1. Cheʼ bajcheʼ jiñi rey David, ¿chuqui tajol miʼ cʼajtibeñob i bʌ jiñi xñoptʼañob?

TI LAC pejtelel la com chumtʌl ti tijicña yicʼot ti ñʌchʼʌl. Pero ti lac pejtelel mi lac ñusan tsʌts tac bʌ wocol. Tajol an xñoptʼañob cheʼ bʌ miʼ yubiñob i bʌ bajcheʼ jiñi rey David cheʼ bʌ tiʼ sube Jehová iliyi: «¿Jaypʼejl to qʼuin mi caj c tsic c pusicʼal?» (Sal. 13:2).

2. ¿Chuqui mi caj laj qʼuel ti ili estudio?

² An i tajol ti lac pejtelel mi lac chaʼlen cʌlʌx pensar, pero añʌch chuqui tac miʼ mejlel lac mel. Ti ili estudio, mi caj lac tech laj qʼuel chuqui tac jiñi muʼ bʌ techbeñonla jiñi laj cʌlʌx pensar. Cheʼ jiñi, mi caj laj qʼuel 6 ticʼojel chaʼan chuqui yom mi lac mel cheʼ bʌ mi lac ñusan wocol tac.

3. a) ¿Chuqui ti wocol tac mi lac ñusan? b) ¿Am ba chuqui miʼ mejlel lac mel chaʼan maʼañic mi lac ñusan jiñi wocol tac?

³ Añʌch chuqui tac miʼ mejlel laj cʌlʌx pensalin i maʼañic chuqui miʼ mejlel lac mel chaʼan maʼañic mi lac ñusan jiñi wocol. Jumpʼejl ejemplo, maʼañic chuqui miʼ mejlel lac mel chaʼan ti jujumpʼejl jab maʼañic miʼ letsel i tojol jiñi bʌlñʌcʼʌl tac, jiñi lac pislel yicʼot baqui chumulonla. Cheʼ jaʼel, maʼañic chuqui miʼ mejlel lac mel chaʼan jiñi lac piʼʌlob ti eʼtel (troñel) o ti clase maʼañic miʼ cʼotel i subeñoñobla lac mel tsʼiʼlel o mach bʌ weñic. I maʼañic chuqui miʼ mejlel lac mel chaʼan maʼañic miʼ melob jontolil jiñi wiñicob xʼixicob (quixtañujob) yaʼ baqui  chʼoyolonla. Mi lac ñusan ili wocol tac come chumulonla ti jumpʼejl pañimil (mulawil) baqui cabʌlob maʼañic miʼ jacʼob jiñi principio tac am bʌ ti Biblia. Satanás, i dios ili pañimil, yujil chaʼan an muʼ bʌ caj i yʌcʼob chaʼan jiñi cʌlʌx pensar miʼ mʌctañob chaʼan miʼ melbeñob i yeʼtel Jehová (Mt. 13:22; 1 Jn. 5:19). Jin chaʼan, ila ti pañimil an cabʌl wocol muʼ bʌ i yʌcʼ ti pensar jiñi quixtañujob.

4. ¿Chuqui tajol mi lac mel cheʼ bʌ mi lac wen ñusan wocol tac?

⁴ Cheʼ bʌ mi lac wen ñusan wocol tac, tajol mi laj cʌlʌx chaʼlen pensar. Jumpʼejl ejemplo, tajol mi lac pensalin chaʼan maʼañic miʼ mejlel lac mʌn i cʼʌjñibal bʌ lac chaʼan come mach wen letsic mi lac tojtʌl, o tajol mi laj cʼamʼan i maʼañic mi lac mejlel ti eʼtel, o mi lac sʌt la queʼtel. Cheʼ jaʼel, tajol mi lac pensalin chaʼan mach xucʼulic mi caj la cajñel cheʼ bʌ mi lac subentel lac ñusan ti pʼis i mandar Dios. I tajol mi lac pensalin chuqui mi caj lac mel cheʼ baʼ ora Satanás miʼ ñijcʌben i pusicʼal jiñi quixtañujob chaʼan miʼ contrajiñob i tejclum Dios. Tajol mi laj cʼajtiben lac bʌ: «¿Am ba i wocolel cheʼ bʌ mi lac pensalin pejtelel iliyi?».

5. ¿Chuqui yom i yʌl Jesús cheʼ bʌ tsiʼ yʌlʌ: «Mach mi laʼ mel laʼ pusicʼal»?

⁵ Jesús tiʼ sube jiñi xcʌntʼañob i chaʼan: «Mach mi laʼ mel laʼ pusicʼal» (Mt. 6:25). ¿Yom ba i yʌl ili tsaʼ bʌ i yʌlʌ Jesús chaʼan maʼañic chuqui yom mi lac tsʼitaʼ pensalin? Maʼañic. Come ti wajali, an i wiñicob Jehová tsaʼ bʌ i chaʼleyob cʌlʌx pensar, pero Jehová tsaʼʌch i bej qʼueleyob bajcheʼ i yamigojob (1 R. 19:4; Sal. 6:3). * Jesús tsiʼ yʌlʌ jiñi tʼan tac chaʼan miʼ ñuqʼuesan lac pusicʼal chaʼan maʼañic mi laj cʌlʌx chaʼlen pensar tiʼ caj jiñi wocol tac i mi laj cʌy lac melben i yeʼtel Dios. Jin chaʼan, ¿chuqui miʼ mejlel lac mel cheʼ bʌ mi laj cʌlʌx chaʼlen pensar? (Qʼuele jiñi recuadro: « ¿Bajcheʼ miʼ mejlel a mel?»).

6. Cheʼ bajcheʼ miʼ yʌl Filipenses 4:6, 7, ¿chuqui miʼ mejlel i coltañonla chaʼan maʼañic mi laj cʌlʌx chaʼlen pensar?

⁶ 1) Chʌn chaʼlen oración. Tijicña mi caj a wubin a bʌ mi mucʼʌch a wen melben oración Jehová cheʼ bʌ mach cujchix maʼ wubin jiñi a wocol tac (1 P. 5:7). Cheʼ jiñi, mi caj a taj jiñi i ‹ñʌchʼtʌlel a pusicʼal chʼoyol bʌ ti Dios [...] maʼanic bʌ i pʼisol› (pejcan Filipenses 4:6, 7). Jehová miʼ cʼʌn jiñi chʼujul bʌ i yespíritu chaʼan maʼañic mi laj cʌlʌx chaʼlen pensar (Gá. 5:22).

7. ¿Chuqui yom cʼajal lac chaʼan cheʼ bʌ mi lac mel oración?

⁷ Cheʼ bʌ maʼ melben oración Jehová, suben pejtelel chuqui an ti a pusicʼal. Suben baqui bʌ jiñi a wocol yicʼot bajcheʼ yubil maʼ wubin a bʌ. Mi añʌch bajcheʼ miʼ mejlel a tojʼesan jiñi a wocol, cʼajtiben Jehová jiñi a ñaʼtʌbal chaʼan bajcheʼ miʼ mejlel a mel yicʼot a pʼʌtʌlel chaʼan maʼ mel. Mi maʼañic bajcheʼ miʼ mejlel a tojʼesan jiñi a wocol, cʼajtiben Jehová chaʼan miʼ coltañet chaʼan maʼañic maʼ cʌlʌx pensalin jiñi a wocol. Mi mucʼʌch a jamʌ suben Jehová baqui bʌ jiñi a wocol, xucʼu xucʼul mi caj a qʼuel bajcheʼ tsiʼ jacʼbeyet a woración. Mi mach orajic miʼ jacʼ a woración, mach lujbʼaquet. Jehová yom chaʼan maʼ jamʌ suben jiñi a wocol tac, pero yom jaʼel chaʼan ti bele ora maʼ melben oración (Lc. 11:8-10).

8. ¿Chuqui yom mi lac taj ti tʼan ti jiñi la coración tac?

⁸ Cheʼ maʼ pejcan Jehová ti oración chaʼan maʼ suben bajcheʼ yubil maʼ wubin a bʌ, ñaʼtan pejtelel chuqui wem bʌ an a chaʼan anquese an a wocol tac, i aqʼuen wocolix i yʌlʌ Jehová. An i tajol wocol mi caj a wubin chaʼan  maʼ ñaʼtan bajcheʼ mi caj a suben Jehová jiñi am bʌ ti a pusicʼal. Yom maʼ cʼajtesan chaʼan Jehová mucʼʌch caj i jacʼbeñet a woración, anquese cojach maʼ suben: «¡Coltañon, a wocolic!» (2 Cr. 18:31; Ro. 8:26).

9. ¿Baqui miʼ mejlel lac taj laj coltʌntel?

⁹ 2) Sʌclʌben i coltaya Jehová, i mach a bajñel ñaʼtan chuqui mi caj a mel. Lʌcʼʌ cheʼ ti jabil 800, cheʼ bʌ maxto tilemic Cristo, jiñi tejclum Judá tsiʼ bʌcʼñayob chaʼan jiñi asiriojob miʼ cʼotel i contrajiñob, i cheʼ jiñi miʼ sujtelob tiʼ xyaj eʼtelob. Jin chaʼan, jiñi tejclum Judá tsiʼ cʼajtibe Egipto chaʼan miʼ coltañob (Is. 30:1, 2). Jehová tiʼ sube jiñi tejclum Judá chaʼan mach weñic chuqui mi caj i yujtel miʼ tsiʼ cʼajtibeyob i coltaya Egipto (Is. 30:7, 12, 13). Jehová tiʼ sube i tejclum baqui mi caj i tajob i coltʌntel: ‹Ñopo c tʼan. Cheʼ jini ñʌchʼʌl mi caj a wajñel. Mi caj a taj a pʼʌtʌlel› (Is. 30:15b).

10. Alʌ ejemplo tac chaʼan bajcheʼ miʼ mejlel lac pʌs chaʼan mucʼʌch lac ñop chaʼan Jehová mi caj i coltañonla.

¹⁰ Laʼ laj qʼuel ejemplo tac chaʼan bajcheʼ miʼ mejlel lac pʌs chaʼan mucʼʌch lac ñop chaʼan mucʼʌch caj i coltañonla Jehová. Laʼcu lac ñaʼtan chaʼan maʼ subentel jumpʼejl eʼtel baqui wen lets mi caj a tojtʌl, pero mi caj i chilbeñet cabʌl i yorajlel yicʼot chaʼan mach mejlix a wen melben i chaʼan tac bʌ Dios. O tajol yaʼ baqui muqʼuet ti eʼtel an juntiquil muʼ bʌ i subeñet o miʼ pʌsbeñet chaʼan miʼ mulañet, pero mach juntiquilic testigo chʼʌmbil bʌ i chaʼan jaʼ. O tajol juntiquil ti a familia miʼ subeñet chaʼan miʼ maʼañic maʼ cʌy a melben i yeʼtel Dios maʼañix mi caj i pejcañet. Mach cʼuñic ti ñusʌntel ili wocol tac, pero Jehová mucʼʌch i coltañonla (Mt. 6:33; 10:37; 1 Co. 7:39). Pero ¿mucʼʌch ba caj lac ñop chaʼan Jehová mi caj i coltañonla yicʼot mi caj lac jacʼ chuqui miʼ subeñonla?

11. ¿Chuqui tac ti ejemplo am bʌ ti Biblia miʼ mejlel lac pejcan chaʼan miʼ coltañonla cheʼ bʌ mi laj contrajintel?

¹¹ 3) Cʌñʌ tiʼ tojlel jiñi i wiñicob Jehová ti wajali. Yaʼ ti Biblia mi lac taj wem bʌ ejemplo tac yicʼot mach bʌ weñic, muʼ bʌ i pʌsbeñonla chaʼan ñuc i cʼʌjñibal cheʼ bʌ mi lac ñop chaʼan Jehová mi caj i coltañonla. Cheʼ bʌ maʼ cʼotel a pejcan yaʼ ti Biblia wem bʌ ejemplo tac, wen qʼuele chuqui tsiʼ colta jiñi i wiñicob Dios cheʼ bʌ tsaʼ contrajintiyob. Jumpʼejl ejemplo, jiñi apóstolob maʼañic tsiʼ bʌcʼñayob cheʼ bʌ jiñi judíojob añoʼ bʌ i yeʼtel tiʼ subeyob chaʼan yom miʼ cʌyob subtʼan. Jiñi apóstolob tsiʼ yʌlʌyob: «Wersa mic jacʼben lojon i mandar Dios anquese miʼ ñusʌntel i mandar winicob» (Hch. 5:29). Maʼañic tsaʼ cajiyob ti bʌqʼuen cheʼ bʌ tsaʼix jajtsʼiyob. ¿Chucoch? Come yujilob chaʼan Jehová yaʼan yicʼotob yicʼot chaʼan weñʌch miʼ qʼuejlelob ti Jehová. Jin chaʼan, tsiʼ chʌn chaʼleyob subtʼan (Hch. 5:40-42). Cheʼʌch tsaʼ ujti jaʼel tiʼ tojlel Esteban cheʼ bʌ tsʼitaʼ jax yom chaʼan miʼ tsʌnsʌntel, maʼañic tsiʼ chaʼle bʌqʼuen i jiñi yaʼ bʌ tempʌbilob «tsiʼ qʼuelbeyob i wut Esteban lajal bajcheʼ i wut ángel» (Hch. 6:12-15). ¿Chucoch? Come yujil chaʼan wen an tiʼ wut Jehová.

12. Cheʼ bajcheʼ miʼ yʌl 1 Pedro 3:14 yicʼot 4:14, ¿chucoch mucʼʌch mejlel la cubin lac tijicñʌyel cheʼ bʌ mi laj contrajintel?

¹² Jiñi apóstolob cabʌl chuqui tsiʼ yʌqʼueyob i ñaʼtan chaʼan Jehová yaʼʌch an yicʼotob come Jehová tsiʼ yʌqʼueyob i pʼʌtʌlel chaʼan miʼ melob milagro tac (Hch. 5:12-16; 6:8). Anquese ili ora maʼañix mi lac mel milagro tac, Jehová miʼ cʼʌn jiñi i Tʼan chaʼan miʼ subeñonla chaʼan wen miʼ qʼuelonla yicʼot miʼ yʌqʼueñonla chʼujul bʌ i yespíritu cheʼ bʌ mi lac melbentel mach bʌ weñic (pejcan 1 Pedro 3:14; 4:14). Jin chaʼan, mach yomic mi lac chʌcʌ pensarin chuqui mi caj lac mel cheʼ baʼ ora mi lac ticʼlʌntel, yom bʌ mi lac mel ili ora jiñʌch  cheʼ bʌ mi lac wen ñaʼtan chuqui miʼ mejlel lac mel chaʼan mi lac ñop chaʼan Jehová mucʼʌch mejlel i coltañonla. Yom mi laj cʼajtesan jiñi tʼan tac tsaʼ bʌ i yʌlʌ Jesús cheʼ bajcheʼ tsiʼ meleyob jiñi apóstolob: «Joñon mi caj cʌqʼueñetla tʼan muʼ bʌ caj laʼ sub yicʼot laʼ ñaʼtʌbal mach bʌ mejlic i contrajintel». Cheʼ jaʼel, Jesús tiʼ subeyonla: «Mi bej xucʼuletla cheʼ mi laʼ ñusan wocol mi quejel laʼ cotyʌntyel» (Lc. 21:12-18; 21:19, Jini wen bʌ tʼan). I laʼ laj cʼajtesan chaʼan mi tsaʼ chʌmi juntiquil xucʼul bʌ hermano, Jehová maʼañic miʼ ñajʌyel i chaʼan bajcheʼ yilal i mi caj i chaʼ cuxtesan.

13. ¿Bajcheʼ miʼ mejlel i coltañonla cheʼ bʌ mi lac pejcan yaʼ ti Biblia tiʼ tojlel jiñi maʼañic bʌ tsiʼ ñopoyob chaʼan Jehová mi caj i coltañob?

¹³ Cheʼ jaʼel, miʼ mejlel laj cʌn tiʼ tojlel jiñi mach bʌ añic tsiʼ ñopoyob chaʼan Jehová mi caj i coltañob. Cheʼ mi lac pejcan ili ejemplo tac mi caj coltañonla chaʼan maʼañic mi lac mel jiñi tsaʼ bʌ i meleyob. Jumpʼejl ejemplo, cheʼ bʌ tsiʼ teche yumʌntel jiñi rey Asá yaʼ ti Judá tsiʼ cʼajtibe i coltaya Jehová chaʼan miʼ mʌlben (jotben) cabʌl soldadojob, i Jehová tsaʼʌch i colta i mʌl jiñi guerra (2 Cr. 14:9-12). Pero ¿chuqui tsiʼ mele Asá cheʼ bʌ tsiʼ contraji jiñi rey Baasá i chaʼan Israel mach bʌ cabʌlic i soldadojob? Tsiʼ tojo jiñi siriojob chaʼan miʼ coltañob i maʼañic tsiʼ cʼajtibe i coltaya Jehová cheʼ bajcheʼ tsiʼ mele ti ñaxan (2 Cr. 16:1-3). I cheʼ bʌ tsiʼ taja tsʌts bʌ cʼamʌjel yicʼot cheʼ lʌcʼʌlix miʼ cajel ti chʌmel (sajtel), maʼañic tsiʼ cʼajtibe i coltaya Jehová (2 Cr. 16:12).

14. ¿Chuqui mi laj cʌn ti jiñi mach tac bʌ weñic tsiʼ mele Asá?

¹⁴ Ti ñaxan, Asá muqʼuixto i sʌclʌben i coltaya Jehová cheʼ bʌ an i wocol tac, pero ti wiʼil tsaʼ caji i mel chuqui tsiʼ bajñel ñaʼta. Asá tsiʼ qʼuele chaʼan weñʌch cheʼ miʼ cʼajtiben i coltaya jiñi siriojob chaʼan miʼ contrajiñob Israel. Pero mach weñic tsaʼ ujti. Jehová tsiʼ cʼʌñʌ juntiquil xʼaltʼan chaʼan miʼ suben Asá ili tʼan: «Tsaʼ bajñel colta a bʌ tiʼ tojlel jini rey ti Siria. Maʼanic tsaʼ cʼajti a coltʌntel ti lac Yum Dios. Jini chaʼan tsaʼix coli ti a cʼʌb i soldadojob jini rey ti Siria» (2 Cr. 16:7). Joñonla jaʼel yom mi lac wen cʌntan lac bʌ chaʼan maʼañic mi lac mel chuqui mi lac bajñel ñaʼtan, i tiʼ caj jiñi maʼañix mi lac sʌclʌben i coltaya Jehová yaʼ tiʼ Tʼan. An i tajol mi caj i cʼotel i yorajlel baqui orajach yom mi lac ñaʼtan chuqui mi caj lac mel. Pero weñʌch mi caj i loqʼuel muʼ bʌ lac mel mi mucʼʌch lac ñop chaʼan Jehová mi caj i coltañonla.

15. ¿Chuqui miʼ mejlel lac mel cheʼ bʌ woli lac pejcan jiñi Biblia?

¹⁵ 4) Cʌyʌ ti a jol texto tac. Cheʼ bʌ maʼ pejcan yaʼ ti Biblia muʼ bʌ i pʌsbeñet chaʼan cheʼ bʌ maʼ ñop Jehová miʼ yʌqʼueñet a pʼʌtʌlel, chaʼlen wersa a cʌy ti a jol jiñi texto tac. Tajol miʼ mejlel i coltañet cheʼ bʌ maʼ pejcan ti cʼam bʌ tʼan o maʼ tsʼijbun yicʼot maʼ chaʼ pejcan chaʼan maʼ chaʼ cʼajtesan. Jehová tiʼ sube Josué chaʼan miʼ pejcan jiñi libro i chaʼan bʌ Mandar yicʼot miʼ wen ñaʼtan muʼ bʌ i yʌl ti qʼuiñil yicʼot ti acʼʌlel chaʼan miʼ pʌs i ñaʼtʌbal ti chuqui miʼ mel. Iliyi tsiʼ colta chaʼan maʼañic miʼ chaʼlen bʌqʼuen cheʼ bʌ miʼ pʌy majlel jiñi i tejclum Dios yaʼ baqui tsaʼ wʌn subentiyob (Jos. 1:8,TNM; 1: 9). Yaʼ tiʼ Tʼan Dios, cabʌl mi lac taj muʼ bʌ mejlel i coltañonla ti jiñi wocol tac muʼ bʌ i yʌqʼueñonla bʌqʼuen o cʌlʌx pensar (Sal. 27:1-3; Pr. 3:25, 26).

16. ¿Bajcheʼ miʼ cʼʌn Jehová jiñi congregación chaʼan mi lac ñop chaʼan mucʼʌch caj i coltañonla?

¹⁶ 5) Ñusan qʼuin a wicʼot jiñi hermanojob. Jehová miʼ cʼʌn jiñi hermanojob chaʼan mi lac ñop chaʼan mucʼʌch caj i coltañonla. Jiñi cʌntesa tac muʼ bʌ i yʌjqʼuel yaʼ ti tempa bʌ, jiñi comentario tac yicʼot cheʼ bʌ mi lac chaʼlen  tʼan la quicʼot jiñi hermanojob miʼ coltañonla (He. 10:24, 25). Cheʼ jaʼel, miʼ mejlel i coltañonla cheʼ bʌ mi lac suben juntiquil la camigo yaʼ ti laj congregación bajcheʼ yubil mi la cubin lac bʌ. Cheʼ bʌ juntiquil la camigo miʼ subeñonla ‹wem bʌ tʼan› miʼ wen coltañonla chaʼan maʼañic mi laj cʌlʌx chaʼlen pensar (Pr. 12:25).

17. Cheʼ bajcheʼ miʼ yʌl Hebreos 6:19, ¿bajcheʼ miʼ mejlel i coltañonla jiñi pijtaya chaʼan i Yumʌntel Dios anquese an wocol tac?

¹⁷ 6) Chʌn cʼajtesan jiñi a pijtaya. Jiñi pijtaya chaʼan i Yumʌntel Dios «jiñʌch muʼ bʌ i tsʌts xucʼchocoñonla» anquese an lac wocol tac yicʼot laj cʌlʌx pensar (pejcan Hebreos 6:19). Wen ñaʼtan chaʼan jiñi mach bʌ weñic pensar mi caj i lajmel ti talto bʌ qʼuin cheʼ bajcheʼ wʌn albil i chaʼan Jehová (Is. 65:17). Ñaʼtan chaʼan ti jiñi tsijiʼ bʌ pañimil, miʼ cajel ñʌchʼtʌlel yicʼot maʼañix miʼ cajel jiñi mach bʌ weñic (Mi. 4:4). Yambʌ muʼ bʌ i coltañet chaʼan maʼañic miʼ ñajʌyel a chaʼan jiñi a pijtaya jiñʌch cheʼ bʌ maʼ suben yambʌlob. Jin chaʼan, chaʼlen wersa chaʼan maʼ chaʼlen subtʼan yicʼot chaʼan maʼ sutqʼuin ti xcʌntʼan yambʌlob. Mi mucʼʌch a mel, mi caj a ‹taj pejtel woli bʌ a pijtan› (He. 6:11).

18. ¿Chuqui mi caj lac ñusan ti talto bʌ qʼuin, i chuqui mi caj i coltañonla lac lʌtʼ?

¹⁸ Cheʼ bʌ miʼ ñumen lʌcʼtiyel i jilibal ili pañimil, ñumento mi caj lac ñusan wocol yicʼot mi caj lac taj cʌlʌx pensar. Jiñi texto chaʼan ili jabil 2021 miʼ cʼajtesʌbeñonla chaʼan jiñi muʼ bʌ i coltañonla chaʼan mi lac lʌtʼ jiñi wocol tac jiñʌch cheʼ mi lac ñop i coltaya Jehová i mach ti lac bajñel pʼʌtʼʌlelic. Ti ili jabil, laʼ lac pʌs chaʼan mucʼʌch lac ñop ili tʼan muʼ bʌ i subeñonla Jehová: ‹Ñopo c tʼan. Cheʼ jini ñʌchʼʌl mi caj a wajñel. Mi caj a taj a pʼʌtʌlel› (Is. 30:15).