1, 2. a) ¿Baqui ora mi lac ñumen cʼajtesan juntiquil chʌmen bʌ lac chaʼan? b) ¿Chuqui tsiʼ waʼchoco Jesús cheʼ bʌ jumpʼejl jax acʼʌlel yom chaʼan miʼ chʌmel?

 CHEʼ bʌ an majqui miʼ chʌmel (sajtel) lac chaʼan, mi lac chʌn cʼajtesan anquese miʼ ñumel cabʌl jab. Muʼto lac ñumen cʼajtesan jajayajl miʼ tsʼʌctiyel i jabilel bajcheʼ tsaʼ chʌmi.

² Ti jujumpʼejl jab, yonlelonla tiʼ petol Pañimil mi lac tempan lac bʌ chaʼan mi laj cʼajtesan i chʌmel juntiquil wen cʼuxbibil bʌ: Jesucristo (1 Ped. 1:8). Mi lac mel (chaʼlen) iliyi chaʼan mi laj cʼajtesan jiñi tsaʼ bʌ i yʌcʼʌ i cuxtʌlel chaʼan miʼ coltañonla loqʼuel ti mulil yicʼot ti jiñi chʌmel (Mat. 20:28). Jesús yom chaʼan jiñi xcʌntʼañob i chaʼan miʼ cʼajtesañob jiñi i chʌmel. Cheʼ bʌ jumpʼejl jax acʼʌlel yom chaʼan miʼ chʌmel, tsiʼ waʼchoco jumpʼejl ñuc bʌ cena i tsiʼ yʌcʼʌ ili mandar: «Chʌn melela iliyi chaʼan mi laʼ cʼajtesañon» (Luc. 22:19). *

3. ¿Chuqui mi caj laj qʼuel ti ili estudio?

³ Yonlel lac piʼʌlob miʼ yajñelob tiʼ Cʼajtesʌntel i chʌmel Jesús. Pero mach cabʌlobic woli (choncol) bʌ i pijtañob chumtʌl ti panchan, jiñi yambʌlob woli (yʌquel) i pijtañob chumtʌl ti Lum. Ti ili estudio, mi caj laj qʼuel chucoch jiñi samoʼ bʌ ti panchan yicʼot jiñi muʼ bʌ caj i chumtʌlob ti Lum miʼ mulañob majlel ti Conmemoración. Mi caj laj qʼuel jaʼel chucoch mi lac taj lac wenlel cheʼ bʌ mucʼʌch la cajñel. Laʼ lac tech laj qʼuel chucoch miʼ yajñelob jiñi muʼ bʌ caj i majlelob ti panchan.

4. ¿Chucoch jiñi yajcʌbiloʼ bʌ miʼ cʼuxob jiñi pan yicʼot miʼ japob jiñi vino yaʼ ti Conmemoración?

⁴ Junchajp i sujmlel chucoch jiñi samoʼ bʌ ti panchan miʼ mulañob majlel ti Conmemoración chaʼañʌch miʼ cʼuxob jiñi  pan yicʼot miʼ japob jiñi vino. ¿Chucoch mucʼʌch i mejlel i melob iliyi? Chaʼan mi lac ñaʼtan, laʼ laj cʼajtesan chuqui tsiʼ mele Jesús ti jiñi cojix bʌ acʼʌlel wʌʼan ti Lum. Cheʼ bʌ tsaʼix i mele jiñi Pascua, Jesús tsiʼ waʼchoco jiñi cʌmbil bʌ bajcheʼ i Cena lac Yum. Tsiʼ ñusʌbe jiñi pan yicʼot vino jiñi 11 i yapóstolob i tiʼ subeyob chaʼan miʼ cʼuxob yicʼot miʼ japob. Tiʼ subeyob chaʼan bʌ chaʼpʼejl trato: Jiñi tsijib trato yicʼot jiñi trato chaʼan bʌ Yumʌntel (Luc. 22:19, 20, 28-30). * Ili trato tac tsiʼ yʌcʼʌ chaʼan jiñi apóstolob yicʼot yambʌ xñoptʼañob miʼ sujtelob ti rey yicʼot ti sacerdote yaʼ ti panchan (Apoc. 5:10; 14:1). Jiñi i colobal jiñi yajcʌbiloʼ bʌ * ochemob ti ili chaʼpʼejl trato, jin chaʼan jin jach muʼ bʌ i mejlel i cʼuxob jiñi pan yicʼot i japob jiñi vino.

5. ¿Chuqui yujilob jiñi yajcʌbiloʼ bʌ chaʼan jiñi pijtaya tsaʼ bʌ aqʼuentiyob?

⁵ Yambʌ i sujmlel chucoch jiñi yajcʌbiloʼ bʌ miʼ mulañob majlel ti Conmemoración chaʼañʌch miʼ wen ñaʼtañob ti jiñi i pijtaya. Jehová tsiʼ yʌqʼueyob utsʼatax bʌ i pijtaya: Chaʼan miʼ chumtʌlob ti panchan i maʼañic baʼ ora miʼ chʌmelob, miʼ comol chaʼleñob eʼtel (troñel) yicʼotob Jesús i jiñi yambʌlob ochemoʼ bʌ ti jiñi 144 mil, i jiñi ñumen ñuc bʌ i cʼʌjñibal jiñʌch cheʼ miʼ yajñelob tiʼ tʼejl Jehová (1 Cor. 15:51-53; 1 Juan 3:2). Jiñi yajcʌbiloʼ bʌ yujilob chaʼan tsaʼ pʌjyiyob chaʼan miʼ tajob ili majtañʌl tac. Pero yom xucʼul miʼ yajñelob cʼʌlʌl miʼ chʌmelob chaʼan miʼ mejlelob ti ochel yaʼ ti panchan (2 Tim. 4:7, 8). Wen tijicña miʼ yubiñob cheʼ miʼ ñaʼtañob jiñi i pijtaya (Tito 2:13). ¿I chuqui miʼ mejlel la cʌl tiʼ tojlel jiñi yambʌ tʌñʌmeʼ tac? (Juan 10:16). ¿Chucoch miʼ yajñelob ti Conmemoración? Laʼ laj qʼuel.

6. ¿Chucoch miʼ yajñelob ti Conmemoración ti jujumpʼejl jab jiñi yambʌ tʌñʌmeʼ tac?

⁶ Junchajp i sujmlel chucoch miʼ yajñelob ti Conmemoración jiñi yambʌ tʌñʌmeʼ tac chaʼañʌch miʼ qʼuelob, mach chaʼañic miʼ cʼuxob jiñi pan yicʼot miʼ japob jiñi vino. Ti 1938 jiñʌch cheʼ bʌ cojaxto tsaʼ pʌjyiyob chaʼan miʼ mejlel i tempañob i bʌ jaʼel jiñi muʼ bʌ caj i chumtʌlob ti Lum. Jiñi revista La Torre del Vigía chaʼan abril 1938 tsiʼ yʌlʌ chaʼan «i tojelʌch yicʼot weñʌch» cheʼ jiñi ochemoʼ bʌ ti jiñi yambʌ tʌñʌmeʼ tac «yaʼañob ti jiñi tempa bʌ i miʼ qʼuelob chuqui miʼ mejlel». I tsiʼ bej alʌ: «Yom tijicñayob jaʼel, yicʼot i yorajlelʌch». Cheʼ bajcheʼ jiñi pʌybiloʼ bʌ ti jumpʼejl ñujpuñel tijicña miʼ yubiñob cheʼ miʼ majlelob chaʼan miʼ qʼuelob jiñi ñujpuñel, jiñi yambʌ tʌñʌmeʼ tac tijicña miʼ yubiñob cheʼ miʼ majlelob ti Conmemoración chaʼan miʼ qʼuelob muʼ bʌ i mejlel.

7. ¿Chucoch yomob i ñʌchʼtan jiñi discurso chaʼan Conmemoración jiñi yambʌ tʌñʌmeʼ tac?

⁷ Jiñi yambʌ tʌñʌmeʼ tac jaʼel miʼ wen ñaʼtañob ti jiñi i pijtaya. Yomob i ñʌchʼtan jiñi discurso chaʼan Conmemoración come lʌcʼʌ tiʼ pejtelel jiñi discurso miʼ taj ti tʼan muʼ bʌ caj i mel Cristo yicʼot jiñi 144 mil cheʼ bʌ miʼ chaʼleñob yumʌntel tiʼ tojlel jiñi wiñicob xʼixicob (quixtañujob) xucʼuloʼ bʌ ti jiñi mil jab talto bʌ. Tiʼ coltaya Jesucristo, jiñi Rey, ili yumʌlob miʼ cajelob ti coltaya chaʼan miʼ sujtel ti jumpʼejl Paraíso ili Lum yicʼot chaʼan jiñi lac piʼʌlob miʼ sujtelob ti toj. Jiñi yonlel muʼ bʌ i qʼuelob jiñi Conmemoración wen tijicña miʼ yubiñob cheʼ miʼ ñaʼtañob jiñi qʼuin cheʼ bʌ miʼ tsʼʌctiyel jiñi profecía tac bajcheʼ Isaías  35:5, 6; 65:21-23 yicʼot Apocalipsis 21:3, 4. Cheʼ bʌ miʼ ñaʼtañob chaʼan yaʼix añob yaʼ ti tsijiʼ bʌ Pañimil yicʼotob jiñi muʼ bʌ i cʼuxbiñob, miʼ pʼʌtʼañob jiñi i pijtaya i yomob i ñumen chaʼleñob wersa chaʼan miʼ bej melbeñob i yeʼtel Jehová (Mat. 24:13; Gál. 6:9).

8. ¿Baqui bʌ yambʌ i sujmlel cheʼ jiñi yambʌ tʌñʌmeʼ tac miʼ yajñelob ti Conmemoración?

⁸ Jiñi yambʌ tʌñʌmeʼ tac miʼ yajñelob ti Conmemoración jaʼel chaʼan miʼ pʌsob i cʼuxbiya yicʼot i coltaya tiʼ tojlel jiñi yajcʌbiloʼ bʌ chaʼan miʼ majlelob ti panchan. Jiñi i Tʼan Dios tsiʼ wʌn alʌ chaʼan jiñi muʼ bʌ caj i majlelob ti panchan yicʼot muʼ bʌ caj i chumtʌlob ti Lum temel mi caj i yajñelob. Laʼ laj qʼuel profecía tac muʼ bʌ i pʌs jiñi.

9. Cheʼ bajcheʼ miʼ yʌl jiñi profecía am bʌ ti Zacarías 8:23 (TNM), ¿bajcheʼ yubil miʼ yubiñob jiñi yambʌ tʌñʌmeʼ tac tiʼ tojlel jiñi yajcʌbiloʼ bʌ?

⁹ (Pejcan Zacarías 8:23, TNM).  * Yicʼot jumpʼejl lajiya, ili profecía miʼ tsictesan muʼ bʌ i yubiñob jiñi yambʌ tʌñʌmeʼ tac tiʼ tojlel jiñi yajcʌbiloʼ bʌ. Jiñi tʼan «judío bʌ» yicʼot «quicʼotetla» woli jach i taj ti tʼan junmojt lac piʼʌlob: Jiñi i colobal jiñi yajcʌbiloʼ bʌ (Rom. 2:28, 29). Jiñi «10 wiñicob yujiloʼ bʌ tiʼ pejtelel i tʼan jiñi tejclum tac» jiñobʌch jiñi yambʌ tʌñʌmeʼ tac. Tsʌts miʼ chucob i bʌ tiʼ tojlelob jiñi yajcʌbiloʼ bʌ, ili yom i yʌl chaʼan xucʼulob tiʼ tojlel, i miʼ tem chʼujutesañob Jehová. Jin chaʼan, tiʼ yorajlel jiñi Conmemoración, jiñi yambʌ tʌñʌmeʼ tac miʼ yajñelob jaʼel chaʼan miʼ pʌsob chaʼan temelob yicʼotob jiñi yajcʌbiloʼ bʌ.

10. ¿Chuqui an i mele Jehová chaʼan miʼ tsʼʌctiyel jiñi profecía am bʌ ti Ezequiel 37:15-19, 24, 25?

¹⁰ (Pejcan Ezequiel 37:15-19, 24, 25). Jehová tiʼ tsʼʌctesa ili profecía cheʼ bʌ tsiʼ yʌcʼʌ chaʼan jiñi yajcʌbiloʼ bʌ yicʼot jiñi yambʌ tʌñʌmeʼ tac miʼ tem chaʼleñob eʼtel. Jiñi profecía miʼ taj ti tʼan chaʼtsʼijt teʼ. Jiñi añoʼ bʌ i pijtaya chaʼan miʼ majlelob ti panchan lajalob bajcheʼ jiñi teʼ chaʼan «Judá» (jiñi tribu baqui miʼ yajcʌntelob jiñi reyob ti Israel). I jiñi woli bʌ i pijtañob chumtʌl ila ti Lum lajalob bajcheʼ jiñi teʼ chaʼan bʌ Israel [Efraín]. * Jehová mi caj i sujtesan ti juntsʼijt jach bʌ teʼ. Ili yom i yʌl chaʼan temel miʼ cajelob ti eʼtel yicʼot Cristo Jesús, jiñi i Reyob. Ti jujumpʼejl jab, jiñi yajcʌbiloʼ bʌ yicʼot jiñi yambʌ tʌñʌmeʼob miʼ yajñelob ti Conmemoración, pero mach cheʼic bajcheʼ chaʼmojt tʼoxbiloʼ bʌ, cheʼʌch bajcheʼ «junmojt jach bʌ tiñʌmeʼ juntiquil jach bʌ xcʌnta tiñʌmeʼ i chaʼañob» (Juan 10:16).

11. ¿Bajcheʼ miʼ coltañob i yermañujob Cristo jiñi yambʌ tʌñʌmeʼ tac muʼ bʌ i tajtʌl ti tʼan ti Mateo 25:31-36, 40?

¹¹ (Pejcan Mateo 25:31-36, 40). Jiñi tʌñʌmeʼ tac muʼ bʌ i yʌjlel ti ili parábola jiñobʌch jiñi toj bʌ lac piʼʌlob chumuloʼ bʌ ili ora yicʼot añoʼ bʌ i pijtaya chaʼan miʼ chumtʌlob ila ti Lum, yom i yʌl jiñi yambʌ tʌñʌmeʼ tac. Yicʼotob i xucʼtʌlel miʼ coltañob jiñi i yermañujob Cristo, ñumento cheʼ miʼ chaʼleyob coltaya chaʼan miʼ tsʼʌctesañob jiñi ñumen ñuc bʌ eʼtel: Jiñi subtʼan yicʼot cʌntesa (Mat. 24:14; 28:19, 20).

12, 13. ¿Bajcheʼ yambʌ miʼ coltañob i yermañujob Cristo jiñi yambʌ tʌñʌmeʼ tac?

¹² Ti jujumpʼejl jab, cheʼ bʌ anto yom chaʼpʼej uxpʼejl semana chaʼan jiñi Conmemoración, jiñi yambʌ tʌñʌmeʼob miʼ pʌsob chaʼan miʼ coltañob jiñi i yermañujob Cristo. ¿Bajcheʼ? Jiñʌch cheʼ miʼ pʌyob bajcheʼ cʼamel lac piʼʌlob ti ili tempa bʌ (qʼuele jiñi recuadro « ¿Woli ba  a chajpan a bʌ chaʼan jiñi i yorajlel Conmemoración?»). Tiʼ petol Pañimil miʼ chajpañob i bʌ chaʼan miʼ melob jiñi Conmemoración anquese yaʼ ti congregación maʼañic juntiquil muʼ bʌ caj i majlel ti panchan. Tijicña miʼ yubiñob cheʼ miʼ mejlel i coltañob jiñi i yermañujob Cristo. Yujilob chaʼan tiʼ tojlel Jesús, pejtelel muʼ bʌ melob tiʼ tojlel jiñi yajcʌbiloʼ bʌ lajal bajcheʼ woliʼ melbentel Jesús jaʼel (Mat. 25:37-40).

¹³ ¿Chucoch yom mi lac majlel ti Conmemoración ti lac pejtelel, mach yʌlʌyic baqui bʌ lac pijtaya?

14. ¿Bajcheʼ an i pʌsʌ Jehová yicʼot Jesús jiñi ñuc bʌ i cʼuxbiyajob ti lac tojlel?

¹⁴ Come mi laj qʼuel ti ñuc i cʼuxbiya Jehová yicʼot Jesús. Cabʌl bajcheʼ an i pʌsbeyonla i cʼuxbiya Jehová. Pero jiñi ñumen ñuc bʌ jiñʌch cheʼ tsiʼ choco tilel i Yalobil chaʼan miʼ ñusan wocol yicʼot miʼ chʌmel ti laj caj (Juan 3:16). Jesús tsiʼ pʌsbeyonla i cʼuxbiya jaʼel cheʼ bʌ tsaʼʌch i yʌcʼʌ i bʌ ti chʌmel (Juan 15:13). I sujmʌch chaʼan maʼañic baqui ora mi caj i mejlel lac toj pejtelel am bʌ i meleyob chaʼañob i cʼuxbiya, pero mucʼʌch i mejlel lac pʌs ti lac melbal (chaʼlibal) chaʼan mucʼʌch laj qʼuel ti ñuc (Col. 3:15). Cheʼ bʌ mi la cajñel ti Conmemoración, woli laj qʼuel ti ñuc i cʼuxbiyajob i mi lac pʌsbeñob laj cʼuxbiya jaʼel.

15. ¿Chucoch jiñi yajcʌbiloʼ bʌ yicʼot jiñi yambʌ tʌñʌmeʼ tac miʼ qʼuelob ti ñuc jiñi i tojol laj coltʌntel?

¹⁵ Come mi laj qʼuel ti ñuc jiñi i tojol laj coltʌntel (Mat. 20:28). Jiñi yajcʌbiloʼ bʌ miʼ qʼuelob ti ñuc jiñi i tojol laj coltʌntel come jiñʌch tsaʼ bʌ i yʌqʼueyob i pijtaya. Wocolix i yʌlʌ chaʼan jiñi i ñopoñelob chaʼan Cristo tsiʼ yʌcʼʌ i cuxtʌlel, Jehová tsiʼ qʼueleyob ti toj i tsiʼ yotsayob bajcheʼ i yalobilob (Rom. 5:1; 8:15-17, 23). I Jiñi yambʌ tʌñʌmeʼob miʼ qʼuelob ti ñuc jiñi i tojol coltʌntel come wocolix i yʌlʌ Cristo chaʼan tsiʼ yʌcʼʌ i bʌ ti chʌmel, Dios miʼ mejlel i qʼuelob ti utsʼat, miʼ mejlel i melbeñob i yeʼtel i cuxul miʼ mejlelob ti loqʼuel ti jiñi «cabʌl wocol» (Apoc. 7:13-15). Cheʼ bʌ ili chaʼmojtob mucʼʌch i yajñelob ti Conmemoración ti jujumpʼejl jab, miʼ pʌsob chaʼan mucʼʌch i qʼuelob ti ñuc jiñi i tojol laj coltʌntel.

16. ¿Baqui bʌ yambʌ i sujmlel cheʼ mi lac majlel ti Conmemoración?

¹⁶ Come la com lac jacʼben i tʼan Jesús. Mach yʌlʌyic baqui bʌ jiñi lac pijtaya, la com lac jacʼ jiñi mandar tsaʼ bʌ i yʌcʼʌ Jesús ti jiñi acʼʌlel cheʼ bʌ tsiʼ waʼchoco jiñi i Cʼajtesʌntel i chʌmel: «Chʌn melela iliyi chaʼan mi laʼ cʼajtesañon» (1 Cor. 11:23, 24).

17. ¿Chucoch mi lac ñumen lʌcʼtesan lac bʌ tiʼ tojlel Jehová cheʼ bʌ mi la cajñel ti Conmemoración?

¹⁷ Come miʼ ñumen lʌcʼtesañonla ti Jehová (Sant. 4:8). Cheʼ bajcheʼ tsaʼix laj qʼuele, cheʼ mi la cajñel ti Conmemoración miʼ mejlel lac wen ñaʼtan jiñi lac pijtaya tsaʼ bʌ i yʌqʼueyonla Jehová yicʼot jiñi ñuc bʌ cʼuxbiya am bʌ i pʌsbeyonla (Jer. 29:11; 1 Juan 4:8-10). Mi lac ñop jiñi pijtaya yicʼot chaʼan maʼañic baʼ ora mi caj i jilel jiñi i cʼuxbiya. Cheʼ bʌ mi lac wen ñaʼtan iliyi, mi lac ñumen cʼuxbin Jehová i ñumen lʌcʼʌl añonla tiʼ tojlel mi la cubin (Rom. 8:38, 39).

18. ¿Bajcheʼ miʼ coltañonla cheʼ bʌ mi lac wen ñaʼtan i yejemplo Jesús?

¹⁸ Come miʼ ñijcañonla lac lajin Jesús (1 Ped. 2:21). Cheʼ bʌ anto yom chaʼpʼej uxpʼejl qʼuin chaʼan jiñi Conmemoración, mi lac pejcan jiñi relato tac am bʌ ti Biblia chaʼan bʌ jiñi cojix bʌ semana wʌʼan Jesús, chaʼan bajcheʼ tsaʼ chʌmi yicʼot tsaʼ chaʼ chʼojyi. Cheʼ jiñi, jiñi  discurso tiʼ yorajlel jiñi Conmemoración miʼ cʼajtesʌbeñonla jiñi i cʼuxbiya Jesús ti lac tojlel (Efes. 5:2; 1 Juan 3:16). Cheʼ mi lac pejcan pejtelel tsaʼ bʌ i mele Jesús i mi lac ñaʼtan tiʼ tojlel miʼ ñijcañonla chaʼan mi lac «bej chumtʌl cheʼ bajcheʼ tsiʼ mele» (1 Juan 2:6).

19. ¿Chuqui yom mi lac mel chaʼan mi lac chʌn ajñel tiʼ cʼuxbiya Dios?

¹⁹ Come miʼ coltañonla chaʼan mi lac chʌn ajñel tiʼ cʼuxbiya Dios (Jud. 20, 21). Cheʼ bʌ mi lac chaʼlen wersa chaʼan mi lac jacʼben i tʼan, chaʼan mi lac sʌqʼuesʌben i cʼabaʼ yicʼot chaʼan mi lac tijicñesʌben i pusicʼal, mi lac chʌn ajñel tiʼ cʼuxbiya (Pr. 27:11; Mat. 6:9; 1 Juan 5:3). Cheʼ bʌ mi la cajñel mi lac ñumen taj lac pʼʌtʌlel chaʼan ti jujumpʼejl qʼuin mi lac suben Jehová ti lac melbal: «¡Com chʌn ajñel bajcheʼ a wamigo tiʼ pejtelel ora!».

20. ¿Chucoch yom mi lac majlel ti Conmemoración?

²⁰ Mach yʌlʌyic mi an lac pijtaya chaʼan mi lac chumtʌl ti panchan o ila ti Lum, cabʌl i sujmlel chucoch yom mi lac majlel ti Conmemoración ti jujumpʼejl jab. Jajayajl mi lac tempan lac bʌ, mi laj cʼajtesan i chʌmel juntiquil muʼ bʌ laj cʼuxbin: Jesucristo. I jiñi ñumen ñuc bʌ i cʼʌjñibal, mi laj cʼajtesan jiñi ñumen ñuc bʌ cʼuxbiya tsaʼ bʌ pʌsle: Cheʼ Jehová tsiʼ yʌcʼʌ jiñi i Yalobil chaʼan miʼ coltañonla. Ti ili jabil, jiñi Conmemoración miʼ cajel cheʼ ti viernes 15 chaʼan abril, 2022. Mi laj cʼuxbin Jehová yicʼot Jesús. Jin chaʼan, cheʼ tiʼ yorajlel i cʼajtesʌntel i chʌmel Jesús, maʼañic chuqui yambʌ ñumen ñuc bʌ i cʼʌjñibal yom bʌ miʼ mʌctañonla chaʼan mi lac majlel ti jiñi Conmemoración.