CHEʼ ti miércoles 24 i chaʼan enero, 2018 cheʼ ti sʌcʼan, jiñi familia Betel am bʌ ti Estados Unidos yicʼot Canadá tijicñayob cheʼ bʌ tsiʼ yubiyob jumpʼejl ñuc bʌ anuncio: Jiñi hermano Kenneth Cook. Tsaʼ tsijib ochi yaʼ ti Junmojt muʼ bʌ i pʌsob bij i chaʼan i testigojob Jehová.

Jiñi hermano Cook tsaʼ chʼocʼa yicʼot tsaʼ coli yaʼ ti sur central i chaʼan Pennsylvania ti Estados Unidos. Juntiquil i piʼʌl ti clase tiʼ pʌsbe i sujmlel cheʼ bʌ muqʼuix caj i loqʼuel yaʼ ti preparatoria. Tsiʼ chʼʌmʌ jaʼ cheʼ ti 7 i chaʼan junio ti 1980. Tsiʼ teche eʼtel bajcheʼ precursor regular ti 2 i chaʼan septiembre, 1982. Cheʼ ti 12 i chaʼan octubre ti 1984, cheʼ bʌ ñumeñix chaʼpʼejl jab, tsaʼ pʌjyi ti eʼtel ti jiñi Betel am bʌ ti Wallkill, Nueva York.

Ti jiñi 25 jab ñumeñix bʌ, jiñi hermano chaʼlebil i chaʼan eʼtel ti cabʌl departamento, cheʼ bajcheʼ ti imprenta yicʼot ti Oficina i chaʼan Betel. Ti 1996 tsaʼ ñujpuñi yicʼot Jamie i tsaʼ bej cajiyob ti eʼtel yaʼ ti Betel i chaʼan Wallkill. Ti diciembre i chaʼan 2009, tsaʼ chojquiyob majlel yaʼ baqui miʼ yʌjqʼuel cʌntesa i chaʼan Watchtower am bʌ ti Patterson, Nueva York. Jiñi hermano tsaʼ ajqʼui ti eʼtel ti Departamento am bʌ tiʼ wenta i Tsʼijbuntel jun tac baqui miʼ jajqʼuel cʼajtiya tac. Ti abril i chaʼan 2016, cheʼ bʌ maxto jalic i chaʼ sujtelob ti Wallkill, tsaʼ chojquiyob majlel ti Brooklyn Nueva York. Cheʼ bʌ ñumeñix joʼpʼejl uw, tsaʼ chojquiyob majlel yaʼ ti tsijiʼ bʌ central mundial am bʌ ti Warwick, Nueva York. Ti enero i chaʼan 2017 tsaʼ waʼchoconti bajcheʼ xcoltaya i chaʼan jiñi Comité am bʌ tiʼ wenta i Tsʼijbuntel jun tac i chaʼan jiñi Junmojt muʼ bʌ i pʌsob bij.