CHAʼTIQUIL xchʼocob woliyob (choncolob) ti xʌmbal yaʼ baqui an cabʌl choñoñibʌl ti jiñi tejclum Baguio (Filipinas). Tsiʼ qʼueleyob jiñi carrito, pero maʼañic tsiʼ lʌcʼtesayob i bʌ. Juntiquil hermana i cʼabaʼ Helen am bʌ yaʼ ti carrito tsiʼ qʼuele jiñi xchʼocob, i tseʼtseʼña tsaʼ caji i mel i wut. Jiñi xchʼocob maʼañic tsaʼ waʼli i pejcañob, pero tsaʼʌch i wen mulayob cheʼ bʌ tseʼtseʼña tsiʼ mele i wut Helen.

Cheʼ bʌ wolix (yʌquelix) i chaʼ sujtelob tiʼ yotot ti autobús, tsiʼ qʼueleyob jumpʼejl colem bʌ letrero muʼ bʌ i yʌl jw.org yaʼ tiʼ Yotlel tempa bʌ. Tsaʼ cʼajtiyi i chaʼañob chaʼan lajal jach jiñi letra tsaʼ bʌ i qʼueleyob yaʼ ti carrito. Tsaʼ jubiyob yaʼ ti autobús i tsiʼ qʼueleyob bajcheʼ hora miʼ tempañob i bʌ jiñi congregación tac ti jiñi i Yotlel tempa bʌ.

Jiñi chaʼtiquil xchʼocob tsajñiyob ti tempa bʌ. I cheʼ bʌ wolito i yochelob yaʼ tiʼ Yotlel tempa bʌ, tsiʼ taja i qʼuelob Helen. Orajach tsiʼ cʌmbeyob i tseʼñal jiñi hermana. Helen miʼ yʌl: «Cheʼ woli i lʌcʼtesañob i bʌ baʼañon, tsaʼ cajiyon ti bʌqʼuen. Tsaʼ c ñaʼta chaʼan tsaʼ c mele mach bʌ weñic». Pero jiñi xchʼocob tiʼ subeyob Helen jiñi tsaʼ bʌ ujti.

Jiñi chaʼtiquil xchʼocob tsaʼʌch i wen mulayob jiñi tempa bʌ yicʼot cheʼ bʌ yaʼañob yicʼot jiñi hermanojob, lajal bajcheʼ añob ti yotot tsiʼ yubiyob. Cheʼ bʌ tsiʼ qʼueleyob chaʼan jiñi hermanojob woliʼ sʌqʼuesañob jiñi i Yotlel tempa bʌ, tsaʼ cajiyob ti coltaya jaʼel. Juntiquil mach yaʼix chumul ti jiñi país, i jiñi yambʌ xchʼoc tsaʼ caji ti cʼotel ti tempa bʌ tac yicʼot tsaʼ caji ti estudio... Jin chaʼan, ñuc i cʼʌjñibal cheʼ tseʼtseʼñayonla.