1. ¿Baqui tac bʌ cʼajtiya yom miʼ melben i bʌ juntiquil hermana cheʼ bʌ woliʼ ñaʼtan ñujpuñel?

TI LAC pejtelel jiñi xñoptʼañonbʌla añonla tiʼ wenta Jesucristo come jiñʌch i jol jiñi congregación, i mach xmulilic bajcheʼ joñonla. Pero cheʼ bʌ juntiquil hermana miʼ ñujpuñel miʼ yochel tiʼ wenta juntiquil wiñic xmulil bʌ, i an i tajol wocolʌch miʼ yubin chaʼan miʼ jacʼben i tʼan. Jin chaʼan, mi woli (choncol) a ñaʼtan ñujpuñel a wicʼot juntiquil hermano, yom maʼ cʼajtiben a bʌ: «¿Bajcheʼ cujil chaʼan ili hermano mi caj i sujtel ti wem bʌ i jol familia? ¿Ñaxam ba miʼ yʌcʼ tiʼ cuxtʌlel i melol i yeʼtel Jehová? Mi mach cheʼiqui, ¿bajcheʼ cujil chaʼan mucʼʌch caj i wen coltañon tiʼ chaʼan bʌ Dios cheʼ bʌ tsaʼix ñujpuñiyon lojon?». Cheʼ jaʼel, cʼajtiben a bʌ: «¿Baqui bʌ melbalʌl yom an c chaʼan chaʼan chʌn temel mi lon cajñel cheʼ bʌ ñujpuñemoñix lojon? ¿Muʼ ba c pʌs cutslel? ¿Ti ora ba mic michʼan? ¿Pʼʌtʌlʌch ba añon tiʼ chaʼan bʌ Jehová?» (Ec. 4:9, 12). Jiñi xʼixic tijicña mi caj i yubin i bʌ cheʼ bʌ ñujpuñemix mi mucʼʌch i wen ñaʼtan chuqui mi caj i mel cheʼ bʌ maxto ñujpuñemic.

2. ¿Chuqui mi caj laj qʼuel ti ili estudio?

² Cabʌl hermanajob miʼ yʌcʼob wem bʌ ejemplo cheʼ miʼ jacʼbeñob i tʼan i ñoxiʼal. Tijicña mi la cubin bʌ cheʼ bʌ mi lac melben i yeʼtel (troñel) Jehová yicʼot ili hermanajob, i la com lac subeñob chaʼan weñʌch woli (yʌquel) bʌ i melob. Ti ili estudio, mi caj laj qʼuelben i jacʼbal ili uxpʼejl cʼajtiya: ¿Chuqui tac ti wocol tajol miʼ ñusañob jiñi ijñamʌlob? ¿Chucoch jiñi ijñamʌlob miʼ chʼʌmob ti ñuc jiñi eʼtel tsaʼ bʌ aqʼuentiyob i ñoxiʼal? ¿Chuqui miʼ mejlel i cʌñob jiñi xñujpuñelob tiʼ tojlel Jesús,  Abigaíl yicʼot María jiñi i mamá Jesús, chaʼan bajcheʼ tsiʼ qʼueleyob ti ñuc jiñi eʼtel tsaʼ bʌ aqʼuentiyob yambʌlob?

3. ¿Am ba jumpʼejl xñujpuñel mach bʌ añic miʼ ñusañob wocol?

³ Jiñi ñujpuñel jiñʌch jumpʼejl wem ñuc bʌ majtañʌl tilem bʌ ti Dios, pero jiñi wiñicob xʼixicob luʼ xmulilonla (1 Jn. 1:8). Jin chaʼan, jiñi i Tʼan Dios miʼ yʌl chaʼan jiñi muʼ bʌ i ñujpuñelob «mi caj i yubiñob wocol» (1 Co. 7:28). Laʼ laj qʼuel baqui tac bʌ wocol miʼ mejlel i ñusan jiñi ijñamʌl.

4. ¿Chucoch an i tajol juntiquil xʼixic miʼ cʼotel i yubin chaʼan maʼañix i cʼʌjñibal cheʼ bʌ miʼ jacʼben i tʼan i ñoxiʼal?

⁴ Tajol juntiquil xʼixic miʼ cʼotel i yubin chaʼan maʼañix i cʼʌjñibal cheʼ bʌ miʼ jacʼben i tʼan i ñoxiʼal come cheʼʌch tsaʼ cʌntesʌnti. Juntiquil hermana chumul bʌ ti Estados Unidos i cʼabaʼ Marisol, miʼ yʌl: «Yaʼ baqui tsaʼ coliyon, tiʼ pejtelel ora miʼ subentel jiñi xʼixicob chaʼan yom junlajalob cheʼ bajcheʼ jiñi wiñicob. Joñon cujil chaʼan Jehová tsiʼ yʌqʼue eʼtel tac jiñi wiñicob i chaʼan jiñi ijñamʌlob yom miʼ jacʼbeñob i tʼan i ñoxiʼal, pero chaʼan yomʌch miʼ qʼuejlel ti ñuc jaʼel jiñi xʼixicob. Anquese cheʼʌchi, an i tajol wocolʌch chaʼan mi lac jacʼ».

5. ¿Chuqui mach bʌ weñic miʼ ñaʼtañob jiñi wiñicob tiʼ tojlel jiñi xʼixicob?

⁵ Cheʼ jaʼel, tajol juntiquil xʼixic ñujpuñem yicʼot juntiquil wiñic muʼ bʌ i ñaʼtan chaʼan jiñi xʼixicob maʼañobic i cʼʌjñibal. Juntiquil hermana chumul bʌ ti Sudamérica i cʼabaʼ Ivón, miʼ yʌl: «Yaʼ baqui chumulon, jiñi wiñicob miʼ ñaxan cʼuxob i waj i ti wiʼil jiñi xʼixicob. Cʼʌlʌl cheʼ bʌ chutobto jiñi xchʼocob, miʼ pijtʌntel chaʼan yujilobix melol uchʼel yicʼot yujilobix sujcuntel i yototob, pero jiñi chʼitoñob miʼ luchbentelob i bʌl i ñʌcʼ, i miʼ subentelob chaʼan jiñobʌch jiñi ‹rey yaʼ tiʼ yototob›». Juntiquil hermana chumul bʌ ti Asia i cʼabaʼ Yingling, miʼ yʌl: «Ti jiñi tʼan cujil bʌ, an jumpʼejl tʼan muʼ bʌ i yʌcʼ ti ñaʼtʌntel chaʼan jiñi xʼixicob mach wersajic an chuqui yujilob melol o añob i ñaʼtʌbal. I yeʼtel jiñi xʼixic jiñʌch cheʼ miʼ sʌqʼuesan i yotot, i mach mejlic i suben jiñi i ñoxiʼal chuqui miʼ ñaʼtan». Juntiquil wiñic mach bʌ añic miʼ pʌs i cʼuxbiya yicʼot mach bʌ añic miʼ mel muʼ bʌ i yʌl jiñi Biblia, maʼañic miʼ coltan i yijñam chaʼan tijicña miʼ ñusan i ñujpuñel, maʼañic miʼ lajin Jesús yicʼot maʼañic miʼ jacʼben i tʼan Jehová (Ef. 5:28, 29; 1 P. 3:7).

6. ¿Chuqui yom miʼ melob jiñi ijñamʌlob chaʼan miʼ chʌn ajñelob bajcheʼ i yamigajob Jehová?

⁶ Cheʼ bajcheʼ tsaʼix laj qʼuele ti yambʌ estudio, Jehová miʼ pijtan chaʼan jiñi wiñicob xñoptʼañoʼ bʌ miʼ yʌqʼuen chuqui i cʼʌjñibal bʌ i chaʼan i familia yicʼot miʼ coltañob tiʼ chaʼan bʌ Dios (1 Ti. 5:8). Anquese jiñi hermanajob ñujpuñemoʼ bʌ cabʌlʌch chuqui miʼ melob ti jujumpʼejl qʼuin, yomʌch miʼ locʼsʌbeñob i yorajlel chaʼan miʼ pejcañob jiñi Biblia, miʼ wen ñaʼtañob jiñi tsaʼ bʌ i pejcayob yicʼot miʼ pejcañob Jehová tiʼ pejtelel i pusicʼal. Tajol miʼ ñaʼtañob chaʼan maʼañobic i yorajlel i chaʼan yicʼot i pʼʌtʌlel chaʼan miʼ melob pejtelel iliyi, pero ñucʌch i cʼʌjñibal cheʼ miʼ locʼsʌbeñob i yorajlel chaʼan miʼ melob. ¿Chucoch? Come Jehová yom chaʼan jujuntiquil i yalobil miʼ locʼsʌben i yorajlel chaʼan miʼ sujtelob tiʼ yamigo (Hch. 17:27).

7. ¿Chuqui mi caj i coltan jiñi ijñamʌl chaʼan miʼ mel muʼ bʌ i subentel ti Jehová?

⁷ Pero jiñi ijñamʌl yomʌch miʼ chaʼlen wersa chaʼan miʼ qʼuel ti ñuc i ñoxiʼal yicʼot miʼ jacʼben i tʼan come xmulilʌch jaʼel. Mach wocolic mi caj i yubin chaʼan miʼ mel jiñi muʼ bʌ i suben Jehová miʼ mucʼʌch i chʼʌmben i sujm chucoch jiñi Biblia miʼ yʌl chaʼan yom miʼ jacʼben i tʼan i ñoxiʼal.

8. Cheʼ bajcheʼ miʼ yʌl Efesios 5:22-24 (TWT), ¿chucoch jiñi hermana ñujpuñemix bʌ mucʼʌch i jacʼben i tʼan i ñoxiʼal?

⁸ Jiñi hermana ñujpuñemix bʌ mucʼʌch i jacʼben i tʼan i ñoxiʼal come jiñʌch yom bʌ Jehová chaʼan miʼ mel (pejcan Efesios 5:22-24, TWT). * Jiñi hermana miʼ ñopben i tʼan Jehová yicʼot yujil chaʼan pejtelel muʼ bʌ i mel Jehová jiñʌch i cʼuxbiya muʼ bʌ i ñijcan i mel, i yujil chaʼan wen mi caj i yajñel miʼ cheʼʌch miʼ mel (Dt. 6:24; 1 Jn. 5:3).

9. ¿Baqui bʌ i wenlel miʼ taj jiñi ijñamʌl cheʼ mucʼʌch i jacʼben i tʼan i ñoxiʼal?

⁹ Ila ti pañimil (mulawil) miʼ subentelob jiñi xʼixicob chaʼan mach yomic miʼ jacʼbeñob i mandar Jehová yicʼot chaʼan maʼañobic i cʼʌjñibal miʼ pʌsob i bʌ cheʼ bʌ miʼ jacʼbeñob i tʼan i ñoxiʼal. Jiñi muʼ bʌ i yʌlob ñumel ili ñaʼtʌbalʌl, mach i cʌñʌyobic jiñi lac Dios muʼ bʌ i cʼuxbiñonla. Jehová maʼañic baqui ora mi caj i cʼajtiben jiñi cʼuxbibil bʌ i yixicʼalob chaʼan miʼ melob jiñi muʼ bʌ i yʌcʼ ti ñaʼtʌntel chaʼan maʼañobic i cʼʌjñibal. Mi jiñi ijñamʌl mucʼʌch i chaʼlen wersa i jacʼ tsaʼ bʌ subenti ti Jehová, mi caj i chumtʌlob ti tijicña (Sal. 119:165). I cheʼ jaʼel, jiñi familia wen mi caj i yajñelob.

10. ¿Chuqui miʼ cʌntesañonla tsaʼ bʌ i yʌlʌ Carol?

¹⁰ Jiñi ijñamʌl miʼ pʌs chaʼan miʼ cʼuxbin Jehová yicʼot chaʼan miʼ qʼuel ti ñuc cheʼ bʌ miʼ jacʼben i tʼan i ñoxiʼal. Juntiquil hermana chumul bʌ ti Sudamérica i cʼabaʼ Carol, miʼ yʌl: «Cujil chaʼan jiñi c ñoxiʼal miʼ taj i sajtemal. I cheʼ jaʼel, cujil chaʼan jiñi c melbal (chaʼlibal) miʼ pʌs bajcheʼ cʼamel mij qʼuel ti ñuc cheʼ i yamigajon Jehová. Jin chaʼan, mic chaʼlen wersa j qʼuel ti ñuc jiñi c ñoxiʼal come j com c mel muʼ bʌ i mulan Jehová».

11. a) ¿Chuqui miʼ coltan Aneese chaʼan miʼ ñusʌben i mul i ñoxiʼal? b) ¿Chuqui mi laj cʌn tiʼ tojlel?

¹¹ Mi jiñi ijñamʌl miʼ qʼuel chaʼan jiñi i ñoxiʼal maʼañic miʼ chʼʌm ti ñuc bajcheʼ yubil miʼ yubin i bʌ, wocol mi caj i yubin chaʼan miʼ qʼuel ti ñuc yicʼot chaʼan miʼ jacʼben i tʼan. Laʼ laj qʼuel chuqui miʼ mel juntiquil hermana ñujpuñem bʌ i cʼabaʼ Aneese cheʼ bʌ miʼ yujtel bajcheʼ ili. Miʼ  yʌl: «Mic chaʼlen wersa chaʼan maʼañic mic michʼan, i cujil chaʼan ti lac pejtelel mi lac taj lac sajtemal. Mic chaʼlen wersa c pʌs cutslel cheʼ bajcheʼ miʼ mel Jehová cheʼ bʌ mic ñusʌben i mul c ñoxiʼal. Cheʼ bʌ mic mel iliyi, mic chaʼ taj c tijicñʌyel» (Sal. 86:5). Jiñi ijñamʌl mucʼʌch bʌ i ñusʌben i mul i ñoxiʼal, mach wocolic miʼ yubin chaʼan miʼ qʼuel ti ñuc.

12. ¿Chuqui ti ejemplo tac mi lac taj yaʼ ti Biblia?

¹² Tajol an muʼ bʌ i ñaʼtañob chaʼan mach pʼʌtʌlic jiñi muʼ bʌ i jacʼben i tʼan yambʌlob. Pero mach isujmic iliyi. Yaʼ ti Biblia mi lac taj ejemplo tac i chaʼan wiñicob xʼixicob tsaʼʌch bʌ i jacʼbeyob i tʼan yambʌlob, i maʼañic baqui ora tsiʼ pʌsʌyob i bʌ chaʼan maʼañobic i cʼʌjñibal. Laʼ laj qʼuel chuqui miʼ mejlel laj cʌn tiʼ tojlel Jesús, Abigaíl yicʼot María.

13. ¿Chucoch Jesús miʼ jacʼben i tʼan Jehová?

¹³ Jesús miʼ jacʼben i tʼan Jehová. Pero ¿yom ba i yʌl iliyi chaʼan Jesús maʼañic i ñaʼtʌbal jin chaʼan miʼ jacʼben i tʼan? Maʼañic, Jesús wen añʌch i ñaʼtʌbal come mach wocolic tsiʼ chaʼle cʌntesa cheʼ bʌ tsajñi ila ti Pañimil (Jn. 7:45, 46). Jehová miʼ wen qʼuel ti ñuc jiñi yujil bʌ melol Jesús, jin chaʼan tsiʼ tem chaʼleyob eʼtel cheʼ bʌ tsiʼ mele jiñi universo (Pr. 8:30; He. 1:2-4). I cheʼ bʌ Jesús tsaʼ chaʼ cuxtʌyi, Jehová tsiʼ yʌqʼue i ‹pʼʌtʌlel chaʼan miʼ mel pejtelel chuqui yom ti panchan yicʼot ti pañimil› (Mt. 28:18). Anquese cabʌlʌch chuqui yujil melol Jesús, muʼto i chʌn sʌclʌben i coltaya Jehová come miʼ cʼuxbin i Tat (Jn. 14:31).

14. a) ¿Chuqui miʼ mejlel i cʌñob jiñi wiñicob ñujpuñemoʼ bʌ tiʼ yejemplo Jehová? b) ¿I chuqui miʼ mejlel i cʌñob chaʼan muʼ bʌ i yʌl Proverbios 31?

¹⁴ ¿Chuqui miʼ mejlel i cʌñob jiñi wiñicob añoʼ bʌ i yijñam? Jehová maʼañic tsiʼ waʼchoco jiñi wiñicob bajcheʼ i jol familia come miʼ ñaʼtan chaʼan jiñi xʼixicob maʼañobic i cʼʌjñibal. ¿Bajcheʼ la cujil? Come tsaʼʌch i yajca xʼixicob yicʼot wiñicob chaʼan miʼ chaʼleñob yumʌntel yicʼot Jesús (Gá. 3:26-29). Cheʼ bajcheʼ Jehová an i yʌqʼue eʼtel Jesús, juntiquil wiñic am bʌ i ñaʼtʌbal mi caj i yʌcʼ chaʼan jiñi i yijñam añʌch chuqui miʼ mel jaʼel. Jiñi i Tʼan Dios miʼ yʌl chaʼan juntiquil wem bʌ ijñamʌl miʼ mejlel i qʼuel i yotot, miʼ mejlel i chaʼlen mʌñoñel yicʼot i chon i lum, o yan tac bʌ (pejcan Proverbios 31:15, 16, 18). Juntiquil xʼixic mach juntiquilic xyaj eʼtel mach bʌ añic chuqui miʼ mejlel i yʌl. I jiñi wiñic miʼ chʼʌm ti ñuc muʼ bʌ i yʌl i yijñam (pejcan Proverbios 31:11, 26, 27). Mi juntiquil wiñic mucʼʌch i qʼuel ti ñuc i yijñam, jiñi xʼixic mach wocolic mi caj i yubin chaʼan miʼ jacʼben i tʼan.

15. ¿Chuqui miʼ mejlel i cʌñob jiñi ijñamʌlob tiʼ yejemplo Jesús?

¹⁵ ¿Chuqui miʼ mejlel i cʌñob jiñi ijñamʌlob? Anquese Jesús cabʌl chuqui an i mele, maʼañic miʼ yubin chaʼan maʼañic i cʼʌjñibal cheʼ bʌ miʼ jacʼben i tʼan Jehová (1 Co. 15:28; Fil. 2:5, 6). Cheʼ jaʼel, jiñi ijñamʌl muʼ bʌ i lajiben i yejemplo Jesús maʼañic miʼ yubin chaʼan maʼañic i cʼʌjñibal cheʼ bʌ miʼ jacʼben i tʼan i ñoxiʼal. Miʼ coltan i ñoxiʼal come miʼ cʼuxbin, pero mucʼʌch i mel come miʼ cʼuxbin Jehová yicʼot miʼ qʼuel ti ñuc.

16. Cheʼ bajcheʼ miʼ yʌl 1 Samuel 25:3, 23-28, ¿chuqui ti wocol tac tsiʼ ñusa Abigaíl? (Qʼuele jiñi dibujo am bʌ tiʼ tejchibal).

¹⁶ Abigaíl ñujpuñem yicʼot Nabal, juntiquil wiñic i bajñel jach bʌ miʼ ñaʼtan i bʌ, muʼ bʌ i wen chañʼesan i bʌ yicʼot mach bʌ añic miʼ qʼuel ti ñuc muʼ bʌ i mel yambʌlob. Pero Abigaíl maʼañic chuqui tsiʼ waʼ mele chaʼan miʼ cʌy i ñoxiʼal. Cheʼ yomic, maʼañic chuqui tsiʼ mele chaʼan David yicʼot jiñi i wiñicob miʼ tsʌnsañob Nabal. Pero añʌch chuqui tsiʼ mele chaʼan miʼ coltan Nabal yicʼot pejtelel añoʼ bʌ tiʼ yotot. Abigaíl maʼañic tsiʼ chaʼle bʌqʼuen chaʼan miʼ majlel i pejcan David anquese yaʼañob 400 i wiñicob  chajpʌbilobix bʌ chaʼan miʼ chaʼleñob tsʌnsa. I tsaʼto i sube David chaʼan laʼ i yʌqʼuen tiʼ wenta jiñi tsaʼ bʌ i mele i ñoxiʼal (pejcan 1 Samuel 25:3, 23-28). David tsiʼ qʼuele chaʼan Jehová woliʼ cʼʌn ili chʼejl bʌ xʼixic chaʼan miʼ ticʼ yicʼot chaʼan maʼañic miʼ mel mach bʌ weñic.

17. ¿Chuqui miʼ mejlel i cʌñob jiñi wiñicob añoʼ bʌ i yijñam ti jiñi relato i chaʼan David yicʼot Abigaíl?

¹⁷ ¿Chuqui miʼ mejlel i cʌñob jiñi wiñicob añoʼ bʌ i yijñam? Abigaíl wen an i ñaʼtʌbal. Jin chaʼan weñʌch cheʼ bʌ David tsiʼ jacʼbe i tʼan, i cheʼ bajcheʼ ili maʼañic tiʼ tsʌnsa jiñi maʼañobic bʌ i mul. Cheʼ jaʼel, jiñi i jol familia am bʌ i ñaʼtʌbal mi caj i ñʌchʼtan muʼ bʌ i yʌl i yijñam cheʼ bʌ an chuqui yom miʼ mejlel ñuc bʌ i cʼʌjñibal. Tajol ili, mi caj i coltan chaʼan wen miʼ loqʼuel jiñi muʼ bʌ i ñaʼtan i mel.

18. ¿Chuqui miʼ mejlel i cʌñob jiñi ijñamʌlob tiʼ yejemplo Abigaíl?

¹⁸ ¿Chuqui miʼ mejlel i cʌñob jiñi ijñamʌlob? Jiñi ijñamʌl muʼ bʌ i cʼuxbin Jehová yicʼot miʼ qʼuel ti ñuc miʼ mejlel i wen coltan i familia, i cheʼto jaʼel mi jiñi i ñoxiʼal maʼañic miʼ melben i yeʼtel Jehová o maʼañic miʼ jacʼben i mandar. Jiñi xʼixic maʼañic mi caj i ñusan ti pʼis jiñi principio tac tiʼ caj yom i cʌy i ñoxiʼal. Mucʼʌch i qʼuel ti ñuc yicʼot miʼ jacʼben i tʼan i ñoxiʼal, i cheʼ bajcheʼ ili mi caj i coltan chaʼan miʼ mulan i cʌn Jehová (1 P. 3:1, 2). Jehová mucʼʌch i qʼuel ti ñuc jiñi i xucʼtʌlel anquese jiñi i ñoxiʼal maʼañic miʼ qʼuel jiñi wem bʌ i yejemplo i yijñam.

19. ¿Baqui tac maʼañic mi caj i jacʼben i tʼan i ñoxiʼal jiñi ijñamʌl?

¹⁹ Pero jiñi hermana ñujpuñem bʌ maʼañic mi caj i jacʼben i tʼan i ñoxiʼal cheʼ bʌ miʼ suben i mel mach bʌ weñic. Jumpʼejl ejemplo, juntiquil hermana maʼañic mi caj i jacʼben i tʼan i ñoxiʼal mach bʌ xñoptʼañic mi tiʼ sube chaʼan miʼ chaʼlen lot, xujchʼ o yan tac bʌ mach bʌ añic miʼ mulan Jehová. Ti lac pejtelel yicʼot jiñi hermanajob ñujpuñemobix bʌ yom ñumen xucʼulonla ti Jehová. Jin chaʼan, juntiquil hermana mach yomic miʼ jacʼ cheʼ bʌ miʼ subentel chaʼan miʼ ñusan ti pʼis jiñi principio am bʌ ti Biblia. I yicʼot i cʼuxbiya yom miʼ yʌl chucoch maʼañic miʼ mel, pero ti toj bʌ tʼan yom miʼ yʌl (Hch. 5:29).

20. ¿Chucoch la cujil chaʼan María jiñʌch wem bʌ i yamiga Jehová?

²⁰ María wem bʌ i yamiga Jehová. Wen cʌmbil  i chaʼan jiñi Tsʼijbujel tac come cheʼ bʌ tsiʼ pejca Elisabet, i ñaʼ Juan jiñi Xʼacʼ chʼʌmjaʼ, ñumen ti 20 texto am bʌ yaʼ ti Tsʼijbujel Hebreo tsiʼ taja ti tʼan (Lc. 1:46-55). I laʼ lac ñaʼtan iliyi: Anquese María cʼajtibilix ti José, jiñi i yángel Jehová mach ñaxañic tsiʼ pʌsʌ i bʌ tiʼ tojlel José. Ñaxan tsiʼ pejca María, i tiʼ sube chaʼan mi caj i yʌcʼ ti pañimil i Yalobil Dios (Lc. 1:26-33). Jehová wen i cʌñʌyʌch María i yujil chaʼan mucʼʌch caj i wen cʼuxbin yicʼot i cʌntʌben i Yalobil. I anquese Jesús tsaʼ chʌmi (sajti) yicʼot tsaʼ pʌjyi letsel ti panchan, María tsaʼʌch chʌn ajñi bajcheʼ i yamiga Jehová (Hch. 1:14).

21. ¿Chuqui miʼ mejlel i cʌñob jiñi i jolob familia tiʼ tojlel María?

²¹ ¿Chuqui miʼ mejlel i cʌñob jiñi wiñicob añoʼ bʌ i yijñam? Jiñi i jol familia wen am bʌ i ñaʼtʌbal, tijicña miʼ yubin cheʼ bʌ jiñi i yijñam wen cʌmbil i chaʼan jiñi Biblia. I maʼañic miʼ tech i yubin chaʼan maʼañix i cʼʌjñibal. Miʼ cʼotel i qʼuel chaʼan jiñi i yijñam mi caj i wen coltan i familia come i wen cʌñʌ jiñi Biblia yicʼot jiñi principio tac. Anquese jiñi i yijñam tsiʼ ñumen chaʼle estudio cheʼ bajcheʼ jiñi i ñoxiʼal, jiñʌch jiñi i jol familia am bʌ tiʼ wenta chaʼan miʼ mel jiñi chʼujutesaya ti familia yicʼot yan tac bʌ i chaʼan bʌ Dios (Ef. 6:4).

22. ¿Chuqui miʼ mejlel i cʌñob jiñi ijñamʌlob tiʼ tojlel María?

²² ¿Chuqui miʼ mejlel i cʌñob jiñi ijñamʌlob? Jiñi ijñamʌl yom miʼ qʼuelben ti ñuc i yeʼtel i ñoxiʼal, pero jiñʌch an tiʼ wenta chaʼan pʼʌtʌl miʼ yajñel i ñopoñel (Gá. 6:5). Jin chaʼan, yom miʼ wen locʼsʌben i yorajlel chaʼan miʼ chaʼlen estudio yicʼot miʼ wen ñaʼtan jiñi muʼ bʌ i pejcan. Ili mucʼʌch caj i coltan chaʼan miʼ cʼuxbin Jehová yicʼot miʼ qʼuel ti ñuc, i cheʼ jaʼel tijicña mi caj i yajñel cheʼ bʌ miʼ jacʼben i tʼan i ñoxiʼal.

23. Mi jiñi ijñamʌlob mucʼʌch i qʼuelob ti ñuc jiñi i yeʼtel i ñoxiʼal, ¿bajcheʼ mi caj i bajñel tajob i wenlel yicʼot mi caj i coltan jiñi i familia yicʼot jiñi congregación?

²³ Jiñi ijñamʌlob muʼ bʌ i qʼuelbeñob ti ñuc i yeʼtel i ñoxiʼal, ñumen tijicñayob cheʼ bajcheʼ jiñi mach bʌ añic miʼ melob. Cheʼ jaʼel, miʼ yʌqʼuen wem bʌ ejemplo jiñi xcolelob, yicʼot tijicña miʼ yajñelob tiʼ familia yicʼot tiʼ congregación (Tit. 2:3-5). Ti ili ora, ñumen cabʌl an xʼixicob tiʼ tejclum Jehová (Sal. 68:11). Mach yʌlʌyic mi wiñiconla o xʼixiconla, ti lac pejtelel añʌch junchajp la queʼtel yaʼ ti congregación. Ti yambʌ estudio mi caj laj qʼuel bajcheʼ miʼ mejlel lac mel.