1. ¿Chuqui ti wocol woliʼ ñusan David?

 DAVID woli (choncol) i putsʼel come Saúl, jiñi pʼʌtʌl bʌ rey ti Israel, yom i tsʌnsan. David maʼañic chuqui miʼ cʼux, jin chaʼan tsaʼ ochi ti tejclum Nob i tsiʼ cʼajti chaʼan mucʼ jach i yʌqʼuentel joʼpʼejl pan (1 S. 21:1, 3). Cheʼ jiñi, David yicʼot i wiñicob tsaʼ majliyob ti putsʼel ti jumpʼejl chʼen (1 S. 22:1). ¿Chucoch cheʼ woli (yʌquel) i ñusan bajcheʼ iliyi?

2. ¿Chuqui tsiʼ mele Saúl chaʼan miʼ yʌcʼ i bʌ ti wocol? (1 Samuel 23:16, 17).

² Saúl tsʌytsʌyña i pusicʼal tsaʼ caji cheʼ bʌ tsiʼ qʼuele chaʼan David tsaʼ caji ti wen cʌjñel yicʼot tsiʼ mʌlʌ (joto) cabʌl guerra. Cheʼ jaʼel, yujil chaʼan Jehová tsaʼix i choco bajcheʼ rey tiʼ caj i ñusatʼan yicʼot chaʼan tsiʼ yajca David bajcheʼ i qʼuexol (pejcan 1 Samuel 23:16, 17). Pero Saúl cabʌl i soldadojob yicʼot muʼ bʌ i coltañob come bej jinto jiñi rey ti Israel, jin chaʼan David tsaʼ putsʼi chaʼan maʼañic miʼ tsʌnsʌntel. ¿Tsaʼ ba i ñaʼta Saúl chaʼan miʼ mejlel i contrajin tsaʼ bʌ i yʌlʌ Jehová tiʼ tojlel David? (Is. 55:11). Jiñi Biblia maʼañic miʼ yʌl, pero an junchajp muʼ bʌ i mejlel lac ñaʼtan: Saúl woliʼ yʌcʼ i bʌ ti wocol. Jiñi muʼ bʌ i contrajiñob Dios maʼañic baʼ ora miʼ mʌlob.

3. ¿Bajcheʼ yubil tsiʼ yubi i bʌ David anquese woliʼ ñusan cabʌl wocol?

³ David juntiquilʌch wiñic am bʌ i pecʼlel. Mach jiñic tsiʼ bajñel yajca i bʌ bajcheʼ rey, Jehová tsiʼ yajca (1 S. 16:1, 12, 13). Jin chaʼan, Saúl tsaʼ caji i wen tsʼaʼlen. Pero David maʼañic tsiʼ yʌqʼue tiʼ mul Jehová pejtelel jiñi wocol tac woli bʌ i ñusan.  Cheʼ jaʼel, maʼañic tsaʼ michʼa tiʼ caj mach cabʌlic chuqui miʼ cʼux yicʼot chaʼan woliʼ putsʼel ti chʼen. Tajol cheʼ bʌ yaʼ woliʼ mujcun i bʌ yaʼ ti chʼen tiʼ tsʼijbu ili utsʼatax bʌ cʼay baqui loqʼuem jiñi texto chaʼan bʌ ili estudio: «Jini muʼ bʌ i sajcan lac Yum [...] mi caj i taj pejtel chuqui tac wen» (Sal. 34:10).

4. ¿Baqui tac bʌ cʼajtiya mi caj lac jacʼ, i chucoch ñuc i cʼʌjñibal?

⁴ Ti ili ora, cabʌl i wiñicob Jehová mach cabʌlic chuqui miʼ cʼuxob yicʼot maʼañic miʼ wen tajob jiñi i cʼʌjñibal bʌ i chaʼañob ti jujumpʼejl qʼuin. * Ñumento ti ili pandemia. I muʼto caj i ñumen tsʌtsʼan jiñi wocol tac cheʼ bʌ miʼ lʌcʼtiyel jiñi «cabʌl wocol» (Mat. 24:21). Jin chaʼan, laʼ la cʌqʼuen i jacʼbal chʌmpʼejl cʼajtiya: ¿Chuqui yom i yʌl cheʼ David tsiʼ taja «pejtel chuqui tac wen»?, ¿chucoch yom mi laj cʌn la cubin lac tijicñʌyel yicʼot jiñi am bʌ lac chaʼan?, ¿chucoch miʼ mejlel lac ñop chaʼan Jehová mi caj i cʌntañonla? ¿I bajcheʼ miʼ mejlel lac chajpan lac bʌ ili ora chaʼan jiñi talto bʌ qʼuin?

5, 6. ¿Bajcheʼ miʼ coltañonla Salmo 23:1-6 chaʼan mi lac ñaʼtan chuqui tsiʼ yʌcʼʌ ti ñaʼtʌntel David cheʼ bʌ tsiʼ yʌlʌ chaʼan jiñi i wiñicob Dios mi caj i tajob «pejtel chuqui tac wen»?

⁵ ¿Chuqui yom i yʌl David cheʼ bʌ tsiʼ yʌlʌ chaʼan jiñi i wiñicob Jehová mi caj i tajob «pejtel chuqui tac wen»? Junchajp muʼ bʌ caj i coltañonla lac ñaʼtan jiñʌch cheʼ mi lac wen qʼuel jiñi tʼan tac lʌcʼʌ lajal bʌ am bʌ ti Salmo 23 (pejcan Salmo 23:1-6). David miʼ yʌl tiʼ tejchibal ili salmo: «Lac Yum miʼ cʌntañon cheʼ bajcheʼ xcʌnta tiñʌmeʼ. Maʼanic chuqui an to yom c chaʼan». Tiʼ pejtelel ili capítulo, David miʼ yʌl jiñi añʌch bʌ i cʼʌjñibal tiʼ sujm: Jiñi bendición tac am bʌ i chaʼan come Jehová jiñʌch muʼ bʌ i cʌntan. Jehová miʼ pʌy «majlel ti toj tac bʌ bij» i miʼ coltan cheʼ bʌ wen an yicʼot cheʼ bʌ miʼ ñusan wocol. David yujil chaʼan mucʼʌch caj i ñusan wocol tac anquese lajal bajcheʼ an baqui miʼ cʼaj i yo ti  wem bʌ jamil. An qʼuiñil chʼijyem tsiʼ yubi i bʌ, lajal bajcheʼ an «ti icʼyochʼan bʌ tiʼ yebal jajp wits», i miʼ yʌl chaʼan mi caj i taj i contrajob. Pero, come Jehová jiñʌch muʼ bʌ i cʌntan, David tsiʼ yʌlʌ: «Maʼanic chuqui mic bʌcʼñan».

⁶ Yubil cheʼ jiñi, ¿chuqui yom i yʌl cheʼ David tsiʼ taja «pejtel chuqui tac wen»? Jiñʌch cheʼ luʼ an i chaʼan i cʼʌjñibal bʌ chaʼan lʌcʼʌl miʼ yajñel ti Jehová. Jiñi i tijicñʌyel mach yaʼic cʌyʌl ti jiñi chubʌʼañʌl. Tijicña chaʼan jiñi tsaʼ bʌ i yʌqʼue Jehová. Jiñi ñumen ñuc bʌ i cʼʌjñibal tiʼ tojlel jiñʌch cheʼ jiñi i Dios miʼ yʌqʼuen i bendición yicʼot miʼ cʌntan.

7. Cheʼ bajcheʼ miʼ yʌl Lucas 21:20-24, ¿chuqui ti wocol tsiʼ ñusayob jiñi xñoptʼañob ti ñaxam bʌ siglo chumuloʼ bʌ ti Judea?

⁷ Jiñi tsaʼ bʌ i yʌlʌ David miʼ pʌsbeñonla chaʼan wen jach bajcheʼ yom mi laj qʼuel jiñi chubʌʼañʌl. I sujmʌch chaʼan miʼ mejlel lac ñusan lac bʌ ti jiñi an tac bʌ lac chaʼan, pero mach jiñic ñumen ñuc i cʼʌjñibal yom ti laj cuxtʌlel. Ili jiñʌch junchajp ñuc bʌ i cʼʌjñibal tsaʼ bʌ i chʼʌmbeyob i sujm jiñi xñoptʼañob ti ñaxam bʌ siglo chumuloʼ bʌ ti Judea (pejcan Lucas 21:20-24). Jesús tsiʼ wʌn subeyob chaʼan mi caj i qʼuelob cheʼ bʌ Jerusalén «joyol ti soldadojob». Cheʼ bʌ miʼ yujtel jiñi, yom miʼ putsʼelob majlel ti wits tac. Mi mucʼʌch i melob (chaʼleñob) maʼañic mi caj i chʌmelob (sajtelob), pero cabʌl chuqui yom miʼ cʌyob. Ti wajali, jiñi Lac Tsictesʌbentel tsiʼ yʌlʌ: «Tsiʼ cʌyʌyob i yotot, i lum i mi tsaʼicto i tempayob chuqui tac añob i chaʼan tiʼ yotot. Tsiʼ ñopoyob chaʼan Jehová mi caj i coltañob yicʼot mi caj i cʌntañob, jin chaʼan jiñi ñumen ñuc bʌ i cʼʌjñibal tsiʼ qʼueleyob jiñʌch jiñi i chʼujutesayajob».

8. ¿Chuqui ñuc bʌ i cʼʌjñibal miʼ pʌsbeñonla tsaʼ bʌ ujti tiʼ tojlel jiñi xñoptʼañob ti Judea?

⁸ ¿Chuqui ñuc bʌ i cʼʌjñibal miʼ pʌsbeñonla tsaʼ bʌ ujti tiʼ tojlel jiñi xñoptʼañob ti Judea? Jiñi Lac Tsictesʌbentel tsaʼ bʌ lac taja ti tʼan ti yambʌ párrafo tsiʼ yʌlʌ: «Ti talto bʌ qʼuin tajol mi lac ñusan wocol tac muʼ bʌ caj i pʌs bajcheʼ yilal mi laj qʼuel jiñi chubʌʼañʌl tac. ¿Jimba ñumen ñuc bʌ i cʼʌjñibal mi caj laj qʼuel jiñi, o jin cheʼ mi laj coltʌntel chaʼan lac xucʼtʌlel ti Dios? I sujmʌch, tajol mi caj lac ñusan wocol tac o an chuqui tac yom mi laj cʌy chaʼan mi lac putsʼel. Cheʼ bajcheʼ jiñi xñoptʼañob ti ñaxam bʌ siglo tsaʼ bʌ putsʼiyob loqʼuel ti Judea, yom chajpʌbilonla chaʼan mi lac mel pejtelel chuqui i cʼʌjñibal bʌ». *

9. ¿Bajcheʼ miʼ coltañet jiñi ticʼojel tac tsaʼ bʌ i yʌqʼue Pablo jiñi hebreojob?

⁹ ¿Muʼ ba lac ñaʼtan chaʼan wen wocol tsiʼ yubiyob jiñi xñoptʼañob chaʼan miʼ cʌyob pejtelel chuqui tac añob i chaʼan i miʼ techob chumtʌl ti yambʌ tejclum? Yom miʼ ñopob chaʼan Jehová mi caj i coltañob i taj chuqui i cʼʌjñibal i chaʼañob. Pero cheʼ bʌ anto yom joʼpʼejl jab chaʼan jiñi romanojob miʼ joyob Jerusalén, jiñi apóstol Pablo tsiʼ yʌcʼʌ ticʼojel tac muʼ bʌ caj i coltañob jiñi hebreojob. Tsiʼ yʌlʌ: «Mach laʼ cʼuxbin taqʼuin, i yom tijicñayetla yicʼot jiñi am bʌ laʼ chaʼan. Come Dios tsiʼ yʌlʌ: ‹Maʼañic baʼ ora mi caj j cʌyet i maʼañic baʼ ora mi caj j cʌy j coltañet›. Jin chaʼan ti jumpʼejl lac pusicʼal miʼ mejlel la cʌl: ‹Jehová jiñʌch caj coltaya. Maʼañic mi caj c chaʼlen bʌqʼuen. ¿Chuqui miʼ mejlel i tumbeñon jiñi wiñic?›» (Heb. 13:5, 6). ¿Bajcheʼ yilal tsiʼ ñusayob jiñi xñoptʼañob tsaʼ bʌ i jacʼbeyob i ticʼojel Pablo cheʼ bʌ maxto cʼotiyob jiñi romanojob? Miʼ mejlel la cʌl chaʼan mach wen wocolic tsiʼ yubiyob chaʼan miʼ ñʌmʼañob yaʼ baqui tsaʼ cʼotiyob ti chumtʌl. Tsiʼ ñopoyob chaʼan Jehová mi caj i yʌqʼueñob chuqui i cʼʌjñibal i chaʼañob. Jiñi tsaʼ bʌ i yʌlʌ Pablo miʼ pʌsbeñonla chaʼan joñonla jaʼel miʼ mejlel lac ñop jiñi.

10. ¿Chuqui jiñi tsaʼ bʌ i tsʼijbubeyonla cʌytʌl Pablo?

¹⁰ Pablo tsiʼ yʌqʼue Timoteo jumpʼejl ticʼojel lʌcʼʌ lajal bʌ bajcheʼ jiñi, i miʼ coltañonla jaʼel. Tiʼ tsʼijbu: «Jin chaʼan, mi an i bʌl lac ñʌcʼ yicʼot lac pislel, yom tijicñayonla chaʼan jiñi» (1 Tim. 6:8). ¿Yom ba i yʌl jiñi chaʼan maʼañic miʼ mejlel lac ñusan lac bʌ ti sumuc bʌ bʌlñʌcʼʌl, chaʼan mach yomic an utsʼatax bʌ la cotot o chaʼan maʼañic miʼ mejlel lac bixel mʌn lac pislel? Pablo mach jiñic woliʼ taj ti tʼan jiñi. Yom bʌ i yʌl jiñʌch chaʼan yom tijicñayonla yicʼot jiñi an tac bʌ lac chaʼan (Filip. 4:12). Jiñʌch tsaʼ bʌ i cʌñʌ i mel Pablo. Jiñi ñumen ñuc bʌ i cʼʌjñibal am bʌ lac chaʼan jiñʌch cheʼ i yamigojonla Dios, mach jiñic jiñi chubʌʼan tac (Hab. 3:17, 18).

11. ¿Chuqui mi laj cʌn ti jiñi tsaʼ bʌ subentiyob jiñi israelitajob ti Moisés?

¹¹ Tajol jiñi i cʼʌjñibal bʌ lac chaʼan mi lac ñaʼtan mach jiñic i cʼʌjñibal bʌ lac chaʼan miʼ qʼuel Jehová. Laʼ laj qʼuel chuqui tiʼ sube Moisés jiñi israelitajob cheʼ bʌ tsaʼix i ñusayob 40 jab yaʼ tiʼ tiquiñal lum: «Laʼ Yum Dios tsaʼix i wen cʌntayetla. Tsiʼ wen qʼueleyetla cheʼ bʌ tsaʼ ñumiyetla tiʼ pejtelel ili colem bʌ i tiquiñal pañimil. Chaʼcʼal jab tsiʼ piʼleyetla laʼ Yum. Maʼanic chuqui anto yom laʼ chaʼan» (Dt. 2:7). Ti jiñi 40 jab, Jehová tsiʼ yʌqʼueyob maná chaʼan miʼ cʼuxob. I jiñi i pislelob, añoʼ bʌ i chaʼan cheʼ bʌ tsaʼ loqʼuiyob ti Egipto, maʼañic tsaʼ jili (Dt. 8:3, 4). Tajol an israelitajob tsaʼ bʌ i ñaʼtayob chaʼan mach cabʌlic chuqui añob i chaʼan, pero Moisés tsiʼ cʼajtesʌbeyob  chaʼan añob i chaʼan pejtelel chuqui i cʼʌjñibal bʌ. Jehová tijicña mi caj i yubin mi tijicñayonla yicʼot jiñi am bʌ lac chaʼan, ili yom i yʌl, mi mucʼʌch laj qʼuel ti ñuc jiñi mach bʌ wen ñuquic muʼ bʌ i yʌqʼueñonla, mi laj qʼuel bajcheʼ jumpʼejl bendición i mi la cʌqʼuen wocolix i yʌlʌ.

12. ¿Bajcheʼ la cujil chaʼan David tsiʼ ñopo ti Jehová i mach tiʼ bajñel pʼʌtʌlelic?

¹² David yujil chaʼan Jehová xucʼulʌch yicʼot chaʼan miʼ wen ñaʼtan jiñi muʼ bʌ i cʼuxbiñob. Anquese woliʼ sʌclʌntel chaʼan miʼ tsʌnsʌntel tsiʼ mele jiñi Salmo 34, wen pʼʌtʌl i ñopoñel i tsiʼ yubi chaʼan jiñi i yángel Jehová lajal bajcheʼ yaʼan tiʼ joytʌlel (Sal. 34:7). David tsiʼ laja jiñi i yángel Jehová bajcheʼ juntiquil soldado wen yʌxʌl bʌ i yo woli ti cʌntaya ame miʼ cʼotel jiñi i contrajob. Anquese David juntiquilʌch pʼʌtʌl bʌ soldado i Jehová tiʼ sube chaʼan mi caj i sujtel ti rey, maʼañic tsiʼ bajñel ñopo tiʼ tojlel chaʼan wen yujil julbʌl ti xajlel o chaʼan wen yujil cʼʌñol jiñi espada chaʼan miʼ mʌlben jiñi i contrajob (1 S. 16:13; 24:12). Tsiʼ ñopo ti Dios yicʼot chaʼan jiñi i yángel miʼ coltan jiñi muʼ bʌ i bʌcʼñañob. I sujmʌch, joñonla maʼañic mi lac pijtan jumpʼejl milagro chaʼan Dios miʼ coltañonla. Pero la cujil chaʼan jiñi muʼ bʌ i ñopob ti Jehová mi caj i tajob i cuxtʌlel mach bʌ añic miʼ jilel anquese miʼ chʌmelob ili ora.

13. Cheʼ bʌ miʼ contrajiñonla Gog de Magog, ¿chucoch ora mi caj i mejlel i jisañonla yilal, pero chucoch mach yomic mi lac chaʼlen bʌqʼuen? (Qʼuele jiñi dibujo am bʌ tiʼ tejchibal).

¹³ Ti talto bʌ qʼuin mi caj i mejlel lac pʌs mi mucʼʌch lac ñop chaʼan Jehová miʼ mejlel i cʌntañonla. Cheʼ bʌ miʼ contrajiñonla Gog de Magog, jiñi junmojt tejclum tac, tajol mi caj lac ñaʼtan chaʼan mi caj lac chʌmel. Ti jimbʌ ora yom mi lac ñop chaʼan Jehová mucʼʌch i mejlel i coltañonla yicʼot chaʼan mucʼʌch caj i mel. Jiñi tejclum tac mi caj i qʼueloñobla bajcheʼ tʌñʌmeʼ tac maʼañic bʌ miʼ mejlel laj coltan lac bʌ yicʼot maʼañic bʌ majqui miʼ cʌntañob (Ez. 38:10-12). Mi caj i ñaʼtañob chaʼan ora mi caj i jisañonla come maʼañic la queʼtijib chaʼan guerra i mi chajpʌbiloñicla chaʼan jiñi. Maʼañic mi caj i taj i qʼuelob muʼ bʌ laj qʼuel joñonla am bʌ lac ñopoñel: Yonlel ángelob añoʼ bʌ tiʼ joytʌlel i tejclum Dios chaʼan miʼ coltañob. ¿Bajcheʼ mi caj i mejlel i qʼuelob mi maʼañic miʼ ñopob ti Jehová? ¡Mi caj i toj sajtelob i pusicʼal cheʼ bʌ jiñi ángelob miʼ coltañonla! (Apoc. 19:11, 14, 15).

14. ¿Chuqui yom mi lac mel ili ora chaʼan mi lac chajpan lac bʌ chaʼan jiñi talto bʌ qʼuin?

¹⁴ ¿Chuqui miʼ mejlel lac mel ili ora chaʼan mi lac chajpan lac bʌ chaʼan jiñi talto bʌ qʼuin? Ñaxan, yom wen jach bajcheʼ mi laj qʼuel jiñi chubʌʼañʌl tac i yom mi laj cʼajtesan chaʼan ti jumpʼejl bʌ qʼuin yom mi lac loqʼuel baqui añonla i mi laj cʌy pejtelel chuqui an lac chaʼan. Cheʼ jaʼel, yom tijicñayonla yicʼot jiñi i cʼʌjñibal bʌ lac chaʼan yicʼot cheʼ i yamigonla Jehová. Cheʼ bʌ mi lac ñumen cʌn jiñi lac Dios, mi caj lac ñumen ñop chaʼan mi caj i mejlel i cʌntañonla cheʼ bʌ miʼ contrajiñonla Gog de Magog.

15. ¿Chuqui tac tsiʼ pʌsbe David chaʼan Jehová maʼañic baʼ ora mi caj i cʌy?

¹⁵ Laʼ laj qʼuel chuqui yambʌ tsiʼ colta David chaʼan miʼ lʌtʼ jiñi wocol tac. Tsiʼ yʌlʌ: «Ñopola utsʼat lac Yum. Ñaʼtanla, tijicña jini muʼ bʌ i taj i coltʌntel ti lac Yum» (Sal. 34:8). Ili tʼan tac miʼ pʌsbeñonla chucoch David yujil chaʼan  Jehová mi caj i coltan. Tiʼ pejtelel ora tsiʼ colta i bʌ tiʼ Dios, i Dios maʼañic tsiʼ cʌyʌ. Cheʼ bʌ chʼitonto, David tsiʼ contraji juntiquil chan bʌ filisteo i cʼabaʼ Goliat i tiʼ sube: «C Yum lojon mi caj i yʌqʼuet tij cʼʌb» (1 S. 17:46). Ti wiʼil, cheʼ bʌ woliʼ melben i yeʼtel (troñel) jiñi rey Saúl, Saúl mach junsujtelic jach tsiʼ ñopo i tsʌnsan, pero «an lac Yum yicʼot» David (1 S. 18:12). Yujil chaʼan Jehová mi caj i bej coltan come tsaʼix i qʼuelbe i coltaya ti ñaxan. Jiñʌch muʼ bʌ i mejlel i coltañonla jaʼel chaʼan mi lac chajpan lac bʌ chaʼan jiñi wocol tac.

16. ¿Bajcheʼ miʼ mejlel laj qʼuel chaʼan Jehová an i yutslel?

¹⁶ Cheʼ bʌ mi lac ñumen sʌclʌben i coltaya Jehová ili ora, mi caj lac ñumen ñop chaʼan mi caj i coltañonla ti wiʼil. Jumpʼejl ejemplo, yom an lac ñopoñel ti Jehová cheʼ mi laj cʼajtin permiso ti la queʼtel chaʼan mi lac majlel ti colem tempa bʌ o chaʼan jiñi lac patrón miʼ qʼuextan bajcheʼ ora mi lac chaʼlen eʼtel chaʼan maʼañic mi laj cʌy tempa bʌ tac yicʼot mi lac ñumen chaʼlen subtʼan. Laʼ cu lac ñaʼtan chaʼan maʼañic miʼ jajqʼuel jiñi woli bʌ laj cʼajtin i mi lac sʌt la queʼtel. ¿Muʼ ba caj lac ñop chaʼan Jehová maʼañic mi caj i cʌyonla yicʼot chaʼan mi caj i chʌn aqʼueñonla jiñi i cʼʌjñibal bʌ lac chaʼan? (Heb. 13:5). Cabʌl hermanojob muʼ bʌ i melbeñob i yeʼtel Jehová ti tsʼʌcʌl miʼ mejlel i yʌlob bajcheʼ an i coltayob Jehová cheʼ bʌ ñumen i cʼʌjñibal i chaʼañob. Jehová xucʼulʌch.

17. ¿Baqui bʌ jiñi texto chaʼan jiñi jabil 2022, i chucoch weñʌch?

¹⁷ Mi añonla la quicʼot Jehová, mach yomic mi lac bʌcʼñan chuqui mi caj i yujtel ti talto bʌ qʼuin. Mi jiñʌch mi la cʌcʼ ti ñaxan ti laj cuxtʌlel, maʼañic baʼ ora mi caj i cʌyonla. Jiñi Junmojt muʼ bʌ i pʌsob bij tsiʼ yajca jiñi Salmo 34:10 bajcheʼ jiñi texto chaʼan bʌ jiñi jabil 2022: «Jini muʼ bʌ i sajcan lac Yum [...] mi caj i taj pejtel chuqui tac wen». Tsiʼ yajca iliyi chaʼan miʼ cʼajtesʌbeñonla chucoch ñuc i cʼʌjñibal cheʼ mi lac chajpan lac bʌ ili ora chaʼan jiñi wocol tac muʼ bʌ caj i tilel.