌlben (jotben) jiñi lac xicʼol chaʼan mi lac chaʼlen pensar bajcheʼ Satanás.

17, 18. a) Cheʼ bajcheʼ miʼ yʌl 1 Reyes 8:61, ¿chuqui miʼ yujtel cheʼ mi lac mel muʼ bʌ i subeñonla Jehová? b) ¿Chuqui miʼ cʌntesañonla tsaʼ bʌ i mele jiñi rey Ezequías? c) Cheʼ bajcheʼ mi laj qʼuel ti Salmo 139:23, 24 chaʼan tsaʼ bʌ i cʼajti David ti Jehová, ¿chuqui miʼ mejlel laj cʼajtin ti la coración tac?

¹⁷ Cheʼ mi lac mel chuqui wen i mi laj qʼuelben i wenlel, miʼ pʼʌtʼesan lac ñopoñel (Stg. 1:2, 3). Mi laj cubin lac tijicñʌyel cheʼ bʌ Jehová miʼ cʌñonla bajcheʼ i yalobil i mi caj lac ñumen  mulan lac pʌsben lac xucʼtʌlel (Pr. 27:11). Cheʼ mi lac ñusan jiñi wocol tac miʼ coltañonla lac pʌs chaʼan mach tʼoxolic lac pusicʼal (Sal. 119:113). Tiʼ sujm, ti jumpʼejl lac pusicʼal mi laj cʼuxbin Jehová yicʼot la com lac jacʼben i mandar tac yicʼot lac mel chuqui miʼ subeñonla (pejcan 1 Reyes 8:61).

¹⁸ Ti lac pejtelel mi lac taj lac sajtemal come luʼ xmulilonla. Mi cheʼ mi la cujtel, laʼ laj cʼajtesan tsaʼ bʌ ujti tiʼ tojlel jiñi rey Ezequías. Tsiʼ taja i sajtemal, pero tsaʼʌch i cʌyʌ i mul i «xucʼul» tsiʼ bej melbe i yeʼtel Jehová (Is. 38:2-6; 2 Cr. 29:1, 2; 32:25, 26). Mach la cʌcʼ chaʼan Satanás miʼ bibʼesan lac pensar. Laʼ laj cʼajtiben Jehová chaʼan miʼ coltañonla lac taj wem bʌ lac ñaʼtʌbal (1 R. 3:9; pejcan Salmo 139:23, 24). Mi mucʼʌch laj cʌntan lac pusicʼal, mi caj lac pʌsben lac xucʼtʌlel Jehová.