1, 2. a) Cheʼ bajcheʼ miʼ yʌl i mandar Jesús ti Mateo 28:18-20, ¿chuqui ñuc bʌ eʼtel an i chaʼan jiñi xñoptʼañob? b) ¿Baqui bʌ cʼajtiya tac mi caj lac jacʼ ti ili temaj?

JIÑI apóstolob wen tijicñayob cheʼ bʌ tsiʼ tempayob i bʌ ti jumpʼejl wits. Jesús, cheʼ bʌ tsaʼ chaʼ tejchi, tiʼ subeyob chaʼan yaʼʌch mi caj i tajob i bʌ (Mt. 28:16). Tajol ti jiñi bʌ qʼuin jiñʌch cheʼ «tsaʼ tsictiyi tiʼ wut ñumen ti joʼcʼal i chaʼbajcʼ hermanojob cheʼ temel añob» (1 Co. 15:6). ¿Chucoch tsiʼ chajpa Jesús ili tempa bʌ? Chaʼan miʼ yʌqʼuen jiñi xcʌntʼañob i chaʼan ili ñuc bʌ eʼtel: «Cucula cheʼ jini. Sutqʼuiñob ti xcʌntʼañob winicob xʼixicob ti pejtelel pañimil» (pejcan Mateo 28:18-20).

² Jiñi tsaʼ bʌ i yubiyob i tʼan Jesús jiñʌch tsaʼ bʌ wiʼil ochiyob ti jiñi congregación ti ñaxam bʌ siglo. Jiñi ñuc bʌ i yeʼtelob jiñʌch cheʼ miʼ sujtesañob ti xcʌntʼan i chaʼan Cristo jiñi yambʌlob. * Ti ili ora, an cabʌl i sujm bʌ xñoptʼañob ti congregación tac tiʼ pejtelel Pañimil. I woli (choncol) i bej melob jiñi eʼtel. Ti ili temaj, mi caj lac jacʼ ili chʌmpʼejl cʼajtiya: ¿Chucoch ñuc i cʼʌjñibal cheʼ mi lac sutqʼuiñob ti xcʌntʼan yambʌlob? ¿Chuqui yom mi lac mel? ¿Muʼ ba lac chaʼlen coltaya pejtelel jiñi xñoptʼañonbʌla  chaʼan miʼ tsʼʌctesʌntel jiñi eʼtel? I ¿chucoch yom la cujil pijt chaʼan mi lac mel?

3. Cheʼ bajcheʼ miʼ yʌl Juan 14:6 yicʼot 17:3, ¿chucoch ñuc i cʼʌjñibal cheʼ mi lac sutqʼuiñob ti xcʌntʼan yambʌlob?

³ ¿Chucoch ñuc i cʼʌjñibal cheʼ mi lac sutqʼuin ti xcʌntʼan yambʌlob? Come cojach jiñi muʼ bʌ i tsajcañob Cristo miʼ mejlel i sujtelob tiʼ yamigo Dios. Cheʼ jaʼel, ñumen wen bajcheʼ miʼ chumtʌlob ili ora i miʼ pijtañob i taj jiñi cuxtʌlel maʼañic bʌ i jilibal cheʼ ti talto bʌ qʼuin (pejcan Juan 14:6; 17:3). I sujmʌch chaʼan Jesús an i yʌqʼueyonla jiñi ñuc bʌ eʼtel, pero mach lac bajñel jach. Jiñi apóstol Pablo tsiʼ yʌlʌ chaʼan yicʼot yambʌ xñoptʼañob ‹xʼeʼtelob› yicʼot Dios (1 Co. 3:9). Tiʼ sujm, Jehová yicʼot Cristo an i yʌqʼueyonla jumpʼejl ñuc bʌ eʼtel anquese xmulilonla.

4. ¿Chuqui mi laj cʌn chaʼan tsaʼ bʌ ujti tiʼ tojlel Iván yicʼot Matilde?

⁴ Cheʼ mi lac sutqʼuin ti xcʌntʼan yambʌlob miʼ mejlel i yʌqʼueñonla lac tijicñʌyel. La laj qʼuel tsaʼ bʌ ujti tiʼ tojlel Ivan yicʼot Matilde, jumpʼejl xñujpuñel chʼoyol bʌ ti Colombia. Tiʼ subeyob wen tʼan juntiquil xcolel i cʼabaʼ Davier, tsaʼ bʌ i yʌlʌ: «Comʌch j qʼuextan j cuxtʌlel, pero mach mejlicon mi cubin». Davier jiñʌch wen yujil bʌ box, muʼ bʌ i wen cʼʌn droga tac yicʼot miʼ wen jap lembal. Cheʼ jaʼel, chumul yicʼot jiñi i novia, i cʼabaʼ Érika. Iván miʼ yʌl: «Tsaʼ c teche lon c julaʼtan. Come ñajt baqui chʼoyol, mi lon c xʌn cabʌl ora ti bicicleta i ti jiñi bij cabʌl ocʼol. Cheʼ bʌ Érika tsaʼ caji i qʼuel bajcheʼ woli (yʌquel) i qʼuextan i cuxtʌlel jiñi Davier, tsaʼ caji i tech i chʼʌm estudio jeʼel». Ti wiʼil, ili xcolel tsiʼ cʌyʌ jiñi droga tac, jap lembal yicʼot jiñi box. Tsaʼ ñujpuñi yicʼot i novia jaʼel. Matilde miʼ yʌl: «Cheʼ bʌ Érika yicʼot Davier tsiʼ chʼʌmʌyob jaʼ ti 2016, tsaʼ cʼajtesa lon tsaʼ bʌ i yʌlʌ: ‹Comʌch j qʼuextan j cuxtʌlel, pero mach mejlicon mi cubin›. Tsaʼ cajiyon lon ti uqʼuel. Tiʼ sujm, mi lac taj cabʌl lac tijicñʌyel cheʼ bʌ an majqui mi laj coltan i sujtel ti xcʌntʼan i chaʼan Cristo».

5. ¿Chuqui ñaxan yom miʼ mejlel chaʼan mi lac sutqʼuin ti xcʌntʼan yambʌlob?

⁵ Jiñi ñaxam bʌ yom mi lac mel (chaʼlen) jiñʌch cheʼ mi lac sʌclan wiñicob xʼixicob (quixtañujob) yomoʼ bʌ i cʌn Jehová (Mt. 10:11). Cheʼ mi lac chaʼlen wersa lac subeñob jiñi wen tʼan jiñi quixtañujob yicʼot cheʼ mi lac jacʼ jiñi i mandar Cristo chaʼan mi lac chaʼlen subtʼan, mi lac pʌs chaʼan i sujm bʌ xñoptʼañonla.

6. ¿Chuqui miʼ mejlel lac mel chaʼan jiñi quixtañujob miʼ ñʌchʼtañoñobla?

⁶ An quixtañujob yomoʼ bʌ i cʌn jiñi i sujmlel am bʌ ti Biblia. Pero an mach bʌ i wentajob ti ñaxan, i tajol an chuqui mi caj lac mel chaʼan miʼ mulañob. Chaʼan jiñi quixtañujob miʼ ñʌchʼtañoñobla, yom mi lac wen ñaʼtan chuqui mi caj la cʌl. Yom mi lac sʌclan temaj tac muʼ bʌ mejlel i mulañob yicʼot lac wen ñaʼtan bajcheʼ mi caj lac tsictesʌbeñob.

7. a) ¿Bajcheʼ miʼ mejlel lac tech tʼan yicʼotob? b) ¿Chucoch maʼ ñaʼtan chaʼan ñucʼ i cʼʌjñibal cheʼ mi lac ñʌchʼtañob i mi lac pʌs chaʼan mi laj qʼuelob ti ñuc?

⁷ Jumpʼejl ejemplo, miʼ mejlel la cʌl: «Mic mulan c ñaʼtan bajcheʼ yilal maʼ qʼuel ili temaj. Ili ora, miʼ tajonla cabʌl wocol tac. ¿Muʼ baʼ ñaʼtan chaʼan yomʌch jumpʼejl yumʌntel tiʼ pejtelel pañimil (mulawil) chaʼan miʼ tojʼesan?». Ti wiʼil, miʼ mejlel lac pejcan yicʼot la cʌl muʼ bʌ i yʌl Daniel 2:44. O tajol miʼ mejlel la cʌl: «Mic mulan c melbeñet jumpʼejl cʼajtiya. ¿Chuqui ñuc i cʼʌjñibal maʼ ñaʼtan chaʼan jiñi a walobilob cʌntesʌbilob miʼ yajñel?». Cheʼ jiñi, miʼ mejlel lac tsajin Deuteronomio 6:6, 7.  Mach yʌlʌyic baqui bʌ temaj mi lac yajcan, laʼ lac ñaʼtan jiñi quixtañujob muʼ bʌ caj lac pejcañob. Laʼ lac ñaʼtan bajcheʼ mi caj i coltañob cheʼ miʼ cʌñob chuqui miʼ cʌntesan jiñi Biblia. Cheʼ mi lac pejcañob, ñuc i cʼʌjñibal cheʼ mi lac ñʌchʼtañob i mi laj qʼuel ti ñuc chuqui miʼ yʌlob. Cheʼ bajcheʼ iliyi, mi caj lac chʼʌmbeñob i sujm i tajol mi caj i ñumen mulañob i ñʌchʼtañoñobla.

8. ¿Chucoch mach yom mi lac lujbʼan lac mel revisita tac?

⁸ Chaʼan juntiquil quixtañu miʼ tech i mulan jumpʼejl estudio, tajol yom mi la cʌqʼuen i yorajlel i mi lac chaʼlen wersa chaʼan mach junyajl jach mi lac julaʼtan. ¿Chucoch? Come tajol mach yaʼic an tiʼ yotot cheʼ mi laj cʼotel o maʼañic i yorajlel i chaʼan. Cheʼ jaʼel, tajol mach junyajl jach mi caj lac julaʼtan chaʼan wen miʼ yubin i bʌ la quicʼot i mi jacʼ i chʼʌm jumpʼejl estudio. Yom cʼajal lac chaʼan chaʼan jumpʼejl ñichteʼ mi caj i colel cheʼ mi lac chʌcʌ mul ti jaʼ. Lajal jaʼel, mi caj i colel i cʼuxbiya juntiquil quixtañu tiʼ tojlel Jehová yicʼot Cristo mi mucʼʌch lac bej suben jiñi i Tʼan Dios.

9, 10. ¿Chucoch mi la cʌl chaʼan pejtelel jiñi xsubtʼañonbʌla mi la cʌcʼ laj coltaya chaʼan mi lac taj jiñi utsoʼ bʌ?

⁹ Pejtelel jiñi xñoptʼañonbʌla mi lac chaʼlen coltaya chaʼan miʼ tajtʌl jiñi utsoʼ bʌ i pusicʼal. Jiñi la queʼtel miʼ lajintel bajcheʼ i sʌclʌntel juntiquil alob tsaʼ bʌ i sʌtʌ i bʌ. ¿Bajcheʼ? Ñaʼtancu ili tsaʼ bʌ ujti. Chaʼan miʼ sʌclʌntel juntiquil alob, an jaxto bʌ uxpʼejl i jabilel, tsiʼ chaʼleyob coltaya cheʼ bʌ 500 lac piʼʌlob. Cheʼ bʌ ñumeñix 20 ora i sʌtʌ i bʌ, tsaʼ tajle. Juntiquil woli bʌ ti coltaya tsiʼ taja ti jumpʼejl cholelʌl. Pero maʼañic tsiʼ mulaj i yʌl chaʼan jiñʌch tsiʼ bajñel taja, jin chaʼan tsiʼ yʌlʌ: «Tsaʼ c taja lon come juntemel tsaʼ c chaʼle lon wersa chaʼan mi lon c sʌclan».

 ¹⁰ Cabʌl quixtañu miʼ yubiñob i bʌ bajcheʼ jiñi alob tsaʼ bʌ i sʌtʌ i bʌ. Maʼañobic i pijtaya, pero yomob coltʌntel (Ef. 2:12). Ñumen ti 8 millón i testigojob Jehová choncol lac sʌclan jiñi quixtañujob. Tajol maʼañic mi caj la taj juntiquil quixtañu yom bʌ i chʼʌm jumpʼejl estudio loqʼuem bʌ ti Biblia, pero yambʌ hermanojob mucʼoʼ bʌ ti subtʼan ti lac territorio jaʼel mucʼʌch. Cheʼ bʌ juntiquil hermano miʼ taj juntiquil quixtañu muʼ bʌ i cʼotel ti sujtel ti xcʌntʼan i chaʼan Cristo, jiñʌch muʼ bʌ i yʌqʼueñonla lac tijicñʌyel.

11. Anquese maʼañic mi la cʌcʼ jumpʼejl estudio, ¿bajcheʼ miʼ mejlel lac chaʼlen coltaya chaʼan mi lac sutqʼuin ti xcʌntʼan yambʌlob?

¹¹ Anquese wʌle maʼañic mi la cʌcʼ jumpʼejl estudio, miʼ mejlel lac chaʼlen coltaya chaʼan mi lac sutqʼuin ti xcʌntʼan yambʌlob. Jumpʼejl ejemplo, cheʼ an majqui cojaxto miʼ tilel tiʼ Yotlel Tempa bʌ, miʼ mejlel lac suben chaʼan weñʌch cheʼ tsaʼ tili chaʼan wen miʼ yubin i bʌ. Cheʼ bajcheʼ iliyi, mi laj coltan i ñop chaʼan jiñi laj cʼuxbiya miʼ yʌcʼonla ti cʌñol bajcheʼ i sujm bʌ xñoptʼañonla (Jn. 13:34, 35). Cheʼ jaʼel, jiñi comentario tac mach bʌ wen tamic muʼ bʌ la cʌcʼ ti tempa bʌ, miʼ pʌs chaʼan mi laj qʼuel ti ñuc bajcheʼ miʼ yubiñob i bʌ yambʌlob cheʼ ti lac pusicʼal mi la cʌl yicʼot ti wen jach bʌ tʼan. Ili jiñʌch wem bʌ ejemplo chaʼan jiñi tsijiʼobto bʌ. Yicʼot jaʼel, miʼ mejlel lac loqʼuel ti subtʼan la quicʼot juntiquil xsubtʼan tsijibto bʌ i mi laj coltan chaʼan miʼ cʼʌn ti wen jiñi Biblia cheʼ miʼ cʌntesan jiñi quixtañujob. Cheʼ mi lac mel iliyi, mi laj cʌntesan i lajin Cristo (Lc. 10:25-28).

12. ¿Chucoch mach cʼʌñʌlic chaʼan cabʌl chuqui wen la cujil chaʼan mi lac sutqʼuin ti xcʌntʼan juntiquil quixtañu? Alʌ jumpʼejl ejemplo.

¹² Mach yomic mi lac ñaʼtan chaʼan cabʌl chuqui wen la cujil chaʼan mi laj cʌntesan juntiquil quixtañu chaʼan miʼ sujtel ti xcʌntʼan i chaʼan Jesús. Jiñi i ejemplo Faustina, chumul bʌ ti Bolivia, miʼ coltañonla lac ñaʼtan chucoch. Cheʼ bʌ tsiʼ cʌñʌ jiñi i testigojob Jehová, mach yujilic i pejcʌntel jun, pero tsaʼix i tsʼitaʼ cʌñʌ. Ili ora chʼʌmʌlix i chaʼan jaʼ, i miʼ wen mulan i cʌntesan yambʌlob i chaʼan bʌ Biblia. Choncol i yʌqʼuen estudio chʌntiquil quixtañujob ti jujumpʼejl semana. Anquese Faustina mach wen yujilic i pejcʌntel jun bajcheʼ jiñi muʼ bʌ i yʌqʼueñob estudio, an coltʌbil i chaʼan wʌctiquil quixtañujob chaʼan miʼ cʼotel i chʼʌmob jaʼ (Lc. 10:21).

13. Anquese cabʌl chuqui mi lac mel, ¿chuqui ti bendición miʼ mejlel lac taj cheʼ mi lac mel jiñi eʼtel chaʼan mi lac sujtesan ti xcʌntʼan jiñi yambʌlob?

¹³ Yonlel xñoptʼañob cabʌl i yeʼtelob, jin chaʼan mach jocholobic. Pero mucʼʌch i yʌqʼueñob i yorajlel chaʼan miʼ yʌcʼob estudio, muʼ bʌ i yʌqʼueñob cabʌl tijicñʌyel. Laʼ laj qʼuel tiʼ tojlel Melanie. Juntiquil ñaʼʌl i bajñel bʌ yicʼot i yixicʼal am bʌ 8 i jabilel. Cheʼ jaʼel, miʼ chaʼlen eʼtel joʼpʼejl qʼuin ti jujumpʼejl semana  i miʼ cʌntan i tat am bʌ i chaʼan cáncer. Chumul ti jumpʼejl tejclum ñajt bʌ an ti Alaska, baqui cojach bajcheʼ i testigo Jehová. Mach ti junyajlel jach tsiʼ cʼajtibe Dios chaʼan miʼ yʌqʼuen i pʼʌtʌlel chaʼan miʼ loqʼuel ti subtʼan anquese an tsʌñal, come yom i taj juntiquil quixtañu mejl bʌ i yʌqʼuen estudio chaʼan bʌ Biblia. Ti wiʼil, tsiʼ cʌñʌ jiñi Sara, toj sajtel bʌ i pusicʼal cheʼ bʌ tsiʼ yubi chaʼan Dios an i cʼabaʼ. Cheʼ ñumeñix ora, jiñi xʼixic tsiʼ jacʼʌ i chʼʌm jumpʼejl estudio. Melanie miʼ tsictesan: «Ti jujumpʼejl viernes cheʼ ti ochʼajel qʼuin mic wen lujbʼan. Pero quicʼot quixicʼal miʼ majlel lon cʌqʼuen estudio jiñi Sara, jiñʌch muʼ bʌ i yʌqʼueñon lon c taj c wenlel. Tsaʼ lon c wen mulaj lojon sʌclʌben i jacʼbal jiñi i cʼajtiya tac Sara, i tsiʼ yʌqʼueyon lon cabʌl tijicñʌyel cheʼ tsaʼ sujti tiʼ yamiga Jehová». Sara tsiʼ pʌsʌ i chʼejlel cheʼ bʌ tsiʼ ñusa contrajintel, tsiʼ cʌyʌ jiñi iglesia i tsiʼ chʼʌmʌ jaʼ.

14. a) ¿Bajcheʼ lajal i sutqʼuintel ti xcʌntʼan yambʌlob bajcheʼ jiñi chuc chʌy? b) ¿Chuqui miʼ ñijcañonla lac mel jiñi i tʼan Pablo am bʌ ti 2 Timoteo 4:1, 2?

¹⁴ Anquese maxto añic lac taja juntiquil yom bʌ sujtel ti xcʌntʼan, mach laj cʌy lac sʌclan. Laʼ laj cʼajtesan chaʼan Jesús tsiʼ laji ili eʼtel bajcheʼ jiñi chuc chʌy. Jiñi xchuc chʌyob cabʌl ora miʼ mejlel i ñusañob ti ili eʼtel i tajol maʼañic miʼ chucob mi juncojtic. Ti bele ora miʼ chaʼleñob eʼtel cheʼ ti acʼʌlel o cheʼ icʼanto, i an i tajol ñajt miʼ xʌñob tiʼ sʌclʌntel (Lc. 5:5). Lajal jaʼel, an Testigojob muʼ bʌ i ñusañob cabʌl ora yicʼotob i pijt ti subtʼan ti baqui jach. Miʼ melob iliyi chaʼan miʼ mejlel i ñumen tajob quixtañujob. Jiñi muʼ bʌ i chaʼleñob wersa i melob iliyi miʼ cʼotel i pejcañob jiñi quixtañujob  yomoʼ bʌ i cʌn jiñi wen tʼan. ¿Mejl ba lac chaʼlen subtʼan cheʼ baʼ ora o baqui jach miʼ mejlel lac taj jiñi quixtañujob? (Pejcan 2 Timoteo 4:1, 2).

15. ¿Chucoch yom an lac pijt cheʼ mi la cʌcʼ estudio?

¹⁵ ¿Chucoch yom an lac pijt cheʼ mi la cʌcʼ estudio? Junchajp, come mach cojach mi caj laj coltan jiñi quixtañu i cʌn yicʼot i cʼuxbin jiñi cʌntesa tac am bʌ ti Biblia. Cheʼ jaʼel, yom mi laj coltan i cʌn yicʼot i cʼuxbin jiñi Jehová, jiñi tsaʼ bʌ i yʌcʼʌ ti tsʼijbuntel. Mach cojach mi caj laj cʌntesan chuqui miʼ cʼajtin Jesús tiʼ tojlel xcʌntʼañob i chaʼan, yom mi laj coltan i ñaʼtan bajcheʼ miʼ mejlel i sujtel tiʼ sujm bʌ xñoptʼan. Yom mi lac chʌn coltan cheʼ bʌ woliʼ ñop i cʼʌn tiʼ cuxtʌlel jiñi principio tac. An quixtañujob muʼ bʌ i qʼuextañob ti ora jiñi i pensar yicʼot i melbal, pero an yambʌlob muʼto bʌ i wen jalʼañob.

16. ¿Chuqui mi laj cʌn tiʼ tojlel Raúl?

¹⁶ Jiñi tsaʼ bʌ ujti tiʼ tojlel juntiquil misionero ti Perú miʼ pʌs chucoch añʌch i wenlel cheʼ an lac pijt. Tsiʼ yʌlʌ: «Juntiquil muʼ bʌ cʌqʼuen estudio i cʼabaʼ Raúl, qʼuelbilix i chaʼan chaʼpʼejl libro. Pero wocolto miʼ yubin chaʼan miʼ pʌs tiʼ cuxtʌlel woli bʌ i cʌn ti Biblia. Mach weñic an i ñujpuñel, miʼ chaʼlen tsucul tʼan i jiñi i yalobilob wocol miʼ yubiñob chaʼan miʼ qʼuelob ti ñuc. Pero, come ti bele ora miʼ yajñel ti tempa bʌ, maʼañic tsaʼ j cʌyʌ c julaʼtan yicʼot i familia. Cheʼ bʌ añix uxpʼejl jab j cʌñʌ, tiʼ tsʼʌctesa muʼ bʌ i cʼajtintel chaʼan miʼ chaʼlen chʼʌm jaʼ».

17. ¿Chuqui mi caj lac tsajin ti yambʌ temaj?

¹⁷ Jesús tsiʼ yʌlʌ chaʼan yom mi lac «sutqʼuiñob ti xcʌntʼañob winicob xʼixicob tiʼ pejtelel pañimil». Chaʼan mi lac jacʼ ili mandar, ti bele ora yom mi lac pejcan jiñi quixtañujob qʼuexel bʌ i pensar bajcheʼ joñonla, yicʼot jaʼel jiñi mach bʌ añobic i ñopoñel o muʼ bʌ i ñopob chaʼan maʼañic Dios. Ti yambʌ temaj, mi caj lac tsajin bajcheʼ miʼ mejlel lac subeñob jiñi wen tʼan chaʼan i Yumʌntel Dios.