1. ¿Chuqui tac tiʼ caj juntiquil wiñic mach tojic chuqui miʼ mel tiʼ tojlel i familia?

¿CHUQUI miʼ tilel ti a pensar cheʼ bʌ maʼ wubin jiñi tʼan «i jol familia»? An wiñicob mach bʌ tojic chuqui miʼ melob tiʼ tojlel i yijñam yicʼot i yalobilob tiʼ caj i culturajob o bajcheʼ tsaʼ coliyob. Juntiquil hermana chumul bʌ ti Europa i cʼabaʼ Yanita, miʼ yʌl: «Yaʼ baqui chumulon miʼ yʌlob chaʼan jiñi xʼixicob maʼañobic i cʼʌjñibal yicʼot chaʼan yom jach miʼ qʼuejlelob bajcheʼ xyaj eʼtelob (troñelob)». I juntiquil hermano chumul bʌ ti Estados Unidos i cʼabaʼ Luke, miʼ yʌl: «An tatʌlob muʼ bʌ i subeñob i yalobil chaʼan maʼañic i cʼʌjñibal muʼ bʌ i yʌl jiñi xʼixicob, jin chaʼan maʼañic miʼ qʼuejlel ti ñuc muʼ bʌ i yʌlob». Pero mach jiñic yom bʌ Jehová chaʼan miʼ mel jiñi wiñicob tiʼ tojlel i yijñamob (laja yicʼot Marcos 7:13). ¿Bajcheʼ miʼ mejlel ti sujtel ti wem bʌ i jol familia jiñi wiñic?

2. ¿Chuqui yom yujil juntiquil i jol familia, i chucoch?

² Chaʼan juntiquil wiñic miʼ sujtel ti wem bʌ i jol familia, ñaxan yom miʼ chʼʌmben i sujm chuqui miʼ pijtan Jehová tiʼ tojlel, chucoch tsiʼ waʼchoco jiñi eʼtel tac yicʼot bajcheʼ tac miʼ mejlel i lajin Jehová yicʼot Jesús. ¿Chucoch ñuc i cʼʌjñibal cheʼ juntiquil wiñic miʼ ñaʼtan pejtelel iliyi? Come Jehová an i yʌqʼue eʼtel jiñi i jol familia i miʼ pijtan chaʼan wen miʼ melob jiñi eʼtel (Lc. 12:48b).

3. Cheʼ bajcheʼ miʼ yʌl 1 Corintios 11:3 (TWT), ¿chuqui jiñi eʼtel tsaʼ bʌ aqʼuentiyob jiñi yambʌlob?

³ (Pejcan 1 Corintios 11:3, TWT). * Jehová jiñʌch ñumen am bʌ i yeʼtel i añʌch i wen chajpa jiñi i familia. An i yʌqʼue eʼtel tac jiñi i yalobilob am bʌ ti panchan yicʼot am bʌ ila ti Lum, pero  Jehová yujilʌch bajcheʼ yilal woli (choncol) i melob i yeʼtel (Ro. 14:10; Ef. 3:14, 15). Jehová an i yʌqʼue Jesús i yeʼtel chaʼan miʼ cʌntan jiñi congregación, pero Jesús yujilʌch chaʼan Jehová woli (yʌquel) i qʼuel bajcheʼ yilal woliʼ mel jiñi eʼtel (1 Co. 15:27). Jehová an i waʼchoco jiñi wiñic bajcheʼ i jol jiñi familia, i Jehová yicʼot Jesús yujilob bajcheʼ yilal woliʼ mel tiʼ tojlel i familia (1 P. 3:7).

4. ¿Chuqui ti eʼtel an i chaʼan Jehová yicʼot Jesús?

⁴ Jehová jiñʌch i jol i familia am bʌ ti panchan yicʼot am bʌ ila ti Lum, jin chaʼan mejlʌch i yʌqʼuen mandar tac i yalobilob yicʼot i suben chaʼan miʼ tsʼʌctesañob (Is. 33:22). Jesús jiñʌch i jol pejtelel jiñi congregación, jin chaʼan miʼ mejlel i yʌcʼ mandar tac jaʼel yicʼot miʼ yʌl chaʼan yom miʼ tsʼʌctesʌntel (Gá. 6:2; Col. 1:18-20).

5. ¿Chuqui i yeʼtel jiñi i jol familia, i baqui jach jaxʌl i yeʼtel?

⁵ Lajal bajcheʼ Jehová yicʼot Jesús, jiñi hermano i jol bʌ familia miʼ mejlel i yʌl chuqui yom miʼ mejlel tiʼ familia (Ro. 7:2; Ef. 6:4). Pero an jach baqui jaxʌl i yeʼtel. Jumpʼejl ejemplo, jiñi muʼ bʌ i ñaʼtan i mel yom chucul ti jiñi principio tac am bʌ ti Biblia (Pr. 3:5, 6). Cheʼ jaʼel, juntiquil i jol familia maʼañic tiʼ wenta miʼ suben chuqui yom miʼ mel jiñi mach bʌ i familiajic (Ro. 14:4). Anquese maʼañix tiʼ wenta jiñi i yalobilob cheʼ bʌ ñucobix yicʼot cheʼ bʌ bajñel chumulobix, wersa yomʌch miʼ qʼuejlel ti ñuc (Mt. 19:5).

6. ¿Chucoch Jehová tsiʼ waʼchoco eʼtel tac?

⁶ Jumpʼejlʌch majtañʌl cheʼ bʌ Jehová tsiʼ waʼchoco eʼtel tac tiʼ familia. Jin chaʼan, jiñi i familia Jehová utsʼat an yicʼot chajpʌbil chuqui miʼ mejlel (1 Co. 14:33, 40, TNM). Cheʼ machic la cujilic majqui jiñi tsaʼ bʌ waʼchocontiyob, mach chajpʌbilic chuqui miʼ mejlel yicʼot maʼañic majqui tijicña. Jumpʼejl ejemplo, maʼañic majqui mi caj i ñaʼtan majqui mi caj i yʌl chuqui mi caj i ñoj mejlel yicʼot mi muqʼuicto caj i ñaʼtʌntel majqui mi caj i ñaxan mel.

7. Cheʼ bajcheʼ miʼ yʌl Efesios 5:25, 28, ¿chuqui yom Jehová chaʼan miʼ mel jiñi wiñic tiʼ tojlel i yijñam?

⁷ Mi utsʼatʌch bajcheʼ Dios tsiʼ waʼchoco jiñi eʼtel tac, ¿chucoch an xʼixicob ticʼlʌbiloʼ bʌ miʼ yubiñob i bʌ tiʼ tojlel i ñoxiʼal? Come cabʌl wiñicob maʼañic miʼ jacʼob jiñi principio tac am bʌ i yʌcʼʌ Jehová chaʼan jiñi familia, i miʼ melob jiñi ñʌmʌl bʌ i melob jiñi yambʌlob. Cheʼ jaʼel, miʼ mejlel i melob mach bʌ weñic tiʼ tojlelob i yijñam come an chuqui yom i poj tajob. Jumpʼejl ejemplo, tiʼ caj ñumen ñuc yom miʼ yubiñob i bʌ o chaʼan miʼ pʌsben jiñi yambʌlob chaʼan «wiñicʌch». Tajol miʼ ñaʼtan chaʼan anquese mach mejlic i wersa xicʼ i yijñam chaʼan miʼ cʼuxbin, añʌch chuqui miʼ mejlel i mel chaʼan jiñi i yijñam miʼ bʌcʼñan. An cheʼ bʌ miʼ melob come yomob chaʼan jiñi i yijñam miʼ jacʼ pejtelel chuqui miʼ yʌl. * Jiñi muʼ bʌ i melob bajcheʼ ili, miʼ pʌsob chaʼan maʼañic miʼ qʼuelob ti ñuc jiñi xʼixicob cheʼ bajcheʼ i wentʌlel yom. I maʼañic miʼ melob muʼ bʌ i yʌl Jehová (pejcan Efesios 5:25, 28).

8. ¿Bajcheʼ miʼ mejlel ti sujtel ti wem bʌ i jol familia jiñi wiñic?

⁸ Juntiquil wiñic miʼ mejlel ti sujtel ti wem bʌ i jol familia cheʼ bʌ miʼ lajin bajcheʼ yilal miʼ cʼʌn Jehová yicʼot Jesús jiñi eʼtel am bʌ i chaʼañob. Laʼ laj qʼuel chaʼpʼejl melbalʌl (chaʼlibal) muʼ bʌ i pʌsob yicʼot laʼ laj qʼuel bajcheʼ jiñi i jol familia  miʼ mejlel i pʌs ili melbalʌl tac cheʼ bʌ yaʼan yicʼot i yijñam o yicʼot i yalobilob.

9. ¿Bajcheʼ miʼ pʌs i pecʼlel Jehová?

⁹ Jiñi pecʼlel. Jehová jiñʌch ñumen am bʌ i ñaʼtʌbal, pero miʼ ñʌchʼtan chuqui miʼ yʌl jiñi i wiñicob (Gn. 18:23, 24, 32). Cheʼ jaʼel, an i yʌcʼʌ chaʼan jiñi i wiñicob miʼ yʌlob chuqui yom miʼ mejlel (1 R. 22:19-22). I maʼañic miʼ pijtan chaʼan pejtelel chuqui mi lac mel toj miʼ loqʼuel. Miʼ coltan jiñi i wiñicob chaʼan wen chuqui tac miʼ melob anquese mach tojobic (Sal. 113:6, 7). Yaʼ ti Biblia mi lac taj chaʼan David tiʼ sube Jehová: «Jatetʌch muʼ bʌ a coltañon» (Sal. 27:9, TNM; He. 13:6). David yujil chaʼan pejtelel chuqui tsaʼ bʌ i mele, jiñʌch Jehová tsaʼ bʌ i colta come añʌch i pecʼlel (2 S. 22:36).

10. ¿Bajcheʼ tsiʼ pʌsʌ i pecʼlel Jesús?

¹⁰ Laʼ laj qʼuel jiñi i yejemplo Jesús. Jesús tsaʼʌch i pocbe i yoc jiñi i yapóstolob anquese tiʼ subeyob tiʼ ‹Maestro yicʼot tiʼ Yum›. ¿Chucoch Jehová tsiʼ yʌcʼʌ tiʼ tsʼijbuntel ili relato yaʼ ti Biblia? Come yom chaʼan ti lac pejtelel, jinto jaʼel jiñi i jol bʌ familia, mi laj cʌn bajcheʼ yilal yom mi lac pʌs lac pecʼlel. Jesús tsiʼ yʌlʌ: «Tsac pʌsbeyetla chuqui wen chaʼan cheʼʌch yom mi laʼ mel jatetla jaʼel cheʼ bajcheʼ tsac melbeyetla» (Jn. 13:12-17). Anquese Jesús an wen ñuc bʌ i yeʼtel, tsaʼʌch i colta jiñi yañoʼ bʌ (Mt. 20:28).

11. ¿Chuqui miʼ cʌñob tiʼ tojlel Jehová yicʼot Jesús jiñi i joloʼ bʌ familia?

¹¹ ¿Chuqui miʼ cʌntesañonla iliyi? Juntiquil i jol familia an cabʌl bajcheʼ miʼ mejlel i pʌs i pecʼlel. Jumpʼejl ejemplo, maʼañic miʼ pijtan chaʼan jiñi i yijñam yicʼot i yalobilob tojob. Miʼ ñʌchʼtan chuqui miʼ yʌl jiñi i familia anquese mach lajalic chuqui miʼ ñaʼtan. Marley, chumul bʌ ti Estados Unidos, miʼ yʌl: «Jiñi c ñoxiʼal yicʼot joñon mach junlajalic chuqui mic ñaʼtan lojon, pero mij qʼuel chaʼan mucʼʌch i qʼuelon ti ñuc come cheʼ bʌ an chuqui yom melol mucʼʌch i ñaxan cʼajtibeñon bajcheʼ yilal mij qʼuel». Juntiquil wiñic añʌch bʌ i pecʼlel miʼ chaʼlen coltaya tiʼ yotot, anquese yaʼ baqui chʼoyol mach weñic miʼ qʼuelob come miʼ yʌlob chaʼan i yeʼtel xʼixic. Iliyi mach cʼuñic ti melol. ¿Chucoch? Juntiquil hermana i cʼabaʼ Rachel miʼ yʌl: «Yaʼ baqui tsaʼ coliyon, mi juntiquil wiñic miʼ coltan i yijñam i poc plato o miʼ sʌqʼuesan i yotot, jiñi i piʼʌlob ti chumtʌl yicʼot i familiajob mi caj i ñaʼtañob chaʼan ‹mach wen wiñiquic›. Come miʼ ñaʼtañob chaʼan jiñi i yijñam  jiñʌch muʼ bʌ i chaʼlen xicʼoñel». Mi cheʼ miʼ ñaʼtañob jaʼel yaʼ baqui chumulet, cʼajtesan chaʼan Jesús tsiʼ pocbe i yoc i yapóstolob anquese ili eʼtel miʼ mel juntiquil xyaj eʼtel. Juntiquil wem bʌ i jol familia mi caj i qʼuel chaʼan jiñi i yijñam yicʼot i yalobilob wen miʼ yajñelob, i maʼañic mi caj i pensarin chuqui miʼ yʌl yambʌlob. Wʌle laʼ laj qʼuel chuqui ti melbalʌl yom an i chaʼan juntiquil i jol familia.

12. Come Jehová yicʼot Jesús miʼ cʼuxbiñonla, ¿chuqui miʼ melob?

¹² Jiñi cʼuxbiya. Tiʼ pejtelel chuqui miʼ mel Jehová, miʼ mel chaʼañʌch an i cʼuxbiya (1 Jn. 4:7, 8). Miʼ pʌsbeñonla cheʼ bʌ miʼ cʼʌn jiñi Biblia yicʼot jiñi i yorganización chaʼan miʼ cʌntesañonla yicʼot miʼ coltañonla chaʼan wen mi la cubin lac bʌ cheʼ bʌ miʼ cʼajtesʌbeñonla chaʼan miʼ cʼuxbiñonla. Cheʼ jaʼel, Jehová miʼ yʌqʼueñonla pejtelel chuqui i cʼʌjñibal bʌ lac chaʼan chaʼan tijicña mi la cubin lac bʌ (1 Ti. 6:17). Mi tsaʼ lac mele mach bʌ weñic, Jehová miʼ tojʼesañonla i maʼañic miʼ cʌy i cʼuxbiñonla. Come Jehová miʼ cʼuxbiñonla, tsiʼ yʌcʼʌ i Yalobil chaʼan miʼ coltañonla. I Jesús mucʼʌch i wen cʼuxbiñonla, jin chaʼan tsiʼ yʌcʼʌ i cuxtʌlel chaʼañonla (Jn. 3:16; 15:13). Maʼañic chuqui miʼ mejlel i mʌctan chaʼan Jehová yicʼot Jesús miʼ cʼuxbin jiñi xucʼuloʼ bʌ (Jn. 13:1; Ro. 8:35, 38, 39).

13. ¿Chucoch ñucʌch i cʼʌjñibal chaʼan jiñi i jol familia miʼ pʌs cʼuxbiya? (Qʼuele jaʼel jiñi recuadro: « ¿Chuqui miʼ mejlel i mel juntiquil wiñic tsijib ñujpuñem bʌ chaʼan miʼ qʼuejlel ti ñuc tiʼ yijñam?»).

¹³ ¿Chuqui miʼ cʌntesañonla iliyi? Tiʼ pejtelel chuqui miʼ mel juntiquil i jol familia yom miʼ mel yicʼot i cʼuxbiya. ¿Chucoch ñuc i cʼʌjñibal? Jiñi apóstol Juan tsiʼ yʌlʌ: «Mi mach cʼuxic miʼ yubin i yermano [o i familia] tsaʼ bʌ i qʼuele, ¿bajcheʼ mi mejlel i cʼuxbin Dios mach bʌ anic tsiʼ qʼuele?» (1 Jn. 4:11, 20). Jin chaʼan, juntiquil wiñic muʼ bʌ i cʼuxbin i familia yicʼot yom bʌ i lajin Jehová yicʼot Jesús miʼ chaʼlen wersa chaʼan jiñi i familia miʼ colel tiʼ chaʼan bʌ Dios, chaʼan wen miʼ yubiñob i bʌ yicʼot miʼ yʌqʼuen chuqui i cʼʌjñibal bʌ i chaʼan (1 Ti. 5:8). Miʼ cʌntesan i yalobilob yicʼot mi caj i chʌn cʌn chuqui yom miʼ mel chaʼan miʼ coltan i familia  yicʼot miʼ yʌqʼuen i ñuclel Jehová. Jin chaʼan, laʼ laj qʼuel jujunchajp yom bʌ miʼ mel jiñi i jol familia chaʼan miʼ lajin jiñi i yejemplo Jehová yicʼot Jesús.

14. ¿Chuqui yom miʼ mel juntiquil i jol familia chaʼan pʼʌtʌl miʼ yajñelob tiʼ chaʼan bʌ Dios jiñi i familia?

¹⁴ Yom miʼ coltan jiñi i familia chaʼan miʼ colelob tiʼ chaʼan bʌ Dios. Jesús tsiʼ laji i Tat come tsiʼ chaʼle wersa chaʼan jiñi xcʌntʼañob i chaʼan pʼʌtʌlob tiʼ chaʼan bʌ Dios (Mt. 5:3, 6; Mr. 6:34). Cheʼ jaʼel, juntiquil i jol familia yom miʼ qʼuel chaʼan jiñi i familia pʼʌtʌl miʼ yajñelob tiʼ chaʼan bʌ Dios (Dt. 6:6-9). Jin chaʼan, yom miʼ pejcañob jiñi Biblia, yom miʼ yajñelob ti tempa bʌ, yom miʼ chaʼleñob subtʼan yicʼot yom miʼ chaʼleñob wersa chaʼan wem bʌ i yamigojob Jehová.

15. ¿Chuqui yom miʼ mel juntiquil i jol familia chaʼan tijicña miʼ yajñel i familia?

¹⁵ Yom miʼ coltan jiñi i familia chaʼan tijicña miʼ yajñelob. Jehová maʼañic tsiʼ bʌcʼña i suben Jesús chaʼan miʼ cʼuxbin cheʼ bʌ an yambʌ woli bʌ i ñʌchʼtañob (Mt. 3:17). Jesús añʌch chuqui tac tsiʼ mele yicʼot tsiʼ yʌlʌ chaʼan miʼ pʌsbeñob jiñi xcʌntʼañob i chaʼan chaʼan mucʼʌch i cʼuxbiñob. I jiñi xcʌntʼañob i chaʼan tsaʼʌch i subeyob chaʼan mucʼʌch i cʼuxbiñob jaʼel (Jn. 15:9, 12, 13; 21:16). Juntiquil i jol familia miʼ mejlel i pʌsben i yijñam yicʼot i yalobilob chaʼan mucʼʌch i cʼuxbiñob cheʼ bʌ an chuqui miʼ mel tiʼ tojlelob, jumpʼejl ejemplo, cheʼ bʌ miʼ tem pejcañob jiñi Biblia. Cheʼ jaʼel, yom miʼ subeñob chaʼan miʼ cʼuxbiñob yicʼot miʼ qʼuelob ti ñuc, i cheʼ baʼ ora wen miʼ qʼuel miʼ mejlel i subeñob utsʼatax bʌ tʼan cheʼ bʌ yaʼan yicʼot yambʌlob (Pr. 31:28, 29).

16. a) ¿Chuqui yambʌ yom miʼ mel jiñi i jol familia? b) ¿Chuqui mach yomic miʼ mel juntiquil i jol familia?

¹⁶ Yom miʼ yʌqʼuen chuqui i cʼʌjñibal bʌ i chaʼan i familia. Jehová tsaʼʌch i yʌqʼueyob jiñi israelitajob chuqui i cʼʌjñibal bʌ i chaʼañob anquese tsiʼ yʌqʼueyob i toj i mul tiʼ caj i ñusatʼañob (Dt. 2:7; 29:5). Ti ili ora jaʼel, Jehová mucʼʌch i yʌqʼueñonla chuqui i cʼʌjñibal bʌ lac chaʼan (Mt. 6:31-33; 7:11). Jesús cheʼʌch tsiʼ mele jaʼel, tsiʼ yʌqʼue jiñi i bʌl i ñʌcʼ jiñi xcʌntʼañob i chaʼan yicʼot tsiʼ qʼuele chaʼan cʼocʼ miʼ yajñelob (Mt. 4:24; 14:17-20). Chaʼan juntiquil i jol familia wen miʼ qʼuejlel ti Jehová, yom miʼ yʌqʼuen i cʼʌjñibal bʌ i chaʼan jiñi i familia. Pero yom pʼisbil jach chuqui miʼ mel. Mach yomic miʼ ñusan cabʌl hora tiʼ yeʼtel chaʼan cheʼ jiñi maʼañic miʼ mʌctan chaʼan miʼ yʌqʼuen jiñi i familia i cʼʌjñibal bʌ i chaʼan ti Dios yicʼot chaʼan miʼ coltañob chaʼan tijicña miʼ yajñelob.

17. ¿Bajcheʼ miʼ cʌntesañonla yicʼot miʼ ticʼonla Jehová yicʼot Jesús?

¹⁷ Yom miʼ cʌntesan yicʼot yom miʼ yʌqʼueñob ticʼojel. Jehová miʼ cʌntesañonla yicʼot miʼ ticʼonla chaʼan wen mi la cajñel (He. 12:7-9). Jesús cheʼʌch tsiʼ mele jaʼel, tsiʼ cʌntesa yicʼot tsiʼ yʌqʼue ticʼojel jiñi añoʼ bʌ tiʼ wenta (Jn. 15:14,  15). Jesús miʼ yʌcʼ tsʌts bʌ ticʼojel, pero yicʼotʌch i cʼuxbiya miʼ mel (Mt. 20:24-28). Yujil chaʼan xmulilonla yicʼot chaʼan an i tajol mi lac mel mach bʌ weñic (Mt. 26:41).

18. ¿Chuqui yom cʼajal i chaʼan juntiquil i jol familia?

¹⁸ Juntiquil i jol familia muʼ bʌ i lajin Jehová yicʼot Jesús yujil chaʼan jiñi i yijñam yicʼot i yalobilob mach tojobic, i maʼañic miʼ michʼan yicʼotob (Col. 3:19). Miʼ chʼʌm ti ñuc jiñi principio am bʌ ti Gálatas 6:1, i cheʼ bʌ miʼ yʌcʼ jiñi ticʼojel miʼ yʌcʼ yicʼot i ‹yutslel i pusicʼal›, i maʼañic miʼ ñajʌyel i chaʼan chaʼan jiñi i familia xmulilobʌch jaʼel. Lajal bajcheʼ tsiʼ mele Jesús, jiñi i jol familia yujil chaʼan jiñʌch yom miʼ ñaxan pʌs wem bʌ ejemplo mi yom i chaʼlen cʌntesa (1 P. 2:21).

19, 20. ¿Bajcheʼ miʼ mejlel i lajin Jehová yicʼot Jesús jiñi i jol familia cheʼ bʌ an chuqui yom miʼ ñaʼtan i mel?

¹⁹ Yom miʼ ñaʼtan i mel jiñi muʼ bʌ caj i coltan i familia. Cheʼ bʌ Jehová an chuqui miʼ ñaʼtan i mel chaʼañʌch wen mi la cajñel. Jumpʼejl ejemplo, mach chaʼan i wenlel tsiʼ mele chuqui tac an, chaʼañʌch mi la cubin lac tijicñʌyel cheʼ bʌ cuxulonla. Maʼañic majqui tsiʼ xiqʼui Jehová chaʼan miʼ yʌcʼ ti chʌmel i Yalobil ti laj caj. Tsaʼʌch i mele chaʼan miʼ coltañonla. Cheʼ jaʼel, Jesús añʌch chuqui tac tsiʼ mele chaʼan miʼ coltan jiñi yambʌlob (Ro. 15:3). Jumpʼejl ejemplo, anquese wen lujbix tsiʼ cʌntesa cabʌl wiñicob xʼixicob (Mr. 6:31-34).

²⁰ Juntiquil wem bʌ i jol familia yujilʌch chaʼan wocolʌch chaʼan miʼ ñaʼtan i mel muʼ bʌ caj i wen coltan jiñi i familia, i mucʼʌch i wen qʼuel ti ñuc jiñi i yeʼtel. Miʼ chaʼlen wersa chaʼan maʼañic miʼ ñaʼtan i bajñel mel muʼ bʌ i mulan o jiñi muʼ bʌ i waʼ tilel tiʼ jol. Miʼ yʌcʼ chaʼan jiñʌch Jehová muʼ bʌ i cʌntesan chaʼan wen chuqui muʼ bʌ i ñaʼtan i mel. Cheʼ bajcheʼ jiñi, mi caj i ñaʼtan jiñi muʼ bʌ caj i ñumen coltan yambʌlob i mach jiñic muʼ bʌ caj i bajñel coltan (Pr. 2:6, 7; Fil. 2:4). *

21. ¿Chuqui mi caj laj qʼuel yaʼ ti yambʌ estudio?

²¹ Jehová an i yʌqʼue jiñi i jol familia wen tsʌts bʌ eʼtel, i miʼ pijtan chaʼan wen miʼ mel i yeʼtel. Pero mi jiñi wiñic ñujpuñem bʌ mucʼʌch i chaʼlen wersa i lajiben i yejemplo Jehová yicʼot Jesús, mi caj i sujtel ti wem bʌ i jol familia. I mi jiñi i yijñam mucʼʌch i mel jiñi am bʌ tiʼ wenta, tijicña mi caj i yajñelob tiʼ ñujpuñel. ¿Bajcheʼ yilal yom miʼ qʼuel jiñi ijñamʌl jiñi eʼtel tsaʼ bʌ aqʼuenti i ñoxiʼal, i chuqui tac ti wocol miʼ taj? Ili mi caj laj qʼuel yaʼ ti yambʌ estudio.