1, 2. a) ¿Chuqui miʼ qʼuel Jehová cheʼ miʼ tempañob i bʌ yonlel quixtañujob chaʼan miʼ melob i Cena lac Yum? (Qʼuele jiñi foto am bʌ tiʼ tejchibal). b) ¿Chuqui mi caj laj qʼuel ti ili temaj?

¿CHUQUI miʼ qʼuel Jehová cheʼ bʌ yonlel quixtañujob tiʼ pejtelel pañimil miʼ tempañob i bʌ chaʼan miʼ melob i Cena lac Yum? Miʼ qʼuel ti jujuntiquil jiñi wiñicob xʼixicob (quixtañujob), mach cojach bajcheʼ yonlelob. Jumpʼejl ejemplo, miʼ qʼuel jiñi muʼ bʌ i yajñelob ti jujumpʼejl jab. I yaʼ ochem jaʼel jiñi cheʼʌch bʌ miʼ melob anquese añob i contrajintel. Tajol an maʼañic bʌ miʼ yajñelob ti tempa bʌ tac ti jujumpʼejl semana, pero miʼ qʼuelob ti ñuc chaʼan yomʌch miʼ majlelob tiʼ Cʼajtesʌntel i chʌmel Jesús. I jiñi cojaxto bʌ woli (choncol) i yajñelob, tajol yomob jach i qʼuel chuqui miʼ mejlel, Jehová mucʼʌch i qʼuelob ti ñuc jaʼel.

² Mi lac ñop chaʼan Jehová miʼ yubin i tijicñʌyel cheʼ yonlel quixtañujob miʼ yajñelob ti ili tempa bʌ (Lc. 22:19). Pero muʼ bʌ i ñumen chʼʌm ti ñuc jiñʌch chucoch miʼ melob, mach jiñic jaytiquil miʼ yajñelob. Ti ili temaj, mi caj laj qʼuel wen ñuc bʌ cʼajtiya: ¿Chucoch mi la cajñel jaʼel ti jiñi tempa bʌ tac muʼ bʌ i chajpan Jehová ti jujumpʼejl semana chaʼan muʼ bʌ i cʼuxbiñob, i mach cojach tiʼ Cena lac Yum muʼ bʌ i mejlel ti jujumpʼejl jab? Laʼ laj qʼuel chuqui tac miʼ ñijcañonla chaʼan mi lac majlel ti tempa bʌ tac.

3, 4. a) ¿Chucoch mi la cajñel ti tempa bʌ tac? b) ¿Chuqui ti melbalʌl tac mi lac pʌs cheʼ mi la cajñel ti tempa bʌ tac? c) Cheʼ bajcheʼ miʼ yʌl 1 Corintios 11:23-26, ¿chucoch mach yomic mi laj cʌy lac bʌ cheʼ miʼ Cʼajtesʌntel i chʌmel Jesús?

³ Mi la cajñel ti tempa bʌ tac come cheʼʌch mi lac chʼujutesan  Dios. Cheʼ jaʼel, come jiñʌch Jehová muʼ bʌ i cʌntesañonla yaʼi. Jiñi muʼ bʌ i chañʼesañob i bʌ maʼañic miʼ ñopob chaʼan yom miʼ cʌntesʌntelob (3 Jn. 9). Pero joñonla, la com chaʼan miʼ cʌntesañonla Jehová yicʼot i yorganización (Is. 30:20; Jn. 6:45).

⁴ Cheʼ mi la cajñel ti tempa bʌ tac, mi lac pʌs lac pecʼlel yicʼot chaʼan la com chaʼan Dios miʼ cʌntesañonla. Mi lac majlel tiʼ Cʼajtesʌntel i chʌmel Cristo come la cujil chaʼan wen ñuc i cʼʌjñibal, pero cheʼ jaʼel, chaʼañʌch an lac pecʼlel i la com lac jacʼ ili mandar: «Cheʼʌch yom mi laʼ chaʼlen chaʼan mi laʼ ñaʼtañon» (pejcan 1 Corintios 11:23-26). Ili tempa bʌ miʼ pʼʌtʼesan lac pijtaya yicʼot miʼ cʼajtesʌbeñonla bajcheʼ cʼamel miʼ cʼuxbiñonla Jehová. Pero yujil chaʼan mach jasʌlic junyajl ti jumpʼejl jab yom miʼ ñuqʼuesʌntel lac pusicʼal yicʼot mi lac pʼʌtʼesʌntel. Jin chaʼan, miʼ yʌcʼ tempa bʌ tac ti jujumpʼejl semana i miʼ subeñonla majlel. Jiñi lac pecʼlel miʼ ñijcañonla chaʼan mi lac jacʼben i tʼan. Mi lac wen aqʼuen i yorajlel ti jujumpʼejl semana chaʼan mi lac chajpan lac bʌ yicʼot mi lac majlel ti tempa bʌ tac.

5. ¿Chucoch miʼ jacʼob i pʌyol ti Jehová jiñi quixtañujob añoʼ bʌ i pecʼlel?

⁵ Ti jujumpʼejl jab, cabʌl muʼ bʌ i jacʼob yicʼot i pecʼlel jiñi pʌyol muʼ bʌ i melbentelob ti Jehová chaʼan miʼ cʌñob (Is. 50:4). An ñaxam bʌ miʼ majlelob tiʼ Cʼajtesʌntel i chʌmel Jesús, i ti wiʼil miʼ techob majlel ti tempa bʌ (Zac. 8:20-23). Ti lac pejtelel mi lac mulan lac chʼʌm laj cʌntesʌntel yicʼot lac tojʼesʌntel ti Dios, jiñʌch muʼ bʌ i coltañonla (Sal. 40:17). Tiʼ sujm, maʼañic yambʌ ñumen wem bʌ, cojach cheʼ mi lac chʼʌm jiñi lac pʌyol ti tempa bʌ chaʼan miʼ cʌntesañonla Jehová yicʼot Jesús (Mt. 17:5; 18:20; 28:20).

6. ¿Bajcheʼ tsiʼ colta juntiquil wiñic jiñi i pecʼlel chaʼan miʼ majlel ti Cʼajtesʌntel i chʌmel Jesús?

⁶ Mi lac chaʼlen wersa ti jujumpʼejl jab chaʼan mi lac pʌy yonlel quixtañujob chaʼan i Cʼajtesʌntel i chʌmel Jesús. Yonlelob añoʼ bʌ i pecʼlel muʼ bʌ i jacʼob i pʌyol an i tajayob i wenlel. Jumpʼejl ejemplo. Añix cabʌl jab, juntiquil hermano tsiʼ yʌqʼue i pʌyol juntiquil wiñic, pero jiñi wiñic tsiʼ yʌlʌ chaʼan mach mejlic ti majlel. Pero ti jiñi bʌ acʼʌlel cheʼ tsaʼix cʼoti i yorajlel, jiñi hermano toj sajtel i pusicʼal cheʼ tsiʼ qʼuele chaʼan yaʼ cʼotel jiñi wiñic. I jiñi wiñic tsiʼ mulaj chaʼan wen jach bajcheʼ tsaʼ pejcʌnti cheʼ tsaʼ cʼoti, i tsiʼ teche majlel tiʼ pejtelel tempa bʌ tac. ¿Chuqui tsiʼ colta chaʼan miʼ qʼuextan i pensar yicʼot miʼ jacʼ i pʌyol? Jiñi hermano tsaʼ bʌ i pejca tsiʼ yʌlʌ: «Juntiquilʌch wen am bʌ i pecʼlel». Tiʼ sujm, jiñʌch Jehová tsaʼ bʌ i pʌyʌ ili wiñic chaʼan miʼ yochel tiʼ tejclum. Ili ora, jiñi wiñic tsaʼix i chʼʌmʌ jaʼ yicʼot Testigojix (1 P. 5:5; Jn. 6:44).

7. ¿Bajcheʼ miʼ coltañonla lac pʌs lac pecʼlel jiñi muʼ bʌ laj cʌn ti tempa bʌ tac yicʼot muʼ bʌ lac pejcan ti Biblia?

⁷ Jiñi muʼ bʌ laj cʌn ti tempa bʌ tac yicʼot muʼ bʌ lac pejcan ti Biblia miʼ coltañonla lac taj lac pecʼlel. Cheʼ anto yom chaʼpʼejl uxpʼejl semana chaʼan i Cʼajtesʌntel i chʌmel Jesús, yaʼ ti tempa bʌ tac miʼ wen tsajintel tiʼ tojlel yicʼot bajcheʼ tsiʼ pʌsʌ i pecʼlel cheʼ tsiʼ yʌcʼʌ i cuxtʌlel ti lac tojlel. I cheʼ mach jalix yom chaʼan miʼ Cʼajtesʌntel i chʌmel Jesús, mi lac subentel chaʼan mi lac pejcan jiñi relato tac am bʌ ti Biblia chaʼan chuqui tac tsaʼ ujti cheʼ bʌ tsaʼ chʌmi (sajti) yicʼot cheʼ tsaʼ chaʼ chʼojyi. Pejtelel iliyi miʼ ñijcan lac pusicʼal chaʼan mi lac ñumen qʼuel ti ñuc i cuxtʌlel. Cheʼ bajcheʼ jiñi, mi lac ñumen mulan lac lajiben i pecʼlel yicʼot lac mel muʼ bʌ i mulan Dios, anquese an qʼuiñil wocolʌch (Lc. 22:41, 42).

8. ¿Bajcheʼ tsiʼ pʌsʌ i chʼejlel Jesús?

⁸ Yambʌ com bʌ lac lajiben Jesús jiñʌch i chʼejlel. Laʼ laj qʼuel bajcheʼ tsiʼ pʌsʌ cheʼ tsʼitaʼ jax yom chaʼan miʼ chʌmel. Wen yujil chaʼan jiñi i contrajob muqʼuix caj i yʌcʼob ti quisin, mi caj i wen jatsʼob yicʼot i tsʌnsañob (Mt. 20:17-19). Pero tsaʼʌch i cuchu pejtelel jiñi wocol. Cheʼ bʌ tsaʼix cʼoti i yorajlel, tiʼ sube jiñi apóstolob cheʼ yaʼañob yicʼot yaʼ ti pʌcʼʌbʌl Getsemaní: «Chʼojyenla. Conixla. Awilan, lʌcʼʌl an jini muʼ bʌ i yʌcʼon tiʼ cʼʌb j contra» (Mt. 26:36, 46). Cheʼ bʌ tsaʼ cʼoti ti chujquel, ñaxan tsiʼ yʌcʼʌ i bʌ, tsiʼ yʌlʌ majqui i tiʼ sube jiñi soldadojob chaʼan miʼ yʌcʼob ti sujtel jiñi apóstolob (Jn. 18:3-8). ¿Mach ba tsaʼʌch i wen pʌsʌ i chʼejlel? Ili ora, jiñi hermanojob bombiloʼ bʌ yicʼot ochemonbʌla ti jiñi yambʌ tiñʌmeʼob mi lac chaʼlen wersa chaʼan mi lac lajiben i chʼejlel. ¿Bajcheʼ?

9. a) ¿Chucoch tajol yomʌch an lac chʼejlel chaʼan maʼañic mi laj cʌy jiñi tempa bʌ tac? b) ¿Bajcheʼ miʼ coltan yambʌ hermanojob añoʼ bʌ ti cárcel jiñi lac melbal?

⁹ Tajol añʌch wocol tac muʼ bʌ i mejlel i mʌctañonla chaʼan an qʼuiñil maʼañic mi lac majlel ti tempa bʌ tac. Mi cheʼ bajcheʼ jiñi, yomʌch chʼejlonla. An hermanojob cʼamoʼ bʌ, wen chʼijiyemoʼ bʌ o cʼuñob. An muʼ bʌ i contrajintel tiʼ familia o ti yumʌlob. Laʼcu lac jumucʼ ñaʼtan jiñi hermanojob añoʼ bʌ ti cárcel chaʼan i ñopbalob. ¿Am ba lac ñaʼta chaʼan jiñi lac melbal miʼ mejlel i coltañob? (He. 13:3). Cheʼ miʼ yubiñob chaʼan xucʼul woli (yʌquel) lac wen melben i yeʼtel Jehová anquese an wocol tac, miʼ pʼʌtʼañob jaʼel chaʼan miʼ bej ñopob Jehová, chaʼan bej chʼejlob yicʼot xucʼulob. Cheʼʌch tsaʼ ujti tiʼ tojlel jiñi apóstol Pablo. Cheʼ yaʼ mʌcʌl i chaʼañob tiʼ yotot yaʼ ti Roma, miʼ wen taj i tijicñʌyel cheʼ miʼ yubin chaʼan woliʼ chʌn melbeñob i yeʼtel (troñel) Dios jiñi hermanojob (Fil. 1:3-5, 12-14). Cheʼ tsʼitaʼ jax yom chaʼan miʼ cojlel o tajol cheʼ tsaʼix loqʼui, tiʼ tsʼijbu jiñi jun i chaʼan Hebreojob. Yaʼ ti jun tiʼ sube jiñi xucʼul bʌ hermanojob chaʼan maʼañic miʼ cʌyob i tempan i bʌ i tsiʼ yʌlʌ: «Chʌn cʼuxbin laʼ bʌ, come hermanojetla» (He. 10:24, 25; 13:1).

10, 11. a) ¿Majqui yom mi lac pʌyob tiʼ Cʼajtesʌntel i chʌmel Jesús? b) Cheʼ bajcheʼ miʼ yʌl Efesios 1:7, ¿chucoch yom mi lac mel?

¹⁰ Mi lac pʌs lac chʼejlel jaʼel cheʼ mi lac pʌyob tiʼ Cʼajtesʌntel i chʌmel Jesús jiñi lac familia, lac piʼʌlob ti eʼtel o jiñi chumuloʼ bʌ ti lac tʼejl. ¿Chucoch mi lac mel? Come mi lac wen qʼuel ti ñuc melbil bʌ i chaʼan Jehová yicʼot Jesús ti lac tojlel. Cheʼ jaʼel, la com chaʼan miʼ cʌñob bajcheʼ miʼ mejlelob i taj i wenlel ti jiñi i yutslel Jehová cheʼ tsiʼ yʌcʼʌ i tojol laj coltʌntel (pejcan Efesios 1:7; Ap. 22:17).

¹¹ Cheʼ mi lac majlel ti tempa bʌ tac, mi lac pʌs yambʌ wen ñuc bʌ lac melbal. I wen tsiquilʌch bajcheʼ an i pʌsʌ Jehová yicʼot Jesús.

12. a) ¿Chucoch miʼ pʼʌtʼesan laj cʼuxbiya ti Jehová yicʼot ti Jesús jiñi tempa bʌ tac? b) Cheʼ bajcheʼ miʼ yʌl 2 Corintios 5:14, 15, ¿bajcheʼ miʼ mejlel lac lajin Jesús?

¹² Jiñi laj cʼuxbiya ti Jehová yicʼot ti Jesús miʼ ñijcan lac pusicʼal chaʼan mi lac majlel ti tempa bʌ tac, i jiñi miʼ pʼʌtʼesan laj cʼuxbiya. ¿Chucoch? Come yaʼi, ti bele ora mi laj cʼajtesʌbentel tsaʼ bʌ i meleyob ti lac tojlel (Ro. 5:8). Jiñi i Cʼajtesʌntel i chʌmel Jesús miʼ ñumen aqʼueñonla lac chaʼ ñaʼtan bajcheʼ cʼamel i cʼuxbiya, cheʼto tiʼ tojlel jiñi maʼañic bʌ miʼ qʼuelob ti ñuc. Pero joñonla mi lac wen aqʼuen wocolix i yʌlʌ, jin chaʼan ti jujumpʼejl qʼuin mi lac chaʼlen wersa chaʼan mi lac ñop lac lajin Jesús ti laj cuxtʌlel (pejcan 2 Corintios 5:14, 15). Cheʼ jaʼel, miʼ ñijcʌyel lac pusicʼal chaʼan mi la cʌqʼuen i ñuclel Jehová cheʼ tsiʼ yʌcʼʌ i cuxtʌlel i Yalobil. Junchajp bajcheʼ mi lac mel jin cheʼ ti jumpʼejl lac pusicʼal mi la cʌcʼ laj comentario tac ti tempa bʌ.

13. Tsictesan bajcheʼ miʼ mejlel lac pʌs chaʼan mi lac wen cʼuxbin Jehová yicʼot i Yalobil.

¹³ Cheʼ ti jumpʼejl lac pusicʼal mi lac mel chuqui jach yom tiʼ tojlel Dios yicʼot i Yalobil mi lac pʌs chaʼan mi lac wen cʼuxbiñob. Ti bele ora añʌch chuqui yom mi lac mel chaʼan mi lac majlel ti tempa bʌ tac. Jumpʼejl ejemplo, cheʼ ti semana an cabʌl congregación añoʼ bʌ i tempa bʌ cheʼ jiñi hermanojob miʼ yujtelob i yeʼtel, tajol cheʼ bʌ lujbobix. I jiñi yambʌ tempa bʌ miʼ melob tiʼ yujtibal semana, cheʼ wolobix tiʼ cʼaj o jiñi quixtañujob. ¿Muʼ ba i qʼuel Jehová cheʼ mi la cajñel ti tempa bʌ anquese lujbonla? Mucʼʌch. Cheʼ jaʼel, cheʼ cabʌl wersa mi lac chaʼlen ñumento miʼ qʼuel ti ñuc jiñi laj cʼuxbiya tiʼ tojlel (Mr. 12:41-44).

14. ¿Chuqui utsʼat bʌ tsiʼ pʌsʌ Jesús?

¹⁴ Jesús utsʼat tsiʼ pʌsʌ chuqui yom i yʌl cheʼ mi la cʌcʼ lac bʌ tiʼ tojlel yambʌlob chaʼan cʼuxbiya. Mach cojach chaʼan tsiʼ yʌcʼʌ i cuxtʌlel tiʼ tojlel xcʌntʼañob i chaʼan, chaʼañʌch ñaxan tsiʼ chʼʌmʌyob ti ñuc ti jujumpʼejl qʼuin i mach jiñic i bajñel wenlel. Jumpʼejl ejemplo, anquese wen lujbix yicʼot chʼijiyem tsiʼ tempa i bʌ yicʼotob (Lc. 22:39-46). Jin tsiʼ ñaxan ñaʼta chuqui miʼ mejlel i yʌcʼ tiʼ tojlelob, mach jiñic chuqui miʼ mejlel ti aqʼuentel (Mt. 20:28). Mi cheʼʌch cʼamel laj cʼuxbiya tiʼ tojlel Jehová yicʼot la quermañojob, mi caj lac chaʼlen wersa chaʼan mi lac majlel tiʼ Cena lac Yum yicʼot tiʼ pejtelel tempa bʌ.

15. ¿Majqui la com lac ñumen coltañob?

 ¹⁵ Ochemonla ti jiñi junmojt i sujm bʌ xñoptʼañob i ti jumpʼejl lac pusicʼal mi la cʌqʼuen i yorajlel chaʼan mi lac pʌy ochel yambʌ quixtañujob. Pero la com lac ñumen coltan jiñi muʼ bʌ «i chʼujbiñob Dios», yom i yʌl, jiñi la quermañojob am bʌ i cʌyʌyob tempa bʌ yicʼot subtʼan (Gá. 6:10, Jini wen bʌ tʼan). Mi lac pʌsbeñob laj cʼuxbiya cheʼ mi lac pʌyob ti tempa bʌ tac, ñumento cheʼ tiʼ Cʼajtesʌntel i chʌmel Jesús. Cheʼ bajcheʼ Jehová yicʼot Jesús, wen tijicña mi la cubin cheʼ an majqui miʼ chaʼ sujtel baʼan jiñi xCʌnta tiñʌmeʼ yicʼot lac Tat yujil bʌ cʼuxbiya (Mt. 18:14).

16. a) ¿Chuqui yom mi lac mel tiʼ tojlel yambʌlob, i bajcheʼ mi caj i coltañonla jiñi tempa bʌ tac? b) ¿Chucoch weñʌch i yorajlel bajcheʼ añonla wʌle chaʼan mi laj cʼajtesan tsaʼ bʌ i yʌlʌ Jesús ti Juan 3:16?

¹⁶ Ti jiñi semana tac muʼ bʌ caj i tilel, laʼ lac pʌy cabʌl lac piʼʌlob chaʼan miʼ majlelob tiʼ Cʼajtesʌntel i chʌmel Jesús cheʼ ti viernes 19 i chaʼan abril, 2019 (Qʼuele jiñi recuadro « Laʼ lac pʌy yambʌ quixtañujob»). I tiʼ pejtelel ora, laʼ lac tem ñijcʌben lac bʌ lac pusicʼal chaʼan ti bele ora mi lac majlel ti tempa bʌ. Woli lac ñumen lʌcʼtiyel tiʼ jilibal ili pañimil. Jin chaʼan, i cʼʌjñibal mi lac majlel ti tempa bʌ tac come miʼ coltañonla lac chʌn pʌs lac pecʼlel, lac chʼejlel yicʼot laj cʼuxbiya (1 Ts. 5:8-11). Laʼ lac pʌsben Jehová chaʼan mi lac wen qʼuel ti ñuc jiñi cʼuxbiya am bʌ i chaʼan yicʼot i Yalobil ti lac tojlel (pejcan Juan 3:16).