JIÑI c tat, i cʼabaʼ John Mills, tsiʼ chʼʌmʌ jaʼ cheʼ ti 1913 yaʼ ti Nueva York, cheʼ an 25 i jabilel. Tsaʼ bʌ i yʌcʼʌ jiñi discurso chaʼan chʼʌm jaʼ jiñʌch jiñi hermano Russell. Mach wen jalic tsaʼ ñumi i jiñi c tat tsaʼ majli ti chumtʌl ti jumpʼejl isla i cʼabaʼ Trinidad, yaʼi tsiʼ cʌñʌ juntiquil chʼejl bʌ xpejcaya Biblia i cʼabaʼ Constance Farmer i tsaʼ bʌ ñujpuñi yicʼot. I tsaʼ caji i coltan jiñi i yamigo Willian Brown * chaʼan miʼ ñusan jiñi «Foto-Drama de la Creación» cʼʌlʌl ti 1923, cheʼ bʌ jiñi hermano Brown yicʼot i yijñam tsaʼ chojquiyob majlel ti África Occidental. Pero jiñi c tatob, añoʼ bʌ i pijtaya chaʼan miʼ majlelob ti panchan, yaʼʌch tsaʼ cʌyleyob ti Trinidad.

Jiñic tatob, tsiʼ tajayob bolomtiquil i yalobil. Jiñi ascuñʌl tsaʼ otsʌbenti i cʼabaʼ bajcheʼ Rutherford come cheʼʌch i jol i cʼabaʼ jiñi hermano am bʌ tiʼ wenta jiñi Sociedad Watch Tower. Cheʼ jiñi tsaʼ quila pañimil (chʼocʼayon), ti 30 i chaʼan diciembre ti 1922. Tsaʼ otsʌbentiyon j cʼabaʼ bajcheʼ Woodworth, anquese mic subentel bajcheʼ Worth, come Clayton Woodworth i cʼabaʼ jiñi am bʌ tiʼ wenta miʼ qʼuel bajcheʼ miʼ chajpʌntel jiñi revista The Golden Age (wʌle jiñʌch jiñi ¡Jamʌx a wut!). Ti lon c pejtelel tsaʼ chojquiyon lon majlel ti escuela, pero jiñi c tatob tsiʼ ñumen cʌntesayon lojon chaʼan yom mic ñaʼtan lon c melben i yeʼtel (troñel) Dios. Jiñi c mamá wen yujil cʼʌñol jiñi Biblia chaʼan miʼ coltañon lon c ñop. I jiñi c papá miʼ wen mulan i subeñon lon historia tac am bʌ ti Biblia, i miʼ luʼ ñijcan i bʌ cheʼ bajcheʼ tsaʼ ujti chaʼan miʼ chaʼ cuxtesan ti lon c ñaʼtʌbal.

Pejtelel tsaʼ bʌ i meleyob (chaʼleyob) tsaʼʌch i coltayon lojon. Ti jiñi joʼtiquil wiñiconbʌlon, uxtiquil tsajñiyon lon yaʼ ti Cʌntesʌntel i chaʼan Galaad, i uxtiquil quijtsʼiñob xchʼocoʼ bʌ cabʌl jab tsaʼ ajñiyob bajcheʼ precursora yaʼ ti Trinidad y Tobago. Jiñi cʌntesa tac yicʼot wem bʌ i melbalob jiñi c tatob tsiʼ pʌcʼʌyon lojon, cheʼ bajcheʼ teʼ, yaʼ «tiʼ yotot lac Yum», cheʼ bajcheʼ miʼ yʌl Salmo 92:13. Jiñi i tʼañob tsiʼ coltayon lojon chaʼan yaʼʌch mi lon c chʌn ajñel yicʼot mi lon c chaʼlen ñich yaʼ tiʼ jumpatlel i yotot Dios.

Jiñi hermanojob miʼ cʼotelob ti lon j cotot i yaʼʌch miʼ chajpañob jiñi subtʼan. Yaʼ miʼ tempañob i bʌ jiñi precursorob i ti bele ora miʼ tajob ti tʼan jiñi hermano George Young, juntiquil misionero chʼoyol bʌ ti Canadá tsajñi bʌ ti julaʼ yaʼ ti Trinidad. Jiñi c tatob utsʼatax chuqui miʼ yʌlob tiʼ tojlel jiñi hermano Brown yicʼot i yijñam, añoʼ bʌ ti África Occidental ti jiñi bʌ ora. Pejtelel iliyi tsiʼ  coltayon chaʼan mic tech subtʼan cheʼ bʌ 10 c jabilel.

Ti jiñi bʌ ora, jiñi revista tac miʼ jamʌ tsictesan i melbal jiñi ñopbalʌl tac mach bʌ i sujmic, chaʼan jiñi wiñicob xʼixicob (quixtañujob) cojach añob tiʼ pusicʼal jiñi eʼtel yicʼot chaʼan política. Jiñi ñaxam bʌ miʼ yʌcʼob i bʌ ti ñopbalʌl tsaʼ michʼayob, jin chaʼan ti 1936 tiʼ subeyob jiñi gobernador ti Trinidad chaʼan miʼ mʌctʌntel i pujquel jiñi revista tac chaʼan jiñi Watch Tower. Jiñi chaʼan tsaʼ c mucu lojon, pero tsaʼto c bej cʼʌñʌ lojon jinto tsaʼ jili. Tsaʼ c mele lon marcha tac chaʼan subtʼan i mic xʌn lon ñumel ti bicicleta yicʼot tratado tac yicʼot letrero. Tsaʼ c tempa lon c bʌ quicʼot jiñi hermanojob tilemoʼ bʌ ti Tunapuna añoʼ bʌ jumpʼejl i carro yicʼot bʌ i bocinajlel, cheʼ jiñi tsaʼ cʼotiyon lojon ti yambʌ tejclum tac ñajt bʌ an. Ili utsʼatax bʌ eʼtel yicʼot yambʌlob tsiʼ ñijca c pusicʼal chaʼan mic chaʼlen chʼʌm jaʼ cheʼ 16 c jabilel.

Pejtelel tsaʼ bʌ j cʌñʌ tic tatob yicʼot tsaʼ bʌ c chumta tsiʼ ñijca c pusicʼal chaʼan mi cochel bajcheʼ misionero. I cheʼʌch tsaʼ c bej ubi tic pusicʼal cheʼ tsajñon ti subtʼan ti jiñi isla i cʼabaʼ Aruba ti 1944 quicʼot jiñi hermano Edmund Cummings. Tsaʼ c taja lon c tijicñʌyel cheʼ tsajñiyob lujuntiquil quixtañujob tiʼ Cʼajtesʌntel i chʌmel Jesús ti 1945. Jiñi ñaxam bʌ congregación tsaʼ tejchi ti jumpʼejl jab.

Mach wen jalic tsaʼ ñumi, tsaʼ c sube jiñi wen tʼan juntiquil xchʼoc c piʼʌl bʌ ti eʼtel i cʼabaʼ Oris Williams. Wen yujil bajcheʼ miʼ coltan chuqui ñopol i chaʼan. Pero cheʼ tsaʼ caji ti estudio, tsiʼ cʌñʌ jiñi i sujmlel am bʌ tiʼ tʼan Dios i tsiʼ chʼʌmʌ jaʼ ti 5 i chaʼan enero ti 1947. Ti wiʼil, tsaʼ caji c mulan lon c bʌ i tsaʼ ñujpuñiyon lojon. Cheʼ ti noviembre i chaʼan 1950, tsaʼ ochi bajcheʼ precursora. Cabʌl chuqui utsʼatax tsaʼ lon c chumta.

Ti 1955, tsaʼ pʌjyiyon lojon yaʼ ti cʌntesʌntel i chaʼan Galaad, jin chaʼan tsaʼ j cʌyʌ lojon j queʼtel, tsaʼ c choño lon cotot yicʼot yan tac bʌ am bʌ lon c chaʼan i tsaʼ loqʼuiyon lojon ti Aruba. Cheʼ ti 29 i chaʼan julio ti 1956, cheʼ bʌ tsaʼix loqʼuiyon lon yaʼ ti clase 27 i chaʼan Galaad tsaʼ chojquiyon lojon majlel ti Nigeria.

Ti wiʼil, Oris tsiʼ yʌlʌ muʼ bʌ i ñaʼtan ti jiñi bʌ ora: «Jiñi i yespíritu Jehová miʼ coltañet ti chuqui jach maʼ ñusan cheʼ añet bajcheʼ misionero. Ti ñaxan, joñon maʼañic tsaʼ c mulaj ochel bajcheʼ misionero bajcheʼ jiñi c ñoxiʼal. Com bʌ jiñʌch cheʼ an jumpʼejl cotot i mic taj calobil. Pero mach cheʼix taʼ c ñaʼta cheʼ tsaʼ cʼoti j qʼuel chaʼan yomʌch miʼ sujbel jiñi wen tʼan. Jin chaʼan, cheʼ bʌ tsaʼ loqʼuiyon lon ti Galaad, tsaʼ cʌcʼʌ tic ñaʼtʌbal chaʼan mi caj c majlel ti subtʼan bajcheʼ misionera. Cheʼ bʌ woli (choncol) j cʼʌjquel lojon yaʼ ti barco Queen Mary, jiñi hermano Worth Thornton muʼ bʌ i chaʼlen eʼtel yaʼ tiʼ oficina jiñi hermano Knorr, tsaʼ cʼoti i sub i bʌ i tsiʼ yʌlʌ chaʼan mi caj lon c majlel ti Betel. Jiñi tsiʼ yʌqʼueyon c chʼijiyemlel. Pero mach jalic tsaʼ ñʌmʼayon i tsaʼ cʼoti c wen mulan. Cabʌl eʼtel chuqui tsaʼ c mele ti Betel. Tsaʼ bʌ c ñumen mulaj jiñʌch jiñi eʼtel ti recibidor. Tijicña miʼ cubin cheʼ mij qʼuel jiñi quixtañujob, i miʼ mejlel c pejcan jiñi hermanojob. Cabʌl muʼ bʌ i cʼotelob yicʼot tsʼubejn, lujbobix, tʌquiñob i tiʼ yicʼot wiʼñayob. Mic mulan j coltañob chaʼan miʼ yubiñob i tijicñʌyel. Pejtelel jiñi eʼtel chʼujulʌch tiʼ wut Jehová, jin chaʼan mi cubin c tijicñʌyel». Tiʼ sujm, jiñi eʼtel tac muʼ bʌ lon j cʌqʼuentel miʼ coltañon lon ti bej colel tiʼ chaʼan bʌ Dios.

Ti 1961, tsaʼ c tempa lon c bʌ bajcheʼ familia yaʼ ti Trinidad, i jiñi hermano Brown tsaʼ caji i subeñon lojon chuqui tac utsʼatax bʌ tiʼ ñusa yaʼ ti África. Ti wiʼil tsaʼ caji j cʌl jaʼel bajcheʼ tsaʼ coli jiñi subtʼan ti Nigeria. Jiñi hermano Brown tsiʼ meqʼueyon i tiʼ sube c papá: «Johnny, maʼañic ba ora tsajñiyet ti África, pero Woodworth tsajñʌch». Jiñi c tat tiʼ jacʼʌ: «Chaʼlen wersa, Worth, chaʼlen wersa». Jiñi tsaʼ bʌ i subeyoñob tsiʼ coltayon chaʼan mic bej chaʼlen wersa c tsʼʌctesan jiñi queʼtel.

Tijicña tsaʼ cubi cheʼ tsajñiyon yaʼ ti clase 37 i chaʼan Galaad, baqui tsaʼ chajpʌntiyon yambʌ 10 uw. Jiñi hermano Wilfred Gooch am bʌ bajcheʼ superintendente i chaʼan sucursal yaʼ ti Nigeria, tsajñi ti jiñi clase 38 i tsaʼ chojqui majlel  ti Inglaterra, i joñon tsaʼ waʼchocontiyon tiʼ qʼuexol. Cheʼ bajcheʼ tsiʼ mele jiñi hermano Brown, cabʌl baqui tsajñiyon ti julaʼ, i cheʼʌch tsaʼ cʼoti j cʌn yicʼot j cʼuxbin jiñi hermanojob ti Nigeria. Anquese mach cabʌlic i chubʌʼañob, bajcheʼ jiñi hermanojob ti colem tejclum tac, miʼ pʌsob tiʼ melbal chaʼan jiñi tijicñʌyel mach yaʼic cʌyʌl ti taqʼuin o ti chubʌʼan tac. Mic mulan j qʼuel cheʼ sʌc yicʼot wen chajpʌbilob miʼ cʼotelob ti tempa bʌ. Cabʌl muʼ bʌ i cʼotelob ti colem tempa bʌ ti carro yicʼot ti bolekaja *, lajal bʌ bajcheʼ jumpʼejl autobús. Ti bele ora miʼ mejlel laj qʼuel yaʼ tiʼ pat bolekaja tʼan tac bajcheʼ: «Cabʌl chʌjcʼ jaʼ miʼ sujtel ti colem jaʼ».

¡Ili tʼan i sujmʌch! Jiñi coltaya muʼ bʌ i yʌcʼ jujuntiquil quixtañu añʌch i cʼʌjñibal anquese mach cabʌlic chuqui miʼ melob, i cheʼʌch tsaʼ lon c mele jaʼel. Ti 1974, Nigeria jiñʌch i chaʼpʼejlel país tsaʼ bʌ cʼoti ti 100 mil xsubtʼañob i chaʼan, Estados Unidos jiñʌch jiñi ñaxam bʌ. Jiñi eʼtel woliyʌch (yʌquelʌch) i yʌcʼ i wut.

Ti jimbʌ ora, tsaʼ tejchi guerra ti Nigeria, ti 1967 cʼʌlʌl ti 1970. Jiñi hermanojob añoʼ bʌ tiʼ tiʼ jiñi jaʼ Níger tiʼ tojel jiñi Biafra, cabʌl uw tsaʼ bajñel cʌyleyob. Pero mach cheʼ jach tsaʼ lon j qʼuele, yomʌch mic chʼʌmben lon majlel jiñi chʼujul bʌ bʌlñʌcʼʌl. Ti jumpʼejl bʌ acʼʌlel, jiñi jaʼ Níger am bʌ 1,600 metro i pochtʌlel, wen pʼʌtʌl. Cheʼ jaʼel, wen tsʌts an jiñi guerra ti jiñi ora, i mic mejlel lon ti chʌmel (sajtel) mi tsaʼ cʼaxiyon lon yaʼ ti junwejl jaʼ. Pero yomʌch mi lon c mel. I mach junsujtel jach tsaʼ lon c mele bajcheʼ jiñi. Pero mi lon c wen melben oración Jehová i mic ñop lojon tiʼ coltaya.

Wen cʼajal c chaʼan chuqui tsaʼ ujti ti jumpʼejl bʌ qʼuin. Cabʌl wocol tsaʼ lon c taja. An soldadojob orajach bʌ miʼ mejlel i tsʌnsañet, cʼamʌjel tac yicʼot yan tac bʌ. Cheʼ bʌ jujunyajl mi lon j cʼaxel, mi lon j cʌcʼ ti wocol lon j cuxtʌlel. Wocol cheʼ mij cʼaxel lon yaʼ baʼan jiñi soldadojob, come chuqui jach miʼ mejlel i ñaʼtañob. Pero ñumen bʌbʌqʼuen cheʼ mi lon j cʼaxel ti Biafra. Ti jumpʼejl bʌ acʼʌlel tsaʼ ñumiyon yaʼ ti jaʼ ti jumpʼejl cayuco, ti Asaba cʼʌlʌl ti Onitsha i tsaʼ majliyon ti Enugu chaʼan mic tijicñesʌben i pusicʼal jiñi ancianojob. Ti yambʌ qʼuin tsaʼ majli c pʼʌtʼesañob jiñi hermanojob ti Aba, baqui ticʼbil chaʼan maʼañic miʼ mejlel i tsʼʌbob luz ti acʼʌlel. Yaʼ ti Port Hancourt, ti ora tsaʼ lon j cujtesa jumpʼejl tempa bʌ come jiñi soldadojob tsiʼ wersa jamʌyob i ñumib yaʼ ti Biafra i lʌcʼʌlix añob.

Jiñi tempa bʌ tac ñucʌch i cʼʌjñibal chaʼan mij cʼajtesʌben jiñi hermanojob chaʼan Jehová mucʼʌch i cʼuxbiñob yicʼot mi caj i cʌntañob. Tsaʼ c subeyob chaʼan maʼañic miʼ yotsañob i bʌ ti guerra i juntemel miʼ yajñelob. Jiñi hermanojob ti Nigeria tsaʼʌch i pʌsʌyob i xucʼtʌlel cheʼ tsiʼ ñusayob wocol tac. Tsiʼ pʌsʌyob chaʼan jiñi cʼuxbiya ñumen ñuc bajcheʼ jiñi tsʼaʼleya i muchʼul tsaʼ ajñiyob. Tijicña mi cubin cheʼ tsaʼ ajñi quicʼotob ti jiñi wocol tac.

Ti 1969, jiñi hermano Milton Henschel tsaʼ ajñi tiʼ wenta jiñi colem tempa bʌ internacional bʌ i cʼabaʼ «Ñʌchʼtʌlel ti Pañimil» tsaʼ bʌ mejli yaʼ ti Estadio de los Yankees (Nueva York). Joñon tsaʼ j colta i cabʌl chuqui tsaʼ j cʌñʌ tiʼ tojlel. Jiñi tsiʼ coltayon, come cheʼ ti 1970 tsaʼ ujti jumpʼejl colem tempa bʌ internacional bʌ i cʼabaʼ «Wiñicob Utsoʼ bʌ i Pusicʼal» yaʼ ti Lagos (Nigeria). Chaʼan miʼ mejlel iliyi wocolʌch come tsaʼ jaxto lajmi jiñi guerra, pero tsaʼ mejli tiʼ coltaya Jehová. Tsaʼ cʼotiyob 121 mil 128 quixtañujob i tsaʼ ñusʌnti ti 17 tʼan tac. Jiñi hermano Knorr yicʼot Henschel yicʼot yañoʼ bʌ tsaʼ bʌ cʼotiyob ti avión tilemoʼ bʌ ti Estados Unidos yicʼot ti Inglaterra tsiʼ qʼueleyob chaʼan 3,775 tsiʼ chʼʌmʌyob jaʼ, ñumen cheʼ bajcheʼ tsaʼ ujti ti Pentecostés. Maʼañic ba ora tsaʼ wen lujbʼayon bajcheʼ i chajpʌntel jiñi tempa bʌ. Mach jalic tsaʼ pʼojli jiñi xsubtʼañob.

Ti jiñi 30 jab cheʼ tsaʼ ajñiyon ti Nigeria an i tajol tsaʼ c chaʼle eʼtel bajcheʼ superintendente i chaʼan circuito yicʼot tsaʼ c julaʼta yambʌ país tac ti África Occidental. Wen ñuc miʼ qʼuelob jiñi misionerojob cheʼ miʼ tijicñesʌbentelob i pusicʼal yicʼot cheʼ ti jujuntiquil miʼ ñʌchʼtʌntelob. Mic mulan c subeñob chaʼan mucʼʌch c wen cʼajtesañob. Ili eʼtel tsiʼ cʌntesayon chaʼan yomʌch mi laj qʼuel ti ñuc jiñi hermanojob cheʼ miʼ melbeñob i yeʼtel Jehová yicʼot chaʼan pʼʌtʌl yicʼot muchʼul miʼ yajñel jiñi organización.

 Cojach tiʼ coltaya Jehová tsaʼ mejli lon c ñusan jiñi cʼamʌjel tac yicʼot jiñi wocol tac tiʼ caj jiñi guerra. Ti bele ora tsaʼ lon j qʼuelbe i bendición. Oris tsiʼ yʌlʌ:

«Ti lon c chaʼticlel mach ti junyajl jach tsaʼ lon c taja paludismo. Ti jumpʼejl bʌ qʼuin Worth wen boyemix tsaʼ cʼoti ti hospital am bʌ ti Lagos. Tsaʼ subentiyon chaʼan tajol mach mejlix ti cʼocʼan, pero tsaʼʌch cʼocʼa. Cheʼ bʌ tsaʼ chʼojyi, tiʼ sube wen tʼan chaʼan i Yumʌntel Dios jiñi enfermero woli bʌ i qʼuel, i cʼabaʼ Nwambiwe. Ti wiʼil, tsaʼ majli lon j qʼuel tiʼ yotot chaʼan mic bej suben lon chaʼan bʌ Biblia. Tsaʼʌch i ñopo jiñi i sujmlel i tsaʼ sujti ti anciano yaʼ ti Aba. Joñon jaʼel tsaʼ j colta yambʌ quixtañujob, jinto wen ochemoʼ bʌ tiʼ ñopbal musulman, chaʼan miʼ sujtelob ti chʼejl bʌ i wiñicob Jehová. Tsaʼ c wen ubi lon c tijicñʌyel cheʼ tsaʼ j cʌñʌ lojon yicʼot tsaʼ j cʼuxbi lon jiñi hermanojob ti Nigeria, jiñi i cultura, jiñi costumbre yicʼot i tʼan».

Jiñi jiñʌch yambʌ tsaʼ bʌ lon j cʌñʌ: Chaʼan utsʼat mi lon c mel jiñi lon queʼtel ti yambʌ país, yomʌch mi lon j cʼuxbin jiñi yambʌ hermanojob anquese mach lajalic jiñi lon j cultura.

Ti 1987, tsaʼ qʼuextʌyi jiñi lon queʼtel. Tsaʼ loqʼuiyon lon ti Betel am bʌ ti Nigeria i tsaʼ majliyon lon ti subtʼan ti jumpʼejl isla i cʼabaʼ Santa Lucía. Wen utsʼatax jiñi eʼtel, pero añʌch i wocolel jaʼel. Jiñi wocol am bʌ ti África jiñʌch cheʼ jiñi wiñicob cabʌl i yijñam miʼ pʌyob, i yaʼ ti Santa Lucía mach cheʼiqui, pero mach ñujpuñemob. Tiʼ coltaya i Tʼan Dios, cabʌl muʼ bʌ lon cʌqʼuen estudio tiʼ qʼuextayob i melbal.

Cheʼ ñumeñix ora, jiñi lon c pʼʌtʌlel tsaʼ jili majlel. Jin chaʼan, jiñi Junmojt muʼ bʌ i pʌsob bij tsiʼ chocoyon lon majlel yaʼ ti Broklyn (Nueva york) cheʼ ti 2005. Pero ti 2015 Oris tsaʼ chʌmi, maʼañic mi mejlel la cʌl bajcheʼ yubil cheʼ bʌ an majqui mi lac sʌt. Ti jujumpʼejl qʼuin mi cʌqʼuen wocolix i yʌlʌ Jehová chaʼan Oris. Wen utsʼatax i melbal yicʼot wen uts. Ti jiñi 68 jab tsaʼ bʌ ajñi quicʼot tsaʼ j cʼuxbi tiʼ pejtelel c pusicʼal. Tsaʼ cʼoti lon c ñaʼtan chaʼan mi lac taj lac tijicñʌyel ti lac ñujpuñel yicʼot ti congregación cheʼ mi laj qʼuel ti ñuc jiñi añoʼ bʌ i yeʼtel, mi lac ñusʌben i sajtemal yambʌlob, mi lac pʌs lac pecʼlel yicʼot i wut jiñi espíritu.

Cheʼ an chuqui miʼ yujtel maʼañic bʌ mi lon c mulan o mic taj lon c chʼijiyemlel, mij cʼajtiben lon Jehová chaʼan miʼ yʌcʼ i bendición ti chuqui mi lon c mel. Jiñʌch tsiʼ bej chajpayon lojon, i ti bele ora tsaʼ lon j qʼuele chaʼan cabʌl chuqui woli ti weñʼan majlel, i muʼto caj i ñumen weñʼan ti talto bʌ qʼuin (Is. 60:17; 2 Co. 13:11).

Yaʼ ti Trinidad y Tobago, Jehová tsaʼʌch i yʌcʼʌ i bendición chaʼan jiñi eʼtel tsaʼ bʌ i mele c tatob yicʼot yambʌ hermanojob. Ti jiñi tsijiʼ bʌ informe tac miʼ pʌs chaʼan 9,892 añob tiʼ sujmlel. Yaʼ ti Aruba, cabʌl hermanojob tsiʼ pʼʌtʼesayob jiñi congregación baʼ tsaʼ ñumiyon. Ti jiñi isla añix 14 congregación. Wʌle añobix 381 mil 398 xsubtʼañob ti Nigeria. I yaʼ ti isla Santa Lucía añix 783 quixtañujob añoʼ bʌ tiʼ tojlel i Yumʌntel Jehová.

Wʌle ñumeñix ti 90 c jabilel. Salmo 92:14 miʼ yʌl chaʼan jiñi pʌcʼʌloʼ bʌ bajcheʼ teʼ tiʼ yotot Jehová, «cʼʌlʌl cheʼ ñoxobix mi caj i chʌn acʼob i wut» i chaʼan mi caj i bej ajñelob «bajcheʼ wen yʌx bʌ teʼ am bʌ i yetsel». Wen tijicña mi cubin c bʌ cheʼ tsaʼ c wen melbe i yeʼtel Jehová. Jiñi tsaʼ bʌ j cʌñʌ tiʼ tojlel c tatob yicʼot yambʌ hermanojob tsiʼ coltayon chaʼan ti jumpʼejl c pusicʼal mic melben i yeʼtel Jehová. Yicʼot i cʼuxbiya an i yʌcʼʌ chaʼan mic chaʼlen ñich yaʼ tiʼ jumpatlel i yotot Dios (Sal. 92:13).