1. ¿Chuqui tsiʼ yʌlʌ Jesús chaʼan jiñi majtañʌl tac am bʌ ti panchan?

¿AM BA majtañʌl tac mach bʌ mejlic laj qʼuel? Ancu, jiñi majtañʌl tac ñumen ñuc bʌ i cʼʌjñibal jiñʌch mach bʌ mejlic laj qʼuel. Ti jiñi Cʌntesa yaʼ ti bujtʌl, Jesús tsiʼ taja ti tʼan majtañʌl tac o chubʌʼañʌl tac am bʌ ti panchan ñumen ñuc bʌ i cʼʌjñibal bajcheʼ jiñi chubʌʼan tac. I tsiʼ yʌlʌ: «Baqui jach tempʌbil laʼ chubʌʼan, mi laʼ teñe acʼ ti laʼ pusicʼal» (Mt. 6:19-21). Jiñi lac pusicʼal mi caj i ñijcañonla lac sʌclan jiñi majtañʌl tac ñumen am bʌ i cʼʌjñibal lac chaʼan. Mi lac tempan ‹lac chubʌʼan ti panchan› cheʼ mi lac chaʼlen wersa chaʼan wen miʼ qʼuelonla Dios. Cheʼ bajcheʼ tsiʼ yʌlʌ Jesús, ili majtañʌl tac maʼañic miʼ mejlel ti jisʌntel o i xujchʼintel.

2. a) ¿Chuqui miʼ subeñonla lac mel Pablo yaʼ ti 2 Corintios 4:17, 18? b) ¿Chuqui mi caj lac tsajin ti ili estudio?

² Jiñi apóstol Pablo miʼ subeñonla chaʼan yom «mi lac xucʼchocon lac pusicʼal ti chuqui tac [...] mach bʌ tsiquilic» (pejcan 2 Corintios 4:17, 18). Ti jiñi majtañʌl tac mach bʌ mejlic laj qʼuel, yaʼ ochem jiñi bendición tac muʼ bʌ caj lac taj yaʼ ti tsijiʼ bʌ pañimil wʌn albil bʌ i chaʼan Dios. Ti ili estudio mi caj lac tsajin chʌmpʼejl majtañʌl mach bʌ mejlic laj qʼuel muʼ bʌ lac tajben i wenlel ili ora: Cheʼ la camigo Dios, jiñi oración, i coltaya jiñi chʼujul bʌ espíritu yicʼot jiñi coltaya muʼ bʌ i yʌqʼueñonla Jehová, Jesús yicʼot jiñi ángelob ti subtʼan. Cheʼ jaʼel, mi caj laj qʼuel bajcheʼ miʼ mejlel lac pʌs chaʼan mi laj qʼuel ti ñuc ili majtañʌl tac mach bʌ mejlic laj qʼuel.

3. ¿Baqui bʌ jiñi majtañʌl mach bʌ mejlic laj qʼuel ñumen ñuc bʌ i cʼʌjñibal, i chuqui miʼ yʌcʼ chaʼan miʼ mejlel lac taj?

³ Jiñi majtañʌl ñumen ñuc bʌ i cʼʌjñibal mach bʌ mejlic laj qʼuel jiñʌch cheʼ i yamigojonla Jehová (Stg. 2:23). Pero ¿bajcheʼ miʼ mejlel ti sujtel Dios tiʼ yamigo jiñi wiñicob xʼixicob (quixtañujob) xmuliloʼ bʌ yicʼot chʌn chʼujul miʼ yajñel? Come jiñi i cuxtʌlel tsaʼ bʌ i yʌcʼʌ Jesús miʼ «chʼʌm majlel i mul pejtel pañimil» (Jn. 1:29). Cheʼ bʌ maxto chʌmi Jesús, Jehová yujilix chaʼan xucʼul mi caj i yajñel i Yalobil cʼʌlʌl miʼ chʌmel (sajtel) chaʼan miʼ coltan jiñi quixtañujob. Jin chaʼan, Dios tsaʼ mejli ti sujtel tiʼ yamigojob jiñi quixtañujob tsaʼ bʌ chumleyob cheʼ bʌ maxto tilemic Cristo (Ro. 3:25).

4. Alʌ chaʼtiqui uxtiquil i yamigojob Dios tsaʼ bʌ chumleyob cheʼ bʌ maxto tilemic Cristo.

⁴ Laʼ lac taj ti tʼan chaʼtiqui uxtiquil i yamigojob Dios tsaʼ bʌ chumleyob cheʼ bʌ maxto tilemic Cristo. Abrahán tsiʼ wen pʌsʌ i ñopoñel. Cheʼ bʌ ñumeñix cabʌl jab tsaʼ chʌmi, Jehová tiʼ sube bajcheʼ: «C winiquet» o camigo (Is. 41:8). Jin chaʼan, mi jiñicto jiñi chʌmel miʼ mejlel i yʌcʼ chaʼan Jehová miʼ cʌy jiñi wem bʌ i yamigojob. Abrahán chʌn cuxul tiʼ ñaʼtʌbal Jehová (Lc. 20:37, 38). Job jiñʌch yambʌ wem bʌ ejemplo. Ti jumpʼejl bʌ qʼuin, cheʼ bʌ jiñi ángelob tsiʼ tempayob i bʌ yaʼ ti panchan, Jehová wen chuqui tsiʼ yʌlʌ tiʼ tojlel Job. Tsiʼ yʌlʌ: «Maʼanic yambʌ ti pañimil muʼ bʌ i cʼuxbin Dios bajcheʼ jini. Miʼ cʌntan i bʌ chaʼan mach miʼ taj mulil» (Job 1:6-8). ¿I chuqui tsaʼ cʼoti i ñaʼtan tiʼ tojlel Daniel, xucʼul bʌ tsiʼ melbe i yeʼtel (troñel) 80 jab ti jumpʼejl país baqui jiñi quixtañujob miʼ chʼujutesañob diosteʼ tac? Cheʼ bʌ ñoxix jiñi Daniel, jiñi ángelob uxyajl tiʼ subeyob chaʼan Dios miʼ wen cʼuxbin (Dn. 9:23; 10:11, 19). Miʼ mejlel lac ñop chaʼan Jehová yomix i chaʼ tejchesan jiñi cʼuxbibil bʌ i yamigojob (Job 14:15).

5. ¿Chuqui tac yom mi lac mel chaʼan mi lac sujtel ti wem bʌ i yamigojonla Jehová?

⁵ Ili ora, yonlel quixtañujob xmuliloʼ bʌ añob bajcheʼ wem bʌ i yamigojob Jehová. Cabʌl wiñicob, xʼixicob yicʼot alobob tiʼ pejtelel pañimil woli (choncol) i pʌsob tiʼ melbal chaʼan yomob sujtel tiʼ yamigo Dios. Jiñi Biblia miʼ yʌl chaʼan i yamigojob Jehová jiñi tojoʼ bʌ (Pr. 3:32, TNM). Miʼ mejlel i yajñelob bajcheʼ i yamigo come añob i ñopoñel ti jiñi i cuxtʌlel tsaʼ bʌ i yʌcʼʌ Jesús. Come tsaʼ ajqʼui jiñi i tojol laj coltʌntel, Jehová miʼ mejlel i yʌcʼ chaʼan mi la cʌqʼuen laj cuxtʌlel yicʼot mi lac chʼʌm jaʼ. Cheʼ mi lac mel ili ñuc tac bʌ i cʼʌjñibal, mi la cochel ti jiñi yonlel xñoptʼañob tsaʼix i bʌ i yʌcʼʌyob i cuxtʌlel tiʼ tojlel Dios yicʼot tsaʼix bʌ i chʼʌmʌyob jaʼ añobix bʌ bajcheʼ i yamigojob Jehová, jiñi ñumen ñuc bʌ ti panchan yicʼot ti pañimil.

6. ¿Bajcheʼ miʼ mejlel lac pʌs chaʼan mi laj qʼuel ti ñuc cheʼ i yamigojonla Dios?

⁶ ¿Bajcheʼ miʼ mejlel lac pʌs chaʼan mi laj qʼuel ti ñuc cheʼ i yamigojonla Dios? Jiñʌch cheʼ mi lac lajin Abrahán yicʼot Job. Xucʼul tsaʼ ajñiyob ti Dios cʼʌlʌl tsaʼ chʌmiyob, ñumen ti 100 jab. Cheʼʌch yom mi lac mel jaʼel, mach yʌlʌyic jaypʼejlix jab an i cajel lac melben i yeʼtel Jehová ti ili pañimil. Cheʼ jaʼel, yom mi lac lajin Daniel yicʼot mi laj qʼuel ti ñuc cheʼ i yamigojonla Jehová ñumento bajcheʼ laj cuxtʌlel (Dn. 6:7, 10, 16, 22). Tiʼ coltaya Jehová, miʼ mejlel lac lʌtʼ baqui jach bʌ wocol yicʼot miʼ mejlel lac chʌn ajñel bajcheʼ i yamigo (Is. 12:2).

7. a) Cheʼ bajcheʼ miʼ yʌl Proverbios 15:8, ¿bajcheʼ yilal miʼ qʼuel Dios jiñi la coración tac? b) ¿Bajcheʼ miʼ jacʼbeñonla?

⁷ Yambʌ majtañʌl mach bʌ mejlic laj qʼuel jiñʌch jiñi oración. Jiñi wem bʌ amigojob miʼ mulan i subeñob i bʌ chuqui miʼ ñaʼtañob yicʼot bajcheʼ yubil miʼ yubiñob i bʌ. Lajalʌch miʼ yujtel cheʼ i yamigojonla Jehová. Miʼ pejcañonla ti jiñi i Tʼan, jiñi Biblia, i yaʼi miʼ yʌqʼueñonla laj  cʌn chuqui miʼ ñaʼtan yicʼot bajcheʼ yubil miʼ yubin i bʌ. I joñonla mi lac pejcan ti oración. Cheʼ mi lac pejcan ti oración, miʼ mejlel lac suben chuqui mi lac ñaʼtan yicʼot bajcheʼ yubil mi la cubin lac bʌ ti lac pusicʼal. Jehová miʼ wen mulan i ñʌchʼtan la coración tac (pejcan Proverbios 15:8). Jiñʌch juntiquil la camigo muʼ bʌ i wen cʼuxbiñonla, jin chaʼan, mach cojach miʼ ñʌchʼtan la coración tac, mucʼʌch i jacʼbeñonla. An qʼuiñil, orajach miʼ jacʼbeñonla chuqui mi lac suben. Pero an i tajol, yomto mi lac bej mel oración. Bajcheʼic jach, Jehová mucʼʌch caj i jacʼbeñonla la coración cheʼ baʼ ora weñix miʼ qʼuel. Tajol mach cheʼic mi caj i jacʼbeñonla bajcheʼ tsaʼ lac pijta. Jumpʼejl ejemplo, cheʼ an jumpʼejl lac wocol mach ti orajic mi caj i locʼsan, pero mucʼʌch caj i yʌqʼueñonla lac ñaʼtʌbal yicʼot lac pʼʌtʌlel chaʼan mi lac lʌtʼ (1 Co. 10:13).

8. ¿Bajcheʼ miʼ mejlel lac pʌs chaʼan mi la cʌqʼuen wocolix i yʌlʌ Jehová chaʼan jiñi oración?

⁸ ¿Bajcheʼ miʼ mejlel lac pʌs chaʼan mi la cʌqʼuen wocolix i yʌlʌ Jehová chaʼan jiñi oración? Jumpʼejl ejemplo, jiñʌch cheʼ mi lac jacʼ iliyi: «Chʌn chaʼlenla oración» (1 Ts. 5:17). Jehová maʼañic miʼ wersa xicʼonla chaʼan mi lac pejcan ti oración. Mucʼ jach i yʌcʼ ti lac wenta lac ñaʼtan mi la com la pejcan ti oración i miʼ subeñonla chaʼan mi lac chʌn mel oración (Ro. 12:12). Jin chaʼan, ti jujumpʼejl qʼuin laʼ lac wen mel oración chaʼan mi lac pʌsben chaʼan mi laj qʼuel ti ñuc ili majtañʌl. Pero cheʼ mi lac mel oración, mach ñajʌyic lac chaʼan la cʌqʼuen wocolix i yʌlʌ yicʼot mi lac suben i ñuclel (Sal. 145:2, 3).

9. a) ¿Bajcheʼ miʼ qʼuel jiñi hermano Chris jiñi oración? b) ¿Bajcheʼ maʼ qʼuel jatet jiñi oración?

⁹ Cheʼ cabʌlix jab an i cajel lac melben i yeʼtel Jehová i an laj qʼuele bajcheʼ miʼ jacʼbeñonla la coración, ñumento yom mi laj qʼuel ti ñuc jiñi oración. Laʼ laj qʼuel chuqui tsiʼ yʌlʌ Chris, juntiquil hermano am bʌ i melbe i yeʼtel Jehová tiʼ pejtelel ora ti 47 jab: «Mic mulan tejchel ti sʌcʼan chaʼan mic jumucʼ pejcan Jehová cheʼ ñʌchʼʌlto pañimil. Wen utsʼatax cheʼ mi lac pejcan Jehová cheʼ wolito (yʌquelto) i loqʼuel tilel jiñi qʼuin i tiʼ pejtelel wen utsʼatax. Cheʼ mic mel iliyi, miʼ loqʼuel tic pusicʼal cʌqʼuen wocolix i yʌlʌ Jehová chaʼan pejtelel jiñi majtañʌl  am bʌ i yʌqʼueyon yicʼot chaʼan jiñi oración. I cheʼ miʼ ñumel jumpʼejl qʼuin, mic chaʼ mel oración i tijicñayix mic majlel ti wʌyel».

10. ¿Chucoch yom mi laj qʼuel ti ñuc jiñi chʼujul bʌ i yespíritu Dios?

¹⁰ Yambʌ majtañʌl mach bʌ mejlic laj qʼuel yom bʌ mi laj qʼuel ti ñuc jiñʌch jiñi chʼujul bʌ i yespíritu Dios. Jesús tsiʼ yʌlʌ chaʼan ti bele ora yom mi laj cʼajtin (Lc. 11:9, 13). Jehová miʼ cʼʌn jiñi chʼujul bʌ i yespíritu chaʼan miʼ yʌqʼueñonla «jini ñuc bʌ lac pʼʌtʌlel» (2 Co. 4:7; Hch. 1:8). Tiʼ coltaya chʼujul bʌ i yespíritu miʼ mejlel lac lʌtʼ baqui jach bʌ wocol.

11. ¿Bajcheʼ miʼ mejlel i coltañonla jiñi chʼujul bʌ espíritu?

¹¹ Jiñi chʼujul bʌ espíritu mi caj i coltañonla chaʼan wen mi lac tsʼʌctesan jiñi eʼtel tac muʼ bʌ la cʌqʼuentel tiʼ chaʼan bʌ Dios. Miʼ mejlel i weñʼesan jiñi la cujilix bʌ melol. Tiʼ sujm, la cujil chaʼan mach ti lac bajñel pʼʌtʼʌlelic mi lac taj pejtelel chuqui wem bʌ cheʼ mi lac melben i yeʼtel Jehová, jiñʌch miʼ coltañonla jiñi chʼujul bʌ espíritu.

12. Cheʼ bajcheʼ miʼ yʌl Salmo 139:23, 24, ¿chuqui miʼ mejlel laj cʼajtin ti oración?

¹² Yambʌ bajcheʼ mi lac pʌs chaʼan mi laj qʼuel ti ñuc jiñi chʼujul bʌ espíritu jiñʌch cheʼ mi laj cʼajtiben Jehová chaʼan miʼ coltañonla laj qʼuel mi an chuqui mach bʌ weñic ti lac pensar o ti lac pusicʼal (pejcan Salmo 139:23, 24). Jehová mi caj i jacʼbeñonla jiñi la coración cheʼ miʼ cʼʌn jiñi chʼujul bʌ i yespíritu chaʼan miʼ coltañonla laj qʼuel mi an mach bʌ weñic ti lac tojlel, i cheʼ jiñi mi lac tojʼesan. Mi añʌch, laʼ laj cʼajtiben chaʼan jiñi chʼujul bʌ i yespíritu miʼ yʌqʼueñonla lac pʼʌtʌlel chaʼan mi lac mʌlben jiñi mach bʌ weñic an ti lac pensar o ti lac pusicʼal. Cheʼʌch mi caj lac pʌs chaʼan mach la com lac mel mach bʌ weñic mejl bʌ i mʌctan jiñi Jehová chaʼan miʼ bej cʼʌn jiñi chʼujul bʌ i yespíritu chaʼan miʼ coltañonla (Ef. 4:30).

13. ¿Bajcheʼ miʼ mejlel lac ñumen qʼuel ti ñuc jiñi chʼujul bʌ espíritu?

¹³ Miʼ mejlel lac ñumen qʼuel ti ñuc jiñi chʼujul bʌ espíritu cheʼ mi lac wen ñaʼtan chuqui woli i mel ili ora. Cheʼ bʌ muʼto caj i letsel majlel ti panchan, Jesús tiʼ sube iliyi jiñi  xcʌntʼañob i chaʼan: «Mi caj laʼ wʌqʼuentel laʼ pʼʌtʌlel cheʼ miʼ yochel jini Chʼujul bʌ Espíritu ti laʼ pusicʼal. [...] Cʼʌlʌl ti ñajt bʌ pañimil mi caj laʼ sub chuqui tsaʼ laʼ qʼuele» (Hch. 1:8). Ili tʼan tac wen utsʼatax bajcheʼ an tsʼʌctiyi. Tiʼ coltaya jiñi chʼujul bʌ espíritu, an sujtiyob tiʼ testigo Jehová 8 millón yicʼot ojlil quixtañujob tiʼ pejtelel pañimil. Cheʼ jaʼel, añonla ti jumpʼejl tejclum lajal bʌ bajcheʼ jumpʼejl paraíso come jiñi chʼujul bʌ espíritu miʼ coltañonla lac pʌs wem bʌ melbal tac bajcheʼ jiñi cʼuxbiya, jiñi tijicñʌyel, jiñi ñʌchʼtʌlel, jiñi pijt, jiñi wenlel, jiñi i yutslel lac pusicʼal, jiñi ñopoñel, jiñi utslel yicʼot jiñi i ticʼol lac bʌ. Ili melbalʌl tac jiñʌch «i wut muʼ bʌ i yʌcʼ jiñi espíritu» (Gá. 5:22, 23, TNM). Tiʼ sujm, jiñi chʼujul bʌ espíritu jiñʌch jumpʼejl majtañʌl wen am bʌ i cʼʌjñibal.

14. ¿Majquiyob miʼ coltañonla cheʼ bʌ mi lac loqʼuel ti subtʼan?

¹⁴ An yambʌ lac majtan mach bʌ mejlic laj qʼuel: Jiñʌch cheʼ mi lac chaʼlen eʼtel yicʼot Jehová, Jesús yicʼot jiñi ángelob (2 Co. 6:1). An laj coltaya tiʼ tojlelob cheʼ mi lac loqʼuel ti subtʼan. Chaʼan miʼ taj i bʌ ti tʼan Pablo yicʼot jiñi yambʌ xsubtʼañob, tsiʼ yʌlʌ: «Joñon lojon xʼeʼtelon lojon yicʼot Dios» (1 Co. 3:9). Cheʼ mi lac loqʼuel ti subtʼan, mi lac chaʼlen eʼtel yicʼot Jesús jaʼel. Laʼ laj cʼajtesan chaʼan cheʼ bʌ Jesús tsaʼix i sube jiñi xcʌntʼañob chaʼan yom miʼ «sutqʼuiñob ti xcʌntʼañob winicob xʼixicob ti pejtelel pañimil», tsiʼ yʌlʌ: «Añon quicʼotetla» (Mt. 28:19, 20). ¿Ixcu jiñi ángelob? Mi laj qʼuel ti ñuc i coltaya jiñi ángelob cheʼ bʌ mi lac majlel lac subeñob «jini wen tʼan [...] jini chumuloʼ bʌ ti pañimil» (Ap. 14:6).

15. ¿Chuqui ti relato am bʌ ti Biblia miʼ pʌs chaʼan Jehová miʼ coltañonla ti lac subtʼan?

¹⁵ ¿Chuqui woliʼ yujtel tiʼ coltaya Jehová, Jesús yicʼot i yángelob? Cheʼ bʌ mi lac suben jiñi quixtañujob chaʼan jiñi i Yumʌntel Dios, an mucʼʌch bʌ i ñʌchʼtañob i miʼ jacʼob (Mt. 13:18, 23). ¿Majqui miʼ ñijcʌbeñob i pusicʼal chaʼan miʼ jacʼob? Jesús tsiʼ yʌlʌ: ‹Maʼanic majch miʼ mejlel i tilel baʼ añon, jini jach muʼ bʌ i wersa pʌy tilel c Tat› (Jn. 6:44). Yaʼ ti Biblia mi lac taj jumpʼejl relato muʼ bʌ i pʌs chaʼan cheʼʌchi. Ti jumpʼejl bʌ qʼuin, Pablo tiʼ sube wen tʼan jiñi xʼixicob mach bʌ yaʼic añob ti mal jiñi tejclum Filipos. Laʼ laj qʼuel chuqui miʼ yʌl jiñi Biblia tiʼ tojlel juntiquil, i cʼabaʼ Lidia: «Lac Yum tsiʼ jambe i pusicʼal chaʼan miʼ jacʼben i tʼan» (Hch. 16:13-15). Cheʼ bajcheʼ tsiʼ mele tiʼ tojlel Lidia, Jehová an pʌyʌ tilel cabʌl quixtañujob chaʼan miʼ yochelob tiʼ tejclum.

16. ¿Majqui yom miʼ yʌqʼuentel i ñuclel cheʼ an chuqui wen miʼ yujtel ti lac subtʼan?

¹⁶ ¿Majqui yom miʼ yʌqʼuentel i ñuclel cheʼ an chuqui wen miʼ yujtel ti lac subtʼan? Pablo tsiʼ jacʼʌ ili cʼajtiya cheʼ bʌ tiʼ tsʼijbube ili tʼan tac jiñi congregación am bʌ ti Corinto: «Joñon tsac chaʼle pacʼ. Apolos tsiʼ mulu. Dios tsiʼ yʌcʼʌ ti colel. Cheʼ jini mach ñuquic jini muʼ bʌ i chaʼlen pacʼ yicʼot jini muʼ bʌ i mul. Cojach ñuc Dios muʼ bʌ i yʌcʼ ti colel» (1 Co. 3:6, 7). Tiʼ pejtelel ora, cheʼ an chuqui wen miʼ yujtel ti lac subtʼan, Jehová yom mi la cʌqʼuen i ñuclel, cheʼ bajcheʼ tsiʼ mele Pablo.

17. ¿Bajcheʼ mi lac pʌs chaʼan mi laj qʼuel ti ñuc cheʼ mi lac chaʼlen eʼtel yicʼot Dios, Cristo yicʼot jiñi ángelob?

¹⁷ ¿Bajcheʼ mi lac pʌs chaʼan mi laj qʼuel ti ñuc cheʼ mi lac chaʼlen eʼtel yicʼot Dios, Cristo yicʼot jiñi ángelob? Jiñʌch cheʼ mi lac chaʼlen wersa lac suben jiñi wen tʼan jiñi quixtañujob. Cabʌl bajcheʼ miʼ mejlel lac mel, jumpʼejl ejemplo, cheʼ mi lac chaʼlen subtʼan baqui mi lac taj cabʌl ‹winicob xʼixicob yicʼot ti jujumpʼejl otot› (Hch. 20:20). Cabʌl hermanojob miʼ mulañob subtʼan yaʼ baqui jach miʼ tajob quixtañujob. Cheʼ bʌ mach i cʌñʌyobic juntiquil quixtañu, uts miʼ pejcañob yicʼot miʼ techob tʼan. Mi jiñi  quixtañu yomʌch tʼan, wen jach bajcheʼ miʼ subeñob chaʼan jiñi i Yumʌntel Dios.

18, 19. a) ¿Bajcheʼ mi lac bej coltañob jiñi quixtañujob muʼ bʌ lac subeñob jiñi wen tʼan? b) ¿Bajcheʼ tsiʼ colta Jehová jiñi Raphalalani?

¹⁸ Come mi lac chaʼlen eʼtel yicʼot Dios, mach cojach yom mi lac subeñob jiñi wen tʼan jiñi quixtañujob, yomʌch mi lac bej coltañob. Cheʼ bʌ juntiquil quixtañu miʼ mulan i ñʌchʼtan jiñi wen tʼan, mi lac chaʼlen wersa lac bej tsictesʌben o mi lac suben yambʌ chaʼan miʼ pejcan ti ora chaʼan miʼ tech i yʌqʼuen jumpʼejl estudio. Cheʼ bʌ juntiquil muʼ bʌ la cʌqʼuen estudio woliʼ chaʼlen wersa chaʼan miʼ sujtel ti xñoptʼan, mi lac taj lac tijicñʌyel cheʼ bʌ mi laj qʼuel chaʼan Jehová woliʼ coltan chaʼan miʼ qʼuextan i pensar yicʼot i pusicʼal.

¹⁹ Laʼ laj cʌn tiʼ tojlel Raphalalani, juntiquil xwujt yaʼ ti Sudáfrica. Tsaʼ cʼoti i wen mulan pejtelel woli bʌ i cʌntesʌntel yaʼ ti Biblia. Pero ñumen wocol tsiʼ yubi cheʼ bʌ tsiʼ pejca yaʼ ti Biblia chaʼan mach yomic miʼ pejcʌntel jiñi chʌmeñoʼ bʌ (Dt. 18:10-12). Cʼunteʼ cʼunteʼ, tsiʼ yʌcʼʌ chaʼan Dios miʼ qʼuextʌben i pensar. I ti wiʼil, tsiʼ cʌyʌ ajñel bajcheʼ xwujt, anquese yaʼʌch baqui miʼ taj taqʼuin chaʼan miʼ mʌcʼlan i bʌ. Ili ora añix 60 i jabilel i miʼ yʌl: «Mic wen aqʼueñob wocolix i yʌlʌ jiñi i testigojob Jehová come cabʌl bajcheʼ tsiʼ coltayoñob, jumpʼejl ejemplo, tsiʼ coltayoñob c taj jumpʼejl eʼtel. Pero ñumento mi cʌqʼuen wocolix i yʌlʌ Jehová come tsiʼ coltayon j qʼuextan c melbal, i ili ora mejlix c loqʼuel ti subtʼan bajcheʼ juntiquil Testigo tsaʼix bʌ i chʼʌmʌ jaʼ».

20. ¿Chuqui la com lac mel?

²⁰ Ti ili estudio tsaʼ lac taja ti tʼan chʌmpʼejl majtañʌl mach bʌ mejlic laj qʼuel. Jiñi ñumen ñuc bʌ i cʼʌjñibal jiñʌch cheʼ an bajcheʼ wem bʌ la camigo jiñi Jehová. Jin chaʼan, miʼ mejlel lac taj ili yambʌ majtañʌl tac mach bʌ mejlic laj qʼuel: Miʼ mejlel lac pejcan ti oración, miʼ coltañonla jiñi chʼujul bʌ i yespíritu, i mi lac taj laj coltʌntel tilem bʌ ti panchan chaʼan lac subtʼan. Laʼ com lac ñumen qʼuel ti ñuc ili majtañʌl tac mach bʌ mejlic laj qʼuel. I mi caj lac chʌn aqʼuen wocolix i yʌlʌ Jehová chaʼan an bajcheʼ ñumen wem bʌ la camigo.