TI WAJALI cheʼ bʌ an majqui miʼ ñujpuñel, jiñi noviojʌl yom miʼ yʌqʼuen i majtan i familia jiñi xchʼoc. Miʼ mejlel i yʌqʼuen chuqui tac lets bʌ i tojol, añimal tac o taqʼuin. An i tajol, miʼ chaʼleñob eʼtel (troñel) jaʼel cheʼ bajcheʼ tsiʼ mele (chaʼle) Jacob cheʼ bʌ muʼto caj i ñujpuñel yicʼot Raquel. Tiʼ sube i suegro chaʼan mi caj i chaʼlen eʼtel 7 jab chaʼan miʼ mejlel i pʌy (Gn. 29:17, 18, 20). ¿Chucoch ñʌmʌl i melob iliyi?

Carol Meyers, juntiquil especialista chaʼan muʼ bʌ i yʌl jiñi Biblia, miʼ yʌl: «Jiñi muʼ tac bʌ i yʌjqʼuel jumpʼejlʌch majtañʌl muʼ bʌ i yʌqʼuentel i familia jiñi xchʼoc tiʼ caj jiñi eʼtel tac muʼ bʌ caj i cʌy i mel. Ili ñumen ñucto i cʼʌjñibal tiʼ tojlel jiñi familia tac muʼ bʌ i chaʼleñob eʼtel tiʼ lum». Miʼ yʌjqʼuel jaʼel chaʼan ñumen temel miʼ yajñel jiñi chaʼpʼejl familia. I cheʼ bʌ an wocol tac miʼ mejlel i laja coltañob i bʌ. Cheʼ jaʼel, jiñi majtañʌl miʼ pʌs chaʼan juntiquil xʼixic muqʼuix caj i ñujpuñel yicʼot chaʼan mach jiñix i papá mi caj i cʌntan, jiñix i ñoxiʼal.

Cheʼ miʼ yʌjqʼuel majtañʌl tac chaʼan jiñi xʼixic mach yomic i yʌl chaʼan miʼ mejlel ti mʌjñel o ti chojñel bajcheʼ chubʌ tac jach an. Jiñi libro Instituciones del Antiguo Testamento miʼ yʌl: «Cheʼ jiñi i familia jiñi xchʼoc yom miʼ yʌqʼuentel taqʼuin o yan tac bʌ, miʼ mejlel i yʌcʼ ti ñaʼtʌntel chaʼan jiñi wiñic woli (choncol) i mʌn jiñi i yijñam. Pero [...] cheʼ bʌ miʼ mejlel iliyi mach yomic i yʌl chaʼan woli (yʌquel) i mʌjñel jiñi xʼixic, woli jach i yʌqʼuentel i majtan jiñi i familia». *

Ili ora, an país tac baqui ñʌmʌlto i melob iliyi. Mi jiñi tatʌlob xñoptʼañoʼ bʌ mach ñumeñic ti pʼis chuqui miʼ cʼajtiñob, mi caj i pʌsob chaʼan mach tsʌtsic miʼ melob i bʌ (Filip. 4:5; 1 Cor. 10:32, 33). Cheʼ bajcheʼ jiñi, mi caj i pʌsob chaʼan maʼañic miʼ «cʼuxbiñob taqʼuin» (2 Tim. 3:2). Cheʼ jaʼel, mi mach cʌlʌxic chuqui miʼ cʼajtintel, jiñi novio maʼañic mi caj i yʌl chaʼan wiʼilto miʼ ñujpuñel jinto miʼ tempan jiñi woli bʌ i cʼajtibentel. I mi precursor jiñi novio, maʼañic mi caj i cʌy i mel i yeʼtel bajcheʼ precursor chaʼan miʼ chaʼlen eʼtel chaʼan miʼ taj jiñi taqʼuin.

An país tac baqui an mandar tac muʼ bʌ i yʌl bajcheʼ cʼamel yom miʼ yʌjqʼuel jiñi majtañʌl. Jiñi tatʌlob xñoptʼañoʼ bʌ mucʼʌch i jacʼob ili mandar tac. Miʼ melob iliyi come Dios yom chaʼan jiñi xñoptʼañonbʌla mi lac «chuc laʼ bʌ tiʼ tojlel jiñi añoʼ bʌ i yeʼtel» yicʼot chaʼan mi lac jacʼ jiñi mandar tac maʼañic bʌ miʼ ñusan ti pʼis jiñi albil bʌ i chaʼan Dios (Rom. 13:1; Hech. 5:29).