1. ¿Chuqui woliʼ pʌs ti ili ora chaʼan wolix i jilel jiñi cʼuxbiya?

JIÑI Biblia tsiʼ yʌlʌ chaʼan ti cojix bʌ qʼuin tac jiñi wiñicob xʼixicob «mach yujilobic cʼuxbiya» (2 Ti. 3:1, 3). Ti ili ora wolix (choncolix) i tsʼʌctiyel. Jumpʼejl ejemplo, cabʌl familia tac tsaʼix jejmi tiʼ caj jiñi divorcio, jiñi tatʌl ñaʼʌl mach yomix i qʼuelob i bʌ, i jiñi i yalobilob miʼ yubiñob chaʼan maʼañic majqui miʼ cʼuxbiñob. Cheʼ jaʼel, an familia tac tem chumulobto bʌ, pero mach i cʌñʌyobic i bʌ miʼ melob. Juntiquil wiñic muʼ bʌ i yʌqʼuen ticʼojel tac jiñi familiajob miʼ yʌl: «Jiñi tatʌl ñaʼʌl yicʼotob i yalobilob maʼañic miʼ pejcañob i bʌ i yaʼ jach añob ti computadora, tiʼ tableta, tiʼ celular o ti videojuego tac. Anquese tem chumulob mach i cʌñʌyob i bʌ».

2, 3. a) Cheʼ bajcheʼ miʼ yʌl Romanos 12:10, ¿majquiyob yom mi lac ñumen cʼuxbiñob? b) ¿Chuqui mi caj laj qʼuel ti ili estudio?

² Mach la comic chaʼan miʼ jilel majlel jiñi laj cʼuxbiya cheʼ bajcheʼ ili pañimil (Ro. 12:2). Yom mi laj cʌn lac ñumen cʼuxbin jiñi lac familia yicʼot jiñi la quermañujob añoʼ bʌ ti congregación (pejcan Romanos 12:10). Jiñi cʼuxbiya muʼ bʌ i yʌjlel ilayi, jiñʌch muʼ bʌ la cubin tiʼ tojlel lac familia cheʼ bʌ mi laj qʼuelob bajcheʼ wem bʌ la camigojob. I jiñʌch jiñi cʼuxbiya yom bʌ mi la cubin tiʼ tojlel jiñi la quermañujob come lac familiajob jaʼel. Mi mucʼʌch lac pʌsben lac bʌ jiñi cʼuxbiya, mi caj laj coltan lac bʌ chaʼan chʌn temel mi lac melben i yeʼtel (troñel) Jehová (Mi. 2:12).

³ Ti ili estudio mi caj laj qʼuel ejemplo tac ti Biblia muʼ bʌ caj coltañonla lac ñumen pʌs cʼuxbiya.

4. ¿Bajcheʼ miʼ coltañonla lac chʼʌmben i sujm Santiago 5:11 chaʼan Jehová miʼ wen cʼuxbiñonla?

⁴ Jiñi Biblia miʼ yʌl utsʼatax bʌ i melbal (chaʼlibal) tac Jehová. Jumpʼejl ejemplo, miʼ yʌl chaʼan Dios «cʼuxbiyajʌch» (1 Jn. 4:8). Cheʼ la cujil ili, la com lac lʌcʼtesan lac bʌ tiʼ tojlel. Pero cheʼ jaʼel, jiñi Biblia miʼ yʌl chaʼan Jehová wen «uts i pusicʼal» (pejcan Santiago 5:11). ¡Wen utsʼatax cheʼ mi laj qʼuel bajcheʼ yubil miʼ yubin i bʌ Jehová ti lac tojlel!

5. ¿Bajcheʼ miʼ pʌs i pʼuntaya Jehová, i bajcheʼ miʼ mejlel lac lajin?

⁵ Ti Santiago 5:11 miʼ yʌjlel jiñi i yutslel Jehová yicʼot yambʌ utsʼatax bʌ i melbal: Jiñi pʼuntaya (Éx. 34:6). Junchajp bajcheʼ miʼ pʌsbeñonla Jehová jiñi i pʼuntaya jiñʌch cheʼ bʌ miʼ ñusʌbeñonla lac mul (Sal. 51:1). Pero cheʼ bʌ jiñi Biblia miʼ taj ti tʼan jiñi pʼuntaya mach cojach yom i yʌl cheʼ bʌ mi lac ñusʌben i mul yambʌlob. Jiñi pʼuntaya jiñʌch jaʼel jiñi muʼ bʌ i tech i yubin tiʼ pusicʼal juntiquil quixtañu i miʼ ñijcan chaʼan miʼ coltan jiñi woli (yʌquel) bʌ i ñusan wocol. Jiñi Biblia miʼ tsictesan chaʼan Jehová ñumen yom i coltañonla bajcheʼ juntiquil ñaʼʌl tiʼ tojlel i yalobil (Is. 49:15). Cheʼ bʌ mi lac ñusan wocol, jiñi i pʼuntaya Jehová jiñʌch muʼ bʌ i ñijcʌben i pusicʼal chaʼan miʼ coltañonla (Sal. 37:39; 1 Co. 10:13). Joñonla miʼ mejlel lac lajiben jiñi i pʼuntaya cheʼ bʌ lac ñusʌben i mul jiñi la quermañujob yicʼot cheʼ bʌ maʼañic mi lac lot michʼajel ti lac pusicʼal cheʼ bʌ yʌqʼueñoñobla lac chʼijyemlel (Ef. 4:32). Yambʌ bajcheʼ miʼ mejlel lac ñumen pʌsbeñob lac pʼuntaya jiñʌch cheʼ bʌ mi laj coltañob cheʼ bʌ miʼ ñusañob wocol. Cheʼ bʌ jiñi cʼuxbiya miʼ ñijcan lac pusicʼal chaʼan mi lac pʌs pʼuntaya, mi lac lajin Jehová, muʼ bʌ i wen pʌs i cʼuxbiya (Ef. 5:1).

6. ¿Bajcheʼ tsiʼ pʌsbeyob i bʌ cʼuxbiya Jonatán yicʼot David?

⁶ Jiñi Biblia miʼ taj ti tʼan i wiñicob Dios tsaʼʌch bʌ i pʌsbeyob i bʌ cʼuxbiya. Laʼ laj cʌn tiʼ tojlel Jonatán yicʼot David. Jiñi Biblia miʼ yʌl chaʼan Jonatán «tsaʼ cajiʼ wen cʼuxbin David  cheʼ bajcheʼ tsiʼ bajñel cʼuxbi i bʌ. Junsujm jach tsaʼ ajñi i pusicʼal» bajcheʼ i pusicʼal David (1 S. 18:1). Jehová tsiʼ yajca David chaʼan miʼ yochel ti rey tiʼ qʼuexol Saúl, jiñi i tat Jonatán. Saúl tsaʼ wen michʼa yicʼot tsiʼ wen tsʼaʼle David, jin chaʼan tsiʼ ñopo i tsʌnsan. Pero Jonatán maʼañic tsiʼ colta jiñi i tat cheʼ bʌ tsiʼ chaʼle wersa chaʼan miʼ tsʌnsan David. Jonatán yicʼot David tsiʼ yʌqʼueyob i bʌ i tʼan chaʼan tiʼ pejtelel ora mi caj i yajñelob bajcheʼ i yamigojob i bʌ yicʼot chaʼan mi caj i coltañob i bʌ (1 S. 20:42).

7. ¿Chuqui junchajp tsaʼ mejli i mʌctan Jonatán yicʼot David chaʼan maʼañic miʼ sujtelob tiʼ yamigojob i bʌ?

⁷ Jonatán yicʼot David tsaʼʌch sujtiyob ti wem bʌ amigojob anquese an cabʌl chuqui tajol tsaʼ mejli i mʌctañob chaʼan mach cheʼic miʼ yujtel. Jumpʼejl ejemplo, Jonatán ñumen ti 30 i jabilel bajcheʼ David. Jin chaʼan, Jonatán tsaʼ mejli i ñaʼtan chaʼan mach lajalobic come David xcolelto i maxto wen añic i ñaʼtʌbal. Pero mach cheʼic tsiʼ ñaʼta come tsiʼ wen qʼuele ti ñuc David.

8. ¿Chucoch Jonatán tsaʼ sujti tiʼ wem bʌ i yamigo David?

⁸ Cheʼ yomic Jonatán, tsaʼ mejli i tsʼaʼlen David yicʼot an tac chuqui tajol tsaʼ mejli i mel chaʼan jiñʌch miʼ yochel ti rey come i yalobil Saúl (1 S. 20:31). Pero Jonatán tsiʼ pʌsʌ i pecʼlel yicʼot i xucʼtʌlel ti Jehová, i tiʼ pejtelel i pusicʼal tsiʼ yʌqʼue i coltaya Jehová cheʼ bʌ jiñʌch David tsiʼ yajca bajcheʼ rey. Jonatán tsaʼʌch i pʌsʌ jaʼel jiñi i xucʼtʌlel tiʼ tojlel David anquese Saúl tsaʼ wen michʼa (1 S. 20:32-34).

9. ¿Bajcheʼ la cujil chaʼan Jonatán maʼañic tsiʼ qʼuele David bajcheʼ i contra?

⁹ Come Jonatán tsiʼ cʼuxbi David, maʼañic tsiʼ qʼuele bajcheʼ i contra. Jonatán wen yujil cʼʌñol jiñi jalʌjb yicʼot wen chʼejl bʌ soldado. Jiñi Biblia miʼ yʌl chaʼan Jonatán yicʼot i tat «ñumen sejbob ti xʌmbal bajcheʼ xiyeʼ» yicʼot «ñumen pʼʌtʌlob bajcheʼ bajlum» (2 S. 1:22, 23). Jin chaʼan, Jonatán tajol tsaʼ mejli yʌl bajcheʼ tac tsiʼ pʌsʌ i chʼejlel ti jiñi guerra tac. Pero maʼañic tsiʼ ñopo i pʌs chaʼan ñumen yujilto bajcheʼ David. I maʼañic tsiʼ loto michʼajel tiʼ pusicʼal chaʼan jiñi chuqui tac wem bʌ tsiʼ mele David. Tsiʼ qʼuele ti ñuc i chʼejlel yicʼot cheʼ miʼ ñop ti Jehová. Jonatán tsaʼ caji i cʼuxbin David cheʼ bʌ tsiʼ tsʌnsa Goliat. ¿Bajcheʼ miʼ mejlel lac pʌsben laj cʼuxbiya jiñi la quermañujob cheʼ bajcheʼ Jonatán tsiʼ wen cʼuxbi David?

10. ¿Chuqui yom i yʌl cheʼ bʌ yom mi lac ‹wen cʼuxbin lac bʌ ti jumpʼejl lac pusicʼal›?

¹⁰ Jiñi Biblia miʼ yʌl: «Wen cʼuxbin laʼ bʌ ti jumpʼejl laʼ pusicʼal» (1 P. 1:22). Jehová miʼ yʌqʼueñonla jiñi wem bʌ ejemplo. Miʼ wen cʼuxbiñonla, jin chaʼan maʼañic chuqui mi caj i ñajtʼesañonla tiʼ tojlel mi chʌn xucʼuloñʌchla (Ro. 8:38, 39). Jiñi tʼan am bʌ ti griego muʼ bʌ i chaʼlentel ti traducir bajcheʼ «wen» miʼ yʌcʼ ti ñaʼtʌntel chaʼan yom mi lac ñumen chaʼlen wersa chaʼan mi lac pʌs cʼuxbiya, i tajol jiñʌch yom bʌ mi lac mel tiʼ tojlel jiñi la quermañujob. Jiñi Biblia miʼ subeñonla chuqui yom mi lac mel cheʼ bʌ an majqui miʼ michʼesañonla: «Cuchbeñob i sajtemal laʼ piʼʌlob ti laʼ cʼuxbiya. Chaʼlenla wersa chaʼan ñʌchʼʌl mi laʼ wajñel ti jumpʼejl jach laʼ pusicʼal ti jini Espíritu» (Ef. 4:1-3). ‹Chaʼan ñʌchʼʌl mi la cajñel› la quicʼot la quermañujob, mach yomic mi lac xucʼchocon lac pensar ti jiñi mach tac bʌ weñic miʼ melob, yom mi lac chaʼlen wersa laj qʼuelob cheʼ bajcheʼ miʼ mel Jehová (1 S. 16:7; Sal. 130:3).

11. ¿Chucoch an i tajol wocolʌch mi la cubin chaʼan mi lac pʌs cʼuxbiya?

¹¹ An i tajol wocolʌch mi la cubin chaʼan mi lac pʌsben cʼuxbiya jiñi la quermañujob, ñumento mi jin jach mi laj qʼuel jiñi mach tac bʌ  weñic chuqui miʼ melob. Jiñʌch tsaʼ bʌ ujti ti ñaxam bʌ siglo. Jumpʼejl ejemplo, Evodia yicʼot Síntique mach wocolic tsiʼ yubiyob chaʼan miʼ chaʼleñob eʼtel yicʼot Pablo tiʼ subol «jini wen tʼan». Pero jiñi chaʼtiquil mach yomic i qʼuelob i bʌ i mach ñaʼtʌbilic chucoch. Jin chaʼan, Pablo tiʼ subeyob chaʼan ‹yom jumpʼejl i pusicʼalob ti lac Yum› (Fil. 4:2, 3).

12. ¿Chuqui yom mi lac mel chaʼan mi lac ñumen cʼuxbin jiñi la quermañujob?

¹² ¿Chuqui yom mi lac mel chaʼan mi lac ñumen cʼuxbin jiñi la quermañujob? Ñumen cʌñʌyob ti wen. Cheʼ bajcheʼ jiñi, mi caj i mejlel lac chʼʌmbeñob i sujm chucoch cheʼ yilalob bajcheʼ jiñi, i mi caj lac ñumen cʼuxbiñob. Cheʼ bʌ mach lajalic lac jabilel yicʼot baqui tsaʼ coliyonla mach yomic miʼ mʌctañonla chaʼan mi laj cʼuxbiñob. Laʼ laj cʼajtesan chaʼan anquese Jonatán ñumeñix ti 30 i jabilel bajcheʼ i chaʼan David, tsaʼ sujtiyob ti wem bʌ i yamigojob i bʌ. Ñaʼtancu yaʼ ti a congregación, ¿ixcu cheʼ muqʼuic a sujtesan ti a wamigo juntiquil añix bʌ i jabilel o ñumen xcolelto bʌ bajcheʼ jatet? Mi mucʼʌch a mel, mi caj a pʌs chaʼan mucʼʌch a «cʼuxbin [pejtelel] a wermanojob» (1 P. 2:17).

13. ¿Chucoch mach tiʼ pejtelelic jiñi la quermañujob mi caj i sujtelob ti wem bʌ la camigojob?

¹³ Pero cheʼ bʌ mi la cʌl chaʼan yom mi la cʼuxbin tiʼ pejtelel jiñi la quermañujob, ¿yom ba i yʌl chaʼan tiʼ pejtelelob mi caj i sujtelob ti wem bʌ la camigojob? Maʼañic. Come an hermanojob muʼ bʌ lac ñumen ñʌmʼan la quicʼotob. Jesús tsiʼ qʼuele tiʼ yamigojob pejtelel jiñi apóstolob, pero tsiʼ ñumen cʼuxbi Juan (Jn. 13:23; 15:15; 20:2). Pero mach yom i yʌl chaʼan Jesús ñumen ñuc tsiʼ qʼuele. Jumpʼejl ejemplo, cheʼ bʌ Juan yicʼot Santiago tsiʼ cʼajtiyob chaʼan miʼ yʌqʼuentelob ñuc bʌ i yeʼtel tiʼ Yumʌntel Dios, Jesús tsiʼ yʌlʌ: «Mach c wentajic chaʼan mic sub majqui mi caj i buchtʌl tic ñoj yicʼot tic tsʼej» (Mr. 10:35-40). Joñonla yom mi lac lajin Jesús i mach jin jach yom mi laj qʼuelob ti ñuc jiñi wem bʌ la camigojob (Stg. 2:3, 4). Cheʼ yajcʌbil jach majqui mi laj qʼuelob ti ñuc miʼ mejlel ti ujtel tʼox bʌ, i jiñi mach yomic miʼ wis ujtel yaʼ ti congregación (Jud. 17-19).

14. Cheʼ bajcheʼ miʼ yʌl Filipenses 2:3, ¿chuqui mi caj i coltan jiñi hermanojob chaʼan maʼañic miʼ chañʼesañob i bʌ?

 ¹⁴ Jiñi cʼuxbiya mi caj i coltan jiñi hermanojob chaʼan maʼañic miʼ chañʼesañob i bʌ. Laʼ laj cʼajtesan chaʼan Jonatán maʼañic tsiʼ ñopo i contrajin David chaʼan jin miʼ yochel ti rey. Cheʼ yomonla bajcheʼ Jonatán i mach laj qʼuelob bajcheʼ laj contrajob jiñi la quermañujob tiʼ caj chuqui yujilob melol. Laʼ lac mel tsaʼ bʌ i yʌlʌ Pablo: «Yom pecʼ mi laʼ mel laʼ bʌ. Yom ñumen ñuc mi laʼ qʼuel laʼ piʼʌlob cheʼ bajcheʼ mi laʼ bajñel qʼuel laʼ bʌ» (pejcan Filipenses 2:3). Yom mi laj cʼajtesan chaʼan pejtelel jiñi la quermañujob añob i cʼʌjñibal yaʼ ti congregación. Mi añʌch lac pecʼlel, mi caj laj qʼuel wem bʌ i melbal jiñi la quermañujob i mi caj i coltañonla jiñi i yejemplojob (1 Co. 12:21-25).

15. ¿Chuqui maʼ cʌn chaʼan jiñi tsaʼ bʌ i ñusa Tanya yicʼot i familia?

¹⁵ Cheʼ mi lac ñusan tsʌts bʌ wocol tac, Jehová miʼ ñuqʼuesan lac pusicʼal cheʼ bʌ miʼ cʼʌn jiñi hermanojob chaʼan miʼ pʌsbeñoñobla cʼuxbiya yicʼot miʼ coltañoñobla. Laʼ laj qʼuel chuqui tsiʼ chaʼle jumpʼejl familia cheʼ bʌ tsajñi ti jiñi colem tempa bʌ internacional bʌ «Jiñi cʼuxbiya maʼañic miʼ jilel», tsaʼ bʌ ujti ti Estados Unidos ti 2019. Tanya, am bʌ uxtiquil i yalobil, miʼ yʌl chaʼan cheʼ bʌ majlelix mucʼob ti jiñi hotel cheʼ ti sábado, juncojt carro tsaʼ ochiyob tiʼ bijlel i tsiʼ jatsʼʌyob i bʌ yicʼot. Tanya miʼ yʌl: «Maʼañic majqui tsaʼ lojwi, tsaʼ loqʼuiyon lojon ti jiñi carro i waʼal tsaʼ cʌyleyon lon ti carretera, i cheʼ jaʼel maʼañic tsaʼ c ñaʼta lojon chuqui yom mi lon c mel. Cheʼ jiñi, tsaʼ c taja lojon j qʼuel chaʼan ti junwejlel jiñi carretera an majqui woliʼ pʌyon lojon chaʼan mi lon cochel tiʼ carro i maʼañic chuqui mi lon c chaʼlen. Jiñʌch juntiquil hermano woli bʌ sujtel ti jiñi colem tempa bʌ. I cheʼ jaʼel, tsiʼ cotchocoyob i carro joʼtiquil hermanojob chʼoyoloʼ bʌ ti Suecia tsajñiyoʼ bʌ  ti jiñi colem tempa bʌ. Jiñi hermanajob tsiʼ meqʼueyob jiñi quixicʼal yicʼot joñon. Jiñʌch i cʼʌjñibal bʌ lon c chaʼan ti jimbʌ ora. Anquese tsaʼ c subeyob lojon chaʼan weñʌch añon lojon, tsaʼ cʌyleyob yicʼoton lojon. Maʼañic tsiʼ bajñel cʌyʌyon lojon mi jiñicto cheʼ bʌ tsaʼ cʼoti jiñi ambulancia. Tsiʼ qʼueleyob mi luʼ añʌch i cʼʌjñibal bʌ lon c chaʼan. Cheʼ bʌ tsaʼ lon c ñusa ili wocol, tsaʼ lon c wen qʼuelbe i cʼuxbiya Jehová. Cheʼ bʌ tsaʼ c ñusa lojon jiñi wocol, tsiʼ coltayon lojon c ñumen cʼuxbin jiñi hermanojob. Cheʼ jaʼel, tsiʼ coltayon lojon chaʼan mi lon c ñumen qʼuel ti ñuc Jehová yicʼot chaʼan mi lon c ñumen cʼuxbin». ¿Cʼajal ba a chaʼan cheʼ bʌ juntiquil hermano tsiʼ wen pʌsbet cʼuxbiya cheʼ bʌ i cʼʌjñibal a chaʼan?

16. ¿Chucoch yomʌch mi lac pʌsben lac bʌ cʼuxbiya?

¹⁶ ¿Bajcheʼ miʼ coltañonla cheʼ bʌ mi lac pʌsben lac bʌ cʼuxbiya? Mi caj lac ñuqʼuesʌbeñob i pusicʼal jiñi la quermañujob cheʼ bʌ miʼ ñusañob wocol yicʼot mi caj la cʌcʼ laj coltaya chaʼan chʌn temel miʼ yajñel i tejclum Dios. Cheʼ jaʼel, mi caj lac pʌs chaʼan i sujm bʌ xcʌntʼañonla i chaʼan Jesús i jiñi mi caj i coltan cabʌl quixtañujob chaʼan yomob i melben i yeʼtel Jehová. Pero jiñi ñumen ñuc bʌ i cʼʌjñibal jiñʌch cheʼ mi caj la cʌqʼuen i ñuclel Jehová, jiñi «lac Tat [...] muʼ bʌ i pʼuntañonla, muʼ bʌ i ñuqʼuesan lac pusicʼal tiʼ pejtelel wocol» (2 Co. 1:3). Jin chaʼan ti lac pejtelel laʼ lac chʌn chaʼlen wersa lac pʌs cʼuxbiya.