1, 2. a) ¿Chucoch cabʌlob wocol bʌ miʼ yubiñob chaʼan miʼ ñopob tiʼ tojlel jiñi aqʼuebiloʼ bʌ i yeʼtel? b) ¿Chuqui mi caj laj qʼuel ti ili estudio?

ILI ora, cabʌlob wocol bʌ miʼ yubiñob chaʼan miʼ ñopob tiʼ tojlel majqui jach am bʌ i yeʼtel. ¿Chucoch? Come miʼ qʼuelob chaʼan jiñi ley yicʼot jiñi política jin jach miʼ coltan jiñi ricojob yicʼot jiñi ñucoʼ bʌ, pero miʼ ticʼlan jiñi pʼumpʼuñoʼ bʌ. Jin chaʼan, jiñi Biblia miʼ yʌl chaʼan jiñi lac piʼʌlob miʼ «cʼʌñob i pʼʌtʌlel chaʼan miʼ jisañob i piʼʌlob» (Ec. 8:9). Cheʼ jaʼel, cabʌlob ñucoʼ bʌ i yeʼtel (troñel) ti ñopbalʌl tac mach weñobic i melbal (chaʼlibal) i jiñi an i yʌcʼʌ chaʼan jiñi lac piʼʌlob miʼ cʌy i ñopob Dios. Jin chaʼan, yom mi laj coltan jiñi lac estudiantejob chaʼan miʼ ñopob Dios yicʼot tiʼ tojlel jiñi waʼchocobiloʼ bʌ i chaʼan ila ti Lum chaʼan miʼ coltañonla.

² I sujmʌch, mach jin jach jiñi estudiantejob yom miʼ cʌñob i ñopob ti Jehová yicʼot tiʼ yorganización. Joñonla cabʌlix bʌ jab añonla tiʼ sujmlel yom mi lac bej ñop chaʼan pejtelel chuqui miʼ mel (chaʼlen) Jehová jiñʌch ñumen wem bʌ, come an i tajol miʼ tilel wocol tac muʼ bʌ i mejlel i cʼuñʼesan lac ñopoñel. Ti ili estudio mi caj laj qʼuel uxpʼejl. Ñaxam bʌ, cheʼ bʌ mi lac pejcan jiñi relato tac ti Biblia. I chaʼpʼejlel, cheʼ bʌ an chuqui miʼ subeñonla jiñi i yorganización Jehová. I yuxpʼejlel, cheʼ bʌ mi lac ñusan jiñi wocol tac muʼ bʌ caj i tilel.

3. ¿Chucoch an relato muʼ bʌ i mejlel i yʌqʼueñonla lac ñaʼtan mi weñʌch o mach weñic tsaʼ bʌ i mele Jehová?

 ³ Cheʼ bʌ mi lac pejcan jiñi Biblia, tajol mi laj cʼajtiben lac bʌ chucoch mach junlajalic chuqui miʼ mel Jehová o bajcheʼ yilal tiʼ tojlel lac piʼʌlob. Jumpʼejl ejemplo, cheʼ bʌ mi lac pejcan jiñi libro chaʼan Números mi laj qʼuel chaʼan Jehová tsiʼ yʌcʼʌ ti tsʌnsʌntel juntiquil wiñic israelita bʌ woli (choncol) bʌ i tempan i siʼ ti sábado. Pero tiʼ chaʼpʼejlel libro chaʼan Samuel miʼ yʌl chaʼan Jehová tsiʼ ñusʌbe i mul jiñi rey David anquese tsiʼ chaʼle tsʼiʼlel yicʼot tsʌnsa (Nm. 15:32, 35; 2 S. 12:9, 13). Tajol mi laj cʼajtiben lac bʌ chucoch Jehová tsiʼ ñusʌbe i mul David anquese wen tsʌts i tsiʼ yʌcʼʌ ti tsʌnsʌntel jiñi yambʌ wiñic mach bʌ wen tsʌtsic i mul yilal. Laʼ laj qʼuel uxchajp yom bʌ mi lac chʼʌm ti ñuc cheʼ bʌ mi lac pejcan jiñi Biblia.

4. ¿Bajcheʼ miʼ coltañonla Génesis 18:20, 21 yicʼot Deuteronomio 10:17 chaʼan mi lac ñop chaʼan weñʌch chuqui tac miʼ mel Jehová?

⁴Jiñi Biblia maʼañic miʼ luʼ al chuqui tsaʼ ujti. Jumpʼejl ejemplo, la cujil chaʼan David tsaʼʌch i chaʼ ñaʼta i bʌ tiʼ sujm (Sal. 51:2-4). Pero ¿bajcheʼ yilal jiñi wiñic tsaʼ bʌ i ñusa ti pʼis jiñi mandar chaʼan bʌ sábado? ¿Tsaʼʌch ba i chaʼ ñaʼta i bʌ? ¿Cojaxto ba tsiʼ ñusʌbe i mandar Jehová? ¿Tsaʼix ba aqʼuenti ticʼojel ti ñaxan i maʼañic tsiʼ jacʼʌ? Jiñi Biblia maʼañic miʼ yʌl. Pero miʼ mejlel lac ñop chaʼan toj pejtelel chuqui miʼ mel Jehová (Dt. 32:4). Lʌcʼʌ tiʼ pejtelel ora mi lac ñaʼtan mach bʌ weñic tiʼ tojlel yambʌlob tiʼ caj jach chuqui miʼ yʌlob yañoʼ bʌ o tiʼ caj jach bajcheʼ yilal mi laj qʼuelob. Pero Jehová mach cheʼic miʼ mel bajcheʼ jiñi, miʼ chʼʌm ti ñuc pejtelel chuqui miʼ yujtel (pejcan Génesis 18:20, 21; Deuteronomio 10:17). Cheʼ mi lac ñumen cʌn Jehová yicʼot i mandar tac, mi caj lac ñumen ñop chaʼan weñʌch chuqui miʼ mel. Jin chaʼan, mi tsaʼ loqʼui laj cʼajtiya tac cheʼ mi lac pejcan jiñi Biblia i maxto añic mi lac tajben i jacʼbal, jasʌl yom mi la cubin jiñi la cujil bʌ chaʼan mi lac ñop chaʼan weñʌch pejtelel chuqui miʼ mel Jehová (Sal. 145:17).

5. ¿Bajcheʼ miʼ ticʼlañonla cheʼ xmulilonla cheʼ baʼ ora mi lac chaʼlen meloñel? (Qʼuele jiñi recuadro « An i tajol mach weñic bajcheʼ mi lac chaʼlen meloñel tiʼ caj xmulilonla»).

⁵An i tajol mach weñic bajcheʼ mi lac chaʼlen  meloñel tiʼ caj xmulilonla. Maʼañic mi lac mulan cheʼ bʌ an majqui miʼ mel mach bʌ weñic come melbilonla (pʌtbilonla) tiʼ yejtal Dios (Gn. 1:26). Pero, come xmulilonla, an i tajol mach tojic mi lac chaʼlen meloñel tiʼ tojlel juntiquil anquese mi lac ñaʼtan chaʼan luʼ la cujilix chuqui tsaʼ ujti. Laʼ cu laj cʼajtesan tsaʼ bʌ ujti tiʼ tojlel Jonás. Tsaʼ wen michʼa cheʼ bʌ Jehová tsiʼ chaʼ pʼunta jiñi ninivitajob (Jon. 3:10–4:1). Pero chaʼan jiñi i pʼuntaya Jehová, ñumen ti 120 mil ninivitajob maʼañix tsaʼ chʌmiyob. ¿Chuqui miʼ pʌsbeñonla iliyi? Chaʼan tojʌch chuqui tsiʼ mele Jehová i chaʼan Jonás mach weñic bajcheʼ tsiʼ ñaʼta.

6. ¿Chucoch mach xicʼbilic Jehová chaʼan miʼ tsictesʌbeñonla chuqui ñaʼtʌbil i chaʼan i mel?

⁶Jehová mach xicʼbilic chaʼan miʼ tsictesʌbeñonla chuqui mi caj i mel. I sujmʌch chaʼan ti wajali tsiʼ yʌcʼʌ chaʼan jiñi i wiñicob miʼ subeñob chuqui miʼ ñaʼtañob chaʼan jiñi muʼ bʌ caj i mel (Gn. 18:25; Jon. 4:2, 3). I an i tajol tsaʼʌch i tsictesa chucoch cheʼ tsiʼ mele bajcheʼ jiñi (Jon. 4:10, 11). Pero mach xicʼbilic chaʼan miʼ tsictesʌbeñonla chucoch cheʼ tsiʼ mele. Jehová jiñʌch tsaʼ bʌ i meleyonla, jin chaʼan mach cʼʌñʌlic mi laj qʼuel mi weñʌch o mach weñic jiñi tsaʼix bʌ i mele o muʼto bʌ caj i mel (Is. 40:13, 14; 55:9).

7. ¿Majquiyob wocol bʌ mi la cubin chaʼan mi lac ñop tiʼ tojlelob, i chucoch?

⁷ Mucʼʌch lac ñop chaʼan ti bele ora wen chuqui miʼ mel Jehová. Pero tajol wocol mi la cubin chaʼan mi lac ñop tiʼ tojlel jiñi waʼchocobiloʼ bʌ i chaʼan ila ti Lum. Tajol mi laj cʼajtiben lac bʌ mi cheʼʌch woli (yʌquel) i melob i yeʼtel bajcheʼ miʼ mulan Jehová o cheʼ jach bajcheʼ miʼ bajñel mulañob. Tajol jiñʌch tsaʼ bʌ ujti tiʼ tojlel chaʼtiqui uxtiquil muʼ bʌ i yʌjlelob ti Biblia. Laʼ cu lac ñaʼtan jiñi ejemplo tac tsaʼ bʌ ajli ti  párrafo 3. Tajol juntiquil i familia jiñi wiñic tsaʼ bʌ tsʌnsʌnti tsiʼ cʼajtibe i bʌ mi Moisés tsaʼʌch i ñaxan cʼajtibe Jehová chuqui yom miʼ mel. Tajol cheʼʌch tsaʼ ujti jaʼel tiʼ tojlel juntiquil i yamigo Urías, jiñi hitita. David tsiʼ chaʼle tsʼiʼlel yicʼot i yijñam Urías, i tajol jiñi i yamigo Urías tsiʼ cʼajtibe i bʌ mi David maʼañic tsaʼ aqʼuenti i toj i mul tiʼ caj jiñʌch jiñi rey. Tiʼ sujm maʼañic miʼ mejlel la cʌl chaʼan mi lac ñop tiʼ tojlel Jehová mi maʼañic mi lac ñop tiʼ tojlel jiñi waʼchocobiloʼ bʌ i chaʼan ila ti Lum, muʼ bʌ i ñop tiʼ tojlelob.

8. ¿Bajcheʼ lajal muʼ bʌ i yʌl Hechos 16:4, 5 yicʼot bajcheʼ miʼ yujtel eʼtel ti congregación ili ora?

⁸ Ili ora, Jehová miʼ cʼʌn «jiñi xucʼul bʌ xyaj eʼtel wen am bʌ i ñaʼtʌbal» chaʼan miʼ coltan jiñi i yorganización am bʌ ila ti Lum (Mat. 24:45). Cheʼ bajcheʼ jiñi Junmojt muʼ bʌ i pʌsob bij cheʼ ti ñaxam bʌ siglo, ili xucʼul bʌ xyaj eʼtel miʼ qʼuel jiñi eʼtel muʼ bʌ i mejlel tiʼ petol Pañimil i miʼ suben jiñi ancianojob chuqui yom miʼ melob yaʼ ti congregación tac (pejcan Hechos 16:4, 5). I jiñi ancianojob miʼ chaʼleñob wersa chaʼan miʼ jajqʼuel yaʼ ti congregación chuqui tac miʼ yʌjlel. Mi mucʼʌch lac jacʼ muʼ bʌ i yʌl jiñi organización yicʼot jiñi ancianojob mi lac pʌs chaʼan mucʼʌch lac ñop chaʼan weñʌch chuqui tac miʼ mel Jehová.

9. ¿Baqui ora wocol mi la cubin chaʼan mi lac jacʼ muʼ bʌ i yʌlob jiñi ancianojob, i chucoch?

⁹ An i tajol wocol mi la cubin chaʼan mi lac jacʼ muʼ bʌ i yʌl jiñi ancianojob. Jumpʼejl ejemplo, ti jiñi jabil tac ñumen bʌ tilel tsaʼ ñijcʌnti cabʌl congregación yicʼot circuito tac. Tajol jiñi ancianojob tiʼ subeyob chaʼtiqui uxtiquil publicadorob chaʼan miʼ majlelob ti yambʌ congregación, chaʼan ñumen wen bajcheʼ miʼ cʼʌjñel jiñi i Yotlel tempa bʌ. Cheʼ muqʼuic lac subentel lac mel jiñi, tajol wocol mi  caj la cubin chaʼan mi laj cʌy lac familia yicʼot la camigojob. ¿Muʼ ba i suben Jehová jiñi ancianojob baqui yom miʼ majlel jujuntiquil publicador? Maʼañic. I jin chaʼan, tajol wocol mi la cubin chaʼan mi lac jacʼ muʼ bʌ i yʌlob. Pero Jehová miʼ ñop chaʼan weñʌch woli (yʌquel) bʌ i melob, i cheʼʌch yom mi lac mel joñonla jaʼel. *

10. Cheʼ bajcheʼ miʼ yʌl Hebreos 13:17, ¿chucoch yom mi lac jacʼ muʼ bʌ i yʌlob jiñi ancianojob?

¹⁰ ¿Chucoch yom mi lac jacʼ muʼ bʌ i yʌlob jiñi ancianojob anquese maʼañic mi lac mulan? Come cheʼ bajcheʼ jiñi, mi laj coltan chaʼan temelonla (Efes. 4:2, 3). Cheʼ jaʼel, jiñi congregación miʼ taj i wenlel cheʼ bʌ añʌch lac pecʼlel i mi laj coltan muʼ bʌ i ñaʼtañob jiñi ancianojob (pejcan Hebreos 13:17). Pero jiñi ñumen ñuc bʌ i cʼʌjñibal, mi lac pʌsben Jehová chaʼan mi lac ñop tiʼ tojlel come jiñʌch tsiʼ waʼchoco jiñi ancianojob chaʼan miʼ cʌntañonla (Hech. 20:28).

11. ¿Chuqui miʼ mejlel i coltañonla chaʼan mi lac ñumen ñop tiʼ coltaya jiñi ancianojob?

¹¹ ¿Chuqui miʼ mejlel i coltañonla chaʼan mi lac ñumen ñop tiʼ coltaya jiñi ancianojob? Jiñʌch cheʼ mi laj cʼajtesan chaʼan miʼ cʼajtibeñob i yespíritu Jehová cheʼ bʌ an chuqui woliʼ ñaʼtañob i mel yaʼ ti congregación. Miʼ chʼʌmob ti ñuc jiñi principio tac am bʌ ti Biblia yicʼot muʼ bʌ i yʌl jiñi organización. Ti jumpʼejlob i pusicʼal yomob i tijicñesan Jehová yicʼot i cʌntañob ti wen jiñi hermanojob. Ili xucʼul bʌ wiñicob yujilob chaʼan miʼ cajelob ti meloñel tiʼ tojlel Dios chaʼan bajcheʼ woliʼ melob i yeʼtel (1 Ped. 5:2, 3). Laʼ cu lac ñaʼtan iliyi: Ili ora an tʼox bʌ tiʼ caj mach junlajaloñicla, tiʼ caj jiñi ñopbalʌl tac yicʼot tiʼ caj jiñi política, pero joñonla temel mi lac melben i yeʼtel jiñi i sujm bʌ Dios. Ili miʼ jamʌ pʌs chaʼan Jehová woliʼ yʌcʼ i bendición tiʼ tojlel i yorganización.

12. ¿Chuqui tac yom miʼ qʼuelob jiñi ancianojob chaʼan miʼ ñaʼtañob mi wolʌch i chaʼ ñaʼtan i bʌ tiʼ sujm juntiquil lac piʼʌl?

¹² Jehová tsiʼ yʌqʼue tiʼ wenta jiñi ancianojob chaʼan sʌc miʼ yajñel jiñi congregación. Jin chaʼan, mi juntiquil xñoptʼan miʼ chaʼlen tsʌts bʌ mulil, Jehová miʼ pijtan chaʼan jiñi ancianojob miʼ qʼuelob mi mucʼʌch caj i bej ajñel yaʼ ti congregación. Junchajp yom bʌ miʼ qʼuelob jiñʌch mi wolʌch i chaʼ ñaʼtan i bʌ tiʼ sujm. Yom miʼ qʼuelob pejtelel iliyi, anquese miʼ yʌl chaʼan tsaʼʌch i chaʼ ñaʼta i bʌ tiʼ sujm, ¿mucʼʌch ba i tsʼaʼlen chuqui tsiʼ mele? ¿Tsaʼix ba i wen ñaʼta chaʼan maʼañix mi caj i chaʼ mel jiñi mulil? Mi tsaʼ yajli ti mulil tiʼ caj mach weñic i yamigojob, ¿mucʼʌch ba caj i cʌy i ñochtañob? Jiñi ancianojob miʼ pejcañob Jehová, miʼ wen qʼuelob pejtelel chuqui tsaʼ ujti cheʼ bajcheʼ miʼ yʌl jiñi Biblia i miʼ chʼʌmob ti ñuc chuqui miʼ ñaʼtan jiñi lac piʼʌl chaʼan jiñi tsaʼ bʌ i mele. Cheʼ jiñi, miʼ qʼuelob mi muqʼuixto caj i bej ajñel ti congregación o maʼañic. Tajol yom miʼ chaʼlentel ti expulsar (1 Cor. 5:11-13).

13. ¿Chuqui miʼ mejlel ti tilel ti lac jol cheʼ miʼ chaʼlentel ti expulsar juntiquil lac familia o juntiquil la camigo?

¹³ Cheʼ miʼ chaʼlentel ti expulsar juntiquil mach bʌ la camigojic o mach bʌ lac familiajic, tajol mach wocolic mi la cubin chaʼan mi lac chʼʌm ti ñuc muʼ bʌ i yʌlob jiñi ancianojob. Pero ¿ixcu mi tsaʼ chaʼlenti ti expulsar juntiquil muʼ bʌ laj cʼuxbin? Tajol wocol mi caj la cubin chaʼan mi lac ñop mi weñʌch tsaʼ bʌ i meleyob jiñi ancianojob. Tajol mi lac ñaʼtan chaʼan maʼañic tsiʼ laj chʼʌmʌyob ti ñuc chuqui tsaʼ ujti o chaʼan mach cheʼic tsiʼ meleyob cheʼ bajcheʼ miʼ mulan Jehová. ¿Chuqui mi caj i coltañonla chaʼan wen mi laj qʼuel tsaʼ bʌ i meleyob jiñi ancianojob?

14. ¿Chuqui yom mi laj cʼajtesan mi jiñi ancianojob miʼ qʼuelob chaʼan yom miʼ chaʼlentel ti expulsar juntiquil lac familia o juntiquil la camigo?

 ¹⁴ Laʼ laj cʼajtesan chaʼan jiñi expulsión jiñʌch junchajp acʼbil bʌ i chaʼan Jehová chaʼan i wenlel jiñi congregación yicʼot jiñi xmulil. Mi maʼañic miʼ chaʼlentel ti expulsar juntiquil maʼañic bʌ tsiʼ chaʼ ñaʼta i bʌ, miʼ mejlel i ticʼlan jiñi congregación (Gál. 5:9). Cheʼ jaʼel, tajol maʼañic mi caj i cʌn chaʼan wen tsʌts jiñi i mul yicʼot chaʼan yom miʼ qʼuextan jiñi i melbal yicʼot i ñaʼtʌbal chaʼan wen miʼ chaʼ ajñel yicʼot Jehová (Ec. 8:11). Miʼ mejlel lac ñop chaʼan jiñi ancianojob miʼ chʼʌmob ti ñuc jiñi i yeʼtelob chaʼan miʼ ñaʼtañob mi an majqui yom miʼ chaʼlentel ti expulsar. Cheʼ bajcheʼ jiñi juezob ti Israel, yujilob chaʼan yom miʼ chaʼleñob meloñel ti toj «cheʼ bajcheʼ miʼ mulan lac Yum» (2 Cr. 19:6, 7).

15. ¿Chucoch yom mi lac ñumen ñop tiʼ coltaya Jehová ili ora?

¹⁵ Ñumen lʌcʼʌlix i jilibal ili jontol bʌ pañimil (mulawil). Jin chaʼan, ili ora yom mi lac ñumen ñop chaʼan weñʌch bajcheʼ miʼ mel i yeʼtel Jehová. Ili ñuc i cʼʌjñibal come tiʼ yorajlel jiñi cabʌl wocol, tajol jiñi muʼ bʌ lac subentel mach jiñic ñumen wem bʌ mi laj qʼuel. I sujmʌch, Jehová maʼañic mi caj i pejcañonla. Tajol mi caj i cʼʌn jiñi waʼchocobiloʼ bʌ i chaʼan ila ti Lum chaʼan miʼ subeñonla chuqui yom mi lac mel. Ti jiñi bʌ ora mach i yorajlelic chaʼan mi lac ñaʼtan o mi laj cʼajtiben lac bʌ mi tilemʌch ti Jehová jiñi muʼ bʌ lac subentel o mi jiñi hermanojob woli jach i melob chuqui bajñel yomob. ¿Muʼ ba caj lac ñop tiʼ tojlel Jehová yicʼot tiʼ yorganización ti jiñi bʌ ora? Muʼ bʌ caj i coltañonla lac tajben i jacʼbal jiñʌch cheʼ mi laj qʼuel bajcheʼ yilal mi lac jacʼ muʼ bʌ i subeñonla jiñi organización ili ora. Mi mucʼʌch lac ñop muʼ bʌ lac subentel i ti ora mi lac jacʼ, tajol cheʼʌch mi caj lac mel jaʼel tiʼ yorajlel jiñi cabʌl wocol (Luc. 16:10).

16. ¿Bajcheʼ mi caj i tsictiyel ti lʌcʼʌl mi mucʼʌch lac ñop ti Jehová?

¹⁶ An yambʌ junchajp yom bʌ mi lac wen ñaʼtan, ¿chuqui mi caj lac mel cheʼ bʌ Jehová miʼ chaʼlen meloñel tiʼ tojlel jiñi lac piʼʌlob tiʼ jilibal ili pañimil? Ti ili ora cheʼ bʌ anto i yorajlel, mi lac pijtan chaʼan jiñi maʼañic miʼ melbeñob i yeʼtel Jehová cheʼ bajcheʼ jiñi lac familia mach bʌ xñoptʼañobic, miʼ tech i chʼujutesañob. Jehová mi caj i cʼʌn Jesús chaʼan miʼ ñaʼtan chuqui mi caj i yujtel tiʼ tojlelob (Mat. 25:31-33; 2 Tes. 1:7-9). Maʼañic ti lac wenta chaʼan mi la cʌl majqui yom miʼ pʼuntʌntel i majqui maʼañic (Mat. 25:34, 41, 46). ¿Muʼ ba caj lac ñop chaʼan wen chuqui woliʼ mel Jehová,  o maʼañic mi caj lac jacʼben tiʼ caj maʼañic mi lac mulan chuqui woliʼ mel? Tsiquil chaʼan ili ora yom mi lac pʼʌtʼesan lac ñopoñel tiʼ tojlel chaʼan miʼ mejlel lac ñop tiʼ tojlel ti talto bʌ qʼuin.

17. ¿Chuqui ti wenlel mi caj i tajtʌl chaʼan jiñi muʼ bʌ i mel Jehová tiʼ jilibal ili pañimil?

¹⁷ Ñaʼtancu bajcheʼ yubil mi caj la cubin cheʼ bʌ yaʼix añonla ti tsijiʼ bʌ pañimil i mi laj qʼuelben i wenlel pejtelel chuqui tsiʼ mele Jehová. Maʼañix jiñi mach bʌ i sujmic ñopbalʌl, jiñi empresa tac yicʼot jiñi yumʌlob muʼ bʌ i ticʼlañob lac piʼʌlob. Mi caj i jilel jiñi cʼamʌjel, ñoxlel i maʼañix mi caj i chʌmel (sajtel) jiñi lac piʼʌlob. Satanás yicʼot jiñi i xibajob mi caj i ñujpʼelob mil jab. Mi caj i laj jilel pejtelel mach bʌ weñic (Apoc. 20:2, 3). ¡Wen tijicña mi caj la cubin cheʼ tsaʼ lac ñopo chaʼan weñʌch pejtelel muʼ bʌ i mel Jehová!

18. Cheʼ bajcheʼ miʼ yʌl Números 11:4-6 yicʼot 21:5, ¿chuqui mi laj cʌn tiʼ tojlel jiñi israelitajob?

¹⁸ ¿Am ba chuqui mi caj i yʌqʼueñonla lac ñaʼtan mi weñʌch o mach weñic chuqui woliʼ mel Jehová cheʼ bʌ yaʼañonla ti tsijiʼ bʌ pañimil? Laʼ cu lac ñaʼtan tsaʼ bʌ ujti tiʼ tojlel jiñi israelitajob cheʼ bʌ Jehová tsaʼ jaxto i locʼsayob ti Egipto. An mach bʌ wen tijicñayobic come tsiʼ ñaʼtayob jiñi bʌlñʌcʼʌl am bʌ ti Egipto i maʼañic tsiʼ mulayob jiñi maná tsaʼ bʌ i yʌqʼueyob Jehová (pejcan Números 11:4-6; 21:5). ¿Cheʼ ba mi lac mejlel ti ujtel jaʼel cheʼ bʌ miʼ ñumel jiñi cabʌl wocol? Mach la cujilic bajcheʼ cʼamel yom mi lac chaʼlen eʼtel chaʼan mi lac sʌqʼuesan ili Pañimil i mi laj cʼunteʼ sujtesan majlel ti jumpʼejl paraíso. Tajol cabʌl chuqui yom mi lac mel i wocol mi lac ñusan ti ñaxan. ¿Muʼ ba caj lac michʼan tiʼ caj muʼ bʌ i yʌqʼueñonla Jehová ti jiñi bʌ ora? Cheʼ bʌ mi lac ñumen qʼuel ti ñuc muʼ bʌ i yʌqʼueñonla ili ora, tajol cheʼʌch mi caj lac mel jaʼel ti talto bʌ qʼuin.

19. ¿Bajcheʼ miʼ mejlel a tsictesan jiñi ñuc tac bʌ i cʼʌjñibal ti ili estudio?

¹⁹ Weñʌch pejtelel bajcheʼ miʼ mel i yeʼtel Jehová. I joñonla yomʌch mi lac ñop jiñi. Cheʼ jaʼel, yom mi lac ñop jaʼel tiʼ tojlel jiñi waʼchocobiloʼ bʌ i chaʼan chaʼan miʼ subeñonla chuqui yom miʼ mejlel. Laʼ lac chʌn cʼajtesan tsaʼ bʌ i yʌlʌ Jehová tiʼ coltaya jiñi xʼaltʼan Isaías: «Ñopox c tʼan. Cheʼ jini ñʌchʼʌl mi caj a wajñel. Mi caj a taj a pʼʌtʌlel yicʼot i xucʼtilel a pusicʼal» (Is. 30:15).